មីយ៉ាន់ម៉ា និង ថៃ៖ អាជ្ញាធរខេត្តតាករបស់ថៃបានរាយការណ៍ថា មានជនបរទេសដែលសង្ស័យថាជាក្រុមជាប់ពាក់ព័ន្ធនឹងការបោ.កប្រាស់តាមអនឡាញចម្រុះជាតិសាសន៍ជិត ១,០០០ នាក់ បានរត់គេចខ្លួនពីប្រទេសមីយ៉ាន់ម៉ា ចូលទៅក្នុងប្រទេសថៃ ក្រោយយោធាមីយ៉ាន់ម៉ាបើកការបង្ក្រាបដោយបំផ្ទុះគ្រាប់បែ.កនៅតំបន់ KK-Park ដែលជាសម្បុកឧក្រិដ្ឋកម្មដ៏ធំមួយក្បែរព្រំដែនរវាងថៃ និងមីយ៉ាន់ម៉ា។

យោងតាមការចុះផ្សាយរបស់សារព័ត៌មាន The Nation នៅថ្ងៃទី២៥ ខែតុលា បានឲ្យដឹងថា ជនបរទេសដែលបានរត់គេចខ្លួនចូលមកកាន់ទឹកដីថៃប្រមាណ ១,០៤៩ នាក់ និងមានសរុប ២៦ ជាតិសាសន៍ ដែលភាគច្រើនជាជនជាតិឥណ្ឌា ចិន និងវៀតណាម បានឆ្លងកាត់ពីប្រទេសមីយ៉ាន់ម៉ា ពីស្រុក Myawaddy ទៅកាន់ស្រុក Mae Sot ខេត្ត Tak ប្រទេសថៃ។ បច្ចុប្បន្នកំពុងត្រូវបានឃុំខ្លួនដើម្បីត្រួតពិនិត្យរកអត្តសញ្ញាណពិតប្រាកដបន្ថែម ខណៈអាជ្ញាធរពាក់ព័ន្ធរបស់ថៃ បានសហការជាមួយស្ថានទូតរបស់ពួកគេ។

តាមរយៈវីដេអូដែលបានបង្ហោះនៅលើប្រព័ន្ធផ្សព្វផ្សាយ បានបង្ហាញពីការផ្ទុះដែលលាន់លឺសម្លេងកងរំពងនៅតំបន់ KK-Park ដែលហាក់ដូចជាយោធាមីយ៉ាន់ម៉ាបានបំផ្ទុះគ្រា.ប់បែកនៅទីនោះ ហើយមនុស្សម្នាបានផ្អើលចេញពីទីតាំងដែលពួកគេលាក់ខ្លួន ដោយមានអ្នកខ្លះត្រូវបានយោធាមីយ៉ាន់ម៉ាចាប់ខ្លួនបានភ្លាមៗ ខ្លះរត់ប្រសាចចូលទឹកដីថៃ និងខ្លះទៀតត្រូវបានចរន្តទឹកហូរគួចយកទៅបាត់ ខណៈព្យាយាមហែលទឹកគេចខ្លួនឆ្លងកាត់តាមទន្លេមឿយ។

មេដឹកនាំសហភាពជាតិការ៉ែន (KNU) ដែលប្រឆាំងនឹងរបបយោធាមីយ៉ាន់ម៉ាបានថ្លែងថា ការវា.យឆ្មក់បង្រ្កាបរបស់យោធាមីយ៉ាន់ម៉ាលើតំបន់ KK Park នេះ គឺគ្រាន់តែជាល្បិចបង្កើតរូបភាពដើម្បីបង្ហាញដល់សហគមន៍អន្តរជាតិ ជាជាងសកម្មភាពបោសសម្អាតឧក្រិដ្ឋកម្មពិតប្រាកដ។ លោកបានកត់សម្គាល់ថា ជនឆបោ.កជាច្រើននាក់នៅតែមានសកម្មភាពរបស់ពួកគេ បើទោះជាការបង្រ្កាបយ៉ាងខ្លាំងក្លានៅក្នុងប្រទេសមីយ៉ាន់ម៉ាក៏ដោយ។

គួរជម្រាបថា ចាប់តាំងពីមានការប្រកាសឲ្យមានការបង្រ្កាបពេញលេញលើបណ្ដាញក្រុមឪក្រិដ្ឋកម្មតាមអនឡាញមក កងទ័ពមីយ៉ាន់ម៉ាបានវា.យឆ្មក់មូលដ្ឋានបោកប្រាស់មជ្ឈមណ្ឌលអនឡាញដែលគេស្គាល់ឈ្មោះថា “KK Park” មានទីតាំងនៅទូទាំងស្រុក ម៉ែសត ក្នុងខេត្ត តាក របស់ប្រទេសថៃ ដោយបានចាប់ខ្លួនមនុស្សចំនួន ២,១៩៨ នាក់ រួមទាំងបុគ្គលិក និងសន្តិសុខ ព្រមទាំងរឹបអូសបានឧបករណ៍អ៊ីនធឺណេតផ្កាយរណប Starlink ដែលជារបស់មហាសេដ្ឋីអាម៉េរិក Elon Musk ចំនួន ៣០ គ្រឿង៕

សាអ៊ូឌីអារ៉ាប៊ីកំពុងបន្តបង្ហាញពីសុបិនបែបអនាគត ដោយបានប្រកាសគម្រោងសង់ពហុកីឡដ្ឋានថ្មីមួយ ដែលត្រូវបានគេស្គាល់ថា «Stadium in the Sky» ឬ «កីឡដ្ឋាននៅលើអាកាស»។ គម្រោងនេះជាផ្នែកមួយនៃគម្រោងអភិវឌ្ឍន៍អគ្គិសនីអនាគតឈ្មោះ NEOM ដែលរួមមានទីក្រុងឆ្លាតវៃ The Line ដែលជាគម្រោងមួយក្នុងចំណោមគម្រោងសំណង់ធំបំផុតក្នុងប្រវត្តិសាស្ត្រពិភពលោក។

បើតាមការរាយការណ៍ព័ត៌មានអន្តរជាតិ ពហុកីឡដ្ឋាននេះមានកម្ពស់ប្រមាណ ៣៥០ ម៉ែត្រពីដី ដែលស្ថិតនៅក្នុងគម្រោងទីក្រុងធំរបស់អាណាចក្រ NEOM។ វាត្រូវបានរចនាឡើងដោយអាចប៉ះពាល់ទៅលើបរិស្ថានតិចបំផុត និងប្រើប្រាស់ថាមពលសាធារណៈពីប្រភពថាមពលកកើតឡើងវិញ។

បន្ថែមពីនេះ ពហុកីឡដ្ឋានដ៏ប្រណិតនេះអាចផ្ទុកអ្នកទស្សនាបានប្រមាណ ៤៦,០០០នាក់ ហើយមានគោលបំណងសម្រាប់ដាក់ឲ្យប្រើប្រាស់នៅក្នុងព្រឹត្តិការណ៍បាល់ទាត់អន្តរជាតិ ពានរង្វាន់ FIFA World Cup 2034 ដែលសាអ៊ូឌីអារ៉ាប៊ីជាម្ចាស់ផ្ទះ។

យោងតាមប្រព័ន្ធផ្សព្វផ្សាយអារ៉ាប៊ីសាអូឌីត គម្រោងនេះគឺជាផ្នែកមួយនៃផែនការអភិវឌ្ឍន៍ Vision 2030 និងមានគោលបំណងបញ្ចូលគ្នានូវបច្ចេកវិទ្យាទំនើប ស្ថាបត្យកម្មប្រកបដោយចីរភាព និងទេសចរណ៍កីឡា។គម្រោង NEOM Stadium ត្រូវបានគេពិពណ៌នាថា មានផ្ទៃខាងក្រៅជាអក្សរឆ្លុះកញ្ចក់ និងអេក្រង់ LED ធំៗ ដែលអាចបង្ហាញវីដេអូ និងព្រឹត្តិការណ៍ផ្សេងៗ។

ទោះជាយ៉ាងណា គម្រោងដ៏អស្ចារ្យនេះ កំពុងស្ថិតនៅក្នុងដំណាក់កាល គំនិត និងរៀបចំផែនការ ប៉ុណ្ណោះ ដោយអាជ្ញាធរព្យាករថា ដំណើរការសាងសង់នឹងចាប់ផ្តើមនៅឆ្នាំ ២០២៧ ហើយអាចនឹងបញ្ចប់ក្នុងឆ្នាំ ២០៣២។

គួរបញ្ជាក់ថា គម្រោងដ៏មានមហិច្ឆតានេះបានគូសបញ្ជាក់ពីការប្តេជ្ញាចិត្តរបស់ប្រទេសអារ៉ាប៊ីសាអូឌីតក្នុងការក្លាយខ្លួនជាមជ្ឈមណ្ឌលសកលសម្រាប់កីឡា នវានុវត្តន៍ និងសំណង់បច្ចេកវិទ្យាខ្ពស់ ដែលឆ្លុះបញ្ចាំងពីគោលដៅទូលំទូលាយនៃចក្ខុវិស័យឆ្នាំ ២០៣០ ដើម្បីធ្វើពិពិធកម្មសេដ្ឋកិច្ចជាតិលើសពីប្រេង ឲ្យមានចីរភាព៕

បាងកក៖ នគរបាលភូមិន្ទថៃបានប្រតិកម្មនឹងរបាយការណ៍របស់សារព័ត៌មានកូរ៉េដែលចុះផ្សាយអំពីជនជាតិកូរ៉េខាងត្បូងសរុប ១១ នាក់ហើយ ដែលត្រូវបានចាប់ពង្រត់នៅប្រទេសថៃក្នុងឆ្នាំនេះ និងបញ្ជាក់ឲ្យថៃចាត់វិធានការសន្តិសុខជាបន្ទាន់។ នេះបើយោងតាមសារព័ត៌មាន The Thaiger។

ទាក់ទងនឹងរបាយការណ៍របស់ទីភ្នាក់ងារព័ត៌មាន The Korea Herald ដែលផ្អែកលើទិន្នន័យរបស់ក្រសួងការបរទេសកូរ៉េខាងត្បូងបានបង្ហាញថា ចំនួនជនជាតិកូរ៉េខាងត្បូងដែលត្រូវបានចាប់ពង្រត់នៅប្រទេសថៃក្នុងឆ្នាំនេះបានកើនឡើងដល់ ១១ នាក់។ ស្ថិតិនេះបានលាតត្រដាងថាមិនមានការចាប់ជំរិតក្នុងឆ្នាំ ២០២១នោះទេ ចំណែកនៅឆ្នាំ ២០២២ មានម្នាក់ និងមានប្រាំនាក់ ក្នុងឆ្នាំ ២០២៣ និង ២០២៤ ហើយគិតត្រឹមឆ្នាំ ២០២៥ នេះសរុបមានចំនួន១១នាក់។

ឆ្លើយតបទៅនឹងរបាយការណ៍ខាងលើនេះ ឧត្តមសេនីយ៍ឯក Chaturaphat Piromkaew មេបញ្ជាការនៃនាយកដ្ឋានការបរទេស និងជាអ្នកនាំពាក្យរងនៃនគរបាលភូមិន្ទថៃ នៅថ្ងៃទី២៤ ខែតុលានេះ បានអះអាងថា បញ្ហានេះប្រទេសថៃកំពុងតែដោះស្រាយ និងបញ្ជាក់ឡើងវិញថារបាយការណ៍របស់ប្រព័ន្ធផ្សព្វផ្សាយកូរ៉េគ្រាន់តែជារបាយការណ៍ប៉ុណ្ណោះ ហើយតួលេខនេះមិនចុះសម្រុងនឹងទិន្នន័យរបស់ទីភ្នាក់ងារស៊ើបអង្កេតរបស់ថៃឡើយ។

បន្ថែមលើនេះ នគរបាលថៃ និងកូរ៉េខាងត្បូងរក្សាទំនាក់ទំនងល្អ និងកំពុងសម្របសម្រួលគ្នាជាបន្តបន្ទាប់។ លោក Chaturaphat បានបញ្ជាក់ថា កម្លាំងនគរបាលភូមិន្ទថៃបាននិងកំពុងអនុវត្តវិធានការសន្តិសុខកម្រិតខ្ពស់បំផុតក្នុងការទប់ស្កាត់ និងបង្រ្កាប ដើម្បីការពារភ្ញៀវទេសចរពីការធ្លាក់ខ្លួនជាជនរងគ្រោះនៃក្រុមឧក្រិដ្ឋកម្មឆបោ.កឆ្លងដែន។

ទោះជាយ៉ាងណាក៏ដោយ បើផ្អែកតាមការចុះផ្សាយរបស់សារព័ត៌មានកូរ៉េខាងត្បូងនាពេលថ្មីៗកន្លងមកនេះបានបង្ហាញថា ភ្ញៀវទេសចរជនជាតិកូរ៉េជាច្រើននាក់បានលុបចោលការធ្វើដំណើររបស់ពួកគេមកកាន់តំបន់អាសុីអាគ្នេយ៍ ស្របពេលដែលឧក្រិដ្ឋកម្មចាប់ជំរិតទារប្រាក់ ការបោ.កប្រាស់ឲ្យមកធ្វើការងារ និងសកម្មភាពក្លែងបន្លនានាកំពុងកើនឡើងខ្ពស់៕

ប្រទេសថៃ ៖ នាយករដ្ឋមន្ត្រីថៃ លោក អានុទីន ឆាន់វីរៈគូន នឹងធ្វើដំណើរទៅម៉ាឡេស៊ីនៅថ្ងៃទី២៦ ខែតុលា ឆ្នាំ២០២៥ ដើម្បីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី ក្រោយពីលុបចោលការធ្វើដំណើរទៅម៉ាឡេស៊ីនៅថ្ងៃទី២៥ ខែតុលានេះ ក្រោមហេតុផលជាប់ភារកិច្ចរៀបចំពិធីបុណ្យសពព្រះមហាក្សត្រី Sirikit Kitiyakara ជាព្រះមាតារបស់ព្រះមហាក្សត្រថៃ សោយទិវង្គត ។ នេះបើតាមការចុះផ្សាយរបស់សារព័ត៌មាន Khaosod ។

លោក អានុទីន នាយករដ្ឋមន្ត្រីថៃថា នឹងធ្វើដំណើរទៅប្រទេសម៉ាឡេស៊ីនៅថ្ងៃស្អែក (ថ្ងៃទី២៦ ខែតុលា) ដើម្បីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃតាមការគ្រោងទុក ។ ការចុះហត្ថលេខានេះនឹងផ្តល់សុវត្ថិភាពដល់ពលរដ្ឋថៃ និងការពារអធិបតេយ្យ ហើយលោកនឹងប្រញាប់ត្រឡប់មកប្រទេសថៃវិញឱ្យទាន់ព្រះរាជពិធីបុណ្យសពព្រះមហាក្សត្រី Sirikit Kitiyakara ។

នាវេលាម៉ោង១១ព្រឹក ថ្ងៃទី២៥ ខែតុលា នាយករដ្ឋមន្ត្រីថៃបាននិយាយក្រោយបញ្ចប់កិច្ចប្រជុំពិសេសគណៈរដ្ឋមន្ត្រីថា ថ្ងៃទី២៥ ខែតុលានេះ គឺជាថ្ងៃដែលលោកត្រូវធ្វើដំណើរទៅម៉ាឡេស៊ីជាផ្លូវការ ប៉ុន្តែបានលុបចោលការធ្វើដំណើរដោយសារការសោយទិវង្គតរបស់ព្រះមហាក្សត្រី ។ ប៉ុន្តែលោកនឹងទៅម៉ាឡេស៊ីនៅថ្ងៃស្អែក (ថ្ងៃទី២៦ ខែតុលា) ដើម្បីចូលរួមពិធីចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជា ដែលមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី គឺលោកស្នើសុំឱ្យចុះហត្ថលេខានាពេលព្រឹកវិញ និងប្រញាប់ត្រឡប់មកថៃឱ្យទាន់ព្រះរាជពិធីបុណ្យសពព្រះមហាក្សត្រី ។

នាយករដ្ឋមន្ត្រីថៃបន្តថា មុនឈានមកដល់ចំណុចនេះ គឺស្ថាប័នពាក់ព័ន្ធ មិនថាក្រសួងការពារជាតិ ក្រសួងការបរទេស និងក្រសួងមហាផ្ទៃ បានចូលរួមចរចាក្នុងកិច្ចប្រជុំ JBC និងកិច្ចប្រជុំ GBC កម្ពុជា-ថៃ រហូតទទួលបានលទ្ធផលឱ្យកម្ពុជាយល់ព្រមអនុវត្តតាមលក្ខខណ្ឌរបស់ថៃ ។ បើកម្ពុជាអនុវត្តលក្ខខណ្ឌ ថៃនឹងពិចារណាថា តើមានការគំរាមកំហែងសន្តិសុខជាតិឬទេ បើគ្មាន យើងនឹងអនុវត្តការទូត ។ បច្ចុប្បន្ន គ្មានអ្វីគួរឱ្យបារម្ភពីការចាញ់ប្រៀបក្រោយការចុះហត្ថលេខាលើកិច្ចព្រមព្រៀងសន្តិភាព ឬធ្វើឱ្យបាត់បង់អធិបតេយ្យទេ វាជាការចុះហត្ថលេខាដើម្បីសុវត្ថិភាពរបស់ពលរដ្ឋ រួមទាំងរក្សាអធិបតេយ្យ ។

ដោយឡែក កិច្ចប្រជុំមេដឹកនាំសេដ្ឋកិច្ច APEC នៅប្រទេសកូរ៉េខាងត្បូង ចាប់ពីថ្ងៃទី២៩ ខែតុលា រហូតដល់ថ្ងៃទី១ ខែវិច្ឆិកា ឆ្នាំ២០២៥ បើគ្មានប្រធានបទសំខាន់ដែលតម្រូវឱ្យមេដឹកនាំប្រទេសថៃចូលរួមពិភាក្សាទេ គឺលោក អានុទីន ប្រគល់តួនាទៅឱ្យលោក សីហស័ក្តិ ពួងកេតកែវ រដ្ឋមន្ត្រីក្រសួងការបរទេសចូលរួមប្រជុំជំនួស ។ រីឯខ្លួនលោក (នាយករដ្ឋមន្ត្រីថៃ) បានតាំងចិត្តរួចហើយ ត្រូវតែនៅប្រទេសថៃចាត់ចែងការងារផ្សេងៗពាក់ព័ន្ធនឹងព្រះរាជពិធីបុណ្យសពព្រះមហាក្សត្រី ។

គួរបញ្ជាក់ថា ប្រធានាធិបតីអាមេរិក លោក Donald Trump បានកំណត់ឱ្យកម្ពុជា និងថៃ ចុះហត្ថលេខាលើកិច្ចព្រមព្រៀងសន្តិភាពក្រៅកិច្ចប្រជុំកំពូលអាស៊ាននៅប្រទេសម៉ាឡេស៊ី ពីព្រោះប្រធានាធិបតីអាមេរិកប្រាថ្នាចង់ឃើញប្រទេសទាំងពីរមានសន្តិភាពពិតប្រាកដ និងស្តារទំនាក់ទំនងល្អឡើងវិញ ជាពិសេស បញ្ឈប់សកម្មភាពឈ្លានពានរបស់ថៃមកលើកម្ពុជា ។ នាយករដ្ឋមន្ត្រីកម្ពុជា-ថៃនឹងចុះហត្ថលេខាលើកិច្ចព្រមព្រៀងសន្តិភាពដោយមាន លោក Trump និងប្រធានអាស៊ានជាសាក្សី ៕

ប្រទេសថៃ ៖ ក្រោយរងការចោ.ទប្រកាន់កេងបន្លំប្រាក់មូលនិធិរាប់រយលានបាតដែលពលរដ្ឋថៃផ្ញើចូលគណនីធនាគារទុកចំណាយលើការងារព្រំដែនកម្ពុជា-ថៃ ថែមទាំងប្រាក់មូលនិធិពាក់ព័ន្ធនឹងផលប្រយោជន៍របស់ឧបនាយករដ្ឋមន្ត្រី និងរដ្ឋមន្ត្រីកសិកម្ម លោក ថាំម៉ាណាស់ ព្រំផៅ កាលពីថ្ងៃទី២៤ ខែតុលា ឆ្នាំ២០២៥ កាន់ ចមផ្លាំង Influencer ថៃបានបកស្រាយនៅចំពោះមុខមហាជន និងបង្ហាញបញ្ជីចំណូល ចំណាយ ។ បុគ្គលនេះនិយាយទាំងទឹកភ្នែកថា បានប្រឹងប្រែងលះបង់ដើម្បីជាតិ បែរជារងការចោទប្រកាន់យកប្រាក់មូលនិធិមកទិញរថយន្តទំនើប និងបន្លំគណនីធនាគារ ចាប់ពីពេលនេះ ឈប់ធ្វើសកម្មភាពនៅព្រំដែនហើយ និងសូមទោសរដ្ឋមន្ត្រីកសិកម្ម ។

ពេលមកក្រសួងមហាផ្ទៃដើម្បីដាក់លិខិតសុំការត្រួតពិនិត្យឯកសារ «ប្រាក់មូលនិធិ កាន់ ចមផ្លាំង» កាលពីថ្ងៃទី២៤ ខែតុលា កាន់ ចមផ្លាំង និយាយថា ក្រោយបកស្រាយពីប្រាក់មូលនិធិនៅមុខមហាជន ខ្លួនមានអារម្មណ៍ធូរស្រាលដោយសារបានបង្ហាញបញ្ជីចំណូល ចំណាយ មិននិយាយតែមាត់ ដោយឯកសារបានបង្ហាញរួចរាល់ដើម្បីភាពច្បាស់លាស់ និងតម្លាភាព ។ នៅថ្ងៃទី២៤ ខែតុលានេះ ខ្លួនដាក់លិខិតនៅក្រសួងមហាផ្ទៃដើម្បីសុំការត្រួតពិនិត្យ និងព្រមសហការជាមួយក្រសួង ។

បើការិយាល័យប្រឆាំងការលាងលុយកខ្វក់ ឬស្ថាប័នផ្សេងៗត្រូវការឯកសារ ឬចង់ពិនិត្យមើល គឺខ្លួនរីករាយជានិច្ច ។ កាន់ ចមផ្លាំង ថា ខ្លួនជាមនុស្សបរិសុទ្ធ និងមានបញ្ជីឈ្មោះអ្នកផ្ញើប្រាក់ចូលគណនីធនាគារ បើពាក់ព័ន្ធនឹងការលាងលុយកខ្វក់ ឬប្រើប្រាស់គណនីធនាគារក្លែងក្លាយ ខ្លួនមិនមកដាក់លិខិតឱ្យក្រសួងមហាផ្ទៃពិនិត្យទេ ។ ការចោទប្រកាន់កេងបន្លំប្រាក់មូលនិធិធ្វើឱ្យប៉ះពាល់ដល់រដ្ឋមន្ត្រីកសិកម្ម លោក ថាំម៉ាណាស់ ព្រោះពុំបានពិភាក្សាជាមួយរដ្ឋមន្ត្រីកសិកម្ម និងសូមទោសលោករដ្ឋមន្ត្រីផងដែរ ។

ប្រាក់មូលនិធិរបស់ពលរដ្ឋថៃដែលផ្ញើចូលគណនីធនាគារ គឺបានចំណាយក្នុងគម្រោងផ្សេងៗតាមគោលបំណងរបស់ពលរដ្ឋថៃ ខ្លួនបានជួយសង្គមរហូតមក រួមទាំងចំណាយប្រាក់នៅព្រំដែនកម្ពុជា-ថៃ ដោយមិនបានយកប្រាក់នេះចំណាយផ្ទាល់ខ្លួន ឬផ្ទេរប្រាក់មូលនិធិទៅឱ្យបុគ្គលផ្សេង ឬយកប្រាក់ទៅទិញរថយន្តទំនើបជិះទេ ។ ចាប់ពីនេះ ខ្លួននឹងឈប់ធ្វើសកម្មភាពនៅព្រំដែនកម្ពុជា-ថៃ និងចំណាយពេលនៅជាមួយប្រពន្ធកូនវិញ ពីព្រោះកន្លងមក ធ្វើការងារសង្គមរហូតគ្មានពេលឱ្យក្រុមគ្រួសារ ។

ក្រោយពីនិយាយចប់ កាន់ ចមផ្លាំង មានទឹកមុខក្រៀមក្រំ និងសម្តែងជាតួកម្សត់ហូរទឹកភ្នែកដោយសារធ្វើការងារសង្គមច្រើនពេកគ្មានពេលវេលានៅជាមួយក្រុមគ្រួសារ បែរជាមករងការចោទប្រកាន់កេងបន្លំប្រាក់មូលនិធិទៅវិញ ។

កាលពីថ្ងៃទី២៤ ខែតុលា កាន់ ចមផ្លាំង បានបកស្រាយពីការកេងបន្លំប្រាក់មូលនិធិក្នុងសណ្ឋាគារមួយកន្លែងនៅទីក្រុងបាងកក ដើម្បីឱ្យមហាជនឈប់សង្ស័យ ។ កាន់ ចមផ្លាំង ថា ប្រាក់មូលនិធិដែលប្រមូលបានសរុបចំនួន២០៧លានបាត (ស្មើជាង៦លាន ៣សែនដុល្លារ) និងចំណាយអស់ ១១៧លានបាត ពេលនេះ ប្រាក់មូលនិធិនៅសល់ក្នុងបញ្ជីធនាគារតែ៩០លានបាត ហើយ ប្រាក់មូលនិធិនៅសល់៩០លានបាត គឺសម្រាប់ចំណាយលើការជីកលេណដ្ឋាន ទិញឧបករណ៍អេឡិចត្រូនិក ធ្វើស្ពាន និងផ្លូវ ។

គួរបញ្ជាក់ថា កន្លងមក សមាជិកសភាគណបក្សប្រឆាំង អ្នកនាង រ៉ាក់ឆាណុក ស៊ីណក បានសួរដេញដោល កាន់ ចមផ្លាំង ពីការកេងបន្លំប្រាក់មូលនិធិធ្វើឱ្យផ្ទុះការចាប់អារម្មណ៍ពេញប្រទេសថៃថា កាន់ ចមផ្លាំង យកប្រាក់មូលនិធិដែលពលរដ្ឋថៃផ្ញើចូលគណនីធនាគារទៅទិញរថយន្តទំនើប ថែមទាំងប្រាក់មូលនិធិពាក់ព័ន្ធនឹងផលប្រយោជន៍របស់រដ្ឋមន្ត្រីកសិកម្ម ៕

ខេត្តស្រះកែវ៖ បើទោះជាស្ថានភាពបច្ចុប្បន្នរៀងស្ងប់ស្ងាត់ហើយក្ដី ប៉ុន្តែថៃនៅតែបន្តពង្រាយកម្លាំងមន្ត្រីត្រួតពិនិត្យហ្វូងមនុស្សប្រមាណ ៦,០០០នាក់បន្ថែម នៅភូមិណងចាន់ និងភូមិណងយ៉ាកែវ ក្នុងខេត្តស្រះកែវ ដោយអះអាងថាដើម្បីឆ្លើយតបទៅនឹងភាពចលាចលកាន់តែខ្លាំងឡើងនៅជុំវិញព្រំដែន។ នេះបើតាមការចុះផ្សាយរបស់សារព័ត៌មាន The Nation។

កាលពីរសៀលថ្ងៃសុក្រ ទី២៤ ខែតុលា ឧត្តមសេនីយ៍ឯក Siriwat Deephor អ្នកនាំពាក្យនគរបាលភូមិន្ទថៃ បានថ្លែងនៅក្នុងកិច្ចប្រជុំអគ្គស្នងការនគរបាលជាតិទាក់ទងនឹងការគំរាមកំហែងនៅតំបន់ភាគខាងកើត ដោយស្នើសុំការគាំទ្របន្ថែមពីមន្ត្រីត្រួតពិនិត្យហ្វូងមនុស្សចំនួន ៦,០០០នាក់ ក្រោយមានការរាយការណ៍ពាក់ព័ន្ធនឹងពលរដ្ឋមកពីប្រទេសជិតខាងថាបង្កភាពចលាចលនៅក្នុងតំបន់ណងចាន់ និងណងយ៉ាកែវ និងដើម្បីទប់ស្កាត់ឧក្រិដ្ឋកម្មឆ្លងដែន។

បន្ទាប់ពីការថ្លែងរបស់លោក Siriwat មន្ត្រីចំនួន ៦,០០០នាក់ ត្រូវបានដាក់ពង្រាយបន្ថែម ដើម្បីទប់ស្កាត់អំពើហិង្សាដែលអាចកើតមាន។ ការចល័តមន្ត្រីទាំងនេះទៅ គឺដើម្បីគាំទ្រដល់កងកម្លាំងសន្តិសុខក្នុងស្រុក ដោយសាររបាយការណ៍បានបង្ហាញពីការប្រមូលផ្តុំ និងភាពតានតឹងដែលពាក់ព័ន្ធនឹងពលរដ្ឋមកពីប្រទេសជិតខាង។ អគ្គស្នងការនគរបាលភាគខាងកើតថៃ បានធ្វើការត្រួតពិនិត្យនៅនឹងកន្លែង ដើម្បីវាយតម្លៃការត្រៀមខ្លួនផងដែរ។

គួរជម្រាបថា ហេតុផលដែលភាគីថៃបានលើឡើងជុំវិញការបន្កើនកម្លាំងបង្ក្រាបនៅភូមិណងចាន់ និងភូមិណងយ៉ាកែវ ដែលនៅទល់មុខនឹងភូមិជោគជ័យ និងភូមិព្រៃចាន់ និងអះអាងថាមានភាពចលាចលដោយសារប្រជាជនប្រទេសជិតខាង ដែលចង់សំដៅដល់កម្ពុជានេះ គឺការលើកឡើងដោយមិនសមហេតុផលទាល់តែសោះ ខណៈស្ថានភាពបច្ចុប្បន្ននៅក្នុងតំបន់នោះមានសភាពស្ងប់ស្ងាត់ គ្មានការបង្កបង្កើនសកម្មភាពណាមួយដែលអាចចាត់ទុកថាជាការបង្កភាពចលាចលឡើយ។

កន្លងមក ពលរដ្ឋខ្មែរ និងកម្លាំងការពារសន្តិសុខខាងកម្ពុជានៅតំបន់នោះ តែងតែរក្សាភាពអត់ធ្មត់ជាអតិបរមា មិនដែលឆ្លើយតបដោយអំពើហិង្សា ឬការគំរាមកំហែងណាមួយដាក់ភាគីថៃនោះទេ បើទោះជាស្ថិតក្នុងស្ថានភាពតានតឹងយ៉ាងណាក៏ដោយ។ ផ្ទុយពីទង្វើរបស់ថៃ ដែលមិនត្រឹមតែរំលោ.ភបំពានចូលអធិបតេយ្យកម្ពុជា ទន្ទ្រានយកដីផ្ទះ ស្រែចម្ការបស់ពលរដ្ឋខ្មែរនោះទេ ថែមទាំងប្រើហិង្សាបង្ករបួសស្នាម និងធ្វើទុក្ខបុកម្នេញគ្រប់រូបភាព ដូចជាការចាក់សម្លេងរំខានលាន់លឺខ្លាំងៗជាដើម។

យ៉ាងណាក៏ដោយ ក្រោយកិច្ចប្រជុំ JBC នៅម៉ាឡេសុីត្រូវបានបញ្ចប់ ភាគីកម្ពុជា.ថៃ បានសម្រេចសម្រួលថានឹងមានការវាស់វែងខណ្ឌសីមា និងបោះបង្គោលព្រំដែនបណ្ដោះអាសន្នរួមគ្នា ដោយកំណត់លើកំណាត់ខ្សែព្រំដែនអទិភាព ចន្លោះបង្គោលលេខ ៤២-៤៧ ព្រមទាំងកែសម្រួលនូវសកម្មភាពមួយចំនួនរៀងខ្លួន ដោយអនុលោមតាមមាត្រា ៣ នៃ MOU ឆ្នាំ ២០០០៕

ប្រទេសថៃ ៖ លោក អនុថីន ឆាន់វីរៈគូន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃបានលុបចោលការធ្វើដំណើរទៅចូលរួមកិច្ចប្រជុំកំពូលអាស៊ាននៅប្រទេសម៉ាឡេស៊ី ដែលប្រធានាធិបតីអាមេរិក លោក Donald Trump កំណត់ឱ្យនាយករដ្ឋមន្ត្រីកម្ពុជា-ថៃចុះហត្ថលេខាលើកិច្ចព្រមព្រៀងសន្តិភាពនៅចំពោះមុខលោក និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី ។ ការលុបចោលការធ្វើដំណើរទៅម៉ាឡេស៊ីភ្លាមៗរបស់នាយករដ្ឋមន្ត្រីថៃ ក្រោមហេតុផលព្រះមហាក្សត្រី Sirikit Kitiyakara ជាព្រះមាតារបស់ព្រះមហាក្សត្រថៃបច្ចុប្បន្នសោយទិវង្គត។

នាយករដ្ឋមន្ត្រីថៃកោះប្រជុំគណៈរដ្ឋមន្ត្រីនាវេលាម៉ោង១០ព្រឹក ថ្ងៃទី២៥ ខែតុលា ឆ្នាំ២០២៥ ក្រោយពីបានលុបចោលការធ្វើដំណើរទៅប្រទេសម៉ាឡេស៊ីជាផ្លូវការនៅថ្ងៃទី២៥ ខែតុលានេះ ដើម្បីចូលរួមកិច្ចប្រជុំកំពូលអាស៊ាន លើកទី៤៧ និងចូលរួមកិច្ចប្រជុំកំពូលពាក់ព័ន្ធ ចាប់ពីថ្ងៃទី២៦ ដល់ថ្ងៃទី២៨ ខែតុលា នៅទីក្រុងកូឡាឡាំពួរ ប្រទេសម៉ាឡេស៊ី តាមការអញ្ជើញរបស់លោក Anwar Ibrahim នាយករដ្ឋមន្ត្រីម៉ាឡេស៊ី ។

តាមប្រភពព័ត៌មានពីវិមានរដ្ឋាភិបាលថៃ លោក អនុថីន បានលុបចោលការធ្វើដំណើរទៅម៉ាឡេស៊ីជាផ្លូវការនៅថ្ងៃទី២៥ ខែតុលា ដែលធ្វើឱ្យកិច្ចប្រជុំកំពូលអាស៊ាន និងកិច្ចប្រជុំចតុភាគីដែលមាននាយករដ្ឋមន្ត្រីកម្ពុជា-ថៃ ប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ចូលរួមនោះមានភាពមិនច្បាស់លាស់ ។

នាវេលាម៉ោង១០ព្រឹកថ្ងៃទី២៥ ខែតុលា នាយករដ្ឋមន្ត្រីថៃ លោក អនុថីន បានកោះប្រជុំគណៈរដ្ឋមន្ត្រីដើម្បីជជែកពីការរៀបចំព្រះរាជពិធីបុណ្យសពព្រះមហាក្សត្រី Sirikit Kitiyakara ជាព្រះមាតារបស់ព្រះមហាក្សត្រថៃបច្ចុប្បន្ន រួមទាំងបង្កើតគណៈកម្មការផ្សេងៗពាក់ព័ន្ធនឹងព្រះរាជពិធីបុណ្យសព ក្រោយពីព្រះរាជវាំងថៃចេញសេចក្តីប្រកាសពីការសោយទិវង្គតរបស់ព្រះមហាក្សត្រី ។

គួរបញ្ជាក់ថា កាលពីថ្ងៃទី២៤ ខែតុលា ឆ្នាំ២០២៥ លោក អនុថីន ឆាន់វីរៈគូន នាយករដ្ឋមន្ត្រីថៃ បាននិយាយពីការចុះហត្ថលេខាលើកិច្ចព្រមព្រៀងសន្តិភាពនៅកិច្ចប្រជុំកំពូលអាស៊ាន ប្រទេសម៉ាឡេស៊ីថា ថ្ងៃទី២៦ ខែតុលា គឺជាពេលវេលាស័ក្តិសមសម្រាប់ប្រកាសសន្តិភាពរវាងកម្ពុជា-ថៃដែលមានប្រទេសនានាជាសាក្សី បើកម្ពុជាយល់ព្រមតាមលក្ខខណ្ឌ៤ចំណុច ហើយលោកជឿជាក់លើភាគីថៃនឹងផ្តោតចម្បងលើផលប្រយោជន៍ កិត្តិយស និងអធិបតេយ្យភាព ។

លោកនឹងទៅចូលរួមកិច្ចប្រជុំកំពូលអាស៊ាននៅម៉ាឡេស៊ីដើម្បីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី ។ ប៉ុន្តែនៅថ្ងៃទី២៥ ខែតុលានេះ បែរជានាយករដ្ឋមន្ត្រីថៃប្តូរចិត្តភ្លាមៗមិនទៅប្រជុំនៅម៉ាឡេស៊ីវិញ ក្រោមហេតុផលព្រះមហាក្សត្រីថៃសោយទិវង្គត ទាំងដែលនៅប្រទេសថៃមានរដ្ឋមន្ត្រីជាច្រើនរូបអាចចាត់ចែងពិធីបុណ្យសពព្រះមហាក្សត្រីបាន មិនមែនមានតែលោក អនុថីន ម្នាក់ទេ ។

ការប្តូរផ្លាស់ចិត្តយ៉ាងលឿនរបស់នាយករដ្ឋមន្ត្រីថៃធ្វើឱ្យគម្រោងរបស់ប្រធានាធិបតីអាមេរិកដែលកំណត់ឱ្យកម្ពុជា-ថៃចុះហត្ថលេខាលើកិច្ចព្រមព្រៀងសន្តិភាពនៅកិច្ចប្រជុំកំពូលអាស៊ាននៅម៉ាឡេស៊ីនោះមានភាពមិនច្បាស់លាស់ ។ តើលោក Trump នឹងមានវិធានការបែបណាបន្តទៀតចំពោះការនិយាយបាតដៃ ខ្នងដៃរបស់ថៃ និងគេចវេះមិនចូលរួមប្រជុំដែលមានមេដឹកនាំប្រទេសមហាអំណាចជាសាក្សី ៕