ចាប់តាំងពីមហាជនរិះគន់រឿងការដាក់ Title មិនព្រមលុបចេញកម្មវិធីរបស់ ណាវ៉ាត់ និងរឿងរ៉ាវផ្សេងៗមួយចំនួនទៀតទាក់ទងនឹងការប្រកួតកម្មវិធី Miss Universe Cambodia ពេជ្រ វត្តីសារ៉ាវឌ្ឍី បានលាតត្រដាងក្នុងកិច្ចសម្ភាសមួយដែលមហាជនអាចនឹងយល់ជម្រៅចិត្តនាងបានកាន់តែច្រើន។ អាចឆ្លងផុតឧបសគ្គជាច្រើននេះ ពេជ្រ វត្តីសារ៉ាវឌ្ឍី បានអរគុណអ្នកគាំទ្រជាពិសេស។
តាមរយៈបទសម្ភាសន៍ ពេជ្រ វត្តី បានបញ្ជាក់ថាកាលពេលដែលនាងនៅដាក់ Title គឺដោយសារតែនៅជាប់កុងត្រាហើយមិនចង់លុបព្រោះមិនចង់មានបញ្ហា មានព័ត៌មានពីភាគីម្ខាងទៀត។ នាងបញ្ជាក់ថា បើនាងដាក់ Title មួយនោះគឺមោទនភាពនិងការខិតខំរបស់ខ្លួនមិនមែនមោទនភាពនឹងកម្មវិធីឡើយ ពីព្រោះទម្រាំឈានដល់ចំណុចនោះនាងពិបាកខ្លាំង ។ ពេជ្រ វត្តីសារ៉ាវឌ្ឍី ថានាងដាក់ពាក្យប្រលងកម្មវិធីមួយនោះគឺដូចជាបេក្ខភាពផ្សេងទៀតចង់តំណាងឱ្យប្រទេស ហើយយើងក៏មិនអាចមើលឃើញអនាគតថាមានរឿងអ្វីកើតឡើងដែរ។ នៅពេលនាងយកមោទនភាពជូនប្រទេស នាងពិតជាសប្បាយចិត្ត ប៉ុន្តែនៅថ្ងៃណាមួយដែលមានបញ្ហាជាមួយនឹងកម្មវិធីគេលែងឱ្យតម្លៃ មោទនភាពរបស់នាងក៏ធ្លាក់ដល់សូន្យដូចគ្នាសូម្បីតែដាក់ Title ក៏មិនអាចដាក់កើត។
ចំពោះរឿងកុងត្រា ពេជ្រ វត្តីសារ៉ាវឌ្ឍី បន្ថែមថានៅពេលយើងចុះគឺត្រូវធ្វើតាម បើមិនដូច្នេះទេនឹងកើតទៅជាសំណងប្តឹងផ្តល់គ្នាហើយការចុះនោះគឺដោយសារតែនាងជាប់លំដាប់រងទី៥ ដែលត្រូវតម្រូវឱ្យចុះ បើមិនចុះគឺមិនបានមកុដ ដកតំណែងយើង ហើយកុងត្រានោះនៅដៃគេ។ ពេជ្រ វត្តីសារ៉ាវឌ្ឍី ថានាងសុខចិត្តទទួលរងការជេរប្រមាថហើយជ្រើសរើសភាពស្ងប់ស្ងាត់ព្រោះមិនចង់ឱ្យមានរឿងកាន់តែធំ។
ទាក់ទិននឹងការប្រកួតកម្មវិធី Miss Universe Cambodia ពេជ្រ វត្តីសារ៉ាវឌ្ឍី បានរំលេចដែរថានាងធ្លាប់បដិសេធមិនទៅចូលរួមប្រកួតនៅប្រទេសថៃដើម្បីការសប្បាយចិត្តព្រោះនាងជាមុខសញ្ញាហើយវាក៏ជាដំបៅនៅក្នុងចិត្តនាងដដែលៗពីមួយឆ្នាំទៅមួយឆ្នាំគឺថៃ-ខ្មែរ ហើយនឹងនាង។ នៅពេលប្រកួតផ្តាច់ព្រ័ត្រក្នុងស្រុកនាងមានបំណងថាមិនចង់ទៅចូលរួមប្រកួតព្រោះនាងមិនទៅប្រកួតនៅប្រទេសថៃដដែលហើយដឹងច្បាស់ថាមិនបានលេខ១។ ប៉ុន្តែមិនចង់ឱ្យជាប់ឈ្មោះមិនល្អជាបវរកញ្ញារត់ចោលកម្មវិធីនាងក៏សម្រេចចិត្តទៅប្រកួតវិញឱ្យចប់ចុងចប់ដើមមានទំនួលខុសត្រូវអ្វីដែលខ្លួនធ្វើ។
ពេជ្រ វត្តីសារ៉ាវឌ្ឍី បានបកស្រាយទៀតថា នាងពេញចិត្តជាមួយនឹងលទ្ធផលលេខ៣ហើយការប្រកួត Miss Universe Cambodia បានបង្រៀននាងច្រើន ហើយសំណួរពេលប្រលងនាងពុំបានដឹងមុននោះទេគឺសួរភ្លាមឆ្លើយភ្លាម។ ក្នុងនោះដែរបវរកញ្ញារូបនេះបាននិយាយថាកំឡុងពេលប្រលងនាងឆ្លើយសំណួរមុនគេហើយក្បាលមេក្រូបិទរហូតមិនឱ្យមានសំឡេង មានបញ្ហារអាក់រអួល។ ជាពិសេសបើបកទៅមើលពេលកំពុងប្រកួតនៅចំណាត់ថ្នាក់ TOP3 ពេជ្រ វត្តីសារ៉ាវឌ្ឍី ដឹងថានាងប្រហែលជាជាប់លេខ៣តាំងពីភ្លាមៗនោះមកម្ល៉េះ៕
