(ភ្នំពេញ)៖ ជុំវិញចម្ងល់របស់ពលរដ្ឋទូទៅ ដែលចង់ដឹងអំពីមូលហេតុដែលរដ្ឋាភិបាលមិនបញ្ចេញព័ត៌មានការចាប់ខ្លួនទាហានខ្មែរពីសំណាក់ទាហានថៃ សម្ដេចធិបតី ហ៊ុន ម៉ាណែត បានធ្វើការបញ្ជាក់ថា អាយុជីវិតរបស់កងកម្លាំង គឺជាអាទិភាពធំបំផុតរបស់រាជរដ្ឋាភិបាល ដូច្នេះការគ្រប់គ្រងព័ត៌មាននៅលើសមរភូមិ ក៏មានសារៈសំខាន់ដូចគ្នា ក្នុងការការពារអាយុជីវិតនិងប្រៀបឈ្នះរបស់កងទ័ពរបស់យើង។

ក្រោយមានពលរដ្ឋជាច្រើនចោ.ទសួរថា ហេតុអ្វីបានជារាជរដ្ឋាភិបាលកម្ពុជាមិនបញ្ចេញព័ត៌មានភ្លាមពាក់ព័ន្ធនឹងកងកម្លាំងរបស់កម្ពុជាដែលត្រូវបានកងទ័ពថៃចាប់ខ្លួន ក្រោយពីមានបទឈប់បា.ញ់នោះ? តើរាជរដ្ឋាភិបាលមិនគិតគូរពីអាយុជីវិតរបស់ពួកគេឬទេ? សម្ដេចធិបតី ហ៊ុន ម៉ាណែត បានបកស្រាយយ៉ាងដូច្នេះថា៖
ចាប់តាំងពីការប្រយុទ្ធគ្នាបានផ្ទុះឡើងនៅថ្ងៃទី ២៤ កក្កដា ២០២៥ ការយកចិត្តទុកដាក់ចំពោះអាយុជីវិតរបស់កងកម្លាំងរបស់យើង ក៏ដូចជារបស់ប្រជាពលរដ្ឋខ្មែរដែលរស់នៅក្នុងតំបន់ប្រយុទ្ធគ្នា គឺជាអាទិភាពធំបំផុតរបស់រាជរដ្ឋាភិបាល។ ហេតុដូច្នេះហើយបានជារាជរដ្ឋាភិបាលខិតខំធ្វើយ៉ាងណាដើម្បីឲ្យមានបទឈប់បាញ់ឱ្យបានឆាប់ជាទីបំផុត។

នៅក្នុងនោះ ការគ្រប់គ្រងព័ត៌មានកងទ័ពនៅលើសមរភូមិ គឺមានសារៈសំខាន់ណាស់សម្រាប់ការពារអាយុជីវិតនិងប្រៀបឈ្នះរបស់កងទ័ពរបស់យើង។ ចំពោះករណីចាប់ខ្លួនយុទ្ធជនយើង ដែលមកដល់ពេលនេះយើងនៅរង់ចាំភាគីថៃបញ្ជូនត្រឡប់មកកម្ពុជាវិញនោះ ជីវិតរបស់ពួកគាត់គឺជាអាទិភាពចម្បងបំផុតរបស់រាជរដ្ឋាភិបាលតាំងពីពេលវេលាដែលពួកគេត្រូវចាប់ខ្លួន។ នេះបើយោមតាមប្រសាសន៍របស់សម្ដេច ដែលបង្ហោះនៅលើទំព័រហ្វេសប៊ុក នាព្រឹកថ្ងៃព្រហស្បត្តិ៍ ទី៣១ ខែកក្កដា នេះ។

សារដដែលបានឲ្យដឹងទៀតថា៖ នៅក្នុងដំណាក់កាលដំបូង ដែលមិនទាន់មានព័ត៌មានច្បាស់លាស់អំពីជោគវាសនារបស់ពួកគេនោះ ការគ្រប់គ្រងព័ត៌មានសំខាន់ណាស់ ព្រោះការបញ្ចេញព័ត៌មានមួយចំនួនអាចនឹងនាំគ្រោះថ្នាក់ដល់ជីវិតរបស់ពួកគាត់ ឬក៏អាចបង្កឲ្យមានភាពស្មុគស្មាញកាន់តែខ្លាំងនៅក្នុងការចរចាសម្រាប់ការដោះលែងពួកគាត់ត្រឡប់មកវិញ។

ហេតុដូច្នេះ រវាងជម្រើសក្នុងការផ្សពផ្សាយព័ត៌មានឲ្យសាធារណៈជនបានដឹង និងជម្រើសក្នុងការរក្សាព័ត៌មានដើម្បីធានាអាយុជីវិតរបស់ពួកគាត់នៅក្នុងដំណាក់កាលដំបូងដែលមានភាពមិនច្បាស់លាស់នោះ គឺរាជរដ្ឋាភិបាលគ្មានជម្រើសអ្វីក្រៅពីការគ្រប់គ្រងព័ត៌មានអោយបានល្អនិងបើកការចរចាទាមទារពួកគេមកវិញឲ្យបានឆាប់រហ័សនោះទេ។ មិនមែនរាជរដ្ឋាភិបាលលាក់ព័ត៌មានមិនចង់អោយប្រជាពលរដ្ឋដឹង ឬមិនគិតពីអាយុជីវិតរបស់កងកម្លាំងយើង ដូចមជ្ឈដ្ឋានមួយចំនួនបានចោទប្រកាន់នោះទេ។

សម្ដេចបានគូសបញ្ជាក់ថា ថ្នាក់ដឹកនាំកងទ័ពរបស់យើងបានទាក់ទងទៅភាគីថៃដើម្បីស្នើសុំឲ្យមានការដោះលែងកម្លាំងរបស់យើងភ្លាមៗតាំងពីពេលកើតហេតុ។ ចំណែករដ្ឋមន្ត្រីក្រសួងការពារជាតិ មេបញ្ជាការយោធភូមិភាគទី៤របស់កម្ពុជាក៏បានទាក់ទងជាប្រចាំ ជាមួយសមភាគីថៃ ដើម្បីស្នើឲ្យមានការដោះលែងយោធិនយើងត្រឡប់មកវិញឲ្យបានឆាប់ជាទីបំផុត។

បន្ថែមលើនោះ អគ្គមេបញ្ជាការកងទ័ពកម្ពុជា ក៏បានស្នើសុំការជួយអន្តរាគមន៍ពីអគ្គមេបញ្ជាការកងទ័ពម៉ាឡេស៊ី ក្នុងនាមគាត់ជាអ្នកសម្របសម្រួលនិងតាមដាននៃបទឈប់បាញ់ ដើម្បីស្នើទៅអគ្គបញ្ជាការកងទ័ពថៃ អោយជួយជំរុញការដោះលែងឲ្យបានឆាប់ផងដែរ៕

ប្រទេសថៃ ៖ នៅថ្ងៃទី៣១ ខែកក្កដា ឆ្នាំ២០២៥ សារព័ត៌មានថៃ News In Thailand រាយការណ៍ថា មន្ទីរពេទ្យថៃឈ្មោះ «Sunpasitthiprasong Hospital» នៅខេត្តឧប៊ុនរ៉ាជថានី បានចេញសេចក្តីប្រកាសបន្ទាន់ផ្អាកទទួលព្យាបាលអ្នកជំងឺកម្ពុជា និងផ្អាកការងារបណ្តោះអាសន្នរបស់ជំនួយការទំនាក់ទំនងជ.នជាតិកម្ពុជា ដោយសារស្ថានការណ៍អសន្តិសុខនៅតំបន់ព្រំដែនកម្ពុជា-ថៃធ្វើឱ្យប៉ះពាល់ដល់សុវត្ថិភាពប្រទេសថៃ ។

មន្ទីរពេទ្យនេះបញ្ជាក់ថា កន្លងមក មន្ទីរពេទ្យបានទទួលព្យាបាលអ្នកជំងឺជនជាតិថៃ អ្នកជំងឺបរទេស និងអ្នកជំងឺកម្ពុជាដែលបានធ្វើដំណើរមកព្យាបាលនៅមន្ទីរពេទ្យថៃ ប៉ុន្តែដោយសារស្ថានការណ៍អសន្តិសុខនៅតំបន់ព្រំដែនកម្ពុជា-ថៃ ធ្វើឱ្យមន្ទីរពេទ្យសម្រេចចិត្តផ្អាកព្យាបាលអ្នកជំងឺកម្ពុជាមួយរយៈ ។ បន្ទាប់ពីប្រជុំគណៈកម្មការគ្លីនិក មន្ទីរពេទ្យ Sunpasitthiprasong បានឯកភាពកំណត់ការផ្អាកសេវាកម្មដូចខាងក្រោមនេះ ៖

១-ផ្អាកការងារបណ្តោះអាសន្នរបស់ជំនួយការទំនាក់ទំនងជនជាតិកម្ពុជា និងអ្នកស្ម័គ្រចិត្តបរទេស
២-បិទការផ្តល់សេវាកម្ម SMC Ptemium ជាបណ្តោះអាសន្ន
៣-លុបចោលការទទួលថ្នាំពេទ្យជំនួស និងផ្អាកទទួលអ្នកជំងឺកម្ពុជា
៤-អ្នកជំងឺកម្ពុជាដែលកំពុងសម្រាកព្យាបាលនៅមន្ទីរពេទ្យនេះ ត្រូវតែកំណត់ទីកន្លែងច្បាស់លាស់ ។

ការប្រកាសបន្ទាន់របស់មន្ទីរពេទ្យ Sunpasitthiprasong នៅខេត្តឧប៊ុនរ៉ាជថានី ផ្អាកព្យាបាលអ្នកជំងឺកម្ពុជាទាំងអស់ គឺអនុវត្តចាប់ពីថ្ងៃទី៣១ ខែកក្កដា រហូតដល់ថ្ងៃទី១០ ខែសីហា ឆ្នាំ២០២៥ ។ ប៉ុន្តែពុំទាន់មានព័ត៌មានច្បាស់លាស់ថា តើមន្ទីរពេទ្យនេះនឹងផ្អាកព្យាបាលអ្នកជំងឺកម្ពុជាជាបណ្តោះអាសន្ន ឬក៏យ៉ាងណា ។

គួរបញ្ជាក់ថា តាំងពីកងទ័ពថៃឈ្លានពាន និងបាញ់ប្រហារមុនមកលើកម្ពុជា កាលពីថ្ងៃទី២៤ ខែកក្កដា សារព័ត៌មានថៃផ្សាយបំភ្លៃថា កងទ័ពកម្ពុជាជាអ្នកបាញ់ប្រហារមុនមកលើថៃ ហើយចោទប្រកាន់ថា កងទ័ពកម្ពុជាបាញ់មកលើតំបន់ស៊ីវិល និងបាញ់ទីតាំងមន្ទីរពេទ្យថៃនៅព្រំដែន ។ ហេតុនេះ មន្ទីរពេទ្យថៃតាមព្រំដែនមួយចំនួនបានទម្លាក់ស្លាកអក្សរខ្មែរចេញដើម្បីប្រឆាំងវិញ ខណៈពលរដ្ឋថៃថា មន្ទីរពេទ្យថៃតាមព្រំដែនតែងតែព្យាបាលអ្នកជំងឺកម្ពុជារហូតមក ប៉ុន្តែបែរជាខូចខាតដោយសារសង្គ្រាម ៕

សហរដ្ឋអាមេរិក ៖ កាលពីថ្ងៃទី៣០ ខែកក្កដា ឆ្នាំ២០២៥ សារព័ត៌មាននានារបស់បរទេសរាយការណ៍ថា លោក Sean K. O’Neill ដែលត្រូវបានប្រធានាធិបតីអាមេរិក លោក Donald Trump បញ្ជូនមកធ្វើជាឯកអគ្គរដ្ឋទូតអាមេរិកថ្មីប្រចាំប្រទេសថៃ ព្រមានថា ថៃធ្វើសង្គ្រាមឈ្លានពានប្រទេសជិតខាង គឺកម្ពុជា នឹងធ្វើឱ្យរង្គោះរង្គើ ឬប៉ះពាល់ដល់ទំនាក់ទំនងការទូតរវាងអាមេរិក និងថៃ ។

ពេលមានការចោទសួរនៅសមាជិកព្រឹទ្ធសភាអំពីថៃធ្វើសង្គ្រាមឈ្លានពានកម្ពុជាដែលអូសបន្លាយពេលរហូតដល់៥ថ្ងៃ លោក O’Neill និយាយថា លោកនឹងជូនដំណឹងទៅទីក្រុងបាងកកឱ្យដឹងច្បាស់ថា ការធ្វើសង្គ្រាមនៅតំបន់ព្រំដែនកម្ពុជា-ថៃនាពេលថ្មីៗនេះ បានប៉ះពាល់ពលរដ្ឋថៃខ្លួនឯង និងប៉ះពាល់ដល់ទំនាក់ទំនងការទូតរវាងអាមេរិក និងថៃ ។

បន្ទាប់មក ក៏មានសំណួរថា តើលោកនឹងមានវិធានការដូចម្តេចដើម្បីផ្លាស់ប្តូរពីការឈប់បាញ់គ្នារវាងប្រទេសទាំងពីរទៅជាសន្តិភាពយូរអង្វែង? លោក O’Neill ឆ្លើយថា កិច្ចការដំបូងដែលលោកត្រូវធ្វើ គឺលោកនឹងប្រាប់ទៅប្រទេសថៃដែលជាមិត្តតាមសន្ធិសញ្ញាជាមួយអាមេរិកនៅតំបន់អាស៊ីថា ការធ្វើសង្គ្រាមបែបនេះ ជម្លោះបែបនេះ ពុំបានជួយពលរដ្ឋថៃឡើយ ថៃពុំបានធ្វើអ្វីដើម្បីជំរុញមិត្តភាពជាមួយអាមេរិក ហើយថៃពុំដោះស្រាយបញ្ហាកំពុងប្រឈមជាមួយអាមេរិក ។ ថៃបែរជាធ្វើឱ្យកងទ័ព និងពលរដ្ឋបាត់បង់ជីវិត រួមទាំងខូចខាតទ្រព្យសម្បត្តិ ។

លោក O’Neill ឯកអគ្គរដ្ឋទូតអាមេរិកថ្មីប្រចាំប្រទេសថៃ និងធ្លាប់ធ្វើជាមន្ត្រីទូតនៅថៃចំនួន២លើក បាននិយាយពីគោលជំហរច្បាស់លាស់របស់អាមេរិក និងព្រមានរដ្ឋាភិបាលថៃបែបនេះ ក្រោយពីមេដឹកនាំកម្ពុជា-ថៃបានទៅប្រទេសម៉ាឡេស៊ី កាលពីថ្ងៃទី២៨ ខែកក្កដា ដើម្បីចរចាកិច្ចព្រមព្រៀងឈប់បាញ់បន្ទាន់ដោយឥតលក្ខខណ្ឌ ដែលចូលជាធរមានចាប់ពីដើមថ្ងៃទី២៩ ខែកក្កដា ក្រោមការសម្របសម្រួលរបស់ប្រធានអាស៊ាន និងការអង្កេតការណ៍របស់មហាអំណាចអាមេរិក និងមហាអំណាចចិន ។

ជំនួបចរចាកិច្ចព្រមព្រៀងឈប់បាញ់រវាងកម្ពុជា-ថៃនៅម៉ាឡេស៊ី កើតឡើងក្រោយពីប្រធានាធិបតីអាមេរិក លោក Donald Trump ថ្លែងមកកាន់មេដឹកនាំកម្ពុជា-ថៃថា អាមេរិកនឹងពុំចរចាពាណិជកម្មជាមួយប្រទេសទាំងពីរទេ ប្រសិនបើប្រទេសទាំងពីរនៅតែបន្តសង្គ្រាម ។

គួរបញ្ជាក់ថា បើទោះជារដ្ឋាភិបាល កងទ័ព និងពលរដ្ឋថៃព្យាយាមលាបពណ៌ចោទប្រកាន់កម្ពុជា និងប្រាប់ពិភពលោកថា កម្ពុជាបំពានកិច្ចព្រមព្រៀងបទឈប់បាញ់ក្តី ប៉ុន្តែពិភពលោកដឹងការពិតអស់ហើយ គឺថៃខ្លួនឯងទេដែលបំពានកិច្ចព្រមព្រៀងឈប់បាញ់ជាបន្តបន្ទាប់ ។

អ្នកសារព័ត៌មានសិង្ហបុរី Channel News Asia ដែលបានមកកម្ពុជាផ្ទាល់ និងធ្វើសេចក្តីរាយការណ៍ព័ត៌មានពីតំបន់ព្រំដែនកាលពីថ្ងៃទី៣០ ខែកក្កដា បញ្ជាក់ថា ៖ «កម្ពុជាពុំបានល្មើសបទឈប់បាញ់ដែលកម្ពុជា-ថៃព្រមព្រៀងគ្នានៅម៉ាឡេស៊ីកាលពីថ្ងៃទី២៨ កក្កដា ដូចការចោទប្រកាន់របស់រដ្ឋាភិបាលថៃទេ» ៕

ប្រទេសថៃ ៖ ក្រោយពីសារព័ត៌មាន និងអ្នកលេងបណ្តាញសង្គមថៃចោទប្រកាន់ថា រុស្ស៊ីបញ្ជូនកងទ័ពមកជួយកម្ពុជាក្នុងជម្លោះព្រំដែនជាមួយថៃ ហើយកងទ័ពរុស្ស៊ីស្លៀកពាក់ឈុតកងទ័ពកម្ពុជា លោក ណាតថាផុន ណាតផានីត អនុរដ្ឋមន្ត្រីក្រសួងការពារជាតិថៃបានប្រាប់ទៅសារព័ត៌មានថៃថា លោកបានត្រួតពិនិត្យរួចហើយ គឺពុំមែនជាកងទ័ពរុស្ស៊ីទេ ។ នេះបើតាមការផ្សព្វផ្សាយរបស់សារព័ត៌មានថៃ Top News កាលពីថ្ងៃទី៣០ ខែកក្កដា ឆ្នាំ២០២៥ ។

លោក ណាតថាផុន ណាតផានីត អនុរដ្ឋមន្ត្រីក្រសួងការពារជាតិថៃនិយាយនៅថ្ងៃទី៣០ ខែកក្កដា នៅក្រសួងការពារជាតិថា កងទ័ពក្នុងរូបភាពដែលបណ្តាញសង្គមថៃចែកចាយនេះ គឺជាកងទ័ពកម្ពុជាមានរូបរាងខ្ពស់សង្ហា ជាកីឡាករបាល់ទះ និងគ្មានទំនាក់ទំនងជាភាសារុស្ស៊ី ។ លោកទទួលបានការបញ្ជាក់ថា កងទ័ពរូបនេះពុំមែនជាកងទ័ពបរទេសមកស៊ីឈ្នួលវាយថៃទេ គេជាកីឡាករបាល់ទះមានរូបរាងខ្ពស់ មុខមាត់ស្អាតបាត ទើបធ្វើឱ្យអ្នកលេងបណ្តាញសង្គមថៃចាប់អារម្មណ៍ និងយល់ខុសច្រឡំជាជនបរទេស ។

ចំណែកសំឡេងសន្ទនាតាមវិទ្យុជាភាសារុស្ស៊ី លោក ណាតថាផុន និយាយថា លោកពុំទាន់អាចបញ្ជាក់បានទេ ពីព្រោះតាំងព្រឹកមក (ព្រឹកថ្ងៃទី៣០ ខែកក្កដា) លោករវល់ប្រជុំ និងតាមដានព័ត៌មានពីប្រព័ន្ធផ្សព្វផ្សាយ ។ ពលរដ្ឋថៃជាច្រើនសង្ស័យថា កម្ពុជាជួលកងទ័ពរុស្ស៊ីមកធ្វើសង្គ្រាម ហើយបានសួរលោកតាំងពីយប់ថ្ងៃទី២៩ ខែកក្កដា ទើបលោកព្យាយាមឆ្លើយតប និងទទួលបានព័ត៌មានពុំមែនជាកងទ័ពរុស្ស៊ី ។

អ្នកសារព័ត៌មានថៃបានប្រាប់ទៅលោក ណាតថាផុន ថា ប៉ុន្តែកងទ័ពនេះមានរូបរាងស្រដៀងជនជាតិរុស្ស៊ី អ៊ុយក្រែន អ៊ូសបេគីស្ថាន និងកាហ្សាក់ស្ថាន លោកឆ្លើយថា យើងពុំអាចចោទប្រកាន់អ្វីមួយដោយគ្មានភស្តុតាងឡើយ ។ ប្រសិនបើលោកជាពលរដ្ឋសាមញ្ញ លោកនឹងគិតដូចគ្នាជាមួយអ្នកលេងបណ្តាញសង្គមដែរ ប៉ុន្តែលោកជាអនុរដ្ឋមន្ត្រីក្រសួងការពារជាតិពុំអាចនិយាយអ្វីបានទេ គឺដូចគ្នានឹងករណីកងទ័ពថៃដើរជាន់មីន ពុំដឹងថាជាមីនថ្មី ឬចាស់ ។

វាអាចទៅរួចដែលកម្ពុជាចំណាយប្រាក់ជួលកងទ័ពបរទេសមកជួយប្រយុទ្ធជាមួយថៃ ដូចលោក សុឆាតិ បាំរុងសុខ អ្នកវិភាគសន្តិសុខបានដាស់តឿនឱ្យពលរដ្ឋថៃប្រុងប្រយ័ត្នជាមួយជនជាតិរុស្ស៊ី ។ លោក សុឆាតិ អាចនិយាយតាមព័ត៌មានដែលខ្លួនមាន និងអ្វីដែលបានស្តាប់ឮ ។ នេះបើតាមការលើកឡើងរបស់លោក ណាតថាផុន ៕

ថៃ៖ ផ្អើ.លទាំងកណ្ដាលថ្ងៃត្រង់! ហេតុការណ៍ដ៏រន្ធត់មួយទៀតហើយ បានកើតឡើងនៅក្នុងប្រទេសថៃ ករណីផ្ទុះរោងចក្រផលិតកាំជ្រួចមួយកន្លែង បានបណ្ដាលឲ្យមនុស្សយ៉ាងហោចណាស់9នាក់ត្រូវបានគេរកឃើញថាស្លា.ប់ភ្លាមៗ និងច្រើននាក់ផ្សេងទៀតរងរបួសធ្ងន់ និងស្រាល ត្រូវបានដឹកជញ្ជូនទៅសង្រ្គោះបន្ទាន់។

យោងតាមសារព័ត៌មាន Khaosod នាវេលាម៉ោង 11:00 ព្រឹកថ្ងៃពុធ ទី30 ខែកក្កដា ឆ្នាំ2025 មានសេចក្ដីរាយការណ៍មួយត្រូវបានគេបញ្ជូនមកកាន់ប៉ុស្តិ៍អាជ្ញាធរមូលដ្ឋានជុំវិញហេតុការណ៍ផ្ទុះរោងចក្រផលិតកាំជ្រួច នៅក្បែរវត្តភូថាសៃ ភូមិលេខ១ ឃុំបានផូ ស្រុកមឿង ខេត្តស៊ូផានបុរី ។ បើតាមសេចក្ដីរាយការណ៍បឋមបានឲ្យដឹងថា មានអ្នកស្លា.ប់ និងរបួសច្រើននាក់នៅក្នុងការផ្ទុះនេះ។

ក្រោយទទួលបានដំណឹងនេះភ្លាម សមត្ថកិច្ច និងក្រុមអ្នកជួយសង្គ្រោះបានប្រញាប់ប្រញាល់ទៅកាន់ទីតាំងកើតហេតុខាងលើ និងរកឃើញមានសា.ក.ស.ពមនុស្សចំនួន 9 នាក់ ដោយជនរងគ្រោះខ្លះត្រូវបានរកឃើញនៅក្នុងផ្ទះដែលផ្ទុះ និងខ្លះទៀតបានខ្ទាតទៅរាយប៉ាយពាសពេញវាលស្រែដែលនៅក្បែរនោះ។

ការផ្ទុះនេះមិនបណ្ដាលឲ្យមានអគ្គីភ័យឆាបឆេះនោះទេ ប៉ុន្តែផ្ទះពីរខ្នងបានរងការខូចខាតទាំងស្រុង នៅសល់តែគ្រោងដែកបន្តិចបន្តួចប៉ុណ្ណោះពីការបំផ្ទុះនេះ។ បន្ថែមពីលើនេះ មនុស្សពីរនាក់ដែលនៅរស់រានមានជីវិត បានរងរបួសធ្ងន់និងកំពុងទទួលការសង្គ្រោះបន្ទាន់។ ប៉ុន្តែជាអកុសល ម្នាក់ក្នុងចំណោមពួកគេមិនអាចជួយសង្រ្គោះបានទេក្រោយទៅដល់មន្ទីរពេទ្យ។

គួរជម្រាបថា ករណីបែបនេះ តែងកើតឡើងជារៀងរាល់ឆ្នាំនៅខេត្ត Suphan Buri ដែលអាចមានចំនួនពី ពីរ ទៅបីដងក្នុងមួយឆ្នាំ។ បច្ចុប្បន្ន អាជ្ញាធរថៃបានបញ្ជូនមន្រ្តីជំនាញបើកការស៊ើបអង្កេតស្វែងរកមូលហេតុនៃការផ្ទុះនេះ ហើយអាជ្ញាធរថៃអះអាងថាចំនួនអ្នកស្លា.ប់ និងរបួសអាចនិងកើនឡើងច្រើនជាងនេះ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath នៅថ្ងៃទី៣០ ខែកក្កដា ឆ្នាំ២០២៥ ឱ្យដឹងថា សភាព្រឹទ្ធសភាថៃម្នាក់បានចោទប្រកាន់កម្ពុជាបំពានកិច្ចព្រមព្រៀងបទឈប់បា.ញ់ និងណែនាំឱ្យរដ្ឋាភិបាលថៃកាត់ផ្តាច់ទំនាក់ទំនងការទូតជាមួយកម្ពុជា ដោយការបិទច្រកព្រំដែនទាំងអស់ រួមទាំងកាត់ផ្តាច់ទឹក ភ្លើង បណ្តាញអ៊ីនធើរណេត និងទូរស័ព្ទ ដើម្បីកម្ចា.ត់ក្រុមឆបោកអនឡាញ Call Center ប្រសិនបើកម្ពុជានៅតែបំពានបទឈប់បា.ញ់ ។

សមាជិកព្រឹទ្ធសភា លោក អាឡុងគុត វ៉ារៈគី បាននិយាយនៅថ្ងៃទី៣០ ខែកក្កដា ថា កម្ពុជាបំពានកិច្ចព្រមព្រៀងបទឈប់បាញ់ ហើយបើកម្ពុជានៅតែពុំអនុវត្តតាមកិច្ចព្រមព្រៀងនេះ គឺរដ្ឋាភិបាលថៃពុំគួរចរចាអ្វីទាំងអស់ជាមួយកម្ពុជា ។ ស្ថានការណ៍បច្ចុប្បន្ន កងទ័ពថៃបានបំពេញតួនាទីរបស់ខ្លួន ប៉ុន្តែរដ្ឋាភិបាល និងក្រសួងការបរទេសគួរធ្វើអ្វីដើម្បីការពារ និងរក្សាភាពថ្លៃថ្នូររបស់ពលរដ្ឋ ។

អ្វីដែលរដ្ឋាភិបាលថៃគួរតែធ្វើជាបន្ទាន់ រួមមាន ៖

១-បិទព្រំដែនកម្ពុជា-ថៃទាំងអស់ដើម្បីទប់ស្កាត់ក្រុមឆបោកអនឡាញ Call Center និងឧក្រិដ្ឋកម្មឆ្លងដែន
២-កាត់ផ្តាច់ទឹក ភ្លើង បណ្តាញអ៊ីនធើរណេត និងទូរស័ព្ទ ដែលតភ្ជាប់ជាមួយកម្ពុជា
៣-កាត់ផ្តាច់ទំនាក់ទំនងការទូត ដោយគ្មានឯកអគ្គរាជទូតថៃនៅរាជធានីភ្នំពេញ ដើម្បីឱ្យការធ្វើកិច្ចព្រមព្រៀង MOU ផ្សេងៗរវាងប្រទេសទាំងពីរត្រូវលុបចោល និង
៤-ពលរដ្ឋកម្ពុជាដែលមកធ្វើការនៅថៃត្រូវតែមកបង្ហាញខ្លួននៅស្ថាប័នរដ្ឋាភិបាល ពីព្រោះពុំដឹងថា តើពួកគេជាចារកម្មឬក៏អត់ ។

ការចាប់ផ្តើមចរចាជាមួយកម្ពុជាបាន លុះត្រាតែកម្ពុជាសងការខូចខាតទាំងអស់ឱ្យថៃ ដូចជា ៖ អាយុជីវិតកងទ័ព និងពលរដ្ឋថៃ រួមទាំងសងថ្លៃខូចខាតទ្រព្យសម្បត្តិផ្សេងៗដែលរដ្ឋាភិបាលថៃបានចំណាយប្រាក់អស់ប៉ុន្មាន គឺកម្ពុជាត្រូវតែសងទាំងអស់ ទើបអាចចរចាគ្នាបាន ។

ក្រៅពីនេះ សូមរដ្ឋាភិបាលថៃកុំយកករណីពន្ធទំនិញរបស់ប្រធានាធិបតីអាមេរិក លោក Donald Trump មកធ្វើជាលក្ខខណ្ឌសម្រាប់ការចរចាជម្លោះជាមួយកម្ពុជា បើទោះជាអាមេរិកនឹងទម្លាក់ពន្ធទំនិញថៃក្តី ។ ការទម្លាក់ពន្ធទំនិញថៃនាំចូលអាមេរិកពុំអាចប្តូរនឹងការបាត់បង់អធិបតេយ្យទេ លោកជឿថា ពលរដ្ឋថៃនឹងពុំព្រម ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Khaosod នៅថ្ងៃទី៣០ ខែកក្កដា ឆ្នាំ២០២៥ ថា កងទ័ពថៃបានចេញសេចក្តីថ្លែងការណ៍ថ្កោលទោសកម្ពុជា និងចោទប្រកាន់កងទ័ពកម្ពុជាប្រើប្រាស់កាំភ្លើ.ងតូច និងឧបករណ៍បា.ញ់គ្រា.ប់បែកដៃ ។ កងទ័ពថៃថា ខ្លួនប្រកាន់យកនូវគោលការណ៍សន្តិភាព និងមនុស្សធម៌ រួមទាំងប្រឆាំងតបតរវិញ ដោយសារកម្ពុជាបំពានកិច្ចព្រមព្រៀងលើបទឈប់បា.ញ់យ៉ាងធ្ងន់ធ្ងរ ។

ស្របពេលកម្ពុជា និងថៃកំពុងស្ថិតក្នុងដំណាក់កាលនៃការចាប់ផ្តើមអនុវត្តបទឈប់បាញ់ ដែលចូលជាធរមានចាប់ពីដើមថ្ងៃទី២៩ ខែកក្កដា ក្រោមការសម្របសម្រួលរបស់ប្រធានអាស៊ាន និងការអង្កេតការណ៍របស់មហាអំណាចអាមេរិក និងមហាអំណាចចិន ឃើញថា រដ្ឋាភិបាលថៃ និងកងទ័ពថៃបានចោទប្រកាន់កម្ពុជាជាបន្តបន្ទាប់ ។

កងទ័ពថៃថា ខ្លួនអនុវត្តតាមកិច្ចព្រមព្រៀងឈប់បាញ់យ៉ាងម៉ឺងម៉ាត់រហូតមក ដោយផ្អាកការប្រើប្រាស់កម្លាំងកងទ័ពទាំងអស់ និងកាត់បន្ថយសកម្មភាពកងទ័ពក្នុងតំបន់ដើម្បីសន្តិភាព ប៉ុន្តែកងទ័ពថៃបានទទួលសេចក្តីរាយការណ៍ពីក្នុងតំបន់ព្រំដែនថា ចាប់ពីថ្ងៃទី២៩ ដល់ថ្ងៃទី៣០ ខែកក្កដា កងទ័ពកម្ពុជាបានបំពានកិច្ចព្រមព្រៀងបទឈប់បាញ់ម្តងទៀត ។

កងទ័ពថៃបានចោទប្រកាន់មកលើកងទ័ពកម្ពុជាជាច្រើនចំណុចដូចខាងក្រោម ៖

១-កងទ័ពថៃចោទថា កាលពីថ្ងៃទី២៩ ខែកក្កដា កងទ័ពកម្ពុជាបានប្រើប្រាស់កាំភ្លើងតូចបាញ់កងទ័ពថៃនៅតំបន់អានម៉ា ខេត្តឧប៊ុនរ៉ាជថានី ដែលធ្វើឱ្យកងទ័ពថៃតបតរវិញរហូតប៉ះទង្គិចគ្នា ។

២-កងទ័ពថៃចោទថា នៅថ្ងៃដដែល (ថ្ងៃទី២៩ ខែកក្កដា) កងទ័ពកម្ពុជាប្រើប្រាស់កាំភ្លើងតូចជាបន្តបន្ទាប់ រួមទាំងប្រើប្រាស់ឧបករណ៍បា.ញ់គ្រា.ប់បែកដៃនៅតំបន់ប្រាសាទព្រះវិហារ បរិវេណភ្នំទ្រព្យ និងតំបន់ហួយតាម៉ារៀ ខេត្តស៊ីសាកេត ។ ហេតុនេះ កងទ័ពថៃក៏តបតរវិញដើម្បីការពារខ្លួន ហើយកងទ័ពថៃចោទទៀតថា ការបាញ់ពីកម្ពុជាបានកើតឡើងជាបន្តបន្ទាប់ រហូតដល់ព្រឹកថ្ងៃទី៣០ ខែកក្កដា ។

៣-កងទ័ពថៃចោទថា នាវេលាម៉ោង៥និង១៧នាទីព្រឹក ថ្ងៃទី៣០ ខែកក្កដា ពួកគេបានឃើញគ្រាប់បែកដៃបាញ់ចេញពីកម្ពុជាចូលតំបន់ហ្វាម៉អ៊ីឌែង ខេត្តស៊ីសាកេត ។

កងទ័ពថៃចាត់ទុកថា ទង្វើរបស់កងទ័ពកម្ពុជា គឺបំពាននឹងកិច្ចព្រមព្រៀងបទឈប់បាញ់យ៉ាងធ្ងន់ធ្ងរ ហើយនេះជាការបំពានលើកទី២ ក្រោយពីបទឈប់បាញ់បន្ទាន់ដោយឥតលក្ខខណ្ឌរវាងកម្ពុជា និងថៃចូលជាធរមាន ។ វាបង្ហាញពីអាកប្បកិរិយាពុំគោរពកាតព្វកិច្ចអន្តរជាតិ និងបំផ្លាញការព្យាយាមធ្វើឱ្យស្ថានការណ៍ស្ងប់ស្ងាត់ ហើយថែមទាំងប៉ះពាល់ស្ថិរភាព និងទំនុកចិត្តរវាងប្រទេសទាំងពីរ ។

កងទ័ពថៃសូមថ្កោលទោសយ៉ាងដាច់អលង្ការចំពោះទង្វើគ្មានការទទួលខុសត្រូវរបស់កងទ័ពកម្ពុជា ហើយបើមានការបំពានទៀត កងទ័ពថៃនឹងអនុវត្តតាមដំណាក់កាល និងភាពចាំបាច់ដើម្បីការពារអធិបតេយ្យ រួមសុវត្ថិភាពពលរដ្ឋដោយមិនធ្វេសប្រហែស ។

ជាការឆ្លើយតប ក្រសួងការបរទេស និងសហប្រតិបត្តិការអន្តរជាតិកម្ពុជាបានចេញសេចក្តីថ្លែងការណ៍បដិសេធការចោទប្រកាន់របស់ថៃអំពីការរំលោភបទឈប់បាញ់ ។ កម្ពុជាប្តេជ្ញាចិត្តក្នុងការរក្សាបទឈប់បាញ់នេះយ៉ាងម៉ឺងម៉ាត់ និងខ្ជាប់ខ្ជួន កងកម្លាំងប្រដាប់អាវុធកម្ពុជាពុំបានធ្វើសកម្មភាពណាមួយទាល់តែសោះដែលអាចចាត់ទុកជាការរំលោភលើបទឈប់បាញ់ដែលបានព្រមព្រៀងគ្នា វាផ្ទុយស្រឡះពីពាក្យចោទប្រកាន់មានលក្ខណៈប្រឌិតរបស់ថៃ ៕