ទេព បូព្រឹក្ស និង ហ្វីយ៉ាតា បង្ហាញមិត្តភាពយ៉ាងកម្រ ខណៈអ្នកលក់អនឡាញជាច្រើនស្រុះដៃជួយគ្នា

មិនសូវជាបង្ហាញនៅលើបណ្តាញសង្គមពីមិត្តភាពដ៏ល្អប៉ុន្មាននោះទេប៉ុន្តែក្នុងពេលវេលាសំខាន់តារាចម្រៀង ទេព បូព្រឹក្ស និង ហ្វីយ៉ាតា បានបង្ហាញពីមិត្តភាពដ៏ល្អចំពោះគ្នានិងជួយគាំទ្រពេញទំហឹងសម្រាប់ការតំណាងប្រទេសកម្ពុជា។ មិនត្រឹមតែប៉ុណ្ណឹងអ្នកលក់អនឡាញជាច្រើនរូបស្រុះដៃគ្នាយ៉ាងខ្លាំងចំណាយថវិកាផ្ទាល់ខ្លួនជួយដើម្បីបោះឆ្នោតឱ្យ ហ្វីយ៉ាតា មានឱកាសចូល TOP។

ថ្មីៗកន្លងមកនេះអ្នកតាមដានវិស័យបវរកញ្ញាជ្រាបមកហើយថាតារាចម្រៀង ទេព បូព្រឹក្ស ទោះបីជារវល់យ៉ាងណាជាញឹកញាប់បានបង្ហាញការគាំទ្រ ហ្វីយ៉ាតា ដោយចែករំលែកបន្តនៅលើ Story ព្រមទាំងបានអំពាវនាវឱ្យអ្នកគាំទ្រដទៃទៀតជួយគាំទ្រ Miss Universe Cambodia 2025 ។ មិនត្រឹមតែប៉ុណ្ណោះ ទេព បូព្រឹក្ស បានជួយ ហ្វីយ៉ាតា នូវទឹកប្រាក់១០០០ដុល្លារដើម្បីបោះឆ្នោតសម្រាប់ការប្រកួតប្រជែងជាមួយនឹងបេក្ខភាពផ្សេងទៀត។ មិនត្រឹមតែផ្តល់ការគាំទ្ររួមទាំងថវិកាប៉ុណ្ណោះម្ចាស់បទ «វីរៈនាទី» ថែមទាំងនិយាយថា ហ្វីយ៉ាតា ស័ក្តិសមខ្លាំងនឹងមកុដនេះ។

ទេព បូព្រឹក្ស បានសរសេរថា «ពួកម៉ាក់ពិតជាក្លាហាន រឹងមាំណាស់ សម្រាប់ខ្ញុំអ្នកពិតជាអស្ចារ្យ ស្អាត ឆ្លាត ពូកែរ ក្លាហាន ទោះជាជួបព្យុះភ្លៀងយ៉ាងណា ក៏អ្នករឹងមាំ អ្នកស័ក្តិសមខ្លាំងបំផុតសំរាប់មកុដនេះ love you queen»។ ជាការឆ្លើយតបនូវទឹកចិត្តធំធេងនេះ ហ្វីយ៉ាតា បានពោលពាក្យទៅកាន់ ទេព បូព្រឹក្ស ថា «អរគុណមិត្តភក្តិខ្លាំងណាស់ សម្រាប់ទឹកចិត្ត និងផ្តល់តម្លៃនូវមិត្តភាពមួយនេះមិនដឹងថាត្រូវនិយាយបែបណាទើបស័ក្តិសមទៅចំពោះក្តីស្រឡាញ់និងទឹកចិត្តដ៏ស្មោះត្រង់មួយនេះ ទោះបីជាមិត្តភក្តិរវល់ ការងារ រកស៊ីយ៉ាងណាក៏ឃើញនូវការខិតខំរបស់គ្នាក្នុងការយកឈ្មោះកម្ពុជាទៅកាន់ឆាកអន្តរជាតិ។ ក្តីស្រលាញ់និងមិត្តភាពមួយនេះមិនអាចមានអ្វីមកប្រៀបបាន មិត្តគឺជាគំរូដ៏ល្អសំរាប់គ្នា។ គ្នាជូនពរឯងឱ្យរកស៊ីកាន់តែទទួលទានមានបាននិងគ្រួសារមានសុភមង្គល សំណាងល្អ និងកេរ្តិ៍ឈ្មោះកាន់តែល្បីរន្ទឺ។ នេះហើយជាកម្លាំងរូបរួមគ្នាដ៏សំខាន់ដើម្បីផ្សព្វផ្សាយកម្ពុជាទៅកាន់ពិភពលោក»។

នេះគឺជាការបង្ហាញមិត្តភាពដ៏កម្ររវាង ទេព បូព្រឹក្ស និង ហ្វីយ៉ាតា ព្រោះកន្លងមកអ្នកទាំងពីរពុំសូវបានបង្ហាញរូបភាពនិងសកម្មភាពឱ្យអ្នកគាំទ្របានឃើញនោះទេ ប៉ុន្តែនៅក្នុងពេលវេលាសំខាន់អ្នកទាំងពីរមិនដែលបោះបង់ចោលគ្នាជួយគាំទ្រដែលអាចបញ្ជាក់ពីមិត្តភាពរឹងមាំ។

មិនត្រឹមតែតារាចម្រៀង ទេព បូព្រឹក្ស ប៉ុណ្ណោះទេដែលជួយ ហ្វីយ៉ាតា ១០០០ដុល្លារ ប៉ុន្តែអ្នកលក់អនឡាញល្បីៗជាច្រើនរូបទៀតបានស្រុះដៃគ្នា ជួយ ហ្វីយ៉ាតា យ៉ាងផុសផុលដែលបញ្ជាក់ពីទឹកចិត្តគាំទ្រខ្មែរស្រលាញ់ខ្មែរ៕