ប្រទេសថៃ ៖ កាលពីថ្ងៃទី១៦ ខែកក្កដា ឆ្នាំ២០២៥ សារព័ត៌មាន Thairath Plus រាយការណ៍ថា ពលរដ្ឋថៃរស់នៅព្រំដែននិយាយដូចៗគ្នាថា ពួកគេគ្មានជម្លោះជាមួយកម្ពុជាទេ ពីព្រោះត្រូវពឹងផ្អែកគ្នាទៅវិញទៅមក និងត្រូវប្រកបមុខរបរនៅព្រំដែន ។ ការលើកឡើងរបស់ពលរដ្ឋថៃនៅព្រំដែនស្របពេលមានជម្លោះរវាងកម្ពុជា និងថៃក្នុងបណ្តាញសង្គម ហើយពលរដ្ឋថៃដែលរងផលប៉ះពាល់ខ្លាំងជាងគេ គឺជាអ្នករស់នៅក្បែរព្រំដែនកម្ពុជា-ថៃ ។

ការបិទច្រកព្រំដែនអចិន្ត្រៃយ៍កម្ពុជា-ថៃ ចំនួន៦កន្លែង និងច្រកព្រំដែនបណ្តោះអាសន្ន ១០កន្លែង បានធ្វើឱ្យប៉ះពាល់ដល់ពលរដ្ឋថៃជាច្រើន ដូចជា ៖ អាជីវករលក់ដូរ, ពលរដ្ឋថៃមានសាច់ញាតិនៅកម្ពុជា, គ្រួសារកម្ពុជា-ថៃដែលបានចុះសំបុត្រអាពាហ៍ពិពាហ៍ជាមួយគ្នា និងមានកូន ។ ពលរដ្ឋថៃទាំងនេះគិតថា សុវត្ថិភាព និងការធ្វើសង្គ្រាម គឺពុំគួរឱ្យខ្លាចដូចការស្លាប់ដោយសារពុំអាចប្រកបមុខរបរ ហើយព្រំដែនដែលមនុស្សភាគច្រើនកំពុងបារម្ភ គឺពុំសំខាន់ដូចទំនាក់ទំនងល្អ ។

សារព័ត៌មាន Thairath Plus បានសាកសួរពីការរស់នៅរបស់ពលរដ្ឋថៃនៅស្រុកអារញ្ញប្រាថេត ខេត្តស្រះកែវ ព្រំដែនកម្ពុជា-ថៃ រួមទាំងផលប៉ះពាល់ដោយសារជម្លោះរវាងប្រទេសទាំងពីរដែលពួកគេប្រឈមឃើញថា ពលរដ្ឋថៃនៅព្រំដែនគ្មានជម្លោះជាមួយកម្ពុជាទេ ពីព្រោះពលរដ្ឋប្រទេសទាំងពីរត្រូវប្រកបមុខរបរនៅព្រំដែន និងពឹងផ្អែកគ្នាទៅវិញទៅមក ។

បុរសប្រកបរបររត់ម៉ូតូកង់៣ អស់រយៈពេលជាង២០ឆ្នាំ ប្រាប់ថា លោកចេញពីផ្ទះតាំងពីម៉ោង៥ព្រឹក ហើយទើបតែមានភ្ញៀវជិអម៉ូតូកង់៣ តែម្នាក់គត់ ។ មុនពេលបិទព្រំដែន លោករកប្រាក់បានរហូតដល់៥០០បាតក្នុង១ថ្ងៃ ប៉ុន្តែពេលនេះ ប្រាក់ចំណូលធ្លាក់ចុះមកត្រឹម១០០បាត ។ ជម្លោះរវាងប្រទេសទាំងពីរធ្វើឱ្យអ្នកនៅព្រំដែនរងផលប៉ះពាល់ខ្លាំង រឿងសុវត្ថិភាព និងសង្គ្រាមពុំគួរឱ្យខ្លាចដូចការស្លាប់ដោយសារមិនអាចប្រកបរបរទេ ។ បើបិទព្រំដែនអារញ្ញប្រាថេតនឹងគ្មានអ្នកណាមក តើឱ្យខ្ញុំបានអ្វីចិញ្ចឹមជីវិត បើព្រំដែនបិទបែបនេះ ។

មិនមែនមានតែអ្នកបើកម៉ូតូកង់៣ទេ ដែលរងផលប៉ះពាល់ដោយសារការបិទព្រំដែនកម្ពុជា-ថៃ គឺនៅមានអាជីវករ និងពលរដ្ឋថៃដែលមានសាច់ញាតិនៅកម្ពុជា ក៏រងផលប៉ះពាល់ដែរ ដែលរដ្ឋាភិបាលថៃពុំធ្លាប់ចុះមកពិនិត្យមើលឡើយ ។ ហេតុនេះ ពលរដ្ឋថៃសូមឱ្យរដ្ឋាភិបាលគិតពីពលរដ្ឋតូចតាចផង ពួកគេត្រូវប្រកបរបរចិញ្ចឹមគ្រួសារ ។

ចំណែកម្ចាស់ហាងលក់ទូរស័ព្ទដៃនៅបរិវេណចេញ-ចូលច្រកព្រំដែនបានឃ្លងលឹក ប្រាប់ថា ប្រាក់ចំណូលស្មើសូន្យ តាំងពីថ្ងៃទី៧ ខែមិថុនា ។ មុនពេលបិទព្រំដែន ហាងរកចំណូលបានពី១ម៉ឺន ទៅ២ម៉ឺនបាតក្នុង១ថ្ងៃ ហើយហាងជួលទាំងបុគ្គលិកថៃ និងខ្មែរ ដោយសារមានអតិថិជនថៃផង ខ្មែរផង ។ ការលើកឡើងថា ខ្មែរទាំងអស់មិនល្អ គឺពុំត្រឹមត្រូវ ជម្លោះនេះជារឿងរបស់អ្នកមានអំណាច មិនមែនពលរដ្ឋខ្មែរ-ថៃឈ្លោះគ្នាទេ ។ ពលរដ្ឋខ្មែរគួរឱ្យស្រឡាញ់ ជួលឱ្យធ្វើការអ្វីធ្វើបានទាំងអស់ ពួកគេឧស្សាហ៍ធ្វើការចិញ្ចឹមគ្រួសារ ។ កុំយកការស្អប់ខ្ពើមក្នុងបណ្តាញសង្គមមកស្អប់ខ្ពើមក្នុងសង្គមពិត ពីព្រោះអ្នកលេងបណ្តាញសង្គមរីករាយនឹងបញ្ចេញមតិ ប៉ុន្តែធ្វើឱ្យអ្នកព្រំដែនជួបការលំបាក ។

ចំណែកពលរដ្ឋថៃនៅព្រំដែនផ្សេងទៀតនិយាយថា មុននេះ យើងមានទំនាក់ទំនងល្អជាមួយកម្ពុជា ហើយការស្អប់ខ្ពើមក្នុងបណ្តាញសង្គមពុំផ្តល់ប្រយោជន៍អ្វីឡើយក្នុងរយៈពេលយូរ ។ ហេតុនេះ ត្រូវតែមានទំនាក់ទំនងពាណិជ្ជកម្ម វិនិយោគ និងទេសចរណ៍រវាងប្រទេសទាំងពីរ ហើយពួកគេចង់ឱ្យចែកដាច់ពីគ្នារវាងបញ្ហាព្រំដែនជាមួយវិស័យផ្សេងៗ ។ ចុងក្រោយ ពលរដ្ឋថៃនៅព្រំដែនចង់ឱ្យស្ថានការណ៍ត្រឡប់មកប្រក្រតីឡើងវិញដើម្បីប្រកបរបរចិញ្ចឹមជីវិត ៕

ដាណាង ៖ ប៉ូលីសនៅទីក្រុង Da Nang ប្រទេសវៀតណាម បានរកឃើញសកម្មភាពក្លែងបន្លំនៅគ្លីនិកអន្តរជាតិ Da Nang ព្យាបាលជំងឺទូទៅ ជាកន្លែងទទួលបុគ្គលដែលមិនមានលក្ខណៈសម្បត្តិគ្រប់គ្រាន់ និងគ្មានវិជ្ជាជីវៈ ដាក់ជាវេជ្ជបណ្ឌិត និងធ្វើរោគវិនិច្ឆ័យអ្នកជំងឺក្លែងក្លាយដើម្បីបោ.កយកប្រាក់។

យោងតាមការសារព័ត៌មាន VN Express ចុះផ្សាយថ្ងៃទី17 ខែកក្កដា ឆ្នាំ2025 បានឲ្យដឹងថា កាលពីថ្ងៃអង្គារ ប៉ូលីស Da Nang បានបើកការស៊ើបអង្កេតបទល្មើសឧក្រិដ្ឋកម្មលើបុគ្គលចំនួន 7 នាក់ រួមមានអ្នកគ្រប់គ្រង និងបុគ្គលិកនៃគ្លីនិកនៅ ផ្លូវ Tran Phu 180, ក្នុងសង្កាត់ Hai Chau ពីបទ “ឆបោ.កអតិថិជនដែលជាអ្នកជំងឺ” ។ ជនសង្ស័យចំនួន៤នាក់ត្រូវបានចាប់ខ្លួន ខណៈ៣នាក់ទៀតកំពុងស្ថិតក្រោមការឃ្លាំមើលរបស់ប៉ូលីសនៅផ្ទះរបស់ពួកគេ។

គ្លីនិកខាងលើនេះ បានផ្សព្វផ្សាយសេវាកម្មថាមានដូចជា ការព្យាបាលរោគស្ត្រី, បញ្ហាតម្រងនោម ជំងឺកាមរោគ និងការរំលូតកូន។ ក្រោយការស៊ើបរបស់ប៉ូលីសគេបានរកឃើញថា ស្ថាប័ននេះបានជួលវេជ្ជបណ្ឌិតក្លែងក្លាយជាច្រើននាក់ដោយសម្ងាត់ ដែលពួកគេទាំងនោះសុទ្ធតែគ្មានអាជ្ញាប័ណ្ណផ្នែកវេជ្ជសាស្ត្រ។ ប៉ូលីសបានក៏បានពិនិត្យឃើញថា វេជ្ជបណ្ឌិតក្លែងក្លាយទាំងនេះមួយចំនួន អ្នកខ្លះមិនបានរៀនចប់សូម្បីកម្រិតវិទ្យាល័យ ប៉ុន្តែត្រូវបានគេបង្វឹកឲ្យចេះធ្វើរោគវិនិច្ឆ័យ និងចេញវេជ្ជបញ្ជាព្យាបាលទៅកាន់អ្នកជំងឺ។

ដើម្បីទទួលបានអាជ្ញាប័ណ្ណ និងចៀសវាងការបែកធ្លាយដល់ក្រសួងសុខាភិបាល គ្លីនិកនេះបានជួលគ្រូពេទ្យពិតប្រាកដប៉ុន្មាននាក់ឲ្យមកប្រចាំការបណ្ដោះអាសន្ននៅខាងមុខ ខណៈដែលនៅខាងក្នុង គ្លីនិកនេះបានកសាងផ្លូវសម្ងាត់ទៅជាន់ក្រោមដីដើម្បីនាំអ្នកជំងឺឲ្យទៅព្យាបាលជាមួយគ្រូពេទ្យក្លែងក្លាយ។

អ្នកស៊ើបអង្កេតបានរកឃើញថា គ្លីនីកខាងលើបានប្រឌិតលក្ខខណ្ឌវេជ្ជសាស្ត្រមួយចំនួនជាប្រចាំ និងបំប៉ោងតម្លៃព្យាបាល។ អ្នកជំងឺនឹងត្រូវបង់ថ្លៃដំបូងចាប់ពី 199,000 ដុងទៅ 1 លានដុង (8 ដល់ 40 ដុល្លារ) សម្រាប់រោគវិនិច្ឆ័យ ប៉ុន្តែក្រោយមកត្រូវប្រឈមនឹងការបង់ថ្លៃចន្លោះពី 10 លានទៅ 50 លានដុង (ប្រហែលជិត 400 ដល់ 2,000 ដុល្លារ) សម្រាប់ការសម្រាកព្យាបាលខ្នាតតូចមួយ។

រហូតមកដល់ពេលនេះ អាជ្ញាធរបានកំណត់អត្តសញ្ញាណជនរងគ្រោះយ៉ាងតិច 17 នាក់ និងប៉ាន់ស្មានដឹងពីប្រាក់ចំណេញដោយខុសច្បាប់ជិត 376 លានដុង (14,800 ដុល្លារ)។ ប៉ូលីស Da Nang កំពុងជំរុញជនរងគ្រោះដទៃៗទៀតដែលចា.ញ់បោ.កគ្លីនិកអន្តរជាតិ Da Nang នេះ ចូលរួមរាយការណ៍ពីករណីរបស់ពួកគេទៅក្រុមការិយាល័យប៉ូលីសស៊ើបអង្កេតឧក្រិដ្ឋកម្មឲ្យបានទាំងអស់គ្នា៕

ប្រទេសជប៉ុន ៖ កាលពីថ្ងៃទី១៥ ខែកក្កដា ឆ្នាំ២០២៥ សារព័ត៌មានបរទេសរាយការណ៍ថា ក្រសួងការពារជាតិជប៉ុនបានចេញលិខិតប្រកាសជាថ្មីពីការបង្កើនសកម្មភាពខ្លាំងក្លារបស់កងទ័ពចិនធ្វើឱ្យប៉ះពាល់ដល់សន្តិសុខជប៉ុនយ៉ាងធ្ងន់ធ្ងរ ខណៈយន្តហោះកងទ័ពចិនធ្លាប់រំលោ.ភដែនអាកាសជប៉ុន ។ លិខិតប្រកាសនេះបានផ្សព្វផ្សាយនៅថ្ងៃទី១៥ ខែកក្កដា ដោយបញ្ជាក់ថា ចិនបានបង្កើនសកម្មភាពកងទ័ពនៅទូទាំងតំបន់ និងក្បែរទឹកដីជប៉ុន ។

យន្តហោះកងទ័ពចិន១គ្រឿងបានហោះចូលដែនអាកាសជប៉ុន កាលពីខែសីហា ឆ្នាំ២០២៤ ។ បន្ទាប់មក នៅខែកញ្ញា ឆ្នាំ២០២៤ នាវាផ្ទុកយន្តហោះ និងនាវាចម្បាំងចិន ២គ្រឿងទៀតបានបើកឆ្លងកាត់កោះចំនួន២របស់ជប៉ុន ដែលស្ថិតនៅក្បែរតៃវ៉ាន់ ។ កងទ័ពរំដោះប្រជាជនចិនបានធ្វើសកម្មភាពប៉ះពាល់ដល់សន្តិសុខជប៉ុនយ៉ាងខ្លាំង ហើយទង្វើរបស់ចិនគួរឱ្យបារម្ភណាស់ ។

មហិច្ឆតាកងទ័ពចិន គឺជាបញ្ហាប្រឈមយុទ្ធសាស្ត្រដ៏ធំបំផុត និងពុំធ្លាប់កើតឡើងពីមុន ដែលនឹងប៉ះពាល់សន្តិសុខជប៉ុន និងពិភពលោក ។ កាលពីសប្តាហ៍ទី២ ខែកក្កដានេះ អាជ្ញាធរទីក្រុងតូក្យូបញ្ជាក់ថា មានយន្តហោះចម្បាំងចិន១គ្រឿងបានហោះក្បែរយន្តហោះស៊ើបការណ៍ជប៉ុន ដែលឆ្ងាយពីគ្នាត្រឹមតែ៣០ម៉ែត្រនៅសមុទ្រចិនខាងកើត ។

កាលពីឆ្នាំ២០២៤ នាវាចិនបានធ្វើដំណើរក្បែរកោះ Senkaku ឬចិនហៅថា កោះ Diaoyu រហូតដល់៣៥៥លើក ។ នៅឆ្នាំដដែល ជប៉ុនបានពិនិត្យឃើញនាវាផ្ទុកយន្តហោះចិន ចំនួន២គ្រឿងបានបើកឆ្លងកាត់មហាសមុទ្រប៉ាស៊ីហ្វិកជាលើកដំបូង និងបើកចូលតំបន់សេដ្ឋកិច្ច EEZ ប៉ុន្តែរដ្ឋាភិបាលចិនអះអាងថា វាគ្រាន់តែជាការហ្វឹកហាត់ធម្មតា ។

កងទ័ពចិនថែមទាំងធ្វើសមយុទ្ធជាមួយកងទ័ពរុស្ស៊ី ដែលបង្ហាញយ៉ាងច្បាស់ថា ចិនមានបំណងបង្ហាញអំណាចរបស់ខ្លួនលើជប៉ុន ។ ជាមួយគ្នានេះ លិខិតប្រកាសរបស់ជប៉ុនបញ្ជាក់ថា សកម្មភាពរបស់កូរ៉េខាងជើង ក៏គំរាមកំហែងសន្តិសុខជប៉ុនខ្លាំងដែរ ។

ប្រទេសជប៉ុនស្ថិតក្នុងដំណាក់ការបង្កើនថវិកាការពារជាតិស្របតាមស្តង់ដារស្មើ២% នៃផលិតផលក្នុងស្រុកសរុប (GDP) តាមការកំណត់របស់អង្គការសន្ធិសញ្ញាអាត្លង់ទិកខាងជើង (NATO) ។ ក្រៅពីនេះ ជប៉ុនបានសហការផ្នែកកងទ័ពជាមួយអាមេរិក និងបណ្តាប្រទេសជាមិត្តរបស់អាមេរិកក្នុងតំបន់ ដើម្បីឱ្យកងទ័ពជប៉ុន-អាមេរិកអាចទប់ទល់ការគំរាមផ្សេងៗយ៉ាងរហ័ស ដូចជា ៖ ករណីចិនឈ្លានពានតៃវ៉ាន់ ៕

ប្រទេសថៃ ៖ កាលពីថ្ងៃទី១៦ ខែកក្កដា ឆ្នាំ២០២៥ មេបញ្ជាការយោធភូមិភាគ២ លោក ប៊ុនស៊ីន ផាកក្លាង រាយការណ៍ថា កងទ័ពថៃចំនួន១៤នាក់ បានដើរល្បាតនៅតំបន់ភ្នំ៤៨១ ស្ថិតនៅស្រុកណាមយឺន ខេត្តឧប៊ុនរ៉ាជធានី ជាប់ព្រំដែនប្រទេសកម្ពុជា ស្រាប់តែកងទ័ពថៃ៣នាក់ ដើរជាន់មីនបន្សល់ទុកក្នុងសមរភូមិចាស់បណ្តាលឱ្យរងរបួស ក្នុងនោះកងទ័ពម្នាក់រងរបួសកជើងធ្ងន់ធ្ងរ រីឯកងទ័ព២នាក់ទៀតរងរបួសស្រាល ។ បន្ទាប់មក កងទ័ពដែលដើរល្បាតជាមួយគ្នាក៏បានទាក់ទងទៅគ្រូពេទ្យដើម្បីសុំការសង្គ្រោះបឋមមុនពេលបញ្ជូនទៅមន្ទីរពេទ្យ ។

សារព័ត៌មាន Khaosod រាយការណ៍ថា កងទ័ពថៃបានដើរល្បាតក្នុងតំបន់ធ្លាប់ល្បាតជាប្រចាំនៅស្រុកណាមយឺន ខេត្តឧប៊ុនរ៉ាជថានី កាលពីថ្ងៃទី១៦ ខែកក្កដា ប៉ុន្តែកងទ័ព៣នាក់ បានដើរជាន់មីននៅតំបន់ភ្នំ៤៨១ បណ្តាលឱ្យរងរបួសធ្ងន់ និងស្រាល បើតាមការស៊ើបអង្កេតរបស់កងទ័ព គឺវាជាគ្រាប់មីនដែលបន្សល់ទុកក្នុងសមរភូមិចាស់ ។ ក្រោយមក កងទ័ពរងរបួសទាំង៣នាក់ត្រូវបានបញ្ជូនភ្លាមៗទៅកាន់មន្ទីរពេទ្យណាមយឺន ដើម្បីឱ្យគ្រូពេទ្យជួយសង្គ្រោះ ។

ខាងមន្ទីរពេទ្យណាមយឺន ក៏បានបញ្ជូនកងទ័ពទាំង៣នាក់ទៅសង្គ្រោះបន្តនៅមន្ទីរពេទ្យ Fort Sunpasitthiprasong នៅស្រុកវ៉ារីនឆាំរ៉ាប ខេត្តឧប៊ុនរ៉ាជថានី តាមរយៈឧទ្ធម្ភាគចក្រ រួចហើយ គ្រូពេទ្យបញ្ជូនកងទ័ព៣នាក់ទៅកាន់បន្ទប់សង្គ្រោះបន្ទាន់ និងវះកាត់កងទ័ពម្នាក់ដែលរងរបួសធ្ងន់ ។

ដោយឡែក សារព័ត៌មានថៃ Nation TV រាយការណ៍ថា គ្រាប់មីននៅតំបន់ភ្នំ៤៨១ អាចជាគ្រាប់មីនដែលកម្ពុជាយកមកដាក់ថ្មីក្នុងសមរភូមិចាស់ដែលបានដោះគ្រាប់មីនរួចហើយ ។ វាជាគ្រាប់មីនថ្មីផលិតនៅប្រទេសវៀតណាម ហើយសារព័ត៌មាននេះចោទប្រកាន់ថា កម្ពុជាបានយកគ្រាប់មីនមកដាក់ជាថ្មីក្នុងសមរភូមិចាស់បណ្តាលឱ្យកងទ័ពថៃដើរជាន់រងរបួស ។

វាជាការទម្លាក់កំហុស និងចោទប្រកាន់មកលើកម្ពុជាដោយគ្មានភស្តុតាង ស្របពេលស្ថានការណ៍ព្រំដែនកម្ពុជា-ថៃពុំទាន់ធូរស្រាល ។ កម្ពុជាពុំចង់បង្កសង្គ្រាមជាមួយប្រទេសជិតខាងទេ គឺមានតែប្រទេសថៃប៉ុណ្ណោះដែលតែងតែគំរាមកំហែងប្រើប្រាស់កម្លាំងកងទ័ពជាបន្តបន្ទាប់ និងបិទព្រំដែនដើម្បីដាក់សម្ពាធសេដ្ឋកិច្ចមកលើកម្ពុជា ៕