បន្ទាប់ពីអាកាសយានដ្ឋានអន្តរជាតិតេជោដំណើរការជាផ្លូវការនៅថ្ងៃទី៩ ខែកញ្ញា ឆ្នាំ២០២៥ គេសង្កេតឃើញថាប្រជាពលរដ្ឋជាច្រើនបានបង្ហាញការអបអរចំពោះសមិទ្ធផលថ្មីនេះ។ ចំណែកឯបងប្អូនមួយចំនួនទៀតគឺបានធ្វើដំណើរទៅទស្សនាព្រលានយន្តហោះថ្មីនេះតែម្តងប្រកបដោយសេចក្តីរំភើបរីករាយ។ ទោះយ៉ាងណា កាលដែលប្រជាពលរដ្ឋទៅចូលរួមអបអរសាទរអង្គុយនៅព្រលានថ្មីស្រាប់តែមានមតិវែកញែកត្រង់ចំណុចនេះដោយគិតថាមិនសមភ្នែក។
ការបញ្ចេញមតិវែកញែកទាក់ទងនឹងប្រជាពលរដ្ឋទៅអង្គុយនៅព្រលានយន្តហោះថ្មីលោកជំទាវឧកញ៉ា នឹម វណ្ណៈ បានលើកឡើងថាការអង្គុយលើឥដ្ឋនៅព្រលានយន្តហោះនៅលើពិភពលោកក៏មានដែរ។ លោកជំទាវឧកញ៉ា បានសរសេរនៅលើបណ្តាញសង្គមថា «សូមបងប្អូនមួយចំនួនតូច កុំមើលងាយ ដៀលខ្មែរគ្នាឯង។ ការអង្គុយលើឥដ្ឋ នៅព្រលានយន្តហោះនៅលើពិភពលោកក៏មានដែរ។ បើកចិត្ត បើកបេះដូង កុំសរសើរដោយសារគេជាបរទេស ហើយជាន់បានតែខ្មែរគ្នាឯង គេមិនសរសើរទេ»។
ងាកមកកាន់ ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ បានលើកឡើងនៅលើបណ្តាញសង្គមយ៉ាងដូច្នេះថា «បើគិតតាមបែបវិជ្ជមាន ក៏ថាមិនអីទេ បើគិតតាមបែបអវិជ្ជមាន ក៏មើលទៅថាមិនសូវសមរម្យ ប៉ុន្តែសំខាន់ពេលនេះផ្ទះលេខ២កំពុងសន្សំរូបភាព ដើម្បីវ៉ៃប្រហារ ចំអក ផ្សព្វផ្សាយទប់ស្កាត់មិនឱ្យទេសចរមកកម្ពុជា។ តែគិតតាមបែបម្យ៉ាងទៀត តើកម្ពុជាសាងសង់ព្រលានថ្មីបែបទំនើបនេះដើម្បីឱ្យប្រជាជនទៅអង្គុយលេង ឬ ដើម្បីឱ្យបរទេសចាប់អារម្មណ៍មកកាន់កម្ពុជាកាន់តែច្រើន នឹងបានផ្តល់ផលប្រយោជន៍ផ្សេងៗសំរាប់ការអភិវឌ្ឍន៍ប្រទេសតទៅទៀត? ។ … គិតបែបណាក៏បាន តែសូមជួយគិតគ្នា រួមគ្នាការពារកុំឱ្យសៀមមើលងាយ»។
គួរជម្រាបថា អាកាសយានដ្ឋានអន្តរជាតិតេជោ ត្រូវបានសាងសង់លើផ្ទៃដីដ៏ធំទូលាយប្រមាណ ២,៦០០ ហិកតា ស្ថិតនៅស្រុកកណ្ដាលស្ទឹង ខេត្តកណ្ដាល និងផ្នែកខ្លះនៃស្រុកបាទី ខេត្តតាកែវ។ អាកាសយានដ្ឋានថ្មីនេះមានទីតាំងយុទ្ធសាស្ត្រនៅភាគខាងត្បូងនៃរាជធានីភ្នំពេញដែលមានចម្ងាយប្រមាណ ២០ គីឡូម៉ែត្រពីកណ្ដាលក្រុង។ អាកាសយានដ្ឋាននេះ ត្រូវបានប្រកាសបើកដំណើរការ នៅថ្ងៃទី៩ ខែកញ្ញា ឆ្នាំ២០២៥នេះ ហើយនឹងសម្ពោធផ្លូវការនៅថ្ងៃទី២០ ខែតុលា ឆ្នាំ២០២៥ ខាងមុខនេះ៕
