វ៉ាន់ នីឡា រំភើបចិត្តខ្លាំងទោះបីលែងល្បីទៀតក៏ថ្វីក្រោយមានបទចម្រៀងឈានដល់៣៩ M Views

តារាចម្រៀង វ៉ាន់ នីឡា បានបង្ហាញអារម្មណ៍រំភើបចិត្តជាខ្លាំងបន្ទាប់ពីឃើញបទចម្រៀងរបស់នាងមានចំណងជើងថា «ស្រលាញ់អ្នកមុនរៀបការអ្នកក្រោយ» មានការស្តាប់រហូតដល់៣៩លានដង។ ទោះបីជាមិនស្ថិតនៅលើឆាណែលយូធូបផ្លូវការក៏ដោយ វ៉ាន់ នីឡា នៅតែត្រេកអរ ហើយថាទោះបីជានាងលែងល្បីទៀតក៏មិនថ្វីពីព្រោះសមិទ្ធផលនេះនាងស្កប់ចិត្តហើយ។

រម្លឹកទៅកាន់អតីតកាលជាង១០ឆ្នាំមុនផលិតកម្ម Phleng Records ដែលជាបុត្រសម្ព័ន្ធរបស់ផលិតកម្មរស្មីហង្សមាសបានសាងភាពល្បីល្បាញយ៉ាងខ្លាំងខណៈ វ៉ាន់ នីឡា គឺជាតារាចម្រៀងដ៏ល្បីលេចធ្លោមួយរូបនៅក្នុងផលិតកម្មនេះដោយមានបទចម្រៀងល្បីៗជាច្រើនបទក្រោមស្នាដៃរបស់បងប្រុសបង្កើតគឺលោក សុខ ជំនោរ។ មកទល់នឹងបច្ចុប្បន្ននេះបទចម្រៀងពីមុនរបស់ វ៉ាន់ នីឡា នៅតែទទួលបានការគាំទ្រពីទស្សនិកជនជាក់ស្តែងបទ «ស្រលាញ់អ្នកមុនរៀបការអ្នកក្រោយ»ជាដើម។

នៅយប់ថ្ងៃទី៨ ខែកក្កដា វ៉ាន់ នីឡា បានបង្ហោះវីដេអូមួយដោយភ្ជាប់មកជាមួយនឹងចំណងជើងថា «តែពិននេះហើយលែងខ្វល់រឿងជាតិក្រោយហើយ ចង់ចាប់ជាតិជាអីចាប់ទៅ ជាតិនេះស្គាល់រស់ជាតិ39M ហើយ»។ នៅក្នុងវីដេអូនេះ វ៉ាន់ នីឡា បានបង្ហាញអារម្មណ៍រំភើបចិត្តជាខ្លាំងរហូតនិយាយទាំងរដាក់រដុប។ លើសពីនេះ តារាចម្រៀងរូបនេះបានបង្ហាញថាការចូលទស្សនារហូតដល់ ៣៩លានដងនេះគឺពិតជាច្រើនខ្លាំងបើសិនជាជាតិនេះនាងលែងល្បីទៀតក៏មិនថ្វីដែរ។

វ៉ាន់ នីឡា ថានាងពិតជាមានមោទនភាពណាស់ ពីព្រោះរាល់ពេលនាងបង្ហោះបទចម្រៀងម្តងៗ បានត្រឹមតែ១០០K នាងពិតជាសប្បាយចិត្តណាស់ទៅហើយ។

គួរឱ្យដឹងថា បទពីមុនៗរបស់ វ៉ាន់ នីឡា មានដូចជា «ដឹងថាបងចិត្តស្រីក្មេង» «ស្នេហ៍ជិតផ្ទះ» «បន្តស្រលាញ់ឬចាប់ផ្តើមស្អប់» «បេះដូងអូនទុកនៅបង» «បងមិនអន់ទេតែគេល្អជាង»និងបទ «មនុស្សបងធុញវិលវិញបានទេ» ជាដើម៕