លោក Trump អាចនឹងបើកភ្លើងខៀវឱ្យអ៊ីស្រាអែលវាយប្រ.ហារម្តងទៀត បើក្រុមហាម៉ាស់មិនគោរពបទឈប់បា.ញ់

សហរដ្ឋអាមេរិក ៖ ចំណាប់ខ្មាំងអ៊ីស្រាអែលនៅរស់រានមានជីវិតត្រូវបានដោះលែងដំណាក់កាលដំបូងតាមផែនការសន្តិភាពរបស់ប្រធានាធិបតីអាមេរិក លោក Donald Trump ព្រមទាំងមានការដោះលែងអ្នកទោសប៉ាឡេស្ទីន ។ ជោគជ័យនេះក្លាយជាលទ្ធផលការងារដ៏សំខាន់នៃការកាន់តំណែងរបស់ប្រធានាធិបតីអាមេរិក និងការផ្លាស់ប្តូរយុទ្ធសាស្ត្រនៅមជ្ឈិមបូព៌ា ប៉ុន្តែក្រុមហាម៉ាស់ពុំទាន់ប្រគល់សា.កសពចំណាប់ខ្មាំងអ៊ីស្រាអែលគ្រប់ចំនួននៅឡើយទេ និងអះអាងថា រកពុំឃើញសា.កសពចំណាប់ខ្មាំងផ្សេងទៀត ដែលអ៊ីស្រាអែលចាត់ទុកមិនគោរពបទឈប់បា.ញ់ ។

ប្រធានាធិបតីអាមេរិក លោក Trump ថ្លែងថា នឹងបើកភ្លើងខៀវឱ្យកងទ័ពអ៊ីស្រាអែលវាយប្រ.ហារម្តងទៀត បើក្រុមហាម៉ាស់មិនគោរពតាមកិច្ចព្រមព្រៀងបទឈប់បា.ញ់ ក្រោយពីក្រុមហាម៉ាស់ពុំអាចប្រគល់សាកសពចំណាប់ខ្មាំងអ៊ីស្រាអែលគ្រប់ចំនួន ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១៥ ខែតុលា ឆ្នាំ២០២៥ ។

កាលពីថ្ងៃទី១៥ ខែតុលា លោក Trump ប្រធានាធិបតីអាមេរិកថ្លែងថា លោកបានពិចារណាសម្រេចឱ្យអ៊ីស្រាអែលធ្វើប្រតិបត្តិការកងទ័ពនៅតំបន់កាហ្សាម្តងទៀត បើក្រុមហាម៉ាស់បដិសេធមិនអនុវត្តតាមកិច្ចព្រមព្រៀងឈប់បាញ់ ។ ការថ្លែងបែបនេះ ក្រោយពីក្រុមប្រដាប់អាវុធហាម៉ាស់មិនអាចប្រគល់សាកសពចំណាប់ខ្មាំងអ៊ីស្រាអែលគ្រប់ចំនួន ។

មុននេះ ក្រុមហាម៉ាស់បានបញ្ជូនសាកសពចំណាប់ខ្មាំងអ៊ីស្រាអែល២នាក់មកឱ្យមន្ត្រីកាកបាទក្រហម ដើម្បីបញ្ជូនទៅឱ្យកងកម្លាំងការពារអ៊ីស្រាអែល (IDF) ។ បច្ចុប្បន្ន អ៊ីស្រាអែលបានយកសាកសពចំណាប់ខ្មាំងទាំង២នាក់ទៅបញ្ជាក់អត្តសញ្ញាណ ប៉ុន្តែក្រុមហាម៉ាស់ប្រាប់ថា ពួកគេមិនអាចស្វែងរក និងនាំសាកសពចំណាប់ខ្មាំងនៅសេសសល់ទេ បើគ្មានឧបករណ៍ពិសេស ។ ក្រុមហាម៉ាស់និយាយតែប៉ុណ្ណឹង និងមិនបាននិយាយលម្អិតបន្ថែមទៀត ។

លោក Trump បានផ្តល់សម្ភាសន៍ជាមួយសារព័ត៌មាន CNN ថា ៖ «កងទ័ពអ៊ីស្រាអែលអាចវាយប្រហារនៅតំបន់កាហ្សាឡើងវិញ បើខ្ញុំអនុញ្ញាត ប៉ុន្តែខ្ញុំត្រូវទប់ស្កាត់កងកម្លាំងការពារអ៊ីស្រាអែល (IDF) និងរដ្ឋាភិបាលរបស់លោកនាយករដ្ឋមន្ត្រីអ៊ីស្រាអែល Beniamin Netanyahu ។ ខ្ញុំបាននិយាយជាមួយនាយករដ្ឋមន្ត្រីអ៊ីស្រាអែលយ៉ាងច្បាស់ពីបញ្ហានេះ គឺនឹងដោះស្រាយបញ្ហាក្រុមហាម៉ាស់យ៉ាងឆាប់រហ័ស» ។

ក្រុមហាម៉ាស់ត្រូវតែបញ្ជូនសាកសពចំណាប់ខ្មាំងអ៊ីស្រាអែលសរុបចំនួន២៨នាក់ទៅឱ្យអ៊ីស្រាអែល តាមកិច្ចព្រមព្រៀងឈប់បាញ់នៅតំបន់កាហ្សាដំណាក់កាលដំបូង ។ ពេលនេះ ពួកគេបានបញ្ជូនសាកសពចំណាប់ខ្មាំងអ៊ីស្រាអែលចំនួន៨នាក់ រួមទាំងចំណាប់ខ្មាំងនៅមានជីវិត២នាក់ ។

តាមការបញ្ជាក់របស់អ៊ីស្រាអែលកាលពីថ្ងៃទី១៥ ខែតុលា គឺសាកសពម្នាក់ដែលក្រុមហាម៉ាស់បញ្ជូនមកនោះ មិនមែនជាសាកសពចំណាប់ខ្មាំងអ៊ីស្រាអែលទេ ។ ការបញ្ជូនខុសសាកសពធ្វើឱ្យមានភាពតានតឹងរវាងអ៊ីស្រាអែល និងក្រុមហាម៉ាស់ ហើយអ៊ីស្រាអែលថា នឹងគ្មានការផ្សះផ្សារជាមួយក្រុមហាម៉ាស់ក្នុងការបញ្ជូនសាកសពចំណាប់ខ្មាំង ៕