សហរដ្ឋអាមេរិក ៖ រដ្ឋមន្ត្រីក្រសួងការបរទេសអាមេរិក លោក Marco Rubio បានបង្ហាញក្តីរីករាយចំពោះកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) នៅទីក្រុងកូឡាឡាំពួរ ប្រទេសម៉ាឡេស៊ី ហើយលោកចាត់ទុកជាការបោះជំហ៊ានយ៉ាងសំខាន់ដើម្បីពង្រឹងកិច្ចព្រមព្រៀងបទឈប់បា.ញ់ ខណៈឯកអគ្គរដ្ឋទូតអាមេរិកនៅម៉ាឡេស៊ីឱ្យដឹងថា កិច្ចប្រជុំរវាងប្រទេសទាំងពីរនឹងឆ្ពោះទៅរកសន្តិភាពយូរអង្វែង ។ នេះបើតាមការផ្សព្វផ្សាយរបស់សារព័ត៌មាន AFP នៅថ្ងៃទី៨ ខែសីហា ឆ្នាំ២០២៥ ។

សារព័ត៌មាន AFP រាយការណ៍ថា កាលពីថ្ងៃទី៧ ខែសីហា កម្ពុជា និងថៃ បានប្រជុំវិសាមញ្ញនៃគណៈកម្មាធិការព្រំដែនទូទៅ ខណៈប្រទេសទាំងពីរបានធ្វើសង្គ្រាមតាមព្រំដែនរយៈពេល៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ។ សង្គ្រាមនេះកើតឡើងដោយសារកងទ័ពថៃឈ្លានពានដណ្តើមប្រាសាទកម្ពុជា ហើយកងទ័ពថៃបានប្រើប្រាស់អាវុធគ្រប់ប្រភេទ រហូតដល់យន្តហោះទម្លាក់គ្រាប់បែក ។

កងទ័ពថៃបានបញ្ចប់ការឈ្លានពានកម្ពុជាក្រោយពីនាយករដ្ឋមន្ត្រីម៉ាឡេស៊ី លោក Anwar Ibrahim បានសម្របសម្រួលឱ្យប្រទេសទាំងពីរចរចាកិច្ចព្រមព្រៀងបទឈប់បាញ់ ចាប់ពីយប់ថ្ងៃទី២៨ ខែកក្កដា ក្រោមការអង្កេតការណ៍ពីមហាអំណាចអាមេរិក និងមហាអំណាចចិន ។ កម្ពុជា-ថៃបានប្រជុំពិភាក្សាគ្នាជាច្រើនថ្ងៃ និងទទួលបានជោគជ័យនូវកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ ដោយមានការចូលរួមសង្កេតការណ៍ពីម៉ាឡេស៊ី អាមេរិក និងចិន នាថ្ងៃទី៧ ខែសីហា នៅទីក្រុងកូឡាឡាំពួ ប្រទេសម៉ាឡេស៊ី ។

រដ្ឋមន្ត្រីក្រសួងការបរទេសអាមេរិក លោក Marco Rubio បានបញ្ជាក់ក្នុងសេចក្តីថ្លែងការណ៍ថា ៖ «ប្រធានាធិបតីអាមេរិក លោក Donald Trump និងខ្ញុំសង្ឃឹមថា រដ្ឋាភិបាលកម្ពុជា-ថៃនឹងគោរពពាក្យសន្យារបស់ពួកគេក្នុងការបញ្ចប់ជម្លោះនេះ» ។

ដោយឡែក ឯកអគ្គរដ្ឋទូតអាមេរិកនៅម៉ាឡេស៊ី លោក Edgard Kagan ដែលបានចូលរួមកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ នាថ្ងៃទី៧ ខែសីហា ក្នុងឋានៈជាអ្នកសង្កេតការណ៍បានបង្ហាញក្តីរីករាយថា កិច្ចព្រមព្រៀងនេះជាជំហ៊ានមួយឆ្ពោះទៅរកសន្តិភាពយូរអង្វែង ។ ប៉ុន្តែយើងត្រូវនិយាយដោយភាពស្មោះត្រង់ គឺ កម្ពុជា-ថៃនៅតែមានភាពតានតឹង និងមិនទុកចិត្តគ្នាខ្លាំង ។ ប្រទេសទាំងពីរត្រូវបង្ហាញពីការប្តេជ្ញាចិត្តខ្ពស់ ហើយនេះជាសារផ្ញើទៅកាន់កងទ័ព និងសមត្ថកិច្ចនៅតាមព្រំដែន ។

គួរបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្តែងការអបអរសាទរចំពោះការប្រពឹត្តទៅដោយជោគជ័យនៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ ដោយមានការចូលរួមសង្កេតការណ៍ពីម៉ាឡេស៊ី សហរដ្ឋអាមេរិក និងសាធារណរដ្ឋប្រជាមានិតចិន នាថ្ងៃទី៧ ខែសីហា ឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី ៕

ហ្សឺណែវ៖ អង្គការសុខភាពពិភពលោក (WHO) កាលពីថ្ងៃទី ២២ ខែកក្កដា ឆ្នាំ២០២៥ បានអំពាវនាវឲ្យអនុវត្តសកម្មភាពមួយចំនួនជាបន្ទាន់ ដើម្បីជៀសវាងការកើតឡើងវិញនៃជំងឺជីគុងគ៊ុនយ៉ា ដែលជាជំងឺឆ្លងដោយមូសខ្លា ដែលធ្លាប់បានដាក់សម្ពាធលើពិភពលោកកាលពី២០ឆ្នាំមុន ខណៈពេលដែលការរីករាលដាលថ្មីៗ កើតមាននៅតំបន់មហាសមុទ្រឥណ្ឌា និងចាប់ផ្តើមរាលដល់ទ្វីបអឺរ៉ុប និងទ្វីបផ្សេងៗទៀត សូម្បីតែទ្វីបអាស៉ី។ នេះបើតាមសារព័ត៌មាន The Straits Times។

តាមការវាយតម្លៃជាមធ្យម មានប្រជាជនប្រមាណ ៥.៦ ពាន់លាននាក់ រស់នៅក្នុងតំបន់រាលដាលវីរុសនេះ នៅទូទាំងប្រទេសចំនួន ១១៩ ដែលវាអាចបង្កឲ្យមានអាការក្ដៅខ្លួនខ្លាំង ឈឺសន្លាក់ និងពិការភាពអស់រយៈពេលយូរ។ នេះបើតាមវេជ្ជបណ្ឌិត Diana Rojas Alvarez អ្នកជំនាញសុខភាពនៅ WHO បានប្រាប់អ្នកសារព័ត៌មាននៅទីក្រុងហ្សឺណែវ។

អ្នកស្រី Diana បាននិយាយថា “យើងកំពុងឃើញប្រវត្តិសាស្ត្រកំពុងតែកើតឡើងវិញហើយ” ដោយអ្នកស្រីបានប្រៀបធៀបទៅនឹងការរាលដាលដ៏ធំនៅឆ្នាំ ២០០៤–២០០៥ ដែលបានប៉ះពាល់ដល់មនុស្សជិតពាក់កណ្តាលលាននាក់ ជាពិសេសនៅតំបន់កោះតូចៗ មុននឹងរាលដាលជុំវិញពិភពលោក។

ការកើនឡើងថ្មីនេះបានចាប់ផ្ដើមតាំងពីដើមឆ្នាំ ២០២៥ មកម្លេះ ដោយមានការផ្ទុះឡើងខ្លាំងនៅលើកោះក្នុងមហាសមុទ្រឥណ្ឌាដែលធ្លាប់រងផលប៉ះពាល់ពីមុន មានដូចជាកោះ La Réunion, Mayotte និងMauritius ជាដើម។ ពេលនេះ វីរុសកំពុងរាលដល់ប្រទេសផ្សេងៗដូចជា ម៉ាដាហ្គាស្ការ សូម៉ាលី កេនយ៉ា ឥណ្ឌា រួមទាំងប្រទេសចិនផងដែរ។

អ្វីដែលគួរព្រួយបារម្ភ គឺចំនួនករណីរាលដាលកំពុងកើនឡើង និងមានការឆ្លងនៅអឺរ៉ុបផងដែរ។ អ្នកស្រី Diana បាននិយាយថា មានជាង ៨០០ ករណី ដែលត្រូវបានឆ្លងចូលទៅប្រទេសបារាំងចាប់តាំងពីថ្ងៃទី ១ ខែឧសភា មក។ លើសពីនេះ មាន ១២ករណី ឆ្លងក្នុងស្រុកត្រូវបានរកឃើញនៅតំបន់ភាគខាងត្បូងនៃប្រទេសបារាំង ដែលមានន័យថា អ្នកជំងឺត្រូវបានមូសក្នុងស្រុកខាំ ដោយមិនបានធ្វើដំណើរទៅតំបន់គ្រោះថ្នាក់ឡើយ។ បន្ថែមពីនេះ ក្នុងករណីថ្មីៗនេះគឺមានការឆ្លងនៅប្រទេសចិនផងដែរ ដោយនៅទីក្រុង Foshan មានចំនួនអ្នកឆ្លងជាង ៧០០០នាក់ ហើយ​ ដែលជាករណីរាតត្បាតធំជាងគេនៅចិន។ លើសពីនេះ ទីក្រុងផ្សេងទៀតដូចជា ហុងកុង ម៉ាកាវ និងខេត្តហ៊ូណាន ក៏មានករណីឆ្លងផងដែរ បើទោះបីជាមានចម្ងាយជាង ៦០០គីឡូម៉ែត្រ ពីទីតាំងចម្លងក៏ដោយ(Foshan)។

គួរបញ្ជាក់ថា ជំងឺជីគុងគ៊ុនយ៉ា គឺជាជំងឺឆ្លងមួយ ដែលឆ្លងតាមរយៈមូសដែលមានផ្ទុកវីរុស ដូចជាមូសប្រភេទ Aedes aegypti និង Aedes albopictus ដែលជាប្រភេទដូចគ្នាទៅនឹងមូសដែលផ្ទុកវីរូសជំងឺគ្រុនឈាម(dengue) និង Zika។ បច្ចុប្បន្នវា​មិនទាន់មានការព្យាបាលណាជាក់លាក់ឡើយ។ ទោះជាយ៉ាងណា យើងអាចការពារជំងឺនេះបាន ដោយការសម្លា.ប់ជម្រកមូស ប្រើថ្នាំសម្លា.ប់សត្វល្អិត ព្រមទាំងស្លៀកសម្លៀកបំពាក់ដៃវែងនៅពេលថ្ងៃផងដែរ ព្រោះមូសនេះភាគច្រើនចេញប្រតិ្តបត្តិការតែនៅពេលថ្ងៃ៕

ថៃ៖ មេបញ្ជាការយោធភូមិភាគទី២ថៃ សម្ដែងការមិនយកចិត្តទុកដាក់នឹងសំណើររបស់សម្ដេចតេជោ ហ៊ុន សែន ដែលបានអំពាវនាវឱ្យថៃកុំប្រើប្រាស់យន្តហោះ F-16 ប្រឆាំងនឹងកម្ពុជា ដោយបញ្ជាក់ថា ថៃត្រូវតែប្រើវាដើម្បីការពារអធិបតេយ្យភាពជាតិ។ នេះបើយោងតាមសារព័ត៌មាន Khaodod។

នៅថ្ងៃទី៧ ខែសីហា នៅទីបញ្ជាការកងទ័ពភូមិន្ទថៃ ឧត្តមសេនីយឯក Boonsin Phadklang មេបញ្ជាការយោធភូមិភាគទី២ថៃ បានផ្តល់បទសម្ភាសន៍ទៅកាន់សារព័ត៌មាន បន្ទាប់ពីថៃទទួលបានយន្តហោះដ្រូនឈ្លបយកការណ៍ សម្លៀកបំពាក់ និងសម្ភារចាំបាច់ផ្សេងទៀតពីមូលនិធិសប្បុរសជន ដែលដឹកនាំដោយលោក Pante Puapongphan ដើម្បីប្រគល់ជូនដល់ទាហានជួរមុខ។

នៅពេលសួរនាំអំពីការលើកឡើងរបស់សម្ដេច ហ៊ុន សែន ដែលស្នើឱ្យសហរដ្ឋអាមេរិក និងស៊ុយអែត មិនអនុញ្ញាតឱ្យថៃប្រើប្រាស់យន្តហោះចម្បាំង F-16-Gripen ក្នុងប្រតិបត្តិការប្រឆាំងនឹងកម្ពុជា និងបានអំពាវនាវដល់សហគមន៍អន្តរជាតិកុំលក់យន្តហោះចម្បាំងទៅឱ្យប្រទេសថៃនោះ លោកប៊ុនស៊ីន បានឆ្លើយតបបែបមិនខ្វល់ថា “នោះជារឿងរបស់យើង គាត់អាចសុំឱ្យយើងកុំឱ្យប្រើវា ប៉ុន្តែយើងនៅតែមានសិទ្ធិប្រើវាដើម្បីការពារអធិបតេយ្យភាពរបស់យើង” ។

ដោយឡែក ទាក់ទិននឹងព័ត៌មានអំពីការធ្វើឃា.តសម្តេច ហ៊ុន សែន និងសម្តេចធិបតី ហ៊ុន ម៉ាណែត មេបញ្ជាការយោធភូមិភាគទី២ បានបញ្ជាក់ថា ព័ត៌មាននេះចេញមកពីប្រព័ន្ធផ្សព្វផ្សាយកម្ពុជា ហើយថៃមិនមានគម្រោងធ្វើដូច្នេះទេ។

គួរឲ្យដឹងថា បើតាមប្រសាសន៍របស់សម្ដេចតេជោ ហ៊ុន សែន កាលពីថ្ងៃទី៦ ខែសីហាបានឲ្យដឹងថា សូមប្រទេសណាមួយដែលលក់យន្តហោះចម្បាំងឲ្យប្រទេសថៃ រឹតបន្តឹងកិច្ចសន្យាប្រើប្រាស់យន្តហោះជាមួយថៃឲ្យបានច្បាស់លាស់ផង ព្រោះកន្លងមកថៃតែងប្រើប្រាស់យន្តហោះចម្បាំងរបស់ខ្លួនបើកទៅបំពានចូលទឹកដីរបស់អ្នកជិតខាងជារឿយៗ។
ជាមួយនឹងការបដិសេធមិនព្រមធ្វើតាមសំណើររបស់កម្ពុជាពីមេទ័ពភូមិភាគ២ថៃបែបនេះ អាចបង្ហាញពីចេតនារបស់ថៃក្នុងការប្រើប្រាស់សព្វាវុ.ធទំនើប ដើម្បីធ្វើការគំរាមកំហែងដល់ប្រទេសជិតខាង ជាពិសេសគឺកម្ពុជា ក្នុងនាមជាគូបក្ខដិបក្ខដែលកំពុងមានជម្លោះព្រំដែនជាមួយគ្នា៕

ប្រទេសថៃ ៖ កាលពីថ្ងៃទី៦ ខែសីហា ឆ្នាំ២០២៥ សារព័ត៌មានថៃរាយការណ៍ថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយពីការចរចាក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ នឹងទទួលបានលទ្ធផលវិជ្ជមាន ព្រមទាំងមានការប្រកាសលម្អិតបន្ទាប់ពីបញ្ចប់ការពិភាក្សានៅថ្ងៃទី៧ ខែសីហា នេះ ។ រដ្ឋាភិបាលថៃបានបញ្ជូនលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិឱ្យដឹកនាំមន្ត្រីពាក់ព័ន្ធទៅចូលរួមកិច្ចប្រជុំ GBC នៅម៉ាឡេស៊ី ។

លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយក្រោយកិច្ចប្រជុំក្រុមប្រឹក្សាសន្តិសុខជាតិ និងគណៈរដ្ឋមន្ត្រីនៅថៃថា លោកបានជ្រាបព័ត៌មានពីកិច្ចប្រជុំគណៈកម្មាធិការកិច្ចការព្រំដែនទូទៅ (GBC) តាមរយៈលេខាធិការរាយការណ៍ពីលទ្ធផលកិច្ចប្រជុំ ចាប់ពីថ្ងៃទី៤ ដល់ថ្ងៃទី៦ ខែសីហា កន្លងមក គឺមានសញ្ញាវិជ្ជមាន ។ លោកនឹងប្រកាសលម្អិតបន្ថែមទៀតពេលបញ្ចប់ការចរចាកិច្ចប្រជុំ GBC នៅថ្ងៃទី៧ ខែសីហា ។

រដ្ឋាភិបាលថៃបានបញ្ជូនលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិឱ្យដឹកនាំមន្ត្រីពាក់ព័ន្ធទៅចូលរួមកិច្ចប្រជុំ GBC ដើម្បីឱ្យទទួលបានលទ្ធផលវិជ្ជមាន ។ ប៉ុន្តែលោក ភូមិថាំ វីឆាយ៉ាឆៃ ពុំបានបញ្ជាក់ពីការកំណត់ព្រំដែនរវាងកម្ពុជា-ថៃទេ ។

ចំណែកលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិមានទំនុកចិត្តរហូតដល់៩០% ថា ការចរចាកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ លំដាប់រដ្ឋមន្ត្រីក្រសួងការពារជាតិ នៅថ្ងៃទី៧ ខែសីហា នឹងឈានដល់ការធ្វើកិច្ចព្រមព្រៀង ហើយលោកសង្ឃឹមថា នឹងមានដំណឹងល្អសម្រាប់ពលរដ្ឋថៃ ។ ទោះជាបារម្ភពីការចរចា ប៉ុន្តែការចរចានៅថ្ងៃចុងក្រោយនេះមានប្រទេសផ្សេងៗចូលរួមសង្កេតការណ៍ ។

លោកថា ៖ «ខ្ញុំមានទំនុកចិត្តរហូតដល់៩០% លើការជជែកពិភាក្សាក្នុងកិច្ចប្រជុំ GBC លំដាប់រដ្ឋមន្ត្រីក្រសួងការពារជាតិ នៅថ្ងៃទី៧ ខែសីហា វានឹងអាចបញ្ចប់ ។ខ្ញុំបានប្រាប់រួចហើយ គឺការចរចាដំណាក់កាលទី១ លំដាប់លេខា, ដំណាក់កាលទី២ លំដាប់រដ្ឋមន្ត្រីក្រសួងការពារជាតិ និងដំណាក់កាលទី៣ អនុវត្តជាក់ស្តែង បើអាចអនុវត្តតាមគ្រប់ដំណាក់កាលនឹងជាសញ្ញាវិជ្ជមាន ។ ខ្ញុំសង្ឃឹមថា នៅថ្ងៃទី៧ ខែសីហា នឹងមានដំណឹងល្អសម្រាប់ពលរដ្ឋថៃ» ។

ការផ្តល់ព័ត៌មានទៅកាន់ពលរដ្ឋមានភាពច្របូកច្របល់ ដោយសាររដ្ឋាភិបាល និងកងទ័ពថៃផ្តល់ព័ត៌មានខុសគ្នា លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិថា សូមពលរដ្ឋតាមដានព័ត៌មានពីមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ពីព្រោះមជ្ឈមណ្ឌលនេះផ្តោតលើការផ្សព្វផ្សាយពីសន្តិសុខ និងស្ថានការណ៍ព្រំដែន ។

រីឯអ្នកនាំពាក្យរដ្ឋាភិបាលនឹងប្រកាសព័ត៌មានផ្សេងៗពាក់ព័ន្ធបន្ថែម ដូចជា ៖ វិធានការជួយសង្គ្រោះ និងផ្តល់ប្រាក់ឧបត្ថម្ភ ហើយក៏សូមទោសពលរដ្ឋផងដែរ ដែលប្រកាសព័ត៌មានដដែលៗ ដោយសារព័ត៌មានខ្លះចាំបាច់ត្រូវប្រកាសឡើងវិញ ព្រោះពលរដ្ឋពុំបានតាមដានព័ត៌មានគ្រប់ពេល ។ អ្នកខ្លះពុំបានមើលព័ត៌មានពីមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ទើបរដ្ឋាភិបាលប្រកាសព័ត៌មានជាថ្មីដើម្បីឱ្យពលរដ្ឋទូទាំងប្រទេសជ្រាប ។

ក្នុងកិច្ចប្រជុំថ្នាក់លេខាធិការ GBC កម្ពុជា-ថៃ នៅថ្ងៃទី២ ភាគីថៃបានដាក់សំណើចំនួន៨ចំណុចមកកាន់កម្ពុជា រួមមាន ៖
១-ដាច់ខាតត្រូវបញ្ឈប់ការបាញ់គ្នា
២-ការពារជនស៊ីវិល គ្មានការខូចខាតដល់មនុស្ស ផ្ទះសម្បែង ឬដីធ្លី
៣-ហាមបង្កើនចំនួនទ័ព
៤-ហាមចល័តទ័ពនៅតាមព្រំដែន
៥-ជួយសម្របសម្រួលក្នុងការបញ្ជូនត្រឡប់អ្នករបួស និងអ្នកស្លាប់
៦-បង្កើតក្រុមសម្របសម្រួល៤នាក់ សម្រាប់ភាគីទាំងសងខាងដើម្បីដោះស្រាយបញ្ហាជាក់ស្តែង
៧-កែសម្រួលកម្លាំងទ័ពដើម្បីបន្ថយភាពប្រឈមនៅតំបន់ក្តៅ និង
៨-បើសិនឯកភាព នឹងចុះកិច្ចព្រមព្រៀង ហើយវានឹងក្លាយជាកិច្ចព្រមព្រៀងផ្លូវការ ។

យោងតាមក្រសួងការពារជាតិកម្ពុជាឱ្យដឹងថា ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំគណៈប្រតិភូយោធាជាន់ខ្ពស់នៃកងយោធពលខេមរភូមិន្ទ ទៅចូលរួមកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ដែលមានតំណាងមកពីប្រទេសម៉ាឡេស៊ី សហរដ្ឋអាមេរិក និងចិន ចូលរួមសង្កេតការណ៍ក្នុងប្រជុំវិសាមញ្ញគណៈកម្មាធិការព្រំដែនទូទៅ (GBC) ដែលប្រព្រឹត្តទៅនៅទីក្រុង កូឡាឡាំពួរ ប្រទេសម៉ាឡេស៊ី ៕