ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath កាលពីថ្ងៃទី៣ ខែសីហា ឆ្នាំ២០២៥ ឱ្យដឹងថា អ្នកនាំពាក្យកងទ័ពថៃ លោកឧត្តមសេនីយ៍ វីនឆ័យ សុវ៉ារី បានច្រានចោលព័ត៌មានកងទ័ពថៃជម្លៀសពលដ្ឋរស់នៅព្រំដែនកម្ពុជា-ថៃ ដើម្បីបើកការឈ្លានពានកម្ពុជាជាថ្មី មុនកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ ចាប់ពីថ្ងៃទី៤ ដល់ថ្ងៃទី៧ ខែសីហា ។ លោកថា ជាព័ត៌មានមិនពិត កងទ័ពថៃគ្រាន់តែត្រៀមខ្លួនប៉ុណ្ណោះ ករណីកម្ពុជាបង្កើនកម្លាំងទ័ព និងអាវុ.ធតាមព្រំដែន ។

ព័ត៌មានផ្សព្វផ្សាយកាលពីថ្ងៃទី៣ ខែសីហា ថា កងទ័ពថៃបានជម្លៀសពលរដ្ឋនៅខេត្តសុរិន្ទ ទៅកាន់ជម្រកបណ្តោះអាសន្ន ដោយសារត្រៀមឈ្លានពានកម្ពុជាជាថ្មីនៅតាមព្រំដែន ចាប់ពីប្រាសាទតាមាន់ ប្រាសាទតាក្របី ប្រាសាទព្រះវិហារ រហូតដល់តំបន់អានសេះ មុនកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ នៅទីក្រុងកូឡាឡាំពួរ ប្រទេសម៉ាឡេស៊ី គឺពុំមែនជាការពិតឡើយ ខណៈមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃបានច្រានចោលព័ត៌មាននេះភ្លាមៗ ។

អ្នកនាំពាក្យកងទ័ពថៃ លោកឧត្តមសេនីយ៍ វីនឆ័យ សុវ៉ារី និយាយថា ព័ត៌មាននេះពុំពិតទេ បច្ចុប្បន្ន កងទ័ពថៃពុំបានជម្លៀសពលរដ្ឋចេញពីលំនៅឋានទេ សូមពលរដ្ឋថៃជឿជាក់ព័ត៌មានពីប្រភពផ្លូវការ និងកុំជឿជាក់ព័ត៌មានក្រៅផ្លូវការដែលធ្វើឱ្យជ្រួលច្របល់ក្នុងសង្គម ។ កងទ័ពថៃគោរពតាមកិច្ចព្រមព្រៀងឈប់បាញ់យ៉ាងម៉ឺងម៉ាត់ ប៉ុន្តែកងទ័ពថៃត្រៀមខ្លួនទប់ទល់ស្ថានការណ៍មិននឹកស្មានដល់ ប្រសិនបើកម្ពុជាបំពានបទឈប់បាញ់ញឹកញាប់ ឬកម្ពុជាបង្កើនកម្លាំងទ័ព និងអាវុធតាមព្រំដែន ។

ដូចគ្នានេះ អ្នកនាំពាក្យរដ្ឋាភិបាលថៃ និងជាគណៈកម្មាធិការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ លោក ជិរ៉ាយុ ហួងសាប់ និយាយថា ថៃគ្មានការជម្លៀសពលរដ្ឋនៅតំបន់ព្រំដែនកម្ពុជា-ថៃដើម្បីឈ្លានពានកម្ពុជាទេកាលពីថ្ងៃទី៣ ខែសីហា ពីព្រោះថៃពុំល្មើសអធិបតេយ្យប្រទេសជិតខាងមុន ។

បើតាមការផ្សព្វផ្សាយរបស់សារព័ត៌មានថៃកាលពីថ្ងៃទី៣ ខែសីហា ឱ្យដឹងថា កងទ័ពអាកាស កងទ័ពជើងគោក និងកងទ័ពជើងទឹកថៃ បានត្រៀមខ្លួនប្រយុទ្ធនៅតាមព្រំដែនកម្ពុជា-ថៃរយៈពេល២៤ម៉ោង ដោយកងទ័ពថៃចោទប្រកាន់កម្ពុជាបង្កើនកម្លាំងទ័ពជាបន្តបន្ទាប់ ។

មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានហៅអភិបាលខេត្តចំនួន២០ នៅភាគឦសានប្រជុំជាបន្ទាន់កាលពីថ្ងៃទី៣ ខែសីហា ស្តីពីការបង្ហោះដ្រូនលើដែនអាកាស ។ លោកបានបញ្ជាឱ្យអភិបាលខេត្តទាំងអស់ត្រួតពិនិត្យទីតាំងសំខាន់ៗ រួមមាន ៖ សាលាក្រុង ពហុកីឡដ្ឋាន ឃ្លាំងអាវុធ ស្ថានីយប៉ូលិស ស្ថានីយដឹកអ្នកដំណើរ និងអាកាសយានដ្ឋាន រួមទាំងស្វែងរកឧបករណ៍ការពារដ្រូនមកប្រើប្រាស់ ។

ក្រៅពីនេះ លោកបានបញ្ជាឱ្យសង្កេតមើលមនុស្សប្លែកមុខ ឬមនុស្សពុំរស់នៅក្នុងតំបន់ បើរកឃើញថា ជននោះពាក់ព័ន្ធនឹងបទល្មើស ឬជាអ្នកស៊ើបការណ៍សម្ងាត់ គឺត្រូវចាត់វិធានការជននោះតាមច្បាប់ គឺដាក់ទោសប្រហារជីវិត ។ ក្រៅពីនេះ ត្រូវស៊ើបអង្កេតរឿងរ៉ាវទាំងអស់ និងហាមដោះលែងអ្នកស៊ើបការណ៍សម្ងាត់ដាច់ខាត ៕

ប្រទេសថៃ ៖ សារព័ត៌មានថៃ Khaosod រាយការណ៍ថា នៅថ្ងៃទី២ ខែសីហា ឆ្នាំ២០២៥នេះ ពលរដ្ឋមកពីក្រុមរួមកម្លាំងដើម្បីទឹកដីបានប្រមូលផ្តុំគ្នានៅវិមានជ័យជម្នះ ទីក្រុងបាងកក ដើម្បីធ្វើបាតុកម្មបណ្តេញលោកស្រី ផេងថងថាន ស៊ីណាវ៉ាត់ ឱ្យចុះចេញពីតំណែងដោយពុំចាំបាច់រង់ចាំសេចក្តីសម្រេចរបស់តុលាការធម្មនុញ្ញ ព្រមទាំងផ្តល់កម្លាំងចិត្តឱ្យកងទ័ពថៃឈ្លានពាននៅព្រំដែន ។

នាវេលាម៉ោង១១ ថ្ងៃទី២ ខែសីហា ពលរដ្ឋថៃមកពីក្រុមរួមកម្លាំងដើម្បីទឹកដីបានប្រមូលផ្តុំគ្នានៅវិមានជ័យជម្នះ ដើម្បីនិយាយពីការបារម្ភចំពោះស្ថានការណ៍ព្រំដែនកម្ពុជា-ថៃ និងផ្តល់កម្លាំងចិត្តដល់កងទ័ពនៅព្រំដែន ។ ពួកគេនិយាយភាសាថៃ និងភាសាខ្មែរឱ្យបានឮដល់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។

ពលរដ្ឋថៃដែលមកចូលរួមតវ៉ាស្មើប្រមាណ១ម៉ឺននាក់ បានលើកទង់ជាតិរបស់ខ្លួនបង្ហាញពីការស្នេហាជាតិ ដែលមានសមត្ថកិច្ចចំនួន២,០០០នាក់ មកប្រចាំការនៅកន្លែងតវ៉ា ។ ការតវ៉ានេះចាប់ផ្តើមនាវេលាម៉ោង១២ថ្ងៃត្រង់ ដោយមានមេដឹកនាំក្រុមបាតុករឡើងនិយាយលើវេទិកាម្តងម្នាក់ ដូចជា ៖ លោក ចតុផន ព្រំផាន់ មកពីក្រុមប្រជាជនចម្រុះ, លោក ផិឈិត ជ័យមង្គល មេដឹកនាំបណ្តាញនិស្សិត និងប្រជាជនដើម្បីកំណែទម្រង់ប្រទេសថៃ ព្រមទាំងមេដឹកនាំក្រុមបាតុករផ្សេងទៀត ។

ក្រៅពីនេះ ក្រុមបាតុករក៏បានបង្កើតទីតាំងទទួលសម្ភារៈបរិច្ចាគដើម្បីយកទៅចែកឱ្យកងទ័ពថៃដែលឈ្លានពានទឹកដីកម្ពុជា និងចែកឱ្យសមត្ថកិច្ចនៅព្រំដែនកម្ពុជា-ថៃផងដែរ ។ ក្រុមបាតុករបានទាមទារចំនួន៣ចំណុច រួមមាន ៖

១-បណ្តេញលោកស្រី ផេថងថាន ចុះចេញពីតំណែងដោយពុំចាំបាច់រង់ចាំសេចក្តីសម្រេចរបស់តុលាការធម្មនុញ្ញ
២-គណបក្សនយោបាយដែលចូលរួមជាមួយរដ្ឋាភិបាល ត្រូវតែដកខ្លួនចេញពីរដ្ឋាភិបាលជាបន្ទាន់ និង
៣-អំពាវនាវឱ្យរដ្ឋាភិបាលបង្ហាញភាពច្បាស់លាស់ក្នុងការការពារអធិបតេយ្យ និងទទួលខុសត្រូវចំពោះស្ថានការណ៍ព្រំដែនឱ្យច្រើនជាងនេះ ។

ក្រុមបាតុករនិយាយថា ការធ្វើបាតុកម្មនេះមិនត្រឹមតែជាចលនានយោបាយប៉ុណ្ណោះទេ ប៉ុន្តែជាការរួមកម្លាំងគ្នារបស់ពលរដ្ឋដែលបារម្ភពីប្រទេសជាតិ ព្រមទាំងផ្តល់កម្លាំងចិត្តដល់កងទ័ព និងសមត្ថកិច្ចនៅតំបន់ប្រឈម ។ លើសពីនេះ ការតវ៉ាជាការដាក់សម្ពាធឱ្យរដ្ឋាភិបាលស្តាប់សំឡេងរបស់ពលរដ្ឋ ៕

អ្នកជំនាញជាន់ខ្ពស់មកពីវិទ្យាស្ថានគោលនយោបាយបរទេសរបស់សាកលវិទ្យាល័យ Johns Hopkins សហរដ្ឋអាមេរិក បានផ្តល់បទសម្ភាសន៍ជាមួយសារព័ត៌មាន Channel News Asia ស្តីពីជម្លោះព្រំដែនកម្ពុជា-ថៃ ហើយត្រូវបានអ្នកលេងបណ្តាញសង្គមចាប់អារម្មណ៍ និងចែកចាយកាលពីថ្ងៃទី៣១ ខែកក្កដា ឆ្នាំ២០២៥ ។ លោកផ្តល់ដំណោះស្រាយជម្លោះកម្ពុជា-ថៃ ក្នុងរយៈពេលខ្លី និងរយៈពេលវែង ហើយលោកថា បារាំងបានកំណត់ព្រំដែនកម្ពុជា-ថៃច្បាស់លាស់តាំងពីឆ្នាំ១៩០៧ មកម៉្លេះ ប៉ុន្តែថៃពុំទទួលស្គាល់ការកំណត់ព្រំដែនរបស់បារាំង ។

អ្នកជំនាញជាន់ខ្ពស់អាមេរិកនិយាយថា វាជារឿងចាំបាច់ដែលកម្ពុជា-ថៃត្រូវតែទម្លាក់គំនិតជាតិនិយមខ្លាំងពេក ហើយព្យាយាមឈ្វេងយល់ថា សន្តិភាពយូរអង្វែងកើតឡើងដោយសារការយល់ព្រមពីប្រទេសទាំងពីរ ។ កម្ពុជា-ថៃត្រូវតែយល់ថា ពេលនេះ ពុំមែនជាពេលបណ្តុះគំនិតជាតិនិយមខ្លាំងទេ ប៉ុន្តែវាជាពេលដែលប្រទេសទាំងពីរត្រូវប្រើប្រាស់ហេតុផលដើម្បីបង្កើតសន្តិភាព ។

ចំណែកការដោះស្រាយជម្លោះរយៈពេលវែងរវាងកម្ពុជា និងថៃ គឺការដោះស្រាយជម្លោះនេះមានលក្ខណៈស្មុគស្មាញ ។ អ្វីដែលលំបាកបំផុត គឺការកំណត់តំបន់ព្រំដែនឱ្យច្បាស់លាស់ ហើយនេះជាមូលហេតុនាំឱ្យជម្លោះកម្ពុជា-ថៃអូសបន្លាយពេលរហូតមកដល់ពេលនេះ ។ បារាំងបានកំណត់ព្រំដែនកម្ពុជា-ថៃច្បាស់លាស់តាំងពីឆ្នាំ១៩០៧ មកម៉្លេះ ប៉ុន្តែថៃពុំទទួលស្គាល់ការកំណត់ព្រំដែនរបស់បារាំង បើទោះជាមានការកាត់ក្តីពីតុលាការយុត្តិធម៌អន្តរជាតិក្តី ប៉ុន្តែនៅតែមានបញ្ហាតាមបណ្តោយព្រំដែនកម្ពុជា-ថៃរហូតមក ។

លោកបានណែនាំឱ្យកម្ពុជា-ថៃមានដំណោះស្រាយជម្លោះព្រំដែនចំនួន៣ចំណុច រួមមាន ៖

១-កម្ពុជា-ថៃត្រូវកំណត់ព្រំដែនឱ្យច្បាស់លាស់
២-កម្ពុជា-ថៃត្រូវកំណត់វិធានការអ្វីម្យ៉ាងដើម្បីតាមដានការអនុវត្តបទឈប់បាញ់ឱ្យមានទំនុកចិត្ត និង
៣-បង្កើនការវិនិយោគសេដ្ឋកិច្ចនៅតំបន់ព្រំដែនទាំងសងខាង ដើម្បីឱ្យប្រទេសទាំងពីរទទួលបានផលប្រយោជន៍ និងការខាតបង់ ព្រមទាំងមានសន្តិភាពយូរអង្វែង ។

អ្នកជំនាញជាន់ខ្ពស់អាមេរិកគិតថា ដំណោះស្រាយទាំង៣ចំណុចនេះចាំបាច់ត្រូវតែប្រើប្រាស់ទាំងផ្នែកសេដ្ឋកិច្ចស្ថាប័ន និងគូរផែនទី ។ មូលហេតុមួយក្នុងចំណោមមូលហេតុជាច្រើនដែលធ្វើឱ្យមានសង្គ្រាមរវាងកម្ពុជា-ថៃពេលនេះ គឺមែនមែនជាការចៃដន្យទេ ប៉ុន្តែវាដល់ពេលសង្គ្រាមកើតឡើង ដោយសារប្រទេសថៃគ្មានស្ថិរភាពផ្នែកនយោបាយ ។

គួរបញ្ជាក់ថា នៅប្រទេសថៃអប់រំក្មេងជំនាន់ក្រោយតែប្រវត្តិសាស្ត្របោកប្រាស់ ប្រវត្តិសាស្ត្រក្លែងក្លាយពីមួយជំនាន់ទៅមួយជំនាន់ ទើបធ្វើឱ្យពលរដ្ឋថៃយល់ច្រឡំយ៉ាងខ្លាំង ពុំទទួលស្គាល់ការពិត ដោយសារពួកគេរៀនប្រវត្តិសាស្ត្រប្រឌិត ។ ហេតុនេះ ពលរដ្ឋថៃភាគច្រើននៅតែចិញ្ចឹមចិត្តចង់បានទឹកដីកម្ពុជា ពីព្រោះយល់ថា គឺជាអតីតទឹកដីរបស់ខ្លួន ហើយសូម្បីតែផែនទី ក៏ថៃគូសផែនទីខ្លួនឯងដែរ ថៃពុំទទួលស្គាល់ផែនទីបារាំង ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon នៅថ្ងៃទី២ ខែសីហា ឆ្នាំ២០២៥ ឱ្យដឹងថា ទីប្រឹក្សារដ្ឋមន្ត្រីក្រសួងការបរទេសថៃបានប្រាប់ពលរដ្ឋភៀសសឹកកុំទាន់ត្រឡប់ទៅផ្ទះវិញ និងរង់ចាំកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ ចាប់ពីថ្ងៃទី៤ ដល់ថ្ងៃទី៧ ខែសីហា នៅប្រទេសម៉ាឡេស៊ីបញ្ចប់សិន ទើបពលរដ្ឋអាចត្រឡប់ទៅផ្ទះបាន ។

អ្នកស្រី ឆយិកា វង្សណៈផាចាន់ ទីប្រឹក្សារដ្ឋមន្ត្រីក្រសួងការបរទេសថៃនិយាយថា ពលរដ្ឋថៃភៀសសឹកកំពុងស្នាក់នៅក្នុងទីជម្រកផ្សេងៗចង់ត្រឡប់ទៅផ្ទះវិញក្រោយពីកម្ពុជា-ថៃចរចាកិច្ចព្រមព្រៀងឈប់បាញ់នៅម៉ាឡេស៊ី ប៉ុន្តែការត្រឡប់ទៅផ្ទះរបស់ពលរដ្ឋភៀសសឹក គឺអាស្រ័យលើការចរចារវាងភាគីទាំងពីរក្នុងកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ រយៈពេល៤ថ្ងៃនៅម៉ាឡេស៊ីចប់សព្វគ្រប់សិន ។

ក្រោយពីថៃបាននាំក្រុមមន្ត្រីទូតជាច្រើនប្រទេសចុះពិនិត្យមើលទីតាំងខូចខាតរួចហើយ ក្រសួងការបរទេសថៃនឹងប្រកាសនៅថ្ងៃទី៤ ខែសីហា ពីការខូចខាតដោយសារសង្គ្រាមជាមួយកម្ពុជា ប្រាប់ទៅស្ថានទូតនានាប្រចាំប្រទេសថៃ ។

ពេលនេះដែរ លោក ម៉ារីស សាងៀមផុង រដ្ឋមន្ត្រីក្រសួងការបរទេសនឹងប្រជុំតាមអនឡាញជាមួយឯកអគ្គរាជទូតថៃ កុងស៊ុលថៃ និងមន្ត្រីតំណាងថៃនៅប្រទេសនានា ដើម្បីបញ្ជាក់ពីគោលជំហរថៃចំពោះសហគមន៍អន្តរជាតិ ។ ក្រៅពីនេះ ថៃនឹងតទល់ជាមួយព័ត៌មានខាងកម្ពុជា ដោយអ្នកស្រី ឆយិកា ចោទប្រកាន់ថា ជាព័ត៌មានក្លែងក្លាយ បើទោះជាសង្គ្រាមបញ្ចប់ក្តី ប៉ុន្តែការតទល់ព័ត៌មានពុំទាន់បញ្ចប់ ។

ក្រសួងការបរទេសថៃប្រកាន់គោលជំហរការចរចាទ្វេភាគីជាមួយកម្ពុជាតាមរយៈយន្តការផ្សេងៗ ហើយថៃសូមសរសេរប្រទេសជាមិត្តដែលបង្កលក្ខណៈងាយស្រួលឱ្យមានការចរចាឈប់បាញ់រវាងកម្ពុជា-ថៃនៅម៉ាឡេស៊ីក្នុងឋានៈប្រធានអាស៊ាន កាលពីថ្ងៃទី២៨ ខែកក្កដា ។ ការឈប់បាញ់ជាចំណុចចាប់ផ្តើមដ៏សំខាន់ធ្វើឱ្យស្ថានការណ៍ត្រឡប់មករកប្រក្រតី ។

កាលពីថ្ងៃទី១ ខែសីហា ក្រសួងការបរទេសថៃបានអញ្ជើញបណ្តាប្រទេសសមាជិកអាស៊ាន រួមទាំងប្រទេសមានតួនាទីរក្សាសន្តិភាព និងសន្តិសុខលើពិភពលោក ដូចជា ៖ សហរដ្ឋអាមេរិក ចិន និងជប៉ុន រួមទាំងសារព័ត៌មានបរទេស ចំនួន២៣ មកពិនិត្យទីតាំងដែលថៃចោទថាខូចខាតដោយសារសង្គ្រាម ។ ថៃកុហកពិភពលោក និងចោទប្រកាន់កងទ័ពកម្ពុជាវាយប្រហារតំបន់ស៊ីវិល ស្ថានីយប្រេងឥន្ធនៈ ហាងលក់ទំនិញ មន្ទីរពេទ្យ និងសាលារៀន រហូតបណ្តាលឱ្យពលរដ្ឋខ្លួន និងរងរបួស ។

អ្នកស្រី ឆយិកា និយាយបំភ្លឺប្រាប់ពិភពលោកថា កងទ័ពថៃប្រើប្រាស់សិទ្ធិការពារខ្លួន ការពារអធិបតេយ្យ និងពលរដ្ឋពីការឈ្លានពាន ។ ការចរចាសន្តិភាពយូរអង្វែង គឺកម្ពុជា-ថៃត្រូវតែយកការពិតមកចរចា ខណៈការនាំគណៈប្រតិភូការទូតមកមើលទីតាំងប៉ះពាល់កន្លងមក គឺថៃរង់ចាំកងទ័ពវាយតម្លៃសុវត្ថិភាព ដោយសារកាលពីថ្ងៃទី៣១ ខែកក្កដា កងទ័ពថៃបានប្រមូលគ្រាប់មីន និងគ្រាប់កាំភ្លើងធំនៅទីតាំងជាច្រើន ។

គួរបញ្ជាក់ថា ថៃព្យាយាមបំភ្លៃព័ត៌មាន និងកុហកពិភពលោកថា ថៃពុំបានផ្ទុះអាវុធមុន ប្រទេសខ្លួនរងគ្រោះ កងទ័ពថៃគ្រាន់តែប្រើប្រាស់សិទ្ធិការពារខ្លួនពីការឈ្លានពាន និងទម្លាក់កំហុសលើកម្ពុជា ។ តើថៃចោទប្រកាន់កម្ពុជាដល់ពេលណាទៀត ពីព្រោះពិភពលោកដឹងការពិតអស់ហើយថា កងទ័ពថៃឈ្លានពានទឹកដីកម្ពុជា ថៃគ្មានអ្វីដោះសារទេ ៕

ថៃ៖ អ្នកនាំពាក្យរងកងទ័ពថៃ លោក Wanchana Sawasdee បាននិយាយកាលពីថ្ងៃទី1 ខែសីហា ឆ្នាំ2025 នៅចំពោះមុខអ្នកសារព័ត៌មានថៃថា ថៃមិនបានធ្វើទារុ.ណកម្មទាហានខ្មែរដែលបានចាប់ខ្លួនមកនោះទេ កម្ពុជាកំពុងតែព្យាយាមលាបពណ៌ឲ្យថៃ និងកុហកទៅកាន់ពិភពលោក។ នេះបើយោងតាមសារព័ត៌មាន Khaosod។

នៅថ្ងៃទី1 ខែសីហា ឆ្នាំ 2025 ទាហានខ្មែរចំនួន2នាក់ ដែលថៃបានចាប់ខ្លួនបានធ្វើមាតុភូមិនិវត្តន៍មកដល់ទឹកដីកម្ពុជាវិញ នាម៉ោង 11ព្រឹក នៅច្រកអូស្មាច់ ខេត្តឧត្តរមានជ័យ ទិដ្ឋភាពក្តុ.កក្ដួល និងភាពគួរឲ្យឈឺចាប់បានផុសចេញឡើងពីបេះដូងនៃប្រជាជនខ្មែរគ្រប់ៗគ្នា បន្ទាប់ពីបានឃើញសភាពទ្រុឌទ្រោមទាំងរាងកាយ និងស្មារតីនៃទាហានទាំង2នាក់។ ការណ៍នេះ ក៏បានជំរុញឲ្យគណៈកម្មាធិការសិទ្ធិមនុស្សកម្ពុជា បានដាក់ញ្ញត្តិបន្ទាន់មួយ ផ្ញើទៅកាន់អង្គការសហប្រជាជាតិ ដើម្បីជួយអន្តរគមន៍ និងស៊ើបអង្កេត ករណីធ្វើទារុ.ណកម្មយ៉ាងឃោ.ឃៅមកលើទាហានខ្មែរ ដែលត្រូវបានចាប់ខ្លួនទៅដោយយោធាថៃ។

នៅក្នុងថ្ងៃដដែលបន្ទាប់ពីមានការចោ.ទប្រកាន់ពីសំណាក់កម្ពុជាដូចខាងនេះ ឧត្តមសេនីយ៍ឯក Wanchana Sawasdee អ្នកនាំពាក្យរងកងយោធពលភូមិន្ទថៃ បានចេញមកច្រានចោលវិញភ្លាមៗ ដោយអះអាងថា អ្នកទោសទាំងអស់ដែលត្រូវបានថៃចាប់ឃុំខ្លួន គឺទទួលបានការថែទាំយ៉ាងល្អ មិនមានការធ្វើបាប ឬរងទារុ.ណកម្មអ្វីឡើយ កម្ពុជាកំពុងតែបោ.កប្រាស់ពិភពលោក។

អតីតតារាសម្ដែង និងបច្ចុប្បន្នជាអ្នកនាំពាក្យរងកងទ័ពថៃរូនេះបានបញ្ជាក់ នៅពេលថៃបញ្ជូនទាហានខ្មែរ2នាក់នោះត្រឡប់ទៅកម្ពុជាវិញ លោកអាចទាយដឹងមុនថាកម្ពុជានឹងប្រើយុទ្ធសាស្រ្តអ្វី ដូច្នេះពេលនេះលោកបានឲ្យក្រុមការងាររបស់លោករៀបចំភស្តុតាងដែលមានរួចរាល់ហើយ ដើម្បីលាតត្រដាងការកុហករបស់កម្ពុជា។

គួរឲ្យដឹងថា ការអះអាងរបស់អ្នកនាំពាក្យរងកងទ័ពថៃខាងលើនេះ ហាក់មិនសង្វាក់គ្នាជាមួយនឹងស្ថានភាពជាក់ស្ដែងនៃទាហានទាំង2នាក់ ដែលយើងបានឃើញទាល់សោះ។ ក្នុងន័យនេះ បើតាមគណៈកម្មាធិការសិទ្ធិមនុស្សនៅកម្ពុជា បានគូសបញ្ជាក់នៅក្នុងញ្ញត្តិដែលដាក់ទៅអង្គការសហប្រជាជាតិថា កងកម្លាំងកម្ពុជាទាំងអស់ដែលត្រូវបានយោធាថៃព័ទ្ធចាប់នៅក្នុងលេណដ្ឋាន កាលពីថ្ងៃទី 29 ខែសីហា គឺមានសភាពប្រក្រតី មានសមត្ថភាពគ្រប់គ្រាន់ និងមានស្មារតីជាធម្មតា។ ប៉ុន្តែនៅពេលទាហានចំនួន2នាក់ ត្រឡប់មកដល់មាតុភូមិវិញក្រោយការដោះលែង ស្រាប់តែមានម្នាក់រងរបួសដល់ពិការ ខណៈម្នាក់ទៀតវិបល្លាសផ្លូវចិត្ត ដែលជារឿងមិនអាចទទួលយកបានឡើយ។

ដោយឡែក ចំពោះទាហានខ្មែរដែលនៅសល់ ថៃក៏មិនបានបញ្ជាក់ពីពេលវេលាច្បាស់លាស់ក្នុងការបញ្ចូនពួកគាត់ឱ្យត្រលប់មកមាតុប្រទេសវិញពេលណានោះដែរ ខណៈថៃគ្មានភស្តុតាងបញ្ជាក់ពីសុខសុវត្ថិភាពរបស់ពួកគាត់ ហើយក្រសួងការពារជាតិកម្ពុជា បានព្យាយាមទទូចឱ្យថៃ ប្រគល់ពួកគាត់ត្រឡប់មកវិញឱ្យបានឆាប់បំផុត និង ដោយសុវត្ថិភាព៕

ហាណូយ៖ ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃសុក្រថា ទឹកជំនន់ដែលបង្កឡើងដោយសារភ្លៀងធ្លាក់ខ្លាំង បានបណ្តាលឲ្យមនុស្សយ៉ាងហោចណាស់ ១៤ នាក់ស្លា.ប់ និងបាត់ខ្លួន នៅក្នុងខេត្ត Dien Bien ភាគខាងជើងនៃប្រទេសវៀតណាម។

កាសែត Tien Phong បានរាយការណ៍ថា ទឹកជំនន់បានកើនឡើងយ៉ាងឆាប់រហ័សនៅយប់ថ្ងៃព្រហស្បតិ៍ បន្ទាប់ពីមានភ្លៀងធ្លាក់ខ្លាំងជាច្រើនម៉ោង ដោយបានជន់លិចផ្ទះនៅតំបន់ទំនាប និងបណ្តាលឱ្យមានទឹកជំនន់ភ្លាមៗ ព្រមទាំងការរអិលបាក់ដីនៅតំបន់ភ្នំនៃខេត្ត។ ក្នុងនោះភូមិភ្នំ Xa Dung បានរងគ្រោះធ្ងន់ធ្ងរបំផុត ដោយមានអ្នកស្លា.ប់ម្នាក់ និងបាត់ខ្លួនចំនួន ៦ នាក់។

បើតាមសេចក្តីថ្លែងការណ៍របស់គណៈកម្មាធិការប្រជាជនខេត្តបានឲ្យដឹងថា ចរាចរណ៍ និងបណ្តាញអគ្គិសនីទៅកាន់ផ្នែកមួយចំនួននៃខេត្តត្រូវបានកាត់ផ្តាច់ដោយសារទឹកជំនន់នេះ។

ជនរងគ្រោះពីរនាក់នៅក្នុងភូមិ Hang Pu Xi ត្រូវបានកប់ក្នុងដីភក់ ហើយក្រុមអ្នកជួយសង្គ្រោះមិនទាន់រកឃើញសាក.សពរបស់ពួកគេនៅឡើយទេ។ លើសពីនេះ ដោយសារភ្លៀងធ្លាក់ខ្លាំងក្នុងខេត្តបានរារាំងដល់ការស្វែងរកអ្នកបាត់ខ្លួនជាខ្លាំង៕