អ្នកនាង មាស សុខសោភា បានបង្កឱ្យអ្នកលេងបណ្តាញសង្គមបន្តការវែកញែកជាថ្មី បន្ទាប់ពីតារាចម្រៀងរូបនេះបង្ហោះសំណេរមួយនៅលើបណ្តាញសង្គមនិងមានការឆ្លើយតបឌឺដងទៅកាន់អតីតស្វាមី។ នៅលើទិកតុកវិញតារាចម្រៀងមាស សុខសោភា បានដាក់ចម្រៀងមួយបទជាមួយនឹងលោកគ្រូសក់សភ្នំត្បែងធ្វើឱ្យមានមតិ សង្ស័យថាតារាចម្រៀងរូបនេះទំនងជាចង់បង្ហាញក្តីស្នេហ៍ជាសាធារណៈ។

ថ្មីៗនេះតារាចម្រៀង មាស សុខសោភា បានបង្ហោះនៅលើបណ្តាញសង្គមហ្វេកប៊ុកថា «បើមនុស្សមិនរៀនឈ្វេងយល់អំពីច្បាប់ធម្មជាតិទាំង៧របស់ខ្លួនឯងម្នាក់ៗទេ អ្នកនៅតែមើលឃើញល្អថាជាអាក្រក់ ត្រូវទៅជាខុស សទៅជាខ្មៅ អស់មួយជីវិត។

អ្វីដែលសំគាល់ឱ្យសតិបញ្ញារបស់យើងគិតថាយើងកំពុងតែដើរលើផ្លូវត្រូវឬខុស ល្អឬអាក្រក់នោះ គឺមានតែសច្ចធម៌តែ១គត់ដែលឆ្លុះបង្ហាញភាពសុក្រឹតដល់យើង។
ពេលខ្លះគេមើលមកយើងថាកំពុងដើរលើផ្លូវខុសប៉ុន្តែអ្នកទាំងនោះមិនមានភាពក្លាហានចេញមកបកស្រាយអំពីចំណុចខុសដែលខ្លួនកំពុងគិតថាគេខុសនោះឡើយ។បើចង់ដឹងថាគេដើរលើផ្លូវត្រូវឬខុសត្រូវរៀនស្គាល់ពីច្បាប់ធម្មជាតិរបស់ខ្លួនហើយឈ្វេងយល់ឱ្យច្បាស់អំពីសច្ចធម៌»។

ការបង្ហោះខ្លឹមសារខាងលើនេះបានធ្វើឱ្យអ្នកលេងបណ្តាញសង្គមបញ្ចេញមតិវែកញែកជាច្រើន។ គណនីហ្វេកប៊ុកមួយបានបញ្ចេញមតិថា «សូមបានសំរេចឈាន ឆាប់ៗផងចុះ» តារាចម្រៀង មាស សុខសោភា បានឆ្លើយតបថា «សច្ចធម៌ ដែលកំណត់ឱ្យមនុស្សដឹងខុសឬត្រូវវាមិនចាំបាច់ទាល់តែសម្រេចឈាននោះទេ» ។ គណនីមួយទៀតបានបញ្ចេញមតិថា «សច្ចធម៌គឺត្រូវតែប្ដី១ប្រពន្ធ១មិនវង្វេងនិងកាមគុណ» ។ ការបញ្ចេញមតិនេះតារាចម្រៀង មាស សុខសោភា បានឆ្លើយតបថា «ប្តីដែលឱ្យប្រពន្ធរកស៊ីចិញ្ចឹមជាង១០ឆ្នាំ ប្តីកាន់លុយ រួមទាំងចាំចាប់កំហុសប្រពន្ធគ្រប់ពេលនឹងឬ? អ្នកចង់បានប្តីរបៀបនេះឬ យកចុះ»។

ជាមួយនឹងការបង្ហោះនៅលើបណ្តាញសង្គមហ្វេកប៊ុកខាងលើនេះ ងាកទៅកាន់បណ្តាញសង្គមទិកតុករបស់អ្នកនាង មាស សុខសោភា កាន់តែធ្វើឱ្យមហាជនចាប់អារម្មណ៍យ៉ាងខ្លាំង។ តារាចម្រៀងរូបនេះបានដាក់រូបភាពខ្លួនឯង រួមទាំងរូបភាពរបស់លោកគ្រូសក់សភ្នំត្បែងជាមួយនឹងឃ្លាចម្រៀងថា «មិនស្តាយក្រោយទេរើសបងជាប្តី អូនរើសយកបងព្រោះមានចិត្តស្មោះសរ….»។

ការបង្ហាញបែបនេះរបស់តារាចម្រៀង មាស សុខសោភា និងលោកគ្រូសក់សភ្នំត្បែង បានធ្វើឱ្យអ្នកគាំទ្រមានការព្រួយបារម្ភយ៉ាងខ្លាំង ហើយមានការសង្ស័យថាតារាចម្រៀងរូបនេះចង់បង្ហាញស្នេហាថ្មីក្រោយពីដាក់បទចម្រៀងខាងលើនេះ៕

ឃើញមានការបំពុលសង្គមច្រើនពេកស្របពេលប្រទេសជាតិកំពុងត្រូវផ្ទះលេខ២បំពានពីមួយថ្ងៃទៅមួយថ្ងៃតារាចម្រៀង លីម តិចម៉េង ម្ចាស់ពាន Cambodian Idol រដូវកាលទី៤ ថាគួរតែកាត់បន្ថយហើយ។

នៅយប់ថ្ងៃទី១៥ កក្កដា លីម តិចម៉េង បានបង្ហោះនៅលើបណ្តាញសង្គមហ្វេកប៊ុកថា «ពេលមិនមាត់គេថាយើងសំងំរកសុខ..ពេលនិយាយគេថាយើងចេះដឹងច្រើន..
បើមិននិយាយគឺខុស..បើនិយាយកាន់តែខុស.. តើបងប្អូនជ្រើសយកជម្រើសមួយណា ?»។ លោក បន្តទៀតថា «ស្រុកទេសកំពុងត្រូវគេបំពានពីមួយថ្ងៃទៅមួយថ្ងៃ តើអាចកាត់បន្ថយការបំពុលបន្ថែមបន្តិចសិនបានទេបងប្អូនមួយចំនួនតូច ? សូមមេត្តាអនុគ្រោះហើយយោគយល់ផង»។

ការលើកឡើងរបស់ លីម តិចម៉េង ខាងលើនេះមានទស្សនិកជនជាច្រើនបានបង្ហាញ ការគាំទ្រទៅកាន់តារាចម្រៀងរូបនេះដែលខ្វល់ខ្វាយពីប្រទេសជាតិមិនដូចអ្នកសិល្បៈមួយចំនួនបែរជាបំពុលសង្គមវិញ។

នេះមិនមែនជាលើកទី១នោះទេសម្រាប់ លីម តិចម៉េង បានចេញមកដាស់តឿននិងបង្ហាញ ការស្នេហាជាតិមាតុភូមិជាសិល្បករម្នាក់ដែលហ៊ានចេញមុខនិយាយរឿងជាច្រើននៅក្នុងសង្គម។
គួរបញ្ជាក់ផងដែរថា លីម តិចម៉េង មិនត្រឹមតែជាសិល្បករជំនាន់ក្រោយម្នាក់ដែល ទស្សនិកជនមានការសរសើរពីការភាពក្លាហានហ៊ានបញ្ចេញទស្សនៈនៅក្នុងសង្គមប៉ុណ្ណោះទេប៉ុន្តែតារាចម្រៀងរូបនេះគឺជាម្ចាស់ពានមួយរូបដែលមានប្រជាប្រិយទទួលបានកាដូជាច្រើនពីហ្វេនៗរាល់ពេលលោកមានការប្រគំតន្រ្តីនានា។ លើសពីនេះ ក្រៅពីការច្រៀង តិចម៉េង ក៏បានបង្កើនសមត្ថភាពរបស់ខ្លួនចេះនិពន្ធទំនុកច្រៀងដោយខ្លួនឯងផងដែរ៕

ថ្មីៗនេះនៅក្នុងវិស័យភាពយន្តក្នុងប្រទេសកម្ពុជាបានផ្ទុះនូវពាក្យចចាមអារ៉ាមយ៉ាងខ្លាំងទៅលើអ្នកដឹកនាំរឿងនិងជាផលិតករភាពយន្តបានប្រពឹត្តទង្វើមិនគប្បីទៅលើមនុស្សស្រីដើម្បីជាថ្នូរនឹងតួនាទីសម្តែង។ មិនត្រឹមតែ ប៉ុណ្ណោះថែមទាំងមានពាក្យចចាមអារ៉ាមថាអ្នកដឹកនាំរឿងរូបនោះបានកេងប្រវ័ញ្ចញើសឈាម កម្លាំង សមត្ថភាពការងារ និងលុយមិត្តរួមអាជីពក្នុងវិស័យ ភាពយន្ត គោលបំណងទទួលបានផលប្រយោជន៍ផ្ទាល់ខ្លួន។

យ៉ាងណាមិញ ស្របពេលមានការជជែកវែកញែកយ៉ាងច្រើនពីរឿងខាងលើនេះ ផលិតករឯករាជ្យ David Tito បានចេញលិខិតបំភ្លឺជាសាធារណៈតាមរយៈមេធាវីរបស់ខ្លួនដែលតំណាងឱ្យលោកបានធ្វើការបដិសេធរាល់ការចោទប្រកាន់ទាំងស្រុង។

ក្នុងលិខិតដែលចុះថ្ងៃទី១៣ កក្កដា មេធាវីតំណាងឱ្យលោក ទី ទេពនិមល ហៅ David Tito បានបដិសេធទៅលើការចោទប្រកាន់ពីកូនក្តីរបស់ខ្លួនដែល «ធ្លាប់បានប្រព្រឹត្តអំពើ កេងប្រវ័ញ្ចទៅលើមនុស្សស្រីមួយចំនួន… និង «បានកេងប្រវ័ញ្ច កម្លាំង សមត្ថភាពការងារ និងលុយមិត្តរួមអាជីពក្នុងវិស័យ ភាពយន្ត គោលបំណងទទួលបានផលប្រយោជន៍ ផ្ទាល់ខ្លួន…” ។ ការចោទប្រកាន់នេះគឺបានបំផ្លើស មូលបង្កាច់ ទំលាក់កំហុសដោយអសុទ្ធចិត្ត គ្មានការពិត គ្មានមូលដ្ឋាន និងគ្មានព័ស្តុតាងច្បាស់លាស់ ព្រមទាំងមានចរិតលក្ខណៈជាបទល្មើស «បរិហារកេរ្តិ៍ជាសាធារណៈ” និង “ញុះញង់ឱ្យមាន ការរើសអើង” »។ ការចោទប្រកាន់នេះគឺបានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់លោក David Tito យ៉ាងធ្ងន់ធ្ងរ ជាពិសេស គឺប៉ះពាល់ទៅដល់ អាជីពការងារជាផលិតករឯករាជ្យ (Freelance Director) ក្នុងវិស័យភាពយន្ត។

លិខិតដដែលបានបញ្ជាក់ទៀតថា អំពើរបស់ម្ចាស់គណនីហ្វេសប៊ុកដែលមានការចោទប្រកាន់ទៅកាន់ផលិតកររូបនេះពួកគេកំពុងប្រមូលព័ស្តុតាងនៃការបង្ហោះ (Posts) ការចែកចាយសំណេរ(Shares) ការបញ្ចេញមតិ (Comments) និងកំណត់អត្តសញ្ញាណបុគ្គលទាំងនោះ ដើម្បីរៀបចំពាក្យបណ្តឹងទៅស្ថាប័នអយ្យការ និងអនុវត្តវិធានការ តាមផ្លូវច្បាប់។

លោកមេធាវី ជាសា សុផាតារាវឌី ជាមេធាវីនៃក្រុមហ៊ុនមេធាវី សុភាចារស្មាក្តីអង្គរ បានបញ្ជាក់ថាគណនីដែលបានបង្ហោះចោទប្រកាន់គឺទុកពេលឱ្យ២៤ម៉ោងក្នុងការលុប ហើយក្នុងករណី មិនធ្វើការលុប សំណេរ ឬរូបភាពដែលពាក់ព័ន្ធនឹងលោក David Tito ទេនឹងផ្តើមចំណាត់ការបណ្ដឹងប្រឆាំងនឹងបុគ្គលទាំងនោះទៅស្ថាប័នមានសមត្ថកិច្ច៕