ប្រទេសថៃ៖ បើទោះជាធូរស្បើយពីព្យុះ ប៉ុន្តែស្ថានភាពទឹកជំនន់នៅក្នុងប្រទេសថៃហាក់មិនទាន់ថមថយទៅណាឡើយ ដោយថ្មីៗនេះទំនប់ចៅប្រាយ៉ាដែលជាទំនប់ទឹកដ៏ធំមួយរបស់ថៃ បានបង្កើនការបញ្ចេញទឹករហូតដល់2,000ម៉ែត្រគូបក្នុងមួយវិនាទី ដែលលើសពីកម្រិតធម្មតារបស់វាត្រឹម 1,400 ទៅ 1,500ម៉ែត្រគូបក្នុងមួយវិនាទីប៉ុណ្ណោះ។ កត្តានេះបានជំរុញឲ្យអាជ្ញាធរថៃប្រកាសឲ្យខេត្តចំនួន 5 ត្រៀមខ្លួនទប់ទល់និងផ្លាស់ទីទៅរកកន្លែងសុវត្ថិភាពជាបន្ទាន់។

យោងតាមការចុះផ្សាយរបស់សារព័ត៌មានថៃ The Nation នៅថ្ងៃទី14 ខែកញ្ញា ឆ្នាំ2025 បានឲ្យដឹងថា នាយកដ្ឋានធារាសាស្ត្រ (RID) បានបង្កើនអត្រាបញ្ចេញទឹកពីទំនប់ Chao Phraya ក្នុងខេត្ត Chainat ដល់ 2,000 ម៉ែត្រគូបក្នុង 1 វិនាទី ដើម្បីគ្រប់គ្រងបរិមាណដ៏ច្រើននៃទឹកជំនន់ដែលចូលមកពីភាគខាងជើងប្រទេសថៃ។

គិតត្រឹមម៉ោង 6:00ព្រឹកថ្ងៃដដែល ការវាស់វែងបានបង្ហាញស្ថានភាពផ្លាស់ប្ដូរចុងក្រោយថា ទឹកនៅផ្នែកខាងលើនៃទំនប់មានកម្ពស់រហូតដល់ទៅ 17.31ម៉ែត្រ ខណៈទឹកខាងក្រោមមានកម្ពស់ 14.68 ម៉ែត្រ។ ជាមួយគ្នានោះនាយកដ្ឋាន RID បានព្រមានថា ទំនប់នៅខាងក្រោមទឹកចំនួន ៥ ដែល នឹងរងមានហានិភ័យនៃទឹកជំនន់មានដូចជា៖

នៅស្រុក Tambon នៅក្នុងខេត្ត Ang Thong, ស្រុក Klong Phong Pheng ខេត្តអាយុធ្យា, ឃុំ Bang Bal និង Hua Wiang នៅក្នុងស្រុក Sena, Talad Chid និង Tha Din Daeng នៅក្នុងស្រុក Phak Hai (Ayutthaya)។

បន្ថែមពីនោះ នាយកដ្ឋាន RID បាននិយាយថា ស្ថានភាពភ្លៀងធ្លាក់ និងទឹកជំនន់នឹងមានបន្តកាន់តែច្រើន ខណៈពេលដែលកិច្ចខិតខំប្រឹងប្រែងកំពុងត្រូវបានធ្វើឡើងទាំងយប់ទាំងថ្ងៃដើម្បីបញ្ចៀសទឹក និងដែរក្សាសុវត្ថិភាពប្រជាជន។

គួរជម្រាបផងដែរថា ក្រៅពីការកើនឡើងនៃទឹកទន្លេ នាយកដ្ឋានឧតុនិយមថៃក៏បានចេញការព្រមានអំពីភ្លៀងធ្លាក់ខ្លាំង និងផ្គររន្ទះខ្លាំងនៅថ្ងៃចន្ទ ទី១៥ ខែកញ្ញា ដោយទីក្រុងបាងកក ភាគខាងកើត និងភាគខាងត្បូងប្រឈមមុខនឹងការធ្លាក់ភ្លៀងរហូតដល់ ៧០%។

ការព្យាករណ៍ចុងក្រោយបង្អស់បានបង្ហាញថា ក្នុងរយៈពេល 24 ម៉ោងបន្ទាប់ ភូមិភាគឦសាន តំបន់កណ្តាល រួមទាំងទីក្រុងបាងកក និងតំបន់ជុំវិញ ខាងកើត និងខាងត្បូងនឹងបន្តមានភ្លៀងធ្លាក់ខ្លាំង ហើយស្ថានភាពនេះគឺបង្កឡើងដោយខ្យល់មូសុងដែលឆ្លងកាត់តំបន់ភាគកណ្តាល ភាគខាងត្បូង និងខាងកើតរបស់ប្រទេសថៃ៕

ប្រទេសថៃ ៖ អ្នកជំនាញថៃម្នាក់បានលើកឡើងពីមូលហេតុ ៧ចំណុចដែលថៃគួរតែបើកព្រំដែនដឹកទំនិញជាមួយកម្ពុជាដើម្បីផលប្រយោជន៍សេដ្ឋកិច្ចរបស់ខ្លួន ហើយអ្នកជំនាញរូបនេះក៏បានដាស់តឿនពលរដ្ឋថៃជ្រុលនិយមផងដែរកុំឱ្យខឹងសម្បារ និងស្ពប់ខ្ពើ.មពលរដ្ឋខ្មែរហួសហេតុ រហូតដល់មើលរំលងផលប៉ះពាល់សេដ្ឋកិច្ចថៃរយៈពេលយូរ ។ នេះបើតាមការផ្សព្វផ្សាយរបស់សារព័ត៌មានថៃ Khaosod នៅថ្ងៃទី១៣ ខែកញ្ញា ឆ្នាំ២០២៥ ។

នៅថ្ងៃទី១២ ខែសីហា អ្នកស្រី ភួងថង ផារ៉ាកផាន់ សាស្ត្រាចារ្យនៅសាកលវិទ្យាល័យជុឡាឡុងកន បានសរសេរក្នុងហ្វេសប៊ុករបស់ខ្លួនដើម្បីសំណូមពរឱ្យពលរដ្ឋថៃយល់ពីការបើកព្រំដែនកម្ពុជា-ថៃដើម្បីដឹកទំនិញរវាងប្រទេសទាំងពីរ គឺជាផលប្រយោជន៍សេដ្ឋកិច្ចរបស់ថៃខ្លួនឯង ។

មន្ត្រីស្ថានទូតជប៉ុនប្រចាំប្រទេសថៃបានសំណូមពរឱ្យរដ្ឋាភិបាលថៃបើកព្រំដែនជាមួយកម្ពុជាដើម្បីដឹកទំនិញ ប៉ុន្តែបែរជាត្រូវក្រុមជ្រុលនិយមថៃរិះគន់យ៉ាងចាស់ដៃ ពីព្រោះយល់ថា ការនាំចេញទំនិញថៃនឹងធ្វើឱ្យកម្ពុជាកាន់តែរឹងមាំ ។ ពលរដ្ឋថៃចង់ដាក់សម្ពាធកម្ពុជាដោយការបំផ្លាញសេដ្ឋកិច្ច ហើយគិតថា ថៃពុំរងផលប៉ះពាល់អ្វីសោះ គឺអ្នកជំនាញថៃថា ការគិតបែបនេះខុសទាំងស្រុង និងលើកឡើងពីមូលហេតុ ៧ចំណុចដែលថៃគួរបើកព្រំដែន រួមមាន ៖

១-ទំនិញដែលក្រុមហ៊ុនជប៉ុនត្រូវការឱ្យឆ្លងដែនកម្ពុជា-ថៃ ពុំមែនជាទំនិញប្រើប្រាស់ប្រចាំថ្ងៃទេ ប៉ុន្តែជាទំនិញឧស្សាហកម្មដែលផលិតនៅប្រទេសមួយ និងនាំចេញទៅដំឡើងនៅប្រទេសមួយទៀត ។ ហេតុនេះ ការបិទព្រំដែនកម្ពុជា-ថៃ បានធ្វើឱ្យក្រុមហ៊ុនជប៉ុនរងផលប៉ះពាល់ ។

២-ស្ថានទូតជប៉ុនថា ក្រុមហ៊ុនជប៉ុនរងផលប៉ះពាល់ដោយសារការបិទព្រំដែន ពីព្រោះក្រុមហ៊ុនជប៉ុនបានវិនិយោគនៅថៃ និងកម្ពុជា តាមគោលនយោបាយ Thailand Plus ដែលបង្កើតតាំងពីឆ្នាំ២០១៩ ឬបង្កើតពេលលោក ប្រាយុទ្ធ ចាន់អូចា ជានាយករដ្ឋមន្ត្រី ។ គោលនយោបាយនេះលើកទឹកចិត្តឱ្យវិនិយោគិនបរទេសដែលរងផលប៉ះពាល់ដោយសារសង្គ្រាមពាណិជ្ជកម្មរវាងអាមេរិក-ចិន ឱ្យងាកមកវិនិយោគនៅតំបន់អាស៊ីអាគ្នេយ៍កាន់តែច្រើន ។

ពេលនោះ ថៃស្នើឱ្យក្រុមហ៊ុនបរទេសផលិតគ្រឿងបម្លាស់ឧស្សាហកម្មនៅកម្ពុជា ពីព្រោះប្រាក់ឈ្នួលនៅថៃខ្ពស់ជាង បន្ទាប់មក ក្រុមហ៊ុនបរទេសអាចបញ្ជូនគ្រឿងបម្លាស់ឧស្សាហកម្មមកដំឡើងនៅថៃដោយទទួលការលើកលែងពន្ធ ដើម្បីទាញយកផលប្រយោជន៍ពីតំបន់ពាណិជ្ជកម្មសេរី ។

៣-កាលពីឆ្នាំ២០២៤ រដ្ឋាភិបាលថៃបាននាំវិនិយោគិនបរទេសជាង២០នាក់ ទៅពិនិត្យមើលតំបន់សេដ្ឋកិច្ចពិសេសរបស់កម្ពុជា ក្នុងគោលបំណងទាក់ទាញវិនិយោគិនបរទេសឱ្យមកវិនិយោគនៅថៃតាមគោលនយោបាយ Thailand Plus ។

៤-ការបិទព្រំដែនកម្ពុជា-ថៃបានប៉ះពាល់ដល់ការផលិតរបស់ក្រុមហ៊ុនផ្សេងៗ ហើយក្រុមហ៊ុនថៃក៏រងផលប៉ះពាល់ដែរ ប៉ុន្តែពួកគេពុំហ៊ាននិយាយ ។ ការបិទព្រំដែនផ្លូវគោកធ្វើឱ្យក្រុមហ៊ុនជប៉ុនងាកទៅដឹកជញ្ជូនតាមផ្លូវអាកាស និងផ្លូវទឹកវិញ ដែលធ្វើឱ្យក្រុមហ៊ុនជប៉ុនចំណាយលើការដឹកជញ្ជូនទំនិញខ្ពស់ជាងមុនរាប់រយលានបាតក្នុង១ខែ ។

ជប៉ុនពុំពាក់ព័ន្ធនឹងជម្លោះទេ ប៉ុន្តែជប៉ុនមកវិនិយោគនៅថៃ ព្រោះជឿថា រដ្ឋាភិបាលថៃនឹងផ្តល់ភាពងាយស្រួលដល់ក្រុមហ៊ុនជប៉ុនតាមការព្រមព្រៀងគ្នា ប៉ុន្តែរដ្ឋាភិបាលថៃបែរជាបិទព្រំដែនធ្វើឱ្យពិបាកដល់ក្រុមហ៊ុនជប៉ុន ក្រោមមូលហេតុជាតិនិយម និងស្ពប់ខ្ពើមពលរដ្ឋខ្មែរ ។ ជប៉ុននឹងធុញទ្រាន់ថៃ ហើយឆាប់ៗនេះ ជប៉ុននឹងយល់ថា ថៃពុំអាចផ្តល់ទំនុកចិត្តដល់ក្រុមហ៊ុនខ្លួនទៀតទេ ។

៥-ការបិទព្រំដែនប៉ះពាល់ដល់ការផលិតទំនិញក្នុងឧស្សាហកម្មថៃ ទោះជាទំនិញរបស់ក្រុមហ៊ុនជប៉ុន ប៉ុន្តែប្រាក់ចំណូលពីការនាំចេញជាប្រាក់ចំណូលរបស់ប្រទេសថៃផងដែរ ពីព្រោះជនជាតិថៃកាន់ភាគហ៊ុនជាមួយក្រុមហ៊ុនជប៉ុន ហើយកម្មករធ្វើការក៏ជាជនជាតិថៃ ។

៦-អ្វីគួរចាប់អារម្មណ៍ គឺលោក ណាត់ថាផុង ណាកផានិច រដ្ឋមន្ត្រីក្រសួងការពារជាតិបានយល់ច្បាស់ពីផលប៉ះពាល់សេដ្ឋកិច្ចថៃ និងមានចំណេះដឹងច្រើន ទើបលោកសុំកម្ពុជាបើកព្រំដែនឡើងវិញ ។ ប៉ុន្តែកូនចៅរបស់លោក គឺលោក ប៊ុនស៊ីន ផាកក្លាង មេបញ្ជាការយោធភូមិភាគ២ ដែលរស់នៅព្រំដែនរហូតមក ពុំយល់ពីផលប៉ះពាល់សេដ្ឋកិច្ចថៃ បែរជាមានគំនិតផ្ទុយពីថ្នាក់លើ ដោយសារលោក ប៊ុនស៊ីន ចេះដឹងផ្នែកសង្គ្រាមច្រើនជាងសេដ្ឋកិច្ច ។ លោក ប៊ុនស៊ីន គួរឈ្វេងយល់ពីសេដ្ឋកិច្ច នយោបាយ និងទំនាក់ទំនងបរទេសឱ្យច្រើនជាងនេះ ។

៧-ថៃនាំចេញទំនិញទៅកម្ពុជាក្នុង១ខែៗស្មើទឹកប្រាក់ជាច្រើនម៉ឺនលានបាត ទោះជាមានការហាមឃាត់នាំចេញទំនិញសម្រាប់ប្រើប្រាស់ប្រចាំថ្ងៃទៅកម្ពុជា ប៉ុន្តែថៃបានរងផលប៉ះពាល់សេដ្ឋកិច្ចខ្លាំងជាង គឺប៉ះពាល់ទាំងម្ចាស់រោងចក្រ និងពលករថៃដោយសារការបិទព្រំដែន ។

កម្ពុជាអាចទិញទំនិញពីវៀតណាម និងចិន ដែលទំនិញប្រទេសទាំងពីរមានតម្លៃថោកជាងទំនិញថៃ គឺថៃបាត់បង់ទីផ្សារនៅកម្ពុជា ខណៈអ្នកជំនាញថៃបានចំណាយពេលរហូតដល់ជាង៣០ឆ្នាំ ទម្រាំអាចបង្កើតទីផ្សារកម្ពុជាបាន ។ តើយើងយល់ព្រមឱ្យបាត់បង់ទីផ្សារកម្ពុជាមែនទេ? តើជនជាតិថៃខឹងសម្បាររហូតមើលរំលងផលប៉ះពាល់សេដ្ឋកិច្ចដែលកើតឡើងមកលើខ្លួនឯងរយៈពេលយូរ ឬក៏យ៉ាងណា?

ប្រទេសថៃ ៖ ប្រទេសថៃបានរងគ្រោះធម្មជាតិមិនឈប់ឈរដោយសារឥទ្ធិពលខ្យល់ព្យុះបណ្តាលឱ្យភ្លៀងធ្លាក់ខ្លាំង និងទឹកហូរពីតំបន់ព្រៃភ្នំបង្កើតជាទឹកជំនន់លិចលង់តាមបណ្តាខេត្ត ។ ក្រៅពីជួបទុក្ខលំបាកដោយសារទឹកលិចផ្ទះសម្បែង ពលរដ្ឋថៃរស់នៅទាំងភ័យខ្លា.ចដោយសារក្រពើមកជាមួយទឹកជំនន់ ដូចជា ថ្មីៗនេះ ពលរដ្ឋនៅខេត្តរ៉ាក់យ៉ងបានឃើញក្រពើធំ១ក្បាលប្រវែងជាង២ម៉ែត្រតាមផ្លូវបង្កការភ័យខ្លា.ចលែងហ៊ានធ្វើដំណើរ ឬចុះទឹក ខណៈខេត្តអយុធ្យាមានក្រពើហែលមកដល់ក្រោមផ្ទះ ។

កាលពីថ្ងៃទី១៤ ខែកញ្ញា ឆ្នាំ២០២៥ សារព័ត៌មាន Thairath រាយការណ៍ថា ខេត្តអយុធ្យាក៏មានទឹកជំនន់ដូចបណ្តាខេត្តផ្សេងៗដែរ ហើយពលរដ្ឋភ្ញាក់ផ្អើលយ៉ាងខ្លាំងក្រោយពីឃើញក្រពើហែលទឹកមកដល់ក្រោមផ្ទះ ខណៈអាជ្ញាធរជូនដំណឹងឱ្យពលរដ្ឋប្រុងប្រយ័ត្នដើម្បីចៀសវាងគ្រោះថ្នាក់កើតឡើងដោយសារសត្វសាហាវ ។

តាមសេចក្តីរាយការណ៍ គឺកាលពីថ្ងៃទី១៤ ខែកញ្ញា ពលរដ្ឋរស់នៅភូមិ៥ ឃុំថាឌិនឌែង ស្រុកផាកហៃ ខេត្តអយុធ្យា បានឃើញក្រពើជាបន្តបន្ទាប់នៅក្រោមផ្ទះ ក្រោយពីផ្ទះសម្បែងពួកគេជន់លិចដោយសារកម្ពស់ទឹកទន្លេណយកើនឡើងខ្ពស់ ដែលធ្វើឱ្យអ្នកស្រុកពុំហ៊ានចុះពីលើផ្ទះ បានត្រឹមតែប្រាប់គ្នាឱ្យប្រុងប្រយ័ត្ន ។

ស្ត្រីចំណាស់ឈ្មោះ នូនប្រាង អនឡាអរ អាយុ៧៩ឆ្នាំ និយាយទាំងភ័យខ្លាចថា ២ថ្ងៃមុន អ្នកជិតខាងបានឃើញក្រពើហែលក្រោមផ្ទះ ប៉ុន្តែមិនប្រាកដចិត្តថា វាជាការពិតឬអត់ ។ កាលពីថ្ងៃទី១៣ ខែកញ្ញា ពេលលោកយាយកំពុងសម្អាតផ្ទះ ស្រាប់តែឃើញក្រពើនៅក្រោមផ្ទះខ្លួនឯង ប៉ុន្តែដោយសារមិនប្រាកដចិត្ត ក៏អុំទូកទៅមើលជិតៗឃើញថា ជាក្រពើពិតមែន មានប្រវែងជាង១ម៉ែត្រ ហើយវាបានហែលទឹកទៅកន្លែងផ្សេងធ្វើឱ្យលោកយាយលែងហ៊ានចុះទឹក ។

បើតាមការលើកឡើងរបស់មេឃុំថាឌិនឌែង លោក ឌិរេក ភូសាវ៉ាត គឺមានអ្នកថតរូបក្រពើធ្វើឱ្យពលរដ្ឋត្រូវរស់នៅជាមួយទឹកជំនន់ទាំងភ័យខ្លាច ពេលនេះ អាជ្ញាធរបានជូនដំណឹងឱ្យពលរដ្ឋប្រុងប្រយ័ត្ន ។ អាជ្ញាធរបានពិនិត្យមើលស្ថានការណ៍តាមស្រុកជារៀងរាល់យប់ ដើម្បីផ្តល់ទំនុកចិត្តដល់ពលរដ្ឋ ពេលមានហេតុការណ៍អ្វីកើតឡើងនឹងជួយអន្តរាគមន៍ ។

គួរបញ្ជាក់ថា នៅភូមិ៥ ឃុំថាឌិនឌែង ស្រុកផាកហៃ ខេត្តអយុធ្យា មានទឹកជំនន់ជារៀងរាល់ឆ្នាំ ប៉ុន្តែពលរដ្ឋទើបតែឃើញក្រពើជាលើកដំបូងនៅឆ្នាំ២០២៥ ប៉ុន្តែពុំដឹងថាមានក្រពើនៅក្នុងទឹកជំនន់ប៉ុន្មានក្បាលទេ ។

កាលពីថ្ងៃទី៧ ខែកញ្ញា នៅឃុំម៉ាខាមយូ ខេត្តរ៉ាក់យ៉ង មានក្រពើធំ១ក្បាលប្រវែងជាង២ម៉ែត្របង្ហាញខ្លួនតាមផ្លូវបង្កការភ័យខ្លាចដល់ពលរដ្ឋ ក្រោយពីខេត្តនេះលិចទឹកជំនន់ដោយសារភ្លៀងធ្លាក់ខ្លាំង ខណៈអាជ្ញាធរសន្និដ្ឋានថា ក្រពើអាចរួចពីទ្រុងពេលទឹកជំនន់ ៕

ថៃ៖ ដោយសម្លឹងឃើញពីភាពខ្វះខាតកម្លាំងពលកម្មនៅក្នុងប្រទេសចេះតែបន្តយូរទៅៗក្រោយពលករខ្មែរត្រឡប់មកផ្ទះវិញ រដ្ឋាភិបាលថៃក៏បានសម្រេចចិត្តអនុញ្ញាតឲ្យជនភៀសខ្លួនមីយ៉ាន់ម៉ានៅតាមព្រំដែន អាចឆ្លងចូលមកក្នុងប្រទេសខ្លួននិងផ្ដល់ការងារឲ្យធ្វើក្នុងនាមជាពលករចំណាកស្រុកជាបណ្ដោះអាសន្ន ចាប់ពីថ្ងៃទី១ ខែតុលាតទៅ។ នេះបើយោងតាមសារព័ត៌មាន The Nation របស់ថៃ។

សេចក្តីសម្រេចដែលត្រូវបានអនុម័តដោយគណៈរដ្ឋមន្ត្រីនៅថ្ងៃទី១៣ ខែកញ្ញានេះ មានគោលបំណងដោះស្រាយបញ្ហាកង្វះកម្លាំងពលកម្មនៅក្នុងខេត្តភាគកណ្តាល និងភាគខាងកើតរបស់ប្រទេសថៃ ដោយមានផ្តល់លិខិតអនុញ្ញាតការងាររយៈពេលមួយឆ្នាំដល់អ្នកដែលរស់នៅក្នុងជម្រកបណ្តោះអាសន្នចំនួនប្រាំបួនទីតាំងតាមបណ្ដោយព្រំដែនថៃនិងមីយ៉ាន់ម៉ា។

បន្ថែមពីលើសេចក្ដីសម្រេចនេះ លោក Chamnanwit Terat អនុរដ្ឋលេខាធិការក្រសួងមហាផ្ទៃថៃ គូសបញ្ជាក់ថា ក្រសួងរបស់លោកនៅពេលនេះកំពុងធ្វើការជាមួយក្រសួងការងារ ដើម្បីបញ្ចប់ដំណើរការចុះឈ្មោះសម្រាប់ពលករប្រមាណ ៤០,០០០នាក់មកពីប្រទេសមីយ៉ាន់ម៉ា។

លោក Chamnanwit បានបញ្ជាក់បន្ថែមថា ជនភៀសខ្លួនដែលមានបំណងចូលធ្វើការនៅប្រទេសថៃ ត្រូវតែមកចុះឈ្មោះជាមួយមន្ទីររដ្ឋបាលខេត្តជាមុនសិន។ ពួកគេនឹងទទួលបានការរក្សាសិទ្ធិរស់នៅក្នុងជំរុំភៀសខ្លួនរបស់ពួកគេ ដែលនឹងត្រូវដាក់ពាក្យស្នើសុំទៅមេស្រុករបស់ពួកគេជាមុនសិន ដើម្បីសុំការអនុញ្ញាតឱ្យចេញធ្វើការនៅខាងក្រៅតំបន់បាន។

ក្រោយមកនៅពេលមានការយល់ព្រម ការិយាល័យការងារខេត្តនឹងពិនិត្យលក្ខខណ្ឌរបស់បេក្ខជននីមួយៗក្នុងការជ្រើសរើសជំនាញ ដែលមានចាប់ពីអាជីវកម្មដូចជាជាងឈើ និងកម្មករសំណង់ រហូតដល់ការងារទូទៅ មុននឹងបញ្ជូនពួកគេទៅតាមក្រុមហ៊ុន ឬរោងចក្រ និងធ្វើកិច្ចសន្យា។

កម្មករនិយោជិតក៏នឹងត្រូវបានតម្រូវឱ្យឆ្លងកាត់ការត្រួតពិនិត្យសុខភាព និងមានការធានារ៉ាប់រងសុខភាពផងដែរ មុនពេលចេញលិខិតអនុញ្ញាតការងារ។ ការអនុញ្ញាតនឹងមានសុពលភាពរហូតដល់មួយឆ្នាំ បន្ទាប់ពីនោះកម្មករត្រូវត្រឡប់ទៅកន្លែងស្នាក់នៅវិញ។

គួរឲ្យកត់សម្គាល់ថា ចាប់តាំងពីពលករខ្មែរបានវិលចូលប្រទេសវិញស្ទើតែទាំងស្រុងមក ប្រទេសថៃចាប់ផ្ដើមជួបវិបត្តិខ្វះខាតកម្លាំងពលកម្មជាខ្លាំង ធ្វើឲ្យរោងចក្រ ចម្ការ និងការដ្ឋានសំណង់រាប់សិបមុឺនកន្លែងថយចុះល្បឿននៃការផលិត ឬកន្លែងមួយចំនួនបានផ្អាកសកម្មភាពជាបណ្ដោះអាសន្នតែម្ដង។

ឆ្លើយតបនឹងបញ្ហានេះ អ្នកជំនាញសេដ្ឋកិច្ចថៃបានព្រ.មានថា ភាពខ្វះចន្លោះនៃកម្លាំងពលកម្មភ្លាមៗក្រោយពលករខ្មែរចាកចេញនេះ បានគូសបញ្ជាក់ពីការពឹងផ្អែកជាយូរមកហើយរបស់ថៃលើពលករបរទេស។ បន្ថែមពីលើនេះ រដ្ឋាភិបាលថៃត្រូវរិះរកវិធានការដោះស្រាយជាបន្ទាន់ដើម្បីទប់ស្កាត់ការអាក់ខាន ឬផ្អាកខ្សែសង្វាក់ផលិតរបស់ឧស្សាហកម្មថៃ ដើម្បីចៀសវាងការខាតបង់ផ្នែកសេដ្ឋកិច្ចរយៈពេលវែង៕