មិនមាត់ៗ កុយ អេនណា ចេញលិខិតបំភ្លឺពីមេធាវីតែម្តងដោយរក្សាសិទ្ធិចា.ត់វិធានការតាមច្បា.ប់

ទើបតែបញ្ចប់បេកសកម្មសប្បុរសធម៌ប្រកបដោយភាពជោគជ័យទទួលបានថវិកាជាច្រើនម៉ឺនដុល្លារស្រាប់តែបវរកញ្ញា កុយ អេនណា ត្រូវរងនូវការវែកញែកពីម្ចាស់ផលិតផលម្នាក់ដោយបង្ហោះចោទប្រកាន់ សួររកការងារព្រោះបានកក់លុយរួចហើយ។ ទោះយ៉ាងណា បន្ទាប់ពីស្ងៀមស្ងាត់មួយអន្លើ អេនណា ស្រាប់តែចេញលិខិតមេធាវីតែម្តងដោយបំភ្លឺទាក់ទងនឹងការចោទប្រកាន់។

នៅយប់ថ្ងៃទី២០ ខែតុលា ឆ្នាំ២០២៥ កុយ អេនណា បានបង្ហោះលិខិតជូនដំណឹងជាសាធារណៈពីមេធាវីទៅកាន់គណនី ហ្វេកប៊ុកឈ្មោះ Makara Moum (ហេង មករា) បានផុសនូវ status ជាច្រើនដែលជាព័ត៌មានមិនពិតនាំឱ្យប៉ះពាល់យ៉ាងខ្លាំងដល់កិត្តិយស សេចក្តីថ្លៃថ្នូរ ប្រជាប្រិយភាពរបស់នាង។ អ្វីដែលគណនីនេះបានបង្ហោះចាប់តាំងពីថ្ងៃទី១៩ រហូតដល់ថ្ងៃទី២០ ខែតុលា កុយ អេនណា បានអះអាងថាមិនធ្លាប់ស្គាល់ ឬធ្លាប់ទំនាក់ទំនងដោយផ្ទាល់ជាមួយម្ចាស់ប្រេន MKM (Makara Moum) ប្រើប្រាស់គណនីហ្វេកប៊ុកឈ្មោះ Makara Moum (ហេង មករា) នោះទេ។ កន្លងមកនាងក៏ធ្លាប់បដិសេធមិនប្រម៉ូតផលិតផលអំឡុងពេលកំពុងធ្វើដំណើរថ្មើរជើងផងដែរ។

ក្រោយមកបុគ្គលខាងលើដែលប្រើប្រាស់តេឡេក្រាមឈ្មោះ Doctor Riko ក៏បានទាក់ទងមកក្រុមការងាររបស់នាងនិងជជែកគ្នាអំពីលក្ខខណ្ឌ និងតម្លៃការងារប៉ុន្តែពេលនោះនៅមិនទាន់មានការព្រមព្រៀងនៅឡើយតែបានជាឃើញគណនីហ្វេកប៊ុកឈ្មោះ Makara Moum (ហេង មករា) បានផុសស្វាគមន៍នាងផ្សព្វផ្សាយផលិតផល ខណៈដែលខាងក្រុមការងាររបស់នាងក៏បានទាក់ទងប្រាប់ទៅបុគ្គលឈ្មោះ Doctor Riko សុំឱ្យម្ចាស់ប្រេន ជួយលុប Status នោះវិញព្រោះនាងមិនទាន់បានចុះកិច្ចព្រមព្រៀង និងទទួលកម្រៃ ដើម្បីទទួលធ្វើការផ្សព្វផ្សាយផលិតផលនោះទេ។

ក្នុងលិខិតបំភ្លឺដដែលនេះ កុយ អេនណា បានបញ្ជាក់ថាចាប់តាំងពី ថ្ងៃដែលបុគ្គលឈ្មោះ Doctor Riko ទាក់ទងមកក្រុមការងាររបស់នាងរហូតមកដល់បច្ចុប្បន្ន នាងពុំធ្លាប់បានទទួលប្រាក់កក់ថ្លៃទទួលធ្វើការផ្សព្វផ្សាយផលិតផលឱ្យក្រុមហ៊ុនខាងលើនេះនោះទេ។ ចំណែកឯម្ចាស់ផលិតផលមិនបានសួរនាំក្រុមការងាររបស់ខ្លួនឱ្យបានច្បាស់លាស់។ ចំពោះករណីម្ចាស់ប្រេនបានផ្ញើលុយថ្លៃសេវាការងារឱ្យទៅបុគ្គលឈ្មោះ Doctor Riko ចំនួនប៉ុន្មានជារឿងរវាងអ្នកទាំងពីរមិនពាក់ព័ន្ធនឹងនាងឡើយ។

ចំពោះការបង្ហោះខ្លឹមសារជាសាធារណៈដោយមិនបានទាក់ទងសួរនាងដោយផ្ទាល់បែបនេះធ្វើឱ្យមានការបញ្ចេញមតិវែកញែក ដែលធ្វើឱ្យប៉ះពាល់យ៉ាងខ្លាំងដល់កេរ្តិ៍ឈ្មោះ កិត្តិយស សេចក្តីថ្លៃថ្នូរ ប្រជាប្រិយភាព និងការងាររបស់នាងក្នុងនាមជាសិល្បៈការនី, ជាទូតសុឆន្ទៈ (Brand Ambassador) តំណាងឱ្យផលិតផលជាច្រើននិងជាទូតសុឆន្ទៈរបស់សមាគមតន្ត្រីសំនៀងជនពិការ ផងដែរ។

កុយ អេនណា បានអះអាងដោយច្បាស់ៗថានាងជាមនុស្សសុចរិត និងមានទំនួលខុសត្រូវ ខ្ពស់ចំពោះការងារ ដែលបានទទួលកន្លងមកនិងបានបំពេញសកម្មភាពសប្បុរស ជាច្រើនដើម្បីជួយសង្គមជាតិផងដែរ។ ដូច្នេះនាងរក្សាសិទ្ធិក្នុងការចាត់វិធានការចំពោះបុគ្គលដែលបានបរិហារកេរ្តិ៍នាងតាមផ្លូវច្បាប់៕