តារាពហុជំនាញ ខាត់ សុឃីម បានចេញវីដេអូមួយដែលអង្រួនចិត្តអ្នកទស្សនាយ៉ាងខ្លាំង។ មិនត្រឹមតែប៉ុណ្ណោះក្នុងការពន្យល់ឱ្យសាធារណជនងាកមកគាំទ្រផលិតផលក្នុងស្រុកបង្កើនសេដ្ឋកិច្ចជាតិតារាស្រីរូបនេះថែមទាំងប្រកាសជួយផ្សព្វផ្សាយផលិតផលដែលជារបស់ខ្មែរដោយមិនគិតកម្រៃអ្វីទាំងអស់។

នៅក្នុងវីដេអូដែលបានបង្ហោះកាលពីយប់ថ្ងៃទី៣០ ខែកញ្ញា អ្នកនាង ខាត់ សុឃីម បានលើកយករឿងរ៉ាវដែលប្រទេសជិតខាងប្រមាថខ្មែរនិងគំរាមកំហែងជាច្រើន ដៀលខ្មែរថាមានអ្នកសុំទានកន្លះប្រទេស បើគេកើតជាឆ្កែគ្រាន់បើគេកើតមកជាខ្មែរនិងមើលងាយវិរកងទ័ពខ្មែរទៀត។ ពាក្យសម្តីប្រមាថទាំងនេះអ្នកនាង ខាត់ សុឃីម ថាវាធ្វើឱ្យយើងឈឺចាប់តកូនតចៅហើយផ្នត់គំនិតរបស់គេគិតថាយើងចូលចិត្តប្រើរបស់ស្រាប់ៗមិនចេះផលិតដោយខ្លួនឯងជាប្រទេសតូចប្រជាជនតិចគ្មានអាវុធទំនើបៗដូចគេ។

អ្នកនាង ខាត់ សុឃីម បានលើកឡើងថាខ្មែរមិនខ្សោយនោះទេពូកែដាំដុះ ពូកែច្នៃប្រឌិតគិតគូរវែងឆ្ងាយហើយវីរកងទ័ពគឺមានភាពក្លាហាន មោះមុតអង់អាចហ៊ានប្តូរជីវិតដើម្បីការពារជាតិមាតុភូមិ។ ក្នុងរយៈពេលសង្គ្រាម៥ថ្ងៃ អ្នកនាង ខាត់ សុឃីម ថាប្រជាជនខ្មែរកាន់តែមានការសាមគ្គីកាន់តែខ្លាំងពីព្រោះយើងឈឺចាប់ការប្រមាថមួយនេះ។

ទន្ទឹមនឹងការប្រមាថនេះ អ្នកនាង ខាត់ សុឃីម ថាយើងត្រូវយកការឈឺចាប់នេះមកសួរខ្លួនឯងវិញថាយើងអាចធ្វើអ្វីបានបន្ថែមទៀតដើម្បីប្រទេសជាតិយើង។ ជាមួយគ្នានេះ អ្នកនាង ខាត់ សុឃីម បានលើកឡើងថាយើងត្រូវខិតខំប្រឹងប្រែងទៅតាមជំនាញរៀងៗខ្លួនដែលមានហើយខិតខំបន្ថែមទៀតនិងជួយផ្សព្វផ្សាយគ្នាទៅវិញទៅមកពីផលិតផលខ្មែររបស់យើង។

ក្នុងនាមជាអ្នកសិល្បៈមួយរូបអ្នកនាង ខាត់ សុឃីម ថាខ្លួននឹងខិតខំប្រឹងប្រែងផ្សព្វផ្សាយបន្ថែមទៀតអំពីខ្មែរវប្បធម៌ អរិយធម៌ខ្មែរ ផលិតផលខ្មែរ អាជីពកម្មខ្មែរតូចធំនៅក្នុងប្រទេសកម្ពុជាដោយមិនគិតកម្រៃ។ អ្នកនាង ក៏បានរំលេចដែរថា ខ្មែរមានផលិតផលច្រើនណាស់ដែលអាចជំនួសផលិតផលនាំចូលរបស់បរទេសបាន៕

បាងកក៖ មិនខ្លាចតុលាការមិនមែនថៃទេ! លោក Anutin Charnvirakul នាយករដ្ឋមន្ត្រីថៃបានបញ្ជាក់ជាថ្មីថា លោកនឹងមិនទទួលស្គាល់បណ្តឹងរបស់កម្ពុជានៅ ICJ ជុំវិញបញ្ហាប្រាសាទតាមាន់ធំ និងប្រាសាទតាក្របីជាដាច់ខាត ព្រោះថៃមានការកំណត់ព្រំដែនច្បាស់លាស់ ហើយទីតាំងរបស់ប្រាសាទទាំងពីរនោះ គឺស្ថិតក្នុងទឹកដីថៃពិតៗកម្ពុជាគ្មានសិទ្ធិទាមទារនោះទេ។ នេះបើយោងតាមសារព័ត៌មាន The Nation។

នៅថ្ងៃទី1 ខែតុលា ឆ្នាំ2025 នាយករដ្ឋមន្ត្រី Anutin Charnvirakul បានប្រកាសនៅចំពោះមុខអ្នកសារព័ត៌មានថា រដ្ឋាភិបាលរបស់ថៃនឹងមិនទទួលស្គាល់ការប្ដឹងរបស់កម្ពុជាដែលទាមទារកម្មសិទ្ធិលើទីតាំងប្រាសាទតាមាន់ធំ និងតាក្របីនោះទេ ព្រោះទីតាំងប្រាសាទទាំងពីរនេះ គឺស្ថិតនៅព្រំដែនខេត្តសុរិន្ទ ដែលជាផ្នែកមួយនៃទឹកដីថៃ។

លោក Anutin បានសង្កត់ធ្ងន់ថា បើទោះបីជាកម្ពុជាមានសិទ្ធិនាំយកបញ្ហានេះទៅតុលាការអន្តរជាតិក៏ដោយ ប៉ុន្តែប្រទេសថៃមានការកំណត់ព្រំដែនរបស់ខ្លួនច្បាស់លាស់ ហើយនឹងការពារផលប្រយោជន៍ជាតិរបស់ខ្លួន។ លោកក៏បានកត់សម្គាល់ផងដែរថា ប្រទេសថៃមិនដែលទទួលយកយុត្តាធិការរបស់ ICJ ក្នុងរឿងនេះទេ។

ទន្ទឹមនឹងនេះ ក្នុងកិច្ចប្រជុំក្រុមប្រឹក្សាសន្តិសុខជាតិ ដែលគ្រោងធ្វើនៅថ្ងៃព្រហស្បតិ៍នេះ ប្រទេសថៃនឹងជ្រើសរើសប្រធានតំណាងថ្មីនៃគណៈកម្មាធិការព្រំដែនរួមរបស់ខ្លួនជាមួយកម្ពុជា ចាប់តាំងពីអាណត្តិនៃតំណាងបច្ចុប្បន្នត្រូវបានបញ្ចប់។

ចំណែកខាងភាគីកម្ពុជា ក្រសួងការពារជាតិបាននិយាយថា តំបន់កងទ័ពភាគទីមួយរបស់ប្រទេសថៃត្រូវបានអញ្ជើញឱ្យចូលរួមក្នុងកិច្ចប្រជុំគណៈកម្មាធិការព្រំដែនតំបន់បន្ទាប់ (RBC) ដែលគ្រោងធ្វើឡើងនៅថ្ងៃទី ១០ ដល់ថ្ងៃទី ១២ ខែតុលា នៅខេត្តបន្ទាយមានជ័យ។ បើតាមលោកជំទាវឧត្តមសេនីយ៍ឯក ម៉ាលី សុជាតា បានឲ្យដឹងថា កិច្ចប្រជុំនោះមានគោលបំណងពង្រឹងការអនុវត្តលក្ខខណ្ឌបទឈប់បា.ញ់រវាងកម្ពុជា-ថៃ និងលើកកម្ពស់សន្តិភាពឲ្យមានភាពយូរអង្វែង។

យ៉ាងណាក៏ដោយ ការចេញមកបញ្ជាក់ជាថ្មីពីការមិនទទួលស្គាល់យុត្ថាធិការរបស់តុលាការយុត្តិធម៌អន្តរជាតិ (ICJ) ក្នុងការកាត់ក្ដីលើជម្លោះព្រំដែនពីសំណាក់ភាគីថៃនេះពុំមែនជារឿងថ្មីនោះទេ។ កន្លងមកថៃតែងប្រកាសបែបនេះដើម្បីអូសទាញកម្ពុជាឲ្យយល់ព្រមបញ្ចប់រឿងត្រឹមទ្វេភាគី ព្រោះថៃដឹងច្បាស់ថាខ្លួននឹងចា.ញ់យ៉ាងអាម៉ាស ប្រសិនបើថៃហ៊ានតែឡើងទៅដោះស្រាយនៅតុលាការអន្តរជាតិជាមួយកម្ពុជា៕

ប្រទេសថៃ៖ ក្រៅពីលើការលិចលង់ផ្ទះសម្បែងនិងសំណង់ហេដ្ឋារចនាសម្ព័ន្ធក៏ដូចជាប្រព័ន្ធគមនាគមន៍ហើយនោះ ទឹកជំនន់ដ៏ធ្ងន់ធ្ងរដែលកំពុងកើតមាននៅក្នុងប្រទេសថៃ ក៏បានជន់លិចកសិដ្ឋានចិញ្ចឹមក្រពើនាំឲ្យក្រពើរួចចេញមកក្រៅ បង្កបានជាក្ដីបារម្ភសម្រាប់អ្នកភូមិអ្នកស្រុកមានភាពភ័យខ្លាចគ្រប់ៗគ្នា។

យោងតាមការចុះផ្សាយរបស់សារព័ត៌មាន Matichon នាយប់ថ្ងៃទី1 ខែតុលា ឆ្នាំ2025 បានឲ្យដឹងថា នៅក្នុងសហគមន៍ Ban Bang Prong ក្នុងឃុំ Nakhon Sawan Ok ស្រុក Muang ខេត្ត Nakhon Sawan អ្នកស្រុកមានការភ័យខ្លាចយ៉ាងខ្លាំង បន្ទាប់ពីប្រទះឃើញក្រពើមួយក្បាលបណ្ដែតខ្លួនពីលើទឹកក្នុងសហគមន៍របស់ពួកគេដែលកំពុងជួបគ្រោះទឹកជំនន់។

បើតាមអ្នកស្រី ជីរ៉ាផន ជាអ្នកស្រុកនៅទីនោះបានបង្ហើបថា កាលពី២ថ្ងៃមុន អ្នកស្រីបានឃើញសត្វក្រពើអណ្តែតទឹកនៅទីតាំងពីរខុសគ្នា ដែលជាធម្មតាគាត់ឃើញនៅពេលព្រឹក និងពេលល្ងាច។ គាត់សង្ស័យថា យ៉ាងហោចណាស់មានក្រពើពីរក្បាលកំពុងសម្ងំនៅក្នុងសហគមន៍នេះ។ គាត់ក៏បានជូនដំណឹងភ្លាមៗដល់មន្ត្រីជលផលឱ្យចុះស្រាវជ្រាវ និងដាក់អន្ទាក់ចាប់វាដែរ ប៉ុន្តែរហូតមកដល់ពេលនេះរកមិនឃើញក្រពើឡើយ ។ ខណៈនេះអ្នកស្រុកព្រួយបារម្ភពីគ្រោះថ្នាក់ដល់មនុស្ស និងសត្វចិញ្ចឹមក្នុងតំបន់។

អ្នកភូមិមួយចំនួនជឿថា ក្រពើនេះអាចជារបស់ក្រពើម្ចាស់កសិដ្ឋានម្នាក់ឈ្មោះ Chao Mae Mon Thong ដែលរស់នៅតំបន់បឹងបូរ៉ាផេត ហើយវាបានរួចមកតាមទឹកដែលហៀរចេញពីស្រះនៅពេលមានទឹកជំនន់។ ជារៀងរាល់ឆ្នាំនៅពេលដែលទឹកជំនន់ជន់លិចសហគមន៍បឹងព្រុង ក្រពើតែងតែឃើញសត្វក្រពើមករកចំណីនៅតំបន់នេះ ដោយសារសហគមន៍នេះនៅជិតបឹងបូរ៉ាផេត។

គួរជម្រាបថា សហគមន៍ Bang Prong កំពុងប្រឈមនឹងវិបត្តិទឹកជំនន់ ដោយសារទឹកទន្លេចៅផ្រាយ៉ាហូរហៀរ បានជន់លិចផ្ទះជាង ៨០ខ្នង។ អ្នកស្រុកជាច្រើនត្រូវបានបង្ខំឱ្យជម្លៀសចេញ និងទៅរស់នៅតាមដងផ្លូវជាបណ្ដោះអាសន្នដើម្បីសុវត្ថិភាព។

កាលពីប៉ុន្មានសប្ដាហ៍មុន ករណីស្រដៀងគ្នាបានកើតឡើងម្ដងរួចទៅហើយ នោះគឺការរួចសត្វក្រពើចេញកសិដ្ឋានហើយចេញអុកឡុកប្រជាពលរដ្ឋពេញដងផ្លូវ បង្កើតការភ្ញាក់ផ្អើលនិងភ័យរន្ធ.ត់ជាខ្លាំងសម្រាប់សាធារណជន។ ជាថ្មីម្ដងទៀត ពលរដ្ឋសំណូមពរឲ្យអាជ្ញាធរមូលដ្ឋានជួយពន្លឿនការស្វែងរកក្រពើដែលទើបរួចថ្មីនេះផង ព្រោះបើមិនដូច្នេះទេ ពួកគេនឹងដេកមិនលក់បក់មិនល្ហើយទាំងយប់ទាំងថ្ងៃជាមិនខាន៕

នៅថ្ងៃទី១ ខែតុលា ឆ្នាំ២០២៥នេះ មន្ទីរធនធានទឹក និងឧតុនិយម ខេត្តពោធិ៍សាត់ បានចេញសេចក្តីប្រកាសស្តីពីស្ថានភាពទឹកស្ទឹងពោធិ៍សាត់ ដែលកើនឡើងក្នុងកម្រិតមួយដែលត្រូវប្រកាសអាសន្ន។

នៅក្នុងសេចក្តីប្រកាសនេះ បានបញ្ជាក់ថា៖”បន្ទាប់ពីបានធ្វើការសង្កេតតាមដានលើស្ថានភាពអាកាសធាតុរួចមក ឃើញថាមានភ្លៀងធ្លាក់នៅតំបន់ជួរភ្នំក្រវាញ ស្ទឹងអារ៉ៃ និងស្ទឹងធំ មានកម្រិតខ្ពស់មកលើដងស្ទឹងពោធិ៍សាត់។ ឥទ្ធិពលនៃស្ទឹងខាងលើនេះ នឹងធ្វើអោយទឹកស្ទឹងពោធិ៍សាត់ មានសន្ទុះកើនឡើងបន្តបន្ទាប់ និងអាចបង្កអោយមានទឹកជំនន់នៅក្នុងខេត្តពោធិ៍សាត់”។

បន្ថែមពីនេះ ចាប់ពីថ្ងៃទី ៣០ ខែកញ្ញា ដល់ថ្ងៃទី ០២ ខែតុលា ឆ្នាំ២០២៥ ព្យុះទី២០ ឈ្មោះ ប៊ូឡូយ (Bualoi) ក៏នឹងបក់បោកមកដល់កម្ពុជា ដែលធ្វើឱ្យខេត្តពោធិ៍សាត់មានភ្លៀងធ្លាក់ផ្គររន្ទះពីតិចទៅច្រើនខ្លាំង ភវនីយភាព ៨០ភាគរយ។

ជុំវិញបញ្ហានេះ មន្ទីរធនធានទឹកខេត្តពោធិ៍សាត់ បានក្រើនរម្លឹកដល់ពលរដ្ឋរស់នៅតាមដងស្ទឹងពោធិ៍សាត់ សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុ៕

កម្ពុជា មានគម្រោងអភិវឌ្ឍផ្លូវដែក និងលើកកម្ពស់ផ្លូវដែកបច្ចុប្បន្នចំនួន ៨គម្រោង ដែលគ្រោងនឹងចំណាយថវិកាសរុបចំនួន ១០ ០១០លានដុល្លារ។

យោងតាមរបាយការណ៍របស់ក្រសួងសាធារណការ និងដឹកជញ្ជូន បានបញ្ជាក់ថា៖”ការអភិវឌ្ឍផ្លូវដែកផ្តោតលើការស្តារ និងលើកកម្ពស់ផ្លូវដែកបច្ចុប្បន្នពីភាគខាងជើង និងភាគខាងត្បូង ទៅជាផ្លូវដែកល្បឿនលឿន ព្រមទាំងគិតគូរផ្លូវថ្មី។

នៅក្នុង ៨គម្រោងនេះ មានគម្រោងរយៈពេលខ្លី និងមធ្យមចំនួន ៤គម្រោងពីឆ្នាំ២០២៣ដល់២០២៧ ដែលគ្រោងចំណាយទឹកប្រាក់ ៣ ៨០០លានដុល្លារ។

ដោយឡែក សម្រាប់គម្រោងរយៈពេលវែងចំនួន ៤គម្រោងពីឆ្នាំ២០២៨ដល់២០៣៣ គ្រោងចំណាយទឹកប្រាក់ ៦ ២១០លានដុល្លារ។

គួរបញ្ជាក់ថា បច្ចុប្បន្ន ផ្លូវដែក ២ខ្សែកំពុងមានចរាចរណ៍ នៅក្នុងប្រទេស ដែលមានភាពចាំបាច់ ឆ្លងកាត់បណ្តាខេត្តជាច្រើន និងផ្តល់គុណប្រយោជន៍យ៉ាងធំធេងសម្រាប់សេដ្ឋកិច្ចជាតិ។