(ភ្នំពេញ)៖ ក្រសួងការបរទេស និងសហប្រតិបត្តិការកម្ពុជា បានចាត់ទុកចំណាត់ការផ្លូវច្បាប់របស់ប្រទេសថៃ ដែលគ្រោងនឹងចាប់ខ្លួនមេដឹកនាំកម្ពុជា ថាជាសកម្មភាពប៉ះពាល់ធ្ងន់លើបទឈប់បា.ញ់ដើម្បីស្ដារសន្តិភាព និងខូចខាតដល់ទំនាក់ទំនងរវាងកម្ពុជា-ថៃផងដែរ។

កាលយប់ថ្ងៃទី19 ខែសីហា ឆ្នាំ2025 ក្រសួងការបរទេសកម្ពុជាបានបញ្ចេញនូវសេចក្ដីថ្លែងការណ៍មួយច្បាប់ ឆ្លើយតបទៅនឹងការប្រកាសរបស់លោក Phumtham Vechayachai នាយករដ្ឋមន្រ្តីស្ដីទីថៃ ដែលបញ្ជារឲ្យមានការចាប់ខ្លួន សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ទាំងរស់នៅក្នុងប្រទេសថៃ។ ជាមួយនឹងការប្រកាសនេះ ក្រសួងការបរទេសកម្ពុជាបានលើកឡើងយ៉ាងដូច្នេះថា៖

ចំណាត់ការផ្លូវច្បាប់របស់ប្រទេសថៃចំពោះថ្នាក់ដឹកនាំកម្ពុជា មិនត្រឹមតែជាការរំលោ.ភលើ អធិបតេយ្យ និងបូរណភាពនៃព្រះរាជាណាចក្រកម្ពុជា គោលការណ៍សមភាពអធិបតេយ្យ និង ការគោរពគ្នាទៅវិញទៅមក ដែលមានចែងក្នុងធម្មនុញ្ញអង្គការសហប្រជាជាតិប៉ុណ្ណោះទេ ថែមទាំងធ្វើឱ្យខូចខាតដល់ទំនាក់ទំនងកម្ពុជា-ថៃយ៉ាងធ្ងន់ធ្ងរទៀតផង។ លើសពីនេះទៀត ប្រការនេះបានធ្វើឱ្យប៉ះពាល់យ៉ាងធ្ងន់ធ្ងរដល់កិច្ចខិតខំប្រឹងប្រែងទាំងអស់ដែលបានអនុវត្តកន្លងមក ក្នុងការសម្រេចបាននូវបទឈប់បាញ់ពេញលេញ ដើម្បីស្តារសន្តិភាព និងប្រក្រតីភាពនៃទំនាក់ទំនង រវាងប្រទេសទាំងពីរ។

ក្រសួងបានបន្ថែមថា សកម្មភាពផ្លូវច្បាប់ដែលថៃបានគ្រោងទុក នឹងធ្វើឱ្យខូចខាតដល់ការខិតខំប្រឹងប្រែងទាំងអស់ ក្នុងការស្តារឡើងវិញនូវទំនុកចិត្ត ដែលត្រូវការជាចាំបាច់ដើម្បីអនុវត្តប្រកបដោយប្រសិទ្ធភាពនូវបទឈប់ បាញ់ដែលបានព្រមព្រៀងដោយកម្ពុជា និងថៃ នៅថ្ងៃទី ២៨ ខែកក្កដា ឆ្នាំ ២០២៥ ដែលជាលក្ខខណ្ឌ និងជាជំហានឆ្ពោះទៅរកការបន្ថយភាពតានតឹងនៃស្ថានការណ៍ ដែលភាគីទាំងពីរបានព្រមព្រៀងគ្នា និងការចុះហត្ថលេខានៅក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥ កន្លងមក។

គួរជម្រាបថា កាលពីថ្ងៃទី១៨ ខែសីហា កន្លងទៅ សារព័ត៌មានធំៗរបស់ថៃបានចុះផ្សាយព្រោងព្រាតពីចំណាត់ការផ្លូវច្បាប់របស់ប្រទេសថៃ ក្នុងការចាប់ខ្លួនមេដឹកនាំកម្ពុជា២រូបរួមមាន សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ពីបទឧក្រិដ្ឋកម្មសង្រ្គាម និងរំលោ.ភលើអធិបតេយ្យភាពរបស់ថៃ។ នេះបើតាមការបញ្ជារបស់លោក Phumtham Vechayachai នាយករដ្ឋមន្រ្តីស្ដីទីថៃ។

ឆ្លើយតបទៅនឹងការប្រកាសយ៉ាងព្រហើននេះ សម្ដេចតេជោហ៊ុន សែន បានមានប្រសាសន៍យ៉ាងដូច្នេះថា៖ «ប្រសិនបើថៃអាចចាប់មេដឹកនាំកម្ពុជាបាន កម្ពុជាក៏អាចចាប់មេដឹកនាំថៃមួយចំនួនដែលបានឈ្លានពាន និងសម្លា.ប់ប្រជាជនកម្ពុជាបានដូចគ្នាដែរ។ តើនេះជាគោលបំណងដើម្បីបង្កើតជំនឿទុកចិត្ត និងឈានទៅរកទំនាក់ទំនងល្អឬបំផ្លាញដើម្បីបង្កើតជម្លោះឡើងវិញក្រោយកិច្ចព្រមព្រៀងឈប់បាញ់?»

សម្ដេចតេជោបានសង្កត់ធ្ងន់ផងដែរថា៖ «ប្សិនបើនេះគឺជាសំដីពិតរបស់នាយករដ្ឋមន្ត្រីស្តីទីជិតផុតអាណត្តិមែន វាបង្ហាញឲ្យឃើញថា គាត់គឺជាមនុស្សព្រៃមិនស្គាល់អ្វីទៅជាច្បាប់ទម្លាប់ហើយមិនទាំងចេះការទូតទៀតផង»៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Amarin News នៅថ្ងៃទី១៩ ខែសីហា ឆ្នាំ២០២៥ ឱ្យដឹងថា ពលរដ្ឋថៃនៅស្រុកកាន់ថាឡាក ខេត្តស៊ីសាកេតជាប់ព្រំដែនកម្ពុជា ដែលពុំអាចរកប្រាក់ចំណូលបានក្នុងរយៈពេលជាង១ខែមកនេះ បានសម្រុកលក់គោ ក្របីជាបន្តបន្ទាប់ បើទោះជាតម្លៃធ្លាក់ចុះក៏ដោយ ពីព្រោះបារម្ភពីការប៉ះទង្គិច ឬបា.ញ់គ្នាជាលើកទី២ ។

ផ្សារទិញ-លក់គោ ក្របីមួយកន្លែងស្ថិតនៅស្រុកកាន់ថាឡាក ខេត្តស៊ីសាកេត ជាប់ព្រំដែនកម្ពុជា មានក្រុមអាជីវករថៃមករង់ចាំទិញ-លក់គោ ក្របីជាច្រើន ក្រោយពីផ្សារនេះទើបតែបើកឡើងវិញមិនយូរប៉ុន្មាន ។ កាលពីថ្ងៃទី២៤ ខែកក្កដា កន្លងមក ដែលជាថ្ងៃកងទ័ពថៃបើកការវាយប្រហារមុនមកលើកម្ពុជា គឺផ្សារនេះបានបិទគ្មានការលក់ដូរគោ ក្របីទេ ។

លោក ស៊ុបាន អាយុ៦៦ឆ្នាំ ឈ្មួញទិញ-លក់គោ និយាយថា ផ្សារនេះស្ងត់ស្ងាត់កាលពីកងទ័ពថៃបាញ់ឈ្លានពានទឹកដីកម្ពុជានៅខែកក្កដា ហើយផ្សារនេះទើបតែបើកឡើងវិញឱ្យពលរដ្ឋទិញ-លក់គោ ក្របី ប៉ុន្តែក្នុងតម្លៃថោក ។ ពេលនេះ ពលរដ្ឋថៃសម្រុកលក់គោ ក្របីច្រើនណាស់ ជាពិសេស អ្នករស់នៅក្បែរព្រំដែនជាប់កម្ពុជា ព្រោះបារម្ភប្រទេសទាំងពីរមានសង្គ្រាមម្តងទៀត ទើបធ្វើឱ្យគោ ក្របីសម្បូរពេញផ្សារ ។ តម្លៃគោ ក្របីថោកស្រាប់ហើយ ពេលមានហេតុការណ៍ប៉ះទង្គិចរវាងកម្ពុជា-ថៃ ធ្វើឱ្យតម្លៃកាន់តែថោកថែមទៀត ។ កន្លងមក មានឈ្មួញវៀតណាម និងឈ្មួញប្រទេសផ្សេងៗចូលមកទិញគោ ក្របីខ្លះៗ ប៉ុន្តែពេលមានសង្គ្រាមធ្វើឱ្យឈ្មួញបារម្ភពីសុវត្ថិភាព ។

ចំណែកលោក ខាំផាន់ អាយុ៦៣ឆ្នាំ ឈ្មួញទិញ-លក់គោ ក្របី ប្រាប់ថា ក្រោយពីផ្សារនេះបិទដោយសារការប៉ះទង្គិចរវាងកម្ពុជា-ថៃកន្លងមក ធ្វើឱ្យលោកបាត់បង់ចំណូលជិត១ខែ ពេលផ្សារនេះបើកឡើងវិញ លោកក៏បានរកស៊ីទិញ-លក់គោម្តងទៀតដើម្បីរកចំណូល ។ បច្ចុប្បន្ន កសិករថៃសម្រុកលក់គោ ក្របី ដោយសារបារម្ភអាចមានការប៉ះទង្គិចជាលើកទី២ ហើយត្រូវជម្លៀសចេញពីផ្ទះសម្បែងគ្មានអ្នកណាចិញ្ចឹមសត្វ ខណៈកសិករខ្លះលក់គោ ក្របីអស់គ្មានសល់ ។

ពលរដ្ឋនៅស្រុកកាន់ថាឡាក ខេត្តស៊ីសាកេត នៅតែបារម្ភពីស្ថានការណ៍អសន្តិសុខ និងត្រៀមខ្លួនជម្លៀសចេញពីផ្ទះគ្រប់ពេលវេលា ពុំហ៊ានយករបស់របរប្រើប្រាស់ចាំបាច់ចេញពីរថយន្តទេ ។ ស្ថានការណ៍បែបនេះ គ្មានអ្នកណាហ៊ានប្រកបរបររកស៊ីឡើយ គ្មានប្រាក់ចំណូល ហើយក៏ប្រមូលគោ ក្របី និងរបស់មានតម្លៃលក់យកលុយចិញ្ចឹមជីវិត ។ លោក ខាំផាន់ ចង់ឱ្យកម្ពុជា-ថៃមានសន្តិភាពឆាប់ៗ ទើបពលរដ្ឋអាចរស់នៅតាមធម្មតា ។

គួរបញ្ជាក់ថា ការឈ្លានពានរបស់កងទ័ពថៃមកលើកម្ពុជា បែរជាធ្វើឱ្យពលរដ្ឋថៃខ្លួនឯងលំបាកគ្មានចំណូល ពុំហ៊ានប្រកបរមុខរបរ ជាពិសេស ពលរដ្ឋថៃនៅព្រំដែនជាប់កម្ពុជា បានត្រៀមខ្លួនចាកចេញពីផ្ទះគ្រប់ពេលវេលា ។ ប៉ុន្តែពលរដ្ឋថៃទាំងនេះនៅតែលើកទឹកចិត្តឱ្យកងទ័ពខ្លួនបន្តការឈ្លានពាន ដោយសារពួកគេជឿលើព័ត៌មានញុះញង់របស់ថៃដែលចោទប្រកាន់ ទម្លាក់កំហុស និងលាបពណ៌កម្ពុជា ៕

ប្រទេសថៃ ៖ កាលពីថ្ងៃទី១៨ ខែសីហា ឆ្នាំ២០២៥ សារព័ត៌មានថៃ The Better News រាយការណ៍ថា តាមការបញ្ជាក់របស់អ្នកនាំពាក្យរដ្ឋាភិបាលថៃ គឺគ្មានការរុះរើបន្លាលួសនៅព្រំដែនកម្ពុជា-ថៃជាដាច់ខាត ថៃមានតែរាយបន្លាលួសបន្ថែមទៀតនៅខេត្តជាប់ព្រំដែនទាំង៧ ។ រីឯព័ត៌មានផ្សាយថា រដ្ឋាភិបាលថៃបញ្ជាឱ្យរុះរើបន្លាលួសនោះ គឺជាព័ត៌មានក្លែងក្លាយចង់ឱ្យបែកបាក់ក្នុងសង្គមថៃ ដូច្នេះ អ្នកនាំពាក្យរដ្ឋាភិបាលថៃស្នើពលរដ្ឋកុំចែកចាយព័ត៌មាននេះ ។

លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃ និងជាគណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បាននិយាយពីករណីព័ត៌មានផ្សាយថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីនឹងបញ្ជាឱ្យរុះរើបន្លាលួសនៅព្រំដែនកម្ពុជា-ថៃក្រោយកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) នោះ គឺជាព័ត៌មានក្លែងក្លាយ ។ រដ្ឋាភិបាលថៃគ្មានគំនិតរុះរើបន្លាលួសទេ គឺមានតែរាយបន្លាលួសបន្ថែមទៀតជាបន្តបន្ទាប់ ។

លោក ជិរ៉ាយុ និយាយថា ព័ត៌មានរុះរើបន្លាលួសនេះត្រូវបានផ្សព្វផ្សាយដោយហ្វេសប៊ុកផេកមួយចំនួនដើម្បីទទួលបានចំនួន Like និងអ្នកទស្សនា ដោយការផ្សព្វផ្សាយព័ត៌មានមិនពិតថា រដ្ឋាភិបាលថៃនឹងកោះប្រជុំក្រុមប្រឹក្សាសន្តិសុខជាតិ និងស្នើឱ្យរុះរើបន្លាលួសនៅព្រំដែនកម្ពុជា-ថៃទាំងអស់ ។ ការពិត គ្មានការរុះរើបន្លាលួសដូចការផ្សាយរបស់សារព័ត៌មានទេ ។

រដ្ឋាភិបាលថៃអនុវត្តតាមកិច្ចព្រមព្រៀងបទឈប់បាញ់ចាប់ពីយប់ថ្ងៃទី២៨ ខែកក្កដា ហើយថៃត្រូវតែរក្សាអធិបតេយ្យរបស់ខ្លួន ។ ដូច្នេះ ការរាយបន្លាលួសជាវិធានការចាំបាច់សម្រាប់ថៃកំណត់ព្រំដែន ហើយរដ្ឋាភិបាលថៃនឹងពុំខ្លាចការដាក់សម្ពាធពីភាគីណាទាំងអស់ ។ ប្រទេសថៃនឹងពុំរុះរើបន្លាលួសដែលពង្រាយនៅគ្រប់តំបន់ក្នុងខេត្តទាំង៧ គឺមានតែដាក់បន្ថែម ។

ដោយឡែក មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃបានទទួលការជូនដំណឹងពីកម្ពុជារឿងការពន្យារពេលកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ពីថ្ងៃទី២១ ខែសីហា ទៅប្រជុំនៅថ្ងៃទី២៧ ខែសីហាវិញ គឺភាគីថៃពុំជំទាស់ទេ និងយល់ព្រមពន្យារពេលកិច្ចប្រជុំ ។ នេះបើតាមការអះអាងរបស់លោក ជិរ៉ាយុ ។

ពលរដ្ឋខ្មែរសំណូមពរទៅថៃ គឺរាយបន្លាលួសតែលើទឹកដីរបស់ខ្លួនទៅ សូមថៃកុំរាយបន្លាលួសឈ្លានពានរំលោភចូលទឹកដីកម្ពុជា និងព័ទ្ធយកលំនៅឋានក្នុងភូមិពលរដ្ឋខ្មែរដោយខុសច្បាប់ ។ កាលពីថ្ងៃទី១២-១៣ ខែសីហា កន្លងមក កងទ័ពថៃបានរាយបន្លាលួស និងដាក់កង់ឡានបិទផ្លូវ បិទផ្ទះពលរដ្ឋខ្មែរនៅភូមិព្រៃចាន់ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ដោយខុសច្បាប់ក្រោយប្រទេសទាំងពីរអនុវត្តបទឈប់បាញ់ ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Naewna News នៅថ្ងៃទី១៩ ខែសីហា ឆ្នាំ២០២៥ ឱ្យដឹងថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង ពុំទុកចិត្តកម្ពុជា ហើយលោកថា ស្ថានការណ៍ព្រំដែនកម្ពុជា-ថៃបច្ចុប្បន្ន គឺ៥០% លើ៥០% ថៃនឹងប្រយុទ្ធបើមានការប៉ះទង្គិចកើតឡើង ។ ថៃត្រៀមខ្លួនចូលរួមកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ហើយសង្ឃឹមភាគីទាំងពីរយល់ពីគ្នាទៅវិញទៅមកដោយការពិភាក្សាគ្នាប្រកាន់យកផលប្រយោជន៍ជាតិជាធំ ។

នៅថ្ងៃទី១៩ ខែសីហា នៅវិទ្យាល័យ National Defence College (NDC) លោក ប៊ុនស៊ីន ផាកក្លាង មេបញ្ជាការយោធភូមិភាគ២ បាននិយាយក្រោយពិធីផ្តល់ជំនួយដល់កងទ័ពរងរបួស រួមទាំងពង្រឹងសន្តិសុខការពារអធិបតេយ្យពីការប៉ះទង្គិចតាមព្រំដែនកម្ពុជា-ថៃថា លោកសប្បាយចិត្តដែលប្រទេសថៃបែបនេះ ពលរដ្ឋថៃពុំបោះបង់គ្នា ។ ហេតុការណ៍ជាច្រើនបានកើតឡើងនៅតាមបណ្តោយព្រំដែនប្រវែងជិត១,០០០គីឡូម៉ែត្រ ហើយកងទ័ពថៃធ្វើបានល្អ ។ យើងការពារយ៉ាងរឹងមាំគ្រប់តំបន់ ប៉ុន្តែកងទ័ពអាចរងរបួសក្នុងការប្រយុទ្ធខ្លះ ។

លោកបន្តថា ព្រះមហាក្សត្រថៃព្រួយបារម្ភពីកងទ័ពគ្រប់រូបដែលរងផលប៉ះពាល់ដោយសារការប៉ះទង្គិច ហើយព្រះមហាក្សត្រថៃបានឧបត្ថម្ភកងទ័ពរងរបួសទាំងអស់ ។ ក្រៅពីនេះ លោកនឹងយករបស់របរដែលគ្រប់គ្នាបរិច្ចាគទៅប្រគល់ឱ្យកងទ័ពនៅព្រំដែន ពេលខ្លះ ថវិការបស់កងទ័ព និងថវិការដ្ឋាភិបាលដែលប្រគល់ឱ្យកងទ័ពគ្រប់គ្រាន់ហើយ ប៉ុន្តែរបស់ខ្លះត្រូវការបន្ទាន់ និងពុំអាចទទួលបានទាន់ពេលវេលា ។

ស្ថានការណ៍ព្រំដែនកម្ពុជា-ថៃបច្ចុប្បន្ន គឺ៥០% លើ៥០% គឺយើងពុំអាចទុកចិត្តកម្ពុជាបានទេ ។ ពេលនេះ មេបញ្ជាការបានចុះទៅសួរសុខទុក្ខកងទ័ពជាបន្តបន្ទាប់ដោយសារការបារម្ភ ហើយកងទ័ពបានត្រៀមខ្លួនប្រយុទ្ធរួចហើយបើមានហេតុការណ៍ប៉ះទង្គិចគ្នាម្តងទៀត ក៏ដូចជាការជជែកបែបមិត្តភាព ។ ដូច្នេះ សូមពលរដ្ឋទាំងអស់សប្បាយចិត្តជាមួយការបំពេញភារកិច្ចរបស់កងទ័ព ។

លោកសង្ឃឹមថា ស្ថានការណ៍ជម្លោះនឹងបញ្ចប់យ៉ាងឆាប់រហ័ស ហើយនៅចុងខែសីហានេះ លោកនឹងចូលរួមកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ជាមួយកម្ពុជាដើម្បីយល់ពីគ្នា ។ បន្ទាប់មក ភាគីទាំងពីរនឹងចូលរួមប្រជុំគណៈកម្មាធិការកិច្ចការព្រំដែនទូទៅ (GBC) ម្តងទៀត ហើយលោកសង្ឃឹមថា ការជជែកនឹងផ្អែកលើផលប្រយោជន៍ជាតិជាធំ ។

ចំណែកកម្ពុជាស្នើឱ្យភាគីថៃគោរពបទឈប់បាញ់តាមការសន្យារបស់ខ្លួន និងបញ្ឈប់សកម្មភាពឈ្លានពានរំលោភលើទឹកដីកម្ពុជាជាបន្ទាន់ ពីព្រោះកម្ពុជា និងថៃ សុទ្ធតែជាសមាជិកអាស៊ានដូចគ្នា ។ ប្រទេសនានាលើពិភពលោក កំពុងសង្កេតមើលសកម្មភាពរបស់ថៃ ជាពិសេស មហាអំណាចអាមេរិក បើថៃអនុវត្តខុសបទឈប់បាញ់ តើថៃនឹងដោះសាជាមួយអាមេរិកដូចម្តេច?

ថៃ៖ នៅថ្ងៃទី១៩ ខែសីហា ឆ្នាំ២០២៥ គណៈរដ្ឋមន្ត្រីថៃបានប្រជុំសម្រេច អនុម័តឲ្យមានការហូរចូលនូវពលករជនជាតិស្រីលង្កាជាច្រើនតាមដែលអាចធ្វើទៅបាន ដើម្បីជំនួសកម្លាំងដែលបាត់បង់ក្រោយពេលពលករខ្មែរត្រឡប់មកប្រទេសវិញអស់។ នេះបើតាមការចុះផ្សាយរបស់សារព័ត៌មាន Khaosod នៅរសៀលថ្ងៃអង្គារនេះ។

ប្រភពខាងលើនេះបានឲ្យដឹងថា លោក Pongkwin Juengrungruangkit រដ្ឋមន្ត្រីក្រសួងការងារ បានផ្តល់បទសម្ភាសទាក់ទងនឹងការស្វែងរកកម្លាំងពលកម្ម ដើម្បីជំនួសពលករកម្ពុជា ដែលបានត្រឡប់ទៅប្រទេសវិញអស់ថា៖ កិច្ចប្រជុំគណៈរដ្ឋមន្ត្រីនៅថ្ងៃនេះបានអនុម័តលើអនុស្សរណៈនៃកិច្ចសហប្រតិបត្តិការជួលកម្មករស្រីលង្កា ដើម្បីបំពេញចន្លោះខ្វះខាត និងទប់ស្កាត់ការខាតបង់នៃអាជីវកម្មថៃដែលកំពុងគាំងស្ទះព្រោះគ្មានកម្មករធ្វើការ។

លោកបានលើកឡើងថា “ឥឡូវនេះប្រទេសស្រីលង្កាត្រៀមនឹងបញ្ជូនពលករចំនួន ១ ម៉ឺននាក់មកថៃភ្លាមៗ បន្ថែមពីនោះមានមនុស្សជាង ៣ ម៉ឺននាក់ដែលបានចុះឈ្មោះរួចរាល់ហើយ។ លោកបន្តថា៖ យើងនឹងនាំពលករស្រីលង្កាទាំងនោះមក ហើយនឹងមានក្រុមផ្សេងៗទៀតមកពីប្រទេសដូចជា ហ្វីលីពីន ឥណ្ឌូនេស៊ី និងនេប៉ាល់ផងដែរ”។

រដ្ឋមន្ត្រីរូបនេះបានអះអាងថា វិធានការពន្ធរបស់សហរដ្ឋអាមេរិកនឹងមិនប៉ះពាល់ដល់ទីផ្សារការងាររបស់ប្រទេសថៃទេ វាក៏នឹងមិនបង្កបញ្ហាដល់រោងចក្រនៅក្នុងប្រទេសថៃផងដែរ។ ទោះជាយ៉ាងណា ក៏លើកឡើងរបស់លោក Pongkwin Juengrungruangkit មិនបានបញ្ជាក់ពីផលអវិជ្ជមានជាក់ស្ដែងដែលកំពុងកើតមាននៅក្នុងឧស្សហកម្មការងាររបស់ថៃនោះទេ។

ជាក់ស្ដែងកាលពីថ្ងៃទី8 ខែសីហា ឆ្នាំ2025កន្លងទៅ អង្គការការងារចំណាកស្រុក (MWG) ប្រចាំនៅប្រទេសថៃ បានបង្ហាញក្ដីកង្វល់ចំពោះស្ថានភាពការងារនៅក្នុងប្រទេសខ្លួនជាខ្លាំង ក្រោយពលករខ្មែរប្រមាណជិត 90មុឺននាក់ បាននាំគ្នាត្រឡប់ទៅប្រទេសកំណើតវិញ ជាហេតុដែលធ្វើឲ្យរោងចក្រ និងសហគ្រាសជាច្រើននៅក្នុងប្រទេសថៃជួបប្រទះនឹងការខ្វះខាតកម្លាំងពលកម្ម កកស្ទះការងារនិងមិនអាចដោះស្រាយបាន។ អង្គការនេះបានបញ្ជាក់ថា ការចាកចេញរបស់ពលករខ្មែរ នឹងធ្វើផ្ដល់ផលប៉ះពាល់ដល់ដំណើរការផលិតកម្មរបស់ថៃ។

ដោយឡែក ការជ្រើសយកពលករស្រីលង្ការមកជំនួសពលករខ្មែរដូចខាងលើនេះ បើទោះបីជាអាចទប់ទល់នឹងការខ្វះខាតកម្លាំងក៏ពិតមែន ប៉ុន្តែអ្នកជំនាញបានសម្លឹងឃើញថាវាក៏នឹងហុចផលអវិជ្ជមានច្រើនគួសមផងដែរ។ ចំណុចនេះគេចង់លើកឡើងពាក់ព័ន្ធនឹងជំនាញ និងសមត្ថភាពរបស់ពលករ ដោយសារអនុញ្ញាតឲ្យចូលមកធ្វើការមានសភាពបន្ទាន់ និងធូររលុងខ្លាំងពេកនោះ ដូច្នេះច្បាស់ណាស់ថា ពលករភាគច្រើននឹងមិនបានទទួលបានការបណ្ដុះបណ្ដាលច្បាស់លាស់នោះទេ ហើយវានឹងផ្ដល់ផលវិបាកសម្រាប់ពួកគេក្នុងការធ្វើការឲ្យដូចពលករខ្មែរ៕