ប្រទេសថៃ ៖ អតីតទាហានឈុតខ្មៅថៃដែលវាយកងទ័ពខ្មែរនៅប្រាសាទតាមាន់ធំហើយគេចខ្លួនប្រកែកពុំព្រមសូមទោស ហើយប្រាប់ថា កងទ័ពខ្មែរអាចមកប្តឹងនៅតុលាការប្រទេសថៃ បើចង់ប្តឹង ខណៈមេធាវីរបស់អតីតទាហានឈុតខ្មៅបញ្ជាក់ថា ការចាត់វិធានការតាមច្បាប់ត្រូវតែធ្វើនៅប្រទេសថៃប៉ុណ្ណោះ ពីព្រោះប្រាសាទតាមាន់ធំស្ថិតក្នុងទឹកដីថៃ ។ នេះបើតាមការផ្សព្វផ្សាយរបស់សារព័ត៌មាន Khaosod កាលពីថ្ងៃទី១៧ ខែកក្កដា ឆ្នាំ២០២៥ ។

កាលពីថ្ងៃទី១៣ ខែកក្កដា កន្លងមក លោក ស៊ុមម៉ាយ អតីតទាហានឈុតខ្មៅថៃ និងជាប្រធានជំរំទាហានស្ម័គ្រចិត្តប៉ាកថុងឆ័យ រួមទាំងបក្ខពួក គឺលោក ប៉ាធុមផុង បានវាយផ្ទៃមុខកងទពខ្មែរនៅប្រាសាទតាមាន់ធំ ស្ថិតក្នុងភូមិតាមាន់សែនជ័យ ឃុំគោកមន ស្រុកបន្ទាយអម្ពិល ខេត្តឧត្តរមានជ័យ ជាប់ខេត្តសុរិន្ទ ហើយរត់គេចខ្លួន និងត្រូវបានសមត្ថកិច្ចចាប់ខ្លួននាពេលបន្ទាប់ ។

ក្រោយហេតុការណ៍នេះ នាយឧត្តមសេនីយ៍ ទៀ សីហា រដ្ឋមន្ត្រីក្រសួងការពារជាតិកម្ពុជាបានទាមទារឱ្យអតីតទាហានឈុតខ្មៅថៃដែលវាយកងទ័ពខ្មែរនៅប្រាសាទតាមាន់ធំហើយគេចខ្លួនសូមទោសកម្ពុជា ។ បន្ទាប់មក លោក គ្រីតសាដា លោហីតឌី (ឬមេធាវី ណូបិ) បានចេញមុខការពារជនល្មើសរូបនេះឱ្យរួចពីកំហុស បើទោះជាបានវាយកងទ័ពខ្មែរក្តី ។

លោក គ្រីតសាដា លោហីតឌី មេធាវីថៃនិយាយថា កម្ពុជាចង់ឱ្យថៃនាំខ្លួនលោក ស៊ុមម៉ាយ អតីតទាហានឈុតខ្មៅថៃមកសូមទោសជាផ្លូវការក្រោយពីវាយកងទ័ពខ្មែរនៅប្រាសាទតាមាន់ធំ ប៉ុន្តែក្នុងឋានៈជាមេធាវីរបស់អតីតទាហានឈុតខ្មៅថៃ លោកសូមបញ្ជាក់ថា លោក ស៊ុមម៉ាយ នឹងពុំសូមទោសកម្ពុជាទេ ។ បើកម្ពុជាត្រូវការ ឬចង់ចាត់វិធានការតាមច្បាប់ កម្ពុជាអាចមកប្តឹងនៅតុលាការប្រទេសថៃ ពីព្រោះហេតុការណ៍កើតឡើងក្នុងទឹកដីថៃ បើទោះជាជនរងគ្រោះជាពលរដ្ឋខ្មែរក្តី បញ្ហានេះត្រូវដោះស្រាយនៅតុលាការថៃប៉ុណ្ណោះ ។ ខ្ញុំសូមផ្តាំ បើកងទ័ពរបស់កម្ពុជារងគ្រោះ កម្ពុជាអាចមកប្តឹងនៅប្រទេសថៃ ។

នៅថ្ងៃទី១៩ ខែកក្កដា នេះ លោកនឹងនាំកូនក្តីទៅទទួលការចោទប្រកាន់នៅស្ថានីយប៉ូលិសភ្នំដងរ៉ាក់ ។ លោកបានជជែកជាមួយអតីតទាហានឈុតខ្មៅថៃដែលវាយកងទ័ពខ្មែរនៅប្រាសាទតាមាន់ធំ គឺទាហានឈុតខ្មៅរូបនេះបារម្ភ ពីព្រោះពីដំបូងមានការដោះលែង ហេតុអ្វីសមត្ថកិច្ចហៅមកទទួលការចោទប្រកាន់ទៀត ។ លោកប្រាប់ទៅកូនក្តីថា វាជាបទល្មើសតូចតាចប៉ុណ្ណោះ បើព្រមសារភាពកំហុសជាមួយសមត្ថកិច្ចស៊ើបអង្កេត កូនក្តីនឹងជាប់ពន្ធនាគារត្រឹម១ខែ ហើយបញ្ហានឹងបញ្ចប់ ។

ប៉ុន្តែបើកងទ័ពខ្មែរពុំបញ្ចប់បញ្ហា និងរងរបួសធ្ងន់ធ្ងរ ដូចជា ៖ រហែកមាត់ និងបែកភ្នែក គឺកងទ័ពខ្មែរអាចមកប្តឹងនៅតុលាការប្រទេសថៃ ។ ដូច្នេះ បញ្ហានេះត្រូវតែដោះស្រាយនៅតុលាការប្រទេសថៃប៉ុណ្ណោះ ពីព្រោះទីនេះ (ប្រាសាទតាមាន់ធំ) គឺជាទឹកដីថៃ ។

គួរបញ្ជាក់ថា នាយឧត្តមសេនីយ៍ ទៀ សីហា រដ្ឋមន្ត្រីក្រសួងការពារជាតិកម្ពុជាបានសម្ដែងការហួសចិត្តនឹងអតីតទាហានឈុតខ្មៅថៃជាមួយបក្ខពួកម្នាក់ព្រួតគ្នាវាយកងទ័ពកម្ពុជាម្នាក់ដែលកំពុងឈរជើងនៅប្រាសាទតាមាន់ធំ ខេត្តឧត្តរមានជ័យ ដែលធ្វើឱ្យពលរដ្ឋខ្មែរខឹងសម្បារយ៉ាងខ្លាំង ហើយលោកទាមទារឱ្យអតីតទាហានឈុតខ្មៅរូបនេះសូមទោសជាផ្លូវការ ៕

ប្រទេសថៃ ៖ លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ និងជាឪពុករបស់លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីព្យួរតំណែង បាននិយាយមកកាន់សារព័ត៌មានកាលពីថ្ងៃទី១៧ ខែកក្កដា ឆ្នាំ២០២៥ ថា ប្រទេសថៃនឹងពុំផ្លាស់ប្តូរនាយករដ្ឋមន្ត្រីទេ រដ្ឋាភិបាលរបស់គណបក្សភឿថៃនឹងធ្វើការបន្តទៀត ។ កូនស្រីលោកត្រូវតុលាការធម្មនុញ្ញព្យួរតំណែងដោយសារសំណាងអាក្រក់ ហើយលោកនឹងស្ម័គ្រចិត្តធ្វើជាស្មៀនប្រទេសថៃ ពីព្រោះលោកចូលចិត្តប្រមូលបញ្ហា និងរកដំណោះស្រាយ ។

កាលពីថ្ងៃទី១៧ ខែកក្កដា នៅមជ្ឈមណ្ឌលសន្និបាតជាតិស៊ិរិគីត លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃនិយាយថា រដ្ឋាភិបាលបានអនុម័តច្បាប់ដោះស្រាយបញ្ហាសំខាន់ៗរបស់ប្រទេសថៃយ៉ាងឆាប់រហ័ស បើពុំដូច្នោះទេ បញ្ហាពុំអាចដោះស្រាយបាន ។ បច្ចុប្បន្ន គ្មានអ្នកណាគិតថា រដ្ឋាភិបាលនឹងផ្លាស់ប្តូរនាយករដ្ឋមន្ត្រីទេ គឺគ្មានការផ្លាស់ប្តូរនាយករដ្ឋមន្ត្រីឡើយ ពីព្រោះយើងត្រូវធ្វើការបន្តទៀត ។ កូនស្រី ផេថងថាន ស៊ីណាវ៉ាត់ គឺជានាយករដ្ឋមន្ត្រីថៃ ហើយលោកនឹងធ្វើជាស្មៀនប្រទេសថៃ ។

លោក ថាក់ស៊ីន បន្តថា លោកសូមស្ម័គ្រចិត្តធ្វើជាស្មៀនប្រទេសថៃ និងប្រមូលគ្រប់យ៉ាងបញ្ជូនឱ្យនាយករដ្ឋមន្ត្រីពិនិត្យមើល ពីព្រោះលោកជាមនុស្សចូលចិត្តប្រមូលបញ្ហា និងរកដំណោះស្រាយ ។ លោកមានមិត្តភក្តិជាជនជាតិសិង្ហបុរី ហើយពេលលោកត្រឡប់មកប្រទេសថៃវិញ មិត្តភក្តិសិង្ហបុរីប្រាប់ថា រីករាយខ្លាំងណាស់ដែលបានរាប់អានលោក ប៉ុន្តែពលរដ្ឋសិង្ហបុរីបារម្ភ ដោយសារសិង្ហបុរីត្រូវប្រកួតប្រជែងជាមួយថៃ ។ ពលរដ្ឋថៃពុំគួរឈ្លោះគ្នាដោយសាររឿងឥតប្រយោជន៍ គួរតែធ្វើឱ្យប្រទេសថៃរីកចម្រើនរុងរឿង ។

ចំណុចសំខាន់ ពលរដ្ឋថៃត្រូវតែស្រឡាញ់គ្នា បើទោះជាមានគំនិតផ្សេងគ្នាក៏ដោយ ។ កាលពីសម័យមុន ពេលលោកទើបប្រឡូកក្នុងនយោបាយថ្មីៗ គឺអ្នកនយោបាយជេរគ្នាក្នុងរដ្ឋសភា រួចហើយក៏មកអង្គុយផឹកកាហ្វេជាមួយគ្នា និងផឹកស្រា Wine គ្មានបញ្ហាទេ ប៉ុន្តែពេលលោកមកគណបក្សថៃស្រឡាញ់ថៃ ក៏ប្រកែកគ្នាខ្លាំងឡើង ជជែកគ្នាពុំដឹងរឿង និងយកឈ្នះឱ្យបាន ។ ហេតុនេះ វាជាហ្គេម ដែលអ្នកណាឈ្នះនឹងបំពេញតួនាទី រីឯអ្នកចាញ់ក្លាយជាគណបក្សប្រឆាំងរិះគន់គេ ។

ក្រៅពីការផ្តោតលើសុវត្ថិភាពជាចម្បង ថៃត្រូវតែអភិវឌ្ឍន៍ប្រទេសឱ្យក្លាយជាទីក្រុងទេសចរណ៍ Smart City ដោយដំឡើងកាមេរ៉ា AI គ្រប់កន្លែងទូទាំងទីក្រុង ។ ហេតុនេះ បើយើងក្លាយជា Smart City មានកាមេរ៉ា AI ពេញទីក្រុង យើងនឹងមានសុវត្ថិភាពខ្ពស់ ៕

ប្រទេសថៃ ៖ សារព័ត៌មានវៀតណាមរាយការណ៍ថា ទីក្រុងបាងកក ប្រទេសថៃ ធ្លាប់ជាគោលដៅទេសចរណ៍ដ៏ពេញនិយមរបស់ពលរដ្ឋវៀតណាមកន្លងមក បច្ចុប្បន្ន ពលរដ្ឋវៀតណាមលែងចាប់អារម្មណ៍ទីក្រុងបាងកកទៀតហើយ ពួកគេចាប់អារម្មណ៍ទៅដើរលេងនៅប្រទេសសិង្ហបុរី និងតៃវ៉ាន់ វិញ ។ ក្រៅពីនេះ ពលរដ្ឋវៀតណាមបានដើរលេងនៅតំបន់ទេសចរណ៍ក្នុងស្រុក ដូចជា ៖ ទីក្រុងដាណាង និងណាត្រាំង ដោយសារមើលឃើញថា ស្ថានការណ៍ព្រំដែនកម្ពុជា-ថៃតានតឹងនាំឱ្យការធ្វើដំណើរគ្មានសុវត្ថិភាព ។

ពលរដ្ឋវៀតណាមយល់ថា បច្ចុប្បន្ន ប្រទេសថៃបានបិទព្រំដែន និងកំណត់វិធានការយ៉ាងតឹងរ៉ឹងជាមួយកម្ពុជា ដែលធ្វើឱ្យពលរដ្ឋវៀតណាមគិតពីសុវត្ថិភាពក្នុងការធ្វើដំណើរ និងចាប់ផ្តើមភ័យខ្លាចប្រទេសថៃ ។ លើសពីនេះ យន្តហោះរបស់ក្រុមហ៊ុនអាកាសចរណ៍វៀតណាមជាច្រើនបានកាត់បន្ថយជើងហោះហើរមកទីក្រុងបាងកក ដូចជា ៖ ក្រុមហ៊ុនអាកាសចរណ៍ Vietjet Air បានកាត់បន្ថយជើងហោះហើរប្រចាំថ្ងៃ រវាងទីក្រុងហូជីមិញ និងបាងកក ពី៤ជើងក្នុង១ថ្ងៃ មកត្រឹមតែ៣ជើងក្នុង១ថ្ងៃ ។

ចំណែកក្រុមហ៊ុនអាកាសចរណ៍ Vietnam Airlines និងក្រុមហ៊ុនអាកាសចរណ៍វៀតណាមជាច្រើនទៀត ក៏បានកាត់បន្ថយជើងហោះហើរមកកាន់ប្រទេសថៃដែរ ។ ស្ថានការណ៍ព្រំដែនតានតឹងរវាងកម្ពុជា និងថៃ គឺជាមូលហេតុមួយធ្វើឱ្យចំនួនពលរដ្ឋវៀតណាមមកដើរលេងប្រទេសថៃធ្លាក់ចុះ ហើយក្រុមហ៊ុនអាកាសចរណ៍វៀតណាមត្រូវកាត់បន្ថយជើងហោះហើរមកថៃដោយសារអតិថិជនតិច ។

ដំណើរកម្សាន្តមកប្រទេសថៃជាកញ្ចប់ (ឬដំណើរកម្សាន្តរយៈពេល៥ថ្ងៃ ៤យប់) តាមយន្តហោះរបស់ក្រុមហ៊ុនអាកាសចរណ៍វៀតណាមក៏ធ្លាក់ចុះដែរ ដោយសារបញ្ហាព្រំដែនតានតឹងវាងប្រទេសថៃ និងកម្ពុជា ស្របពេលប្រទេសនានាប្រកួតប្រជែងដណ្តើមចំនួនភ្ញៀវទេសចរ ។ កាលពីឆ្នាំ២០២៤ ភ្ញៀវទេសចរវៀតណាមបានធ្វើដំណើរមកលេងប្រទេសថៃ ស្មើជិត១លាននាក់ ស្ថិតក្នុងលំដាប់ទី១១ ។

ការបិទព្រំដែនពីសំណាក់កងទ័ព និងរដ្ឋាភិបាលថៃដែលចង់ដាក់សម្ពាធមកលើកម្ពុជា បែរជាធ្វើឱ្យប្រទេសថៃខ្លួនឯងខាតបង់ប្រាក់ចំណូលសេដ្ឋកិច្ចយ៉ាងធ្ងន់ធ្ងរ ខណៈអាជីវកម្មថៃដួលរលំមួយចំនួនធំ ពលរដ្ឋថៃធ្វើការក្នុងក្រុមហ៊ុនផលិតទំនិញនាំចេញមកកម្ពុជា ត្រូវបាត់បង់ការងារធ្វើ ។ លើសពីនេះ ថែមទាំងធ្វើឱ្យថៃបាត់បង់ភ្ញៀវទេសចរខ្មែរ និងភ្ញៀវទេសចរបរទេស រួមទាំងភ្ញៀវទេសចរវៀតណាម ដោយសារភ្ញៀវទេសចរយល់ថា ប្រទេសថៃលែងមានសុវត្ថិភាពសម្រាប់ពួកគេ ៕

មីយ៉ាន់ម៉ា៖ ការវា.យប្រហារតាមអាកាសរបស់របបយោធាមីយ៉ាន់ម៉ាទៅលើក្រុមប្រឆាំង បានភ្លាត់ស្នៀតច្រឡំគោលដៅ បែរជាទៅវា.យប្រហារចំកងទ័ពខ្លួនឯង នៅតំបន់ Kyaukphyu បណ្តាលឲ្យទាហានយ៉ាងហោចណាស 19 នាក់ និងមន្រ្តីម្នាក់រងរបួសធ្ងន់។ នេះបើយោងតាមការចុះផ្សាយរបស់សារព័ត៌មាន Mizzima News។

តាមប្រភពយោធាក្នុងតំបន់បាននិយាយថា ឧបទ្ទវហេតុនេះបានកើតឡើងនៅថ្ងៃទី 13 ខែកក្កដា នៅជិតភូមិ Gonechwain ជាកន្លែងដែលមានការពង្រឹងកម្លាំងយោធាដាក់នៅទីតាំងជួរមុខ និងគោលដៅដោយការវា.យប្រហារដោយយន្តហោះគ្មានមនុស្សបើកទៅលើក្រុម យុទ្ធជន Arakan Army (AA)។

ប៉ុន្តែក្នុងករណីជាក់ស្តែងនៃការនេះ គឺកងកម្លាំងយោធារដ្ឋាភិបាលបែរជាទម្លាក់គ្រាប់បែ.កលើកងទ័ពរបស់ខ្លួនឯងដោយខុសបច្ចេកទេស ដែលបណ្តាលឲ្យទាហានយ៉ាងហោចណាស់ចំនួន 19 នាក់រងរបួសយ៉ាងធ្ងន់ធ្ងរ រួមទាំងមន្រ្តីម្នាក់ផងដែរ។

សារព័ត៌មាន Arakan Princess Media (APM) ដែលមានមូលដ្ឋាននៅរដ្ឋ Rakhine ប្រទេសមីយ៉ាន់ម៉ា បានរាយការណ៍កាលពីថ្ងៃទី 15 ខែកក្កដាថា ទាហានរដ្ឋាភិបាលចំនួន 10 នាក់ត្រូវបានសម្លា.ប់ និងជាច្រើននាក់ទៀតបានរងរបួសយ៉ាងធ្ងន់ធ្ងរ។ ដោយឡែក សារព័ត៌មាន Narinjara News បានបញ្ជាក់ថា មានទាហានរហូតជាង២០នាក់បានរងរបួសក្នុងហេតុការណ៍នេះ។

ប្រធានក្រុម CDM Zin Yaw បានបញ្ជាក់អំពីឧប្បត្តិហេតុនេះថា “ចំនួនអ្នករបួសធ្ងន់ធ្ងរទំនងជាមានច្រើនជាងនេះ។ យើងមិនទាន់បញ្ជាក់បានថាទាហានរងគ្រោះមកពីអង្គភាពណាខ្លះទេ ប៉ុន្តែមានទាហានយ៉ាងតិច 19 នាក់នៅក្នុងកងអនុសេនាតូចនីមួយៗបានរងរបួស។ បើទោះបីជាពួកគេមិនបាត់បង់ជីវិតក៏ដោយ ប៉ុន្តែពួកគេម្នាក់ៗសុទ្ធតែរងរបួសធ្ងន់។”

គួរជម្រាបថា ដើម្បីទប់ស្កាត់ការវាយលុករបស់ក្រុម AA យោធាមីយ៉ាន់ម៉ាបានបញ្ជូនកងកម្លាំងជាង1ពាន់នាក់ទៅកាន់ទីក្រុង Kyaukphyu ចាប់តាំងពីខែមីនាមក។ ទោះបីជាយ៉ាងណាក៏ដោយ កងវរសេនាតូចក្នុងស្រុកកំពុងជួបការលំបាក ដោយអង្គភាពមួយចំនួននៅជិតដួលរលំ ហើយទាហានត្រូវបានគេរាយការណ៍ថាបានរត់គេចខ្លួន។

ជាមួយនឹងស្ថានភាពតានតឹងដូចនេះ ជាពិសេសនៅជុំវិញកងវរសេនាតូចលេខ៣២ ដែលក្រុម AA បន្តការវាយប្រហារ។ របបយោធាកំពុងពឹងផ្អែកលើកាំភ្លើងធំពីកងវរសេនាតូចនៅក្បែរនោះ ដើម្បីពន្យាការឈានទៅមុខរបស់ពួកឧទ្ទាម។ អ្នកវិភាគនិយាយថា AA កំពុងបន្តរក្សាការវាយលុកនេះ ខណៈពេលដែលកងកម្លាំងយោធាកំពុងជាប់គាំងនៅក្នុងការប៉ុនប៉ងដ៏លំបាកមួយដើម្បីផ្លាស់ប្តូរពីការការពារទៅជាការវាយបកវិញ៕

ថៃ៖ អនុរដ្ឋមន្ត្រីក្រសួងការពារជាតិថៃ ជំរុញឱ្យកម្ពុជាបោសសម្អាតគ្រាប់មីនចាស់ៗ ព្រមា.នកម្ពុជាកុំឲ្យបំពានអនុស្សារណនៃការយោគយល់គ្នា MOU 43 ។ នេះបើយោងតាមការចុះផ្សាយរបស់សារព័ត៌មានថៃ The Nation នាថ្ងៃសុក្រ ទី18 ខែកក្កដា។

តាមប្រភពខាងលើបានឲ្យដឹងថា អនុរដ្ឋមន្ត្រីក្រសួងការពារជាតិ ឧត្តមសេនីយ៍ Nattapon Nakpanich កាលពីថ្ងៃព្រហស្បតិ៍ បានចុះទៅសួរសុខទុក្ខ និងផ្តល់កម្លាំងចិត្តដល់ទាហានដែលរងរបួសនៅក្នុងការផ្ទុះគ្រាប់មីន នៅជិតភ្នំលេខ 481 ស្រុក Nam Yuen ខេត្ត Ubon Ratchathani ។ លោក Nattapon បានបញ្ជាក់ថា កងទ័ពភូមិន្ទថៃនឹងផ្តល់ការគាំទ្រយ៉ាងពេញទំហឹងដល់បុគ្គលិកដែលរងរបួសទាំងអស់។

ជាមួយគ្នានេះ លោក Nattapon ប្រកាសធានាដល់សាធារណជនថា កងទ័ពបានត្រៀមខ្លួនយ៉ាងពេញលេញក្នុងការថែរក្សាស្ថានការណ៍។ លោកក៏បានជំរុញឲ្យបង្កើនការប្រុងប្រយ័ត្នសម្រាប់ការល្បាតតាមព្រំដែន។ បច្ចុប្បន្នអាជ្ញាធរកំពុងធ្វើការស៊ើបអង្កេតថាតើគ្រាប់មីនដែលពាក់ព័ន្ធនោះជាគ្រាប់មីនចាស់ ឬថ្មី ជាមួយនឹងការរកឃើញដំបូងបង្ហាញថាវាអាចជាមីនចាស់ដែលមិនត្រូវបានគេសម្អាតអស់។ យោធាថៃបានសម្របសម្រួលជាមួយកងទ័ពកម្ពុជារួចហើយ ដើម្បីពន្លឿនដំណើរការបោសសម្អាតមីន។

ទោះជាយ៉ាងណា លោក Nattapon ថា ប្រសិនបើមានការបញ្ជាក់ថា គ្រាប់មីនដែលទើបផ្ទុះនេះ គឺជាគ្រាប់មីនថ្មី ដែលជាការបំពានលើ MOU 43 ធ្លាប់បានចែងថា តំបន់នេះមិនគួរត្រូវបានប៉ះពាល់ និងហាមប្រើប្រាស់អាវុធ នោះថៃនឹងលើកយកករណីនេះធ្វើការតវ៉ាជាផ្លូវការជាមួយកម្ពុជា។ លោកថែមទាំងបញ្ជាក់ថា ថៃមិនទទួលខុសត្រូវចំពោះការបិទច្រកព្រំដែន ដូចការអះអាងរបស់កម្ពុជានោះទេ។

លោក Nattapon បានបញ្ជាក់ថា ព្រំដែនកម្ពុជា-ថៃនៅតែបើកជាធម្មតា គ្រាន់តែមានការកំណត់ម៉ោងជាក់លាក់។ ជាក់ស្ដែងច្រកទ្វារព្រំដែនចុងសង្កែ ខេត្តស៊ីសាកេត គឺបើកពីម៉ោង 8:00 ព្រឹក ដល់ 10:00 យប់ ដោយតែងលើកលែងចំពោះសិស្សានុសិស្ស និងអ្នកជំងឺ។ ប៉ុន្តែសម្រាប់ខាងកម្ពុជាវិញ នៅតែបន្តបិទ24ម៉ោងក្នុង1ថ្ងៃ។

ថៃនឹងបន្ធូរបន្ថយការរឹតបន្តឹងព្រំដែនក្នុងពេលឆាប់ៗនេះ ដើម្បីអនុញ្ញាតឱ្យមានការដឹកជញ្ជូនទំនិញចេញចូល ក្រោយមានការត្អូញត្អែរពីអាជីវកម្មដែលរងផលប៉ះពាល់ដោយសារការបិទច្រកព្រំដែន ដែលបណ្តាលឱ្យការធ្វើពាណិជ្ជកម្មរបស់ពួកគេកកស្ទះ និងជាប់បំណុលហិរញ្ញវត្ថុ។ ថៃសង្កត់ធ្ងន់ថា ការសម្រេចនេះនឹងធ្វើឡើងតាមគោលការណ៍សិទ្ធិមនុស្ស ខណៈថៃគ្មានសិទ្ធិអំណាចលើការបើកបិទព្រំដែនខាងកម្ពុជាទេ៕

ដើម្បីជំរុញសេដ្ឋកិច្ច និងបង្កើនចំណូលជាតិ លោកថាក់ស៊ីន ស៊ីណាវ៉ាត្រ បានស្នើឱ្យរដ្ឋាភិបាល បង្កើត “ទិដ្ឋាការមាស” ដូចទៅនឹងគម្រោងរបស់លោកដូណាល់ត្រាំ។

ទិដ្ឋាការមាស គ្រោងនឹងដាក់លក់ក្នុងតម្លៃ១លានដុល្លារសម្រាប់មនុស្សម្នាក់ ដោយរំពឹងថានឹងលក់បាន៦០មុឺននាក់ក្នុងឆ្នាំដំបូង។

ទិដ្ឋាការមាសនេះ អនុញ្ញាតឱ្យជនជនបរទេស មានសិទ្ធអចលនទ្រព្យនៅក្នុងប្រទេសថៃ ដែលនេះនឹងជួយដល់វិស័យអចលនទ្រព្យ។

បន្ថែមពីនេះ ទិដ្ឋាការមាសនឹងជួយកាត់បន្ថយបំណុលសាធារណៈ និងជំរុញវិស័យទេសចរណ៍ឱ្យកាន់តែកើតឡើងបានមួយកម្រិត។

តែយ៉ាងណាមិញ ការស្នើរបស់លោកថាក់សុីននេះ ហាក់មិនទាន់មានការពិភាក្សាជារួមណាមួយ ដើម្បីអនុម័តគម្រោងនេះនៅឡើយនោះទេ។

គួរបញ្ជាក់ថា គម្រោងនេះ មានភាពស្រដៀងគ្នានឹង ទិដ្ឋាការមាសរបស់សហរដ្ឋអាមេរិក ដែលតម្រូវឱ្យជនបរទេសទិញក្នុងតម្លៃ៥លានដុល្លារ ដើម្បីទទួលបានសញ្ជាតិភ្លាមៗ ដោយពុំចាំបាច់ត្រូវធ្វើការវិនិយោគក្នុងអាជីវកម្មនៅសហរដ្ឋអាមេរិក៕