ដូចប្រិយមិត្តមួយចំនួនជ្រាបមកហើយថា សុវត្ថិ មុន្នីនាគ ឬ N.John ត្រូវបានទស្សនិកជនរិះគន់ចាស់ដៃនៅពេលតារាចម្រៀងរស់នៅសហរដ្ឋអាម៉េរិករូបនេះចេញបទចម្រៀងប៉ះចំតែថ្ងៃខ្មែរនិងថៃមានរឿងក្តៅគគុក។ ទោះយ៉ាងណា ខុសពីមហាជនភាគច្រើនដែលមានការរិះគន់ តារាកំប្លែង ម៉ាដូណា លើកទឹកចិត្ត N.John កុំឱ្យបាក់ទឹកចិត្តក្នុងវិស័យនេះ។

តារាកំប្លែង ម៉ាដូណា បានលើកឡើងថា N.John ជាអ្នកសិល្បៈកូនខ្មែរម្នាក់ដែលមានសមត្ថភាពខ្ពស់ ទាំងភាសា ច្រៀង រាំ ហើយនឹងធ្វើឱ្យពិភពលោកស្គាល់ប្រទេសកម្ពុជាកាន់តែច្រើន។ លោក ថាទាំង N.John ផ្ទាល់និងឪពុកម្តាយយល់ច្បាស់ថាបញ្ហាប្រទេសយ៉ាងមិច តែជីវិតសិល្បៈនៅស្រុកក្រៅរបស់លោកគឺមានការគ្រប់គ្រងដោយជនជាតិបរទេស ហើយចរិតបរទេសគឺមានផែនច្បាស់លាស់ក្នុងការប្រម៉ូតដើម្បីបង្ហាញរាល់វីដេអូចម្រៀងរបស់ N.John ។ ម៉ាដូណា បានលើកឡើងទៀតថា អ្នកប្រម៉ូតដែលជនជាតិបរទេសគេមិនបានគិតពីបញ្ហាជម្លោះប្រទេសទេ។ តារាកំប្លែងរូបនេះសង្ឃឹមថាទស្សនិកជននឹងយល់ និងជួយលើកទឹកចិត្តដល់កូនខ្មែររូបនេះផង។

ម៉ាដូណា ថាពេលមកស្រុកក្រៅដូចជាខ្លួនជួបជនបរទេស ទស្សនិកជននឹងដឹងថាគេមិនសូវស្គាល់ប្រទេសកម្ពុជាទេ គេស្គាល់តែប្រទេសលេខ២។ លោកសម្តែងការជឿជាក់ថា N.John នឹងសាងប្រជាប្រិយឱ្យពិភពលោកកាន់តែស្គាល់ប្រទេសកម្ពុជា ដោយសុំឱ្យប្រជាជនខ្មែរទុកតារាចម្រៀង N.John បន្តក្នុងវិស័យមួយនេះដើម្បីបន្តបង្ហាញទៅកាន់ពិភពលោក ដោយសុំចិត្តងាកមករកដំណោះស្រាយ ដល់ប្រជាជនដែលនៅទល់ដែនវិញ។ បញ្ចប់សេចក្តីរបស់ខ្លួន ម៉ាដូណា បានលើកទឹកចិត្ត N.John កុំឱ្យមានការបាក់ទឹកចិត្តផងដែរ។

គួរបញ្ជាក់ផងដែរថា នៅយប់ថ្ងៃទី១៧ ខែកញ្ញា N.John បានបញ្ចេញ Trailer បទថ្មី«FEEL LIKE THIS» ស្របពេលមានរឿងក្តៅគគុកជាមួយថៃ។ សកម្មភាពនេះបានជំរុញឱ្យសាធារណជនបញ្ចេញមតិរិះគន់យ៉ាងចាស់ដៃទៅកាន់ N.John ។ អ្នកមួយចំនួនថែមទាំងស្នើដល់ឧកញ៉ា ព្រាប សុវត្ថិ ជាឪពុកជួយមើលកូនប្រុសកុំឱ្យចេញបទចម្រៀងខុសកាលៈទេសៈបែបនេះ។ អ្នកខ្លះក៏លើកឡើងពីភាពស៊យរបស់ N.John ព្រោះជាច្រើនដងហើយដែលអ្នកកាន់ផេកដាក់ថ្ងៃចេញបទចម្រៀងចំតែថ្ងៃដែលថៃឈ្លានពានខ្មែរ៕

ដូចអ្នកតាមដានវិស័យបវរកញ្ញាជ្រាបមកហើយថាដ្បិតតែកម្មវិធីបវរកញ្ញាចក្រវាលកម្ពុជាឆ្នាំ២០២៥ បានរកឃើញម្ចាស់មកុដហើយក្តីប៉ុន្តែការដ្រាម៉ានៅលើបណ្តាញសង្គមកើតមានជាហូរហែរហូ។ ទោះយ៉ាងណា នាយកកម្មវិធីនេះគឺជាលោក ឆយ ពុំបានចេញមកនិយាយអ្វីនោះទេចាប់តាំងពីមានភាពចម្រូងចម្រាសមកប៉ុន្តែស្រាប់តែលោកបង្ហើបនៅលើ Instagram ជាមួយនឹងពាក្យថាចូលនិវត្តន៍អមមកជាសញ្ញាសួរ។

កាលពីថ្ងៃទី១៨ ខែកញ្ញា ផេកគាំទ្រវិស័យបវរកញ្ញាបានបង្ហាញអំពីនាយកជាតិក្នុងកម្មវិធី Miss Universe Cambodia លោក ឆយ បានបង្ហាញសកម្មភាពបន្ទាប់ពីជិតមួយសប្តាហ៍នៃការរកឃើញមកុដកម្មវិធីនេះ។ លោកបានបង្ហោះពាក្យជាភាសាអង់គ្លេសដែលមានន័យជាភាសាខ្មែរថា «ចូលនិវត្តន៍» ជាមួយនឹងសញ្ញាសួរ។ ពាក្យខ្លីនេះបានធ្វើឱ្យមនុស្សជាច្រើនជឿថាលោកទំនងជាចង់សម្រាកពីការរៀបចំកម្មវិធីបវរកញ្ញាចក្រវាលហើយមើលទៅ។

គួរឱ្យដឹងថាលោក ឆយ បានកាន់កាប់សិទ្ធិរៀបចំកម្មវិធី Miss Universe Cambodia ក្នុងឆ្នាំ២០២៤ និងឆ្នាំ២០២៥ ដោយឆ្នាំនេះលោកមានការរៀបចំប្រកួតប្រជែងជាច្រើនវគ្គ ប៉ុន្តែការប្រកួតក្នុងកម្មវិធីនេះបែរជាមានការដ្រាម៉ាកើតទុក្ខមិនសុខចិត្តទៅវិញ។ ឃើញចេតនារបស់លោក ឆយ ទំនងជាចង់ចូលនិវត្តន៍បែបនេះ អ្នកគាំទ្រជាច្រើនបានលើកទឹកចិត្តលោកឱ្យបន្តកាន់កម្មវិធីនេះបន្តទៀតព្រោះការរៀបចំរបស់លោកគឺធ្វើបានល្អច្រើនណាស់។

មិនត្រឹមតែទស្សនិកជនគាំទ្រទូទៅប៉ុណ្ណោះទេ ងាកមកកាន់លោក អូលីវ៉ា គង់ ក៏បានកោតសរសើរលើកទឹកចិត្តលោក ឆយ ដូចគ្នា។

អ្នកច្នៃម៉ូតទទួលបានពានរង្វាន់អន្តរជាតិរូបនេះបានសរសេរនៅលើបណ្តាញសង្គមហ្វេកប៊ុកថា «គាត់គឺជា ND មួយរូបដែរមានចក្ខុវិស័យល្អ ជាអ្នកដឹកនាំអស្ចារ្យ ប្រកបដោយក្រមសីលធម៌ ខ្ញុំនៅតែគោរពស្រលាញ់នឹងគាំទ្រឱ្យគាត់បន្តនៅក្នុងវិស័យមួយនេះ»៕

បន្ទាប់ពីកងកម្លាំងថៃបន្តធ្វើទុក្ខបុកម្នេញមកលើខាងកម្ពុជាលែងស្គាល់បុណ្យបាបខែភ្ជុំ វាពិតជាធ្វើឱ្យពលរដ្ឋកម្ពុជារួមទាំងជាតិសាសន៍ដទៃឃើញសន្តានប្រទេសថៃកាន់តែច្បាស់។ ជាមួយនឹងរឿងរ៉ាវដែលកើតឡើងក្តៅគគុកកាលពីល្ងាចថ្ងៃទី១៧ ខែកញ្ញា ហ្វីយ៉ាតា បានបង្ហាញសារពីប្រិយមិត្តមានទាំងទាហានចង់ជូនដំណើរនាង និងអ្នកគាំទ្រព្រួយបារម្ភចំពោះសុខសុវត្ថិភាព។

Miss Universe Cambodia 2025 បានបង្ហាញសារចំនួនពីរពីអ្នកគាំទ្រខ្លួនកាលពីយប់ថ្ងៃទី១៧ ខែកញ្ញា ដោយភ្ជាប់មកជាមួយនឹងសម្តីថា «ខ្លួនជាបវកញ្ញា ចិត្តជាទាហាន បារម្ភ.. តែចិត្តគិតពីទង់ជាតិខ្លួនបំផុត.. ហ៊ឹម សុំព្រះតាមជួយការពាររាល់ប្រជាជនខ្មែរ រួមទាំងខ្ញុំផងចុះ.. ភាពស្មោះត្រង់ត្រូវតែឈ្នះ..»។ តាមការបង្ហាញរបស់ ហ្វីយ៉ាតា មានគណនីហ្វេកប៊ុកមួយបានអះអាងថាជាទាហានការពារនៅប្រាសាទតាមាន់មានបំណងចង់សុំច្បាប់មេរបស់ខ្លួនជូនដំណើររូបនាងឡើងយន្តហោះ។

ខ្លឹមសារមួយទៀតគឺបានបង្ហាញពីអ្នកគាំទ្រដែលសម្តែងការព្រួយបារម្ភចំពោះសុខសុវត្ថិភាពរបស់ ហ្វីយ៉ាតា ដែលត្រូវចេញទៅប្រកួតនៅប្រទេសថៃ។

ស្ថិតក្នុងកាលៈទេសៈនេះវាពិតជាមានភាពតានតឹងសម្រាប់បវរកញ្ញាចក្រវាលកម្ពុជាឆ្នាំ២០២៥ ដែលនឹងត្រូវចេញទៅប្រកួតនាពេលឆាប់ៗខាងមុខនៅប្រទេសថៃក្នុងការតំណាងឱ្យប្រទេសកម្ពុជា។ ហ្វីយ៉ាតា បានបង្ហាញចំណាប់អារម្មណ៍របស់ខ្លួន នាងមានការព្រួយបារម្ភ ប៉ុន្តែពិតជាមិនចង់ឈប់នោះទេ។

គួរបញ្ជាក់ផងដែរថា ការប្រកួតផ្តាច់ព្រ័ត្រ Miss Universe លើកទី៧៤ នឹងប្រព្រឹត្តទៅនៅថ្ងៃទី២១ ខែវិច្ឆិកា ឆ្នាំ២០២៥ នៅលើទឹកដីប្រទេសថៃ៕

ទង្វើឈ្លានពានរបស់កងកម្លាំងថៃធ្វើដាក់ពលរដ្ឋកម្ពុជាមិនលើកឡើងសូម្បីតែព្រះសង្ឃ ពិតធ្វើឱ្យមានការឈឺចាប់យ៉ាងខ្លាំង ប៉ុន្តែអ្នកមួយចំនួនតូចហាក់មិនចេះឈឺចាប់នោះទេហើយនៅតែបន្តគាំទ្រទំនិញចោរឈ្លានពាន។ ប៉ីប៉ី ឌី សុភ័ក្រ កុសុម៉ា ហេង វាសនា វ៉ាន់ នីឡា ជំរុញឱ្យអ្នកមួយចំនួនចេះឈឺចាប់ឈប់គាំទ្រផលិតផលប្រទេសនេះតទៅទៀត។

បុគ្គលល្បីឈ្មោះក្នុងសង្គម ប៉ីប៉ី ឌី ដែលពហិការមិនចាក់បញ្ចាំងកុនខ្លួននៅរោងកុនមានប្រភពមកពីថៃ និងមិនប្រើផលិតផលថៃក្នុងហាងរបស់ខ្លួន បានបង្ហោះនៅលើបណ្តាញសង្គមថា «សៀមនៅតែបន្តឈ្លានពាន ដោយមិនខ្លាចច្បាប់ និងអន្តរជាតិណាឡើយនេះគឺជាសណ្តានថោកទាប និងជារឿងដ៏ឈឺចាប់ដែលខ្មែរត្រូវចងចាំ។ សៀមវាមិនចោលមាយាទទេ ហេតុអីខ្មែរមួយចំនួនឆាប់ភ្លេចម៉្លេះ ឈប់ប្រើ ឈប់ទិញ ឈប់ស៊ីរបស់វាទៀតទៅកុំឱ្យចំណូលបានដល់វា មិនថាក្រុមហ៊ុន ផលិតផល ហាងអីក៏ដោយដែលមានប្រភពមកពីសៀម កុំថោកអត់វាមិនបានពេក ចង់ឱ្យយវាមានបានហើយបន្តយកស្អីមកធ្វើបាបខ្មែរទៀតមែន?»។

លោក ហេង វាសនា ជា Influencer វិញបានបង្ហោះដែរថា «ម៉េចហើយអ្នកប្រើ អ្នកលក់អីវ៉ាន់ថៃ ចាក់សាំងថៃ គាំទ្រថៃ? ដល់ពេលវាបាញ់គ្រាប់ជ័រ ត្រូវបងប្អូនខ្មែរ ហើយវារុករានរាល់ថ្ងៃអ៊ីចឹង សួរថាអត់ចេះឈឺចាប់សោះម៉្មង? ឬក៏អាងថារាល់ថ្ងៃអត់ទាន់ប៉ះខ្លួនផង ខ្លួននៅសុខ អ៊ីចឹងក៏អត់ឈឺក្បាលវិលមុខ? អត់យល់ គេដៀលពូជសាសន៍ គេជាន់ឈ្លី គេឈ្លានពាន តែអត់ចេះឈឺចាប់! ងប់ម៉េះ?»។

ពិធីការិនី សុភ័ក្រ កុសុម៉ា វិញបានលើកឡើងទាំងក្តីឈឺចាប់ថា «ឃើញវីដេអូសៀមឈ្លា.នពានហើយ ឈឺចាប់ណាស់មិនដឹងជួយអីបាន ក្រៅពីបញ្ឈប់ដាច់ខាតប្រើប្រាស់របស់ពួកចោ.រ តើយើងត្រូវឱ្យគេមើលងាយដល់ពេលណាទៀត ?»។

តារាចម្រៀង វ៉ាន់ នីឡា បានបង្ហោះវីដេអូខ្លីមួយជាមួយនឹងខ្លឹមសារថា «បន្តពហិការ .. ស្អីតែមួយចំណិតក៏មិនប្រើរបស់វាដែរ អ្នកលក់មួយចំនួនក៏ដូចគ្នា កុំព្រោះតែលុយធ្វើឱ្យពួកវាជិះជាន់និងមានប្រៀបលើយើងគ្រប់យ៉ាងពេក វាមិនព្រមដកថយទេរឹតតែលួចរបស់យើងស្រស់ៗ ហើយរបស់ញុំារបស់ប្រើដូចគ្នា បទពិសោធន៍កន្លងមកពួកយើងធ្លាប់ដឹងហើយមានទាំងដូរលេខកូដប្រទេសក៏មាន ដល់ពេលចឹងធ្វើឱ្យអ្នកប្រើរាងចាល»៕

ឃើញទង្វើឈ្លានពានរបស់ប្រទេសថៃដែលចិញ្ចឹមចិត្តចង់បានម្តងហើយម្តងទៀតមិនចេះចប់ ព្រះនាង នរោត្តម ចេណ្ណា បង្ហាញព្រះទ័យសោកសៅនិងក្រៀមក្រំយ៉ាងខ្លាំងដែលប្រជាពលរដ្ឋខ្មែរកំពុងរងទុក្ខវេទនា។ ព្រះនាងបានលើកឡើងទៀតថាកើតជាមនុស្ស មិនថាក្នុងប្រទេសណាក៏ស្រលាញ់ប្រទេសរបស់ខ្លួនដែរ ប៉ុន្តែហេតុអ្វីមនុស្សមួយចំនួនមិនអាចរស់នៅដោយស្កប់ស្កល់ចាំបាច់អីដណ្តើមទឹកដីគេ។

នៅរសៀលថ្ងៃទី១៨ ខែកញ្ញា ព្រះនាង ចេណ្ណា បានផ្ញើសារនៅលើបណ្តាញសង្គមដោយបង្ហាញថា «អារម្មណ៍ខ្ញុំនៅពេលនេះ មានតែការសោកស្តាយ និងក្រៀមក្រំនៅពេលឃើញ ប្រជាជនខ្មែរដ៏កំសត់ កំពុងរងទុក្ខវេទនាពីទង្វើឈ្លានពានរបស់ប្រទេសជិតខាង។ ចំពោះខ្ញុំគ្រាន់តែក្មេងម្នាក់ខ្ញុំមិនយល់ទេថាយើងកើតជាមនុស្សមិនថាក្នុងប្រទេសណាក៏ដោយ ក៏ស្រលាញ់ប្រទេសរបស់ខ្លួនដូចគ្នា ប៉ុន្តែហេតុអ្វីមនុស្ស មួយចំនួនមិនអាចរស់នៅ ដោយសេចក្តីស្កប់ស្កល់បាន? ចាំបាច់ ដណ្តើមទឹកដី គេ ឈ្លានពាននិងបំផ្លាញជីវិតមនុស្សដទៃ ដែលពួកយើងសុំត្រឹមតែមានជីវិតរស់នៅព្រោះពួកយើងគ្រាន់តែចង់មានផ្ទះ មានគ្រួសារ មានសេចក្តីស្រឡាញ់ និងសន្តិភាពប៉ុណ្ណោះ»។

សិល្បការិនីដែលមានសែរាជវង្សបានបន្តទៀតថា «សូមពិភពលោកបានឃើញនូវអំពើឃោរឃៅរំលោភឈ្លានពានយ៉ាងគឃ្លីន របស់ប្រទេសជិតខាង មកលើទឹកដីខ្មែរ ប្រជាជនខ្មែរស្លូតត្រង់។ ខ្ញុំក៏បួងសួង សូមឱ្យពិភពលោក មានតែសេចក្តីស្រឡាញ់ ក្តីមេត្តា ករុណា និងសន្តិភាពតែប៉ុណ្ណោះ»។

គួរបញ្ជាក់ផងដែរថា កាលពីកន្លងមកនេះ ព្រះនាង នរោត្តម ចេណ្ណា បានចេញសារប្រាប់ពិភពលោកចំនួន៤ភាសារួមមាន ភាសាខ្មែរ អង់គ្លេស ចិន និងបារាំង អំពីគោលជំហររបស់ប្រទេសកម្ពុជាគឺចង់បានសន្តិភាព ហើយប្រទេសដ៏តូចមួយនេះមិនទទួលបានផលប្រយោជន៍អ្វីឡើងអំពីជម្លោះព្រំដែនខ្មែរ-ថៃ៕