ថៃ នារីសុជាតា ហៅ ហ្វីយ៉ាតា បេក្ខភាពលេចធ្លោរបស់បវរកញ្ញាចក្រវាលកម្ពុជាឆ្នាំ២០២៥បានបង្ហាញវីដេអូខ្លីមួយនៅលើបណ្តាញសង្គមទិកតុកពីវីដេអូខលរបស់ខ្លួនជាមួយនឹង ទេព បូព្រឹក្ស និង អ៊ិន លក្ខិណា។

ហ្វីយ៉ាតា បានបង្ហោះវីដេអូខ្លីជាមួយនឹងប្រយោគថា My ENERGY ។ ទោះយ៉ាងណា ហ្វីយ៉ាតា បង្ហោះវីដេអូខ្លីនេះតែនៅលើបណ្តាញសង្គមទិកតុកប៉ុណ្ណោះ ហើយក៏មិនបាន បង្ហាញខ្លឹមសារការនិយាយគ្នារបស់អ្នកទាំង៣ប្រាប់ទៅទស្សនិកជនឱ្យបានដឹងដែរ។

ទោះបីជាការគាំទ្រនេះបែបស្ងាត់ៗពីសំណាកតារាចម្រៀង ទេព បូព្រឹក្ស និង អ៊ិន លក្ខិណា Miss Cosmo Cambodia 2024 ក៏បានធ្វើឱ្យអ្នកគាំទ្រផ្សេងទៀតបញ្ចេញមតិថា ហ្វីយ៉ាតា នឹងទទួលបានជម្នះក្នុងការប្រកួតបវរកញ្ញាចក្រវាលកម្ពុជាឆ្នាំ២០២៥។ បេក្ខភាពរូបនេះគឺមានចំណេះជំនាញច្រើនក្នុងអាជីពសិល្បៈរួមទាំងមានមុខជំនួញផ្ទាល់ខ្លួន។ នាងក៏បេក្ខនារីម្នាក់ដែលមានកូនចូលរួមប្រកួតក្នុងកម្មវិធីនេះផងដែរ។

កាលកន្លងមកនេះ ហ្វីយ៉ាតា MUC07 បានធ្វើឱ្យអ្នកតាមដានវិស័យបវរកញ្ញាមានការពេញចិត្តចំពោះសម្តីនាងបន្ទាប់ពីនាងនិយាយថាមនុស្សគ្រប់គ្នាសុទ្ធតែមានចំណុចខ្លាំងរៀងៗខ្លួន។ នេះនាងមានន័យថារាល់បេក្ខភាពដែលចូលរួមប្រកួតទាំងអស់មិនថាបេក្ខភាពជំនាន់ថ្មីឬចាស់ ហ្វីយ៉ាតា មិនមើលស្រាលដៃគូប្រកួតឡើយ។

គួរបញ្ជាក់ផងដែរថា ការប្រកួតបវរកញ្ញាចក្រវាលកម្ពុជាឆ្នាំ២០២៥មានបេក្ខនារីទាំងអស់ ចំនួន២០រូបដែលត្រូវប្រជែងគ្នាដើម្បីមានឱកាសតំណាងប្រទេសកម្ពុជាប្រកួតនៅលើឆាកអន្តរជាតិនៅឯប្រទេសថៃ។ វគ្គប្រកួតបឋម Miss Universe Cambodia 2025 នឹងប្រព្រឹត្តទៅនៅថ្ងៃទី២៤ ខែកក្កដា ឆ្នាំ២០២៥ និងវគ្គផ្ដាច់ព្រ័ត្រ នៅថ្ងៃទី២៦ ខែកក្កដា ឆ្នាំ២០២៥ ដែលមានទីតាំងនៅសាលវិមាន ពហុកីឡាដ្ឋានជាតិអូឡាំពិក៕

កំពុងតែនាំយកតន្រ្តីខ្មែរបង្ហាញនៅលើទឹកដីសហរដ្ឋអាម៉េរិកតារារ៉េប វណ្ណដា វណ្ណថាន រ៉េត ស៊ូហ្សាណា បានចេញសារលើកទឹកចិត្តនិងបួងសួងដល់បុព្វបុរសខ្មែរថែរក្សាការពារកងទ័ពជួរមុខកម្ពុជាដែលសត្រូវឈ្លានពានថៃបានបើកវាយប្រហារមុនមកលើកម្ពុជាទាំងព្រឹកនៅថ្ងៃទី២៤ កក្កដា ឆ្នាំ២០២៥។

វណ្ណដា បានបង្ហោះនៅលើផេកផ្លូវការថា «សូមបួងសួងដល់បារមីវត្ថុស័ក្តិសិទ្ធិក្នុងលោកទាំងអស់ និងបុព្វបុរសដូនតាខ្មែរគ្រប់ជំនាន់ ជួយឃុំគ្រង ការពារថែរក្សា ដល់បងប្អូនកងទ័ពជួរមុខប្រកបដោយសុខសុវត្ថិភាពគ្រប់ៗគ្នា»។ តារាចម្រៀង នរិទ្ធ បានបង្ហោះថា «សូមបន់ស្រន់បារមីវត្ថុស័ក្តិសិទ្ធិទាំងអស់តាមថែរក្សាការពារឱ្យបងប្អូនកងទ័ពទាំងអស់ ទទួលបានជោគជ័យ និងសុវត្ថិភាពទាំងអស់គ្នា សូមអ្នកទាំងអស់គ្នាចូលរួមផ្តល់កម្លាំងចិត្តដល់វីរកងទ័ពខ្មែរយើង»។

កញ្ញា រ៉េត ស៊ូហ្សាណា បានបង្ហោះនៅលើបណ្តាញសង្គមរបស់ខ្លួនដែរថា «សូមជូនពរ និងផ្តល់កម្លាំងចិត្តដល់បងប្អូនកងទ័ពទាំងអស់ឱ្យមានសុខសុវត្ថិភាព ។ ងាកទៅកាន់តារារ៉េប យូហៃ ក៏បានជូនពរកងទ័ពកម្ពុជាដែរថា «សូមឱ្យបងៗវីរកងទ័ពជួរមុខដ៏អង់អាចក្លាហាននៃកម្ពុជាទទួលបានជោគជ័យ»។

តារាចម្រៀង វណ្ណថាន ដែលពូកែលេងឧបករណ៍ភ្លេងខ្មែរវិញបានបង្ហោះយ៉ាងដូច្នេះថា «សូមទសបារមីវត្ថុស័ក្តិសិទ្ធិទាំងអស់ សូមជួយតាមថែរក្សាវីរកងទ័ពគ្រប់រូបដែលកំពុងឈរជើងការពារទឹកដី»។

ការផ្ទុះអាវុធនៅព្រឹកថ្ងៃទី២៤ ខែកក្កដា អ្នកនាំពាក្យក្រសួងការពារជាតិកម្ពុជា បានចេញសេចក្តីថ្លែងការណ៍ថានៅវេលាម៉ោងប្រមាណ៦កន្លះព្រឹក ភាគីថៃ បានចាប់ផ្តើមបង្កសកម្មភាពបំពានលើកិច្ចព្រមព្រៀងដែលបានឯកភាពគ្នា ដោយឡើងលើប្រាសាទតាមាន់ធំ ហើយលបចូលរាយបន្លាលួសតាមជើងប្រាសាទ។ នៅវេលាម៉ោង៧:៤នាទីព្រឹក ភាគីថៃបានបង្ហោះដ្រូនរយៈពេល២នាទី ហើយនៅវេលាម៉ោង ០៨:៣០នាទី ភាគីថៃបានធ្វើការបាញ់ឡើងលើ បន្ទាប់មកនៅវេលាម៉ោង៨:៤៦នាទីព្រឹក កងទ័ពឈ្លានពានថៃ បានបើកការបាញ់ប្រហារមុន មកលើកងទ័ពកម្ពុជានៅតំបន់ប្រាសាទតាមាន់ធំ និងឈានទៅបាញ់ប្រហារនៅប្រាសាទតាក្របី តំបន់ភ្នំខ្មោច និងបានពង្រីកភូមិសាស្រ្តនៃការវាយប្រហារទៅដល់តំបន់មុំបី រួមទាំងប្រើប្រាស់យន្តហោះចម្បាំងទម្លាក់គ្រាប់ចំនួន២គ្រាប់នៅផ្លូវវត្តកែវសិក្ខាគីរីស្វារៈ។បន្ទាប់មកនៅវេលាម៉ោង៨:៤៧នាទីព្រឹក កងកម្លាំងប្រដាប់អាវុធរបស់កម្ពុជា គ្មានជម្រើសអ្វីក្រៅពីប្រើប្រាស់សិទ្ធិការពារខ្លួនក្នុងដែនអធិបតេយ្យ និងបូរណភាពទឹកដីរបស់ខ្លួន ប្រឆាំងនឹងការឈ្លានពានរបស់ទាហានថៃដែលបានបំពានលើបូរណភាពទឹកដីកម្ពុជា៕

ខុសពីសិល្បករ សិល្បការិនីជាច្រើនរូបដែលចេញបង្ហោះសារលើកទឹកចិត្តនិងបួងសួងវត្ថុស័ក្តិសម បុព្វបុរសខ្មែរឱ្យថែរក្សាកងទ័ពជួរមុខតារាស្រី មិនចេនី បានបង្ហាញពីការមិនពេញចិត្តរបស់ខ្លួនទៅលើអ្នកសើចចំអកលើគូបក្ខដិបក្ខគ្មានមនុស្សធម៌ក្នុងរឿង។ ការបង្ហោះរបស់ Influencer រូបនេះត្រូវបានសាធារណជនបញ្ចេញមតិរិះគន់យ៉ាងខ្លាំងរហូតតារាស្រីរូបនេះបានលុបការបង្ហោះរបស់ខ្លួន។

នៅថ្ងៃទី២៤ កក្កដា កងទ័ពកម្ពុជានិងថៃបានផ្ទុះអាវុធជាមួយគ្នាដែលភាគីថៃជាអ្នកចាប់ផ្តើមមុន។ ស្របពេលស្ថានការមានភាពតានតឹងពលរដ្ឋខ្មែររួមទាំងអ្នកសិល្បៈច្រើនរូបស្រុះដៃគ្នាយ៉ាងខ្លាំងដោយបានបង្ហាញការលើកទឹកចិត្តនិងបួងសួងឱ្យកងទ័ពខ្មែរមានសុខសុវត្ថិភាពយកឈ្នះមាសត្រូវ។ យ៉ាងណាមិញខុសពីអ្នកសិល្បៈជាច្រើន មិន ចេនី ស្រាប់តែបង្ហោះសំណេរមួយថា «តើពេលវេលានេះជាពេលវេលាឌឺដង សើចចំអក និង ដាក់ទំនាយ គូបដិបក្ខនៅក្នុងបណ្តាញសង្គមទៅមកមែនទេ?? ខ្ញុំបានអូសកាត់វីឌីអូមួយចំនួន សូម្បីសាកសពក៏មានមនុស្សលើកដៃខមិនសើច ចំអកទៅរួចដែរ!! មានមនុស្សធម៌ក្នុងខ្លួនទេ?? សូមចែករំលែកដោយសម្បជញ្ញៈ»។

យ៉ាងណាមិញ ការបង្ហោះរបស់ ចេនី បានធ្វើឱ្យមហាជនប្រតិកម្មនិងបានបញ្ចេញមតិរិះគន់យ៉ាងច្រើនមកកាន់នាងរហូតការបង្ហោះនោះត្រូវបានលុបចេញពីបណ្តាញសង្គមរបស់ខ្លួន។

បន្ទាប់ពីដឹងកំហុសរបស់ខ្លួន មិន ចេនី បានចេញមកសូមទោសនិងមកទទួលខុសត្រូវអ្វីដែលនាងនិយាយមិនបានគិតពិចារណាជាមុនដោយសារតែមានការស្លុតខ្លាំងពេលឃើញមានអ្នកស្លាប់និងរបួស។

Influencer រូបនេះបានបង្ហោះយ៉ាងដូច្នេះថា «នាងខ្ញុំ Jany Min ដោយស្មោះត្រង់ខ្ញុំពិតជាមានអារម្មណ៍ថាខុស និងចង់ចេញមកទទួលខុសត្រូវចំពោះStatusដែលមិនបានគិតមុននោះ ខ្ញុំពិតជាមានអារម្មណ៍ថាខុស ហើយពិតជាចង់គោរពសុំទោសមែន។ មូលហេតុដែលធ្វើឱ្យខ្ញុំផុស Statusមុននោះ គឺដោយសារតែខ្ញុំបានឃើញ Video មួយដែលក្នុងនោះមានអ្នកស្លា.ប់ និងរ.បួស ខ្ញុំមានអារម្មណ៍ថាស្លុតចិត្តខ្លាំង ហើយបានឃើញcommentសើចខ្លះដែលធ្វើឱ្យខ្ញុំមានអារម្មណ៍ថាមិនស្រួលចិត្ត ព្រោះអាណិតអ្នកដែលមិនដឹងអី។ ប៉ុន្តែអ្វីដែលខ្ញុំមិនបានគិតដល់ គឺតាមពិតអ្នកដែលគួរឱ្យអាណិតគឺជាពួកយើងនោះទេ ពួកយើងគឺជាជនរងគ្រោះដែលត្រូវបានគេឈ្លានពាន យើងគ្រាន់តែការពារខ្លួនប៉ុណ្ណោះ ដោយស្មោះត្រង់ពេលដែលខ្ញុំដឹងហើយ ខ្ញុំពិតជាមានអារម្មណ៍មិនសុខ ហើយពិតជាសមនឹងគេថាឱ្យមែន។ ខ្ញុំមកនេះមិនមែនចង់ឲ្យបងប្អូនឈប់ថាឲ្យនោះទេ ខ្ញុំគ្រាន់តែមកចង់បកស្រាយរឿងនៅពីក្រោយ Statusនោះប៉ុណ្ណោះ បងប្អូនអាចនៅបន្តថាឲ្យខ្ញុំបាន ព្រោះវាពិតជាសមអ៊ីចឹងមែន។ ខ្ញុំនៅតែជឿថាកម្ពុជាត្រូវការសន្តិភាព ខ្ញុំបន្តឈរជាមួយកម្ពុជា»៕

ភាពតានតឹងនៅបន្ទាត់ព្រំដែនរវាងប្រទេសកម្ពុជានិងថៃនៅមិនទាន់ថមថយកម្តៅនៅឡើយទេផ្ទុយទៅវិញភាគីថៃតែងតែចោទប្រកាន់មកកាន់ភាគីខាងកម្ពុជាជារឿយៗ។ ស្របពេលប្រទេសជាតិកំពុងជួបបញ្ហាការពារទឹកដីពីសត្រូវឈ្លានពានងាកមកកាត់តារាចម្រៀង ជី ដេវីត ទេព បូព្រឹក្ស តារាចម្រៀង ពេជ្រ សូលីកា ពិធីការិនី សុភ័ក្រ្ត កុសុម៉ា រួមទាំងបវរកញ្ញានិងអ្នកសិល្បៈជាច្រើនរូបទៀតបានបង្ហោះនៅលើបណ្តាញសង្គមលើកទឹកចិត្តកងទ័ពជួរមុខនិងបួងសួងឱ្យកងទ័ពខ្មែរសុខសប្បាយ។

តារាចម្រៀង ទេព បូព្រឹក្ស បានសរសេរថា «បុព្វហេតុកាពារជាតិស្មារតីស្នេហាជាតិក្នុងកាលទេសៈនេះយើងខ្ញុំសូមប្តេជ្ញាចូលរួមជាមួយប្រទេសជាតិត្រូវបូជាឈាមការពារអធិបតីភាពទឹកដី កម្ពុជា ពីចោរឈ្លានពានដោយយើងខ្ញុំនឹងតាំងនាមជា ទ័ពជួរក្រោយសូមលើកទឹកចិត្ត និង សម្តែងនូវសេចក្ដីជឿជាក់ទាំងស្រុងជូនបងប្អូនកងទ័ពជួរមុខ ដោយត្រៀមលក្ខណៈកម្ចាត់ចោរឈ្លានពានចេញពីទឺកដីកម្ពុជា ឬ បម្រុងបំពានអធិបតីភាពដែនដីកម្ពុជា។ វត្ថុស័ក្ដិសិទ្ធិ និង ឬទ្ធីទសបរមីនៃរាជានិងស្តេចមេទ័ពគ្រប់អង្គដែលមានអនុភាពទ្រង់នឹងជួយជាកម្លាំងទ្រទ្រង់ដ៏ខ្លាំងខ្លាដល់ទ័ពដ៏អង់អាចកម្ពុជា។ ចោរតាំងចិត្តជាបិសាចឈ្លានពានចោរនឹងវិនាសដោយសេក្តីប្រមាថរបស់ចោរជាក់ជាមិនខាន»។

តារាចម្រៀង ជី ដេវីត បានបន្ថែមលើការបង្ហោះរបស់ ទេព បូព្រឹក្ស ថា «កងទ័ពកម្ពុជាដ៏អង់អាចត្រៀមលក្ខណរួចរាល់ក្នុងការការពារបូរណភាពទឹកដីពីចោរឈ្លានពាន ដោយអំណាចនៃសច្ចធម៌ដោយសេចក្តីមិនប្រមាថវត្ថុស័ក្ដិសិទ្ធិនៃស្តេចមេទ័ពនឹងជួយជ្រោមជ្រែងដល់ដែនដីមួយនេះ។ ចោរតាំងចិត្តជាបិសាចឈ្លានពានចោរនឹងវិនាសដោយសេក្តីប្រមាថរបស់ចោរជាក់ជាមិនខាន»។

តារាចម្រៀង ពេជ្រ សូលីកា បានបង្ហោះថា «សូមបួងសួងបារមីវត្ថុស័ក្តិសិទ្ធគ្រប់ទិសទីជួយឃុំគ្រងថែរក្សាការពារបងៗកងកម្លាំងទាំងអស់»។ ពិធីការិនី សុភ័ក្រ្ត កុសុម៉ា វិញបានលើកឡើងទឹកចិត្តកងទ័ពជួរមុខថា «សូមដួងព្រលឹងព្រះមហាវិរៈក្សត្រខ្មែរ កំពូលមេទ័ពខ្មែរ ព្រលឹងដូនតាខ្មែរគ្រប់ជំនាន់ និងទសបារមីវត្ថុស័ក្តិសិទ្ធិសូមជួយឃុំគ្រងថែរក្សាបងប្អូនកម្លាំងកងទ័ពខ្មែរ សូមឈ្នះអស់មារសត្រូវ និងជួបតែសេចក្តីសុខសុវត្ថិភាពជានិរន្តរ៍
ខ្មែររួបរួមខ្មែរខ្លាំងសូមមេត្តាបងប្អូនកុំបង្ហាញរូបភាពកងកម្លាំងទ័ពចល័ត»។

តារាចម្រៀង នី រតនា ថា «ម៉ោងនេះ វេលានេះ កម្ពុជាមិនមែនសម័យលង្វែក សម័យឧដុង្គឡើយ ប្រទេសកម្ពុជាខ្ញុំតូចទេ ប៉ុន្តែតាន់ ចង់សាក សាកបាន កម្ពុជាមិនឈ្លានពានប្រទេសណាឡើយ សុំតែការពារខ្លួនប៉ុណ្ណោះ សូមបារមីវត្ថុសក្តិសិទ្ធិ ព្រលឹងបុព្វបុរសខ្មែរគ្រប់ជំនាន់ជួយតាមថែរក្សាឃុំគ្រងបងប្អូនកងទ័ពខ្មែរអោយជួបតែសេចក្តីសុខ ឈ្នះអស់មារសត្រូវឈ្លានពាន ខ្មែររួបរួមខ្មែរសាមគ្គីខ្មែរខ្លាំង។

កញ្ញា ផន ស្រីពី Miss Cosmo Cambodia 2025 វិញបានជូនពរទៅកាន់កងទ័ពខ្មែរថា «សូមបួងសួងដល់បារមីវត្ថុសក្តិសិទ្ធគ្រប់ទិសទី ទាំងអស់ ជួយការពារ និងឃ្លាំមើលបងៗកងកម្លាំងដ៏អង់អាចរបស់យើងទាំងអស់ផងចុះ។ សូមឱ្យជៀសផុតពីគ្រោះគ្រប់យ៉ាង និងឆ្លងកាត់រាល់ឧបសគ្គដោយសុខសន្តិភាព ឯកភាពជាតិ និងមានសុវត្ថិភាពសម្រាប់ជាតិយើង»។ ប៊ី សុធារី វិញបានបង្ហោះថា «សូមបារមីស័ក្ដសិទ្ធគ្រប់ទិសទីតាមថែរក្សា ការពារ ដល់កងទ័ពកម្ពុជាគ្រប់រូបអោយមានសុខសុវត្ថិភាព»។

មិនត្រឹមតែសិល្បករ សិល្បការិនីខាងលើនេះប៉ុណ្ណោះទេតារាល្បីៗជាច្រើនរូបទៀតបានបួងសួងវត្ថុស័ក្តិសមថែរក្សាកងទ័ពកម្ពុជាក្នុងគ្រាដែលចោរសៀមឈ្លានពានមកលើទឹកដីកម្ពុជា៕