ប្រទេសថៃ ៖ ការចុះហត្ថលេខាលើអនុស្សរណៈនៃការយោគយល់គ្នា (MOU) ស្តីពីរ៉ែកម្ររវាងថៃនិងអាមេរិកបានក្លាយជាប្រធានបទក្តៅជជែកវែកញែកពេញបណ្តាញសង្គមប្រទេសថៃ មិនថាសមាជិកសភាគណបក្សប្រឆាំង អ្នកនយោបាយ និងពលរដ្ឋ បានបន្ទោសលោកនាយករដ្ឋមន្ត្រី Anutin Charnvirakul ថា ហេតុអ្វីចុះហត្ថលេខាស្ងាត់ៗមិនឆ្លងកាត់ការឯកភាពពីពលរដ្ឋ ។ ការចុះ MOU ជាមួយប្រទេសមហាអំណាចនឹងធ្វើឱ្យថៃចាញ់ប្រៀបអាមេរិកគ្រប់បែបយ៉ាង មិនអាចលុបចោលងាយៗទេ ថៃខូចខាតបរិស្ថានដោយសារការជីកអណ្តូងរ៉ែ ហើយថៃបានក្លាយជាកូនអុកក្នុងសង្គ្រាមពាណិជ្ជកម្មអាមេរិក-ចិន ។

កាលពីថ្ងៃទី២៨ ខែតុលា ឆ្នាំ២០២៥ នាយករដ្ឋមន្ត្រីថៃបានបកស្រាយពីការចុះហត្ថលេខាលើ MOU រ៉ែកម្រជាមួយអាមេរិកនឹងមិនធ្វើឱ្យថៃរងសម្ពាធទេ ហើយមុនពេលចុះហត្ថលេខា គឺបានឆ្លងកាត់ការអនុម័តពីគណៈរដ្ឋមន្ត្រីថៃរួចហើយ ។ ពលរដ្ឋមិនចាំបាច់បារម្ភពីផលប៉ះពាល់ដោយសារ MOU រ៉ែកម្រ ពីព្រោះថៃនឹងទទួលបានអត្ថប្រយោជន៍ផ្នែកពាណិជ្ជកម្ម និងការទម្លាក់ពន្ធទំនិញ ហើយលោកជឿថា MOU នឹងមិនធ្វើឱ្យប៉ះពាល់ដល់ទំនាក់ទំនងថៃជាមួយចិនទេ ។

បន្ទាប់ពីនាយករដ្ឋមន្ត្រីថៃបានចុះហត្ថលេខាលើសេចក្តីថ្លែងការណ៍រួមស្តីពីសន្តិភាពកម្ពុជា-ថៃ ក្រៅកិច្ចប្រជុំកំពូលអាស៊ាន លើកទី៤៧ នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ នាយករដ្ឋមន្ត្រីថៃក៏បានចុះហត្ថលេខាលើអនុស្សរណៈនៃការយោគយល់គ្នា (MOU) ស្តីពីរ៉ែកម្រជាមួយអាមេរិកផងដែរ ប៉ុន្តែបែរជារងការស្តីបន្ទោសពីពលរដ្ឋ ជាពិសេស សមាជិកសភាគណបក្សប្រឆាំងបន្ទោសរដ្ឋាភិបាលថៃមានកំហុសធ្ងន់ធ្ងរដោយសារចាញ់ប្រៀបអាមេរិក ។

លោក Anutin នាយករដ្ឋមន្ត្រីថៃបានផ្តល់សម្ភាសន៍ជាមួយសារព័ត៌មានកាលពីថ្ងៃទី២៨ ខែតុលា ពីការចុះហត្ថលេខាលើ MOU ស្តីពីរ៉ែកម្រថៃ-អាមេរិក ដែលពលរដ្ឋចង់ឱ្យនាយករដ្ឋមន្ត្រីបកស្រាយឱ្យច្បាស់លាស់ ដោយលោកថា ខ្លឹមសារ MOU បើនៅថ្ងៃអនាគត ថៃមានរ៉ែកម្រ ហើយអាចផ្តល់ប្រយោជន៍ដល់ប្រទេសថៃ គឺថៃអាចស្រាវជ្រាវជាមួយអាមេរិក ។ អាមេរិកមានបច្ចេកវិទ្យាទំនើបជាង និងទីផ្សារច្រើនជាង ប៉ុន្តែមិនមែនមានន័យថា ថៃស្ថិតក្រោមសម្ពាធរបស់អាមេរិកទេ ហើយវាក៏មិនមែនជាការផ្តល់សម្បទាន ឬចំណងអ្វីឡើយ ។ តាមច្បាប់ បើថ្ងៃអនាគត ថៃអាចដំណើរការអណ្តូងរ៉ែកម្រដោយខ្លួនឯង មានទីផ្សារខ្លួនឯង និងមានបច្ចេកវិទ្យាទំនើប ថៃអាចលុបចោល MOU នេះជាមួយអាមេរិក ។

ចំពោះពលរដ្ឋថៃចោទប្រកាន់ការចុះហត្ថលេខាលើ MOU ស្តីពីរ៉ែកម្រជាមួយអាមេរិកគ្មានការជូនដំណឹងជាមុន និងចោទប្រកាន់នាយករដ្ឋមន្ត្រីមានកំហុសធ្ងន់ធ្ងរធ្វើឱ្យថៃចាញ់ប្រៀបអាមេរិក លោក Anutin ថា មុនពេលចុះ MOU គឺបានឆ្លងកាត់ការពិភាក្សាគ្នារួចហើយ និងបានព្រមព្រៀងជាមួយក្រសួងការបរទេស ។ បើថៃបង្ហាញឥរិយាបថជាមិត្តជាមួយអាមេរិក ថៃនឹងទទួលបានប្រយោជន៍ក្នុងកិច្ចសហការផ្សេងៗជាមួយអាមេរិក ខណៈពេលនេះ ថៃមានរឿងច្រើនកំពុងចរចាជាមួយអាមេរិក ដូច្នេះ ថៃមិនចាញ់ប្រៀបទេ ។ ផ្ទុយទៅវិញ វានឹងធ្វើឱ្យការចរចាពាណិជ្ជកម្ម ពន្ធទំនិញ និងរឿងផ្សេងៗជាមួយអាមេរិកទទួលបានលទ្ធផលវិជ្ជមាន ។

ជាមួយគ្នានេះ លោកពុំបារម្ភពីផលប៉ះពាល់ដល់ទំនាក់ទំនងថៃ-ចិនដោយសារ MOU រ៉ែកម្រជាមួយអាមេរិកទេ ថៃត្រូវបកស្រាយឱ្យចិនបានយល់ពី MOU ។ រីឯសារព័ត៌មានមួយចំនួនចុះផ្សាយថា ថៃយល់ព្រមចុះហត្ថលេខាលើ MOU រ៉ែកម្រជាមួយអាមេរិក ដោយសារថៃចង់ទិញយន្តហោះអាមេរិកចំនួន៨០គ្រឿងនោះ លោក Anutin ថា មិនពាក់ព័ន្ធគ្នា ការចុះហត្ថលេខាលើ MOU រ៉ែកម្រ គឺថៃចង់រឹតចំណងមិត្តភាពជាមួយអាមេរិក ៕

ប្រកាសទទួលស្គាល់រួចសុំលេបសម្ដីវិញ! នាយករដ្ឋមន្រ្តីថៃ លោក អនុទីន ឆាន់វីរៈគុល បានសូមការអភ័យទោ.សពីពលរដ្ឋថៃ ចំពោះពាក្យសំដីរបស់ខ្លួនដែលថា ពិតជាមានការល្មើសអធិបតេយ្យចូលទឹកដីកម្ពុជា នៅភូមិជោគជ័យ និងភូមិព្រៃចាន់ ពីសំណាក់ពលរដ្ឋថៃមួយចំនួនមែន។ លោក អនុទីន បានពន្យល់ឡើងវិញថា ការលើកឡើងរបស់លោកនាពេលនោះ គឺមានការយល់ច្រលំបន្តិចបន្តួច។

នៅថ្ងៃអង្គារ ទី២៨ តុលា លោកនាយករដ្ឋមន្រ្តី អនុទីន បានធ្វើការសុំទោសចំពោះការយល់ច្រឡំដែលបង្កើតឡើងដោយសេចក្តីថ្លែងការណ៍របស់លោក ទាក់ទងនឹងការឈ្លានពានដែលអាចកើតមានចូលទៅក្នុងទឹកដីកម្ពុជា។ ការប្រកាសទទួលស្គាល់របស់លោកបែបនេះ បានធ្វើឲ្យពលរដ្ឋថៃភាគច្រើនកើតការមិនសុខចិត្ត មិនអាចទទួលយកបាន និងព្រួយបារម្ភថាពាក្សសម្ដីរបស់នាយករដ្ឋមន្រ្តីខ្លួន នឹងធ្វើឲ្យថៃចា.ញ់ប្រៀបកម្ពុជាចំពោះមុខអន្តរជាតិ។

យោងតាមការចុះផ្សាយរបស់សារព័ត៌មាន The Nation នៅថ្ងៃដដែលបានឲ្យដឹងថា ការអះអាងរបស់លោក អនុទីន បានបង្កឱ្យមានការព្រួយបារម្ភអំពីជម្លោះព្រំដែនរវាងប្រទេសថៃ និងកម្ពុជា។ ដើម្បីស្ដារស្ថានការណ៍ លោក អនុទីន បាននិយាយថា «វាជាតំបន់ដែលមានជម្លោះ ហើយភាគីទាំងពីរត្រូវតែបន្តការចរចាដើម្បីធ្វើឱ្យអ្វីៗច្បាស់លាស់។ ប្រសិនបើពាក្យសម្ដីរបស់ខ្ញុំបង្កឱ្យមានការភាន់ច្រឡំ ខ្ញុំសូមអភ័យទោស។ ចេតនារបស់ខ្ញុំគឺចង់និយាយថា ប្រទេសទាំងពីរត្រូវតែធ្វើសកម្មភាពស្របតាមកិច្ចព្រមព្រៀងរួមគ្នា»។

គួររំលឹកថា កាលពីថ្ងៃទី២៧ ខែតុលាកន្លងទៅ លោក អនុទីន បានលើកឡើងដោយបើកចំហអំពីបញ្ហារសើបនៅតាមបណ្ដោយព្រំដែនដែលមិនទាន់កំណត់សីមាដាច់ស្រេច។ លោកបានលើកឡើងពីភូមិណងចាន់ (ថៃ) ទល់មុខនឹង ភូមិជោគជ័យ (កម្ពុជា) និង ភូមិណងយ៉ាកែវ (ថៃ) ទល់មុខនឹង ភូមិព្រៃចាន់ (កម្ពុជា) ថាមានការល្មើសអធិបតេយ្យគ្នាទៅវិញទៅមក ហើយលោកទទួលស្គាល់ថា ប្រជាជនថៃខ្លះបានល្មើសចូលទឹកដីកម្ពុជាពិតមែន។

លោក អនុទីន បានបញ្ជាក់ពីគោលជំហររបស់ខ្លួនបន្ថែមទៀតថា «ប្រសិនបើជម្លោះនៅក្នុងភូមិទាំងនេះត្រូវបានដោះស្រាយ រដ្ឋាភិបាលថៃនឹងស្វែងរកទីជម្រកថ្មីសម្រាប់ប្រជាជនថៃ ដែលបានរស់នៅទន្ទ្រានលើទឹកដីកម្ពុជា។ ដូចគ្នានេះដែរ ប្រជាជនកម្ពុជាដែលបានទន្ទ្រានរស់នៅលើដីថៃ ត្រូវតែធ្វើដូចគ្នា»។ ពាក្យសម្ដីទាំងនេះ បានធ្វើឲ្យពលរដ្ឋថៃខឹ.ងសម្បារនឹងនាយករដ្ឋមន្រ្តីខ្លួនជាខ្លាំង ដោយពួកគេនៅតែជឿជាក់ថា ថៃមិនដែលបំពានលើកម្ពុជាបន្តិចណាឡើយ ហើយទឹកដីដែលកំពុងមានជម្លោះទាំងអស់គឺសុទ្ធតែជារបស់ថៃ៕

អ្នកពេញនិយមប្រើប្រាស់ផលិតផលថៃសូមប្រយ័ត្នផង! រដ្ឋបាលចំណីអាហារ និងឱសថថៃ (FDA) បានចេញសេចក្តីប្រកាសជាផ្លូវការទាក់ទងនឹងបំពង់ហឺត និងប្រេងកូឡា Hong Thai Herbal រូបមន្ត 2 ថាផលិតឡើមិនស្របតាមស្តង់ដារសុវត្ថិភាព និងបង្កគ្រោះថ្នាក់ដល់អ្នកប្រើប្រាស់នៅពេលហឺត ឬស្រូបក្លិនវាចូលរយៈពេលយូរ។

បើតាមការចុះផ្សាយរបស់សារព័ត៌មាន Thai Enquirer កាលពីយប់ថ្ងៃទី28 ខែតុលា បានឲ្យដឹងថា ការធ្វើតេស្តនៅមន្ទីរពិសោធន៍ដែលធ្វើឡើងដោយនាយកដ្ឋានវិទ្យាសាស្ត្រវេជ្ជសាស្ត្រថៃបានបង្ហាញថា ផលិតផលនេះផ្ទុកចំនួនលើសដែនកំណត់សុវត្ថិភាពនូវបាក់តេរីអេរ៉ូប៊ីក ចំនួនសរុបនៃដំបែ និងផ្សិត ព្រមទាំងសារធាតុ Clostridium spp ។ ការធ្វើតេស្តទាំងនេះត្រូវបានអនុវត្តលើគំរូដែលប្រមូលបានពីកន្លែងផលិតរបស់ក្រុមហ៊ុន Hong Thai Commercial Herbal Products ផ្ទាល់។

FDA បានបញ្ជាក់ថា បាច់ផលិតផលដែលរងផលប៉ះពាល់ខ្លាំងគឺលេខ 000332 បានចុះបញ្ជីក្រោមលេខ G 309/62 មានកាលបរិច្ឆេទផលិតនៅថ្ងៃទី 9 ខែធ្នូ ឆ្នាំ 2024 និងកាលបរិច្ឆេទផុតកំណត់នៅថ្ងៃទី 8 ខែធ្នូ ឆ្នាំ 2027 ដោយផលិតផលទាំងនោះ មិនអនុលោមតាមស្តង់ដារភាពបរិសុទ្ធ និងគុណភាពឆ្នាំ 2021 របស់ក្រសួងសុខាភិបាលសាធារណៈសម្រាប់ផលិតផលឱសថដែលបានចុះបញ្ជីនោះទេ។

ក្រោយការពិនិត្យឃើញរបស់ FDA ក្រុមហ៊ុន Hong Thai Herbal បានប្រមូលយកផលិតផលបំពង់ហឺត និងប្រេងកូឡារូបមន្ត 2 របស់ខ្លួនត្រឡប់ចូលស្តុកវិញ ខណៈនីតិវិធីផ្លូវច្បាប់ប្រឆាំងនឹងក្រុមហ៊ុននេះ កំពុងស្ថិតក្រោមការពិចារណារបស់ FDA។

គួរជម្រាបថា ផលិតផលប្រេងកូឡា និងបំពង់ហឺតយីហោ Hong Thai Herbal ខាងលើនេះ ជាយីហោដែលល្បីឈ្មោះមួយនៅក្នុងប្រទេសថៃ ដែលពេញនិយមប្រើប្រាស់សម្រាប់មនុស្សគ្រប់វ័យ។ ជាមួយគ្នានេះ នៅប្រទេសកម្ពុជាគេក៏សង្កេតឃើញមានអ្នកប្រើប្រាស់ផលិតផលទាំងនេះច្រើនគួសមផងដែរ។ អាស្រ័យហេតុនេះ សូមបងប្អូនដែលនៅគាំទ្រផលិតផលថៃមេត្តាប្រុងប្រយ័ត្នឲ្យបានខ្ពស់បំផុត គិតគូរសុវត្ថិភាព និងសុខភាពរបស់ខ្លួនជាចម្បង ព្រោះសូម្បីផលិតផលដែលផលិតមកសម្រាប់ប្រជាជនគេប្រើប្រាស់មានផ្ទុកនូវសារធាតុគ្រោះថ្នាក់ម្លឹងហើយ ចុះទម្រាំតែផលិតផលនាំចេញមកឲ្យកម្ពុជាយើង តើគេនឹងធ្វើដូចម្ដេចខ្លះ?

ប្រទេសថៃ ៖ ក្រោយបាត់មុខពីការងារនយោបាយជាច្រើនឆ្នាំ លោក អាភីស៊ីត វេចាជីវ៉ា បានត្រឡប់មកប្រឡូកក្នុងនយោបាយឡើងវិញ ដោយកាន់តំណែងជាប្រធានគណបក្សប្រជាធិបតេយ្យ ដើម្បីឈរឈ្មោះក្នុងការបោះឆ្នោតឆ្នាំ២០២៦ ប្រជែងយកតំណែងជានាយករដ្ឋមន្ត្រីថៃ ។ លោក អាភីស៊ីត បានប្រាប់ទៅនាយករដ្ឋមន្ត្រីថៃកុំទុកចិត្តកម្ពុជា ថៃត្រូវតែអនុវត្តទាំងការទូត និងកងទ័ព ទោះជាប្រទេសទាំងពីរចុះហត្ថលេខាលើកិច្ចព្រមព្រៀងសន្តិភាពកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ក្តី ។

លោក អាភីស៊ីត វេចាជីវ៉ា (Abhisit Vejjajiva) អតីតនាយករដ្ឋមន្ត្រីថៃ និងបច្ចុប្បន្នជាប្រធានគណបក្សប្រជាធិបតេយ្យ (ឬប្រាឆាធិប៉ាត់) បាននិយាយនៅថ្ងៃទី២៨ ខែតុលា ឆ្នាំ២០២៥ ថា លោកបានប្រាប់ទៅលោកនាយករដ្ឋមន្ត្រី Anutin Charnvirakul រួចហើយ ត្រូវអនុវត្តការទូតផង និងកងទ័ពផង កុំទុកចិត្តកម្ពុជាឱ្យសោះ ប្រយ័ត្នកម្ពុជារាយការណ៍ទៅពិភពលោក ។ គោលដៅនៃការចុះហត្ថលេខាលើកិច្ចព្រមព្រៀងសន្តិភាព គឺគ្រប់គ្នាឃើញថា កិច្ចព្រមព្រៀងនេះទូលំទូលាយ ដែលត្រូវពិនិត្យមើលចំណុចលម្អិតបន្ថែម ដូចជា ៖ ការបំពេញការងាររបស់ក្រុមអ្នកសង្កេតការណ៍ ហើយថៃស្នើកម្ពុជាអនុវត្តលក្ខខណ្ឌ៤ចំណុច ទើបការងារផ្សេងៗដំណើរការបាន ។ បើរដ្ឋាភិបាលថៃអាចបង្ហាញទៅពិភពលោកពីមូលហេតុត្រូវអនុវត្ត៤លក្ខខណ្ឌនេះ គឺមានសារៈសំខាន់ និងទទួលប្រយោជន៍ច្រើន ។

បន្ទាប់ពីកម្ពុជា-ថៃបានចុះហត្ថលេខាលើកិច្ចព្រមព្រៀងសន្តិភាព លោក អាភីស៊ីត ថា លោកមិនគិតពីការមានប្រៀប និងចាញ់ប្រៀបទេ រហូតដល់ថៃដឹងថា តើមានក្រុមអ្នកសង្កេតការណ៍ ឬប្រទេសនានាចូលមកសង្កេតការណ៍បែបណា រួមទាំងអនុវត្តការទូត និងកងទ័ពរបស់ប្រទេសទាំងពីរដូចម្តេច ។ វាជាភារកិច្ចរបស់កងទ័ព ក្រសួងការបរទេស និងរដ្ឋាភិបាល ដែលត្រូវដំណើរការគ្រប់យ៉ាងដោយប្រុងប្រយ័ត្ន ។

លោក អាភីស៊ីត បន្តថា ធ្លាប់បានជជែកជាមួយលោកនាយករដ្ឋមន្ត្រី Anutin ឱ្យប្រុងប្រយ័ត្នកម្ពុជា ពីព្រោះកម្ពុជាអាចរាយការណ៍ទៅពិភពលោកក្នុងកិច្ចប្រជុំដោយពុំចាំបាច់មានរបៀបវារៈ និងមិនមែនជាគោលបំណងរបស់កិច្ចប្រជុំ ហេតុនេះ ថៃត្រូវត្រៀមខ្លួនគ្រប់ពេលវេលាទាំងការទូត និងកងទ័ព ។ ចំពោះការលើកឡើងពីប្រធានាធិបតីអាមេរិក លោក Donald Trump ធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា-ថៃនៅទីក្រុងកូឡាឡាំពួរ នឹងធ្វើឱ្យកម្ពុជាមិនហ៊ានផ្លាស់ប្តូរគោលជំហរ គឺពុំអាចទុកចិត្តកម្ពុជាទេ ត្រូវតាមដានស្ថានការណ៍ពិតប្រាកដ និងធ្វើឱ្យពិភពលោកឃើញការអនុវត្ត៤លក្ខខណ្ឌពិតប្រាកដ ។

គួរបញ្ជាក់ថា លោក អាភីស៊ីត ជាអតីតនាយករដ្ឋមន្ត្រីថៃ ទី២៧ បានត្រឡប់មកកាន់តំណែងជាប្រធានគណបក្សប្រជាធិបតេយ្យ ក្រោយពីគណបក្សនេះបោះឆ្នោតជ្រើសរើសអ្នកដឹកនាំ ។ ក្រុមអ្នកនយោបាយចាស់ៗក្នុងគណបក្សប្រជាធិបតេយ្យគាំទ្រលោកឱ្យដឹកនាំគណបក្ស បន្ទាប់ពីចាញ់ឆ្នោតជាច្រើនលើក និងមិនបានក្លាយជាប្រធានគណបក្សនយោបាយក្នុងការបង្កើតរដ្ឋាភិបាលដូចមុន ។ បច្ចុប្បន្ន លោកមានក្មួយប្រុសប្រឡូកក្នុងនយោបាយដែរ គឺលោក Parit Wacharasindhu (ឈ្មោះហៅក្រៅ អៃទីម) ជាសមាជិកសភាគណបក្សប្រជាជន ដែលជាគណបក្សប្រឆាំងនៅប្រទេសថៃ ៕

ប្រទេសថៃ៖ អារម្មណ៍ឡើងចុះតាមមិនចង់ទាន់! មេបញ្ជាការទ័ពជើងទឹកថៃបានបង្ហាញការអបអរ និងកោតសរសើរចំពោះកិច្ចសហប្រតិបត្តិការការទូតរវាងប្រទេសថៃ និងកម្ពុជា ប៉ុន្តែបានឆ្លៀតបញ្ជាក់ជាថ្មីបន្ថែមទៀតថា ខ្លួននឹងប្ដេជ្ញាចិត្តក្នុងការរក្សាការត្រៀមខ្លួនប្រយុទ្ធឲ្យបានរួចរាល់ជានិច្ច ដើម្បីការពារផលប្រយោជន៍ជាតិ។ នេះបើតាមការរបស់សារព័ត៌មាន The Nation នៅថ្ងៃអង្គារនេះ។

នៅថ្ងៃទី២៨ ខែកញ្ញា ឆ្នាំ២០២៥ មេបញ្ជាការកងទ័ពជើងទឹកថៃ ឧត្តមនាវីឯក អាឌុង ផាន់យ៉ាម (Adung Phan-iam) បានមានប្រាប់អ្នកសារព័ត៌មានកាលពីថ្ងៃចន្ទថា ខណៈពេលដែលទំនាក់ទំនងជាមួយកម្ពុជានៅតែជាមិត្តភាព និងសហប្រតិបត្តិការ កងទ័ពជើងទឹកយើងនឹងនៅតែបន្តរក្សាបេសកកម្មរបស់ខ្លួន ក្នុងការការពារអធិបតេយ្យភាព និងបូរណភាពទឹកដីរបស់ប្រទេសថៃ។

បន្ថែមពីលើការអបអរសារទរការផ្សះផ្សារទំនាក់ទំនង លោក អាឌុង បានសង្កត់ធ្ងន់ថា យ៉ាងណាក៏ដោយ កងទ័ពជើងទឹកត្រូវតែត្រៀមខ្លួនយ៉ាងល្អសម្រាប់ស្ថានភាពណាមួយ ដោយសង្កត់ធ្ងន់លើតម្រូវការសម្រាប់ការហ្វឹកហ្វឺនជាបន្តបន្ទាប់ ការត្រៀមខ្លួនជាយុទ្ធសាស្ត្រ និងការធ្វើទំនើបកម្មឧបករណ៍កងទ័ពជើងទឹក។ លោកបានបញ្ជាក់ទៀតថា “សន្តិភាពតែងតែជាគោលដៅរបស់យើង ប៉ុន្តែការត្រៀមខ្លួនជាកាតព្វកិច្ចរបស់យើង”។

មេបញ្ជាការទ័ពជើងទឹករូបនេះបានបន្ថែមថា រដ្ឋាភិបាលថៃតែងតែផ្តល់អាទិភាពដល់មធ្យោបាយសន្តិភាព ដើម្បីដោះស្រាយជម្លោះតាំងពីដើមដំបូងមក។ ទោះជាយ៉ាងណាក៏ដោយ កងទ័ពថៃក៏នៅតែត្រូវរក្សាសមត្ថភាពការពារជាតិ ដោយឆ្លុះបញ្ចាំងពីយុទ្ធសាស្ត្រសន្តិសុខទូលំទូលាយរបស់ប្រទេសថៃនៅក្នុងតំបន់ជានិច្ច។

ការលើកឡើងរបស់មេទ័ពជើងទឹកថៃខាងលើនេះ គឺធ្វើឡើងបន្ទាប់ពីកម្ពុជានិងថៃបានចុះហត្ថលេខាលើសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព នាទីក្រុងគួឡាឡាំពួ ប្រទេសម៉ាឡេស៊ី ដោយមានការចូលរួមធ្វើជាសាក្សីពីលោក ដូណាល់ ត្រាំ ប្រធានាធិបតីអាមេរិក និងលោក អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី។

ចំពោះការចុះកិច្ចព្រមព្រៀងសន្តិភាពនេះទៀតសោត កម្ពុជារីករាយនឹងទទួលយក ព្រមទាំងបានប្ដេជ្ញាចិត្តយ៉ាងមុតមាំក្នុងការអនុវត្តតាមគោលការណ៍ដែលបានចរចាគ្នា ដើម្បីឈានទៅរកប្រក្រតីភាព នៃទំនាក់ទំនងរវាងប្រជាជាតិទាំងពីរ។ ប៉ុន្តែតាមការសង្កេត វាហាក់មិនទំនងជាអ្វីដែលយោធាថៃចង់បានពិតប្រាកដនោះទេ ទើបបានជាក្រោយពេលប្រទេសទាំងពីរឯកភាពចុះហត្ថលេខារួមគ្នាបញ្ចប់ជម្លោះទៅហើយ មេបញ្ជាការយោធាទាំងនោះនៅតែចេញមកប្រកាសពីការត្រៀមខ្លួនដដែលបែបនេះទៅវិញ៕