បាងកក៖ ភាពយន្តឯកសាររបស់ទូរទស្សន៍ BBC ថ្មីមួយដែលមានចំណងជើងថា “Thailand: The Dark Side of Paradise” ឬដែលមានន័យថា «ប្រទេសថៃ: ផ្នែកខ្មៅងងឹតនៃស្ថានសួគ៌» បានបង្កឱ្យមានភាពចម្រូងចម្រាស និងទាក់ទាញមតិរិះគន់យ៉ាងខ្លាំងពីសំណាក់ជនជាតិថៃ ក្រោយភាពយន្តនេះបានឆ្លុះបញ្ជាំងពីប្រទេសនៅក្នុងផ្លូវអវិជ្ជមាន។ នេះបើយោងតាមការចុះផ្សាយរបស់សារព័ត៌មាន The Nation។

នៅថ្ងៃទី12 ខែកញ្ញា ឆ្នាំ2025 ប្រភពខាងលើនេះបានឲ្យដឹងថា កម្មវិធីដែលបានចាក់ផ្សាយនាពេលថ្មីៗនេះរបស់ BBC នៅក្នុងចក្រភពអង់គ្លេសបានលាតត្រដាងពីបញ្ហាចាក់ស្រេសជាច្រើនដូចជាឧ.ក្រិដ្ឋ.កម្ម ការកេ.ងប្រវ័ញ្ច អំពើពុ.ករលួយ អំពើពេ.ស្យាចា.រ និងជីវិតពេលរាត្រីនៅក្នុងតំបន់ទេសចរណ៍ដ៏ពេញនិយមរបស់ថៃ។

ទស្សនិកជនដែលជាជនជាតិថៃជាច្រើននាក់បានសម្តែងការខកចិត្តតាមប្រព័ន្ធអ៊ីនធឺណេត ដោយចោទប្រកាន់ភាពយន្តឯកសារនេះថាបំផ្លើសបញ្ហា និងមិនបានបង្ហាញពីទិដ្ឋភាពវិជ្ជមានរបស់ប្រទេសថៃ។ អ្នករិះគន់ទាំងនោះបាននិយាយថា កម្មវិធីនេះអាចប៉ះពាល់ដល់កេរ្តិ៍ឈ្មោះរបស់ប្រទេសថៃនៅលើឆាកអន្តរជាតិ ជាពិសេសនៅក្នុងពេលដែលប្រទេសពួកគេកំពុងធ្វើការដើម្បីស្តារឧស្សាហកម្មទេសចរណ៍របស់ខ្លួនឡើងវិញ បន្ទាប់ពីមានវិបត្តិនៃជំងឺរាតត្បាតអស់រយៈពេលជាច្រើនឆ្នាំ។

ទោះជាយ៉ាងណាក៏ដោយ អ្នកគាំទ្រភាពយន្តឯកសារបានចេញមកការពារការរាយការណ៍របស់ BBC ដោយនិយាយថា បញ្ហាដែលBBC បានបង្ហាញទាំងឡាយ រាប់ចាប់ពីការជួញដូរមនុស្សរហូតដល់ការបោកប្រាស់ដែលផ្តោតលើភ្ញៀវទេសចរ គឺជាក្ដីបារម្ភពិតប្រាកដដែលសមនឹងទទួលបានការយកចិត្តទុកដាក់ពីអន្តរជាតិ។ ពួកគេបានអះអាងទៀតថា ការទទួលស្គាល់បញ្ហាទាំងនេះ គឺជារឿងចាំបាច់ប្រសិនបើថៃចង់ដោះស្រាយវាឲ្យមានប្រសិទ្ធភាព។

ទន្ទឹមនឹងនេះ ការជជែកវែកញែកអំពីរបៀបដែលប្រព័ន្ធផ្សព្វផ្សាយអន្តរជាតិបង្ហាញពីប្រទេសថៃនេះក៏កំពុងបន្តយ៉ាងក្ដៅគគុក ដោយមន្ត្រីនិងអ្នកតស៊ូមតិផ្នែកទេសចរណ៍ថៃបានសង្កត់ធ្ងន់ឲ្យមានការរាយការណ៍ និងប្រមូលទិន្នន័យប្រកបដោយតុល្យភាព។

យ៉ាងណាមិញ បើទោះបីជាមានការរិះគន់ខ្លាំងៗពីសំណាក់ពលរដ្ឋថៃយ៉ាងណាក៏ដោយ ក៏ BBC មិនបានឆ្លើយតបជាសាធារណៈចំពោះការទាមទារនេះដែរ ចំពេលដែលការពិភាក្សាអំពីផលប៉ះពាល់នៃឯកសារនេះនៅតែបន្តផ្សព្វផ្សាយទាំងតាមអ៊ីនធឺណិត និងក្នុងប្រព័ន្ធផ្សព្វផ្សាយរបស់ថៃ៕

ប្រទេសថៃ ៖ ស្របពេលខេត្តជាច្រើនរបស់ថៃរងគ្រោះដោយខ្យល់ព្យុះ ទឹកជំនន់ និងបាក់ដី នៅខេត្តរ៉ាក់យ៉ងឯណោះវិញមានហេតុការណ៍ភ្លើងឆេះរោងចក្រផ្លាស្ទិកយ៉ាងសន្ធោសន្ធៅបណ្តាលឱ្យមានការភ័យជ្រួលច្របល់ទាំងកម្មកររោងចក្រ និងអ្នករស់នៅជុំវិញ ។ ទោះជាមានការជួយអន្តរាគមន៍បញ្ជូនរថយន្តបា.ញ់ទឹកជាច្រើនគ្រឿងក្តី ក៏ប៉ុន្តែទ្រព្យសម្បត្តិក្នុងរោងចក្របានខូចខាតខ្ទេចអស់គ្មានសល់ ។

នៅថ្ងៃទី១៣ ខែកញ្ញា ឆ្នាំ២០២៥ សារព័ត៌មានថៃ Khaosod រាយការណ៍ថា រោងចក្រផ្លាស្ទិកមួយកន្លែងនៅខេត្តរ៉ាក់យ៉ង បានឆេះយ៉ាងសន្ធោសន្ធៅបណ្តាលឱ្យមានផ្សែងខ្មៅហុយពាសពេញអាកាសគួរឱ្យតក់ស្លុតបំផុត ថែមទាំងសាយភាយក្លិនឈ្ងៀមពេញតំបន់ទាំងអស់ ខណៈភ្នាក់ងារពន្លត់ភ្លើងបា.ញ់ទឹករហូតដល់ជាង៣ម៉ោងទើបភ្លើងរលត់ ។ ហេតុការណ៍នេះពុំបណ្តាលឱ្យមនុស្សរងរបួស ឬស្លា.ប់ទេ ប៉ុន្តែបំផ្លា.ញទ្រព្យសម្បត្តិក្នុងរោងចក្រស្មើទឹកប្រាក់រាប់លានបាត ។

នាវេលាម៉ោង៨ព្រឹក ថ្ងៃទី១៣ ខែកញ្ញា អាជ្ញាធរខេត្តរ៉ាក់យ៉ងបានទទួលសេចក្តីរាយការណ៍មានភ្លើងឆេះរោងចក្រផ្លាស្ទិករបស់ក្រុមហ៊ុមមួយនៅឃុំម៉ាបតាផុត ស្រុកមឿង ខេត្តរ៉ាក់យ៉ង ក៏បញ្ជូនភ្នាក់ងារពន្លត់ភ្លើងទៅពិនិត្យមើលកន្លែងកើតហេតុ រួមទាំងបញ្ជូនរថយន្តបាញ់ទឹក ។ រោងចក្រនេះត្រូវបានភ្លើងឆេះយ៉ាងឆាប់រហ័ស ដោយសារមានផ្លាស្ទិកជាច្រើនត្រូវកែច្នៃឡើងវិញ ហើយភ្នាក់ងារប្រើប្រាស់រថយន្តបាញ់ទឹករហូតដល់១២គ្រឿង និងចំណាយពេលជាង៣ម៉ោង ទើបភ្លើងរលត់ ប៉ុន្តែភ្លើងបានឆេះរោងចក្រទាំងមូលខូចខាតទ្រព្យសម្បត្តិទាំងអស់ ។

អភិបាលខេត្តរ៉ាក់យ៉ង លោក ផាសាកន ប៊ុនយ៉ាឡាក់ បានបញ្ជាឱ្យចៅហ្វាយស្រុកមឿង និងប្រធាននាយកដ្ឋានសន្តិសុខខេត្តរ៉ាក់យ៉ង រួមទាំងមន្ត្រីពាក់ព័ន្ធចុះពិនិត្យមើលកន្លែងកើតហេតុដើម្បីជួយសង្គ្រោះបន្ទាន់ ។ បើតាមពលរដ្ឋនៅម្តុំរោងចក្រនេះនិយាយថា បានឮសូរសំឡេងផ្ទុះជាច្រើនលើកក្នុងរោងចក្រមុនពេលកើតហេតុ ក្រោយមក ភ្លើងក៏បានឆេះយ៉ាងខ្លាំង ខណៈកម្មកររោងចក្រប្រាប់ថា ឃើញអណ្តាតភ្លើងតាំងពីម៉ោង៦និង៣០នាទីព្រឹកមកម៉្លេះ (ព្រឹកថ្ងៃទី១៣ ខែកញ្ញា ) ។

ហេតុនេះ កម្មករបានជួយគ្នាពន្លត់ភ្លើង ប៉ុន្តែពុំអាចពន្លត់ភ្លើងបានទេ គឺភ្លើងឆេះកាន់តែខ្លាំងយ៉ាងឆាប់រហ័ស ទើបប្រញាប់ជូនដំណឹងទៅភ្នាក់ងារពន្លត់ភ្លើងឱ្យមកជួយអន្តរាគមន៍ ។ គួរឱ្យសោកស្តាយ ទម្រាំភ្នាក់ងារគ្រប់គ្រងស្ថានការណ៍បាន ភ្លើងបានឆេះរោងចក្រ និងបំផ្លាញទ្រព្យសម្បត្តិអស់គ្មានសល់ ។

ក្រោយភ្លើងរលត់ មជ្ឈមណ្ឌលគ្រប់គ្រងខ្យល់ពុល និងការិយាល័យឧស្សាហកម្មខេត្តរ៉ាក់យ៉ង បានបញ្ជូនភ្នាក់ងារមកត្រួតពិនិត្យគុណភាពខ្យល់នៅជុំវិញរោងចក្រចម្ងាយប្រមាណ៥គីឡូម៉ែត្រ ដោយសារធុំក្លិនឈ្ងៀមផ្លាស្ទិកពេញតំបន់ទាំងអស់ ហើយលទ្ធផលត្រួតពិនិត្យខ្យល់ជំហ៊ានដំបូងបញ្ជាក់ថា កម្រិតខ្យល់ធម្មតា ។ មូលហេតុបណ្តាលឱ្យភ្លើងឆេះរោងចក្រពុំដឹងច្បាស់លាស់ទេ រង់ចាំការពិសោធន៍ភស្តុតាង រីឯទ្រព្យសម្បត្តិក្នុងរោងចក្របានខូចខាតអស់រាប់លានបាត ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ The Better News ឱ្យដឹងថា កាលពីថ្ងៃទី១២ ខែកញ្ញា ឆ្នាំ២០២៥ ក្រសួងការបរទេសថៃបានប្រកាសពីគោលជំហរពុំបើកព្រំដែនជាមួយកម្ពុជាដាច់ខាត លុះត្រាតែកម្ពុជាបំពេញលក្ខខណ្ឌ៣ចំណុច រួមមាន ៖ ការដកថយអាវុធធុនធ្ងន់ បោសសម្អាតមីន និងបង្ក្រាបបទល្មើសអនឡាញ ។ ការប្រកាសបិទព្រំដែនជាឯកតោភាគីបន្តទៀត គឺក្រោយពីពលរដ្ឋថៃប្រឆាំងនឹងការបើកព្រំដែនក្នុងបណ្តាញសង្គម និងស្តីបន្ទោសជប៉ុនចូលមកជ្រៀតជ្រែកដែលសំណូមពរឱ្យកម្ពុជា-ថៃបើកព្រំដែនមួយចំនួន ។

លោក ណាត់ថាផុង ណាកផានិច រដ្ឋមន្ត្រីក្រសួងការពារជាតិថៃបានប្រកាសលទ្ធផលកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង ថា ថៃមានគម្រោងបើកព្រំដែនជាមួយកម្ពុជាមួយចំនួនឡើងវិញដើម្បីសម្រួលការដឹកទំនិញ ក្រោយពីជប៉ុនសំណូមពរ ពីព្រោះការបិទព្រំដែនរបស់ប្រទេសទាំងពីរធ្វើឱ្យជប៉ុនរងផលប៉ះពាល់ខ្លាំង ។ ប៉ុន្តែពលរដ្ឋថៃបានប្រឆាំងដាច់ខាតក្នុងបណ្តាញសង្គមកុំឱ្យថៃបើកព្រំដែន ពីព្រោះខ្លាចចាញ់ប្រៀបសេដ្ឋកិច្ចកម្ពុជា ហើយថៃពុំទាន់ដណ្តើមបានអ្វីដែលខ្លួនចង់ រហូតពលរដ្ឋថៃប្រកាសទម្លាក់នាយករដ្ឋមន្ត្រីថ្មី លោក អនុថីន ឆាន់វីរៈគូន បើហ៊ានបើកព្រំដែន ។

លោក និកនឌេត ផ្លាំងគូន អ្នកនាំពាក្យក្រសួងការបរទេសនិយាយថា ក្រសួងការបរទេសថៃរីករាយចំពោះលទ្ធផលកិច្ចប្រជុំ GBC កម្ពុជា-ថៃ ដែលភាគីទាំងពីរប្តេជ្ញាចិត្តគោរពបទឈប់បាញ់ និងព្រមព្រៀងលើបញ្ហាមួយចំនួន នេះជាការវិវឌ្ឍដ៏សំខាន់ ហើយថៃបានជំរុញឱ្យកម្ពុជាបោសសម្អាតមីន និងបង្ក្រាបបទល្មើសអនឡាញ ។ កិច្ចប្រជុំ GBC ក៏បានពិភាក្សាពីប្រធានបទផ្សេងទៀតដែលផ្តល់ប្រយោជន៍សន្តិសុខ និងសុវត្ថិភាពពលរដ្ឋប្រទេសទាំងពីរ ជាពិសេស នៅតំបន់ព្រំដែន រួមមាន ៖ ការដកថយអាវុធធុនធ្ងន់, ការដោះស្រាយបញ្ហានៅព្រំដែនភូមិណងចាន់ ខេត្តស្រះកែវ (ទល់មុខភូមិជោគជ័យ), កាត់បន្ថយការញុះញង់, ពុំផ្សាយព័ត៌មានក្លែងក្លាយ និងបើកព្រំដែនមួយចំនួនដើម្បីដឹកទំនិញ ដោយចាប់ផ្តើមបើកនៅតំបន់ពុំសូវមានភាពតានតឹងមុនគេ ។

លោក និកនឌេត បានប្រកាសគោលជំហរដូចគ្នាជាមួយលោក ណាត់ថាផុង រដ្ឋមន្ត្រីក្រសួងការពារជាតិថា ថៃពុំទាន់បើកព្រំដែនជាមួយកម្ពុជាពេលនេះទេ ហើយថៃនឹងពុំបើកព្រំដែនសម្រាប់ដឹកទំនិញអ្វីទាំងអស់ បើកម្ពុជាពុំបំពេញតាមលក្ខខណ្ឌ៣ចំណុច រួមមាន ៖ ការដកថយអាវុធធុនធ្ងន់ បោសសម្អាតមីន និងបង្ក្រាបបទល្មើសអនឡាញ ដើម្បីបង្ហាញពីទំនុកចិត្តរវាងគ្នា ។ កិច្ចប្រជុំ GBC គឺជាជោគជ័យនៃការប្រើប្រាស់យន្តការទ្វេភាគីដើម្បីដោះស្រាយបញ្ហាជម្លោះ ហើយប្រទេសទាំងពីរនឹងរៀបចំកិច្ចប្រជុំពិសេស GBC បន្តទៀតក្នុងរយៈពេល៣០ថ្ងៃចាប់ពីបញ្ចប់កិច្ចប្រជុំលើកនេះ ដែលថៃនឹងធ្វើជាម្ចាស់ផ្ទះ ។

ចំណែកលោក ណាត់ថាផុង រដ្ឋមន្ត្រីក្រសួងការពារជាតិ ក្រោយពីរងការរិះគន់ខ្លាំងពេកពីពលរដ្ឋថៃ លោកក៏ឆ្លើយថា ថៃពុំទាន់បើកព្រំដែនពេលនេះទេ គឺនឹងផ្តោតលើការការពារអធិបតេយ្យជាតិ និងពលរដ្ឋជាចម្បង ។ ការបើកព្រំដែនជាដំណាក់កាលបន្ទាប់ ថៃនឹងរង់ចាំកម្ពុជាបង្ហាញពីភាពស្មោះត្រង់ និងអនុវត្តតាមកិច្ចព្រមព្រៀងជាមុនសិន ប្រទេសទាំងពីរគ្រោងបើកព្រំដែនមួយចំនួនដើម្បីដឹកទំនិញដោយសារមានការសំណូមពរពីជប៉ុនជាប្រទេសទី៣ បន្ទាប់ពីក្រុមហ៊ុនជប៉ុនរងផលប៉ះពាល់ខ្លាំង ។

គួរបញ្ជាក់ថា ពលរដ្ឋថៃបានចូលទៅបញ្ចេញមតិប្រឆាំងក្នុងហ្វេសប៊ុកផេករបស់ស្ថានទូតជប៉ុនប្រចាំប្រទេសថៃក្រោយពីជប៉ុនសុំឱ្យបើកព្រំដែនកម្ពុជា-ថៃ ដោយពលរដ្ឋថៃថា ជប៉ុនដាក់សម្ពាធឱ្យបើកព្រំដែន ជប៉ុនជាប្រទេសទី៣ ពុំគួរជ្រៀតជ្រែកបញ្ហាជម្លោះកម្ពុជា-ថៃ ។ បើកម្ពុជាពុំបំពេញលក្ខខណ្ឌ៣ចំណុចរបស់ថៃទេ គឺគ្មានការបើកព្រំដែនរវាងប្រទេសទាំងពីរដាច់ខាត ៕

ប្រទេសថៃ ៖ ក្រោយបញ្ចប់កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី១០ ខែកញ្ញា ឆ្នាំ២០២៥ ហើយភាគីទាំងពីរព្រមព្រៀងលើប្រធានបទជាច្រើន រួមទាំងគ្រោងបើកព្រំដែនមួយចំនួនឡើងវិញដើម្បីដឹកទំនិញ បានធ្វើឱ្យអ្នកនយោបាយ និងពលរដ្ឋថៃជជែកយ៉ាងក្តៅគគុកពីរឿងការបើកព្រំដែន មានទាំងមតិយល់ស្រប និងប្រឆាំង ។ មតិយល់ស្របបានអរគុណនាយករដ្ឋមន្ត្រីថ្មីដែលគ្រោងបើកព្រំដែនជួយកាត់បន្ថយផលប៉ះពាល់សេដ្ឋកិច្ច រីឯមតិប្រឆាំងចង់ឱ្យបិទព្រំដែនបន្ត កុំបញ្ជូនផលិតផលថៃមកកម្ពុជា និងគំរា.មធ្វើបាតុកម្មដូចនេប៉ាល់ បើរដ្ឋាភិបាលថ្មីហ៊ានបើកព្រំដែន ។

លើសពីនេះ មេបញ្ជាកងទ័ពថៃ រួមទាំងលោក ប៊ុនស៊ីន ផាក្លាង មេបញ្ជាការយោធភូមិភាគ២ ក៏បានប្រឆាំងការបើកព្រំដែនមួយចំនួនឡើងវិញដែរ ដោយសារបារម្ភខ្លាចថៃខាតបង់ផលប្រយោជន៍សេដ្ឋកិច្ច និងចាញ់ប្រៀបកម្ពុជា ។ ក្រោយបញ្ចប់កិច្ចប្រជុំ GBC ភ្លាម ស្រាប់តែកងទ័ពថៃចោទប្រកាន់កម្ពុជាសារជាថ្មីថា រកឃើញគ្រាប់មីនថ្មីពុំស្គាល់ប្រភេទនៅបន្ទាត់ព្រំដែនដើរល្បាតក្បែរបរិវេណប្រាសាទតាក្របី ខណៈកងទ័ពថៃធ្លាប់ប្រើល្បិចចោទប្រកាន់បែបនេះពេលបញ្ចប់កិច្ចប្រជុំម្តងៗដើម្បីរករឿងទម្លាក់កំហុសលើកម្ពុជា ។

បន្ទាប់ពីមានការជជែកយ៉ាងក្តៅគគុកពេញបណ្តាញសង្គម និងខ្វែងគំនិតគ្នារវាងអ្នកនយោបាយថៃ លោក ភូមិថាំ វីឆាយ៉ាឆៃ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃនិយាយថា កងទ័ពជាអ្នកសម្រេចចិត្តបើក-បិទព្រំដែនកម្ពុជា-ថៃ ពីព្រោះរដ្ឋាភិបាលចាស់របស់គណបក្សភឿថៃបានប្រគល់អំណាចឱ្យកងទ័ពរួចហើយ ។ លោកជឿថា រដ្ឋាភិបាលថ្មីរបស់គណបក្សភូមិចៃថៃ បានតែងតាំងលោក ណាត់ថាផុង ណាកផានិច កាន់តំណែងជារដ្ឋមន្ត្រីការពារជាតិ គឺនឹងបំពេញការងារព្រំដែនបានល្អ ខណៈលោក អនុថីន ឆាន់វីរៈគូន ពុំចង់ផ្លាស់ប្តូរអ្នកកាន់តំណែងនេះដោយសារជម្លោះកម្ពុជា-ថៃពុំទាន់បញ្ចប់ ។

នៅវិមានរដ្ឋាភិបាល លោក ភូមិថាំ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃបាននិយាយពីស្ថានការណ៍ព្រំដែនកម្ពុជា-ថៃ ដែលពលរដ្ឋថៃនៅតែប្រកែកគ្នារឿងការបើកព្រំដែន ដែលមានទាំងមតិយល់ស្រប និងប្រឆាំងការបើកព្រំដែន ។ លោក ភូមិថា ថា កាលពីព្រឹកថ្ងៃទី១២ ខែសីហា អនុប្រធានគណបក្សភូមិចៃថៃនិយាយថា កិច្ចប្រជុំ GBC កម្ពុជា-ថៃ គឺអនុវត្តតាមគោលនយោបាយរបស់រដ្ឋាភិបាលចាស់ (រដ្ឋាភិបាលគណបក្សភឿថៃ) ពីព្រោះរដ្ឋាភិបាលចាស់បានប្រគល់អំណាចឱ្យកងទ័ពមានសិទ្ធិបើក-បិទព្រំដែន ។

លោក ភូមិថាំ បន្តថា ការបិទព្រំដែនបានប៉ះពាល់ការធ្វើពាណិជ្ជកម្ម គ្រប់គ្នាដឹងហើយកាលពីអាណត្តិរដ្ឋាភិបាលចាស់គណបក្សភឿថៃ គឺក្រុមប្រឹក្សាសន្តិសុខជាតិបានប្រគល់អំណាចឱ្យកងទ័ព និងក្រសួងការពារជាតិ មានអំណាចបើក-បិទព្រំដែនកម្ពុជា-ថៃ ។ កងទ័ពនឹងពិចារណាត្រូវធ្វើដូចម្តេចដើម្បីឱ្យស្ថានការណ៍ជម្លោះធូរស្រាលវិលរកប្រក្រតីវិញ ដូច្នេះ កងទ័ពជាអ្នកសម្រេចចិត្តបើក-បិទព្រំដែន ។

កងទ័ពភូមិភាគ២ នឹងទទួលខុសត្រូវបណ្តាខេត្តព្រំដែននៅភាគឦសាន ខណៈខេត្តស្រះកែវ ជាការទទួលខុសត្រូវរបស់កងទ័ពភូមិភាគ១ ។ រីឯខេត្តចាន់បុរី និងខេត្តត្រាត ជាការទទួលខុសត្រូវរបស់កងកម្លាំងការពារព្រំដែនខេត្តចាន់បុរី-ត្រាត ពីព្រោះកងទ័ពដឹងច្បាស់នឹងដោះស្រាយបញ្ហា និងផលប៉ះពាល់ដូចម្តេចសម្រាប់ពលរដ្ឋប្រទេសទាំងពីរ ជាពិសេស ផលប៉ះពាល់អាជីវកម្ម ។ តាំងពីថៃមានរដ្ឋាភិបាលថ្មី នាយករដ្ឋមន្ត្រីថ្មី លោក ភូមិថៃ ជាមន្ត្រីគណបក្សភឿថៃពុំបានធ្វើអ្វី ឬពិនិត្យអ្វីទេ លើកលែងតែការងារចាំបាច់ ហើយការបើក-បិទព្រំដែន គឺលោក ភូមិថាំ ឱ្យសួរយោបល់កងទ័ព និងក្រសួងការពារជាតិ ។

ចំណែកលោក ណាត់ថាផុង ណាកផានិច ដែលមានតួនាទីជាអនុរដ្ឋមន្ត្រីក្រសួងការពារជាតិក្នុងអាណត្តិរដ្ឋាភិបាលចាស់ ពេលនេះ នាយករដ្ឋមន្ត្រីថ្មី លោក អនុថីន ឆាន់វីរៈគូន បានតែងតាំងលោកជារដ្ឋមន្ត្រីក្រសួងការពារជាតិ និងមានសិទ្ធិអំណាចពេញលេញក្នុងការដោះស្រាយជម្លោះព្រំដែន ។ ប៉ុន្តែពលរដ្ឋថៃមើលឃើញថា បច្ចុប្បន្ន លោក ណាត់ថាផុង ហាក់បន្ទន់ឥរិយាបថ ពុំម៉ឺងម៉ាត់ដូចមុន ។

លោក ភូមិថាំ ជឿជាក់លោក ណាត់ថាផុង នឹងបំពេញតួនាទីជារដ្ឋមន្ត្រីក្រសួងការពារជាតិបានល្អ ដោយសារលោកមានចំណេះដឹង សមត្ថភាព និងជាកងទ័ពជើងចាស់ ។ ប៉ុន្តែបញ្ហាសំខាន់អាស្រ័យលើគោលនយោបាយរបស់រដ្ឋាភិបាលថ្មីដូចម្តេច ហើយលោក ណាត់ថាផុង នឹងអនុវត្តតាមគោលនយោបាយរបស់រដ្ឋាភិបាលថ្មី ។

គួរបញ្ជាក់ថា គណបក្សភឿថៃបានប្រគល់អំណាចឱ្យកងទ័ពសម្រេចចិត្តបិទព្រំដែនដោយឯកតោភាគី និងចោទប្រកាន់កងទ័ពកម្ពុជាល្មើសអធិបតេយ្យ ពេលនេះ ទោះជាថៃមាននាយករដ្ឋមន្ត្រីថ្មី ប៉ុន្តែកងទ័ពនៅតែជ្រៀតជ្រែកកិច្ចការព្រំដែនដដែល ។ តាំងពីរដ្ឋាភិបាលចាស់ រហូតដល់រដ្ឋាភិបាលថ្មី កងទ័ពថៃនៅតែបន្តចោទប្រកាន់កម្ពុជាបង្កប់មីន និងគំរាមបើកងទ័ពថៃដាច់ជើងលើកទី៧ ពួកគេនឹងបាញ់ក្លាំភ្លើងធំតែម្តង ៕

ប្រទេសថៃ ៖ គម្រោងបើកព្រំដែនកម្ពុជា-ថៃមួយចំនួនឡើងវិញសម្រាប់ដឹកទំនិញបានក្លាយជាប្រធានបទជជែកវែកញែកយ៉ាងខ្លាំងក្នុងបណ្តាញសង្គមប្រទេសថៃ ពលរដ្ឋថៃភាគច្រើនពុំគាំទ្រការបើកព្រំដែនទេដើម្បីទប់ស្កាត់កុំឱ្យនាំចេញទំនិញថៃមកកម្ពុជា ហើយពួកគេនឹងប្រមូលផ្តុំគ្នាធ្វើបាតុកម្មប្រឆាំងរដ្ឋាភិបាលថ្មី ដោយសារបារម្ភពីការបាត់បង់អធិបតេយ្យ ។ ប៉ុន្តែប្រធានសមាគមពាណិជ្ជកម្មខេត្តចាន់បុរីមានមតិផ្ទុយពីនេះថា ការបើកព្រំដែនជាមួយកម្ពុជាសម្រាប់ដឹកទំនិញនឹងមិនធ្វើឱ្យថៃបាត់បង់អធិបតេយ្យទេ ពលរដ្ឋគួរយល់ពីផលប៉ះពាល់ពាណិជ្ជកម្ម និងទេសចរណ៍ ។

ប្រធានសមាគមពាណិជ្ជកម្មខេត្តចាន់បុរីចង់ឱ្យពលរដ្ឋថៃដែលមានគំនិតជ្រុលនិយមយល់ពីព្រំដែននៅខេត្តចាន់បុរី និងខេត្តត្រាត គឺតំបន់នេះគ្មានជម្លោះ ឬប្រយុទ្ធគ្នាខ្លាំងក្លាទេ ។ ការបិទព្រំដែនកម្ពុជា-ថៃធ្វើឱ្យប៉ះពាល់ដល់ពាណិជ្ជកម្ម និងទេសចរណ៍ រីឯពលរដ្ឋខេត្តចាន់បុរីបង្ហាញក្តីរីករាយ បើប្រទេសទាំងពីរបើកព្រំដែនដឹកទំនិញដើម្បីដោះស្រាយវិបត្តិ ប៉ុន្តែពលរដ្ឋខេត្តចាន់បុរីថា មិនទុកចិត្តកម្ពុជា ។ នេះបើតាមការផ្សព្វផ្សាយរបស់សារព័ត៌មាន Thairath ។

កាលពីថ្ងៃទី១១ ខែកញ្ញា ឆ្នាំ២០២៥ លោក រ័ត្នថាវិត តាំងកៀតពេជ្រ ប្រធានសមាគមពាណិជ្ជកម្ម និងទេសចរណ៍ព្រំដែនកម្ពុជា-ថៃប្រចាំខេត្តចាន់បុរី បាននិយាយពីលទ្ធផលកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី១០ ខែកញ្ញា ឆ្នាំ២០២៥ ដែលភាគីទាំងពីរបានឯកភាពលើកិច្ចព្រមព្រៀងជាច្រើន ក្នុងនោះក៏មានការបើកព្រំដែនមួយចំនួនដើម្បីកាត់បន្ថយផលប៉ះពាល់អាជីវកម្ម និងការដឹកទំនិញឆ្លងដែន ។ ថៃគ្រោងបើកព្រំដែនខេត្តចាន់បុរី និងខេត្តត្រាតមុនគេសម្រាប់ដឹកទំនិញដោយសារជម្លោះពុំធ្ងន់ធ្ងរ និងគ្រោងបើកព្រំដែននៅខេត្តផ្សេងទៀត ប៉ុន្តែពលរដ្ឋថៃប្រឆាំងដាច់ខាត ។

លោកយល់ថា វាជាជោគជ័យមួយដែលភាគីទាំងពីរបានជជែកជាច្រើនប្រធានបទ សំខាន់ការបើកព្រំដែន ។ យើងត្រូវទទួលស្គាល់ថា ខេត្តចាន់បុរី និងខេត្តត្រាត ពុំមែនជាតំបន់មានជម្លោះ ឬប្រយុទ្ធគ្នាខ្លាំងក្លាទេ កម្ពុជា-ថៃមានទំនាក់ទំនងល្អជាមួយគ្នាយូរហើយនៅខេត្តទាំងពីរ ទាំងផ្នែកសន្តិសុខ និងឯកជន ។ លោកចង់ឱ្យពលរដ្ឋថៃនៅខេត្តផ្សេងយល់ពីហេតុការណ៍ជម្លោះខ្លាំងនៅបណ្តាខេត្តព្រំដែនភាគឦសានដែលទទួលខុសត្រូវដោយកងទ័ពភូមិភាគ២ និងជម្លោះប្រាសាទព្រះវិហារកាលពីឆ្នាំ២០១១ គឺខេត្តភាគខាងកើតពុំបានបិទព្រំដែនទេ ព្រំដែនបើកធម្មតា ។

ហេតុនេះ ការបើកព្រំដែនដឹកទំនិញនឹងមិនធ្វើឱ្យថៃបាត់បង់អធិបតេយ្យទេ ប៉ុន្តែពលរដ្ឋថៃប្រឆាំងការបើកព្រំដែនដោយសារខឹងសម្បារកម្ពុជា ។ យើងត្រូវបែងចែកឱ្យដាច់ពីគ្នា បច្ចុប្បន្ន ខេត្តចាន់បុរី និងខេត្តត្រាត បានរងផលប៉ះពាល់វិស័យទេសចរណ៍ ពាណិជ្ជកម្ម ជាពិសេស ប៉ះពាល់ផ្នែកកសិកម្ម សូមពលរដ្ឋនៅខេត្តផ្សេងយល់ពីផលប៉ះពាល់ទាំងនេះ ។

ចំណែកលោក អុគ្រីត វង្សថងសាលី ប្រធានសភាពាណិជ្ជកម្មខេត្តចាន់បុរីនិយាយថា លទ្ធផលកិច្ចប្រជុំ GBC កម្ពុជា-ថៃ កាលពីថ្ងៃទី១០ ខែកញ្ញា ឆ្នាំ២០២៥ គឺក្រុមហ៊ុនឯកជនគាំទ្រកងទ័ព និងរដ្ឋាភិបាលថ្មី ដែលគ្រោងបើកព្រំដែននៅខេត្តចាន់បុរី និងខេត្តត្រាត ដើម្បីកាត់បន្ថយផលប៉ះពាល់អាជីវកម្ម ។ សភាពាណិជ្ជកម្មខេត្តចាន់បុរីគាំទ្រការបើកព្រំដែន ប៉ុន្តែចង់ឱ្យរដ្ឋាភិបាលថ្មីប្តេជ្ញាចិត្តដោះស្រាយបញ្ហាព្រំដែនឱ្យខ្លាំងជាងនេះ ដោយប្រកាន់គោលជំហរការពារសន្តិសុខជាតិជាចម្បង និងច្បាស់លាស់មុនពេលបើកព្រំដែន ។ វានឹងផ្តល់ទំនុកចិត្តដល់ម្ចាស់អាជីវកម្មថា នឹងគ្មានជម្លោះកើតឡើងទៀត ក្រោយការបើកព្រំដែនឡើងវិញ ។

លោក ស៊ុមឃិត នៀមចាន់ អាយុ៦៤ឆ្នាំ ពលរដ្ឋរស់នៅស្រុកសយដាវ ខេត្តចាន់បុរី រីករាយបើបើកព្រំដែន ដើម្បីទទួលយកពលករខ្មែរមកធ្វើការ ។ នៅស្រុកសយដាវ ខ្វះពលករខ្មែរបេះផ្លែមៀន ពីព្រោះពលករខ្មែរមានជំនាញបេះមៀនជាងពលករថៃ ឬពូកែបេះជាងពលករប្រទេសផ្សេងៗ បើព្រំដែនបើកពិតមែននឹងជួយស្តារសេដ្ឋកិច្ច ។ ប៉ុន្តែលោកពុំជឿកម្ពុជានឹងដកអាវុធទេ គ្រាន់តែដកថយខ្លះប៉ុណ្ណោះ លោកចង់ឱ្យរដ្ឋាភិបាលដោះស្រាយបញ្ហាខ្វះពលករធ្វើការជាមុន រីឯបញ្ហាការគ្រប់គ្រងនយោបាយ ឬកងទ័ព ត្រូវឱ្យកងទ័ពចាត់ការ ។

គួរបញ្ជាក់ថា ភាគីចង់បើកព្រំដែនឡើងវិញ គឺថៃ ប៉ុន្តែលោក ណាត់ថាផុង ណាកផានិច រដ្ឋមន្ត្រីក្រសួងការពារជាតិបែរជាប្រាប់ពលរដ្ឋថា ថៃមិនចង់បើកព្រំដែនទេ ប៉ុន្តែដោយសារជប៉ុនសំណូមពរ ។ លោកនិយាយបែបនេះដើម្បីកុំឱ្យពលរដ្ឋស្តីបន្ទោស ព្រោះកន្លងមក លោកប្រកាន់គោលជំហរពុំបើកព្រំដែនដាច់ខាត រីឯពលរដ្ឋខ្មែរមិនចង់បើកព្រំដែនពេលនេះទេ ទោះជាជប៉ុនសំណូមពរក៏ដោយ ពីព្រោះបច្ចុប្បន្ន ទំនិញកម្ពុជាកំពុងទទួលបានការគាំទ្រយ៉ាងច្រើន ក្រុមហ៊ុនក្នុងស្រុកអាចផលិតទំនិញជាច្រើនប្រភេទ រួមទាំងចំណីអាហារដោយពុំចាំបាច់នាំចូលពីប្រទេសជិតខាង ពលរដ្ឋខ្មែរទាំងក្នុង និងក្រៅប្រទេសឈប់ទិញទំនិញថៃទៀតហើយ ។

ថៃកំពុងព្យាយាមដើរតួជាជនរងគ្រោះសារជាថ្មីក្រោយមានការសំណូមពរពីជប៉ុនសុំឲ្យភាគីទាំងពីរបើកព្រំដែនមួយចំនួនឡើងវិញ ដោយអ្នកនាំពាក្យរងរបស់កងទ័ពភូមិន្ទថៃបានប្រកាសក្ដែងៗនៅចំពោះអ្នកសារព័ត៌មានជាច្រើនថា ប្រសិនបើចង់ឲ្យការចរចាដើម្បីបើកច្រកព្រំដែនទទូលបានជោគជ័យ លុះត្រាតែភាគីម្ពុជាបញ្ឈប់ការគំរា.មកំហែ.ង និងដាក់សម្ពាធលើថៃជាមុនសិន។ នេះបើយោងតាមការចុះផ្សាយរបស់សារព័ត៌មាន The Nation។

នៅថ្ងៃទី12 ខែកញ្ញា អ្នកនាំពាក្យរងកងទ័ពថៃ លោក Wanchana Sawasdee បានសង្កត់ធ្ងន់ថា កម្ពុជាត្រូវតែបញ្ឈប់ការគំរាមកំហែងប្រឆាំងនឹងប្រទេសថៃជាមុន ប្រសិនបើចង់ឲ្យមានការចរចាព្រំដែនប្រកបដោយប្រសិទ្ធភាពត្រូវប្រព្រឹត្តទៅ។ លោកបានលើកឡើងថា ការសន្ទនាដែលឈរលើទស្សនៈផ្សេងគ្នាមិនអាចឈានទៅមុខបានទេ ខណៈដែលពាក្យសំដីបែបវែកញែកបាននិងកំពុងបន្តបង្កើនភាពតានតឹងរវាងប្រទេសជិតខាងទាំងពីរ។

ត្រង់ចំណុចនេះលោក Wanchana បានកត់សម្គាល់ថា ប្រទេសថៃបានត្រៀមខ្លួនរួចជាស្រេចដើម្បីពិភាក្សាអំពីតំបន់ជម្លោះនៅតាមព្រំដែន ប៉ុន្តែបានសង្កត់ធ្ងន់ថាក្នុងកាលទេសៈនេះ វាដាច់ខាតត្រូវតែគ្មានការគំរាមកំហែងពីភាគីម្ខាងទៀត។ លោកបានអះអាងថា ការគំរាមកំហែងមិនត្រឹមតែបំផ្លាញទំនុកចិត្តប៉ុណ្ណោះទេ ប៉ុន្តែថែមទាំងបង្កភាពផុយស្រួលដល់ជម្លោះដែលមិនចាំបាច់ផងដែរ។

គួរជម្រាបថា ការលើកឡើងរបស់អ្នកនាំពាក្យរងកងទ័ពថៃពាក់ព័ន្ធនឹងការ «គំរាមកំហែង» ខាងលើនេះ គឺចង់សំដៅដល់ការដាក់បង្កប់គ្រាប់មីនថ្មី ការបង្កើនឬចល័តយោធា រួមទាំងការប្រើប្រាស់វិធានការបិទព្រំដែនដើម្បីដាក់សម្ពាធលើសេដ្ឋកិច្ច ដែលថៃចោ.ទប្រកាន់ថា សុទ្ធសឹងតែជាអ្វីដែលកម្ពុជាកំពុងអនុវត្តក្នុងការប្រឆាំងនិងគំរាមទៅកាន់ថៃ។

ជាមួយគ្នានេះ បើតាមលោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុបជា បានយល់ឃើញថា កម្ពុជាមិនគួរបើកច្រកព្រំដែនគោកជាមួយថៃនៅពេលនេះទេ បើទោះបីជាមានសំណើរពីខាងជប៉ុន ក្នុងគោលបំណងធានាដល់ខ្សែច្រវាក់ផ្គត់ផ្គង់លើទំនិញដែលចាំបាច់ក៏ដោយ ព្រោះថៃមិនបានបង្ហាញពីការគោរពចំពោះកម្ពុជា។

បន្ថែមពីលើនេះ លោកបណ្ឌិតបានគូសបញ្ជាក់ជាបន្តទៀតថា ក្នុងនាមជាខ្មែររងការឈឺចាប់ មិនគាំទ្រឱ្យបើកព្រំដែនគោកពេលនេះទេ បើទោះជាជប៉ុនសំណូមពរក៏ដោយ។ ព្រោះឈឺមនសិការ…! កម្ពុជាគ្មានអ្វីលក់ទៅថៃទេ។ ហើយសូមឲ្យជប៉ុនអាចជួយរំលឹកថៃ ឱ្យចេះគោរពគោលការណ៍ជាអន្តរជាតិផង។ ព្រមទាំងចោទជាសំណួរខ្លីមួយថា តើការបើកការប្រយុទ្ធដ៏សាហាវរយៈពេល៥ថ្ងៃ កាលពីថ្ងៃទី២៤-២៨ កក្កដា ២០២៥កន្លងទៅ ថៃបានទទួលសំណូមពរពីជប៉ុនដែរមែនទេ?