ខេត្តកោះកុង ៖ កម្លាំងនគរបាលការពារព្រំដែនទឹកលេខ២៦៩ បានចុះប្រតិបត្តិការបង្ក្រាបទូកដឹកទំនិញជាគ្រឿងសមុទ្រ បាន ១ទូក និងចាប់ឃាត់មនុស្សចំនួន២នាក់ ពាក់ព័ន្ធនឹងការនាំចូលទំនិញគេចពន្ធមកពីថៃចូលកម្ពុជា។ បច្ចុប្បន្នជនសង្ស័យ និងវត្ថុតាង ត្រូវបានប្រគល់ជូនមន្ត្រីគយ បាននិងកំពុងស៊ើបអង្កេតបន្តតាមនីតិវិធីច្បាប់ ។
នាព្រឹកថ្ងៃទី២០ ខែសីហា លោក ទៀ សុរៈឆ័យ អភិបាលរង នៃគណៈអភិបាលខេត្ត បានអញ្ជើញដឹកនាំក្រុមការងារ ចុះត្រួតពិនិត្យទំនិញដែលត្រូវនាំចូលដោយមិនបានបង់ពន្ធពីប្រទេសថៃ ត្រូវបានសមត្ថកិច្ចនគរបាលការពារព្រំដែនទឹកលេខ២៦៩ ចាប់ឃាត់ទុក និងបានប្រគល់ជូនសមត្ថកិច្ចគយ និងរដ្ឋាករខេត្ត សហការជាមួយ ក.ប.ប ខេត្ត និងសមត្ថកិច្ចពាក់ព័ន្ធ ពិនិត្យអនុវត្តនីតិវិធីតាមច្បាប់ជាធរមាន។
ទូកដឹកជញ្ជូន ភាគច្រើនសុទ្ធតែជា ត្រីគោបង្កក មឹក ក្តាមថ្មសក ខ្យង និងចាក់ច្រែង ដែលជាមិនបានបង់ពន្ធគយ ត្រូវបាននគរបាលការពារព្រំដែនទឹក បង្រ្កាបបានភ្លាមៗអំឡុងពេលប្រុងឡើងទៅគោក កាលពីម៉ោង១០ព្រឹកថ្ងៃទី២០ ខែសីហា។
លោក ឈិត រតនៈ អភិបាលរងខេត្តកោះកុង បានដឹងនៅម៉ោង៦និង០៦នាទីល្ងាចថ្ងៃទី២០ ខែសីហា ឆ្នាំ២០២៥ថា ក្រៅពីឃាត់ទំនិញគេចពន្ធ សមត្ថកិច្ចក៏ឃាត់បានមនុស្ស២នាក់ ទី១៖ ឈ្មោះ ឈិត ទុំ ជនជាតិខ្មែរ និងទី២៖ ឡន់ ប៉ែង ជនជាតិថៃ និងវត្ថុតាង មានទូកកន្ទុយវែង និងម៉ាស៊ីតបាត១គ្រឿង នៅចំណុចព្រែកកោះយ៉។
បើតាមលោកអភិបាលរងខេត្ត ក្រោយពីត្រួតពិនិត្យឃាត់បានរួចរាល់ ប្រធានគណៈកម្មការត្រួតពិនិត្យការដឹកជញ្ជូនទំនិញក្នុងភូមិសាស្ត្រខេត្តកោះកុង និងសមត្ថកិច្ចជំនាញប្រគល់ជូនមន្រ្តីសាខាគយ និងរដ្ឋាករខេត្ត បន្តស៊ើបអង្កេតអនុវត្តនីតិវិធីច្បាប់ទំនិញគេចពន្ធមកពីថៃ ត្រូវបានប្រភពព័ត៌មានក្រៅផ្លូវការទម្លាយថា មាននការដឹកជញ្ជូនតាមផ្លូវទឹកក្នុងចំនួនច្រើនមិនយប់ឬថ្ងៃនោះទេតាមសមុទ្រ ប៉ុន្តែទោះយ៉ាងណាសមត្ថកិច្ចក៏បង្កើនការតាមដានល្បាតបង្រ្កាបផងដែរ៕
