ប្រទេសចិន ៖ តាមការចុះផ្សាយរបស់សារព័ត៌មានបរទេស នៅថ្ងៃទី១៥ ខែវិច្ឆិកា ឆ្នាំ២០២៥ ចិនបានហាមឃាត់ពលរដ្ឋរបស់ខ្លួនកុំធ្វើដំណើរទៅប្រទេសជប៉ុន ក្រោយពីនាយករដ្ឋមន្ត្រីថ្មីជប៉ុន លោកស្រី Sanae Takaichi និយាយថា ជប៉ុនអាចនឹងបញ្ជូនកងទ័ពទៅជួយតៃវ៉ាន់ ប្រសិនបើមានការវាយប្រ.ហារពីបរទេស ។ រដ្ឋាភិបាលចិនចាត់ទុកការលើកឡើងបែបនេះជាកំហុសដ៏ធ្ងន់ធ្ងរ និងស្នើឱ្យនាយករដ្ឋមន្ត្រីជប៉ុនដកពាក្យសម្តីជាបន្ទាន់ បើមិនដូច្នោះទេ ជប៉ុននឹងទទួលលទ្ធផលតបស្នងនាពេលក្រោយ ។

កាលពីថ្ងៃទី១៤ ខែវិច្ឆិកា ចិនបានហាមឃាត់ពលរដ្ឋរបស់ខ្លួនកុំធ្វើដំណើរទៅប្រទេសជប៉ុន ដោយបញ្ជាក់ថា ទំនាក់ទំនងរវាងចិន-ជប៉ុនកាន់តែធ្លាក់ចុះខ្លាំងដោយសារពាក្យសម្តីរបស់នាយករដ្ឋមន្ត្រីថ្មីជប៉ុន ដែលអាចធ្វើឱ្យពលរដ្ឋចិនប្រឈមនឹងគ្រោះថ្នាក់ផ្សេងៗ ។ រដ្ឋាភិបាលចិនអះអាងថា តៃវ៉ាន់ជាទឹកដីរបស់ចិន ហើយចិននឹងប្រើប្រាស់កម្លាំងទ័ពដើម្បីបង្រួបបង្រួមកោះតៃវ៉ាន់ ខណៈរដ្ឋាភិបាលតៃវ៉ាន់បដិសេធការលើកឡើងរបស់ចិនទាំងស្រុង និងបញ្ជាក់ថា មានតែពលរដ្ឋតៃវ៉ាន់ប៉ុណ្ណោះដែលមានសិទ្ធិកំណត់អនាគតរបស់ខ្លួន ។

ស្ថានការណ៍តានតឹងរវាងចិន-ជប៉ុនកើតឡើងក្រោយពីនាយករដ្ឋមន្ត្រីជប៉ុន លោកស្រី Sanae Takaichi និយាយមកកាន់រដ្ឋសភាជប៉ុនកាលពីថ្ងៃទី១៣ ខែវិច្ឆិកា ថា បើចិនវាយប្រហារតៃវ៉ាន់ គឺនឹងគំរាមកំហែងដល់ជប៉ុនដែរ ហើយជប៉ុនអាចនឹងបញ្ជូនកងទ័ពទៅជួយតៃវ៉ាន់ ។ ស្ថានការណ៍កាន់តែតានតឹងខ្លាំងឡើងពេលមន្ត្រីកុងស៊ុលចិនប្រចាំទីក្រុងអូសាកា បង្ហោះសារក្នុងបណ្តាញសង្គម X ថា ចិននឹងចាត់វិធានការដោយមិនស្ទាក់ស្ទើរ និងលុបសារចេញវិញ ។

អ្នកនាំពាក្យក្រសួងការបរទេសចិន លោក Lin Jian និយាយថា ពាក្យសម្តីរបស់នាយករដ្ឋមន្ត្រីជប៉ុន គឺខ្វះភាពទទួលខុសត្រូវ និងបង្កគ្រោះថ្នាក់យ៉ាងខ្លាំង ហើយលោកដាស់តឿន ប្រសិនបើជប៉ុនមិនសិក្សាពីប្រវត្តិសាស្ត្រ និងបញ្ជូនកងទ័ពមកជ្រៀតជ្រែតរឿងតៃវ៉ាន់ ជប៉ុននឹងបរាជ័យមិនខាន ។ ចិនចាត់ទុកការបញ្ជូនកងទ័ពជប៉ុនមកចូលរួមក្នុងជម្លោះតៃវ៉ាន់ជាការឈ្លានពាន និងបង្កើនជម្លោះការទូតដោយសារពាក្យសម្តីរបស់នាយករដ្ឋមន្ត្រីជប៉ុន ។ ចិននឹងការពាអធិបតេយ្យនៅក្រោមច្បាប់អន្តរជាតិ ដោយប្រឆាំងដាច់ខាតចំពោះពាក្យសម្តីនេះ បញ្ហាតៃវ៉ាន់គឺជាកិច្ចការផ្ទៃក្នុងរបស់ចិន ជប៉ុនមិនគួរលេងជាមួយភ្លើងទេ ពីព្រោះវាធ្វើឱ្យទំនាក់ទំនងរវាងចិន-ជប៉ុនដែលកំពុងតានតឹងកាន់តែធ្លាក់ចុះ ។

គួរបញ្ជាក់ថា ចិនបានកោះហៅមន្ត្រីទូតជប៉ុនមកបំភ្លឺក្រោយពីនាយករដ្ឋមន្ត្រីជប៉ុនចង់បញ្ជូនកងទ័ពទៅជួយតៃវ៉ាន់ ដែលជាការកោះហៅលើកដំបូងក្នុងរយៈពេលជាង២ឆ្នាំ ។ ចិនក្តីបារម្ភយ៉ាងខ្លាំងទៅលើគោលជំហរសន្តិសុខរបស់ជប៉ុន ទាំងគោលនយោបាយមិនច្បាស់លាស់ពាក់ព័ន្ធនឹងការប្រើប្រាស់អាវុធនុយក្លេអ៊ែរ និងត្រៀមប្រើប្រាស់នាវាមុជទឹកនុយក្លេអ៊ែរ ៕

ជាការគាប់ជួន ប៉ុន្តែគួរឲ្យចាប់អារម្មណ៍! ត្រឹមរយៈពេលតែប៉ុន្មានម៉ោងមុនពេលនៃការមកដល់របស់ស្ដេចថៃនៅលើទឹកដីចិន រឿងរ៉ាវអាក្រ.ក់ផ្ទួនៗបានកើតមាន ដែលរួមមានការឆាបឆេះព្រះវិហារបុរាណអាយុកាលជាង ១,៥០០ឆ្នាំ និងការដួលរលំស្ពានថ្មីមួយដែលទើបនឹងសាងសង់រួច។ អ្នកលេងបណ្ដា្ញសង្គមកំពុងនាំគ្នាពិភាក្សាពីប្រធានបទនេះ ដ្បិតវារំលងរយៈពេលជាង៥០ឆ្នាំទៅហើយ ដែលស្ដេចថៃខានយាងមកប្រទេសចិន ប៉ុន្តែមកម្ដងស្រាប់តែកើតមានហេតុការណ៍បែបនេះទៅវិញ។

យោងតាមប្រព័ន្ធផ្សព្វផ្សាយរបស់ចិននិងថៃ កាលពីថ្ងៃទី១១ ខែវិច្ឆិកា ឆ្នាំ២០២៥ បានបញ្ជាក់ពីដំណើរយាងធ្វើទស្សនកិច្ចផ្លូវការរបស់ព្រះហាក្សត្រ មហាវជិរាលង្ករណ៍ ឬស្ដេចរាមា ទី១០ របស់ថៃ ទៅកាន់ប្រទេសចិន នៅថ្ងៃទី១៣ ខែវិច្ឆិកា ដែលជាលើកដំបូងបង្អស់ក្នុងរយៈពេល ៥០ឆ្នាំ ចាប់តាំងពីការបង្កើតទំនាក់ទំនងការទូតទ្វេភាគីមក។

បន្ទាប់ពីការប្រកាសអំពីដំណើរយាងមកកាន់ប្រទេសចិនរបស់ទ្រង់ នៅបន្តិចក្រោយមកហេតុការណ៍ដ៏រន្ធត់នៃការបាក់រលំស្ពានថ្មីមួយនៅខេត្ត Sichuan ត្រូវបានផ្សព្វផ្សាយ។ តាមការបញ្ជាក់ស្ពាននោះ មានឈ្មោះថា Hongqi គឺផ្លូវដ៏សំខាន់សម្រាប់ឆ្លងកាត់ពីប្រទេសចិនទៅកាន់តំបន់ទីបេ ដែលនៅសុខៗវាស្រាប់តែមានស្នាមប្រេះ និងបាក់ស្រុតចុះភ្លាមៗក្នុងពេលមួយរំពិច។

រំលងបានមួយថ្ងៃបន្ទាប់ ពោលគឺថ្ងៃទី១២ ខែវិច្ឆិកា ហេតុការណ៍ដ៏មិននឹកស្មានដល់មួយទៀតបានកើតមាន នោះគឺគ្រោះថ្នាក់អគ្គីភ័យលើវិហារបុរាណដ៏ល្បីល្បាញមួយឈ្មោះវិហារ Yongqing នៅក្រុង Zhangjiagang ប្រទេសចិន។ តាមសេចក្ដីរាយការណ៍ ព្រះវិហារនោះមានអាយុកាលលើសពី ១,៥០០ឆ្នាំទៅហើយ ត្រូវបានភ្លើងឆាបឆេះអស់សល់តែគ្រោងឆ្អឹង បង្កជាការសោ.កស្ដាយយ៉ាងខ្លាំងសម្រាប់ប្រជាជនចិន។

បើទោះជាហេតុការណ៍ទាំងពីរខាងលើមិនបង្កឲ្យមានមនុស្សគ្រោះថ្នាក់ ឬមានរបួសស្នាមក៏ពិតមែន ប៉ុន្តែវាបាននាំមកនូវការភ័យខ្លាច និងការខាតបង់យ៉ាងធ្ងន់ធ្ងរ។ អ្នកប្រើប្រាស់អុីនធើណេតមួយចំនួនបានបញ្ចេញមតិថា ទាំងនេះអាចជាសញ្ញាមិនល្អនោះទេ ជាពិសេសសម្រាប់ជនជាតិចិនដែលជាអ្នកមានជំនឿខ្លាំងទៅលើរឿងហុងស៊ុយ គួរតែពិនិត្យមើលពីបញ្ហាទាំងនេះឲ្យបានហ្មត់ចត់។

ក្នុងនោះក៏មានមនុស្សមួយចំនួនទៀតបានយករឿងរ៉ាវដែលបានកើតឡើងទាំងអស់មកបូកបញ្ចូលគ្នា រួចទាញចេញបានជាការសន្និដ្ឋានបែបអបិយជំនឿថា ហេតុភេទអាក្រ.ក់បណ្ដាក់គ្នាផ្ទួនៗបែបនេះ ហាក់ដូចជាបានកើតឡើងដើម្បីបង្ហាញការស្វាគមន៍ដល់ព្រះរាជដំណើរយាងមកដល់របស់ស្ដេចថៃ ដែលត្រូវបានអញ្ជើញឲ្យមកទស្សនៈកិច្ចនៅក្នុងប្រទេសចិន។

យ៉ាងណាក៏ដោយ ការសន្និដ្ឋានបែបនេះគឺធ្វើឡើងដោយផ្អែកទៅតាមបែបជំនឿរបស់មនុស្សម្នាក់ៗរៀងៗខ្លួន ហើយក៏មិនមានភ័ស្តុតាងបញ្ជាក់ផងដែរ ខណៈនៅជ្រុងម្ខាងទៀតមានអ្នកខ្លះក៏អះអាងថា គ្រប់យ៉ាងគឺគ្រាន់តែជារឿងចៃដន្យតែប៉ុណ្ណោះ។ ទាំងនេះ គឺជាការលើកឡើង និងជាការយល់ឃើញខុសៗគ្នារបស់មនុស្សនៅក្នុងបណ្ដាញសង្គម ចុះសម្រាប់អ្នកវិញតើយល់ឃើញដូចម្ដេចដែរ?

ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul បានបង្ហោះសារក្នុងហ្វេសប៊ុកនៅថ្ងៃទី១៥ ខែវិច្ឆិកា ឆ្នាំ២០២៥ ក្រោយពីជជែកតាមទូរស័ព្ទជាមួយប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ដោយទម្លាក់កំហុសលើកម្ពុជាមិនគោរពកិច្ចព្រមព្រៀងសន្តិភាពដែលចុះហត្ថលេខានៅទីក្រុងគូឡាឡាំពួរ និងប្រាប់មេដឹកនាំអាមេរិក-ម៉ាឡេស៊ី ឱ្យប្រាប់កម្ពុជាគោរពកិច្ចព្រមព្រៀងសន្តិភាពយ៉ាងម៉ឺងម៉ាត់ កុំរារាំងការដោះមីនរបស់ថៃ ។

នៅថ្ងៃទី១៥ ខែវិច្ឆិកា លោកនាយករដ្ឋមន្ត្រី Anutin បង្ហោះសារក្នុងហ្វេសប៊ុកថា កាលពីយប់ថ្ងៃទី១៤ ខែវិច្ឆិកា លោកបានទទួលទូរស័ព្ទរបស់ប្រធានាធិបតីអាមេរិក លោក Trump និងនាយករដ្ឋមន្ត្រីម៉ាឡេស៊ី លោក Ibrahim ដោយមេដឹកនាំទាំង២រូបពិភាក្សាពីស្ថានការណ៍ព្រំដែនកម្ពុជា-ថៃ និងសំណូមពរឱ្យរដ្ឋាភិបាលថៃបន្តគោរពកិច្ចព្រមព្រៀងសន្តិភាពដែលចុះហត្ថលេខានៅទីក្រុងគូឡាឡាំពួរ ។

នាយករដ្ឋមន្ត្រីថៃបង្ហាញពីគោលជំហររបស់រដ្ឋាភិបាលថៃទៅកាន់មេដឹកនាំទាំង២រូបក្នុងឋានៈជាសាក្សីនៃពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ព្រមទាំងចោទប្រកាន់កម្ពុជាមិនគោរពកិច្ចព្រមព្រៀងសន្តិភាព ដើម្បីលាក់បាំងទោសកំហុសរបស់ថៃដែលជាភាគីផ្អាកកិច្ចព្រមព្រៀងសន្តិភាពក្រោមហេតុផលគ្រាប់មីន ។ លោក Anutin ថែមទាំងនិយាយបំភ្លៃប្រាប់លោកប្រធានាធិបតី Trump និងលោកនាយករដ្ឋមន្ត្រី Ibrahim ថា កម្ពុជាបង្កប់មីនថ្មីក្នុងទឹកដីថៃ ក្រោយប្រទេសទាំងពីរចុះហត្ថលេខាលើកិច្ចព្រមព្រៀងសន្តិភាពនៅទីក្រុងគូឡាឡាំពួរ កាលពីថ្ងៃទី២៦ ខែតុលា ឆ្នាំ២០២៥ ។

ហេតុនេះ ទើបរដ្ឋាភិបាលថៃផ្អាកកិច្ចព្រមព្រៀងសន្តិភាព លុះត្រាតែកម្ពុជាយល់ស្របតាមការចោទប្រកាន់ និងការទម្លាក់កំហុសរបស់ថៃ ហើយចង់ឱ្យកម្ពុជាសូមទោសពលរដ្ឋថៃផងដែរ ។ ការបញ្ចប់កិច្ចព្រមព្រៀងសន្តិភាពនេះក្នុងបំណងការពារអធិបតេយ្យ ផ្តល់សុវត្ថិភាព និងការពារទ្រព្យសម្បត្តិរបស់ជនជាតិថៃ ។ ក្រៅពីនេះ លោក Anutin ក៏បានឱ្យលោកប្រធានាធិបតី Trump និងលោកនាយករដ្ឋមន្ត្រី Ibrahim ប្រាប់ទៅកម្ពុជាឱ្យគោរព និងអនុវត្តតាមកិច្ចព្រមព្រៀងសន្តិភាពយ៉ាងម៉ឺងម៉ាត់ ព្រមទាំងកុំឱ្យកម្ពុជារារាំងការដោះមីនរបស់កងទ័ពថៃ ។

នាយករដ្ឋមន្ត្រីថៃនិយាយលាបពណ៌ថា កម្ពុជាបង្កប់មីនថ្មីធ្វើឱ្យកងទ័ពថៃរងរបួស និងដាច់ជើងកាលពីថ្ងៃទី១០ ខែវិច្ឆិកា ប៉ុន្តែមិនទទួលស្គាល់កំហុស ទើបថៃពិបាកបន្តកិច្ចព្រមព្រៀងសន្តិភាព ។ រដ្ឋាភិបាលថៃរីករាយសហការជាមួយប្រទេសនានាដើម្បីបង្កើតសន្តិភាពក្នុងតំបន់អាស៊ាន ប៉ុន្តែមិនត្រូវការចងមិត្តជាមួយកម្ពុជាទេ ដោយនិយាយបំភ្លៃថា កម្ពុជាមិនស្មោះត្រង់ និងល្មើសអធិបតេយ្យថៃគ្រប់ពេលវេលា ។ នាយករដ្ឋមន្ត្រីថៃបានលើកពីគុណបំណាច់ថៃធ្លាប់ជួយជនភៀសសឹកកម្ពុជាកាលពីសម័យសង្គ្រាម រដ្ឋាភិបាលថៃគ្មានចេតនាឈ្លានពានកម្ពុជាទេ គ្រាន់តែការពារអធិបតេយ្យប៉ុណ្ណោះ ។

ក្នុងឱកាសនេះ នាយករដ្ឋមន្ត្រីថៃបានសុំឱ្យលោកប្រធានាធិបតី Trump ទម្លាក់ពន្ធទំនិញថៃបន្ថែមទៀត ពីព្រោះថៃបានសហការគ្រប់ផ្នែកជាមួយអាមេរិក ប៉ុន្តែប្រធានាធិបតីអាមេរិកឆ្លើយថា លោកបានទម្លាក់ពន្ធទំនិញថៃមកត្រឹមអត្រា១៩% គឺទាបបំផុតហើយ ។ រីឯលោកនាយករដ្ឋមន្ត្រី Ibrahim និយាយថា នឹងប្រញាប់ធ្វើឯកសារក្នុងនាមជាប្រធានអាស៊ានដើម្បីឱ្យកម្ពុជា-ថៃអនុវត្តតាមកិច្ចព្រមព្រៀងសន្តិភាពបន្តទៀត ។

គួរបញ្ជាក់ថា ថៃបានចោទប្រកាន់កម្ពុជាបង្កប់មីនថ្មីដើម្បីយកលេសមិនដោះលែងវីរកងទ័ពកម្ពុជាទាំង១៨រូបដែលថៃចាប់ដោយខុសច្បាប់ និងយកលេសផ្អាកកិច្ចព្រមព្រៀងសន្តិភាព ថែមទាំងនិយាយមួលបង្កាច់កម្ពុជា ប្រាប់ទៅលោកប្រធានាធិបតី Trump និងលោកនាយករដ្ឋមន្ត្រី Ibrahim រឿងមីន ។ ការពិត ការផ្ទុះមីនគ្រាន់តែជាល្បិចរបស់ថៃប៉ុណ្ណោះ ដែលថៃធ្លាប់យកមកអនុវត្តដើម្បីទម្លាក់កំហុសលើកម្ពុជាជាបន្តបន្ទាប់ ។

ក្រសួងការពារជាតិកម្ពុជាបានបញ្ជាក់ម្តងហើយម្តងទៀតថា វាជាមីនចាស់បន្សល់ទុកពីសង្គ្រាមស៊ីវិលរបស់កម្ពុជា និងបដិសេធការចោទប្រកាន់របស់ភាគីថៃមកលើកម្ពុជា ពីព្រោះតាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីគំរាមកំហែងសន្តិសុខ និងសុវត្ថិភាពរបស់មនុស្សជាតិឡើយ ប៉ុន្តែថៃនៅតែមិនស្តាប់ និងបន្តលាបពណ៌កម្ពុជាមិនឈប់ឈរ ៕

ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul បានរងការស្តីបន្ទោសពីប្រធានគណបក្សប្រជាជន ឬគណបក្សប្រឆាំងកាលពីថ្ងៃទី១៤ ខែវិច្ឆិកា ឆ្នាំ២០២៥ ក្រោយសម្រេចចិត្តផ្អាកកិច្ចព្រមព្រៀងសន្តិភាពជាមួយកម្ពុជាជាឯកតោភាគី ដោយចោទប្រកាន់កម្ពុជាបង្កប់មីនថ្មីធ្វើឱ្យកងទ័ពថៃរងរបួស៣នាក់ និងដាច់ជើងស្តាំម្នាក់នៅតំបន់ព្រំដែនខេត្តស៊ីសាកេត ។ ប្រធានគណបក្សប្រឆាំងថា ថៃមិនគោរពកិច្ចព្រមព្រៀងសន្តិភាព គឺចាញ់ប្រៀបកម្ពុជាយ៉ាងខ្លាំង ពីព្រោះនាយករដ្ឋមន្ត្រីថៃគិតតែរឿងជាតិនិយមជ្រុលចង់ឱ្យពលរដ្ឋគាំទ្របន្តតំណែងនាយករដ្ឋមន្ត្រីនៅឆ្នាំ២០២៦ ។

តាមការចុះផ្សាយរបស់សារព័ត៌មាន The Better កាលពីថ្ងៃទី១៤ ខែវិច្ឆិកា ឆ្នាំ២០២៥ លោក Natthaphong Ruengpanyawut ប្រធានគណបក្សប្រជាជន ឬគណបក្សប្រឆាំងនៅប្រទេសថៃ បានរិះគន់លោកនាយករដ្ឋមន្ត្រី Anutin ក្រោយពីថៃប្រឌិតរឿងកម្ពុជាបង្កប់មីនថ្មីនៅព្រំដែនខេត្តស៊ីសាកេត ធ្វើឱ្យកងទ័ពថៃរងរបួស៣នាក់ និងដាច់ជើងស្តាំម្នាក់ ថាហេតុការណ៍នេះធ្វើឱ្យថៃប្រកាសផ្អាកកិច្ចព្រមព្រៀងសន្តិភាពជាឯកតោគី និងចាញ់ប្រៀបកម្ពុជាយ៉ាងខ្លាំងនៅលើពិភពលោក ។

ប្រធានគណបក្សប្រឆាំង លោក Natthaphong បានបង្ហាញការសោកស្តាយចំពោះកងទ័ពថៃដែលរងរបួសដោយសារការផ្ទុះមីនកាលពីថ្ងៃទី១០ ខែវិច្ឆិកា ព្រមទាំងចោទប្រកាន់កម្ពុជាបង្កប់មីនថ្មីធ្វើឱ្យថៃពុំអាចទទួលយកបាន ប៉ុន្តែលោករិះគន់នាយករដ្ឋមន្ត្រីថៃធ្វើឱ្យប្រទេសថៃបាត់បង់ឱកាសទាក់ទាញប្រទេសនានាឱ្យដាក់សម្ពាធកម្ពុជា ។ លោកថា ហេតុការណ៍ផ្ទុះមីនលើកចុងក្រោយ នាយករដ្ឋមន្ត្រីថៃគួរចាត់ការដោយមានហេតុផល និងអនុវត្តការទូត ដូចជា ៖ រាយការណ៍ទៅអាមេរិក និងម៉ាឡេស៊ី ក្នុងឋានៈប្រទេសទាំងពីរជាសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ នៅទីក្រុងគូឡាឡាំពួរ ។

លោក Natthaphong ពុំគាំទ្រឱ្យនាយករដ្ឋមន្ត្រីថៃផ្អាកកិច្ចព្រមព្រៀងសន្តិភាពជាមួយកម្ពុជាទេ ពីព្រោះធ្វើឱ្យប្រទេសនានាបន្ទោស និងសួរមកកាន់ថៃ ហេតុអ្វីផ្អាកកិច្ចព្រមព្រៀងសន្តិភាព? ប្រធានគណបក្សប្រឆាំងបានសួរសំណួរទៅកាន់នាយករដ្ឋមន្ត្រីថៃថា តើកំពុងយករឿងជាតិនិយមជ្រុលដើម្បីឱ្យពលរដ្ឋបោះឆ្នោតគាំទ្របន្តតំណែងជានាយករដ្ឋមន្ត្រី មែនទេ?

ទន្ទឹមនឹងនេះ ប្រធានគណបក្សប្រឆាំងបានកំណត់វិធានការបន្ទាន់ទៅកាន់នាយករដ្ឋមន្ត្រីថៃក្នុងស្ថានការណ៍នេះ គឺជជែកផ្ទាល់ជាមួយប្រធានាធិបតីអាមេរិក លោក Donald Trump និងមេដឹកនាំចិន ដើម្បីឱ្យប្រទេសមហាអំណាចទាំង២ឈប់គាំទ្រកម្ពុជា ។ បច្ចុប្បន្ន ប្រទេសថៃកំពុងធ្វើសង្គ្រាមព័ត៌មាន និងត្រូវការនាយករដ្ឋមន្ត្រីចេះគិតពិចារណាវែងឆ្ងាយ ដោយមិនត្រូវការនាយករដ្ឋមន្ត្រីប្រើប្រាស់កងទ័ពជាលេសដើម្បីចៀសវាងការទទួលខុសត្រូវនោះទេ ។

ការបណ្តោយឱ្យកងទ័ពសម្រេចចិត្តជំនួសនាយករដ្ឋមន្ត្រី គ្មានលទ្ធផលឡើយ វាអាចបំផ្លាញទាំងសន្តិភាព និងស្ថិរភាពក្នុងប្រទេស ។ ប្រសិនបើមានការប៉ះទង្គិចដោយអាវុធម្តងទៀតនឹងធ្វើឱ្យកិច្ចព្រមព្រៀងសន្តិភាពកម្ពុជា-ថៃត្រូវលុបចោលជារៀងរហូត ហើយថៃនឹងទទួលបានលទ្ធផលមិននឹកស្មានដល់ ហេតុនេះ ប្រធានគណបក្សប្រឆាំងបានអំពាវនាវឱ្យនាយករដ្ឋមន្ត្រីថៃងាកមកប្រកាន់យកគោលការណ៍អន្តរជាតិ បោះបង់គំនិតជាតិនិយមជ្រុល និងអនុវត្តការទូតដាក់សម្ពាធឱ្យកម្ពុជាចរចាឆ្ពោះទៅរកសន្តិភាពយូរអង្វែង ។

គួរបញ្ជាក់ថា លោកនាយករដ្ឋមន្ត្រី Anutin ធ្លាប់រងការរិះគន់យ៉ាងខ្លាំងពីសង្គមថៃ ក្រោយពីថា ពលរដ្ឋថៃល្មើសអធិបតេយ្យកម្ពុជានៅតំបន់ព្រំដែនខេត្តស្រះកែវ និងសំណូមពរឱ្យពលរដ្ឋថៃចាកចេញពីទឹកដីកម្ពុជា រដ្ឋាភិបាលថៃនឹងស្វែងរកទីលំនៅថ្មីឱ្យរស់នៅ ។ ពលរដ្ឋថៃខឹងសម្បារនាយករដ្ឋមន្ត្រីរបស់ខ្លួន និងគំរាមធ្វើបាតុកម្មទម្លាក់ពីតំណែង ឬបណ្តេញចេញពីប្រទេសថៃ បើហ៊ាននិយាយការពិត ឬបើកព្រំដែនឡើងវិញ ក្រោយមក លោកនាយករដ្ឋមន្ត្រី Anutin ក៏បានសុំទោស និងសន្យាគាំទ្រពលរដ្ឋ ។ ការផ្អាកកិច្ចព្រមព្រៀងសន្តិភាព គឺនាយករដ្ឋមន្ត្រីថៃមានបំណងឱ្យពលរដ្ឋបោះឆ្នោតគាំទ្រដើម្បីបន្តតំណែងនៅឆ្នាំ២០២៦ និងព្យាយាមបង្ហាញគំនិតជាតិនិយម ខ្លាំងជាងផលប្រយោជន៍ប្រទេស ៕

វ៉ាសុីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃសុក្រថា ស្ថានភាពរបស់កម្ពុជា និងថៃ «នឹងល្អប្រសើរឡើងវិញ» បន្ទាប់ពីបានជួបសន្ទនាតាមទូរស័ព្ទជាមួយមេដឹកនាំនៃប្រទេសទាំងពីរ ដើម្បីជួយសម្របសម្រួលការស្ថានការណ៍តានតឹងដែលទើបផ្ទុះឡើងម្ដងទៀតនាពេលថ្មីៗនេះ។ នេះបើតាមការចុះផ្សាយរបស់កាសែត Reuters។

នៅថ្ងៃទី១៤ ខែវិច្ឆិកា ឆ្នាំ២០២៥ លោក ដូណាល់ត្រាំ បានថ្លែងប្រាប់ទីភ្នាក់ងារ Reuters បន្ទាប់ពីបានជួបពីភាក្សាតាមទូរស័ព្ទជាមួយនាយករដ្ឋមន្រ្តីកម្ពុជា និង ថៃ រួចថា លោកបានជជែកជាមួយនាយករដ្ឋមន្ត្រីនៃប្រទេសទាំង២ ហើយពួកគេកំពុងធ្វើបានល្អណាស់។ ខ្ញុំគិតថាពួកគេនឹងមានភាពល្អប្រសើរនឹងគ្នាឡើងវិញ»។

នៅក្នុងសេចក្ដីថ្លែងការណ៍មួយរបស់សេតវិមាន កាលពីថ្ងៃសុក្រក៏បានឱ្យដឹងផងដែរថាថា «លោកប្រធានាធិបតី ត្រាំ បានបើកកិច្ចពិភាក្សាតាមទូរស័ព្ទជាមួយភាគីកម្ពុជា និងថៃ ក្នុងកិច្ចប្រឹងប្រែងដើម្បី សម្របសម្រួលជម្លោះដែលបានផ្ទុះឡើងថ្មីៗនេះ»។ សេតវិមានបន្ថែមថាលោក ត្រាំក៏បានបើកកិច្ចសន្ទនាតាមទូរស័ព្ទជាមួយម៉ាឡេស៊ីផងដែរ។

បើតាមសេចក្ដីរាយការណ៍របស់ Reuters ដដែលបានគូសបញ្ជាក់ថា ប្រទេសថៃបានផ្អាកកិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិក ហើយទាមទារឱ្យមានការសុំទោសពីកម្ពុជា ដោយចោទប្រកាន់ថាបានដាក់មីនថ្មី ខណៈកម្ពុជាបានបដិសេធយ៉ាងដាច់អហង្ការ។

ទន្ទឹមនឹងនេះ សម្ដេចធិបតី ហ៊ុន ម៉ាណែត ក៏បានបញ្ជាក់ទៅកាន់លោក ដូណាល់ ត្រាំ ក្នុងអំឡុងពេលសន្ទនាតាមទូរស័ព្ទជាមួយគ្នាដែរថា រាជរដ្ឋាភិបាលកម្ពុជា នឹងប្រកាន់ខ្ជាប់យ៉ាងម៉ឺងម៉ាត់បំផុតក្នុងការបន្តអនុវត្តតាមស្មារតីសេចក្ដីថ្លែងការណ៍រួមទីក្រុងគូឡាឡាំពួ និងសង្ឃឹមថាភាគីទាំងពីរ នឹងបន្តធ្វើការជាមួយគ្នាស្របតាមគោលការណ៍ និងយន្តការទ្វេភាគីដែលបានឯកភាពគ្នា។ កម្ពុជានឹងបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី ដោយអនុលោមតាមគោលការណ៍ និងយន្តការ ដែលបានឯកភាពគ្នាកន្លងមក ដេីម្បីដោះស្រាយបញ្ហាព្រំដែនកម្ពុជា-ថៃ និងកសាងសន្តិភាពយូរអង្វែងរវាងប្រទេសទាំងពីរ៕