ប្រទេសថៃ ៖ តាមការផ្សព្វផ្សាយរបស់សារព័ត៌មានថៃនៅថ្ងៃទី៩ ខែកក្កដា ឆ្នាំ២០២៥ ឱ្យដឹងថា មេបញ្ជាការកងទ័ពថៃភូមិភាគ២ លោក ប៊ុនស៊ីន ផាកក្លាង បានស្នើឱ្យរដ្ឋាភិបាលកម្ពុជា-ថៃដោះស្រាយបញ្ហាព្រំដែន ហើយលោកបញ្ជាក់ពីថៃមានគ្រា.ប់កាំភ្លើ.ងគ្រប់គ្រាន់សម្រាប់ការពារអធិបតេយ្យ ។ លោកជឿជាក់ថា ជម្លោះព្រំដែននឹងបញ្ចប់មុនពេលលោកចូលនិវត្តន៍នៅខែតុលា ខាងមុខ ។

លោក ប៊ុនស៊ីន ផាកក្លាង មេបញ្ជាការកងទ័ពភូមិភាគ២ បានចុះពិនិត្យមើលតំបន់ព្រំដែនកម្ពុជា-ថៃ នៅខេត្តសុរិន្ទ ស៊ីសាកេត និងឧប៊ុនរ៉ាជថានី ដោយបានយកសម្ភារៈព្រះរាជអំណោយមកប្រគល់ឱ្យកងទ័ពនៅព្រំដែន ។ លោកបានផ្តាំផ្ញើឱ្យកងទ័ពទាំងអស់បំពេញតួនាទីតាមការបញ្ជាពីមេបញ្ជាការកងទ័ពជើងគោក និងថែទាំសុខភាព ។

លោកបាននិយាយពីស្ថានការណ៍ព្រំដែនកម្ពុជា-ថៃ និងការធ្វើរបងនៅប្រាសាទតាមាន់ធំថា ភាគីទាំងពីរត្រូវតែឈានដល់ការយល់ព្រមគ្នាទៅវិញទៅមកលើបញ្ហាព្រំដែន ពីព្រោះការធ្វើរបងអាចបង្កជម្លោះ ។ លោករង់ចាំឱ្យថ្នាក់ដឹកនាំជជែកគ្នា និងយល់ព្រមជាមុន ពីព្រោះការធ្វើរបងភ្លាមៗអាចមានជម្លោះ ។ កម្ពុជា និងថៃបានជជែករហូតមក ជាពិសេស បញ្ហាមិនយល់គ្នាត្រូវតែជជែកដើម្បីកុំឱ្យបញ្ហាកាន់តែធ្ងន់ធ្ងរ ពេលខ្លះ ភាគីទាំងពីរមិនយល់ពីទីតាំងល្បាត ឬការផ្លាស់ប្តូរកងទ័ព ។

កងទ័ពស្នើឱ្យភាគីទាំងពីរជជែកគ្នារហូតដល់ស្ថានការណ៍ល្អប្រសើរ ពេលនេះ ថៃរង់ចាំព័ត៌មានការចូលរួមកិច្ចប្រជុំគណៈកម្មការព្រំដែនតំបន់ (RBC) កម្ពុជា-ថៃ ពីមេដឹកនាំកម្ពុជា ខណៈថៃបានត្រៀមខ្លួនរួចហើយ ។ ប្រសិនបើប្រជុំនៅថ្ងៃស្អែក (ថ្ងៃទី១០ ខែកក្កដា) គឺថៃនឹងចូលរួមប្រជុំ ពីព្រោះថៃត្រៀមខ្លួនជានិច្ច ។

លោកក៏បានអរគុណដល់ពលរដ្ឋថៃដែលបានមកលេងប្រាសាទនានានៅតាមព្រំដែន ។ រីឯការចូលនិវត្តន៍របស់លោកនៅខែតុលា គ្មានបញ្ហាទេ ពីព្រោះលោកជឿជាក់លើថ្នាក់លើអាចជ្រើសរើសអ្នកមានចំណេះដឹង សមត្ថភាពមកកាន់តំណែងជាមេបញ្ជាការកងទ័ពទី២ ជំនួសលោក ។ លោកពុំបារម្ភពីរដ្ឋាភិបាល កងទ័ពមានតួនាទីផ្តល់សន្តិសុខដល់ប្រទេស រីឯបញ្ហានយោបាយត្រូវដោះស្រាយតាមប្រព័ន្ធប្រជាធិបតេយ្យ កងទ័ពត្រៀមខ្លួនបំពេញតួនាទី ទោះផ្លាស់ប្តូរនាយករដ្ឋមន្ត្រីក្តី ប៉ុន្តែសូមឱ្យនាយករដ្ឋមន្ត្រីមានគោលនយោបាយច្បាស់លាស់ និងធ្វើដើម្បីជាតិ ។

លោកបញ្ជាក់ថា ស្ថានការណ៍នឹងល្អប្រសើរឡើងអាស្រ័យលើគោលនយោបាយរបស់មេដឹកនាំកម្ពុជា ពីព្រោះថៃគ្មានបញ្ហាទេ ជាពិសេស កម្ពុជានឹងដោះស្រាយបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ នៅតុលាការយុត្តិធម៌អន្តរជាតិ (ICJ) តើវានឹងទៅជាបែបណា ។ នេះជាតួនាទីរបស់រដ្ឋាភិបាលដោះស្រាយបញ្ហា បើគ្មានអ្វីផ្លាស់ប្តូរ កងទ័ពនឹងគ្រប់គ្រងតំបន់ដូចមុន ។

ចុងក្រោយ លោកបានផ្តាំផ្ញើឱ្យរដ្ឋាភិបាលប្រទេសទាំងពីរដោះស្រាយបញ្ហាព្រំដែនដោយជោគជ័យដើម្បីសេចក្តីសុខពលរដ្ឋខ្មែរ និងថៃ ហើយលោកថា បច្ចុប្បន្ន ប្រទេសថៃមានគ្រាប់កាំភ្លើងគ្រប់គ្រាន់ដើម្បីការពារអធិបតេយ្យ ៕

ប្រទេសថៃ ៖ ក្រោយពីបិទព្រំដែនធ្វើឱ្យថៃខ្វះខាតកម្លាំងពលកម្មយ៉ាងខ្លាំង ជាពិសេស ខ្វះពលករបេះផ្លែឈើនៅតាមចម្ការ រដ្ឋាភិបាលថៃនឹងបញ្ជូនអ្នកទោ.ស និងកងទ័ពមកជួយបេះផ្លែមៀនពលរដ្ឋដើម្បីដោះស្រាយបញ្ហាខ្វះពលករ ។ ក្រៅពីនេះ រដ្ឋាភិបាលថៃក៏បានបង្កើតទីតាំងក្នុងស្រុកទទួលទិញផ្លែឈើ និងស្នើឱ្យហាងលក់ទំនិញ 7-Eleven ចំនួន៨,២០០សាខាជួយទិញផ្លែឈើ ពីព្រោះពិបាករកទីផ្សារនាំចេញទៅក្រៅប្រទេស ។ នេះបើតាមការផ្សាយរបស់សារព័ត៌មាន Chiang Mai News នៅថ្ងៃទី៩ ខែកក្កដា ឆ្នាំ២០២៥ ។

លោក អនុគូល ព្រឹក្សានុសាក់ អ្នកនាំពាក្យរដ្ឋាភិបាលថៃឱ្យដឹងថា រដ្ឋាភិបាល និងភ្នាក់ងារពាក់ព័ន្ធបានជួយចែកចាយផ្លែឈើកសិករនៅភាគខាងកើតនាចុងរដូវ ដោយសារការបិទព្រំដែនពុំអាចនាំចេញផ្លែឈើទៅប្រទេសកម្ពុជា ។ កន្លងមក រដ្ឋាភិបាលបានជួយចែកចាយផ្លែឈើកសិករ ប្រមាណ១ម៉ឺនតោន តាមរយៈការរៀបចំកម្មវិធីផ្សេងៗ ដូចជា ៖ សហការជាមួយផ្សារ១៣កន្លែងចែកចាយទុរេន និងសហការជាមួយក្រុមហ៊ុនឯនជនជួយទិញមង្ឃុត មៀន ម្នាស់ យកទៅធ្វើជាផ្លែឈើក្រៀម និងភេសជ្ជៈលើយន្តហោះ ។

រដ្ឋាភិបាលបានសហការជាមួយក្រុមហ៊ុនឯកជនឱ្យជួយទិញផ្លែឈើកសិករយកទៅលក់នៅផ្សារ Makro និងហាងលក់ទំនិញ Lotus ព្រមទាំងទាក់ទាញក្រុមហ៊ុនឯកជនចំនួន៤០ ឱ្យចុះឈ្មោះក្នុងក្រុម SET50 ទទួលទិញផ្លែឈើថៃ ក៏ដូចជាទាក់ទងទៅកាន់ហាងលក់ទំនិញរាយ និងហាងក្នុងតំបន់ជួយទិញផ្លែឈើ ។ ក្រៅពីនេះ ក៏បានស្នើឱ្យមន្ត្រីរាជការជួយទិញផងដែរ ស្របពេលផ្លែឈើថៃផ្តល់ទិន្នផលត្រូវដាក់លក់លើទីផ្សារ ។

លោក អនុគូល បន្តថា ផ្លែឈើនៅភាគខាងកើតនឹងបញ្ចប់ការប្រមូលផល ខណៈនៅភាគខាងជើងវិញ ផ្លែមៀន ស្វាយ គូលែន និងម្នាស់ដល់ពេលប្រមូលផល ។ រដ្ឋាភិបាល និងក្រសួងពាណិជ្ជកម្មបានទំនាក់ទំនងទៅកងទ័ពឱ្យបញ្ជូនកម្លាំងមកជួយបេះផ្លែឈើ ជាពិសេស បេះមៀន ពីព្រោះឆ្នាំនេះ មៀនផ្តល់ផលច្រើន ដែលនឹងជួយកាត់បន្ថយការចំណាយដើមទុនកសិករ និងដោះស្រាយបញ្ហាខ្វះពលករ ។ រដ្ឋាភិបាលក៏បានទាក់ទងទៅពន្ធនាគារផងដែរឱ្យបញ្ជូនអ្នកទោសមកជួយបេះមៀន ។

រដ្ឋាភិបាលនឹងជំរុញការនាំចេញផ្លែមៀនទៅកាន់ទីផ្សារថ្មី គឺឥណ្ឌា ដោយសារពលរដ្ឋឥណ្ឌាចូលចិត្តមៀនថៃ និងនាំចេញមៀនទៅទីផ្សារមជ្ឈិមបូព៌ា ។ រដ្ឋាភិបាលនឹងនាំចេញផ្លែឈើរសជាតិផ្អែមសម្រាប់ជនជាតិមូស្លីមកាន់សីលក្នុងខែរ៉ាម៉ាដន ក៏ដូចជានាំចេញផ្លែឈើទៅចិន រដ្ឋាភិបាលជឿជាក់ថា នៅតាមទីក្រុង និងបណ្តាខេត្តរបស់ចិនត្រូវការផ្លែឈើច្រើន ។

រដ្ឋាភិបាលនឹងជួយទិញផ្លែឈើកសិករជាបន្តបន្ទាប់ដើម្បីបញ្ជូនទៅហាងលក់ទំនិញ 7-Eleven ចំនួន៨,២០០សាខានៅទូទាំងប្រទេស ។ ហេតុនេះ សូមកសិករនៅភាគខាងជើង និងខាងត្បូងដែលប្រមូលផលផ្លែឈើជឿជាក់លើរដ្ឋាភិបាលក្នុងការស្វែងរកទីផ្សារផ្លែឈើឱ្យបានច្រើនបំផុត ៕

ប្រទេសថៃ ៖ កាលពីថ្ងៃទី៨ ខែកក្កដា ឆ្នាំ២០២៥ សារព័ត៌មានថៃរាយការណ៍ថា អគ្គនាយកនៃនាយកដ្ឋានគយថៃ និងមន្ត្រីពាក់ព័ន្ធបានចុះទៅជួបពលរដ្ឋដើម្បីស្តាប់ផលប៉ះពាល់ដោយសារការបិទព្រំដែនកម្ពុជា-ថៃអស់រយៈពេលជាង១ខែ ហើយឃើញថា បើគិតត្រឹមតែ១៤ថ្ងៃ គឺថៃបានបាត់បង់ប្រាក់ចំណូលសេដ្ឋកិច្ច រហូតដល់ជាង១ម៉ឺនលានបាត ។ មុនពេលបិទព្រំដែន ប្រទេសថៃបាននាំចេញទំនិញមកកម្ពុជា ស្មើទឹកប្រាក់ចំនួន២ម៉ឺនលានបាតក្នុង១ខែ ។

កាលពីថ្ងៃទី៨ ខែកក្កដា នៅច្រកព្រំដែនបានហាតឡិក ស្ថិតក្នុងឃុំហាតឡិក ស្រុកឃ្លងយ៉ៃ ខេត្តត្រាត (ទល់មុខច្រកទ្វារព្រំដែនអន្តរជាតិចាំយាម ខេត្តកោះកុង) លោក ធីរ៉ាត់ អាត់តាណាវ៉ានិត អគ្គនាយកនៃនាយកដ្ឋានគយ និងមន្ត្រីពាក់ព័ន្ធបានធ្វើដំណើរមកពិនិត្យស្ថានការណ៍ព្រំដែនបានហាតឡិក ដែលមានមន្ត្រីនាយកដ្ឋានគយស្រុកឃ្លងយ៉ៃ មកទទួលស្វាគមន៍ និងនាំដើរពិនិត្យមើលនៅបរិវេណព្រំដែន ។ ព្រំដែនបានហាតឡិក ត្រូវបានបិទការឆ្លងដែនចេញ-ចូល និងត្រូវហាមនាំចេញទំនិញថៃទៅកម្ពុជា ហើយក្រុមមន្ត្រីគយក៏បានដើរពិនិត្យមើលហាងលក់ទំនិញក្នុងផ្សារហាតឡិក ផងដែរ ។

ក្រោយការពិនិត្យមើលស្ថានការណ៍ឃើញថា ហាងលក់ទំនិញជាង៩០% បានបិទទ្វារ ដោយសារគ្មានការឆ្លងដែនរវាងកម្ពុជា និងថៃ ខណៈនៅតំបន់ទំនប់ឆ្នេរតូចដែលជាផ្លូវទឹកតភ្ជាប់ការនាំចូលអាហារសមុទ្រមកឃុំបានហាតឡិក ដែលអ្នកនាំចូលភាគច្រើនជាពលរដ្ឋខ្មែរ គឺបច្ចុប្បន្ន ពុំអាចនាំចូលអាហារសមុទ្រមកថៃបានទេ ។

លោកស្រី វិផា សុណេត ប្រធានសភាពាណិជ្ជកម្មខេត្តត្រាត និយាយថា អាជីវកម្មផ្សេងៗ ក៏ដូចជាឈ្មួញថៃបានរងផលប៉ះពាល់ដោយសារពុំអាចនាំចេញទំនិញទៅកម្ពុជា ។ បើថៃនៅតែពុំអាចនាំចេញទំនិញទៅកម្ពុជាលើសពី១ខែ គឺរថយន្តកុងតឺន័ររបស់ឈ្មួញនឹងត្រូវបានរឹបអូស ហើយខាតបង់យ៉ាងខ្លាំង ។

ក្រោយការចុះពិនិត្យមើលស្ថានការណ៍នៅព្រំដែនបានហាតឡិក លោក ធីរ៉ាត់ អាត់តាណាវ៉ានិត អគ្គនាយកនៃនាយកដ្ឋានគយបាននិយាយជាមួយអ្នកសារព័ត៌មានថា លោកធ្វើដំណើរមកព្រំដែនកម្ពុជា-ថៃ ក្នុងខេត្តត្រាត ខេត្តចាន់បុរី និងខេត្តផ្សេងៗនៅជាប់ព្រំដែនកម្ពុជា ដើម្បីស្តាប់ផលប៉ះពាល់ និងសរុបលទ្ធផលបញ្ជូនទៅឱ្យរដ្ឋាភិបាល និងភ្នាក់ងារសន្តិសុខពិចារណាពីផលប៉ះពាល់ដែលកើតឡើងដោយសារការបិទព្រំដែនរយៈពេល១៤ថ្ងៃ ។

កងទ័ពថៃបានបិទព្រំដែនជាមួយកម្ពុជាជាង១ខែ ប៉ុន្តែបើគិតការបិទព្រំដែនត្រឹម១៤ថ្ងៃ គឺថៃបានបាត់បង់ប្រាក់ចំណូលសេដ្ឋកិច្ចរហូតដល់ជាង១ម៉ឺនលានបាត ។ មុនពេលបិទព្រំដែន ប្រទេសថៃបាននាំចេញទំនិញមកកម្ពុជា ស្មើទឹកប្រាក់ចំនួន២ម៉ឺនលានបាតក្នុង១ខែ ។ នាយកដ្ឋានគយជ្រាបពីផលប៉ះពាល់ផ្សេងៗ ប៉ុន្តែនាយកដ្ឋានគយត្រូវអនុវត្តតាមគោលនយោបាយរបស់ភ្នាក់ងារសន្តិសុខ ហើយនាយកដ្ឋានគយបានស្នើឱ្យមានការដោះស្រាយបញ្ហាបន្ត ពីព្រោះបើថៃបិទព្រំដែនបន្តទៀតនឹងធ្វើឱ្យថៃកាន់តែរងផលប៉ះពាល់ខ្លាំងឡើង ។

គួរបញ្ជាក់ថា ភ្នាក់ងារសន្តិសុខដែលទទួលខុសត្រូវការងារព្រំដែន រួមមាន ៖ កងទ័ពជើងគោក កងទ័ពជើងទឹក ក្រសួងការពារជាតិ ក្រសួងមហាផ្ទៃ កងកម្លាំងរក្សាសន្តិសុខប្រទេសថៃ និងការិយាល័យក្រុមប្រឹក្សាសន្តិសុខជាតិ ៕