អតីតតារាសម្តែងជើងចាស់ សុខ ស្រីមុំ បង្កឱ្យមានភាពចម្រូងចម្រាសយ៉ាងខ្លាំងបន្ទាប់ពីអ្នកស្រីបានប្រើសម្តីប្រមាថអង្គព្រះមហាក្សត្រមិនយាងចុះសួរសុខទុក្ខប្រជារាស្រ្តនិងកងទ័ពជួរមុខ។ សម្តីដែលខ្ជាក់ដោយមិនបានពិចារណានេះបានធ្វើឱ្យអ្នកលេងបណ្តាញសង្គមរិះគន់ចាស់ដៃ ខណៈតារាចម្រៀង អ៊ួង សូរិយា បាននិយាយចំៗទៅកាន់អតីតតារាជើងចាស់រូបនេះ។

កាលពីពេលថ្មីៗនេះអតីតតារាជើងចាស់ សុខ ស្រីមុំ បានបង្ហោះវីដេអូខ្លីមួយប្រើសម្តីមិនសមរម្យនិងប្រមាថយ៉ាងខ្លាំងទៅកាន់អង្គព្រះមហាក្សត្រនិងហ្លូងយាយដែលប្រជានុរាស្រ្តខ្មែរមិនអាចទទួលយកបាននោះទេ។ ការនិយាយដែលមិនបានពិចារណានេះបានធ្វើឱ្យ សុខ ស្រីមុំ រងនូវការវាយប្រហារយ៉ាងចាស់ដៃដូចគ្នាពីប្រជាជនខ្មែរទោះបីជាអ្នកស្រីបានលុបវីដេអូខ្លីប៉ុន្តែក្រដាសមិនអាចខ្ចប់ភ្លើងបាននោះទេ ខណៈឃ្លីបនោះត្រូវបានគេយកចាយចែកបន្តបាត់ទៅហើយ។

រសាត់ខ្លួនទៅរស់នៅស្រុកគេប៉ុន្តែប្រមាថជាតិសាសន៍ឯងនេះ តារាចម្រៀង អ៊ួង សូរិយា ក៏ទប់មិនជាប់ចេញមកព្រលះចាស់ដៃទៅកាន់អតីតតារាជើងចាស់ដែលធ្វើខ្លួនមិនសមទំនងដូចនេះ។ ម្ចាស់បទ «នឹកអូនបានត្រឹមស្រមៃ» បានទៅនៅស្រុកក្រៅ ឡប់សតិអស់ហើយ ឈ្លក់នឹងសញ្ជាតិស្រុកក្រៅ មាក់ងាយស្រុកទេសឯង»។

មិនត្រឹមតែតារាចម្រៀង អួង សូរិយា ប៉ុណ្ណោះទេ ប៉ុន្តែអ្នកលេងបណ្តាញសង្គមផ្សេងទៀតក៏បានរិះគន់ សុខ ស្រីមុំ ដូចគ្នា។

គួរបញ្ជាក់ផងដែរថា បុគ្គលណាក៏ដោយឱ្យតែរកឃើញថាបានប្រមាថព្រះមហាក្សត្រនៃប្រទេសកម្ពុជា នឹងត្រូវទទួលទោស តាមមាត្រា៤៣៧ (ស្ទួន) នៃក្រមព្រហ្មទណ្ឌគឺ
ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ពី ២លាន ទៅ ១០លានរៀល។

អតីតតារាជើងចាស់ សុខ ស្រីមុំ មានអាយុ៥២ឆ្នាំ បានចាកចេញពីមាតុភូមិទៅរស់នៅសហរដ្ឋអាម៉េរិកនៅខែកញ្ញា ឆ្នាំ១៩៩៤។ អ្នកស្រីបានចូលប្រឡូកសិល្បៈភាពយន្តនៅឆ្នាំ១៩៨៩ជាអតីតតារាភាពយន្តដ៏មានកេរ្តិ៍ឈ្មោះបោះសម្លេងក្នុងប្រទេសកម្ពុជា កាលពីចុងទសវត្សរ៍ទី៨០និងទសវត្សរ៍ទី៩០៕

ធ្លាប់រួមអនុសាវរីយ៍ថត MV ជាមួយគ្នា ឧកញ៉ា ព្រាប សុវត្ថិ បានបង្ហាញការខូចចិត្តសោកស្តាយចំពោះដំណឹង ឡាក់គី ដែលចាកចេញពីផែនដីដ៏ស្រស់ស្អាតមានមនុស្សរាប់លាននាក់ស្រលាញ់។ ក្នុងសំណេររបស់តារាចម្រៀងឧកញ៉ា ព្រាប សុវត្ថិ គឺចង់ឱ្យ ឡាក់គឺ កើតមកកំណើតជាមនុស្ស។

នៅថ្ងៃទី២៥ សីហា ឧកញ៉ា ព្រាប សុវត្ថិ បានបង្ហោះវីដេអូខ្លីអមជាមួយនឹងខ្លឹមសារថា«អនុស្សាវរីយ៍ដែលដំរី lucky បានទុកអោយមហាជនខ្មែរទស្សនា និង ស្រណោះ ។ ដោយក្ដីស្រលាញ់យ៉ាងច្រើនលើសលុបលើដំរី lucky ។ សូមឱ្យ lucky កើតមកកំណើតជាមនុស្សបានដឹងបានទទួល ការស្រលាញ់ពីមនុស្សផងទាំងពួង»។

វីដេអូខ្លីនេះបានបង្ហាញពីសកម្មភាពរបស់ ឡាក់គី និង ឧកញ៉ា ព្រាប សុវត្ថិ ថត MV «ដំរីថ្មមស្នេហ៍» កាលពី ២០ឆ្នាំ និងការទៅលេងឡាក់គីរបស់តារាចម្រៀងរូបនេះកាលពីខែមេសា រួមជាមួយនឹងរូបភាពការចាកចេញពីពិភពលោកនេះរបស់ ឡាក់គី។ រដ្ឋបាលព្រៃឈើបានប្រកាសជាសាធារណៈអំពីដំរីញីជាទីស្រឡាញ់ឈ្មោះ«ឡាក់គី» បានស្រុត (ស្លាប់) នៅព្រឹកថ្ងៃអាទិត្យ ទី២៤ ខែសីហា បន្ទាប់ពីធ្លាក់ខ្លួនឈឺភ្លាមៗកាលពីល្ងាចថ្ងៃសុក្រ។ ដំណឹងនេះបានធ្វើឱ្យមហាជនមានការសោកស្តាយជាខ្លាំង។

ឡាក់គី បានរួមសម្តែង MV ជាមួយនឹងតារាចម្រៀង ឧកញ៉ាព្រាប សុវត្ថិ កាលពី១៩ ឆ្នាំមុនក្នុងបទ «ដំរីថ្នមស្នេហ៍ និងបទ «ក្រៅពីអូនមិនយកប្រពន្ធ»។ ឡាក់គី ត្រូវបាននាំយកមកកាន់សួនសត្វភ្នំតាម៉ៅ អំឡុងឆ្នាំ ១៩៩៩ ដែលកាលនោះដំរីតូចមួយក្បាលនេះ មានអាយុប្រមាណត្រឹមតែ ៦ ខែប៉ុណ្ណោះ។ រយៈពេល២៦ឆ្នាំរស់នៅលើផែនដីនេះ ឡាក់គី និងលោក ទ្រី ស៊ីថេង ដែលជាអ្នកមើលថែដំរីនេះជាង២០ឆ្នាំបានធ្វើឱ្យមានការរំជើបរំជួលពេញប្រព័ន្ធអ៊ីនធឺណិតកាលពីចុងខែមិថុនា បន្ទាប់ពី ឡាក់គី រត់តាមលោក ទ្រី ស៊ីថេង៕

បន្ទាប់ពីជម្លោះរបស់ខ្លួនជាមួយនឹង ប៉ីប៉ី ឌី ស្ថិតក្នុងផ្លូវវិជ្ជមាន ទីនីន ស្រាប់តែមានបំណងចង់ឱ្យតារាចម្រៀង ជី ដេវីត និង វណ្ណដា ត្រូវគ្នាវិញព្រោះនេះជាពេលវេលាខ្មែររួបរួមគ្នា។ ការលើកឡើងរបស់ ទីនីន មានមតិជាច្រើនគាំទ្រសូម្បីតែលោក ជា វណ្ណារិទ្ធ ក៏បង្ហាញការយល់ស្របដូចគ្នា។

ភាពមិនចុះសម្រុងរវាងតារាចម្រៀង ជី ដេវីត និង វណ្ណដា ល្បីកក្រើកជាច្រើនឆ្នាំមកហើយខណៈហ្វេនៗរបស់អ្នកទាំងពីរជាញឹកញាប់តែងតែប៉ះគ្នានៅលើបណ្តាញសង្គម។ អ្នកគាំទ្រ បានថមថយការឈ្លោះប្រកែកគ្នាបានមួយអន្លើគឺនៅពេល ជី ដេវីត និង វណ្ណដា បានចាប់ដៃគ្នាក្នុងពិធីមង្គលការរបស់ ជា ស្រីនា និង ហេង វិសាល ក្រោមការជួយជ្រោមជ្រែងរបស់ពិធីការិនី ខៀវ សានសាណា។ ទោះយ៉ាងណា ភាពរកាំរកូសបានចាប់ផ្តើមផ្ទុះកក្រើកឡើងវិញនៅពេលចម្រៀងខ្លីរបស់ វណ្ណដា មិនទាន់ចេញជាផ្លូវការចែកចាយនៅលើបណ្តាញ ខណៈ ជី ដេវីត ចេញចម្រៀង Diss Track ទៅកាន់ វណ្ណដា ចំនួន២បទ។

ទោះបីជាមានភាពរកាំរកូសគ្នាអូសបន្លាយជាច្រើនឆ្នាំប៉ុន្តែនៅពេលប្រទេសខ្មែរនិងថៃមានជម្លោះព្រំដែនអ្នកគាំទ្រគឺពិតជាចង់ឃើញអ្នកទាំងពីរសហការជាមួយគ្នាណាស់។ យ៉ាងណាដ្បិតតែមិនបានចាប់ដៃគ្នាក្តីប៉ុន្តែ វណ្ណដា និង ជី ដេវីត គឺបានប្រើទេពកោសល្យនិងសំឡេងរៀងៗខ្លួនបញ្ជាក់ពីការពិតរបស់ប្រទេសកម្ពុជាដែលរងការឈ្លានពានពីថៃមុនហើយប្រទេសកម្ពុជាគ្មានបំណងអ្វីក្រៅពីចង់បានសន្តិភាពឡើយ។

យ៉ាងណាមិញសំឡេងថ្មីមួយទៀតកំពុងធ្វើឱ្យទស្សនិកជនមានការចាប់អារម្មណ៍គឺនៅពេល ទីនីន ដែលជាមិត្តភក្តិរបស់ វណ្ណដា បានបង្ហោះសំណេរមួយស្របពេលនាងនិងប៉ីប៉ី ឌី ធ្លាប់មានបញ្ហាជាមួយគ្នាតាំងពីឆ្នាំ២០១៧ វិលមកផ្សះផ្សាជានាគ្នាវិញក្នុងរូបភាពវិជ្ជមាន។ កាលពីថ្ងៃទី២៤ សីហា ទីនីន បានបង្ហោះសំណេរមួយថា «បងឌីនិងទីនីន
បើកចិត្តជាមួយគ្នាហើយ ចង់ឃើញបងវីតជាមួយ ដា ម្តង»។ ទីនីន ក៏បានបន្ថែមនៅក្នុងខម្មិនថា «នេះជាពេលវេលាខ្មែររួបរួមគ្នា»។

សំណេរខ្លីខ្លឹមរបស់ ទីនីន បានធ្វើឱ្យមានការចាប់អារម្មណ៍យ៉ាងខ្លាំងពីទស្សនិកជនខណៈមានមតិជាច្រើនបានបង្ហាញការយល់ស្របគឺពួកគេពិតជាចង់ឃើញ តារាចម្រៀងល្បីឈ្មោះទាំងពីររូបត្រូវគ្នាវិញសូម្បីពិធីករល្បីឈ្មោះលោក ជា វណ្ណារិទ្ធ ក៏ចង់ឃើញដូចគ្នា។ ប្រសិនជាជម្លោះរបស់តារាល្បីទាំងពីរដួងនឹងដោះស្រាយគ្នាពិតមែន វានឹងក្លាយជារឿងដ៏ល្អក្នុងអាជីពសិល្បៈនិងជាភាពគំរូរបស់សិល្បករមកកាន់អ្នកគាំទ្រផងដែរ។

មិនត្រឹមតែ ទីនីន និង ប៉ីប៉ី ឌី ដែលជាបុគ្គលមានឥទ្ធិពលអាចដោះស្រាយជម្លោះគ្នាបានប៉ុណ្ណោះទេ ជាក់ស្តែងដូចជាអ្នកនាង ម៉េង កែវពេជ្ជតា និងតារាសម្តែង ចង ច័ន្ទលក្ខិណា ជាដើមដែលមានជម្លោះរុំារៃច្រើនឆ្នាំក៏អាចដោះស្រាយគ្នាប្រកបសន្តិវិធីបានដូចគ្នាក្រោមការជ្រោមជ្រែងពីលោកជំទាវអ្នកឧកញ៉ា ម៉ៅ ចំណាន៕

បន្ទាយមានជ័យ៖ ខណៈពេលដែលប្រជាជននៅខេត្ត-ក្រុងផ្សេងៗមានកន្លែងសម្រាកសមរម្យ គេងលក់ស្កប់ស្កល់ បងប្អូនពលរដ្ឋនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ សុខចិត្តយកកន្ទេល ខ្នើយ អង្រឹង មកដាក់សម្រាកនៅនឹងកន្លែងដែលថៃព័ទ្ធលួស ព្រោះខ្លាចទាហានឈ្លានពានទាំងនោះរើទីតាំងរុលមកមុខបន្ថែម។

នារសៀលថ្ងៃទី២៥ ខែសីហា ឆ្នាំ២០២៥ ការតវ៉ាដ៏ក្ដៅគគុកមួយបានកើតឡើងរវាងប្រជាជនសុីវិលខ្មែរដែលរស់នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ និងទាហានថៃប្រដាប់ដោយអាវុ.ធគ្រប់ដៃ ដែលចុះធ្វើសកម្មភាពរាយបន្លាលួសទន្រ្ទានយកដីភូមិ ដីផ្លូវ និងដីចម្ការរបស់ពលរដ្ឋខ្មែរ។ ក្រោយអស់ការអត់ធ្មត់ ពលរដ្ឋខ្មែរដែលនៅទីនោះក៏ប្រមូលគ្នាកាន់ដំបងម្នាក់មួយៗ ឡើងទៅតទល់ផ្ទាល់ជាមួយទាហានថៃទាំងនោះតែម្ដង។

បើតាមប្រភពពលរដ្ឋដែលបានចូលរួមក្នុងសកម្មភាពតវ៉ាជាមួយទាហានឈ្លានពានថៃខាងលើបានឲ្យដឹងថា៖ ពួកគាត់ពិតជាឈឺចាប់ខ្លាំងណាស់ ដែលទាហានឈ្លានពានថៃទាំងនោះនៅតែរុករុលរាយបន្លាលួសតាមតែទំនើងចិត្តរបស់ពួកគេបែបនេះ។ ជាមួយគ្នានេះ ពលរដ្ឋស្នើសុំឲ្យរដ្ឋាភិបាល រួមទាំងក្រសួងការពារជាតិ សូមចាត់វិធានណាមួយជាបន្ទាន់ផងសម្រាប់ពួកគាត់ផង ព្រោះខណៈពេលនេះពួកគាត់ព្យាយាមតវ៉ាជាមួយពួកគេអស់លទ្ធភាពហើយ។

នៅល្ងាចថ្ងៃដដែលនោះ អ្នកនាំពាក្យក្រសួងការពារជាតិកម្ពុជា លោកស្រីម៉ាលី សុជាតា បានបញ្ជាក់នៅក្នុងសេចក្ដីជូនដំណឹងបន្ទាន់មួយថា កម្ពុជាស្នើឱ្យភាគីថៃគោរពឱ្យបានពេញលេញ និងខ្ជាប់ខ្ជួននូវបទឈប់បាញ់ និងជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី៥របស់កម្ពុជា និងកងទ័ពភូមិភាគទី១របស់ថៃ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និងជៀសវាងទង្វើដែលនាំទៅដល់ការកើនឡើងនៃភាពតានតឹង។ កម្ពុជាបញ្ជាក់ថា រាល់ទំនាស់ពាក់ព័ន្ធនឹងបញ្ហាព្រំដែនត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតីនៃអនុស្សរណៈនៃការយោគយល់ឆ្នាំ២០០០ (MOU 2000)។

ទោះជាយ៉ាងណា ដោយមើលឃើញស្ថានការណ៍មិនគួរឲ្យទុកចិត្ត ប្រជាពលរដ្ឋខ្មែរដែលរស់នៅតំបន់កំពុងមានវិវាទខ្លាំងខាងលើនេះ បានមូលមតិគ្នាបោះទីតាំងសម្រាកជុំគ្នានៅនឹងកន្លែងនោះផ្ទាល់តែម្ដង។ ពួកគាត់បានបញ្ជាក់ថា ការធ្វើបែបនេះគឺដើម្បីឆ្លាស់វេនរង់ចាំឃ្លាំមើល ក្រែងកងទ័ពថៃលួចរាយលួសបន្លាឈ្លានពានចូលទឹកដីកម្ពុជាបន្ដទៀត៕

បន្ទាប់ពីតារាចម្រៀង មាស សុខសោភា បាននិយាយលាតត្រដាងចោ.ទទៅកាន់អតីតស្វាមីលួចផិតក្បត់មានស្រី សឹងតែចង់សម្លាប់ខ្លួន ខំច្រៀងរហូតដល់រលូតកូននិងរឿងផ្សេងៗទៀតបានធ្វើឱ្យមនុស្សជាច្រើនភ្ញាក់ផ្អើល។ តារាចម្រៀង ពេជ្រ សោភា រ៉ូលីន រួមទាំង វ៉ាន់ នីឡា បានបញ្ចេញមតិផ្ទាល់ខ្លួននិងចង់ឱ្យទស្សនិកជនដោះលែងតារាចម្រៀង មាស សុខសោភា មានសេចក្តីសុខជាមួយនឹងដៃគូថ្មី។

តារាចម្រៀង មាស សុខសោភា បានចែករំលែកបន្តខ្លឹមសាររបស់មិត្តសម្លាញ់ដោយអមដោយសម្តីថា «ផ្លូវចិត្តសំខាន់ណាស់ ប្រពន្ធយើងគាត់ល្បី អ្នកជាប្តីមុនធ្វើអ្វីត្រូវគិតពីមុខមាត់គាត់ផង មើលសារនេះហើយមានអារម្មណ៏ថាលែងចង់បានប្តី»។ ងាកមកកាន់ រ៉ូលីន វិញគឺចង់ឱ្យទស្សនិកជនដោះលែង មាស សុខសោភា ឈប់ជេរគាត់ទៀត។

រ៉ូលីន បន្តទៀតថា «សេចក្តីសុខផ្លូវចិត្តរបស់យើង មានតែយើងទេ ទើបយល់ច្បាស់ ! បងប្អូនសាកស្រមៃមើលថាបើគេបញ្ជាឱ្យបងប្អូនធ្វើនេះធ្វើនោះខុសពីចិត្ត តើយើងធ្វើទេ ចម្លើយគឺអត់ បើធ្វើក៏ធ្វើទាំងទើសទាល់ដែរ។ រ៉ូលីន សុំចិត្តឱ្យដោះលែង មាស សុខសោភា ឈប់ជេរ ឈប់មុសារ បើមិនពេញចិត្តគាត់ក៏អូសចោលទៅ បើចូលចិត្តស្តាប់បទគាត់ក៏នៅតែបន្តស្តាប់ទៅ កុំនាំបាបជាប់ខ្លួន»។

រ៉ូលីន ថាខ្លួនលោកក៏ធ្លាប់ជាមនុស្សម្នាក់ដែលរងសម្ពាធផ្លូវចិត្តដែរ ហើយខិតខំរកអ្វីដើម្បីមកជួយជុលផ្លូវចិត្តរបស់ខ្លួនដោយមិនឱ្យប៉ះពាល់ដល់អ្នកដទៃ អ្នកខ្លះស្តាប់ធម៌ អ្នកខ្លះចូលក្លឹបផឹកស៊ី អ្នកខ្លះរកមិត្តមកនិយាយរឿងក្នុងមានជម្រើសរៀងៗខ្លួនដើម្បីបំបាត់ទុក្ខផ្លូវចិត្ត។ រ៉ូលីន បានបញ្ជាក់ដែរថានេះគ្រាន់តែគំនិតបន្តិចបន្តួចរបស់ខ្លួនលោកប៉ុណ្ណោះហើយលោកនៅតែគោរពស្រលាញ់រៀមច្បង មាស សុខសោភា ដដែល។

ចំណែកឯតារាចម្រៀង វ៉ាន់ នីឡា វិញបានបង្ហោះរូបមួយសន្លឹកជាមួយនឹងរៀមច្បង មាស សុខសោភា ដោយបានរៀបរាប់ពីអារម្មណ៍របស់ខ្លួនយ៉ាងស៊ីជម្រៅ។ វ៉ាន់ នីឡា បានលើកឡើងថា «ខ្ញុំមិនដែលវាយតម្លៃ គាត់សូម្បីម្តងចាប់តាំងពីគាត់មានបញ្ហាមក ត្រូវចាំថា អ្នកសិល្បៈ អ្នកមានអ្នកក្រអ្នកល្បីកម្រិតណា រឿងផ្ទៃក្នុងរឿងផ្ទាល់ខ្លួនគឺមានគ្រប់គ្នា សំឡេងគាត់ច្រៀងឱ្យយើងស្តាប់ជាសាធារណៈតែជីវិតឯកជនរបស់គាត់មិនអាចបង្ហាញជាសាធារណៈឱ្យយើងដឹងពី១ដល់១០បានទេ»។

តារាចម្រៀងរូបនេះ រៀបរាប់បន្តថា «បែកគ្នាវាឈឺចាប់ណាស់ម្នាក់ៗទម្រាំសម្រេចចិត្តឈានដល់វគ្គបញ្ចប់គឺហែលទឹកភ្នែកវេទនាខ្លោចផ្សាដែលអ្នកដទៃមិនអាចឃើញ។ ឱ្យគាត់ស្វែងរកសេចក្តីសុខពិតរបស់គាត់ទៅ ជីវិតយើងមានមួយជីវិតគាត់មានមួយដូចគ្នា យើងចង់សុខគាត់ចង់សុខ សេចក្តីស្រលាញ់មិនមែនសំខាន់លើភាពស័ក្តិសម តែសំខាន់លើបេះដូង ខួរក្បាលនឹងចិត្តមានក្តីសុខនៅទីណា គឺទីនោះហើយដែលគាត់គិតថាជាទីសុវត្ថិភាពរបស់គាត់ជូនពរបងភា ឱ្យឆ្លងផុតនៅរាល់ទុក្ខសោកនិងឧបសគ្គទាំងឡាយ»។

គួរបញ្ជាក់ផងដែរថា តារាចម្រៀង មាស សុខសោភា គឺបានទទួលស្គាល់ជាសាធារណៈថាបុគ្គល វង្ស ចក្រាយុទ្ធ ហៅតាសក់សភ្នំត្បែង គឺជាស្វាមីរបស់ខ្លួន៕