ប្រទេសថៃ ៖ មជ្ឈមណ្ឌលស្រាវជ្រាវកសិករថៃបានវាយតម្លៃការបិទព្រំដែនរបស់មីយ៉ាន់ម៉ានៅចំណុចស្រុកមេស៊ត និងមៀវឌី បានធ្វើឱ្យថៃបាត់បង់ចំណូលពីការនាំចេញទំនិញយ៉ាងខ្លាំង គឺស្មើ៥,៦០០លានបាតក្នុង១ខែ (ឬស្មើជាង១៥១លានដុល្លារ) ប្រសិនបើមីយ៉ាន់ម៉ាបិទព្រំដែនផ្សេងៗទាំងអស់ ថៃនឹងបាត់បង់ចំណូលរហូតដល់៩,៧០០លានបាតក្នុង១ខែ (ឬស្មើជាង២៦១លានដុល្លារ) ។ នេះបើតាមការផ្សព្វផ្សាយរបស់សារព័ត៌មានថៃ The Nation នៅថ្ងៃទី២៩ ខែសីហា ឆ្នាំ២០២៥ ។

កាលពីថ្ងៃទី១៨ ខែសីហា កន្លងមក រដ្ឋាភិបាលមីយ៉ាន់ម៉ាបានបិទព្រំដែនមេស៊ត-មៀវឌី នៅស្ពានមិត្តភាពមីយ៉ាន់ម៉ា-ថៃ ទី២ ដើម្បីគ្រប់គ្រងពាណិជ្ជកម្មព្រំដែន ដោយសាររដ្ឋាភិបាលមីយ៉ាន់ម៉ាចង់កាត់ផ្តាច់ហិរញ្ញវត្ថុរបស់ក្រុមប្រឆាំង និងកាត់បន្ថយការជួញដូរខុសច្បាប់ ដែលជាប្រភពចំណូលដ៏សំខាន់របស់កងកម្លាំងប្រដាប់អាវុធជនជាតិភាគតិច ។

ប៉ុន្តែការបិទព្រំដែនរបស់មីយ៉ាន់ម៉ាធ្វើឱ្យប៉ះពាល់ដល់ពាណិជ្ជកម្មរវាងមីយ៉ាន់ម៉ា និងថៃយ៉ាងខ្លាំង ដោយសារថៃបានធ្វើពាណិជ្ជកម្មជាមួយមីយ៉ាន់ម៉ាភាគច្រើននៅតំបន់ព្រំដែន ស្មើរហូតដល់៨២.៥% ។ កាលពីឆ្នាំ២០២៤ ថៃបាននាំចេញទំនិញតាមព្រំដែនគោកមីយ៉ាន់ម៉ា ស្មើទឹកប្រាក់១១៧,៧២៦លានបាត ប្រមាណ៨០% នៃការនាំចេញទំនិញសរុបទៅមីយ៉ាន់ម៉ា ខណៈការនាំចូលទំនិញពីមីយ៉ាន់ម៉ាតាមព្រំដែនគោក ស្មើទឹកប្រាក់៩១,៣៩៨លានបាត ប្រមាណ៨៥% នៃការនាំចូលទំនិញសរុបពីមីយ៉ាន់ម៉ា ។

ព្រំដែននៅស្រុកមេស៊ត ខេត្តតាក គឺជាព្រំដែននាំចេញទំនិញថៃដ៏សំខាន់បំផុតទៅមីយ៉ាន់ម៉ា ពីព្រោះថៃអាចដឹកជញ្ជូនទំនិញទៅដល់ចំណុចកណ្តាលប្រទេសមីយ៉ាន់ម៉ាដោយចំណាយពេលមិនដល់១ថ្ងៃ និងចំណាយថ្លៃដឹកជញ្ជូនតិចដោយសារមានផ្លូវល្អ ។ រីឯការដឹកទំនិញតាមច្រកព្រំដែនផ្សេងពិបាកធ្វើដំណើរ ខណៈការដឹកទំនិញតាមផ្លូវទឹកទៅទីក្រុងយ៉ាំងហ្គន ត្រូវចំណាយពេលយ៉ាងហោចណាស់ ៣ថ្ងៃ ។

ការបិទព្រំដែនរបស់មីយ៉ាន់ម៉ាធ្វើឱ្យប៉ះពាល់ដល់ពលរដ្ឋថៃពឹងផ្អែកលើចំណូលពីការលក់ដូរនៅស្រុកមេស៊ត ខេត្តតាក ខណៈរថយន្តដឹកទំនិញថៃរាប់រយគ្រឿងកកស្ទះនៅព្រំដែន ។ ឈ្មួញថៃបាត់បង់ទាំងដើមទុន និងឱកាសពាណិជ្ជកម្ម ជាពិសេស ការនាំចេញទូរស័ព្ទស្មាតហ្វូនភាគច្រើន គឺនាំចេញតាមច្រកព្រំដែនមេស៊ត ។ ក្រៅពីនេះ ក៏ប៉ះពាល់ដល់ការនាំចេញឱសថ, ដូងប្រេង និងទំនិញកសិកម្ម ហើយថៃបារម្ភពីរដ្ឋាភិបាលមីយ៉ាន់ម៉ាអាចនឹងបិទព្រំដែនផ្សេងៗបន្ថែមទៀត ។

តាមការប៉ាន់ស្មានរបស់មជ្ឈមណ្ឌលស្រាវជ្រាវកសិករថៃឱ្យដឹងថា មីយ៉ាន់ម៉ាបិទព្រំដែនមេស៊ត-មៀវឌី ថៃនឹងខាតបង់ចំណូលពីការនាំចេញទំនិញ ចំនួន៥,៦០០លានបាតក្នុង១ខែ ឬស្មើ៤.៨% ។ ប្រសិនបើមីយ៉ាន់ម៉ាបិទព្រំដែនផ្សេងៗទាំងអស់ ថៃនឹងបាត់បង់ចំណូលរហូតដល់៩,៧០០លានបាតក្នុង១ខែ ឬស្មើ៨.២% ។

ឈ្មួញថៃបានបង្ហាញក្តីបារម្ភយ៉ាងខ្លាំងដោយសារការបិទព្រំដែនរបស់មីយ៉ាន់ម៉ានៅចំណុចស្រុកមេស៊ត-មៀវឌី និងបារម្ភខ្លាចមីយ៉ាន់ម៉ាបិទព្រំដែនផ្សេងៗថែមទៀត ខណៈឈ្មួញថៃកំពុងរងផលប៉ះពាល់ខ្លាំងដោយសារកងទ័ពបិទព្រំដែនជាឯកតោភាគីជាមួយកម្ពុជា ។ ពួកគេរំពឹងថា ព្រំដែនថៃជាមួយប្រទេសជិតខាងនឹងបើកឡើងវិញឆាប់ៗដើម្បីឱ្យការធ្វើពាណិជ្ជកម្មត្រឡប់មកប្រក្រតីឡើងវិញ ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath នៅថ្ងៃទី២៩ ខែសីហា ឆ្នាំ២០២៥ ឱ្យដឹងថា កងកម្លាំងបូរ៉ាផាថៃបានប្រកាសច្បាប់អាជ្ញាសឹកនៅភូមិណងចាន់ ឃុំណូនម៉ាកមូន ស្រុកខូកស៊ូង ខេត្តស្រះកែវ ទល់មុខភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយចោទប្រកាន់ពលរដ្ឋខ្មែរបង្កចលាចលលើទឹកដីថៃ ។ ច្បាប់អាជ្ញាសឹកនេះដើម្បីរក្សាសន្តិសុខ សណ្តាប់ធ្នាប់នៅភូមិណងចាន់ កងទ័ពថៃបានសុំការសហការពីពលរដ្ឋគ្រប់រូបចូលរួមតាមដាន បើឃើញអ្វីខុសប្រក្រតី ត្រូវរាយការណ៍មកកាន់អាជ្ញាធរជាបន្ទាន់ ។

កាលពីថ្ងៃទី២៨ ខែសីហា មេបញ្ជាការកងទ័ពបូរ៉ាផា លោកឧត្តមសេនីយ៍ ប៊ិនចាផុង ដេឆាជិវង្ស បានចុះហត្ថលេខាលើសេចក្តីប្រកាសច្បាប់អាជ្ញាសឹកដោយកំណត់តំបន់រក្សាសន្តិសុខ និងសណ្តាប់ធ្នាប់ក្នុង៧ស្រុក នៅខេត្តស្រះកែវ រួមមាន ៖ ស្រុកតាប្រាយ៉ា, ខូកស៊ូង, អារញ្ញប្រាថេត, ឃ្លងហាត, វឌ្ឍនាណាខន, វាំងស៊ុមប៊ូន និងស្រុកវាំងណាមយេន ។

ការប្រកាសច្បាប់អាជ្ញាសឹកនេះ គឺកងទ័ពថៃចោទប្រកាន់ថា ពលរដ្ឋខ្មែរបានបង្កចលាចលលើទឹកដីថៃ នៅព្រំដែនភូមិណងចាន់ ឃុំណូនម៉ាកមូន ស្រុកខូកស៊ូង ខេត្តស្រះកែវ (ទល់មុខភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ) ទើបប្រទេសថៃចាំបាច់ត្រូវតែប្រើប្រាស់កម្លាំងកងទ័ព សមត្ថកិច្ច និងពលរដ្ឋថៃគ្រប់រូប ដើម្បីការពារតំបន់ពីការគំរាមកំហែង ។

ក្រៅពីនេះ វានឹងជួយរក្សាអធិបតេយ្យជាតិ និងបូរណភាពទឹកដី ក៏ដូចជាជីវិត និងទ្រព្យសម្បត្តិរបស់ពលរដ្ឋថៃ ។ ថៃចាំបាច់ត្រូវកំណត់វិធានការរក្សាសន្តិសុខក្នុងតំបន់ ស្ថិតក្រោមអំណាចច្បាប់អាជ្ញាសឹក មាត្រា១១ ឆ្នាំ១៩១៤ ដោយតំបន់សន្តិសុខ និងការរក្សាសណ្តាប់ធ្នាប់នឹងអនុវត្តតាមវិធានការដូចខាងក្រោម ៖

១-ភូមិណងចាន់ ឃុំណូនម៉ាកមូន ស្រុកខូកស៊ូង ខេត្តស្រះកែវ គឺជាតំបន់រក្សាសន្តិសុខ សណ្តាប់ធ្នាប់
២-កំណត់ផ្លូវស្រ៊ីផេញ នៅភូមិណងចាន់ ឃុំណូនម៉ាកមូន ស្រុកខូកស៊ូង ខេត្តស្រះកេវ គឺជាខ្សែបន្ទាត់រក្សាសន្តិសុខ សណ្តាប់ធ្នាប់

៣-វិធានការចូលក្នុងតំបន់សន្តិសុខ (ភូមិណងចាន់) រួមមាន ៖
-ហាមយកអាវុធគ្រប់ប្រភេទ ឬអាវុធក្លែងក្លាយចូលក្នុងតំបន់
-ហាមបិទផ្លូវដែលប៉ះពាល់ដល់ការបំពេញភារកិច្ចរបស់អាជ្ញាធរ និងការរស់នៅរបស់ពលរដ្ឋក្នុងតំបន់
-ហាមថតរូបទីតាំងប្រតិបត្តិការកងទ័ព
-ហាមមានជម្លោះ និងផឹកគ្រឿងស្រវឹង
-ហាមយកឧបករណ៍បំពងសំឡេងចូលក្នុងតំបន់ដោយគ្មានការអនុញ្ញាត ។

កងទ័ព សមត្ថកិច្ច និងអាជ្ញាធរថៃ នឹងបំពេញភារកិច្ចយ៉ាងម៉ឺងម៉ាត់ដើម្បីផ្តល់សុវត្ថិភាពដល់ពលរដ្ឋគ្រប់រូប និងការពារទឹកដីពុំឱ្យប្រទេសណាល្មើស ។ កងទ័ពថៃក៏បានសុំការសហការពីពលរដ្ឋគ្រប់រូបចូលរួមតាមដាន បើឃើញអ្វីខុសប្រក្រតី ត្រូវរាយការណ៍មកកាន់អាជ្ញាធរជាបន្ទាន់ ។

ថៃបានចោទប្រកាន់ពលរដ្ឋខ្មែរបង្កចលាចលនៅព្រំដែនភូមិណងចាន់ ទើបថៃបង្ខំចិត្តប្រកាសច្បាប់អាជ្ញាសឹកជាបន្ទាន់ ប៉ុន្តែការពិត ពលរដ្ឋថៃទៅវិញទេដែលបង្កចលាចលនៅតំបន់នេះ ។ ជាច្រើនថ្ងៃហើយដែលពលរដ្ឋថៃសម្រុកធ្វើដំណើរមកភូមិណងចាន់ ដើម្បីលើកទឹកចិត្តកងទ័ពរបស់ខ្លួនឱ្យរាយបន្លាលួសព័ទ្ធយកដីខ្មែរ ហើយពលរដ្ឋថៃថែមទាំងបញ្ជូនឧបករណ៍បំពងសំឡេងតាមរថយន្តធំៗមករាំរែកយ៉ាងកងរំពងទៀតផង ។

លើសពីនេះ កាលពីថ្ងៃទី២៨ ខែសីហា Influencer ថៃបានបញ្ជូនរថយន្តដឹកលាមក ចំនួន១៤គ្រឿង មកកាន់ភូមិណងចាន់ ដើម្បីស្រោចលើពលរដ្ឋ ដែលនេះជាទង្វើដ៏ស្មោគគ្រោក និងបាតផ្សារ ។ សកម្មភាពទាំងអស់នេះជាការបង្កចលាចលនៅភូមិណងចាន់ ទល់មុខភូមិសាស្ត្រច្រកអូរបីជាន់ ខណៈកម្ពុជាអត់ធ្មត់ គោរពបទឈប់បាញ់ មិនញុះញង់ និងបន្តការចរចាជាមួយថៃក្នុងគោលបំណងបញ្ចប់ជម្លោះរវាងប្រទេសទាំងពីរឆាប់ៗ ៕

(បាងកក)៖ នាថ្ងៃសុក្រ ទី២៩ ខែសីហា លោកស្រី Paetongtarn Shinawatra ដែលជាកូនស្រីពៅរបស់មហាសេដ្ឋី និងជាអតីតនាយករដ្ឋមន្រ្តីថៃ លោក Thaksin Shinawatra ត្រូវបានតុលាការធម្មនុញ្ញនៃប្រទេសថៃ ដកហូតតំណែងនាយករដ្ឋមន្រ្តីជាផ្លូវការហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន The Nation ចេញផ្សាយមុននេះបន្តិច។

សេចក្ដីសម្រេចនារសៀលថ្ងៃទី២៩ ខែសីហា ឆ្នាំ២០២៥នេះបានបញ្ជាក់យ៉ាងច្បាស់ថា នាយករដ្ឋមន្ត្រី Paetongtarn Shinawatra ត្រូវបានតុលាការធម្មនុញ្ញរកឃើញថា មានពិរុទ្ធពីបទរំលោភរដ្ឋធម្មនុញ្ញ អំឡុងពេលវីដេអូឃ្លីប រវាងលោកស្រី និងប្រធានព្រឹទ្ធសភាកម្ពុជា។

សារព័ត៌មានធំៗរបស់ថៃជាច្រើនបានចុះផ្សាយថា តុលាការបានដកស្រង់សម្តីរបស់លោកស្រីPaetongtarn ទៅកាន់ប្រធានព្រឹទ្ធសភាកម្ពុជាថា មេបញ្ជាការភូមិភាគទី២ ឧត្តមសេនីយ៍ Boonsin Padklang គឺអ្នកប្រជែងរបស់លោកស្រី ដែល“បានបង្ហាញពីភាពទន់ខ្សោយនៃនយោបាយក្នុងស្រុក [ថៃ]”។

បន្ថែមពីលើនេះ តុលាការក៏បានបញ្ជាក់ថា នាយករដ្ឋមន្ត្រីធ្វើសម្បទានបើកចំហឲ្យសម្តេច ហ៊ុន សែន ហើយនឹងផ្តល់ប្រយោជន៍ដល់សម្តេច ហ៊ុន សែន ដោយមិនគិតគូរពី «សន្តិសុខជាតិ» របស់ថៃ ក្នុងការប៉ុនប៉ងស្រោចស្រង់ប្រជាប្រិយភាពរបស់លោកស្រី ដូច្នេះការដាក់ផលប្រយោជន៍របស់លោកស្រីលើសផលប្រយោជន៍ជាតិ៕

បាងកក៖ ផ្ទុះការវែកញែក និងរិះគ.ន់សារជាថ្មី ក្រោយនាយករដ្ឋមន្រ្តីស្ដីទីថៃ លោក ភូមថាំ វេឆាយ៉ាឆៃ បានលើកឡើងទាក់ទងនឹងផែនការសាងសង់របងព្រំដែននៅខេត្តស្រះកែវជាក់កម្ពុជា ដោយធ្វើការបញ្ជាក់យ៉ាងច្បាស់ថា៖ ការសង់របងសីមាអចិន្ត្រៃយ៍មួយ អាចធ្វើទៅបានលុះត្រាកម្ពុជា-ថៃ អាចកំណត់ព្រំដែនប្រទេសទាំងពីរឲ្យដាច់ស្រេចសិន។ នេះបើយោងតាមការចុះផ្សាយរបស់សារព័ត៌មាន បាងកកប៉ុស្តិ៍ នៅថ្ងៃទី28 ខែសីហា។

ខណៈនេះប្រទេសថៃកំពុងពិភាក្សាយ៉ាងយកចិត្តទុកដាក់លើការកសាងរបងព្រំដែនជាប់កម្ពុជាត្រង់ចំណុចខេត្តស្រះកែវ ដែលផែនការផ្ដួចផ្ដើមដោយលោក Songwit Noonpakdee មេបញ្ជាការកងកម្លាំងការពារជាតិ បន្ទាប់ពីថៃបង្កភាពតានតឹងនៅព្រំដែនម្ដងទៀត ជាពិសេសការដាក់បន្លាលួស ព័ទ្ធយកដីខ្មែរមិនចេះចប់។

ទាក់ទឹននឹងគម្រោងការនេះដែរ លោក ភូមថាំ វេឆាយ៉ាឆៃ នាយករដ្ឋមន្រ្តីស្ដីទីថៃ បានផ្ដល់សម្ភាសន៍ដល់អ្នកសារព័ត៌មានថា ការសាងសង់របងមិនទាន់អាចចាប់ផ្ដើមបានភ្លាមៗឡើយ។ ការសង់របងសីមាអចិន្ត្រៃយ៍មួយ អាចធ្វើទៅបានលុះត្រាកម្ពុជា-ថៃ អាចកំណត់ព្រំដែនប្រទេសទាំងពីរឲ្យដាច់ស្រេចសិន។ ដូច្នេះជំហានដំបូង គេនឹងធ្វើរបងបណ្តោះអាសន្នកាត់ផ្លូវតាមព្រំដែន ព្រមទាំងដាក់បន្លាលួសចំនួន៣ជាន់ និងបំពាក់កាមេរ៉ាសុវត្ថិភាពនៅតំបន់មួយចំនួនជាមុនសិន។

បន្ថែមពីលើនេះ ប្រមុខរដ្ឋាភិបាលថៃបានបញ្ជាក់ថា៖ ការធ្វើរបងព្រំដែនកម្ពុជា-ថៃ នឹងផ្ដល់ផលប្រយោជន៍សម្រាប់ការចល័តកម្លាំងកងទ័ព និងល្បាត ទប់ស្កាត់បទល្មើសឆ្លងដែន ដែលនឹងធ្វើឱ្យការឆ្លងដែនខុសច្បាប់តាមច្រកធម្មជាតិកាន់តែមានភាពពិបាក និងកាត់បន្ថយការឆបោកផ្សេងៗ។

ដោយឡែក គណៈកម្មការ JBC របស់កម្ពុជា បានចាត់ទុកទង្វើនេះថាជាសកម្មភាពទន្ទ្រានកាន់កាប់យកដីជាឯកតោភាគីដោយយោធាថៃ វាជាសកម្មភាពដែលរំលោភទៅលើស្មារតីនៃ MOU ឆ្នាំ២០០០ និងច្បាប់អន្តរជាតិ។ មិនតែប៉ុណ្ណោះសកម្មភាពនេះ ក៏រំលោភលើសមត្ថកិច្ចរបស់គណៈកម្មការចម្រុះខណ្ឌសីមាព្រំដែនគោក JBC នៃប្រទេសទាំងពីរផងដែរ រាប់ទាំងការបំផ្លាញដល់លទ្ធផលនៃកិច្ចខិតខំប្រឹងប្រែងនាពេលកន្លងមក និងដំណើរការនៃការចរចារបស់JBC។

យ៉ាងណាក៏ដោយ ប្រទេសថៃបានប្រព្រឹត្តទង្វើដាក់បន្លាព័ទ្ធផ្ទះពលរដ្ឋខ្មែរដោយមិនចេះអៀនខ្មាសរួចទៅហើយ ហើយកន្លងមកគណៈកម្មការចម្រុះខណ្ឌសីមាព្រំដែនគោកកម្ពុជា (JBC) ក៏ធ្លាប់ចេញសេចក្ដីថ្លែងការណ៍តវ៉ាប្រឆាំងចំពោះសកម្មភាពរំលោភបំពានរបស់យោធាថៃផងដែរ៕

ប្រទេសថៃ៖ នាយកដ្ឋានឧតុនិយមថៃ នៅថ្ងៃសុក្រនេះបានចេញសេចក្ដីព្រ.មានបន្ទាន់មួយ ប្រាប់ប្រជាពលរដ្ឋប្រុងប្រយ័ត្នឲ្យបានខ្ពស់ ខណៈនៅពេលឆាប់ៗខាងមុខនេះ ព្យុះស៊ីក្លូនត្រូពិចអាចនឹងធ្វើដំណើរឆ្លងកាត់ប្រទេសថៃ ដោយនាំមកនូវភ្លៀងធ្លាក់ខ្លាំងជាមួយនឹងហានិភ័យនៃទឹកជំនន់លិចទូទាំងប្រទេសមានភាគរយច្រើនអាចកើតមាន។

យោងតាមការចុះផ្សាយដោយសារព័ត៌មាន The Nation នៅថ្ងៃទី29 ខែសីហា បានឲ្យដឹងថា ប្រទេសថៃប្រឈមមុខនឹងភ្លៀងធ្លាក់ខ្លាំង គួបផ្សុំនឹងហានិភ័យទឹកជំនន់ភ្លាមៗ ខណៈដែលសម្ពាធទាបអាចប្រែទៅជាព្យុះស៊ីក្លូនត្រូពិច។ នាយកដ្ឋានឧតុនិយមថៃបានព្យាករណ៍ទុកថា ទិសដៅនៃខ្យល់មូសុងបានលាតសន្ធឹងពាសពេញភាគខាងជើង រួមទាំងមានឥទ្ធិពលលើប្រទេសឡាវ និងវៀតណាមផ្នែកខាងលើផងដែរ។

ជាមួយគ្នានេះ ខ្យល់មូសុងទិសនិរតីដែលមានកម្រិតមធ្យម ក៏នឹងធ្វើឲ្យប៉ះពាល់ដល់សមុទ្រ Andaman ប្រទេសថៃ និងឈូងសមុទ្រថៃ ដែលនាំមកនូវលទ្ធភាពនៃភ្លៀងធ្លាក់ខ្លាំងនៅតំបន់ផ្សេងៗ។ ដូច្នេះអាជ្ញាធរថៃបានអំពាវនាវឲ្យប្រជាពលរដ្ឋប្រុងប្រយ័ត្នចំពោះហានិភ័យនៃទឹកភ្លៀង ដែលអាចបង្កជាជំនន់ទឹកភ្លៀង ពិសេសនៅតាមតំបន់ជិតមាត់ទឹក ជើងភ្នំ និងតំបន់ទំនាប។

គួររំលឹកថា រយៈពេលជិត២សប្ដាហ៍មកនេះ ប្រទេសបានជួបប្រទះនឹងគ្រោះធម្មជាតិឥតស្រាកស្រាន្ត ជាពិសេសគឺគ្រោះទឹកជំនន់ ខ្សល់ព្យុះ និងបាក់ដីជាដើម។ កាលពីថ្ងៃព្រហស្បត្តិម្សិលមិញនេះ អាជ្ញាធរថៃបានរាយការណ៍ថា មនុស្សយ៉ាងតិច ៥នាក់បានស្លា.ប់ ជាង១០នាក់បានរងរបួស និង ៧នាក់ទៀតកំពុងបាត់ខ្លួន បន្ទាប់ពីភ្លៀងធ្លាក់ខ្លាំង និងការរអិលបាក់ដីដែលបង្កឡើង ដោយព្យុះ Kajiki ដែលបានវាយប្រហារតំបន់ភាគខាងជើងប្រទេស។

ក្រសួងមហាផ្ទៃថៃបានបញ្ជាក់ថា បើទោះជាពេលនេះឥទ្ធិពល Kajiki ហាក់ថមថយហើយក៏ដោយ ប៉ុន្តែខេត្តចំនួន៨របស់ថៃ នៅតែបន្តរងការជន់លិចនៅឡើយ ដែលកំពុងប៉ះពាល់ដល់ប្រជាជនជិត ៦,០០០នាក់ មកពី ១,៦០០គ្រួសារ។ ទន្ទឹមនឹងនេះ ក្ដីព្រួយបារម្ភក៏នៅមិនទាន់បាត់ទៅណាផងដែរ ខណៈផុតពីព្យុះមួយនេះ ព្យុះសុីក្លូនដ៏កំណាចមួយទៀតនឹងចូលមកវា.យលុកបន្ទាប់៕

ប្រទេសថៃ៖ លោក Pravit Rojanaphruk អតីតអ្នកកាសែតឆ្នើមរបស់ Khaosod បានលាតត្រដាងពីការពិតនៅពីក្រោយគ្រោះថ្នាក់នៃការជាន់គ្រាប់មីនផ្ទុះដា.ច់ជើងរបស់ទាហានថៃកន្លងមកថាគ្រាន់តែជាការសម្ដែងបោ.កប្រាស់អន្តរជាតិ និងពលរដ្ឋថៃ ដើម្បីទទួលបានផលចំណេញផ្នែកនយោបាយ និងជាយុទ្ធសាស្រ្តយកឈ្នះសង្រ្គា.មប៉ុណ្ណោះ។

នៅលើទំព័រហ្វេសប៊ុកផ្ទាល់ខ្លួន កាលពីថ្ងៃទី២៦ ខែសីហា ឆ្នាំ២០២៥ លោក ប្រាវីត បានសរសេរៀបរាប់យ៉ាងដូច្នេះថា៖ អាចនិយាយបានថា 90% នៃទាហានដែលបានរបួស ឬបាត់បង់ជីវិត សុទ្ធតែមកពីគ្រួសារក្រីក្រ។ ខណៈដែលជនជាតិថៃជាច្រើនតែងហៅពួកគេថាជាវិរៈបុរស ហើយនោះគឺជាអ្វីដែលពួកគេត្រូវការ ឬចង់ឲ្យគេចងចាំតាមរបៀបនេះ។

លោកបន្តថា៖ ការពិតបានបង្ហាញថា ក្រុមទាហានដែលមានវណ្ណៈទាប និងមានជីវភាពក្រលំបាក តែងតែត្រូវបានគេប្រើប្រាស់ជាកូនអុកនៅក្នុងផ្លូវសង្រ្គាមរវាងអ្នកមានអំណាចនៅក្នុងប្រទេសថៃ និងកម្ពុជា។ បន្ថែមពីលើទស្សនៈរបស់ខ្លួន លោក ប្រាវីត ក៏បានភ្ជាប់មកជាមួយនឹងរូបថតមួយចំនួន បង្ហាញពីផ្ទះ និងស្ថានភាពគ្រួសាររបស់ទាហានថៃដែលទើបរងរបួសដាច់ជើងដោយសារគ្រាប់មីនកាលពីថ្មីៗនេះផងដែរ។

គួរជម្រាបថា កាលពីរសៀលថ្ងៃទី២៧ ខែសីហា កន្លងទៅ ហេតុការណ៍ជាន់មីនថ្មីមួយទៀតបានកើតឡើងទៅលើទាហានថៃម្នាក់ដែលមានឈ្មោះថា Private Adisorn ក្រោយដើរល្បាតតាមខ្សែបន្ទាត់ព្រំដែនក្បែរប្រាសាទតាក្របី។ ឧប្បត្តិហេតុនោះបានបណ្ដាលឲ្យគេដាច់ជើងខាងស្ដាំ និងរងរបួសជាទម្ងន់។

បើតាមសារព័ត៌មាន Khaosod បានឲ្យដឹងថា គ្រួសាររបស់ Adisorn ពិតជាក្រលំបាកខ្លាំងណាស់។ លើសពីនេះ គេក៏ទើបតែរៀបការបានថ្មីថ្មោង មានកូនស្រីតូចម្នាក់ និងមានជីដូនចំណាស់ម្នាក់នៅក្នុងបន្ទុកទៀតផង។ ទាំងនេះហើយ គឺជាអ្វីដែលលោក ប្រាវីត ចង់បញ្ចាក់ថា គ្រប់យ៉ាងវាជាការរៀបចំរបស់រដ្ឋាភិបាលថៃដើម្បីកេងចំណេញផ្នែកនយោបាយ ប៉ុន្តែអ្នកដែលត្រូវឈឺចាប់គឺជាមនុស្សថ្នាក់ក្រោមដែលគ្មានសិទ្ធិអំណាច។

ទាក់ទងនឹងការចោ.ទប្រកាន់កម្ពុជាលើការដាក់បង្កប់មីនថ្មីនៅក្នុងទឹកដីថៃនេះដែរ ក្រសួងការពារជាតិកម្ពុជា រួមជាមួយអង្គភាពកម្ចាត់មីនកម្ពុជា (CMAC) បានបញ្ជាក់ឡើងវិញថា កម្ពុជានឹងមិនប្រព្រឹត្តល្មើសនូវអនុសញ្ញាអូតាវ៉ា ព្រមទាំងប្ដេជ្ញាមិនប្រើប្រាស់មីនថ្មីជាដាច់ខាត។ មួយវិញទៀត ចាប់តាំងពីក្លាយជារដ្ឋភាគីនៃសន្ធិសញ្ញានេះមក កម្ពុជាបានអនុវត្តយ៉ាងខ្ជាប់ខ្ជួននូវគោលការណ៍មនុស្សធម៌ ចូលរួមក្នុងសកម្មភាពប្រឆាំងមីនទាំងក្នុង និងក្រៅប្រទេស មានការទទួលស្គាល់ពីអន្តរជាតិ។ ដូច្នេះអ្វីដែលភាគីថៃបានចោ.ទប្រកាន់នោះ គឺមិនមានមូលដ្ឋានច្បាស់លាស់ និងមិនអាចជឿជាក់បានឡើយ៕

ប្រទេសថៃ ៖ ថៃតែងតែយកបញ្ហាកងទ័ពខ្លួនជាន់មីនរងរបួស និងដាច់ជើងនៅព្រំដែនមកចោទប្រកាន់កម្ពុជាដោយគ្មានមូលដ្ឋានម្តងហើយម្តងទៀត បើទោះជាកម្ពុជាពុំបានបង្កប់មីនក្តី ។ កន្លងមក កងទ័ពថៃបានបង្កសង្គ្រាមឈ្លានពាន និងបា.ញ់មុនមកលើកម្ពុជា ដោយយកលេសកងទ័ពខ្លួនដាច់មីនពេលដើរល្បាត រហូតមកដល់ពេលនេះ ថៃនៅតែលើកយកបញ្ហាមីនមកចោទប្រកាន់កម្ពុជាដដែលៗ និងលាបពណ៌ប្រាប់ទៅពិភពលោក ដើម្បីឱ្យពិភពលោកជឿតាមការញុះញង់ និងបោកប្រាស់របស់ខ្លួន ។

កាលពីថ្ងៃទី២៨ ខែសីហា ឆ្នាំ២០២៥ សារព័ត៌មានថៃ Top News រាយការណ៍ថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង ដែលជាបុគ្គលពូកែបង្កជម្លោះជាមួយកម្ពុជា បានបញ្ជាឱ្យកងទ័ពខ្លួនបា.ញ់កងទ័ពខ្មែរភ្លាមៗបើឃើញបង្កប់មីនក្នុងទឹកដីថៃ ហើយលោកសង្ស័យកងទ័ពខ្មែរនឹងបង្កប់មីនថែមទៀត ។ ការបញ្ជាឱ្យបាញ់ គឺក្រោយពីកងទ័ពថៃដើរល្បាតខុសផ្លូវនៅព្រំដែនបណ្តាលឱ្យរងរបួស និងដាច់ជើងម្នាក់នៅបរិវេណប្រាសាទតាក្របីនាពេលថ្មីៗនេះ ដែលថៃបានចោទប្រកាន់កងទ័ពខ្មែរបង្កប់មីនដូចមុន ។

នារសៀលថ្ងៃទី២៨ ខែសីហា នៅជំរំស៊ុណារី កងទ័ពភូមិភាគ២ ស្រុកមឿង ខេត្តនគរាជសីម៉ា លោក ប៊ុនស៊ីន ផាកក្លាង មេបញ្ជាការយោធភូមិភាគ២ បានទទួលសម្ភារៈ និងស្បៀងអាហារពីស្ថាប័នរដ្ឋាភិបាល ក្រុមហ៊ុនឯកជន និងពលរដ្ឋថៃ ដើម្បីយកមកចែកឱ្យកងទ័ពឈរជើងនៅព្រំដែនកម្ពុជា-ថៃ ។ បន្ទាប់ពីទទួលសម្ភារៈ និងស្បៀងអាហាររួច លោក ប៊ុនស៊ីន ក៏បានអរគុណក្រុមអ្នកយកសម្ភារៈមកប្រគល់ឱ្យ និងនិយាយពីស្ថានការណ៍ព្រំដែនបច្ចុប្បន្នថា កងទ័ពភូមិភាគ២នៅតែពង្រឹងកម្លាំងដោយប្រុងប្រយ័ត្ន ។

ចំណែកហេតុការណ៍កងទ័ពថៃជាន់មីនដាច់ជើង គឺលោកពុំចង់ឱ្យកើតឡើងទេ ប៉ុន្តែកងទ័ពថៃបានបំពេញតួនាទីល្អហើយ ។ លោក ប៊ុនស៊ីន បានចោទប្រកាន់ថា នេះជាមីនថ្មីដែលកងទ័ពកម្ពុជាបង្កប់ក្នុងទឹកដីថៃ ហើយលោកចោទទៀតថា កងទ័ពខ្មែរអាចនឹងបង្កប់មីនថែមទៀត ថៃមិនត្រូវធ្វេសប្រហែសឡើយ ។

លោកបានបញ្ជាឱ្យកងទ័ពថៃបាញ់កងទ័ពខ្មែរភ្លាមៗ បើឃើញបង្កប់មីនក្នុងទឹកដីថៃ ពីព្រោះថៃចាត់ទុកជាការល្មើសអធិបតេយ្យ ។ ក្រោយកិច្ចប្រជុំវិសាមញ្ញគណៈកម្មការព្រំដែនថ្នាក់យោធភូមិភាគ កម្ពុជា-ថៃ (RBC) គឺថៃនឹងដោះស្រាយបញ្ហាមីនក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) លំដាប់រដ្ឋមន្ត្រីក្រសួងការពារជាតិនាដើមខែកញ្ញានេះ ខណៈកងទ័ពថៃបានរៀបចំផែនការរួចហើយ ។

ចាប់ពីពេលនេះ លោកនឹងកែសម្រួលផែនការល្បាតរបស់កងទ័ព គឺកងទ័ពនឹងល្បាតដោយប្រើប្រាស់កាមេរ៉ា និងដ្រូន ។ បើចាំបាច់ ត្រូវតែពង្រាយមន្ត្រីជំនាញល្បាត ឬប្រើប្រាស់ឧបករណ៍ជំនួយ ។ ទោះជាលោកត្រូវចូលនិវត្តន៍នៅចុងខែកញ្ញា ឆ្នាំ២០២៥ ប៉ុន្តែលោកនៅតែជួយផ្តល់យោបល់ទៅកាន់មេបញ្ជាការយោធភូមិភាគ២ថ្មី រីឯការបើកព្រំដែនកម្ពុជា-ថៃ គឺអាស្រ័យលើរដ្ឋាភិបាល ខណៈកងទ័ពពុំឯកភាពឱ្យបើកព្រំដែនទេ ពីព្រោះស្ថានការណ៍ពុំទាន់ធូរស្រាល ។

ក្រោយពីថៃនៅតែបន្តចោទប្រកាន់ ក្រសួងការពារជាតិកម្ពុជាបញ្ជាក់ថា កម្ពុជាមិនបានប្រើប្រាស់ និងដាក់គ្រាប់មីនថ្មីឡើយ កម្ពុជាប្រកាន់ខ្ជាប់នូវការគោរពអនុសញ្ញាអូតាវ៉ា ដែលកម្ពុជាជារដ្ឋភាគីនៃអនុសញ្ញាហាមប្រាណការប្រើប្រាស់មីនប្រឆាំងមនុស្ស ។ កម្ពុជាធ្លាប់ជម្រាបថៃ និងសហគមន៍អន្តរជាតិជាច្រើនដងរួចមកហើយថា តាមបណ្តោយព្រំដែនក្នុងទឹកដីកម្ពុជា គឺនៅមានគ្រាប់មីនជាច្រើនដែលបន្សល់ទុកពីសម័យសង្គ្រាមស៊ីវិល ។

កម្ពុជាសូមអំពាវនាវឱ្យថៃគោរពលក្ខខណ្ឌកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅ (GBC) ដែលថា ភាគីទាំងពីរបានព្រមព្រៀងគ្នារក្សាកម្លាំងយោធារបស់ខ្លួនក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងពេលកិច្ចព្រមព្រៀងបទឈប់បាញ់ចូលជាធរមាន នៅម៉ោង១២រំលងអធ្រាត្រ ថ្ងៃទី២៨ ខែកក្កដា ឆ្នាំ២០២៥ ឡើយ ។ ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការដើរល្បាតលើទីតាំងរបស់ភាគីម្ខាងទៀតឡើយ ៕

ប្រទេសថៃ ៖ ពលរដ្ឋ និងអាជីវករថៃលក់ដូរនៅផ្សារឆងចម ខេត្តសុរិន្ទ និងខេត្តបុរីរាំ ពុំត្រូវការលោកស្រី ផេថងថាន ស៊ីណាវ៉ាត់ ត្រឡប់មកកាន់តំណែងជានាយករដ្ឋមន្ត្រីវិញទេ ដោយសារបារម្ភពីជម្លោះព្រំដែនកម្ពុជា-ថៃអូសបន្លាយកាន់តែយូរ ។ បច្ចុប្បន្ន ពលរដ្ឋថៃនៅព្រំដែនពុំអាចលក់ដូរអ្វីបានឡើយ គ្មានចំណូលផ្គត់ផ្គង់ជីវភាព និងសងបំណង ហើយពួកគេចង់បាននាយករដ្ឋមន្ត្រីថ្មីប្រញប់ដោះស្រាយជម្លោះព្រំដែន និងស្តារសេដ្ឋកិច្ច ។

សារព័ត៌មានថៃ Ch7HD News រាយការណ៍ថា នាវេលាម៉ោង៣រសៀល ថ្ងៃទី២៩ ខែសីហា ឆ្នាំ២០២៥នេះ តុលាការធម្មនុញ្ញប្រទេសថៃនឹងណាត់លោកស្រី ផេថងថាន ស៊ីណាវ៉ាត់ មកស្តាប់ការកាត់ក្តីករណីបែកធ្លាយកិច្ចសន្ទនារបស់លោកស្រី ជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។ ហេតុនេះ អ្នកសារព័ត៌មានបានធ្វើដំណើរមកផ្សារព្រំដែនឆងចម ឃុំដាន ស្រុកកាបឈើង ខេត្តសុរិន្ទ ដើម្បីសួរមតិពលរដ្ឋពីតុលាការធម្មនុញ្ញកាត់ក្តីលោកស្រី ផេថងថាន ។

លោក សុផាន់ អាជីវករលក់សាច់ជ្រូកនៅផ្សារឆងចម និយាយថា លោកពុំចង់ឱ្យលោកស្រី ផេថងថង ត្រឡប់មកកាន់នាយករដ្ឋមន្ត្រីទេ ដោយសារបារម្ភពីជម្លោះព្រំដែនអូសបន្លាយ ។ លោកចង់បាននាយករដ្ឋមន្ត្រីថ្មីមកដឹកនាំប្រទេស ស្តារសេដ្ឋកិច្ច ជាពិសេស ដោះស្រាយជម្លោះព្រំដែនយ៉ាងឆាប់រហ័សដើម្បីឱ្យពលរដ្ឋអាចប្រកបរបរបាន ពេលនេះ ពិបាកខ្លាំងំាស់ លក់ដូរអ្វីក៏ពុំដាច់ ពីព្រោះគ្មានអតិថិជន ។

ចំណែកអ្នកស្រី អារុណ លក់ផ្លែឈើនៅផ្សារឆងចម ចង់ឱ្យផ្លាស់ប្តូរនាយករដ្ឋមន្ត្រីដើម្បីប្រទេសជាតិរីកចម្រើន ចង់ឃើញនាយករដ្ឋមន្ត្រីថ្មីអភិវឌ្ឍន៍ប្រទេសពិតប្រាកដ ស្មោះត្រង់ ជាពិសេស ស្តារសេដ្ឋកិច្ច និងបញ្ចប់ជម្លោះព្រំដែន ។ អ្នកស្រីពុំចង់បានលោកស្រី ផេថងថាន ជានាយករដ្ឋមន្ត្រីទេ ពលរដ្ឋនៅព្រំដែនចង់បានសន្តិភាព និងដោះស្រាយបញ្ហាឆាប់ៗដើម្បីអាចរកស៊ីចិញ្ចឹមគ្រួសារ ។ អ្នកស្រីសំណូមពរឱ្យធនាគារ និងអ្នកផ្តល់កម្ចីឯកជនកំណត់វិធានការបន្ធូរបន្ថយការសងបំណងសម្រាប់ពលរដ្ឋព្រំដែន ពីព្រោះពលរដ្ឋបាត់បង់ចំណូលដោយសារជម្លោះអូសបន្លាយ ។

ពលរដ្ឋផ្សេងទៀតក៏ចង់បាននាយករដ្ឋមន្ត្រីថ្មីដែរ ដែលជាបុគ្គលអព្យាក្រឹត មានសមត្ថភាពដោះស្រាយបញ្ហាសេដ្ឋកិច្ច និងបញ្ចប់ជម្លោះយ៉ាងឆាប់រហ័ស ពីព្រោះជម្លោះព្រំដែនកាន់តែអូសបន្លាយ ពលរដ្ឋកាន់តែលំបាក ។ ពេលនេះ ហាងលក់ដូរផ្សេងៗនៅផ្សារឆងចមបិទទ្វារដោយសារគ្មានអតិថិជន និងភ្ញៀវទេសចរមកប្រទេសថៃ ខណៈហាងខ្លះលក់ដូរឡើងវិញដើម្បីទទួលបានចំណូលខ្លះទុកជម្លៀសចេញពីលំនៅឋានម្តងទៀត ។

ដូចគ្នានេះ ពលរដ្ឋនៅស្រុកបានក្រួត ខេត្តបុរីរាំ ដែលរងផលប៉ះពាល់ដោយសារកងទ័ពថៃបាញ់ប្រហារមុនមកលើកម្ពុជាកាលពីចុងខែកក្កដា ឆ្នាំ២០២៥ ក៏ពុំចង់ឱ្យលោកស្រី ផេថងថាន ត្រឡប់មកកាន់តំណែងឡើងវិញដែរ ពីព្រោះបារម្ភពីជម្លោះព្រំដែនជាមួយកម្ពុជាកាន់តែអូសបន្លាយ ។ ពួកគេតាមដានព័ត៌មានថា តើតុលាការធម្មនុញ្ញនឹងសម្រេចដូចម្តេចលើជោគវាសនាលោកស្រី ផេថងថាន ។

ពលរដ្ឋថៃនៅព្រំដែនភាគច្រើនពុំត្រូវការលោកស្រី ផេថងថាន ទៀតទេ ដោយសារមានបញ្ហាជម្លោះរវាងកម្ពុជា-ថៃកើតឡើង រហូតឈានទៅកើតសង្គ្រាមធ្វើឱ្យពលរដ្ឋជម្លៀសចេញពីលំនៅឋាន ដោយសារលោកស្រី ផេថងថាន ដឹកនាំប្រទេសគ្មានប្រសិទ្ធភាព ជាពិសេស ការបែកធ្លាយកិច្ចសន្ទនាកាន់តែធ្វើឱ្យពលរដ្ឋបាត់បង់ទំនុកចិត្ត ៕