បវរកញ្ញា កុយ អេនណា បានចេញវីដេអូមួយដើម្បីបង្ហាញភាពស្មោះត្រង់ជូនចំពោះទស្សនិកជននិងសប្បុរសជននានាដែលបានចូលបរិច្ចាគថវិកាក្នុងយុទ្ធនាការរបស់ខ្លួនដោយបញ្ជាក់ពីចំនួនទឹកប្រាក់ដែលទទួលបាន។ ជាមួយនឹងការបង្ហាញពីតួលេខទឹកប្រាក់ អេនណា បានរៀបរាប់ពីអ្វីដែលខ្លួនជួបប្រទះក្នុងអំឡុងពេលដើរ១៦ថ្ងៃនិងបានទម្លាយថាពេលដើរបាន៥ថ្ងៃនាងចង់សម្រាក។
កាលពីល្ងាចថ្ងៃទី១៥ ខែតុលា កុយ អេនណា បានបង្ហាញថាដំណើរថ្មើរជើងរបស់នាងពីរាជធានីភ្នំពេញទៅកាន់ខេត្តសៀមរាបនាងទទួលបាន ១២៤ ៦១៦ដុល្លារ។ ក្នុងបេកសកម្មដែលមានទិសដៅច្បាស់លាស់ដើម្បីជួយជនពិការ កុមារ និងដើម្បីផ្សព្វផ្សាយតំបន់ទេសចរណ៍ កុយ អេនណា បានបង្ហាញថានាងមានអារម្មណ៍រំភើបរីករាយក្រៃលែងហើយនេះជារឿងមួយដ៏ធំក្នុងឆាកជីវិតរបស់នាង។ បវរកញ្ញាដ៏ស្រស់ស្អាតរូបនេះបានឱ្យដឹងទៀតថា នាងមិននឹកស្មានថាទទួលបានការគាំទ្រពីប្រជាពលរដ្ឋច្រើនយ៉ាងនេះនោះទេ ហើយអ្វីដែលលើសពីការរំពឹងទុកនោះគឺចំនួនថវិកាពីសប្បុរសជនដែលទទួលបានច្រើនយ៉ាងខ្លាំងដូចនេះ។
ជាមួយនឹងដំណើរថ្មើរជើងរបស់ខ្លួនដែលបញ្ចប់ទៅដោយភាពជោគជ័យ កុយ អេនណា បានបង្ហាញពីបញ្ហាធំបំផុតរបស់ខ្លួនគឺជើងរបស់នាងដែលត្រូវការដើរក្នុងមួយថ្ងៃៗគឺច្រើនគីឡូជាហេតុធ្វើឱ្យប៉ះពាល់ជើងនាងខ្លាំង។ អេនណា បានទម្លាយទៀតថា បន្ទាប់ពីនាងដើរបានចំនួន៥ថ្ងៃគឺនាងគិតនឹងចង់សម្រាកមួយថ្ងៃព្រោះតែការឈឺជើងខ្លាំងពេកនាងទ្រាំមិនបាន ខណៈដែលនាងជាមនុស្សដែលពូកែទ្រាំខ្លាំង។ ទោះបីជាមានចិត្តចង់សម្រាក អេនណា ថាមានចិត្តមួយទៀតជំរុញឱ្យនាងបន្តការដើរទៀតដោយដាក់គោលដៅថាដើរបានប៉ុណ្ណាយកប៉ុណ្ណឹង ជាពិសេសគឺទទួលបានការលើកទឹកចិត្តច្រើនពីប្រជាពលរដ្ឋនៅតាមដងផ្លូវ។ អ្វីដែលធ្វើឱ្យនាងខ្លាចមួយទៀត កុយ អេនណា បានបង្ហាញថាគឺជាសត្វឆ្កែគឺនាងខ្លាចខ្លាំងមែនទែន។
មុននឹងបញ្ចប់វីដេអូ កុយ អេនណា បាននិយាយថាអ្នកដែលចង់ធ្វើដំណើរថ្មើរជើងគឺត្រូវតែមានគោលបំណងត្រឹមត្រូវ គោលដៅច្បាស់លាស់ ចង់ជួយទៅលើអ្វី និងការតាំងចិត្តឱ្យបានខ្ពស់៕
