ប្រទេសថៃ ៖ ជាច្រើនខែមកហើយដែលបណ្តាខេត្តនានានៅប្រទេសថៃមានគ្រោះធម្មជាតិ ដូចជា ៖ ខ្យល់ព្យុះ បាក់ដី និងទឹកជំនន់ ដែលប៉ះពាល់ដល់ការរស់នៅរបស់ពលរដ្ឋថៃយ៉ាងខ្លាំង ។ ខេត្តពិស្នុលោក ក៏មានគ្រោះធម្មជាតិដែរ គឺកម្ពស់ទឹកជំនន់ក្នុងស្រុកបាងរ៉ាក់កាំ កាន់តែកើនឡើងខ្លាំងជារៀងរាល់ថ្ងៃបណ្តាលឱ្យពលរដ្ឋត្រូវរស់នៅជាមួយទឹកជំនន់យ៉ាងលំបាក ។

នៅថ្ងៃទី១៨ ខែកញ្ញា ឆ្នាំ២០២៥ សារព័ត៌មានថៃរាយការណ៍ថា កម្ពស់ទឹកជំនន់នៅស្រុកបាងរ៉ាក់កាំ ខេត្តពិស្នុលោក នៅតែបន្តកើនឡើងខ្លាំងពុំស្រកបណ្តាលឱ្យពលរដ្ឋលំបាកយ៉ាងខ្លាំងត្រូវរស់នៅជាមួយទឹកជំនន់ដែលស្ទើរតែលិចដំបូលផ្ទះ ។ អភិបាលខេត្តពិស្នុលោក បានជូនដំណឹងឱ្យពលរដ្ឋប្រុងប្រយ័ត្នទឹកជំនន់កាន់តែកើនឡើងខ្លាំង ដោយសារភ្លៀងធ្លាក់នៅភាគខាងជើង ព្រមទាំងមានទឹកហូរពីតំបន់ព្រៃភ្នំ ។

ស្ថានភាពទឹកជំនន់នៅតែបន្តបង្កផលប៉ះពាល់ដល់ពលរដ្ឋថៃ ដោយសារកម្ពស់ទឹកជំនន់កើនឡើងជាបន្តបន្ទាប់នៅតំបន់កសិកម្ម ផ្លូវធ្វើដំណើរ និងផ្ទះពលរដ្ឋ ។ នៅភូមិវាំងកុម ស្រុកបាងរ៉ាក់កាំ ខេត្តពិស្នុលោក ស្ថិតនៅមាត់ទន្លេយម គឺមានទឹកជំនន់ហូរមកពីតំបន់ខ្ពស់មកតំបន់ទំនាបធ្វើឱ្យពលរដ្ឋជាច្រើនគ្រួសារពិបាករស់នៅ ដោយសារផ្លូវធំបានទឹកលិចជ្រៅ ហើយពលរដ្ឋក៏យកម៉ូតូ និងរថយន្តមកចតចោលនៅផ្លូវទើបធ្វើថ្មីដែលខ្ពស់ជាងផ្លូវធំ ដើម្បីកុំឱ្យយានជំនិះលិចទឹកខូច ។ ប៉ុន្តែប្រឈមនឹងការបាត់បង់ ដោយសារម្ចាស់យានជំនិះមានផ្ទះនៅឆ្ងាយពីផ្លូវថ្មី ។

លោក ណារុង ពលរដ្ឋនៅស្រុកបាងរ៉ាក់កាំ និយាយថា ផ្ទះលោកនៅឆ្ងាយពីផ្លូវថ្មីរាប់រយម៉ែត្រត្រូវទឹកលិចជិតដល់ដំបូល ។ លោកពិបាកណាស់ត្រូវមកមើលថែទ្រព្យសម្បត្តិ និងជញ្ជូនរបស់របរចេញពីផ្ទះ ថែមទាំងមានឪពុក-ម្តាយចាស់ជរាទៀត ។ កម្ពស់ទឹកជំនន់នៅតែកើនឡើងរាល់ថ្ងៃ ហើយវានឹងកើនឡើងកាន់តែខ្លាំងជាងនេះ ។

រីឯអ្នកស្រី វាសនា និយាយថា ទឹកជំនន់នៅតែកើនឡើងខ្លាំង រហូតផ្ទះអ្នកស្រីទឹកលិចដល់ដើមទ្រូង ខណៈកាលពីឆ្នាំ២០២៤ ទឹកលិចត្រឹមចង្កេះ ។ វាធ្វើអ្នកស្រី និងពលរដ្ឋក្នុងភូមិពិបាករស់នៅ ចង់ឱ្យស្ថាប័នពាក់ព័ន្ធប្រញាប់រកវិធីជួយដោះស្រាយរយៈពេលវែង គឺធ្វើផ្លូវឱ្យខ្ពស់ជាងទឹកដើម្បីឱ្យពលរដ្ឋងាយស្រួលធ្វើដំណើរចូលផ្ទះ ។

ចំណែកពលរដ្ឋរស់នៅភាគខាងជើងខេត្តពិស្នុលោក ក៏ពិបាកដោយសារទឹកជំនន់ដែរ ដោយសារទឹកហូរពីខេត្តសុខោទ័យមកកាន់ទន្លេយម បណ្តាលឱ្យទឹកទន្លេកើនឡើងខ្ពស់លិចផ្ទះពលរដ្ឋ និងផ្លូវ ពលរដ្ឋនៅទីនេះត្រូវធ្វើដំណើរដោយជិះទូក ។

អភិបាលខេត្តពិស្នុលោក លោក ថាវី សឺមភក្តីគុន បានប្រាប់ឱ្យពលរដ្ឋតាមដានព័ត៌មានអាកាសធាតុ និងប្រុងប្រយ័ត្នគ្រោះថ្នាក់ដោយសារទឹកជំនន់ហូរពីតំបន់ព្រៃភ្នំ ក៏ដូចជាត្រៀមខ្លួនការពារដំណាំក្នុងចម្ការ ។ បើតាមឧតុនិយម គឺចាប់ពីថ្ងៃទី១៨ ដល់ថ្ងៃទី២៤ ខែកញ្ញា ឆ្នាំ២០២៥ នៅបណ្តាខេត្តភាគខាងជើងប្រទេសថៃនឹងមានភ្លៀងធ្លាក់ខ្លាំង រួមទាំងខ្យល់ព្យុះ ផ្គររន្ទះ ៕

ស្រោចស្រង់លែងបានហើយ! មិនត្រឹមតែធ្វើឲ្យព្រះសង្ឃរបួសប៉ុណ្ណោះទេ ពេលនេះថៃថែមទាំងចោ.ទប្រកាន់ថា ព្រះសង្ឃដែលទៅចូលរួមការតវ៉ាជាមួយអ្នកភូមិនៅភូមិព្រៃចាន់ គឺជាសង្ឃក្លែងក្លាយ ដែលជាទាហានបន្លំខ្លួនមកបង្កើតស្ថានការណ៍នាំឲ្យមានភាពវឹកវរ ដើម្បីឲ្យកម្ពុជាប្រាប់អន្តរជាតិថាថៃរករឿងកម្ពុជាមុនប៉ុណ្ណោះ។ នេះបើតាមការចុះផ្សាយរបស់ Khaosod។

នៅថ្ងៃព្រហស្បត្តិ៍ ទី១៨ កញ្ញា ឧត្តមសេនីយទោ Surawit Daengjan នាយសេនាធិការនៃកងទ័ពភូមិភាគទី១ និងជាអ្នកនាំពាក្យ បានធ្វើសន្និសីទសារព័ត៌មានទាក់ទងនឹងឧបទ្ទវហេតុដែលពលរដ្ឋខ្មែរបានទម្លុះរបងលួសបន្លានៅឯ Ban Nong Ya Kaew ក្នុងខេត្តស្រះកែវថា ឧប្បត្តិហេតុកាលពីម្សិលមិញ បានផ្ទុះឡើងដោយសារតែការវា.យប្រហា.រពីសំណាក់ជនសុីវិលកម្ពុជាមកលើកងកម្លាំងសន្តិសុខថៃ និងបានធ្វើឲ្យមន្រ្តីថៃរងរបួសជាច្រើននាក់ដោយសារការគប់ដុំថ្ម និងការបា.ញ់គ្រាប់ជំពាម ដែលជំរុញឱ្យកងកម្លាំងថៃប្រើឧស្ម័នបង្ហូរទឹកភ្នែក និងគ្រាប់កៅស៊ូដើម្បីឆ្លើយតបវិញ។

អ្នកនាំពាក្យរូបនេះបានលើកឡើងថា «ខ្ញុំសូមថ្កោលទោសថ្នាក់ដឹកនាំកម្ពុជា ដែលអនុញ្ញាតឲ្យស្ថានការណ៍នេះកើតឡើងលើទឹកដីអធិបតេយ្យភាពរបស់ថៃ ដោយយកកុមារ ស្ត្រី និងព្រះសង្ឃជាអ្នកញុះញង់។ កម្ពុជាចង់បង្កើតរូបភាពថា ប្រទេសថៃអមនុស្សធម៌ និងកំពុងធ្វើសកម្មភាពយ៉ាងគឃ្លើនដោយមិនខ្វល់ពីអារម្មណ៍ ឬសុវត្ថិភាពរបស់ជនសុីវិលកម្ពុជា។ សូមបញ្ឈប់ការញុះញង់នេះ ហើយឈប់លាក់ខ្លួននៅពីក្រោយស្ត្រីទៀតទៅ»។

មិនតែប៉ុណ្ណោះ លោក Surawit បាននិយាយឌឺដងកកាន់ព្រះសង្ឃកម្ពុជាដែលចូលរួមក្នុងចលនាតវ៉ាដើម្បីការពារទឹកដីជាមួយពលរដ្ឋយ៉ាងដូច្នេះថា ប្រសិនបើអ្នកចង់ធ្វើបាតុកម្មបែបនេះ អ្នកគួរតែទៅសឹកហើយចូលបម្រើជាទាហានទៅល្អជាង ដើម្បីមកតតាំងជាមួយពួកយើង។

លើសពីនេះ បើតាមការចុះផ្សាយរបស់ Khaosod ដោយផ្អែកលើមតិរបស់សារណជនថៃមួយចំនួនពួកគេបានអះអាងថា មុខព្រះសង្ឃខ្មែរដែលចូលរួមក្នុងចលនានេះ ប្រហាក់ប្រហែលនឹងទាហានខ្មែរម្នាក់ ដែលយូរៗទៅវាបានក្លាយជាប្រធានបទសម្រាប់ពលរដ្ឋ និងក្រុមជ្រុលនិយមថៃនាំគ្នាយកមកអះអាងថា កម្ពុជាចាត់ឲ្យទាហាន សម្ដែងធ្វើជាសង្ឃដើម្បីបង្កើតសេណារីយ៉ូភូតកុហកអន្តរជាតិ។

គួរបញ្ជាក់ថា នៅក្នុងការប៉ះទង្គិចគ្នារវាងប្រជាពលរដ្ឋកម្ពុជា និងទាហានប្រដាប់ងាវុ.ធថៃកាលពីថ្ងៃទី១៧ ខែកញ្ញា ម្សិលមិញបានបណ្ដាលឲ្យជនសុីវិល និងព្រះសង្ឃប្រមាណជិត៣០នាក់រងរបួស ដោយសារគ្រាប់កាំភ្លើងជ័រ រួមទាំងបាត់បង់ស្មារតី ពិបាកដកដង្ហើមដោយសារគ្រាប់បែ.កផ្សែង និងត្រូវបញ្ជូនមកសង្រ្គោះភ្លាមៗនៅមន្ទីរពេទ្យ។

ជាមួយគ្នានេះ វាបង្ហាញយ៉ាងច្បាស់ពីទង្វើឈ្លានពានរបស់យោធាថៃ និងសកម្មភាពបង្រ្កាបបាតុកម្មដោយហិង្សាដ៏អមនុស្សធម៌មកលើប្រជនស្លូតត្រង់ កងកម្លាំងដែលគ្មានអាវុ.ធ រួមទាំងព្រះសង្ឃ ដែលមានបំណងចង់ត្រឹមការពារអធិបតេយ្យទឹកដី ផ្ទះសម្បែង ដីស្រែសម្ការរបស់ពួកគាត់តែប៉ុណ្ណោះ៕

កាលពីថ្ងៃទី១៧ ខែកញ្ញា ឆ្នាំ២០២៥ សារព័ត៌មានថៃរាយការណ៍ថា ប្រធានក្រុមសង្កេតការណ៍អន្តរកាល (IOT) បានស្នើឱ្យថៃបញ្ឈប់អំពើហិ.ង្សា និងរក្សាភាពស្ងៀមស្ងាត់រហូតដល់មានកិច្ចប្រជុំ JBC ។ ក្រៅពីនេះ ប្រធាន IOT ក៏បានស្នើឱ្យកងកម្លាំងថៃគោរពច្បាប់អន្តរជាតិផងដែរ ក្រោយពីសមត្ថកិច្ចថៃប្រើប្រាស់កាំភ្លើ.ងគ្រាប់ជ័រ គ្រា.ប់បែកផ្សែង ឧបករណ៍បំពងសំឡេង ជំពាមកៅស៊ូគ្រាប់ឃ្លី ឧស្ម័នបង្ហូរទឹកភ្នែក ខែល និងកាំភ្លើ.ងវែងខ្លី មកលើពលរដ្ឋ និងព្រះសង្ឃខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។

លោកឧត្តមសេនីយ៍ Shamsul Rizal Bin Musa អនុព័ន្ធយោធាម៉ាឡេស៊ីប្រចាំប្រទេសថៃ ក្នុងឋានៈជាប្រធានក្រុមសង្កេតការណ៍អន្តរកាល (IOT) និយាយថា លោកបានធ្វើដំណើរមកភូមិព្រៃចាន់ នៅថ្ងៃទី១៧ ខែកញ្ញា គឺមកពិនិត្យមើលការអនុវត្តបទឈប់បាញ់ ដោយលោកស្នើឱ្យថៃបញ្ឈប់អំពើហិង្សា និងរក្សាភាពស្ងៀមស្ងាត់នៅភូមិព្រៃចាន់ រហូតដល់មានកិច្ចប្រជុំ JBC ។

ចំណែកការដោះស្រាយជម្លោះនៅក្នុងកិច្ចប្រជុំ JBC លោក Musa ជឿជាក់ថា ជម្លោះនៅព្រំដែនភូមិព្រៃចាន់នឹងស្ងប់ស្ងាត់នាពេលឆាប់ៗ និងស្នើឱ្យកងកម្លាំងថៃគោរពច្បាប់អន្តរជាតិ ។ លោកមានទំនុកចិត្តថា បើកងទ័ពថៃគោរពបទឈប់បាញ់ គឺចាប់ពីពេលនេះទៅ ប្រទេសទាំងពីរនឹងទទួលបានសន្តិភាព ។

គួរបញ្ជាក់ថា កាលពីថ្ងៃទី១៧ ខែកញ្ញា សមត្ថកិច្ចថៃបានបា.ញ់កាំភ្លើងគ្រាប់ជ័រ និងគ្រាប់បែកផ្សែងមកលើពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យហៀរទឹកភ្នែក ហើយសមត្ថកិច្ចថៃបានប្រើប្រាស់ឧបករណ៍បំពងសំឡេងធ្វើឱ្យប៉ះពាល់ក្រដាសត្រចៀក និងប្រព័ន្ធខួរក្បាល ។ លើសពីនេះ ពួកគេបង្កអំពើហិង្សាដោយប្រើប្រាស់ឧបករណ៍បង្ក្រាប និងបា.ញ់ជំពាមកៅស៊ូគ្រាប់ឃ្លីបណ្តាលឱ្យពលរដ្ឋ និងព្រះសង្ឃខ្មែរ យ៉ាងតិច២៤អង្គ/នាក់ ដួលសន្លប់ និងរងរបួសធ្ងន់ស្រាល ។ កងកម្លាំង និងសមត្ថកិច្ចចម្រុះកម្ពុជាដែលគ្មានអាវុធ បានការពារសុវត្ថិភាពលរដ្ឋខ្មែរ ដោយប្រកាន់ខ្ជាប់នូវកិច្ចព្រមព្រៀងឈប់បាញ់ និងគោរពគោលការណ៍ដែលបានឯកភាពគ្នាដោះស្រាយបញ្ហាដោយសន្តិវិធី និងត្រឹមត្រូវស្របតាមច្បាប់អន្តរជាតិ ។

អ្នកនាំពាក្យរាជរដ្ឋាភិបាលកម្ពុជាបានថ្កោលទោសចំពោះអំពើហិង្សារបស់សមត្ថកិច្ចថៃមកលើពលរដ្ឋ និងព្រះសង្ឃខ្មែរ ព្រមទាំងអំពាវនាវឱ្យអាជ្ញាធរថៃបញ្ឈប់ទង្វើរំលោភបំពាន និងហិង្សាទាំងនេះជាបន្ទាន់ ។ កម្ពុជាទាមទារឱ្យភាគីថៃគោរពកិច្ចព្រមព្រៀងឈប់បាញ់ គោរពស្មារតីនៃកិច្ចប្រជុំ GBC និង RBC អនុស្សរណៈនៃការយោគយល់ត្រង់ចំណុច២ មាត្រា៤ នៃ MOU ឆ្នាំ២០០០ រួមទាំងគោលការណ៍សិទ្ធិមនុស្ស និងច្បាប់អន្តរជាតិជាធរមាន ។

រាជរដ្ឋាភិបាលកម្ពុជាដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ប្រកាន់គោលជំហរច្បាស់លាស់គោរពកិច្ចព្រមព្រៀងឈប់បាញ់ និងដោះស្រាយបញ្ហាដោយសន្តិវិធី ដោយឈរលើមូលដ្ឋាននៃកិច្ចព្រមព្រៀងទ្វេភាគីដែលមានជាធរមាន ព្រមទាំងអនុសញ្ញា សន្ធិសញ្ញា និងច្បាប់អន្តរជាតិ ។ កម្ពុជាសូមអំពាវនាវដោយទទូចឱ្យថៃគោរពគោលការណ៍ទាំងអស់នេះដូចគ្នាដែរ ដើម្បីរក្សាបទឈប់បាញ់ និងកាត់បន្ថយភាពតានតឹងក្នុងការប្រឈមមុខដាក់គ្នាដើម្បីបញ្ចៀសការប៉ះទង្គិចនាំដល់ការផ្ទុះអាវុធជាថ្មី ៕

ភ្នំពេញ៖ ប្រជាជនថៃកើតទុក្ខមិនសុខចិត្ត ខឹ.ងនឹងប្រធានអ្នកសង្កេតការណ៍ម៉ាឡេសុី ថាលម្អៀងកាន់ជើងមកកាន់កម្ពុជា និងសម្ដែងការខកចិត្តថាម៉ាឡេសុី និងកម្ពុជាគុបគិតគ្នាជាបក្ខពួកតែមួយ ក្រោយប្រធានអ្នកសង្កេតការណ៍រូបនេះ បដិសេធមិនទៅត្រួតពិនិត្យមើលកន្លែងប៉ូលិសថៃបា.ញ់អ្នកភូមិខ្មែរ ដោយប្រាប់ថៃឲ្យរក្សាស្ថានការណ៍នៅដដែល។

យោងតាមការចុះផ្សាយរបស់សារព័ត៌មាន Khaosod របស់ថៃនាព្រឹកថ្ងៃទី១៨ ខែកញ្ញា បានឲ្យដឹងថា លោក សាមសុល រីហ្សាល់ ប៊ីន មូសា (Samsul Rizal Bin Musa) អនុព័ន្ធយោធាជំនួយការម៉ាឡេស៊ី និងជាប្រធានក្រុមអ្នកសង្កេតការណ៍អន្តរកាល (IOT) ប្រចាំប្រទេសថៃបានជំរុញឱ្យប្រទេសថៃរក្សាភាពស្ងប់ស្ងៀម និងបញ្ឈប់រាល់សកម្មភាពនៅភូមិព្រៃចាន់ ខេត្តបន្ទាយមានជ័យ ដែលស្ថិតនៅទល់មុខតំបន់ បានណង យ៉ាកែវ។

នៅក្នុងវីដេអូដែលអ្នកសារព័ត៌មានថៃបានសម្ភាសន៍លោក សាមសុល បាននិយាយថា៖ សូមរក្សាភាពស្ងៀមស្ងាត់នៅទីនេះ នោះអ្វីៗនឹងល្អ គ្មានបញ្ហាទេ ហើយយើងរង់ចាំរហូតដល់កិច្ចប្រជុំ JBC និងរង់ចាំការសម្រេចចិត្តបន្ទាប់។ វានឹងមិនអីទេ។

បន្ថែមពីនោះ លោកសាមសុល ក៏បានគូសបញ្ជាក់ក្នុងនាមជាអ្នកសង្កេតការណ៍ផងដែរថា៖ កងកម្លាំងប្រដាប់អាវុធថៃមានស្តង់ដារខ្ពស់ណាស់ក្នុងការក្លាយជាទាហាន ដូច្នេះវាមិនគួរឲ្យបារម្ភថានឹងមាននរណាម្នាក់អាចមកបៀតបៀនបាននោះទេ។ ប្រធានក្រុម IOT រូបនេះហាក់ចង់សំដៅថា លោកមិនបារម្ភឡើយថានឹងមានអ្នកណាហ៊ានចូលមកឈ្លានពានថៃ។

ការបដិសេធមិនចូលត្រួតពិនិត្យស្ថានភាពព្រំដែនតាមការអញ្ជើញរបស់ថៃ និងការប្រាប់ឲ្យថៃរក្សាភាពស្ងៀមស្ងាត់ដើម្បីរង់ចាំដោះស្រាយនៅកិច្ចប្រជុំ JBC ខាងមុខនេះ បានធ្វើឲ្យប្រជាពលរដ្ឋថៃកើតក្ដីក្ដៅក្រហា.យជាខ្លាំង ដោយពួកគេយល់ថាប្រទេសខ្លួនកំពុងត្រូវបានបរទេសប្រងើយកន្តោយដាក់ និងចា.ញ់ប្រៀបកម្ពុជា។

នៅក្នុងការបង្ហោះរបស់ Khaosod ប្រជាជនថៃបាននាំគ្នាចូលទៅខមិនបែបមិនពេញចិត្តថា «ថៃមិនគួជឿទុកចិត្តនរណម្នាក់ឡើយ ជាពិសេសប្រទេសដែលជាភាគីទី៣។» «ស្ងៀមស្ងាត់ៗ ឲ្យថៃស្ងៀមស្ងាត់រហូត ចុះអ្នកវិញកំពុងធ្វើអ្វី? ជិត៣ខែហើយមិនឃើញមានអ្វីប្រែប្រួលសោះ» «អ្វីទៅជាកិច្ចប្រជុំ JBC? និយាយមកដូចជាដឹងរឿងច្បាស់ណាស់អញ្ចឹង។»

គួរជម្រាបថា ករណីនៅភូមិព្រៃចាន់ និងភូមិជោគជ័យនៅកម្ពុជា ដែលភាគីថៃទាមទារ គឺជាចំណុចក្តៅចុងក្រោយនៃតំបន់ជម្លោះព្រំដែន។ កាលពីល្ងាចថ្ងៃពុធទី ១៧ ខែកញ្ញា ម្សិលមិញនេះ ពលរដ្ឋកម្ពុជជិត ៣០ នាក់ រួមទាំងព្រះសង្ឃ បានរងរបួសនៅពេលដែលប៉ូលិសបង្ក្រាបបាតុកម្មថៃប្រដាប់អាវុធ និងទាហានថៃប្រដាប់អាវុធ បានយកខ្សែលួសបន្លាមកដាក់នៅភូមិព្រៃចាន់ និងបានប៉ះទង្គិចជាមួយអ្នកភូមិកម្ពុជា៕

ប្រទេសថៃ ៖ ក្រោយពីសមត្ថកិច្ចថៃប្រព្រឹត្តអំពើហិ.ង្សា និងប្រើប្រាស់អាវុ.ធគ្រប់ប្រភេទមកលើពលរដ្ឋ និងព្រះសង្ឃខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យពលរដ្ឋខ្មែររងរបួស និងសន្លប់ជាច្រើននាក់ នាយករដ្ឋមន្ត្រីថៃ លោក អនុថីន ឆាន់វីរៈគូន និយាយថា កងទ័ពថៃមានអំណាចសម្រេចចិត្តលើបញ្ហាព្រំដែនខេត្តស្រះកែវ ទោះជាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាសុំការគាំទ្រពីប្រធានអាស៊ាន និងថ្នាក់ដឹកនាំពិភពលោក ដើម្បីជំរុញការអនុវត្តបទឈប់បា.ញ់រវាងកម្ពុជា-ថៃឱ្យមានប្រសិទ្ធភាពក្តី ប៉ុន្តែថៃត្រូវតែរក្សាផលប្រយោជន៍ជាតិ ។

នៅសភាពាណិជ្ជកម្ម នាយករដ្ឋមន្ត្រីថៃ លោក អនុថីន បាននិយាយមកកាន់សារព័ត៌មានថា កងទ័ពថៃជាអ្នកចាត់វិធានការនៅព្រំដែនខេត្តស្រះកែវ ហើយគ្មានការបើកព្រំដែនឡើយ ។ លោកសន្យាថា រដ្ឋាភិបាលនឹងស្តាប់មតិកងកម្លាំងនៅព្រំដែន បើទោះជាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាសុំការគាំទ្រពីប្រធានអាស៊ាន និងថ្នាក់ដឹកនាំពិភពលោក ឱ្យជំរុញការអនុវត្តបទឈប់បាញ់រវាងកម្ពុជា-ថៃក្តី ពីព្រោះថៃត្រូវតែរក្សាផលប្រយោជន៍ ។ នេះបើតាមការផ្សព្វផ្សាយរបស់សារព័ត៌មាន Top News នៅថ្ងៃទី១៨ ខែកញ្ញា ឆ្នាំ២០២៥ ។

លោកបន្តថា កងទ័ពជាអ្នកចាត់វិធានការ និងរាយការណ៍ពីបញ្ហានៅព្រំដែនខេត្តស្រះកែវ ខណៈច្បាប់អាជ្ញាសឹកបានប្រកាសនៅតំបន់នេះរួចហើយ ដូច្នេះ អំណាចសម្រេចចិត្ត គឺស្ថិតនៅលើកងទ័ព ។ បច្ចុប្បន្ន លោកពុំទាន់គ្រប់គ្រងរដ្ឋាភិបាលជាផ្លូវការទេ ប៉ុន្តែលោកសន្យាជាមួយពលរដ្ឋ និងផ្នែកទទួលខុសត្រូវសន្តិសុខថា បើរដ្ឋាភិបាលរបស់លោកចូលមកគ្រប់គ្រងប្រទេសជាផ្លូវការ គឺរដ្ឋាភិបាលនឹងស្តាប់ពីបញ្ហាសន្តិសុខនៅព្រំដែនដោយផ្ទាល់ ខណៈការបើកព្រំដែនឡើងវិញ គឺពុំទាន់បើកនៅឡើយទេ ។

ចំណែកសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាសុំការគាំទ្រពីប្រធានអាស៊ាន និងថ្នាក់ដឹកនាំពិភពលោក ឱ្យជំរុញការអនុវត្តបទឈប់បាញ់រវាងកម្ពុជា-ថៃ លោក អនុថីន និយាយថា មេដឹកនាំគ្រប់ប្រទេសត្រូវតែរក្សាផលប្រយោជន៍ជាតិរបស់ខ្លួន គឺដូចគ្នានឹងមេដឹកនាំថៃ ក៏ត្រូវរក្សាផលប្រយោជន៍ អធិបតេយ្យ និងសុវត្ថិភាពពលរដ្ឋថៃ ហើយលោកនឹងប្រកាន់ខ្ជាប់នូវគោលជំហរនេះមិនផ្លាស់ប្តូរ ។

គួរបញ្ជាក់ថា កងទ័ពថៃកាន់តែបញ្ចេញសណ្តានព្រៃផ្សៃឱ្យពិភពលោកបានឃើញច្បាស់ ក្រោយពីពួកគេប្រព្រឹត្តអំពើហិង្សាដោយការប្រើប្រាស់កាំភ្លើងគ្រាប់ជ័រ គ្រាប់បែកផ្សែង ឧបករណ៍បំពងសំឡេង ជំពាមកៅស៊ូគ្រាប់ឃ្លី ឧស្ម័នបង្ហូរទឹកភ្នែក ខែល និងកាំភ្លើងវែងខ្លី មកលើពលរដ្ឋខ្មែរកាលពីថ្ងៃទី១៧ ខែកញ្ញា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ ក្រៅពីនេះ កងទ័ពថៃថែមទាំងចោទប្រកាន់ដោយគ្មានមូលដ្ឋានច្បាស់លាស់ថា កម្ពុជាបង្កប់មីនថ្មីជាបន្តបន្ទាប់ ក៏ដូចជាចោទប្រកាន់កម្ពុជាល្មើសអធិបតេយ្យខ្លួននៅខេត្តត្រាត ។

កម្ពុជាស្នើឱ្យភាគីថៃចៀសវាងសកម្មភាពទាំងឡាយណាដែលនាំទៅដល់ការកើនឡើងនូវភាពតានតឹង និងពង្រីកតំបន់ជម្លោះ ដោយខិតខំធ្វើយ៉ាងណា បង្កបរិយាកាសអំណោយផលដល់ការអនុវត្តបទឈប់បាញ់ឱ្យបានពេញលេញ និងប្រកបដោយប្រសិទ្ធភាព ក្នុងនោះរួមទាំងការព្រមព្រៀងទាំងឡាយដែលភាគីទាំងពីរសម្រេចបានក្នុងកិច្ចប្រជុំគណៈកម្មាធិការព្រំដែនទូទៅ កម្ពុជា-ថៃ (GBC) និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ(RBC) ទាំងអស់ឱ្យបានម៉ឺងម៉ាត់ និងខ្ជាប់ខ្ជួន ។ ឆ្លៀតឱកាសនេះ កម្ពុជាបញ្ជាក់ពីការប្តេជ្ញាចិត្តសហការជាមួយភាគីថៃនៅគ្រប់កម្រិតដើម្បីលើកកម្ពស់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍសម្រាប់ជាប្រយោជន៍ដល់ប្រទេស និងពលរដ្ឋទាំងពីរ ៕

ប្រទេសថៃ ៖ តាំងពីឆ្នាំ២០២៤ រហូតមកដល់បច្ចុប្បន្ន សេដ្ឋកិច្ចថៃកាន់តែដុនដាបខ្លាំងឡើងក្រោយពីវិនិយោគិនបរទេសផ្លាស់ប្តូរទីតាំងផលិតទំនិញចេញពីប្រទេសថៃជាបន្តបន្ទាប់ ដែលបណ្តាលឱ្យរោងចក្រនានាបិទទ្វារភ្លាមៗ ពលរដ្ឋថៃបាត់បង់ការងារធ្វើ បាត់ប្រាក់ចំណូល ។ អ្វីគួរឱ្យភ្ញាក់ផ្អើលខ្លាំងនោះ គឺចំនួនពលរដ្ឋថៃមានជីវភាពក្រីក្របានកើនឡើងរហូតដល់ជាង៣លាននាក់កាលពីឆ្នាំ២០២៤ ។

ក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គមថៃបានបង្ហាញទិន្នន័យកាលពីឆ្នាំ២០២៤ ឬពេលប្រទេសថៃស្ថិតក្រោមការដឹកនាំរបស់រដ្ឋាភិបាលគណបក្សភឿថៃ គឺចំនួនពលរដ្ឋថៃក្រីក្រកើនឡើងរហូតដល់ជាង៣លាននាក់ (ឬស្មើ៣លាន៤សែន៣ម៉ឺននាក់) ដោយសារថៃប្រឈមនឹងវិបត្តិសេដ្ឋកិច្ច និងគ្រោះធម្មជាតិ ។ នេះបើតាមការផ្សព្វផ្សាយរបស់សារព័ត៌មានថៃ Spring News កាលពីថ្ងៃទី១៧ ខែកញ្ញា ឆ្នាំ២០២៥ ។

ក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គមបានបង្ហាញរបាយការណ៍វិភាគស្តីពី «ស្ថានភាពក្រីក្រ និងវិសមភាពនៅប្រទេសថៃ ឆ្នាំ២០២៤» ស្ថិតក្រោមការគ្រប់គ្រងរបស់រដ្ឋាភិបាលគណបក្សភឿថៃ ដែលមានលោក ស្រេតថា ថាវីស៊ីន ជានាយករដ្ឋមន្ត្រី បន្ទាប់មក លោកស្រី ផេថងថាន ស៊ីណាវ៉ាត់ ឡើងជានាយករដ្ឋមន្ត្រី ។ របាយការណ៍បញ្ជាក់ថា ពលរដ្ឋក្រីក្រនៅថៃកើនឡើងបន្ថែមទៀតជាង១លាននាក់ ដែលធ្វើឱ្យចំនួនពលរដ្ឋថៃក្រីក្រសរុបកើនឡើងរហូតដល់៣លាន៤សែន៣ម៉ឺននាក់ ឬស្មើ៤.៨៩% នៃចំនួនពលរដ្ឋថៃសរុប ។

កាលពីឆ្នាំ២០២៣ ថៃមានពលរដ្ឋក្រីក្រចំនួន២លាន៣សែន៩ម៉ឺននាក់ ខណៈប្រាក់ចំណូលពលរដ្ឋថៃម្នាក់ស្មើត្រឹមតែ៣,០៧៨បាតប៉ុណ្ណោះក្នុង១ខែ (ឬស្មើ៩៦ដុល្លារក្នុង១ខែ) រីឯកំណើនពលរដ្ឋថៃក្រីក្រភាគច្រើន គឺធ្វើការងារកសិកម្ម ។ ពលរដ្ឋថៃមានជីវភាពក្រីក្របំផុតបានកើនឡើងពីចំនួន៦សែន២ម៉ឺន៨ពាន់នាក់នៅឆ្នាំ២០២៣ មកស្មើនឹង៨សែន៩ម៉ឺននាក់នៅឆ្នាំ២០២៤ ឬស្មើ១.២៥% នៃចំនួនពលរដ្ឋថៃសរុប ។

ទោះជាស្ថានភាពក្រីក្ររបស់ពលរដ្ឋថៃល្អប្រសើរឡើងក្នុងរយៈពេលជាច្រើនឆ្នាំកន្លងមក ប៉ុន្តែកំណើនពលរដ្ឋថៃក្រីក្រកាលពីឆ្នាំ២០២៤ គឺជាសញ្ញាដាស់តឿនឱ្យថៃត្រូវប្រុងប្រយ័ត្នបំផុត ជាពិសេស ពេលសេដ្ឋកិច្ចពិភពលោក និងសេដ្ឋកិច្ចថៃប្រឈមនឹងភាពមិនប្រាកដប្រជាដោយសារកត្តាជាច្រើន ។ កត្តាចម្បងធ្វើឱ្យមានកំណើនពលរដ្ឋថៃក្រីក្រ គឺបណ្តាលមកពីពលរដ្ឋថៃពុំទទួលបានការឧបត្ថម្ភសុខុមាលភាពពីរដ្ឋ គ្រោះធម្មជាតិ និងការប្រែប្រួលតម្លៃទំនិញកសិកម្ម ។

ស្ថានភាពក្រីក្ររបស់ពលរដ្ឋថៃនេះ គឺជាការជំរុញឱ្យរដ្ឋាភិបាលត្រួតពិនិត្យការពង្រឹងវិធានការផ្សេងៗក្នុងសង្គម, ជួយសង្គ្រោះពលរដ្ឋងាយរងគ្រោះ និងមានប្រសិទ្ធភាពជាងមុន ដើម្បីអាចអនុវត្តគោលនយោបាយកាត់បន្ថយភាពក្រីក្ររបស់ប្រទេសថៃរយៈពេលវែង ។

គួរបញ្ជាក់ថា ពលរដ្ឋថៃក្រីក្រមួយចំនួនបានអង្គុយសុំទាននៅតាមទីប្រជុំជននានាក្នុងទីក្រុងបាងកក និងតាមបណ្តាខេត្តដើម្បីឱ្យសាធារណជន និងភ្ញៀវទេសចរបរទេសអាណិតអាសូរ ខណៈរដ្ឋាភិបាលថៃ ក៏ដូចជាស្ថាប័នពាក់ព័ន្ធព្យាយាមកាត់បន្ថយអ្នកសុំទានកុំឱ្យខូចមុខមាត់ប្រទេសថៃ ៕