ញូយ៉ក ៖ ដុំថ្មទម្ងន់ 54 ផោន (25 គីឡូក្រាម) ដែលជាបំណែកដ៏ធំបំផុតមួយនៃភពអង្គារបានធ្លាក់មកលើភពផែនដី ត្រូវបានគេដាក់ដេញថ្លៃនៅទីក្រុងញូយ៉ក ក្នុងតម្លៃចាប់ពី២លាន ទៅ៤លានដុល្លារអាមេរិក។ នេះបើយោងតាមការចុះផ្សាយរបស់សារព័ត៌មាន ABC News របស់សហរដ្ឋអាមេរិក។

កាលពីថ្ងៃចន្ទ ទី១៣ កក្កដា សារព័ត៌មានមួយនេះបានឲ្យដឹងថា នៅសាលដេញថ្លៃ Sotheby’s ក្នុងទីក្រុងញូវយ៉ក បានដាក់លក់ដេញថ្លៃនូវអ្វីដែលគេស្គាល់ថា NWA 16788 ដែលជាផ្នែកមួយនៃការលក់វត្ថុបែបប្រវត្តិសាស្ត្រធម្មជាតិ និងគ្រោងឆ្អឹងដាយណូស័រ Ceratosaurus វ័យក្មេងដែលមានកម្ពស់ជាង 6 ហ្វីត (2 ម៉ែត្រ) និងជិត 11 ហ្វីត (3 ម៉ែត្រ) ផងដែរ។

Sotheby’s និយាយថា៖ ថ្មអាចម៍ផ្កាយនេះត្រូវបានគេជឿថា បានហោះចេញពីផ្ទៃនៃភពព្រះអង្គារ បន្ទាប់ពីមានការវា.យប្រហារដោយអាចម៍ផ្កាយដ៏ធំមួយផ្សេងទៀតនៅក្នុងលំហ មុនពេលថ្មភពអង្គារនេះធ្វើដំណើរចម្ងាយ 225 លានគីឡូម៉ែត្រមកកាន់ផែនដី ធ្លាក់ចូលទៅក្នុងតំបន់សាហារ៉ា ប្រទេស Niger ក្នុងខែវិច្ឆិកា ឆ្នាំ 2023 និងត្រូវបានរកឃើញដោយអ្នកអង្កេតអាចម៍ផ្កាយម្នាក់។

មូលហេតុដែលថ្មអាចម៍ផ្កាយមួយដុំនេះ អាចដាក់ដេញថ្លៃបានក្នុងតម្លៃដ៏ថ្លៃបែបនេះ គឺដោយសារតែកត្តាធំៗចំនួន ៥ រួមមាន៖ ១. វាជាបំណែកនៃអង្គធាតុក្រៅភពដែលកម្របំផុត។ ២. វាជាបំណែកនៃអង្គធាតុក្រៅភពធំបំផុតដែលត្រូវបានរកឃើញ។ ៣. វាផ្ដល់ផលប្រយោជន៍ខ្ពស់សម្រាប់ការសិក្សាផ្នែកវិទ្យាសាស្រ្ត និងការវិវត្តន៍នៃធាតុអាកាសនៅក្នុងលំហ។ ៤. ទីផ្សាប្រកួតប្រជែងរបស់មហាសេដ្ឋីដែលចូលចិត្តប្រមូលទិញវត្ថុកម្រ។ ៥. ឥទ្ធិពលនៃ Sotheby’s ដែលជាសាលដេញថ្លៃវត្ថុដ៏ល្បីល្បាញបំផុតនៅលើពិភពលោក។

គួរឲ្យដឹងថា ថ្មភពអង្គារមួយដុំនេះ គឺជាប្រភេទថ្មភ្នំភ្លើងដ៏កម្រដែលគេស្គាល់ថាជា olivine-microgabbroic shergottite មានប្រហែល 400 ដុំប៉ុណ្ណោះដែលត្រូវបានរកឃើញនៅលើផែនដី ប៉ុន្តែមានតែមួយដុំនេះគត់ ដែលអាចយកជាគំរូបាន ព្រោះវាមានប្រហែល 7% នៃវត្ថុធាតុភពអង្គារទាំងអស់ដែលគេបានស្គាល់។ ជាងនេះទៅទៀត វាក៏បានផ្ដល់នូវការយល់ដឹងបន្ថែមទៀតសម្រាប់មនុស្សលើភពផែនដី អំពីសណ្ឋានដី និងវដ្តជីវិតដែលអាចចាប់ផ្ដើមកើតមាននៅភពអង្គារផងដែរ។

ការដេញថ្លៃនេះគឺជាផ្នែកមួយនៃព្រឹត្តិការណ៍ “Geek Week” ប្រចាំឆ្នាំរបស់ Sotheby ដែលនឹងចាប់ផ្តើមនៅថ្ងៃទី 16 ខែកក្កដា ដោយមានអ្នកចូលរួមមកពីជុំវិញពិភពលោកយ៉ាងអធិកអធម។ ទោះជាយ៉ាងណា មិនថាចុងបញ្ចប់វាត្រូវបានគេដេញថ្លៃយកទៅធ្វើជាកម្មសិទ្ធិឯកជន ឬតាំងនៅសារមន្ទីរនោះទេ ប៉ុន្តែ «ថ្មភពអង្គារ» មួយនេះ គឺជាការរំលឹកថាផែនដីមិនមែនជាភពតែមួយគត់ក្នុងលំហនោះទេ៕

ប្រទេសថៃ ៖ កាលពីថ្ងៃទី១៥ ខែកក្កដា ឆ្នាំ២០២៥ លោក និធី ស៊ីព្រែ នាយករងវិទ្យាស្ថានទំនាក់ទំនងទីផ្សារវិស័យទេសចរណ៍ថៃ បាននិយាយក្នុងសិក្ខាសាលាស្តីពី «Decode 2025: The Mid-Year Signal សញ្ញាសេដ្ឋកិច្ចពិភពលោក ការផ្លាស់ប្តូរអនាគតសេដ្ឋកិច្ចថៃ» ថា វិស័យទេសចរណ៍គឺជាក្តីសង្ឃឹមមួយដើម្បីជំរុញសេដ្ឋកិច្ចថៃ ប៉ុន្តែរយៈពេលចុងក្រោយនេះ វិស័យទេសចរណ៍ថៃធ្លាក់ចុះដោយសារជំងឺរាតត្បាត និងវិបត្តិផ្សេងៗ ។ វិទ្យាស្ថានទំនាក់ទំនងទីផ្សារវិស័យទេសចរណ៍ និងស្ថាប័នពាក់ព័ន្ធនឹងព្យាយាមជំរុញវិស័យទេសចរណ៍ឱ្យរួចផុតពីវិបត្តិ ។

នៅឆ្នាំ២០២៥ វិស័យទេសចរណ៍ថៃបានធ្លាក់ចុះដូចបណ្តាឆ្នាំមុនៗ ហើយបារម្ភថា ប្រទេសថៃអាចពុំមែនជាគោលដៅទេសចរណ៍ពេញនិយមសម្រាប់ភ្ញៀវទេសចរបរទេសទៀតទេ ។ ហេតុនេះ វិទ្យាស្ថានទំនាក់ទំនងទីផ្សារវិស័យទេសចរណ៍នឹងព្យាយាមធ្វើឱ្យប្រទេសថៃក្លាយជាមេដែកឆក់ទាក់ទាញភ្ញៀវទេសចរបរទេសដើម្បីប្រមូលប្រាក់ជួយសេដ្ឋកិច្ចបន្តទៀត ។

ឆ្នាំនេះ ពុំទាន់ប្រាកដចិត្តថា តើចំនួនភ្ញៀវទេសចរបរទេសនឹងមកកម្សាន្តនៅប្រទេសថៃតាមគោលដៅដែរឬទេ ពីព្រោះចំនួនភ្ញៀវទេសចរបច្ចុប្បន្ន ដែលគិតតាំងពីដើមឆ្នាំ២០២៥ ធ្លាក់ចុះ ៥% ទោះជាមានការងើបឡើងវិញក្តី បើធៀបនឹងឆ្នាំ២០១៩ មុនការឆ្លងជំងឺកូវីដ ។ ការធ្លាក់ចុះចំនួនភ្ញៀវទេសចរមួយផ្នែកដោយសារការធ្លាក់ចុះភ្ញៀវទេសចរចិន ប៉ុន្តែនៅចុងឆ្នាំនេះ អាចនឹងមានភ្ញៀវទេសចរបរទេសមកលេងថៃច្រើនជាងមុន ហើយប្រាក់ចំណូលពីវិស័យទេសចរណ៍ក៏កើនឡើងដូចគ្នា ។

យើងពុំផ្តោតសំខាន់លើភ្ញៀវទេសចរបរទេសតែម្យ៉ាងទេ ពីព្រោះភ្ញៀវទេសចរថៃក៏សំខាន់ដែរ ប៉ុន្តែប្រាក់ចំណូលពីភ្ញៀវទេសចរបរទេស និងភ្ញៀវទេសចរថៃខុសគ្នាច្រើន ។ ថៃទទួលបានចំណូលសរុបពីវិស័យទេសចរណ៍ ចំនួន៣លានលានបាត ក្នុងនោះចំណូលពីភ្ញៀវទេសចរបរទេស ស្មើ២លានលានបាត និងចំណូលពីភ្ញៀវទេសចរថៃ ស្មើ១លានលានបាត ។

យើងចាត់ទុកថា វិស័យទេសចរណ៍ថៃងើបឡើងឆាប់រហ័សជាងប្រទេសផ្សេងៗក្រោយជំងឺកូវីដ ប៉ុន្តែពេលប្រទេសផ្សេងៗប្រឹងប្រែងជំរុញវិស័យទេសចរណ៍យ៉ាងខ្លាំង ក្នុងនោះក៏មានចិនផងដែរដែលទាក់ទាញភ្ញៀវទេសចរបរទេស គឺធ្វើឱ្យបណ្តាប្រទេសលើពិភពលោកប្រកួតប្រជែងគ្នាខ្លាំងក្នុងការទាក់ទាញភ្ញៀវទេសចរ ។ បច្ចុប្បន្ន ភ្ញៀវទេសចរចាប់អារម្មណ៍លើទេសចរណ៍សុខភាពកាន់តែច្រើន និងយកចិត្តទុកដាក់ថែទាំសុខភាព ។

ដូច្នេះ ចាប់ពីពេលនេះ ថៃនឹងផ្តោតលើទេសចរណ៍ប្រភេទ Health and Wellness រួមទាំងទេសចរណ៍កីឡា ដោយរៀបចំការប្រកួតកីឡាធំៗដើម្បីទាក់ទាញភ្ញៀវទេសចរបន្ថែម ។ ក្រៅពីនេះ ថៃមានកន្លែងទាក់ទាញភ្ញៀវទេសចរថ្មី គឺទេសចរណ៍នៅតាមរោងភាពយន្ត និងការប្រគំតន្ត្រីលំដាប់ពិភពលោកដើម្បីជំរុញសេដ្ឋកិច្ចឱ្យរីកចម្រើនតាមរយៈដំណើរកម្សាន្តពេលយប់ ។ នេះបើតាមការលើកឡើងរបស់លោក និធី ស៊ីព្រែ នាយករងវិទ្យាស្ថានទំនាក់ទំនងទីផ្សារវិស័យទេសចរណ៍ ៕

ប្រទេសថៃ ៖ លោក ភូមិថាំ វីឆាយ៉ាឆៃ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ មានតួនាទីជានាយករដ្ឋមន្ត្រីថៃស្តីទីនិយាយថា រដ្ឋាភិបាលថៃពុំពេញចិត្តជាមួយកម្ពុជាយ៉ាងខ្លាំងរួចទៅហើយ ដូច្នេះ សូមកងទ័ព និងពលរដ្ឋថៃអត់ធ្មត់នឹងហេតុការណ៍កើតឡើងផ្សេងៗ ។ លោកប្រាប់កុំឱ្យពលរដ្ឋស្តាប់ពាក្យសម្តីរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ពីព្រោះសម្តេចគ្រាន់តែជាឪពុករបស់នាយករដ្ឋមន្ត្រីកម្ពុជា ។ នេះបើតាមការផ្សព្វផ្សាយរបស់សារព័ត៌មានថៃ The Reporters កាលពីថ្ងៃទី១៦ ខែកក្កដា ឆ្នាំ២០២៥ ។

នៅថ្ងៃទី១៦ ខែកក្កដា ក្នុងអាកាសយានដ្ឋានដងមឿង លោក ភូមិថាំ វីឆាយ៉ាឆៃ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ មានតួនាទីជានាយករដ្ឋមន្ត្រីថៃស្តីទី បាននិយាយពីហេតុការណ៍ចលាចលនៅប្រាសាទតាមាន់ធំ កាលពីថ្ងៃទី១៥ ខែកក្កដា ថា វាជារឿងពុំចង់ឱ្យកើតឡើង ហើយលោកចោទប្រកាន់ថា នេះជាការញុះញង់ ។ លោកព្យាយាមបញ្ជាឱ្យកងទ័ពថៃប្រុងប្រយ័ត្ន និងអត់ធ្មត់ឱ្យខ្លាំងដើម្បីការពារកុំឱ្យហេតុការណ៍កើតឡើងទៀត ។

លោកចោទប្រកាន់ថា កម្ពុជានឹងប្រើប្រាស់វិធីបែបនេះដើម្បីឱ្យមានការប៉ះទង្គិចគ្នា ឬកើតអំពើហិង្សា ហើយកងទ័ពថៃយល់ និងព្យាយាមធ្វើឱ្យល្អបំផុត ពុំប្រើប្រាស់កម្លាំងដោះស្រាយបញ្ហា ។ យើងមិនឱ្យគេចោទប្រកាន់ពីការប្រើប្រាស់ហិង្សាដើម្បីដណ្តើមទឹកដីកម្ពុជា រីឯប្រាសាទតាមាន់ធំ យើងមានវិធានការទប់ស្កាត់រួចហើយ គឺបើកតំបន់ខ្លះ បិទតំបន់ខ្លះ ត្រូវតែការពារតំបន់ ដែលតំបន់នេះស្ថិតក្រោមការទទួលខុសត្រូវរបស់លោក ប៊ុនស៊ីន ផាកក្លាង មេបញ្ជាការយោធភូមិភាគ២ ។

លោកបន្តថា ថៃបារម្ភពីការប៉ះទង្គិចឈានទៅប្រើប្រាស់អំពើហិង្សា ជាពិសេស ពលរដ្ឋថៃរស់នៅព្រំដែន និងកងទ័ព ។ រដ្ឋាភិបាលថៃពុំពេញជាមួយកម្ពុជាយ៉ាងខ្លាំងរួចទៅហើយ រីឯការទូតវិញ គឺរដ្ឋមន្ត្រីក្រសួងការបរទេសបានដំណើរការតាមដំណាក់កាល និងមានការពិចារណាកោះហៅឯកអគ្គរាជទូតថៃត្រឡប់មកវិញ ដែលជាវិធានការធ្ងន់ធ្ងរសម្រាប់ការទូត ។ ហេតុនេះ យើងកុំធ្លាក់ទៅក្នុងហ្គេមរបស់គេ និងកុំស្តាប់សម្តេចតេជោ ហ៊ុន សែន ខ្លាំងពេក ។

លោកថា សម្តេចតេជោ ហ៊ុន សែន ពុំមែនជាមេដឹកនាំផ្លូវការរបស់កម្ពុជាទេ សម្តេចពុំពាក់ព័ន្ធនឹងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។ ដូច្នេះ សម្តេចតេជោ ហ៊ុន សែន គ្រាន់តែជាមនុស្សម្នាក់កាន់តំណែងជាប្រធានព្រឹទ្ធសភា និងគ្មានអំណាចចរចា ។ ថៃប្រកាន់យកការចរចាគោរពតាមច្បាប់អន្តរជាតិ និងជជែកជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។

ខ្ញុំសូមឱ្យពលរដ្ឋថៃអត់ធ្មត់ យើងព្យាយាមដោះស្រាយបញ្ហានេះឱ្យល្អបំផុតដើម្បីកុំឱ្យប្រទេសថៃបាត់បង់ផលប្រយោជន៍ និងពុំបាត់បង់អធិបតេយ្យភាព យើងនឹងពុំយល់ព្រមទេ ទោះជាទំនាក់ទំនងរបស់អ្នកណាក៏ដោយ ។ ការចរចា ឬទាញយកផលប្រយោជន៍ គឺរដ្ឋាភិបាលថៃអាណត្តិនេះនឹងពុំផ្តល់ឱកាសឱ្យធ្វើបែបនេះ រួមទាំងចាត់វិធានការយ៉ាងពេញទំហឹង ប្រសិនបើមានហេតុការណ៍នេះកើតឡើងទៀត ។ នេះបើតាមការលើកឡើងរបស់លោក ភូមិថាំ វីឆាយ៉ាឆៃ នាយករដ្ឋមន្ត្រីថៃស្តីទី ។

នាយករដ្ឋមន្ត្រីស្តីទីរបស់ថៃចោទប្រកាន់ថា ហេតុការណ៍ចលាចលកើតឡើងនៅប្រាសាទតាមាន់ធំ កាលពីថ្ងៃទី១៥ ខែកក្កដា គឺជាការញុះញង់របស់កម្ពុជាចង់ឱ្យមានការប៉ះទង្គិច ហើយប្រាប់ឱ្យកងទ័ព និងពលរដ្ឋខ្លួនអត់ធ្មត់ ។ ប៉ុន្តែការពិត ហេតុការណ៍នេះកើតឡើងដោយសារកងទ័ពថៃហាមឃាត់ពលរដ្ឋខ្មែរមិនឱ្យឡើងប្រាសាទតាមាន់ធំ ដែលជាសម្បត្តិរបស់ខ្មែរ ប៉ុន្តែស្ត្រីខ្មែរតវ៉ាថា ប្រាសាទនេះជារបស់ខ្មែរ ទើបធ្វើឱ្យកងទ័ពថៃខឹង និងប្រមូលផ្តុំគ្នាឡើងប្រាសាទដើម្បីបណ្តេញពលរដ្ឋខ្មែរជាម្ចាស់ប្រាសាទ ៕

ប្រទេសថៃ ៖ សារព័ត៌មាន Thai TV Social រាយការណ៍នៅថ្ងៃទី១៦ ខែកក្កដា ឆ្នាំ២០២៥ ថា ស្ត្រីថៃឈ្មោះ ស៊ីកាកូស ដែលបានប្រមូលព្រះចៅអធិការវត្តល្បីៗ និងព្រះសង្ឃជាច្រើនអង្គធ្វើប្តី ត្រូវបានសមត្ថកិច្ចចាប់ខ្លួនក្នុងលំនៅឋាន ពីបទស្ត្រីរូបនេះជំរិតទារប្រាក់ពីព្រះចៅអធិការវត្ត ហើយផ្ទេរប្រាក់ទៅវែបសាយល្បែងអនឡាញជាច្រើនលើក ហើយក្នុង១លើក នាងផ្ទេរប្រាក់រហូតដល់៥សែនបាត ។ រីឯប្រាក់ទទួលបានពីព្រះសង្ឃ ចំនួន៣៨៥លានបាត ពេលនេះ នាងនៅសល់ប្រាក់ក្នុងគណនីធនាគារតែ៨ពាន់បាតប៉ុណ្ណោះ ។

កាលពីថ្ងៃទី១៥ ខែកក្កដា នៅនាយកដ្ឋានបង្ក្រាបបទល្មើសទីក្រុងបាងកក សមត្ថកិច្ចថៃបានរួមគ្នាធ្វើសន្និសីទសារព័ត៌មាន ស្តីពីការចាប់ខ្លួនស្ត្រីថៃដែលប្រមូលព្រះចៅអធិការវត្តល្បីៗ និងព្រះសង្ឃជាច្រើនអង្គធ្វើប្តី ។ ស្ត្រីឈ្មោះ ស៊ីកាកូស ឬឈ្មោះ វិឡាវ៉ាន់ ត្រូវបានសមត្ថកិច្ចចាប់ខ្លួនពីបទគាំទ្រឱ្យព្រះសង្ឃប្រព្រឹត្តល្មើស, ទទួលរបស់លួច និងលាងលុយកខ្វក់ ។ ក្រៅពីនេះ សមត្ថកិច្ចក៏បានចោទប្រកាន់អតីតព្រះចៅអធិការវត្ត «ឈូជិតថាំម៉ារ៉ាម» ព្រះនាម ស៊ុមផុង ធិតូសូ ពីបទប្រព្រឹត្តល្មើសតួនាទី ។

តាមការត្រួតពិនិត្យចំនួនប្រាក់រយៈពេល៣ឆ្នាំឃើញថា ស្ត្រីឈ្មោះ ស៊ីកាកូស មានប្រាក់ក្នុងគណនីធនាគារច្រើនរហូតដល់៣៨៥លានបាត ហើយនាងបានផ្ទេរប្រាក់ចូលក្នុងវែបសាយល្បែងអនឡាញជាញឹកញាប់ គឺការផ្ទេរប្រាក់១លើក ស្មើ៥សែនបាត ។ ពេលនេះ នាងនៅសល់ប្រាក់ក្នុងគណនីធនាគារតែ៨ពាន់បាតប៉ុណ្ណោះ ។

សមត្ថកិច្ចបានបែងចែកព្រះចៅអធិការវត្ត និងព្រះសង្ឃដែលមានទំនាក់ទំនងស្នេហាជាមួយស្ត្រីឈ្មោះ ស៊ីកាកូស ជា៣ក្រុម រួមមាន ៖

ក្រុមទី១-ព្រះសង្ឃដែលទទួលស្គាល់ថា បានរួមមេត្រីជាមួយ ស៊ីកាកូស ស្មើ៩អង្គ ក្នុងនោះព្រះសង្ឃ៨អង្គបានសឹក និងនៅសល់១អង្គ
ក្រុមទី២-ព្រះសង្ឃមានទំនាក់ទំនងស្នេហាជាមួយ ស៊ីកាកូស ប៉ុន្តែគ្មានភស្តុតាងបញ្ជាក់ពីការរួមមេត្រី និង
ក្រុមទី៣-ព្រះសង្ឃមានអាកប្បកិរយាមិនសមរម្យ ហើយសមត្ថកិច្ចកំពុងរាប់ចំនួន ។

ជាមួយគ្នានេះ មានជនរងគ្រោះចំនួន២នាក់ បានដាក់ពាក្យបណ្តឹងស្ត្រីឈ្មោះ ស៊ីកាកូស រួមមាន ៖

១-អតីតប្រធានការិយាល័យពុទ្ធសាសនាខេត្តពិជិត និយាយថា ត្រូវបាន ស៊ីកាកូស បោកបញ្ឆោតខ្ចីប្រាក់ចំនួន៤សែនបាត ហើយប្រាប់ថា ឈឺធ្ងន់ត្រូវវះកាត់ ប៉ុន្តែនាងពុំបានវះកាត់ឡើយ និង
២-អតីតព្រះគ្រូជំនួយព្រះចៅអធិការវត្តសូថន ត្រូវបាន ស៊ីកាកូស គំរាមលាតត្រដាងរឿងស្នេហា ប្រសិនបើពុំផ្ទេរឱ្យនាង ចំនួន៨ពាន់បាត ។

អគ្គលេខាធិការរងនៃការិយាល័យប្រឆាំងលាងលុយកខ្វក់ លោក កាក់ម៉ុនឡៈស៊ីត វង្សបុតណយ ឱ្យដឹងថា ទង្វើរបស់ស្ត្រីឈ្មោះ ស៊ីកាកូស និងព្រះសង្ឃជាច្រើនអង្គជាបទល្មើសលាងលុយកខ្វក់ ។ ការិយាល័យនឹងត្រួតពិនិត្យទ្រព្យសម្បត្តិទាំងអស់ បើរកឃើញថា បានមកពីការប្រព្រឹត្តល្មើសមូលដ្ឋាននឹងចាត់វិធានការរឹបអូសទ្រព្យសម្បតិភ្លាម ។

ស្ត្រីឈ្មោះ ស៊ីកាកូស ធ្លាប់និយាយថា នាងមានកូនជាមួយព្រះចៅអធិការវត្ត១អង្គ ហើយនាងបានទាមទារប្រាក់ពីសង្ឃថ្លៃចិញ្ចឹមនាងរយៈពេល២០ឆ្នាំ ចំនួន៧លាន២សែនបាត ។ ប៉ុន្តែពេលពុំទទួលបានប្រាក់តាមការទាមទារ នាងក៏គំរាមព្រះចៅអធិការវត្ត រហូតដល់មានការស៊ើបអង្កេត និងចាប់ខ្លួន ។

ពលរដ្ឋថៃបានគាំទ្រសមត្ថកិច្ចដែលចាប់ខ្លួនស្ត្រីឈ្មោះ ស៊ីកាកូស ប៉ុន្តែមានការសង្ស័យថា ហេតុអ្វី ស៊ីកាកូស ដែលសមត្ថកិច្ចចាប់ខ្លួនមានមុខមាត់ និងរូបរាងខុសគ្នាស្រឡះពីរូបថតដែលចែកចាយក្នុងបណ្តាញសង្គម ។ រូបថតក្នុងបណ្តាញសង្គម គឺនាងមានមុខមាត់ស្អាតបាត និងរាងសង្គម ប៉ុន្តែ ស៊ីកាកូស ដែលសមត្ថកិច្ចចាប់ខ្លួននេះមានមុខមាត់ និងរូបរាងខុសគ្នាស្រឡះ ។

គួរបញ្ជាក់ថា ព្រះសង្ឃថៃបានអប់រំផ្លូវចិត្តពលរដ្ឋតាមរយៈព្រះធម៌អស់រយៈពេលយូរមកហើយ ប៉ុន្តែការប្រព្រឹត្តខុសវិន័យរបស់ព្រះសង្ឃមួយចំនួនធ្វើឱ្យពលរដ្ឋថៃអស់ជំនឿ និងលែងគោរពព្រះពុទ្ធសាសនា ។ បញ្ហាសំខាន់ពេលនេះ គឺការដោះស្រាយបញ្ហាព្រះសង្ឃប្រព្រឹត្តល្មើសដើរខុសផ្លូវធម៌ និងជាពេលវេលាដែលប្រទេសថៃត្រូវធ្វើវិសោធនកម្មច្បាប់ពាក់ព័ន្ធដើម្បីលើកកម្ពស់ពុទ្ធសាសនាក្នុងសង្គមវ ។

ការទទួលស្គាល់កំហុសរបស់ព្រះសង្ឃ គឺជាការដោះស្រាយបញ្ហាបច្ចុប្បន្ន និងថ្ងៃអនាគត ពីព្រោះវាចាំបាច់បំផុតដើម្បីកុំឱ្យកើតហេតុការណ៍បែបនេះទៀត ។ ទោសកំហុសរបស់ព្រះសង្ឃថៃលើកនេះបានប៉ះពាល់ដល់ពុទ្ធសាសនាយ៉ាងខ្លាំង ពីព្រោះពុទ្ធសាសនា គឺជាសាសនាដ៏ធំនៅប្រទេសថៃ ៕

ទីក្រុងតេអេរ៉ង់៖ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានជំរុញឱ្យមានការសម្របសម្រួលផ្នែកសន្តិសុខពីបណ្តាប្រទេសនៃអង្គការសហប្រតិបត្តិការសៀងហៃ (SCO) ដែលរួមមានចិន និងរុស្ស៊ី នៅក្នុងកិច្ចប្រជុំកំពូលមួយក្នុងប្រទេសចិន។ នេះបើយោងតាមការចុះផ្សាយរបស់សារព័ត៌មាន Newsweek នាថ្ងៃអង្គារ ទី១៥ កក្កដា ។

កិច្ចប្រជុំកំពូលនេះបានបង្ហាញពីទំនាក់ទំនងដែលកំពុងរីកចម្រើនរបស់ទីក្រុងតេអេរ៉ង់ជាមួយទីក្រុងប៉េកាំង និងទីក្រុងមូស្គូ បន្ទាប់ពីជម្លោះនាពេលថ្មីៗនេះជាមួយអ៊ីស្រាអែល ដែលត្រូវបានចូលរួមដោយសហរដ្ឋអាមេរិកក្នុងការវា.យប្រហារតាមផ្លូវអាកាសមកលើទីតាំងនុយក្លេអ៊ែររបស់អ៊ីរ៉ង់។ ការគាំទ្ររបស់ចិន នឹងផ្តល់ឲ្យអ៊ីរ៉ង់នូវការគាំទ្រផ្នែកសេដ្ឋកិច្ច និងយោធាដ៏សំខាន់ ដើម្បីដាក់ទណ្ឌកម្មលើសហរដ្ឋអាមេរិកដែលគាំទ្រអ៊ីស្រាអែល និងបង្កើនកិច្ចខិតខំប្រឹងប្រែងក្នុងការទប់ស្កាត់ពីការវា.យប្រហារ។

ជាមួយគ្នានោះ លោក Araghchi បានស្នើឱ្យមានការបង្កើត ”យន្តការអចិន្រ្តៃយ៍មួយដើម្បីត្រួតពិនិត្យ ចងក្រងឯកសារ និងសម្របសម្រួលការឆ្លើយតបចំពោះការឈ្លានពានដោយយោធា សកម្មភាពនៃការបំផ្លិចបំផ្លាញ អំពើភេរវកម្ម និងការរំលោ.ភលើអធិបតេយ្យភាពជាតិនៃរដ្ឋជាសមាជិក” ។ លោក Araghchi ចាត់ទុកការវា.យប្រហាររបស់អ៊ីស្រាអែល និងអាមេរិកថ្មីៗនេះមកលើអ៊ីរ៉ង់ថាជាទង្វើឈ្លានពាន។ បន្ទាប់មកលោក Araghchi បានជួបជាមួយប្រធានាធិបតីចិន Xi Jinping និងរដ្ឋមន្ត្រីការបរទេសរុស្ស៊ី Sergey Lavrov នៅក្រៅព្រឹត្តិការណ៍នេះផងដែរ។

សម្រាប់ប្រទេសអ៊ីរ៉ង់ ការចូលជាសមាជិក SCO បានបើកផ្លូវសម្រាប់ទំនាក់ទំនងការទូត និងសេដ្ឋកិច្ចក្រៅពីលោកខាងលិច ដោយជួយក្រុងតេអេរ៉ង់ឲ្យជៀសផុតពីភាពឯកោបច្ចុប្បន្នរបស់ខ្លួន។ ចិននិងរុស្ស៊ីបានបង្ហាញពីសញ្ញាយល់ស្រប ដោយក្រុងម៉ូស្គូបានហៅការវា.យប្រហាររបស់អាមេរិក និង អ៊ីស្រាអែលថាជាការបង្កសង្រ្គាម។ ខណៈដែលប្រធានាធិបតីអ៊ីរ៉ង់ លោក Masud Pezeshkian បាននិយាយថា លោកបើកចំហសម្រាប់ការសន្ទនាជាមួយសហរដ្ឋអាមេរិក ហើយអ៊ីរ៉ង់បានផ្អាកកិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែរអន្តរជាតិរបស់អង្គការសហប្រជាជាតិផងដែរ។

ឥឡូវនេះ អ៊ីរ៉ង់កំពុងពង្រឹងសមត្ថភាពយោធារបស់ខ្លួន ដោយបង្ហាញពីការព្រួយបារម្ភពីការវា.យប្រហារម្ដងទៀត ព្រោះមិនទាន់មានការឆ្លើយតបតាមរយៈការទូតពីភាគីជម្លោះរបស់ខ្លួននៅឡើយ។ ដូច្នេះហើយ ការស្វែងរកការគាំទ្រពីចិន និង រុស្ស៊ី គឺជាវិធីល្អបំផុតមួយក្នុងការទប់ស្កាត់ការវា.យប្រហារ ជាមួយនឹងខ្នងបង្អែកដែលរឹងមាំ៕

វ៉ាស៊ីនតោន៖ ប្រធានាធិបតីអាមេរិក លោក Donald Trump បាននិយាយថា អាមេរិកបានយល់ព្រមលើការបន្ធូបន្ថយពន្ធឲ្យនៅសល់ត្រឹម 19 ភាគរយប៉ុណ្ណោះ លើការនាំចូលទំនិញទាំងអស់ពីប្រទេសឥណ្ឌូនេស៊ីទៅកាន់សហរដ្ឋអាមេរិក។ នេះបើយោងតាមសារព័ត៌មាន CNBC បានចុះផ្សាយនាថ្ងៃពុធនេះ។

កាលពីថ្ងៃអង្គារ ទី15 ខែកក្កដា ឆ្នាំ2025 លោក Trump បានបង្ហោះសារនៅលើប្រព័ន្ធផ្សព្វផ្សាយសង្គមថា សហរដ្ឋអាមេរិកបានឈានដល់កិច្ចព្រមព្រៀងពាណិជ្ជកម្មជាមួយឥណ្ឌូនេស៊ីហើយ។ នៅក្នុងសារនោះ គាត់បានសរសេរថា “ឥណ្ឌូនេស៊ីនឹងបង់ពន្ធដល់សហរដ្ឋអាមេរិកចំនួន 19% លើទំនិញទាំងអស់ដែលពួកគេនាំចេញមកឱ្យយើង ខណៈដែលការនាំចេញរបស់សហរដ្ឋអាមេរិកទៅកាន់ប្រទេសឥណ្ឌូនេស៊ីនឹងមិនមានការគិតថ្លៃអ្វីទាំងអស់” ។

ជាមួយគ្នានេះ លោក Trump ក៏បានឲ្យដឹងផងដែរថា “ជាផ្នែកមួយនៃកិច្ចព្រមព្រៀងនេះ ប្រទេសឥណ្ឌូនេស៊ីបានប្តេជ្ញាទិញថាមពលពីសហរដ្ឋអាមេរិក ក្នុងតម្លៃ $15 ពាន់លានដុល្លារ, ទិញផលិតផលកសិកម្មអាមេរិកចំនួន $ 4.5 ពាន់លានដុល្លារ និងទិញយន្តហោះ Boeing Jets ពីសហរដ្ឋអាមេរិក ចំនួន 50គ្រឿងផងដែរ។”

គួរឲ្យដឹងថា នៅក្នុងការប្រកាសថ្មីៗនេះ លោក Trump បានសម្រេចថា ចាប់ពីថ្ងៃទី1 ខែសីហា អាមេរិកនឹងយកពន្ធគយលើទីនិញរបស់ប្រទេសឥណ្ឌូណេស៊ីក្នុងអត្រា 32% ។ ប៉ុន្តែក្រោយមានការចរចាម្ដងទៀត លោក Trump បានប្រាប់អ្នកសារព័ត៌មានកាលពីថ្ងៃអង្គារថា ពន្ធរបស់ឥណ្ឌូណេស៊ី បានថយចុះមកត្រឹម 19% វិញ។ លោកបានបន្ថែមថា៖ «យើងមានកិច្ចព្រមព្រៀងមួយចំនួនដែលនឹងត្រូវប្រកាស»។

យ៉ាងណាមិញ កាលបរិច្ឆេទថ្មីសម្រាប់ការកំណត់ពន្ធរបស់ឥណ្ដូណេស៊ីក្នុងអត្រា 19% នេះនៅមិនទាន់ប្រកាសថានឹងត្រូវយកចាប់ពីពេលណាទៅនោះទេ។ ប៉ុន្តែជាមួយនឹងការបន្ថយពន្ធនេះ ឥណ្ឌូណេស៊ី នឹងក្លាយជាប្រទេសទី២ នៅក្នុងអាស៊ាន ដែលមានអត្រាពន្ធគយកំណត់ដោយអាមេរិកទាបជាងគេ ធៀបទៅនឹងប្រទេសសិង្ហបុរី ដែលមានអត្រាពន្ធ 10% និងស្ថិតនៅលំដាប់ទី1៕