ប្រទេសថៃ ៖ កាលពីថ្ងៃទី១៨ ខែកក្កដា ឆ្នាំ២០២៥ មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានធ្វើដំណើរទៅប្រាសាទតាមាន់ធំ ដើម្បីកម្លាំងចិត្តដល់កងទ័ពថៃនៅបរិវេណប្រាសាទ និងប្រគល់សម្ភារៈឱ្យកងទ័ពដែលទទួលបានពីការបរិច្ចាគរបស់សាកលវិទ្យាល័យគិលានុបដ្ឋាយិកាខេត្តសុរិន្ទ និងសមាគមភរិយាកងទ័ពភូមិភាគ២ ។ បន្ទាប់មក លោកក៏ផ្តល់សម្ភាសន៍ជាមួយសារព័ត៌មានដោយចោទប្រកាន់ថា កងទ័ពកម្ពុជាបានដាក់កាមេរ៉ាលើដើមឈើបែរមុខទៅប្រាសាទតាមាន់ធំ ។

លោកនិយាយថា វាជារឿងធម្មតា ដែលកងទ័ពកម្ពុជាដាក់កាមេរ៉ានៅលើដើមឈើ ។ កម្ពុជាអាចមានគោលបំណងតាមដានសកម្មភាពកងទ័ពរបស់ខ្លួន, ពិនិត្យមើលភ្ញៀវទេសចរមកលេងប្រាសាទតាមាន់ធំ និងមើលថា តើកងទ័ពថៃរំលោភចូលទឹកដីកម្ពុជាដែរឬអត់ ។ ការដាក់កាមេរ៉ាលើដើមឈើបែបនេះ គឺជាការល្មើសនឹងកិច្ចព្រមព្រៀង ប៉ុន្តែវាពុំប៉ះពាល់ដល់ប្រតិបត្តិរបស់កងទ័ពថៃទេ ។

ចំណែករឿងភ្ញៀវទេសចរខ្មែរមកលេងប្រាសាទតាមាន់ធំ គឺជំហ៊ានដំបូង លោក ប៊ុនស៊ីន ផាកក្លាង បានទំនាក់ទំនងជាមួយកងទ័ពខ្មែររួចហើយ គឺភាគីទាំងពីរឯកភាពឱ្យកងទ័ពរបស់ប្រទេសនីមួយៗមើលការខុសត្រូវភ្ញៀវទេសចររៀងៗខ្លួន ។ ករណីមានមតិរិះគន់ថា លោកធ្វើដំណើរទៅទីកន្លែងផ្សេងៗជាញឹកញាប់ ពុំសូវធ្វើការមួយកន្លែង លោកថា ការធ្វើដំណើរញឹកញាប់ពុំប៉ះពាល់ដល់ភារកិច្ចចម្បងទេ លោកបានបំពេញភារកិច្ចអស់ពីសមត្ថភាពដូចមុន ។

ពលរដ្ឋថៃបានរិះគន់ក្នុងបណ្តាញសង្គមថា រយៈពេលចុងក្រោយនេះ លោក ប៊ុនស៊ីន ផាកក្លាង មានអាកប្បកិរិយាទន់ភ្លន់ជាងមុននោះ លោកបាននិយាយយ៉ាងខ្លីថា ថ្ងៃនេះ រឹងមាំឡើងវិញហើយ ការរិះគន់ផ្សេងៗក្នុងបណ្តាញសង្គម លោកបានអានទាំងអស់ ។

សារព័ត៌មានក៏បានសាកសួរមេបញ្ជាការយោធភូមិភាគ២ ពីករណីក្រុម Call Center ប្តូរទីតាំងមកកាន់បរិវេណទល់មុខច្រកព្រំដែនឆងចម នៅស្រុកកាបឈើង ខេត្តសុរិន្ទ និងច្រកព្រំដែនសាយតាគូ នៅស្រុកបានក្រួត ខេត្តបុរីរាំ លោក ប៊ុនស៊ីន ផាកក្លាង និយាយថា បញ្ហាក្រុម Call Center ខាងកងទ័ពកំពុងតែតាមដានស្រាប់ហើយ ។

កាលពីថ្ងៃទី១៧ ខែកក្កដា អគ្គមេបញ្ជាការកងទ័ពថៃបានធ្វើដំណើរទៅត្រួតពិនិត្យដល់ទីន្លែង អគ្គមេបញ្ជាការនឹងត្រៀមកំណត់វិធានការការពារ ហើយលោកយល់ស្រប ។ ប៉ុន្តែការចាត់វិធានការបានកម្រិតណា គឺអាស្រ័យលើរដ្ឋាភិបាល ពីព្រោះក្រុម Call Center នៅទល់មុខច្រកព្រំដែនទាំង២កន្លែង គឺខុសពីនៅមីយ៉ាន់ម៉ាដែលគ្រាន់តែជាជនជាតិភាគតិច ប៉ុន្តែបទល្មើសនេះជាបញ្ហារវាងប្រទេស ៕

ប្រទេសថៃ ៖ នៅថ្ងៃទី១៩ ខែកក្កដា ឆ្នាំ២០២៥ សារព័ត៌មានថៃ The Structure រាយការណ៍ថា អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត ក្នុងឋានៈជាប្រធានមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានបញ្ជាឱ្យរៀបចំកិច្ចប្រជុំ នៅថ្ងៃទី២០ ខែកក្កដា ដើម្បីពិភាក្សាករណីកងទ័ពថៃ៣នាក់ ដាច់ជើង និងរងរបួសដោយសារដើរជាន់មីននៅតំបន់មុំ៣ ។ ការត្រួតពិនិត្យរបស់ថៃរកឃើញថា វាជាមីនថ្មី ហើយថៃត្រៀមប្តឹងកម្ពុជាទៅអង្គការសហប្រជាជាតិ (UN) ករណីដាក់មីនក្នុងទឹកដីថៃ ។

កិច្ចប្រជុំនេះ គឺក្រសួងការបរទេសថៃនឹងចូលរួមផងដែរដើម្បីពិចារណាពីគោលការណ៍អនុវត្តបន្តទៀត ជាពិសេស ការប្រមូលភស្តុតាងដើម្បីដាក់ពាក្យបណ្តឹងទៅអង្គការសហប្រជាជាតិ (UN) ដោយចោទប្រកាន់កម្ពុជារំលោភលើអនុសញ្ញាអូតាវ៉ា ពីព្រោះអនុសញ្ញាអូតាវ៉ាបានហាមប្រទេសជាភាគីប្រើប្រាស់មីនសម្លាប់បុគ្គល ។

ក្រៅពីនេះ អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត ក៏បានបញ្ជាឱ្យកងទ័ពភូមិភាគ២ ប្រមូលទិន្នន័យ និងភស្តុតាងយ៉ាងលម្អិតទាំងអស់ រួមទាំងធ្វើសន្និសីទសារព័ត៌មានសរសេររបាយការណ៍ជាលាយលក្ខណ៍អក្សរ ដើម្បីប្រើប្រាស់ធ្វើភស្តុតាងប្រគល់ឱ្យក្រសួងការបរទេសចាត់ការ ។ ក្រៅពីនេះ លោកបានបញ្ជាឱ្យកងទ័ពទៅប្រមូលបំណែកមីននៅតំបន់មុំ៣ ដែលលោកអះអាងថា ជាទឹកដីថៃ ។

បច្ចុប្បន្ន មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ កំពុងតែប្រមូលទិន្នន័យ និងភស្តុតាងពីកងទ័ព ព្រមទាំងស្ថាប័នពាក់ព័ន្ធយ៉ាងលម្អិត ។ បន្ទាប់មក នឹងមានការប្រកាសជាផ្លូវការក្នុងកិច្ចប្រជុំមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ នៅថ្ងៃទី២១ ខែកក្កដា នេះ ។ ប្រសិនបើកម្ពុជាបដិសេធនឹងការចោទប្រកាន់របស់ថៃ គឺកម្ពុជាត្រូវតែត្រៀមភស្តុតាងដើម្បីបដិសេធជាមួយទិន្នន័យរបស់ថៃ ។ នេះបើតាមការលើកឡើងរបស់អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត ។

ចំណែកអាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន បានចេញសេចក្តីប្រកាសព័ត៌មានច្រាលចោលចំពោះការចុះផ្សាយរបស់សារព័ត៌មានថៃមួយចំនួនលើករណីកងទ័ពថៃ៣នាក់ រងរគ្រោះថ្នាក់ដោយសារមីននៅតំបន់មុំ៣ ។ ការចុះផ្សាយនោះមានចេតនាចោទប្រកាន់ដោយគ្មានមូលដ្ឋាន និងគ្មានការស៊ើបអង្កេតច្បាស់លាស់ ថាកម្ពុជាបានដាក់មីនថ្មី ។

ហេតុនេះ អាជ្ញាធរមីនកម្ពុជាសូមបដិសេធ និងច្រានចោលទាំងស្រុងចំពោះការចោទប្រកាន់របស់សារព័ត៌មានថៃមួយចំនួនថា កម្ពុជាបានដាក់មីនថ្មី និងសូមអំពាវនាវដល់គ្រប់ភាគីពាក់ព័ន្ធ ចៀសវាងការសន្និដ្ឋាន ឬចោទប្រកាន់ណាមួយដោយមិនទាន់ដឹងអំពីការពិត ។ កម្ពុជាជំរុញឱ្យមានកិច្ចសហការប្រតិបត្តិក្នុងការស៊ើបអង្កេតលើឧប្បត្តិហេតុនេះ និងរក្សាឱ្យបាននូវស្មារតីមិត្តភាព សុវត្ថិភាព និងមិនចោទប្រកាន់គ្នាទៅវិញទៅមក ព្រោះថាសត្រូវពិតប្រាកដរបស់យើងទាំងអស់គ្នា គឺគ្រាប់មីន ៕

ស្ថាបនិក ឬ អ្នកបង្កើតរូបិយប័ណ្ណ Bitcoin បានក្លាយជាមហាសេដ្ឋីលំដាប់ទី11របស់ពិភពលោក ជាមួយនឹងការកាន់កាប់ទឹកប្រាក់ប្រមាណ 129ពាន់លានដុល្លារក្នុងទ្រព្យសម្បត្តិ Bitcoin។ ប៉ុន្តែទោះជាយ៉ាងណា រហូតមកទល់ពេលនេះមិនទាន់មានអ្នកដឹងថាស្ថាបនិករូបិយប័ណ្ណអេឡិចត្រូនិចរូបនេះជានរណាឡើយ ពោលគឺអត្តសញ្ញាណរបស់បុគ្គលរូបនេះនៅតែគ្មានអ្នកណាស្គាល់។

យោងតាមប្រភពពីសារព័ត៌មាន Times of India និង Financial Express បានរាយការណ៍ថា បុគ្គលឈ្មោះ Satoshi Nakamoto អ្នកបង្កើតរូបិយប័ណ្ណ Bitcoin ដែលបានបាត់ខ្លួនពីចុងឆ្នាំ2011 និងពេលនេះកំពុងកាន់កាប់ទ្រព្យសម្បត្តិ Bitcoin ដ៏មហាសាលដែលគិតជាទឹកប្រាក់ គឺចន្លោះពី 128.9 ទៅ១២៩ពាន់លានដុល្លារ ដែលធ្វើឲ្យលោកក្លាយជាមនុស្សមានទ្រព្យសម្បត្តិច្រើនជាងគេលំដាប់ទី 11 ឬ 12 លើពិភពលោក។ ប៉ុន្តែបុគ្គលរូបនេះបានបាត់ខ្លួនពីភ្នែកសាធារណៈជនចាប់ពីឆ្នាំ2011មកម្ល៉េះ។

ថ្មីៗនេះ ការរាប់ចំណាត់ថ្នាក់អ្នកមានបំផុតលើពិភពលោក តាមរយៈការរាប់ចំនួនទ្រព្យសម្បត្តិ គឺលោកបានឈរនៅលំដាប់ទី11 ដោយផ្ដួលបុគ្គលល្បីៗមួយចំនួនដូចជា Michael Bloomberg, Rob Walton និង Zhang Yiming។ ទោះជាយ៉ាងណា គាត់នៅតែត្រូវស្ថិតនៅក្រោម Elon Musk, Bernard Arnault, Jeff Bezos និង Mark Zuckerberg។

គួរជម្រាបថា Bitcoin ត្រូវបានគេបង្កើតឡើង កាលពីឆ្នាំ2008 ក្រោមការផ្តួចផ្តើមគំនិតរបស់មនុស្សម្នាក់ (ឬក៏អាចជាមនុស្សមួយក្រុម) ដែលប្រើរហស្សនាមថា “Satoshi Nakamoto” ដែលមកទល់នឹងពេលបច្ចុប្បន្ននេះ គេនៅតែមិនទាន់ស្គាល់ច្បាស់នៅឡើយពីអត្តសញ្ញាណពិតប្រាកដនៃបុគ្គល ឬក្រុមបុគ្គលនៅពីក្រោយរហស្សនាមនេះ។

វាជាប្រភេទរូបិយវត្ថុមួយដែរ គ្រាន់តែវាជារូបិយវត្ថុដែលអរូបិយ ហើយដែលមិនមែនចេញដោយធនាគារកណ្តាលនៃប្រទេសណាមួយ ប៉ុន្តែអាចត្រូវគេយកទៅប្រើជាមធ្យោបាយដោះដូរនៅតាមប្រព័ន្ធអ៊ីនធ័រនែត ដូចជារូបិយវត្ថុធម្មតាដែរ។ វាមានតម្លៃឡើងចុះអាស្រ័យទៅតាមតម្រូវការទីផ្សារ។ គេអាចយកលុយធម្មតា ដូចជា ដុល្លារ ឬអឺរ៉ូ ជាដើម ទៅទិញ Bitcoin ហើយនៅពេលដែលមានអ្នកស្វែងរកទិញកាន់តែច្រើន តម្លៃ Bitcoin នឹងកើនឡើងកាន់តែខ្លាំង។

ជាមួយចំនួននៃអ្នកកាន់កាប់ Bitcoin ចេះតែកើនឡើងពីមួយឆ្នាំទៅមួយឆ្នាំ ទ្រព្យសម្បត្តិនៃស្ថាបនិករបស់វាក៏ចាប់ផ្ដើមហក់ឡើងខ្ពស់ទៅៗរហូតពេលនេះបានឈរក្នុងតារាងចំណាត់ថ្នាក់នៃមហាសេដ្ឋីកំពូលៗនៅលើពិភពលោក។ ប៉ុន្តែអត្តសញ្ញាណពិតប្រាកដនៃបុគ្គលរូបនោះ នៅតែស្ថិតក្នុងភាពអាថ៌កំបាំង៕

ថៃ៖ បញ្ជាការដ្ឋានយោធាភូមិភាគទី២ របស់ថៃបានបញ្ជាក់ថា ៨០% នៃគ្រាប់មីនដែលមាននៅតំបន់ចុងបូកគឺជាគ្រាប់មីនថ្មីដែលទើបបង្កប់ និងទាមទារឲ្យកម្ពុជាបង្ហាញភស្តុតាង ប្រសិនបើកម្ពុជាចង់បដិសេធមិនទទួលខុសត្រូវថាខ្លួនមិនបានដាក់។ នេះបើយោងតាមសារព័ត៌មាន Khaosod នារសៀល ថ្ងៃទី១៩ ខែកក្កដា។

យោងតាមប្រភពខាងលើ នៅថ្ងៃសៅរិ៍ ទី១៩ ខែកក្កដា បានបង្ហាញពីរបាយការណ៍ទាក់ទងនឹងការវិវត្តនៃដំណើរការស៊ើបអង្កេតជុំវិញឧបទ្ទវហេតុដែលទាហានថៃបីនាក់ មកពីកងពលលេខ៦០២១ ដែលកំពុងបំពេញបេសកកម្មល្បាតរក្សាសន្តិភាពនៅតំបន់ចុងបូក បានដើរជាន់គ្រាប់មីនផ្ទុះ បណ្ដាលឲ្យរងរបួសដា.ច់ជើង និងរងរបួសធ្ងន់។

របាយការណ៍នោះបានបង្ហាញថា កាលពីម្សិលមិញ (១៨ កក្កដា) បញ្ជាការដ្ឋានយោធពលភូមិភាគទី២ បានបញ្ជូនអង្គភាពកម្ចាត់អាវុធជាតិផ្ទុះ (EOD) និងអង្គភាពធ្វើកោសល្យវិច្ច័យទៅកាន់តំបន់ចុងបូក នៅកន្លែងកើតហេតុ ដើម្បីប្រមូលភស្តុតាងបន្ថែមពីប្រភេទនៃគ្រាប់មីននោះសម្រាប់ធ្វើការផ្ទៀងផ្ទាត់។

ជាមួយនឹងការប្រមូលភស្តុតាងនោះ គេបានរកឃើញថា ៨០ ភាគរយនៃការផ្ទុះគឺបណ្តាលមកពីមីនដែលទើបនឹងត្រូវបានគេដាក់បង្កប់ថ្មីៗ មិនមែនជាគ្រាប់មីនចាស់នោះទេ។ ឯកឧត្តម ឧត្តមសេនីយ៍ឯក ប៊ុនស៊ីន ផាតក្លាង មេបញ្ជាការតំបន់កងទ័ពជើងគោក បានបង្កើតគណៈកម្មការស្រាវជ្រាវការពិត ដើម្បីរាយការណ៍ជូនថ្នាក់លើ និងចាត់ការបន្តតាមនីតិវិធីច្បាប់។

លើសពីនេះថៃបានបញ្ជាក់ថា៖ ទាក់ទិននឹងការអះអាងរបស់កម្ពុជា ដែលថាពួកគេមិនទទួលខុសត្រូវចំពោះការដាក់គ្រាប់មីន និងការសង្កេតរបស់ពួកគេថាតំបន់ជីករ៉ែនោះស្ថិតនៅខាងភាគីថៃនោះ មេបញ្ជាការបានអំពាវនាវឱ្យកម្ពុជាផ្តល់ភស្តុតាងលម្អិតដល់ភាគីថៃ។

ទោះជាយ៉ាងណាក៏ដោយ នៅថ្ងៃនេះ (ទី១៩ កក្កដា) ខាងបញ្ជាការដ្ឋានយោធភូមិភាគទី២ កំពុងរៀបចំសន្និសីទសារព័ត៌មានមួយ ដើម្បីបំភ្លឺការពិតដល់សាធារណជនឲ្យបានដឹងច្បាស់។ ទន្ទឹមនឹងនេះ មេបញ្ជាការយោធភូមិភាគទី២ ក៏កំពុងធ្វើដំណើរទៅពិនិត្យស្ថានការណ៍នៅប្រាសាទតាមាន់ធំ ក្នុងខេត្តសុរិន្ទដោយផ្ទាល់ផងដែរ៕

ស៊ីសាកេត ៖ ព្រះសង្ឃបួនអង្គនៅខេត្តស៊ីសាកេតរបស់ថៃត្រូវបានចាប់ខ្លួនបន្ទាប់ពីធ្វើតេស្តរកឃើញសារធាតុញៀ.នមេតំហ្វេតាមីន។ សង្ឃទាំងនេះបានសារភាពថា ពិតជាបានប្រើថ្នាំនេះមែន ប៉ុន្តែអះអាងថាគឺដើម្បីបំបាត់ការឈឺចុកចាប់ក្នុងខ្លួន និងដើម្បីប្រារព្ធពិធីបុណ្យចូលវស្សាប៉ុណ្ណោះ។ នេះបើយោងតាមសារព័ត៌មានបាងកកប៉ុស្តិ៍។

តាមប្រភពដដែលកាលពីថ្ងៃទី១៨ ខែកក្កដា បានឲ្យដឹងថា ករណីនេះត្រូវបានបែ.កធ្លាយនៅពេលដែលសមត្ថកិច្ចនៅសង្កាត់ណាំលៀង បានចុះធ្វើការបង្ក្រាបគ្រឿ.ងញៀ.ន តាមរយៈបណ្ដឹ.ងរបស់ប្រជាពលរដ្ឋនៅក្នុងមូលដ្ឋាន។ យោងតាមរបាយការណ៍អនាមិកមួយបានចោ.ទប្រកាន់ថា នៅវត្តជាច្រើនក្នុងតំបន់នេះ បានក្លាយជាមជ្ឈមណ្ឌលនៃសកម្មភាពគួរឱ្យសង្ស័យ ដោយឃើញយុវជនក្មេងស្ទាវតែងចេញ ចូលបរិវេណវត្តជាញឹកញាប់។

ដើម្បីបញ្ជាក់ពីការសង្ស័យនេះថាពិតឬមិនពិត សមត្ថកិច្ចបានដឹកនាំកម្លាំងចុះធ្វើការតេស្ដទឹកនោម ដែលដំបូងឡើយធ្វើឡើងនៅវត្តចំនួន២ និងជាលទ្ធផល គឺមានព្រះសង្ឃចំនួន៤អង្គ ទទួលបានលទ្ធផលវិជ្ជមាន។ ក្រោយមកពួកគេបានសារភាពថា ពិតជាបានប្រើប្រាស់ថ្នាំមេតំហ្វេតាមីនមែន។ បច្ចុប្បន្ន ទាំង៤អង្គ ត្រូវបានសមត្ថកិច្ចឃាត់ខ្លួន និងបញ្ជូនទៅនៅមណ្ឌលកែប្រែ។

ព្រះសង្ឃមួយអង្គដែលមានជន្មាយុ 60 វស្សាបានប្រាប់អាជ្ញាធរថា កាលដែលគាត់ប្រើប្រាស់សារធាតុនេះ គឺដោយសារគាត់មានការឈឺចាប់រ៉ាំរ៉ៃដែលការព្យាបាលធម្មតាមិនអាចព្យាបាលបានទេ។ គាត់បានបន្តថា គាត់បានសម្រេចចិត្តសាកល្បងថ្នាំមេតំហ្វេតាមីន ដោយលេបពីរគ្រាប់ ជំនួសថ្នាំបំបាត់ការឈឺចាប់ ដើម្បីបានធូរស្បើយ និងអាចប្រារព្ធពិធីបុណ្យចូលវស្សាបានដោយរលូន។

គួររំលឹកថា បច្ចុប្បន្នរដ្ឋាភិបាលថៃកំពុងអនុវត្តយុទ្ធនាការបង្រ្កាបគ្រឿ.ងញៀ.នទ្រង់ទ្រាយធំ បន្ទាប់ពីប្រជាពលរដ្ឋមានការព្រួយបារម្ភខ្លាំងពីស្ថានភាពសង្គមដែលពួកគេរស់នៅ ព្រោះការចរាចរសារធាតុញៀ.នមានភាពទូលំទូលាយខ្លាំងពេក ជាហេតុធ្វើឲ្យយុវជនភាគច្រើន ឬសូម្បីតែក្មេងជំទង់ចេះប្រើប្រាស់គ្រឿ.ងញៀន។

កាលពីកន្លងទៅថ្មីៗនេះ សមត្ថកិច្ចបានឆ្មក់ធ្វើតេស្តសារធាតុញៀ.ននៅសាលាស្រុកមួយកន្លែង ក្នុងខេត្តនគររាជសីហា ទៅលើបុគ្គលិករដ្ឋ មន្រ្តីរាជការ និងអ្នកពាក់ព័ន្ធចំនួន ២០០នាក់។ ជាលទ្ធផលគួរឲ្យភ្ញាក់ផ្អើល មានមនុស្សរហូតដល់ទៅ ១៦៧នាក់ក្នុងចំណោមពួកគេទទួលបានលទ្ធផលវិជ្ជមាន ដែលក្នុងនោះរួមមាន មេភូមិ២នាក់ ជំនួយការមេភូមិ៥នាក់ ព្រះសង្ឃ១អង្គ អ្នកស្ម័គ្រចិត្ត២នាក់ សមាជិកសាធារណៈ១៤៧នាក់ និង១០នាក់ផ្សេងទៀត៕

ប្រទេសថៃ ៖ កាលពីថ្ងៃទី១៨ ខែកក្កដា ឆ្នាំ២០២៥ សារព័ត៌មានថៃណែវណា ញូវ (Naewna News) រាយការណ៍ថា មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃនឹងពុំនៅស្ងៀមជាមួយករណីកងទ័ពថៃ៣នាក់ ដើរជាន់មី.នបណ្តាលឱ្យដាច់ជើង និងរងរបួសនៅព្រំដែនទេ ។ ថៃនឹងតវ៉ាជាមួយកម្ពុជា ប្រសិនបើរកឃើញថា ជាមី.នថ្មី ពីព្រោះកម្ពុជាលួ.ចដាក់មីនក្នុងទឹកដីថៃ ល្មើសអនុសញ្ញាអូតាវ៉ា ឆ្នាំ១៩៩៩ ។

នាថ្ងៃទី១៨ ខែកក្កដា នៅវិមានរដ្ឋាភិបាល លោក ស៊ុរ៉ាសាន់ គុងស៊ិរិ អ្នកនាំពាក្យរងនៃទីបញ្ជាការកងទ័ពថៃ និងអ្នកស្រី ម៉ារ៉ាទី ណាលិតា អាន់ដាម៉ូ អ្នកនាំពាក្យរងក្រសួងការបរទេស បាននិយាយពីលទ្ធផលកិច្ចប្រជុំរបស់មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ថា អនុរដ្ឋមន្ត្រីក្រសួងការពារជាតិ លោក ណាតផុន ណាកផានិត បានទៅមន្ទីរពេទ្យនៅខេត្តឧប៊ុនរ៉ាជថានី ដើម្បីសួរសុខទុក្ខកងទ័ពថៃរងរបួសដោយសារជាន់មីនពេលល្បាតនៅតំបន់មុំ៣ ។ បច្ចុប្បន្ន កងទ័ពថៃទាំង៣នាក់មានសុវត្ថិភាព និងទទួលការព្យាបាលយ៉ាងយកចិត្តទុកដាក់ពីគ្រូពេទ្យ ។

អង្គភាពកម្ចាត់មីនកងទ័ពជើងគោកបានបញ្ជូនភ្នាក់ងារដោះមីនទៅកន្លែងកើតហេតុ ដើម្បីប្រមូលភស្តុតាងមកឱ្យអ្នកជំនាញគ្រាប់ផ្ទុះវិភាគយ៉ាងលម្អិត ។ ការវិភាគនឹងចំណាយពេលពី២ថ្ងៃ ទៅ៣ថ្ងៃ ដើម្បីទទួលបានទិន្នន័យពិតប្រាកដពីប្រភេទមីន និងពេលវេលាដាក់មីនថា តើជាមីនថ្មី ឬមីនចាស់? ប្រសិនបើជាមីនថ្មី គឺកម្ពុជាល្មើសអនុសញ្ញាអូតាវ៉ា ដែលអនុញ្ញានេះបញ្ជាក់ថា ហាមប្រើប្រាស់ និងរក្សាទុកមីនសម្លា.ប់បុគ្គល ខណៈកម្ពុជា និងថៃ គឺជាប្រទេសភាគីនៃអនុសញ្ញានេះតាំងពីឆ្នាំ១៩៩៩ ។ ប្រសិនបើរកឃើញថា វាជាមីនថ្មី រដ្ឋាភិបាលថៃនឹងពុំនៅស្ងៀមឡើយ ។

លោក ស៊ុរ៉ាសាន់ គុងស៊ិរិ អ្នកនាំពាក្យរងនៃទីបញ្ជាការកងទ័ពថៃនិយាយថា ៖ «បើមានការឈ្លានពានចូលអធិបតេយ្យថៃ យើងនឹងចាត់វិធានការ ហើយសូមពលរដ្ឋជឿជាក់ យើងនឹងពុំនៅស្ងៀមទេ» ។

ចំណែកក្រសួងការបរទេសថៃបានបង្ហាញការសោកស្តាយចំពោះហេតុការណ៍កើតឡើងនៅតំបន់មុំ៣ ដែលបណ្តាលឱ្យកងទ័ពថៃ៣នាក់ ដាច់ជើង និងរងរបួស ។ សូមឱ្យកងទ័ពថៃទាំង៣នាក់ជាសះស្បើយឆាប់ៗ ហើយក្រសួងការបរទេសពុំបាននៅស្ងៀម គឺពេលទទួលបានលទ្ធផលការត្រួតពិនិត្យមីនជាផ្លូវការរួចហើយ យើងនឹងចាត់វិធានការបន្តទៀត ។

បើប្រទេសថៃរកឃើញភស្តុតាងច្បាស់លាស់ គឺនេះជាការខកបំណងយ៉ាងខ្លាំងទៅលើកម្ពុជា ដែលជាប្រទេសភាគីនៃអនុសញ្ញាអូតាវ៉ា ។ ថៃនឹងចាត់ទុកថា វាជាការរំលោភអនុសញ្ញា ដោយថៃនឹងចាត់វិធានការរឿងនេះ មិនថាការតវ៉ាដោយផ្ទាល់ជាមួយកម្ពុជាកម្រិតទ្វេភាគី ឬកំណត់វិធានការផ្សេងៗ ។ បើវាជាមីនថ្មី គឺកម្ពុជាល្មើស MOU ឆ្នាំ២០០០ និងរំលោភអធិបតេយ្យរបស់ថៃ ៕