ប្រទេសថៃ ៖ ប្រទេសថៃត្រូវបានពិភពលោកចាត់ទុកថា គឺជាទីតាំងឆបោកតាមអនឡាញដ៏ធំ បើទោះជាថៃព្យាយាមទម្លាក់កំហុសមកលើកម្ពុជាក៏ដោយ ។ មេដឹកនាំរបស់ថៃទាំងរដ្ឋាភិបាល កងទ័ព និងសមត្ថកិច្ច សុទ្ធតែពុំទទួលស្គាល់ការពិត ហើយតែងតែយកបញ្ហាឧក្រិដ្ឋកម្មឆ្លងដែន និងការឆបោកអនឡាញដែលពុំអាចដោះស្រាយក្នុងប្រទេសរបស់ខ្លួនមកចោទប្រកាន់កម្ពុជា ។

ឧក្រិដ្ឋកម្មឆ្លងដែន និងការឆបោកអនឡាញបានកើតឡើងនៅប្រទេសថៃម្តងហើយម្តងទៀត ប៉ុន្តែមេដឹកនាំ កងទ័ព និងសមត្ថកិច្ចថៃ បែរជាចោទប្រកាន់ថា កម្ពុជា គឺជាទីតាំងការឆបោកអនឡាញដ៏ធំបំផុតលើពិភពលោក ដោយថៃអះអាងតាមរបាយការណ៍របស់អង្គការសហប្រជាជាតិ (UN) ។ ការពិត ប្រទេសដែលទទួលបានលិខិតដាស់តឿនរឿងការឆបោកអនឡាញពី UN គឺថៃខ្លួនឯង ពុំមែនកម្ពុជាទេ ។

ចំណែកការផ្សព្វផ្សាយរបស់សារព័ត៌មានបរទេសកន្លងមកក៏បញ្ជាក់ដែរថា មានជនបរទេសរាប់ពាន់នាក់ត្រូវបានគេបោកប្រាស់ឱ្យទៅធ្វើការនៅប្រទេសថៃ ហើយការឆបោកអនឡាញចុងក្រោយបំផុតដែលសមត្ថកិច្ចថៃចាប់បាន គឺជាជនជាតិថៃប្រព្រឹត្តល្មើសលើទឹកដីថៃ ។

ក្រោយមក ក៏មានបុគ្គលសំខាន់ចេញមកបកអាក្រាតទៅកាន់រដ្ឋាភិបាលថៃ គឺលោក ណុបផាដូន អ៊ីនណា សមាជិកព្រឹទ្ធសភាបានរិះគន់ត្រង់ៗទៅរដ្ឋាភិបាលថៃថា បើរដ្ឋាភិបាលមានវិធានការច្បាស់លាស់លើក្រុមឆបោកតាមអនឡាញ និងបណ្តាញ Call Center គឺពុំពិបាកចាត់ការទេ ។ បើរដ្ឋាភិបាលថៃចាត់ការពុំបាន សូមកុំចោទប្រកាន់ប្រទេសផ្សេង ។

ចំណែកលោក ខាន់វិ សឺបសាំង សមាជិកសភាមកពីគណបក្សនយោបាយថៃនិយាយថា វិធានការរបស់រដ្ឋាភិបាលថៃគ្មានប្រយោជន៍ទេ ក្រៅពីធ្វើឱ្យពលរដ្ឋនៅតាមព្រំដែនជួបទុក្ខលំបាក ថែមទាំងធ្វើឱ្យក្រុមឧក្រិដ្ឋកម្មឆ្លងដែនពីថៃចូលកម្ពុជា និងបង្កើតបញ្ហាឱ្យកម្ពុជាថែមទៀត ។

ដោយឡែក ភ្នាក់ងារទប់ស្កាត់ការឆបោកតាមអនឡាញរបស់ថៃរាយការណ៍ថា បញ្ហាការឆបោកតាមអនឡាញនៅប្រទេសថៃកើនឡើងយ៉ាងខ្លាំង និងមានរឿងក្តីឆបោករហូតដល់ជិត២លានករណី ចាប់ពីថ្ងៃទី១ ខែឧសភា ឆ្នាំ២០២៣ ដល់ថ្ងៃទី២៧ ខែមិថុនា ឆ្នាំ២០២៥ ។

អ្វីគួរឱ្យភ្ញាក់ផ្អើលជាងនេះ គឺលោក ថាក់ស៊ីន ស៊ីណាវ៉ាត្រា ឪពុករបស់លោកស្រី ផេងថងថាន ស៊ីណាវ៉ាត់ ដែលទើបធ្លាក់ពីតំណែង និយាយថា លោកមានទិន្នន័យពាក់ព័ន្ធនឹងឧក្រិដ្ឋកម្មឆ្លងដែននៅថៃ ហើយលោកសន្យាបោសសម្អាតឧក្រិដ្ឋកម្មឆ្លងដែននៅថៃឱ្យអស់ ។ ការលើកឡើងរបស់លោក ថាក់ស៊ីន ទទួលបានការគាំទ្រយ៉ាងខ្លាំងពីលោកស្រី ស៊ុដារ៉ាត់ កេយូរ៉ាផាន់ ប្រធានគណបក្សថៃសាងថៃ ។

លោកស្រីបានអំពាវនាវឱ្យលោក ថាក់ស៊ីន ជួយចាត់វិធានការមន្ត្រីរាជការពុករលួយដែលទទួលបានផលប្រយោជន៍ពីក្រុមឧក្រិដ្ឋកម្មឆ្លងដែននៅថៃ ពីព្រោះលោកស្រីឃើញលោក ថាក់ស៊ីន ស្គាល់ក្រុមនេះច្បាស់ ។

សរុបមក ការលើកឡើងទាំងអស់បង្ហាញថា មេដឹកនាំថៃចាប់ពីថ្នាក់កំពូលរហូតដល់ថ្នាក់ក្រោមខ្វះជំនាញការងារ ពុំអាចដោះស្រាយបញ្ហាឧក្រិដ្ឋកម្មឆ្លងដែន និងការឆបោកអនឡាញ ។ លើសពីនេះ មេដឹកនាំថៃនៅហ៊ានប្រឌិតរឿងចោទប្រកាន់កម្ពុជាថែមទៀត ដែលនេះជានិស្ស័យមិនល្អរបស់ជនជាតិថៃដែលកម្ពុជាមើលឃើញ ហើយប្រទេសនានាលើពិភពលោកក៏បានមើលឃើញនិស្ស័យមិនល្អរបស់ជនជាតិថៃដែរ ៕

ប្រទេសថៃ ៖ អ្នកជំនាញសេដ្ឋកិច្ចថៃជឿជាក់ថា ការបិទព្រំដែនកម្ពុជា-ថៃនឹងពុំអាចដាក់សម្ពាធលើកម្ពុជាទេ ប៉ុន្តែវាកាន់តែធ្វើឱ្យពលរដ្ឋថៃលំបាកខ្លាំងឡើង មិនថាការបាត់បង់ការងារ និងចំណូល រហូតធ្វើឱ្យពលរដ្ឋថៃគ្មានប្រាក់សងបំណុលធនាគារ ឬបង់រំលោះផ្ទះ រថយន្ត ។ ពលរដ្ឋថៃដែលរងផលប៉ះពាល់ខ្លាំងជាងគេដោយសារការបិទព្រំដែន គឺពលរដ្ឋរស់នៅខេត្តជាប់កម្ពុជា ចំនួន៧ រួមមាន ៖ ខេត្តស្រះកែវ ចាន់បុរី ត្រាត សុរិន្ទ ស៊ីសាកេត ឧប៊ុនរ៉ាជថានី និងបុរីរាំ ។

នាពេលថ្មីៗនេះ មានសំណួរពាក់ព័ន្ធនឹងការបិទព្រំដែនកម្ពុជា-ថៃជាឯកតោគីពីសំណាក់កងទ័ពថៃថា តើវិធានការនេះអាចដាក់សម្ពាធលើកម្ពុជាដែរឬទេ? អ្នកជំនាញសេដ្ឋកិច្ចថៃនិយាយថា វិធានការរបស់ថៃពុំបានដាក់សម្ពាធកម្ពុជាឡើយ វាបែរជាធ្វើឱ្យពលរដ្ឋថៃរងផលប៉ះពាល់ និងជួបទុក្ខលំបាកទៅវិញ ពីព្រោះពលរដ្ឋថៃដែលគាំទ្រឱ្យកងទ័ពបិទព្រំដែន គឺពួកគេពុំរស់នៅព្រំដែនទេ ។ ហេតុនេះ ទើបពួកគេពុំដឹងថា អ្នករស់នៅព្រំដែនត្រូវប្រឈមមុខនឹងបញ្ហាអ្វីខ្លះ ។

ប៉ុន្តែវាអាចជានយោបាយរបស់រដ្ឋាភិបាលថៃ ឬបុគ្គលណាម្នាក់ដែលពុំបានបញ្ជាក់ពីមូលហេតុច្បាស់លាស់នៃការបិទព្រំដែន ។ អ្នកជំនាញសេដ្ឋកិច្ចថៃបន្តថា យើងគួរតែដឹងថា កម្ពុជាពុំបាននាំចូលទំនិញពីប្រទេសថៃតែមួយទេ ពីព្រោះដៃគូពាណិជ្ជកម្មនាំចូលទំនិញភាគច្រើនរបស់កម្ពុជា គឺប្រទេសចិន ដែលមានអត្រាពី៧០% ទៅ៨០% ។ ដូច្នេះ ថៃគួរចរចាជាមួយកម្ពុជាដោយសន្តិវិធី និងគ្រប់ជ្រុងជ្រោយ វាល្អជាងការបិទព្រំដែន ។

គួរឱ្យអាណិតពលរដ្ឋថៃដែលត្រូវមកលំបាកគ្មានការងារធ្វើ ដោយសារទង្វើរបស់កងទ័ពថៃ ។ ការបិទព្រំដែនកម្ពុជា-ថៃជាឯកតោភាគីរបស់កងទ័ពថៃធ្វើឱ្យពលរដ្ឋថៃបាត់បង់ចំណូល រហូតដល់ពលរដ្ឋថៃមួយក្រុមបង្ខំចិត្តឆ្លងដែនខុសច្បាប់មកប្រទេសកម្ពុជាដើម្បីស្វែងរកការងារធ្វើ កាលពីយប់ថ្ងៃទី១៥ ខែកក្កដា ឆ្នាំ២០២៥ ។ ប៉ុន្តែពលរដ្ឋថៃទាំងនេះត្រូវបានអាជ្ញាធរខ្មែរនៅស្រុកម៉ាឡៃ ខេត្តបន្ទាយមានជ័យ ចាប់ខ្លួនបាន ខណៈកន្លងមក ក៏មានពលរដ្ឋថៃជាច្រើនក្រុមទៀតលួចឆ្លងដែនខុសច្បាប់មកកម្ពុជាដែរ ។

ពលរដ្ឋថៃនៅតាមព្រំដែន ជាពិសេស ក្រុមឈ្មួញ និងអាជីវករបានសំណូមពរម្តងហើយម្តងទៀតទៅកាន់រដ្ឋាភិបាល និងកងទ័ព ឱ្យបើកព្រំដែនកម្ពុជា-ថៃឡើងវិញយ៉ាងឆាប់រហ័សដើម្បីឱ្យមានការលក់ដូរទំនិញ និងការឆ្លងដែនចេញ-ចូលទាំងពលរដ្ឋខ្មែរ-ថៃ និងភ្ញៀវទេសចរបរទេស ។ ពួកគេចង់ឃើញស្ថានការណ៍ព្រំដែនរវាងប្រទេសទាំងពីរត្រឡប់មករកភាពប្រក្រតី និងពុំគាំទ្រការបិទព្រំដែន ពីព្រោះអ្នកដែលគាំទ្រការបិទព្រំដែនភាគច្រើនរស់នៅទីក្រុងបាងកក និងបណ្តាខេត្តផ្សេងៗដែលពុំយល់ពីផលប៉ះពាល់ ។

ពលរដ្ឋខ្មែរ-ថៃរស់នៅតាមព្រំដែនស្រឡាញ់រាប់អានគ្នាដូចបងប្អូន ហើយពលរដ្ឋថៃក៏មានសាច់ញាតិនៅកម្ពុជាដែរ ប៉ុន្តែការបិទព្រំដែនធ្វើឱ្យពួកគេផ្តាច់ទំនាក់ទំនងសាច់ញាតិទាំងស្រុង ។ រីឯនាយករដ្ឋមន្ត្រីថៃស្តីទី លោក ភូមិថាំ វីឆាយ៉ាឆៃ ពុំធ្លាប់និយាយពីដំណោះស្រាយព្រំដែនជាមួយកម្ពុជាទេ លោកផ្តោតតែលើកិច្ចការនយោបាយផ្ទៃក្នុង ។ ដូច្នេះ ពលរដ្ឋសំណូមពរទៅរដ្ឋាភិបាល និងកងទ័ពឱ្យពិចារណាពីផលប៉ះពាល់ឱ្យបានគ្រប់ជ្រុងជ្រោយ ថៃពុំអាចដាក់គំនាបកម្ពុជាទេ បច្ចុប្បន្ន កម្ពុជារីកចម្រើនជាងមុនឆ្ងាយ ៕

ប្រទេសថៃ ៖ សារព័ត៌មានថៃ Naewna News រាយការណ៍ថា កាលពីថ្ងៃទី១៨ ខែកក្កដា ឆ្នាំ២០២៥ មេបញ្ជាការការពារព្រំដែនខេត្តចាន់បុរី និងត្រាត លោក ថៈអាភីឆាត សាប់ប្រាសឺត បានចេញបទបញ្ជាបន្ធូរបន្ថយឱ្យឈ្មួញថៃអាចដឹកទំនិញតាមរថយន្តទៅកម្ពុជា តាមច្រកព្រំដែនអចិន្ត្រៃយ៍ និងច្រកដោះដូរទំនិញនៅខេត្តចាន់បុរី និងត្រាត ដោយកំណត់ឱ្យរថយន្តដឹកទំនិញអាចឆ្លងដែនរៀងរាល់ថ្ងៃ ចាប់ពីម៉ោង៨ព្រឹក ដល់ម៉ោង៤ល្ងាច ។ វាជាដំណឹងដ៏រីករាយរបស់ឈ្មួញថៃ ពីព្រោះការបិទព្រំដែនជាង៣សប្តាហ៍ ធ្វើឱ្យឈ្មួញរងផលប៉ះពាល់ខ្លាំង ពេលនេះ ពួកគេរង់ចាំដំណឹងការបើកព្រំដែនរបស់កម្ពុជា ។

ខ្លឹមសារបទបញ្ជាបញ្ជាក់ថា កន្លងមក បញ្ជាការដ្ឋានការពារព្រំដែនខេត្តចាន់បុរី និងត្រាត បានកំណត់វិធានការហាមឃាត់រថយន្តដឹកទំនិញថៃឆ្លងដែនទៅកម្ពុជា ចាប់ពីថ្ងៃទី២៤ ខែមិថុនា រហូតដល់ថ្ងៃទី១៦ ខែកក្កដា ឆ្នាំ២០២៥ ។ ហេតុនេះ ដើម្បីកុំឱ្យវិធានការនេះប៉ះពាល់ពាណិជ្ជកម្ម ការវិនិយោគ សកម្មភាពសេដ្ឋកិច្ច និងឧស្សាហកម្មរបស់ឈ្មួញ មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃបានពិចារណាអនុញ្ញាតឱ្យយានជំនិះដែលធ្វើដំណើរក្នុងគោលបំណងមនុស្សធម៌ សិទ្ធិមនុស្ស សេដ្ឋកិច្ច ពាណិជ្ជកម្ម ការវិនិយោគ និងឧស្សាហកម្មអាចឆ្លងដែនចេញ-ចូលតាមព្រំដែនផ្លូវគោកនៅខេត្តចាន់បុរី និងត្រាត ។

ការបើកព្រំដែននៅខេត្តទាំង២ អនុញ្ញាតឱ្យរថយន្តដឹកទំនិញថៃឆ្លងដែនទៅកម្ពុជា លោក ផនឆ័យ លីមផ្លយផីផាត់ ប្រធានផ្នែកទទួលភ្ញៀវនៅសណ្ឋាគារមួយក្នុងខេត្តកោះកុង និងបើងហាងលក់ទំនិញនៅកម្ពុជា និយាយថា វាជាដំណឹងល្អរបស់ឈ្មួញរកស៊ីនៅព្រំដែនផ្សារហាតឡិច ពីព្រោះតាំងពីបិទព្រំដែនជាង៣សប្តាហ៍ ធ្វើឱ្យអាជីវករព្រំដែនទាំងខេត្តត្រាត និងកោះកុងរងផលប៉ះពាល់ដោយសារពុំអាចលក់ដូរ ហើយត្រូវបិទហាងស្ទើរទាំងអស់ ។ សូម្បីតែហាងលក់ទំនិញ 7-11 ក៏ត្រូវបិទទ្វារបណ្តោះអាសន្នដែរ ពីព្រោះគ្មានអតិថិជន ។

លោកបន្តថា បើកម្ពុជាគ្មានបញ្ហាទេ ប្រទេសទាំងពីរនឹងធ្វើពាណិជ្ជកម្មជាមួយគ្នាឡើងវិញ បើទោះជាពុំដូចមុន និងតាមតម្រូវការក្តី ។ ពេលនេះ ទោះជាកងទ័ពថៃបន្ធូរបន្ថយការរឹតបន្តឹងដោយការបើកព្រំដែនជាថ្មី ប៉ុន្តែច្រកព្រំដែនកម្ពុជាត្រូវរង់ចាំការសម្រេចរបស់រដ្ឋាភិបាលជាមុនថា តើកម្ពុជានឹងយល់ស្របជាមួយពេលវេលាបើក-បិទព្រំដែន ដែលខាងថៃកំណត់ដែរឬទេ ។ ថៃអាចរង់ចាំដំណឹងការបើកព្រំដែនរបស់កម្ពុជា ចាប់ពី២ថ្ងៃ ទៅ៣ថ្ងៃ ប៉ុន្តែអ្វីដែលកម្ពុជាត្រូវការ គឺចង់ឱ្យថៃបើក-បិទព្រំដែនតាមពេលវេលាចាស់ គឺបើកម៉ោង៦ព្រឹក និងបិទម៉ោង១០យប់ ។ ទោះយ៉ាងណា ឈ្មួញអាចនាំចេញទំនិញទៅកម្ពុជាតាមផ្លូវទឹក ។

ខាងក្រោមនេះជាការកំណត់វិធានការរបស់មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ សម្រាប់ខេត្តចាន់បុរី និងត្រាត ៖

១-ច្រកព្រំដែនអចិន្ត្រៃយ៍បានឡែម នៅឃុំថេពនិមិត ស្រុកប៉ូងណាមរ៉ន ខេត្តចាន់បុរី (ទល់មុខច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង) បើកម៉ោង៨ព្រឹក និងបិទម៉ោង៤ល្ងាច ដោយអនុញ្ញាតឱ្យរថយន្តដឹកទំនិញអាចឆ្លងដែនចេញ-ចូលបាន

២-ច្រកព្រំដែនអចិន្ត្រៃយ៍បានហាតឡិក នៅឃុំហាតឡិក ស្រុកខ្លងញ៉ៃ ខេត្តត្រាត (ទល់មុខច្រកទ្វារព្រំដែនអន្តរជាតិចាំយាម ខេត្តកោះកុង) បើកម៉ោង៨ព្រឹក និងបិទម៉ោង៤ល្ងាច ដោយអនុញ្ញាតឱ្យរថយន្តដឹកទំនិញអាចឆ្លងដែនចេញ-ចូលបាន

៣-ច្រកដោះដូរទំនិញបានសាប់តារី នៅឃុំធុងខៈណាន ស្រុកសយដាវ ខេត្តចាន់បុរី បើកម៉ោង៨ព្រឹក និងបិទម៉ោង៤ល្ងាច ដោយអនុញ្ញាតឱ្យរថយន្តដឹកទំនិញអាចឆ្លងដែនចេញ-ចូលបាន ។

គួរបញ្ជាក់ថា ថៃក៏បានច្រកព្រំដែនអចិន្ត្រៃយ៍២កន្លែង និងច្រកដោះដូរទំនិញ១កន្លែងនៅខេត្តស្រះកែវផងដែរ ដើម្បីឱ្យរថយន្តដឹកទំនិញ និងយានជំនិះមួយចំនួនអាចឆ្លងដែន ក្រោយពីអគ្គនាយកដ្ឋានគយ និងរដ្ឋាករកម្ពុជាអនុញ្ញាតឱ្យអាជីវករ/ពាណិជ្ជករអាចនាំចូលទំនិញថៃមកកម្ពុជាបាន លើកលែងតែបន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈ តាមមធ្យោបាយដឹកជញ្ជូនផ្សេងៗ និងតាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោកកម្ពុជា-ថៃ ដែលត្រូវបានបិទជាឯកតោភាគីដោយកងទ័ពថៃ ៕

ប្រទេសថៃ ៖ កាលពីថ្ងៃទី១៨ ខែកក្កដា ឆ្នាំ២០២៥ មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានធ្វើដំណើរទៅប្រាសាទតាមាន់ធំ ដើម្បីកម្លាំងចិត្តដល់កងទ័ពថៃនៅបរិវេណប្រាសាទ និងប្រគល់សម្ភារៈឱ្យកងទ័ពដែលទទួលបានពីការបរិច្ចាគរបស់សាកលវិទ្យាល័យគិលានុបដ្ឋាយិកាខេត្តសុរិន្ទ និងសមាគមភរិយាកងទ័ពភូមិភាគ២ ។ បន្ទាប់មក លោកក៏ផ្តល់សម្ភាសន៍ជាមួយសារព័ត៌មានដោយចោទប្រកាន់ថា កងទ័ពកម្ពុជាបានដាក់កាមេរ៉ាលើដើមឈើបែរមុខទៅប្រាសាទតាមាន់ធំ ។

លោកនិយាយថា វាជារឿងធម្មតា ដែលកងទ័ពកម្ពុជាដាក់កាមេរ៉ានៅលើដើមឈើ ។ កម្ពុជាអាចមានគោលបំណងតាមដានសកម្មភាពកងទ័ពរបស់ខ្លួន, ពិនិត្យមើលភ្ញៀវទេសចរមកលេងប្រាសាទតាមាន់ធំ និងមើលថា តើកងទ័ពថៃរំលោភចូលទឹកដីកម្ពុជាដែរឬអត់ ។ ការដាក់កាមេរ៉ាលើដើមឈើបែបនេះ គឺជាការល្មើសនឹងកិច្ចព្រមព្រៀង ប៉ុន្តែវាពុំប៉ះពាល់ដល់ប្រតិបត្តិរបស់កងទ័ពថៃទេ ។

ចំណែករឿងភ្ញៀវទេសចរខ្មែរមកលេងប្រាសាទតាមាន់ធំ គឺជំហ៊ានដំបូង លោក ប៊ុនស៊ីន ផាកក្លាង បានទំនាក់ទំនងជាមួយកងទ័ពខ្មែររួចហើយ គឺភាគីទាំងពីរឯកភាពឱ្យកងទ័ពរបស់ប្រទេសនីមួយៗមើលការខុសត្រូវភ្ញៀវទេសចររៀងៗខ្លួន ។ ករណីមានមតិរិះគន់ថា លោកធ្វើដំណើរទៅទីកន្លែងផ្សេងៗជាញឹកញាប់ ពុំសូវធ្វើការមួយកន្លែង លោកថា ការធ្វើដំណើរញឹកញាប់ពុំប៉ះពាល់ដល់ភារកិច្ចចម្បងទេ លោកបានបំពេញភារកិច្ចអស់ពីសមត្ថភាពដូចមុន ។

ពលរដ្ឋថៃបានរិះគន់ក្នុងបណ្តាញសង្គមថា រយៈពេលចុងក្រោយនេះ លោក ប៊ុនស៊ីន ផាកក្លាង មានអាកប្បកិរិយាទន់ភ្លន់ជាងមុននោះ លោកបាននិយាយយ៉ាងខ្លីថា ថ្ងៃនេះ រឹងមាំឡើងវិញហើយ ការរិះគន់ផ្សេងៗក្នុងបណ្តាញសង្គម លោកបានអានទាំងអស់ ។

សារព័ត៌មានក៏បានសាកសួរមេបញ្ជាការយោធភូមិភាគ២ ពីករណីក្រុម Call Center ប្តូរទីតាំងមកកាន់បរិវេណទល់មុខច្រកព្រំដែនឆងចម នៅស្រុកកាបឈើង ខេត្តសុរិន្ទ និងច្រកព្រំដែនសាយតាគូ នៅស្រុកបានក្រួត ខេត្តបុរីរាំ លោក ប៊ុនស៊ីន ផាកក្លាង និយាយថា បញ្ហាក្រុម Call Center ខាងកងទ័ពកំពុងតែតាមដានស្រាប់ហើយ ។

កាលពីថ្ងៃទី១៧ ខែកក្កដា អគ្គមេបញ្ជាការកងទ័ពថៃបានធ្វើដំណើរទៅត្រួតពិនិត្យដល់ទីន្លែង អគ្គមេបញ្ជាការនឹងត្រៀមកំណត់វិធានការការពារ ហើយលោកយល់ស្រប ។ ប៉ុន្តែការចាត់វិធានការបានកម្រិតណា គឺអាស្រ័យលើរដ្ឋាភិបាល ពីព្រោះក្រុម Call Center នៅទល់មុខច្រកព្រំដែនទាំង២កន្លែង គឺខុសពីនៅមីយ៉ាន់ម៉ាដែលគ្រាន់តែជាជនជាតិភាគតិច ប៉ុន្តែបទល្មើសនេះជាបញ្ហារវាងប្រទេស ៕

ប្រទេសថៃ ៖ នៅថ្ងៃទី១៩ ខែកក្កដា ឆ្នាំ២០២៥ សារព័ត៌មានថៃ The Structure រាយការណ៍ថា អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត ក្នុងឋានៈជាប្រធានមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានបញ្ជាឱ្យរៀបចំកិច្ចប្រជុំ នៅថ្ងៃទី២០ ខែកក្កដា ដើម្បីពិភាក្សាករណីកងទ័ពថៃ៣នាក់ ដាច់ជើង និងរងរបួសដោយសារដើរជាន់មីននៅតំបន់មុំ៣ ។ ការត្រួតពិនិត្យរបស់ថៃរកឃើញថា វាជាមីនថ្មី ហើយថៃត្រៀមប្តឹងកម្ពុជាទៅអង្គការសហប្រជាជាតិ (UN) ករណីដាក់មីនក្នុងទឹកដីថៃ ។

កិច្ចប្រជុំនេះ គឺក្រសួងការបរទេសថៃនឹងចូលរួមផងដែរដើម្បីពិចារណាពីគោលការណ៍អនុវត្តបន្តទៀត ជាពិសេស ការប្រមូលភស្តុតាងដើម្បីដាក់ពាក្យបណ្តឹងទៅអង្គការសហប្រជាជាតិ (UN) ដោយចោទប្រកាន់កម្ពុជារំលោភលើអនុសញ្ញាអូតាវ៉ា ពីព្រោះអនុសញ្ញាអូតាវ៉ាបានហាមប្រទេសជាភាគីប្រើប្រាស់មីនសម្លាប់បុគ្គល ។

ក្រៅពីនេះ អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត ក៏បានបញ្ជាឱ្យកងទ័ពភូមិភាគ២ ប្រមូលទិន្នន័យ និងភស្តុតាងយ៉ាងលម្អិតទាំងអស់ រួមទាំងធ្វើសន្និសីទសារព័ត៌មានសរសេររបាយការណ៍ជាលាយលក្ខណ៍អក្សរ ដើម្បីប្រើប្រាស់ធ្វើភស្តុតាងប្រគល់ឱ្យក្រសួងការបរទេសចាត់ការ ។ ក្រៅពីនេះ លោកបានបញ្ជាឱ្យកងទ័ពទៅប្រមូលបំណែកមីននៅតំបន់មុំ៣ ដែលលោកអះអាងថា ជាទឹកដីថៃ ។

បច្ចុប្បន្ន មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ កំពុងតែប្រមូលទិន្នន័យ និងភស្តុតាងពីកងទ័ព ព្រមទាំងស្ថាប័នពាក់ព័ន្ធយ៉ាងលម្អិត ។ បន្ទាប់មក នឹងមានការប្រកាសជាផ្លូវការក្នុងកិច្ចប្រជុំមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ នៅថ្ងៃទី២១ ខែកក្កដា នេះ ។ ប្រសិនបើកម្ពុជាបដិសេធនឹងការចោទប្រកាន់របស់ថៃ គឺកម្ពុជាត្រូវតែត្រៀមភស្តុតាងដើម្បីបដិសេធជាមួយទិន្នន័យរបស់ថៃ ។ នេះបើតាមការលើកឡើងរបស់អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត ។

ចំណែកអាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន បានចេញសេចក្តីប្រកាសព័ត៌មានច្រាលចោលចំពោះការចុះផ្សាយរបស់សារព័ត៌មានថៃមួយចំនួនលើករណីកងទ័ពថៃ៣នាក់ រងរគ្រោះថ្នាក់ដោយសារមីននៅតំបន់មុំ៣ ។ ការចុះផ្សាយនោះមានចេតនាចោទប្រកាន់ដោយគ្មានមូលដ្ឋាន និងគ្មានការស៊ើបអង្កេតច្បាស់លាស់ ថាកម្ពុជាបានដាក់មីនថ្មី ។

ហេតុនេះ អាជ្ញាធរមីនកម្ពុជាសូមបដិសេធ និងច្រានចោលទាំងស្រុងចំពោះការចោទប្រកាន់របស់សារព័ត៌មានថៃមួយចំនួនថា កម្ពុជាបានដាក់មីនថ្មី និងសូមអំពាវនាវដល់គ្រប់ភាគីពាក់ព័ន្ធ ចៀសវាងការសន្និដ្ឋាន ឬចោទប្រកាន់ណាមួយដោយមិនទាន់ដឹងអំពីការពិត ។ កម្ពុជាជំរុញឱ្យមានកិច្ចសហការប្រតិបត្តិក្នុងការស៊ើបអង្កេតលើឧប្បត្តិហេតុនេះ និងរក្សាឱ្យបាននូវស្មារតីមិត្តភាព សុវត្ថិភាព និងមិនចោទប្រកាន់គ្នាទៅវិញទៅមក ព្រោះថាសត្រូវពិតប្រាកដរបស់យើងទាំងអស់គ្នា គឺគ្រាប់មីន ៕