(ភ្នំពេញ)៖ ក្រោយពេលថៃអះអាងថាខ្លួនបានរកឃើញទូរស័ព្ទដៃរបស់ទាហានខ្មែរដែលលាក់នៅក្នុងគន្លាតថ្ម ពេលចូលទៅបង្កប់មីនក្នុងទឹកដីថៃ លោក ម៉ៃឃើល ប៊ីអាល់ហ្វារ៉ូ (Michael B Alfaro) បង្ហាញការហួសចិត្តជាខ្លាំង ដោយចង់ហៅលោក អុីឡុន ម៉ាសក៍ មកវិនិយោគនៅកម្ពុជា ព្រោះកម្ពុជាអាចផលិតទូរស័ព្ទដែលអាចត្រូវភ្លៀងត្រូវខ្យល់ ទុកចោលអស់ជាច្រើនថ្ងៃបានដោយមិនជ្រាបទឹកខូច និងមិនអស់ថ្ម។

នៅយប់ថ្ងៃទី១៩ ខែសីហា ឆ្នាំ២០២៥ សារព័ត៌មានរបស់ថៃបានចុះផ្សាយព្រោងព្រាតថាកងទ័ពភូមិន្ទថៃ បានរកឃើញទូរស័ព្ទមួយគ្រឿងដែលជារបស់ទាហានខ្មែរបានលាក់ទុកនៅគន្លាតថ្មហើយភ្លេច ពេលចូលមកបង្កប់មីននៅក្នុងទឹកដីថៃ។ ក្រោយការរកឃើញ កងទ័ពថៃបានឆែកមើលក្នុងទូរស័ព្ទនោះដោយបានប្រទះឃើញរូបថត និងវីដេអូសកម្មភាពដាក់បង្កប់មីនរបស់ទាហានខ្មែរដែលបានថតទុកនៅក្នុងនោះ ហើយកងទ័ពថៃបានអះអាងថា ទាំងនេះគឺជាភស្តុតាងដ៏ច្បាស់លាស់បំផុតថាកម្ពុជាពិតជាបានលួ.ចដាក់គ្រាប់មីននៅក្នុងទឹកដីថៃពិតមែន។

បន្ទាប់ពីការប្រកាសរបស់ថៃបែបនេះ មានអ្នកវិភាគជាច្រើនបានលើកឡើងថាវាគ្រាន់តែជាការសម្ដែងរបស់ថៃ ដើម្បីចោ.ទប្រកាន់ និងបង្ខូចឈ្មោះកម្ពុជានៅចំពោះមុខអន្តរជាតិតែប៉ុណ្ណោះ។ បើតាមផេកជនបរទេសម្នាក់ដែលមានឈ្មោះថា Kevin Smith KH បានបង្ហោះវីដេអូមួយដោយរៀបរាប់ថា វាមានចំណុចជាច្រើនដែលមិនសមហេតុផលទាល់តែសោះ ក្នុងការឲ្យជឿថាទូរស័ព្ទនេះគឺជារបស់ទាហានកម្ពុជា។

ចំណុចធំៗដែលគេយល់ថានេះជាការសម្ដែងរបស់ថៃរួមមាន៖ ១. តើអ្នកណាទុកទូរស័ព្ទចោលជាមួយនឹងខ្សែសាកដូចនេះ? ២. តើអ្នកណាទៅល្ងង់ដល់ថ្នាក់ថតសកម្មភាពខុសច្បាប់របស់ខ្លួនទុកក្នុងទូរស័ព្ទធ្វើអ្វី? ៣. បើមើលទៅ ទូរស័ព្ទនេះទំនងជាទុកចោលច្រើនថ្ងៃហើយ តែហេតុអ្វីបានជាវាមិនត្រូវភ្លៀងជ្រាបទឹកខូច និងមិនអស់ថ្មបែបនេះ?

ទន្ទឹមនឹងការបង្ហោះវិដេអូរបស់ Kevin Smith KH លោក Michael B Alfaro ដែលទើបចាក់ចេញពីប្រទេសកម្ពុជាទៅដល់សហរដ្ឋអាមេរិកនោះ បានចែករំលែកបន្តនិងសរសេសំណេរខ្លីមួយបែបហួសចិត្តថា៖ តើអ្នកគិតថាកម្ពុជាអាចផលិតទូរសព្ទមិនជ្រាបទឹក ជាមួយនឹងថ្មកាន់ដែលទុកចោលយូរហើយមិនចេះអស់ដូចនេះឬ? អ្នកណាក៏បានដែរ សូមប្រាប់ លោក Elon Musk ឱ្យទាក់ទងមកកម្ពុជាផង។

ក្រៅពីលោក Alfaro ប្រជាជនខ្មែរគ្រប់រូបដែលបានឃើញព័ត៌មាននេះ ក៏មានការហួសចិត្តមិនស្ទើរនោះដែរ ដ្បិតថៃមិនត្រឹមតែចូលចិត្តផលិតភាពយន្តដែលមានល្បិចពិសពុលប៉ុណ្ណោះទេ ប៉ុន្តែសូម្បីថ្នាក់ដឹកនាំរដ្ឋាភិបាល អ្នកសារព័ត៌មាន និងប្រជាជនថៃមួយចំនួនក៏ចូលចិត្តសម្ដែងផងដែរ៕

ប្រទេសថៃ ៖ នៅថ្ងៃទី២០ ខែសីហា ឆ្នាំ២០២៥ សារព័ត៌មានថៃ The Better News រាយការណ៍ថា ស្តេចថៃត្រៀមប្រគល់មេដាយលើកទឹកចិត្តដល់កងទ័ព ទាហានឈុតខ្មៅ និងសមត្ថកិច្ចនៅព្រំដែនកម្ពុជា-ថៃដែលបានបំពេញភារកិច្ចលេចធ្លោ ព្រមទាំងប្រគល់មេដាយទៅឱ្យអង្គភាពផងដែរ នាដើមខែកញ្ញាខាងមុខ ។ ស្តេចថៃបានតាមដានស្ថានការណ៍ព្រំដែនយ៉ាងដិតដល់ និងតែងតែផ្តល់ជំនួយឱ្យកងទ័ពជាបន្តបន្ទាប់ ។

លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិនិយាយថា កន្លងមក ស្តេចថៃ និងមហេសី បានតាមដានស្ថានការណ៍ព្រំដែនយ៉ាងដិតដល់ ហើយព្រះអង្គបានផ្តល់ជំនួយជាបន្តបន្ទាប់ដល់កងទ័ព ទាហានឈុតខ្មៅ និងសមត្ថកិច្ចនៅព្រំដែនកម្ពុជា-ថៃ ដើម្បីជាការលើកទឹកចិត្តឱ្យប្រឹងប្រែងបំពេញភារកិច្ច ។ ការប្រគល់មេដាយនេះចែកចេញជា២ផ្នែក គឺមេដាយសម្រាប់បុគ្គលលេចធ្លោ និងមេដាយសម្រាប់អង្គភាព ។

ថ្មីៗនេះ អនុលេខាព្រះបរមរាជវាំងថៃបានទំនាក់ទំនងមកក្រសួងការពារជាតិ និងទំនាក់ទំនងមកលោក ណាត់ថាផុង ដោយប្រាប់ថា ស្តេចថៃបារម្ភពីស្ថានការណ៍ព្រំដែនកម្ពុជា-ថៃ និងបញ្ជាឱ្យក្រសួងការពារជាតិពន្លឿនការប្រគល់មេដាយលើកទឹកចិត្តដល់កងទ័ព ទាហានឈុតខ្មៅ និងសមត្ថកិច្ចនៅព្រំដែន ។ រីឯកងទ័ពថៃនៅព្រំដែនខេត្តភាគខាងត្បូងចំនួន៣ នឹងទទួលបានមេដាយពីស្តេចដូចគ្នាដែរ ។

បច្ចុប្បន្ន ក្រសួងការពារជាតិថៃកំពុងពិចារណាឱ្យបានគ្រប់ជ្រុងជ្រោយពីការប្រគល់មេដាយនេះដើម្បីកុំឱ្យមានបញ្ហាកើតឡើង បើទោះជាស្តេចថៃបញ្ជាឱ្យប្រញាប់ចាត់វិធានការក្តី ។ ក្រសួងការពារជាតិសង្ឃឹមថា ការប្រគល់មេដាយដល់កងទ័ព ទាហានឈុតខ្មៅ និងសមត្ថកិច្ចនៅព្រំដែនកម្ពុជា-ថៃ នឹងធ្វើឡើងនាដើមខែកញ្ញាខាងមុខ ។

កាលពីថ្ងៃទី១៩ ខែសីហា កន្លងមក មេបញ្ជាការយោធភូមិភាគ២ លោក ប៊ុនស៊ីន ផាកក្លាង ក៏បាននិយាយដូចគ្នាដែរថា ស្តេចថៃព្រួយបារម្ភពីកងទ័ពគ្រប់រូបដែលរងផលប៉ះពាល់ដោយសារការប៉ះទង្គិចនៅព្រំដែនកម្ពុជា-ថៃ ហើយព្រះអង្គបានផ្តល់ជំនួយដល់កងទ័ពរងរបួសទាំងអស់ ។

គួរបញ្ជាក់ថា កាលពីថ្ងៃទី២៥ ខែកក្កដា ស្តេចថៃបានប្រកាសឱ្យកងទ័ពប្រើប្រាស់ច្បាប់អាជ្ញាសឹកនៅខេត្តចាន់បុរី និងត្រាត ជាប់ដែនសមុទ្រកម្ពុជា ដើម្បីផ្តល់អំណាចឱ្យកងទ័ពបញ្ជាទ័ពក្នុងកម្រិតថ្នាក់ជាតិ ។ ការប្រើប្រាស់ច្បាប់អាជ្ញាសឹកនេះមានន័យថា ថៃត្រូវតែប្រើប្រាស់កម្លាំងកងទ័ព សមត្ថកិច្ច និងពលរដ្ឋគ្រប់រូបរួមគ្នាការពារទឹកដី ៕

ប្រទេសថៃ ៖ សារព័ត៌មានថៃ Matichon បានរាយការណ៍នៅថ្ងៃទី២០ ខែសីហា ឆ្នាំ២០២៥ ថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបានបដិសេធជាមួយលោក Anwar Ibrahim នាយករដ្ឋមន្ត្រីម៉ាឡេស៊ី ដែលស្នើសុំថៃបន្ថែមក្រុមសង្កេតការណ៍នៅព្រំដែនកម្ពុជា-ថៃ ដោយសារមានភារកិច្ចច្រើនត្រូវបំពេញ ហើយនាយករដ្ឋមន្ត្រីស្តីទីថៃសុំដោះស្រាយបញ្ហាជម្លោះជាមួយកម្ពុជាត្រឹមទ្វេភាគី ។

នៅថ្ងៃទី២០ ខែសីហា នៅទីបញ្ជាការភូមិភាគ៥ ខេត្តឈៀងម៉ៃ លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានផ្តល់សម្ភាសន៍ជាមួយសារព័ត៌មានអំពីបញ្ហាព្រំដែនកម្ពុជា-ថៃ ដោយលោកនិយាយថា កាលពីថ្ងៃទី១៩ ខែសីហា លោក Anwar Ibrahim នាយករដ្ឋមន្ត្រីម៉ាឡេស៊ីបានទូរស័ព្ទមកជជែកជាមួយលោក ដើម្បីស្នើសុំបញ្ជូនក្រុមសង្កេតការណ៍មកព្រំដែនកម្ពុជា-ថៃបន្ថែមទៀតដោយសារមានភារកិច្ចច្រើនត្រូវបំពែញ ប៉ុន្តែលោកបដិសេធជាមួយម៉ាឡេស៊ី ។

លោក ភូមិថាំ បន្តថា លោកពុំឱ្យម៉ាឡេស៊ីលូកដៃទេ ពីព្រោះវាជារឿងផ្ទៃក្នុង លោកសុំដោះស្រាយបញ្ហាជាមួយកម្ពុជាត្រឹមទ្វេភាគី និងសុំដំណើរការតាមក្របខ័ណ្ឌកិច្ចប្រជុំគណៈកម្មាធិការកិច្ចការព្រំដែនទូទៅ (GBC) ជាមុនសិន បន្ទាប់ពីកិច្ចប្រជុំ GBC នៅថ្ងៃទី១០ ខែកញ្ញា រួចរាល់ បើមានបញ្ហាអ្វីពិភាក្សាបន្ថែម ចាំពិភាក្សាគ្នាពេលក្រោយ ។ ម៉ាឡេស៊ីសុំបន្ថែមក្រុមសង្កេតការណ៍នៅព្រំដែន លោកបានបដិសេធ គឺថៃនឹងទទួលយកតែមន្ត្រីស្ថានទូត និងអនុព័ន្ធយោធាអាស៊ាន ហើយសង្ឃឹមថា អន្តរជាតិនឹងយល់ពីទង្វើរបស់ថៃ ។

អ្វីដែលថៃប្រុងប្រយ័ត្នបំផុត គឺព្យាយាមចៀសវាងសង្គ្រាម និងប្រកាន់គោលជំហរច្បាស់លាស់ ។ លោក ភូមិថាំ អះអាងថា សហគមន៍អន្តរជាតិកាន់ជើងប្រទេសរបស់ខ្លួន ទើបថៃពុំប្រើប្រាស់អំពើហិង្សា ពីព្រោះបើមានអំពើហិង្សាកើតឡើងនឹងធ្វើឱ្យកងទ័ពរងរបួស ខណៈក្រសួងការបរទេសថៃ ក៏បានបញ្ជាក់ពីគោលជំហររបស់ថៃច្បាស់លាស់ទៅកាន់អន្តរជាតិរួចហើយដែរ ។

រដ្ឋាភិបាលថៃតែងតែបដិសេធពុំដោះស្រាយបញ្ហានៅតុលាការយុត្តិធម៌អន្តរជាតិ (ICJ) ហើយបដិសេធពុំឱ្យប្រទេសណាមួយជួយដោះស្រាយបញ្ហាជម្លោះព្រំដែនជាមួយកម្ពុជា បើស្អាតស្អំពិតមែន ហេតុអ្វីថៃខ្លាចតុលាការ ICJ ហេតុអ្វីថៃខ្លាចការអន្តរាគមន៍របស់អន្តរជាតិ? ថៃនិយាយដដែលៗថា នឹងដោះស្រាយជម្លោះជាមួយកម្ពុជាដោយសន្តិវិធី ចរចាទ្វេភាគី និងចង់បញ្ចប់សង្គ្រាមជាមួយកម្ពុជា ។

រដ្ឋាភិបាលថៃពុំគោរពតាមពាក្យសម្តីរបស់ខ្លួនឡើយ មាត់និយាយចង់បានសន្តិភាព និងគោរពតាមកិច្ចព្រមព្រៀងបទឈប់បាញ់ ប៉ុន្តែរដ្ឋាភិបាលថៃបែរជាបញ្ជាឱ្យកងទ័ពរាយបន្លាលួស និងកង់ឡាននៅលើទឹកដីកម្ពុជាដោយខុសច្បាប់ ។ តើនេះឬជាការគោរពកិច្ចព្រមព្រៀងបទឈប់បាញ់ដែលថៃតែងតែប្រាប់ទៅអន្តរជាតិ?

កោតតែនិយាយទៅរួច! ថៃលើកឡើងពីប្រវត្តិតំបន់ បានណងចាន់ ថាជាភូមិមួយនៅក្នុងខេត្តស្រះកែវ ដែលថៃធ្លាប់បានជួយពលរដ្ឋខ្មែរដែលភៀសខ្លួនពីប៉ុលពត និងសង្រ្គា.មជាមួយវៀតណាមឲ្យស្នាក់អាស្រ័យ ប៉ុន្តែកម្ពុជាមិនត្រឹមតែមិនដឹងគុណថៃនោះទេ ថែមទាំងចង់បានទឹកដីថៃធ្វើជាកម្មសិទ្ធិរបស់ខ្លួនទៀត។ នេះបើតាមការចុះផ្សាយរបស់សារព័ត៌មាន The Nation កាលពីថ្ងៃទី១៩ ខែសីហា ឆ្នាំ២០២៥។

តាមប្រភពដដែលខាងលើនេះ បានរៀបរាប់យ៉ាងដូច្នេះថា ប្រទេសថៃធ្លាប់បានផ្តល់ទីជម្រកដល់ជនភៀសខ្លួនកម្ពុជារហូតដល់ជាង 13,000 នាក់នៅតំបន់ ណងចាន់ កាលចុងទសវត្សរ៍ឆ្នាំ 1970 ។ ប្រភពនេះបានបន្តទៀតថា៖ ទោះជាយ៉ាងណាក៏ដោយ ទង្វើនៃការអាណិតអាសូរនេះបែរជានាំឲ្យមានជម្លោះទឹកដីដល់សព្វថ្ងៃនេះ។

សារព័ត៌មានអានសៀវភៅប្រវត្តិសាស្រ្តដាច់មួយកំណាត់នេះបានបន្ថែមទៀតថា៖ នៅពេលដែលស្ថានការណ៍នៅកម្ពុជាមានភាពប្រសើរឡើង ជនភៀសខ្លួនមួយចំនួនបានបដិសេធមិនវិលត្រឡប់ចូលប្រទេសខ្លួនវិញទេ ដែលឈានទៅដល់ការតាំងទីលំនៅអចិន្ត្រៃយ៍នៅក្នុងប្រទេសថៃតែម្ដង។ នៅដើមទស្សវត្សរ៍ឆ្នាំ 1980 កងកម្លាំងកម្ពុជាបានជ្រៀតចូលតាមព្រំដែន ហើយភាពតានតឹងបានកើនឡើងជាបន្តបន្ទាប់ ហើយនៅពេលក្រោយៗមកកម្ពុជាបានទាមទារយកតំបន់នេះ ព្រមទាំងសាងសង់របងព័ទ្ធព្រំដែន។

ពួកគេអះអាងថា រដ្ឋាភិបាលថៃតែងតែលើកយកបញ្ហានេះមកតវ៉ានៅលើវេទិកាការទូតជានិច្ច ប៉ុន្តែដោយសារចង់បានសន្តិភាព ពួកគេសុខចិត្តប្រើប្រាស់ធម៌ត្រជាក់ចរចាដោយសន្តិវិធី ខណៈដែលកម្ពុជាវិញ បានយកប្រជាជនរបស់ខ្លួនមកធ្វើខែល ឲ្យចូលមករស់នៅហើយទាមទារយកទឹកដីថៃ។ ជាមួយនឹងការលើកឡើងនេះ ថៃពោលឡើងដោយមិនចេះខ្មាសមាត់ថា៖ វាជាការរំលឹកដ៏ឈឺចាប់មួយសម្រាប់ជណជាតិថៃឲ្យចងចាំថា ជួនកាលអំពើល្អរបស់យើងនឹងហុចផលវិបាកមកឲ្យយើងវិញនៅពេលក្រោយ។

គួរជម្រាបថា ជំរុំភៀសខ្លួនដែលថៃបានលើកឡើងខាងលើនេះ គឺថៃចង់សំដៅលើជំរុំណងចាន ឬថៃហៅថា «បានណងចាន់» ដែលទីតាំងនោះស្ថិតនៅក្នុងខេត្តស្រះកែវ ប្រទេសថៃ ជាកន្លែងដែលពលរដ្ឋភៀសខ្លួនរបស់ខ្មែរ ត្រូវបានថៃបង្ខំឲ្យធ្វើមាតុភូមិនិវត្តន៍ចូលក្នុងចំការមីនតាមព្រំដែនកម្ពុជា និងជាន់មីនស្លា.ប់អស់ជាច្រើនពាន់នាក់ កាលពីទសវត្សទី៨០ ។

ដោយឡែក ភូមិណងចាន់ ដែលបច្ចុប្បន្នត្រូវបានយោធាថៃព័ទ្ធលួសបិទផ្ទះប្រជាពលរដ្ឋនោះ គឺជាទីតាំងផ្សេងគ្នា ស្ថិតនៅក្នុងឃុំអូបីជាន់ ស្រុកអូជ្រៅ ខេត្តបន្ទាយមានជ័យនៃប្រទេសកម្ពុជា មិនមែនស្ថិតនៅក្នុងទឹកដីថៃឡើយ។ ដូច្នេះ ទីតាំងខាងលើដែលថៃបានរៀបរាប់ថាជាជំរុំភៀសសឹក និងទីតាំងដែលថៃកំពុងធ្វើការព័ទ្ធលួសទាំងបំពាននេះ គឺជាទីតាំង២ផ្សេងគ្នា។ វាបង្ហាញថាថៃអានប្រវត្តិសាស្រ្តមិនអស់ឡើយ ហើយមានចេតនាចង់បានទឹកដីកម្ពុជាទាំងមិនអៀនខ្មាស៕

ប៉េកាំង៖ ប្រទេសចិនកំពុងបន្តបង្ហាញភាពឈានមុខគេក្នុងវិស័យឧស្សាហកម្មមនុស្សយន្ត ដោយកាលពីថ្មីៗនេះ អ្នកវិទ្យាសាស្ត្រក្រុមមួយបានប្រកាសពីការបង្កើត “មនុស្សយន្តមានផ្ទៃពោះ” ដំបូងបង្អស់នៅលើពិភពលោក ដែលអាចពរពោះទារករហូតដល់គ្រប់អាយុ និងអាចសម្រាលកូនបាន។ ការច្នៃប្រឌិតនេះកំពុងបង្កការភ្ញាក់ផ្អើលយ៉ាងខ្លាំងក្នុងសហគមន៍វិទ្យាសាស្ត្រ និងបច្ចេកវិទ្យា។

យោងតាមអ្នកជំនាញ គំរូដំបូងនៃមនុស្សយន្តនេះ ត្រូវបានរំពឹងថានឹងចេញផ្សាយជាសាធារណៈនៅឆ្នាំក្រោយ។ ទោះជាយ៉ាង វាត្រូវគេបានបំពាក់ដោយស្បូនសិប្បនិម្មិត ដែលអាចផ្តល់សារធាតុចិញ្ចឹមតាមរយៈប្រព័ន្ធទុយោ(សុកសុប្បនិម្មិត) ដូចជាការទទួលសារធាតុចិញ្ចឹមក្នុងស្បូនម្តាយពិត។ នេះមានន័យថា មនុស្សយន្តនឹងអាចចម្លងដំណើរការពេញលេញ ចាប់ពីការមានគភ៌រហូតដល់ការសម្រាលកូន។

បច្ចេកវិទ្យាថ្មីនេះត្រូវបានអភិវឌ្ឍដោយក្រុម Kaiwa Technology ក្រោមការដឹកនាំរបស់វេជ្ជបណ្ឌិត Zhang Qifeng។ លោក Zhang បានបញ្ជាក់ថា បច្ចេកវិទ្យាស្បូនសិប្បនិម្មិតមានភាពរួចរាល់សម្រាប់ប្រើប្រាស់ ហើយក្រុមការងារកំពុងសាកល្បងដាក់បញ្ចូលទៅក្នុងមនុស្សយន្ត។ គាត់បានបន្ថែមថា នេះនឹងអនុញ្ញាតឲ្យមានអន្តរកម្មរវាងមនុស្សពិត និងមនុស្សយន្ត ក្នុងដំណើរការមានផ្ទៃពោះ ដើម្បីសម្រេចបាននូវលទ្ធផលដែលប្រកបដោយភាពជាក់ស្តែង។

ប្រព័ន្ធផ្សព្វផ្សាយក្នុងតំបន់បានរាយការណ៍ថា មនុស្សយន្តនេះមិនត្រឹមតែជាកន្លែងសាកល្បងនោះទេ ប៉ុន្តែជាម៉ាស៊ីនផលិតមនុស្សពិតៗដែលអាចចម្លង និងធ្វើឲ្យដំណើរការនៃការមានផ្ទៃពោះកើតឡើងក្នុងទម្រង់ពេញលេញ។

យ៉ាងណាមិញ ទោះបីជាការច្នៃប្រឌិតនេះទទួលបានការគាំទ្រពីមនុស្សជាច្រើនដែលឃើញថាជាជំហានថ្មីសម្រាប់វិទ្យាសាស្ត្រ ក៏ដោយ ប៉ុន្តែក៏មានសម្លេងរិះគន់ក៏ដូចជាការព្រួយបារម្ភពីក្រុមអ្នកវិភាគផងដែរ។ ពួកគេថ្កោលទោសបច្ចេកវិទ្យានេះថាអាចបង្កបញ្ហាក្រមសីលធម៌ និងជាការបំពានលើច្បាប់ធម្មជាតិ។

ដោយឡែក ការច្នៃប្រឌិតនេះក៏កើតឡើងនៅក្នុងពេលដែលប្រទេសចិនកំពុងប្រឈមមុខនឹងបញ្ហាប្រជាក្នុងប្រទេស។ អត្រាមានកូនបានធ្លាក់ចុះដល់កម្រិតទាបគួរឲ្យព្រួយបារម្ភ។ តាមរបាយការណ៍មួយ ស្ថិតិអំពីភាពគ្មានកូនកើនឡើងពី 11.9% ក្នុងឆ្នាំ 2007 ទៅដល់ 18% ក្នុងឆ្នាំ 2020 ដែលជាកត្តាបង្កឲ្យមានការចាប់អារម្មណ៍ចំពោះបច្ចេកវិទ្យាថ្មីនេះ៕