បាងកក៖ នាយករដ្ឋមន្រ្តីស្តីទីថៃ លោក Phumtham Wechayachai បានប្រកាសក្ដែងៗនៅចំពោះមុខអ្នកកាសែតកាលពីថ្ងៃទី13 ខែសីហានេះថា លោកនឹងចាត់វិធានការផ្លូវច្បាប់ ប្រឆាំងនឹងបុគ្គលទាំងឡាយណាដែលនិយាយបំភ្លើស ឬបំភ្លៃពាក្យសំដីរបស់គាត់ និងអ្នកដែលធ្វើការរិះគ.ន់ទាំងមិនសមទំនង។ នេះបើយោងតាមការចុះផ្សាយរបស់សារព័ត៌មានថៃ។

ការប្រកាសបែបនេះរបស់លោក Phumtham ត្រូវបានធ្វើឡើងបន្ទាប់ពីលោករងការចោ.ទប្រកាន់យ៉ាងធ្ងន់ធ្ងរពីប្រជាជនថៃថាលោកកាន់ជើងកម្ពុជា។ បន្ថែមពីនេះ រដ្ឋាភិបាលបច្ចុប្បន្នដែលដឹកនាំដោយគណបក្សភឿថៃ ក៏មិនសូវទទួលបានការគាំទ្រពីប្រជាជនថៃផងដែរ។ ពួកគេតែងរិះគន់ និងបង្ហាញការមិនពេញចិត្តចំពោះចំណាត់ការរបស់រដ្ឋាភិបាល មិនថារឿងអ្វីក៏ដោយ។

កាលពីថ្មីៗនេះ លោក Phumtham បានបង្ហាញពីអារម្មណ៍ផ្ទាល់ខ្លួនរបស់លោកថា លោកគិតថាខ្លួនមិនទទួលបានភាពយុត្តិធម៌ទាល់តែសោះ ស្របពេលដែលមានព័ត៌មានមិនពិតជាច្រើនបានព្យាយាមបង្កាច់បង្ខូច និងបំភ្លើសពាក្យសំដីរបស់លោក ទើបធ្វើឲ្យពលរដ្ឋមានការយល់ច្រលំ។ ជាក់ស្ដែងនៅក្នុងការអត្ថធិប្បាយរបស់លោកពាក់ព័ន្ធនឹងគ្រាប់រ៉ុកក្កែត BM-21 ដែលបា.ញ់ធ្លាក់លើមន្ទីរពេទ្យថៃនៅព្រំដែន មានអ្នកនយោបាយមួយចំនួនបានបំភ្លើសការបកស្រាយរបស់លោក ហើយនាំឲ្យប្រជាជនចោ.ទប្រកាន់លោកថា លោកមានចិត្តកាន់ជើងកម្ពុជា។

លោក Phumtham បានព្រមានថានឹងចាត់វិធានការផ្លូវច្បាប់ចំពោះអ្នកវិភាគណា ដែលនិយាយលេងសើចថាឲ្យលោកគួរតែកាត់ជើងខ្លួនឯង ដើម្បីស្វែងយល់ពីភាពឈឺចាប់របស់ទាហានថៃដែលរងរបួសដោយសារគ្រាប់មីនកម្ពុជា។

លើសពីនេះ នាយករដ្ឋមន្រ្តីស្ដីទីរូបនេះបានគំរាមថា៖ ដូច្នេះចាប់ពីពេលនេះទៅ លោកនឹងប្តឹងរាល់អ្នកទាំងឡាយណា ដែលបង្វែរការពិតដើម្បីធ្វើឲ្យប៉ះពាល់ដល់រដ្ឋាភិបាល ឬរូបលោកផ្ទាល់។ លោកបន្ថែមថា៖ ការលើកឡើងមិនពិតណាមួយពាកព័ន្ធនឹងលោក នឹងធ្វើឱ្យខូចដល់ការទុកចិត្តរបស់សាធារណជន និងជំរុញឲ្យមានការបែកបាក់ផ្ទៃក្នុង។

គួររំលឹកថា លោក Phumtham Wechayachai បានចូលកាន់តំណែងជានាយករដ្ឋមន្ត្រីស្តីទីរបស់ប្រទេសថៃ កាលពីថ្ងៃទី ៣ ខែកក្កដា ឆ្នាំ ២០២៥ បន្ទាប់ពី តុលាការធម្មនុញ្ញថៃ ចេញដីកាព្យួរតំណែងលោកស្រី ផែថងថាន ស៊ីណាវ៉ាត្រ នៅថ្ងៃទី ១ ខែកក្កដា។ ចាប់តាំងពីឡើងកាន់តំណែងមក លោក Phumtham និងរដ្ឋាភិបាលគណបក្សភឿថៃទទួលបានតែពាក្យរិះគន់ម្ដងហើយម្ដងទៀតពីពលរដ្ឋថៃ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Amarin News នៅថ្ងៃទី១៤ ខែសីហា ឆ្នាំ២០២៥ ឱ្យដឹងថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បាននិយាយពីរឿងការបើកច្រកព្រំដែនកម្ពុជា-ថៃថា ថៃពុំទាន់ត្រៀមខ្លួនបើកព្រំដែនឡើងវិញទេ គឺព្រំដែននឹងបិទបន្តទៀតរហូតដល់ពេលលោកចូលនិវត្តន៍ នៅថ្ងៃទី៣០ ខែកញ្ញា ។ បច្ចុប្បន្ន លោកបានកែសម្រួលការល្បាតនៅព្រំដែនកុំឱ្យកងទ័ពថៃជាន់មីន ព្រមទាំងរកវិធីយកប្រាសាទតាក្របីពីកម្ពុជា ។

មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានផ្តល់សម្ភាសន៍ជាមួយសារព័ត៌មានពីកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) រវាងមេបញ្ជាការកងទ័ពកម្ពុជា-ថៃ ថា ភាគីទាំងពីរនឹងចូលរួមប្រជុំនៅចុងខែសីហានេះ ។ ភាគីទាំងពីរនឹងពិភាក្សាគ្នាម្តងទៀតថា តើនឹងនិយាយពីប្រធានបទអ្វីខ្លះ ហើយទីកន្លែងប្រជុំអាចនៅប្រទេសថៃ ។

លោក ប៊ុនស៊ីន បាននិយាយបំភ្លៃថា ប្រាសាទតាក្របីជារបស់ថៃ ហើយលោកកំពុងរកវិធីយកប្រាសាទនេះពីកម្ពុជា មិនថាវិធីណាក៏ដោយទាំងក្នុងប្រទេស និងក្រៅប្រទេស ។ រីឯដំណោះស្រាយរឿងមីន លោកបានកែសម្រួលការល្បាតនៅព្រំដែន និងប្រើប្រាស់ឧបករណ៍ពិសេស ព្រមទាំងដ្រូនត្រួតពិនិត្យការដាក់បន្លាលួស ។

លោកនឹងលើកយកប្រធានបទមីនមកពិភាក្សាក្នុងកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ដោយលោកចោទប្រកាន់ថា នេះជាការបំពានលក្ខខណ្ឌអនុសញ្ញាអូតាវ៉ាប្រើប្រាស់មីនប្រឆាំងបុគ្គល ដែលកម្ពុជាក៏ជាសមាជិក ។ បើកម្ពុជាពុំទទួលស្គាល់ ថៃនឹងតវ៉ា និងទំនាក់ទំនងជាមួយអន្តរជាតិឱ្យដឹងឮ ។ ក្រៅពីនេះ ថៃនឹងស្នើទៅអង្គការសហប្រជាជាតិ (UN) ឱ្យពិនិត្យមើលមានអ្វីកើតឡើង ក៏ដូចជាឱ្យមជ្ឈមណ្ឌលជាតិកម្ចាត់មីន (TMAC) មកពិនិត្យផងដែរ ។

ចំណែកកម្ពុជាបដិសេធពុំបានបង្កប់មីន វាជារឿងរបស់កម្ពុជា ប៉ុន្តែលោកបានត្រៀមជូនដំណឹង ព្រមទាំងត្រៀមកម្លាំងរួចរាល់ហើយ ។ ថៃពុំទាន់ដកថយកម្លាំងកងទ័ព និងអាវុធផ្សេងៗទេ គឺស្ថិតនៅទីតាំងដដែល ។ ចំពោះការប្រើប្រាស់គ្រឿងចក្រឈូសឆាយមីន គឺប្រើប្រាស់បានតែកន្លែងមួយចំនួនប៉ុណ្ណោះ ប៉ុន្តែកន្លែងខ្លះទៀតគ្រឿងចក្រចូលពុំដល់ ពីព្រោះជាព្រៃក្រាស់ ត្រូវប្រើប្រាស់វិធីផ្សេងសម្រាប់បោសសម្អាតមីន ។

ចុងក្រោយ លោក ប៊ុនស៊ីន បាននិយាយពីការបើកច្រកព្រំដែនកម្ពុជា-ថៃថា ថៃពុំទាន់ត្រៀមខ្លួនបើកព្រំដែនឡើងវិញទេ ថៃនឹងបន្តបិទព្រំដែនរហូតដល់ពេលលោកចូលនិវត្តន៍ នៅថ្ងៃទី៣០ ខែកញ្ញា ខាងមុខ ។

គួរបញ្ជាក់ថា កងទ័ពថៃបានបិទព្រំដែនកម្ពុជា-ថៃជាឯកតោភាគីក្រោមហេតុផលទប់ស្កាត់ការឆបោកអនឡាញ និងឧក្រិដ្ឋកម្មឆ្លងដែន ដែលរដ្ឋាភិបាលថៃព្យាយាមទម្លាក់កំហុស និងលាបពណ៌មកលើកម្ពុជា ។ រហូតមកដល់ថ្ងៃទី១៤ ខែសីហា ឆ្នាំ២០២៥ កងទ័ពថៃនៅតែបន្តបិទព្រំដែនដដែល ក្រោយពីព្រះមហាក្សត្រថៃ និងរដ្ឋាភិបាលប្រគល់អំណាចឱ្យកងទ័ពមានសិទ្ធិសម្រេចចិត្ត ៕

ថៃ៖ ក្រុមហ៊ុន PTT Public Company Limited ដែលជាក្រុមហ៊ុនមេរបស់ក្រុមហ៊ុនប្រេងឥន្ធនៈ PTT បានបង្ហាញពីការខាតបង់យ៉ាងច្រើននៃប្រាក់ចំណេញរបស់ខ្លួន ដោយទទួលប្រាក់ចំណេញប្រមាណតែ 598 លានដុល្លារអាមេរិកប៉ុណ្ណោះនៅក្នុងត្រីមាសទី2 នេះ បើធៀបនឹងប្រាក់ចំណេញ 1.09 ពាន់លានដុល្លារអាមេរិកក្នុងរយៈពេលដូចគ្នាកាលពីឆ្នាំមុន ស្មើនឹងអត្រាថយចុះចំនួន 39.4%។ ការថយចុះនេះចំពេលដែល ខាងផ្នែកគីមីឥន្ធនៈ និងការចម្រាញ់ប្រេងរបស់ក្រុមហ៊ុន មានភាពទន់ខ្សោយខ្លាំងផងដែរ។ នេះបើយោងតាមសារព័ត៌មាន The Nation របស់ថៃ កាលពីថ្ងៃទី14 ខែសីហា។

ក្រុមហ៊ុនបានសន្មតថា ការធ្លាក់ចុះនេះគឺដោយសារតែការខាតបង់យ៉ាងច្រើននៅក្នុងប្រតិបត្តិការគីមីឥន្ធនៈ និងការចម្រាញ់របស់ខ្លួន។ ជាក់ស្ដែង គ្រាន់តែផ្នែកចម្រាញ់តែមួយផ្នែកបានកត់ត្រាការខាតបង់សារពើភ័ណ្ឌចំនួន 7.2 ពាន់លានបាត (ប្រហែលជាង 200លានដុល្លារ) ដែលផ្ទុយពីការកើនឡើងកាលពីឆ្នាំមុន ខណៈដែលប្រាក់ចំណេញគីមីឥន្ធនៈបានរួមតូចកាន់តែខ្លាំង។

ប្រភពដដែលបានឲ្យដឹងទៀតថា ចាប់តាំងពីការកើនឡើងនៃជម្លោះនៅតាមព្រំដែន ការបញ្ជាទិញប្រេងឥន្ធនៈរបស់ក្រុមហ៊ុនក៏បានថយចុះជាបន្តបន្ទាប់ គិតត្រឹមត្រីមាសទី2 នៃឆ្នាំ2025។ ការធ្លាក់បូករួមបន្ថែមកត្តាសំខាន់ៗមួយចំនួនដូចជាចំនួននៃការបញ្ជាទិញថយចុះ និងការផលិតមិនមានទីផ្សារគ្រប់គ្រាន់ដូចពីមុន។

ទោះជាយ៉ាងណាក្រុមហ៊ុន PTT បានបញ្ជាក់ថា ការប្រែប្រួលនេះ គឺជាកត្តារួមផ្សុំមកពីតម្លៃប្រេងពិភពលោកមានការផ្លាស់ប្ដូ តម្រូវការគីមីឥន្ធនៈធ្លាក់ចុះ និងសម្ពាធការចម្រាញ់នៅតែជាហានិភ័យសំខាន់ៗសម្រាប់ឆ្នាំ 2025 ទោះបីជាក្រុមហ៊ុននឹងផ្តោតលើការកែលម្អប្រសិទ្ធភាព និងការធ្វើពិពិធកម្មដើម្បីរុករកបរិយាកាសទីផ្សារមិនច្បាស់លាស់ក៏ដោយ៕

ពូត្រារ៉ាយ៉ា៖ លោកឧត្តមសេនីយ៍ Tan Sri Mohd Nizam Jaffar អគ្គមេបញ្ជាការនៃកងកម្លាំងការពារជាតិម៉ាឡេសុី បានស្នើសុំនាយករដ្ឋមន្រ្តី Datuk Seri Anwar Ibrahim ទំនាក់ទំនងជាផ្លូវការជាមួយនាយករដ្ឋមន្រ្តីនៃប្រទេសកម្ពុជា និង ថៃដើម្បីអនុញ្ញាតឱ្យទាហានម៉ាឡេស៊ីអាចចូលទៅសង្កេតដោយផ្ទាល់ក្នុងតំបន់ជម្លោះរវាងប្រទេសទាំងពីរជាមួយនឹងក្រុមអ្នកសង្កេតការណ៍អាស៊ាន (AOT) ។ នេះបើតាមការចុះផ្សាយរបស់សារព័ត៌មាន BERNAMA។

នៅល្ងាចថ្ងៃទី14 ខែសីហា ឆ្នាំ2025 លោកឧត្តមសេនីយ៍ Tan បាននិយាយថា ក្រុមអ្នកសង្កេតការណ៍អាស៊ាន (AOT) មានតំណាងមកពីរដ្ឋសមាជិកអាស៊ាន ហើយនឹងត្រូវបានដាក់ពង្រាយជាបន្តបន្ទាប់នៅលើមូលដ្ឋាន ដើម្បីធានា និងត្រួតពិនិត្យថាមិនមានការរំលោ.ភលើបទឈប់បាញ់នោះទេ។ លោកថា “នេះគឺជាកិច្ចការដ៏ធ្ងន់មួយ ពីព្រោះព្រំដែនដែលមានប្រវែងប្រហែល 840 គីឡូម៉ែត្រ ដែលយើងត្រូវត្រួតពិនិត្យ។ លោកបញ្ជាក់ថា៖ សម្រាប់កិច្ចការនេះ យើងកំពុងទទួលបានការគាំទ្រផ្នែកដឹកជញ្ជូនពីសហរដ្ឋអាមេរិក”។

លោកបានបន្ថែមទៀតថា៖ បន្ទាប់ពីការបញ្ចប់នៃកិច្ចប្រជុំគណៈកម្មាធិការព្រំដែនទូទៅ (GBC) ភាគីពាក់ព័ន្ធបានព្រមព្រៀងគ្នា ក្រោមកិច្ចព្រមព្រៀងឈប់បា.ញ់ដើម្បីបង្កើតក្រុមសង្កេតការណ៍បណ្តោះអាសន្ន (IOT) ដែលរួមមានអនុព័ន្ធការពារមកពីបណ្តាប្រទេសអាស៊ាន។

គួរជម្រាបថា កាលពីម្សិលមិញថ្ងៃទី 14 ខែសីហា អនុព័ន្ធយោធាម៉ាឡេស៊ីប្រចាំកម្ពុជា លោក Nazlee Bin Abdul Rahim បានដឹកនាំអនុព័ន្ធយោធាបរទេសតំណាង 7 ប្រទេស ចុះធ្វើការត្រួតពិនិត្យដោយផ្ទាល់នៅទីតាំងដែលទាហានឈុតប៉ារាថៃបានរាយបន្លាលួស បិទផ្លូវ និងព័ទ្ធផ្ទះប្រជាពលរដ្ឋដែលស្ថិតក្នុងដែនអធិបតេយ្យកម្ពុជា។

នេះសបញ្ជាក់ឲ្យឃើញពីការយកចិត្តទុកដាក់របស់ថ្នាក់ដឹកនាំប្រទេសម៉ាឡេសុី ក្នុងការជំរុញឲ្យបទឈប់បា.ញ់ និងកិច្ចព្រមព្រៀងរវាងកម្ពុជា.ថៃ មានប្រសិទ្ធភាពតាមរយៈការបញ្ជូនក្រុមសង្កេតការណ៍មកជាបន្តបន្ទាប់ ដោយមានការគាំទ្រពីសហរដ្ឋអាមេរិក៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod នៅថ្ងៃទី១៥ ខែសីហា ឆ្នាំ២០២៥ ឱ្យដឹងថា កងទ័ពថៃម្នាក់ឈរជើងនៅព្រំដែនបានបា.ញ់រះចំនួន១២គ្រាប់ទៅលើពលរដ្ឋបណ្តាលឱ្យរងរបួសធ្ងន់ម្នាក់ និងស្រាលម្នាក់នៅស្រុកកាបឈើង ខេត្តសុរិន្ទ រួចហើយជនល្មើសបានគេចខ្លួនបាត់ស្រមោល ។ពេលនេះ សមត្ថកិច្ច និងកងទ័ពជើងគោកថៃកំពុងតាមចាប់ខ្លួនជនល្មើសមកដាក់ទោសតាមច្បាប់ រីឯមូលហេតុនៃការបា.ញ់រះលើពលរដ្ឋ ពុំទាន់ដឹងនៅឡើយទេ ។

នៅថ្ងៃទី១៥ ខែសីហា នៅទីបញ្ជាការកងទ័ពជើងគោក លោក រីតណា សុខស៊ុវ៉ាណុន អ្នកនាំពាក្យរងកងទ័ពជើងគោកថៃឱ្យដឹងថា នាវេលាអធ្រាត្រថ្ងៃនេះ កងទ័ពបានឮស្នូរកាំភ្លើងចំនួន១០គ្រាប់ នៅផ្លូវក្បែរវត្តភូមិខឿនកែវ ស្រុកកាបឈើង ខេត្តសុរិន្ទ បន្តិចក្រោយមក ក៏ឮស្នូរកាំភ្លើងចំនួន២គ្រាប់ទៀត សរុប១២គ្រាប់ ។

តាមការស៊ើបអង្កេតកម្លាំងកងទ័ព និងអាវុធប្រចាំកាយឃើញថា កងទ័ពម្នាក់មកពីកងទ័ពថ្មើរជើងលេខ១៦២៣ បានដើរចេញពីទីតាំងឈរជើងនៅព្រំដែនដោយគ្មានការអនុញ្ញាត ព្រមទាំងយកកាំភ្លើងតូចវែង និងគ្រាប់កាំភ្លើងមួយចំនួនទៅតាមខ្លួន ។

ហេតុការណ៍បាញ់រះនេះបណ្តាលឱ្យពលរដ្ឋថៃ២នាក់រងរបួស រួមមាន ៖ ១-លោក អនុវ៉ាត់ សីងឆ័យ អាយុ៣២ឆ្នាំ រស់នៅភូមិខឿនកែវ រងរបួសធ្ងន់ពុំដឹងស្មារតី និងត្រូវបានបញ្ជូនទៅសង្គ្រោះនៅមន្ទីរពេទ្យខេត្តសុរិន្ទ និង២-អ្នកស្រី វុទ្ធថាណា ណាប្រាខូន អាយុ៣៥ឆ្នាំ រងរបួសស្រាល ។ ពលរដ្ឋរងរបួសដោយសារគ្រាប់កាំភ្លើងទាំង២នាក់ទទួលបានការសង្គ្រោះបឋម មុនពេលបញ្ជូនទៅមន្ទីរពេទ្យកាបឈើង ។

សមត្ថភាពស៊ើបអង្កេតសហការជាមួយកងទ័ពថ្មើរជើងលេខ១៦២៣ បានចុះត្រួតពិនិត្យនៅកន្លែងកើតហេតុ និងសាកសួរសាក្សី ប៉ុន្តែសមត្ថកិច្ចពុំទាន់ដឹងមូលហេតុបណ្តាលឱ្យមានការបាញ់រះនៅឡើយទេ ។ ក្រោយមក ក៏មានការចាត់កងទ័ពតាមស្វែងរកជនល្មើសនៅជុំវិញកន្លែងកើតហេតុ ប៉ុន្តែរកពុំឃើញ ។

កងទ័ពថៃបានប្រកាសទៅកាន់ពលរដ្ឋនៅក្នុងតំបន់ ប្រសិនបើបានឃើញបុគ្គលគួរឱ្យសង្ស័យ ចូរប្រញាប់រាយការណ៍មកសមត្ថកិច្ចជាបន្ទាន់ ។ បើចាប់ខ្លួនជនល្មើសបាន និងដឹងព័ត៌មានលម្អិតពាក់ព័ន្ធនឹងហេតុការណ៍នេះ សមត្ថកិច្ចនឹងជូនដំណឹងឱ្យបានជ្រាបបន្តទៀត ។

ចៅហ្វាយស្រុកកាបឈើង ខេត្តសុរិន្ទឱ្យដឹងថា កងទ័ពបានប្រើប្រាស់កាំភ្លើងម៉ាក M16 បាញ់រះទៅលើពលរដ្ឋនៅតាមផ្លូវដោយសារតានតឹងផ្លូវចិត្ត ហើយសមត្ថកិច្ចក៏បានប្រាប់ពលរដ្ឋឱ្យសម្ងំលាក់ខ្លួនក្នុងផ្ទះ ហាមចេញក្រៅដាច់ខាតដើម្បីសុវត្ថិភាព ។

ចំណែកសាច់ញាតិរបស់ជនល្មើសជឿថា ហេតុការណ៍បាញ់រះនេះកើតឡើងដោយសារជនល្មើសតានតឹងផ្លូវចិត្តខ្លាំងពេកនឹងការបញ្ជូនឱ្យទៅឈរជើងនៅព្រំដែន ។ ជនល្មើសធ្លាប់បានចូលរួមប្រយុទ្ធនៅបរិវេណប្រាសាទតាក្របី ទើបស្ត្រេសក្លាយជាជំងឺផ្លូវចិត្ត កន្លងមក ជនល្មើសបានទូរស័ព្ទមកប្រាប់សាច់ញាតិថា ចង់ត្រឡប់មកផ្ទះវិញ ៕

ប្រទេសថៃ ៖ នៅថ្ងៃទី១៤ ខែសីហា ឆ្នាំ២០២៥ សារព័ត៌មានថៃរាយការណ៍ថា ក្រសួងការងារថៃបានអនុញ្ញាតឱ្យពលករកម្ពុជាធ្វើការនៅថៃរយៈពេល៦ខែបន្តទៀត ដោយពលករកម្ពុជាពុំចាំបាច់ឆ្លងដែនសម្រាប់បន្តសុពលភាពឯកសារ គឺថៃអនុវត្តតាមគោលការណ៍មនុស្សធម៌ ស្របពេលពលករកម្ពុជាឆ្លងដែនតាមច្រកធម្មជាតិចូលថៃជាបន្តបន្ទាប់ ។ ការពិត ការអនុញ្ញាតឱ្យពលករកម្ពុជាធ្វើការនៅថៃបន្តនេះ ដោយសារថៃខ្វះខាតកម្លាំងពលកម្មយ៉ាងខ្លាំង ។

បើតាមលោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃ គឺរដ្ឋាភិបាលថៃទទួលបានសេចក្តីរាយការណ៍ពីកងទ័ពថា បច្ចុប្បន្ន មានពលករកម្ពុជាមួយចំនួនបានឆ្លងដែនតាមច្រកធម្មជាតិចូលថៃក្នុងតំបន់ជាច្រើន ។ ថ្មីៗនេះ បញ្ជាការដ្ឋានការពារព្រំដែនខេត្តចាន់បុរី និងត្រាត សហការជាមួយសមត្ថកិច្ចអន្តោប្រវេសន៍ រកឃើញពលករកម្ពុជាឆ្លងដែនចូលថៃខុសច្បាប់ ខណៈកន្លងមក កម្ពុជាបានអំពាវនាវឱ្យពលកររបស់ខ្លួនដែលធ្វើការនៅថៃត្រឡប់ទៅប្រទេសវិញ ។ ពលករកម្ពុជាបានឆ្លងដែនចូលថៃតាមច្រកធម្មជាតិផ្សេងៗដើម្បីមកធ្វើការនៅថៃ ហើយត្រូវបានកងទ័ពថៃបង្កើនវិធានការត្រួតពិនិត្យយ៉ាងតឹងរ៉ឹង ។

ខ្លឹមសារក្នុងសេចក្តីប្រកាសចំនួន២ច្បាប់ របស់ក្រសួងមហាផ្ទៃ និងក្រសួងការងារថៃ បានអនុញ្ញាតឱ្យពលករកម្ពុជាដែលរយៈពេលធ្វើការនៅថៃផុតកំណត់ ឬការអនុញ្ញាតស្នាក់នៅថៃផុតកំណត់ ប៉ុន្តែពុំអាចធ្វើដំណើរត្រឡប់មកកម្ពុជា គឺថៃនឹងអនុញ្ញាតឱ្យពលករទាំងនេះអាចធ្វើការនៅថៃរយៈពេល៦ខែបន្តទៀត ដោយអនុវត្តចាប់ពីថ្ងៃទី៧ ខែមិថុនា ឆ្នាំ២០២៥ តទៅ (គិតត្រឡប់ក្រោយ) ។ ថៃអនុវត្តតាមគោលការណ៍មនុស្សធម៌សម្រាប់ពលករកម្ពុជាមានបំណងធ្វើការនៅថៃដោយស្របច្បាប់ ហើយនេះជាការស្នាក់នៅករណីពិសេសតាមសេចក្តីប្រកាសរបស់ក្រសួង ។

ទោះជាមានការបន្ធូរបន្ថយច្បាប់សម្រាប់ពលករបរទេសធ្វើការនៅថៃស្របច្បាប់ក្រោមហេតុផលមនុស្សធម៌ក៏ដោយ ប៉ុន្តែថៃនៅតែផ្តោតសំខាន់លើការការពារសន្តិសុខជាតិ និងអនុវត្តច្បាប់ ។ រដ្ឋាភិបាលថៃនៅតែអនុវត្តជាមួយពលករបរទេសតាមគោលការណ៍មនុស្សធម៌ និងផ្តល់ភាពងាយស្រួលដល់ពលករកម្ពុជាតាមច្បាប់ថៃដើម្បីធ្វើការដោយសុវត្ថិភាព ។ នេះបើតាមការលើកឡើងរបស់លោក ជិរ៉ាយុ ។

គួរបញ្ជាក់ថា ក្រសួងការងារថៃបានអនុញ្ញាតឱ្យពលករកម្ពុជាធ្វើការនៅថៃរយៈពេល៦ខែបន្តទៀតនេះ គឺថៃបារម្ភពីសេដ្ឋកិច្ចរបស់ខ្លួនធ្លាក់ចុះខ្លាំងដោយសារពលករកម្ពុជាសម្រុកចាកចេញពីប្រទេសថៃយ៉ាងច្រើនសន្ធឹកសន្ធាប់ ។ ថៃប្រឈមនឹងការបាត់បង់ចំណូលសេដ្ឋកិច្ចរហូតដល់៣ម៉ឺន២ពាន់លានបាតក្នុង១ខែ (ឬស្មើប្រមាណ ៩៩០លានដុល្លារ) បច្ចុប្បន្ន ក្រសួងការងារថៃព្យាយាមស្វែងរកពលករពីប្រទេសផ្សេងដើម្បីជំនួសពលករកម្ពុជា ដូចជា ៖ បង់ក្លាដែស និងស្រីលង្ការ ៕