សហរដ្ឋអាមេរិក ៖ តាមការចុះផ្សាយរបស់សារព័ត៌មានបរទេសនៅថ្ងៃទី១៧ ខែវិច្ឆិកា ឆ្នាំ២០២៥ ប្រធានាធិបតីអាមេរិក លោក Donald Trump បានគាំទ្រសេចក្តីព្រាងច្បាប់របស់អាមេរិក ដែលគ្រោងដាក់ទណ្ឌកម្មសេដ្ឋកិច្ចបណ្តាប្រទេសដែលធ្វើពាណិជ្ជកម្មជាមួយរុស្ស៊ី ដោយដំឡើងពន្ធទំនិញក្នុងអត្រាខ្ពស់រហូតដល់៥០០% ។ ការដាក់ទណ្ឌកម្មសេដ្ឋកិច្ចប្រទេសនានាដែលធ្វើពាណិជ្ជកម្មជាមួយរុស្ស៊ីនេះ ដោយសារអាមេរិកយល់ឃើញថា ប្រទេសទាំងនោះគាំទ្ររុស្ស៊ីឱ្យបន្តសង្គ្រា.មជាមួយអ៊ុយក្រែន ។

លោកប្រធានាធិបតី Trump បានបង្ហាញគោលជំហរគាំទ្រសេចក្តីព្រាងច្បាប់ដែលស្នើឡើងដោយព្រឹទ្ធសភាអាមេរិក ដើម្បីដាក់ទណ្ឌកម្មសេដ្ឋកិច្ចប្រទេសនានាធ្វើពាណិជ្ជកម្មជាមួយរុស្ស៊ី ដោយលោកបានថ្លែងទៅកាន់អ្នកសារព័ត៌មានកាលពីថ្ងៃទី១៦ ខែវិច្ឆិកា មុនពេលធ្វើដំណើរចាកចេញពីរដ្ឋផ្លរីដា ទៅកាន់សេតវិមានថា ៖ «ខ្ញុំគាំទ្រសេចក្តីព្រាងច្បាប់នេះ គណបក្សសាធារណរដ្ឋ (Republican) បានធ្វើសេចក្តីព្រាងច្បាប់យ៉ាងតឹងរ៉ឹងដើម្បីដាក់ទណ្ឌកម្មសេដ្ឋកិច្ចបណ្តាប្រទេសធ្វើពាណិជ្ជកម្មជាមួយរុស្ស៊ី» ។

សេចក្តីព្រាងច្បាប់របស់ព្រឹទ្ធសភាអាមេរិកផ្តល់សិទ្ធិឱ្យលោកប្រធានាធិបតី Trump អាចដំឡើងពន្ធទំនិញនាំចូលពីប្រទេសណាដែលធ្វើពាណិជ្ជកម្មជាមួយរុស្ស៊ីនិងពុំគាំទ្រអ៊ុយក្រែន ក្នុងអត្រាខ្ពស់រហូតដល់៥០០% ជាពិសេស ប្រទេសដែលផ្គត់ផ្គង់ថាមពលច្រើនទៅរុស្ស៊ី រួមមាន ៖ ចិន ឥណ្ឌា និងអាចដំឡើងពន្ធខ្ពស់សម្រាប់ទំនិញនាំចូលពីអ៊ីរ៉ង់ផងដែរ ។

ការប្រកាសដាក់ទណ្ឌកម្មសេដ្ឋកិច្ចបណ្តាប្រទេសធ្វើពាណិជ្ជកម្មជាមួយរុស្ស៊ីក្នុងអត្រាខ្ពស់កប់ពពក ក្រោយពីលោកប្រធានាធិបតី Trump ព្យាយាមជាច្រើនខែជំរុញឱ្យប្រធានាធិបតីរុស្ស៊ី លោក Vladimir Putin ចូលរួមការចរចាសន្តិភាពជាមួយអ៊ុយក្រែន និងទប់ស្កាត់ប្រាក់ចំណូលរបស់រដ្ឋាភិបាលទីក្រុងមូស្គូ ប៉ុន្តែប្រធានាធិបតីរុស្ស៊ីបដិសេធការចរចាសន្តិភាព បើទោះជារុស្ស៊ីធ្វើសង្គ្រាមជាមួយអ៊ុយក្រែនអូសបន្លាយរហូតដល់ជិត៤ឆ្នាំក្តី ។

ក្រៅពីនេះ គណបក្សប្រជាធិបតេយ្យ (Democrat) និងគណបក្សសាធារណរដ្ឋ (Republican) ក៏បានជំរុញការបង្កើតច្បាប់ដាក់ទោសរុស្ស៊ីផងដែរដោយសារមិនបញ្ចប់សង្គ្រាមជាមួយអ៊ុយក្រែន ប៉ុន្តែលោកប្រធានាធិបតី Trump ពុំគាំទ្រច្បាប់នេះទេ និងព្យាយាមជំរុញឱ្យលោក Putin ចរចាសន្តិភាពជាមួយប្រធានាធិបតីអ៊ុយក្រែន លោក Volodymyr Zelenskyy ។

គួរបញ្ជាក់ថា អ៊ុយក្រែនបានវាយប្រហារលើទីតាំងប្រេងឥន្ធនៈរបស់រុស្ស៊ីជាបន្តបន្ទាប់ ហើយរុស្ស៊ីក៏វាយប្រហារតាមអាកាសលើអ៊ុយក្រែនវិញ ដើម្បីគ្រប់គ្រងមជ្ឈមណ្ឌលផ្លូវដែកនៅទីក្រុង Pokrovsk របស់អ៊ុយក្រែន ។ លោកប្រធានាធិបតី Trump ជំរុញឱ្យប្រទេសទាំងពីរបញ្ចប់សង្គ្រាម ក្រោយពីលោកបានបញ្ចប់សង្គ្រាមនៅប្រទេសជាច្រើន រួមទាំងសង្គ្រាមកម្ពុជា-ថៃ និងកំណត់ឱ្យថៃគោរពកិច្ចព្រមព្រៀងសន្តិភាព ទើបអាមេរិកយល់ព្រមចរចាពន្ធទំនិញ ៕

ប្រទេសថៃ ៖ ពលរដ្ឋថៃនៅខេត្តមួយចំនួនកំពុងព្រួយបារម្ភក្រោយពីបរិមាណទឹកក្នុងទំនប់នានាកើនឡើងយ៉ាងខ្លាំង ក្នុងនោះបរិមាណទឹកក្នុងទំនប់ទឹកយក្ស «Bhumibol Dam» នៅខេត្តតាក ក៏កើនឡើងខ្លាំងដែរ ដែលអាចធ្វើឱ្យខេត្តនានា និងទីក្រុងបាងកកជន់លិចធ្ងន់ធ្ងរដោយសារបាក់ទំនប់ ។ ពលរដ្ឋថៃបារម្ភថា ប្រសិនបើភ្លៀងនៅតែបន្តធ្លាក់ឥតឈប់ឈរនឹងធ្វើឱ្យបរិមាណទឹកក្នុងទំនប់យក្សកាន់តែកើនឡើងបង្កជាគ្រោះទឹកជំនន់ និងសំណូមពរឱ្យអាជ្ញាធរធនធានទឹកបង្ហូរទឹកចេញជាបន្ទាន់ បើមិនដូច្នោះទេ ការបាក់ទំនប់នឹងបង្កគ្រោះថ្នាក់មិនខាន ។

ថ្មីៗនេះ ពលរដ្ឋថៃបានបង្ហោះរូបភាពទំនប់យក្ស «Bhumibol Dam» នៅខេត្តតាក ដែលមានបរិមាណទឹកកើនឡើងខ្លាំងជិត១០០% ថែមទាំងមានភ្លៀងធ្លាក់ជាបន្តបន្ទាប់ ។ តាមទិន្នន័យចុងក្រោយ ទំនប់យក្សនេះបានស្តុកទឹកកើនឡើងដល់ជាង៩៩% អាចជាសញ្ញាប្រកាសអាសន្ននៃការបាក់ទំនប់ ពីព្រោះវាអាចផ្ទុកទឹកបានតែបន្តិចទៀតប៉ុណ្ណោះ ។ ពលរដ្ឋថៃបានសំណូមពរឱ្យអាជ្ញាធរធនធានទឹកប្រញាប់បង្ហូរទឹកចេញជាបន្ទាន់ដើម្បីបង្ការគ្រោះទឹកជំននន់ និងបាក់ទំនប់ បើបង្ហូរទឹកមិនទាន់ពេលទេនឹងប៉ះពាល់ដល់ពលរដ្ឋរស់នៅក្បែរទន្លេចៅព្រះយ៉ា ខណៈពេលនេះ បរិមាណទឹកនៅខេត្តឆ័យណា សីងបុរី អាងថង និងអយុធ្យា បានកើនឡើងខ្លាំងរួចទៅហើយ ។

តាមការចុះផ្សាយរបស់សារព័ត៌មាន Khaosod កាលពីថ្ងៃទី១៣ ខែវិច្ឆិកា មន្ត្រីការិយាល័យធនធានទឹក និងនាយកដ្ឋានធារាសាស្ត្រ បាននិយាយពីស្ថានការណ៍ទឹកជំនន់នៅប្រទេសថៃថា ថៃមានភ្លៀងធ្លាក់ខ្លាំងឥតឈប់ឈរនៅតំបន់ភាគកណ្តាល ទីក្រុងបាងកក និងតំបន់ជុំវិញ ដោយសារសម្ពាធខ្ពស់ ឬម៉ាស់ខ្យល់ត្រជាក់ខ្លាំងពីប្រទេសចិនគ្របដណ្តប់លើតំបន់ឦសាន ។ ភ្លៀងធ្លាក់ខ្លាំងធ្វើឱ្យបរិមាណទឹកក្នុងទំនប់នានា រួមទាំងទំនប់ទឹកយក្ស «Bhumibol Dam» នៅខេត្តតាកកើនឡើងខ្លាំង ដែលធ្វើឱ្យពលរដ្ឋបារម្ភពីគ្រោះទឹកជំនន់ធ្ងន់ធ្ងរដោយសារការបាក់ទំនប់ ។

អគ្គលេខាធិការងនៃការិយាល័យធនធានទឹកប្រទេសថៃ អ្នកស្រី ផាឆារ៉ាវី ស៊ុវ៉ាន់នីត បានប្រជុំជាមួយមន្ត្រីពាក់ព័ន្ធដើម្បីតាមដានស្ថានការណ៍ទឹកយ៉ាងដិតដល់ និងត្រៀមវិធានការទប់ស្កាត់ផលប៉ះពាល់ដែលបង្កឡើងដោយទឹកជំនន់ ។ អាជ្ញាធរធនធានទឹកបារម្ភថា ប្រសិនបើទំនប់ទឹកយក្សនៅខេត្តតាកបាក់មែននោះ នឹងបណ្តាលឱ្យខេត្តថៃជាច្រើនជន់លិចមិនធ្លាប់មានក្នុងប្រវត្តិសាស្ត្រ ។

តាមការលើកឡើងរបស់អ្នកវិភាគថៃ ទំនប់ទឹកយក្ស «Bhumibol Dam» មានបរិមាណទឹកកើនឡើងជិត១០០% ហើយវាអាចនឹងបាក់បើស្តុកទឹកបន្តទៀត ខណៈអ្នកបច្ចេកទេសចង់បង្ហូរទឹកចេញពីទំនប់ ប៉ុន្តែមិនអាចបង្ហូរបាន ដោយសារតំបន់នៅផ្នែកខាងក្រោមទំនប់កំពុងលិចលង់ខ្លាំង ហើយវានឹងលិចទីក្រុងបាងកក ។ ទោះជាយ៉ាងណា មិនអាចពន្យារពេលការបង្ហូរទឹកពីទំនប់យូរថ្ងៃទេ បើភ្លៀងនៅតែបន្តធ្លាក់នឹងលិចទីក្រុងបាងកកមិនខាន ។

គួរបញ្ជាក់ថា ចាប់ពីថ្ងៃទី១៣ ខែវិច្ឆិកា បរិមាណទឹកក្នុងទំនប់ទឹកយក្ស «Bhumibol Dam» នៅខេត្តតាក បានកើនឡើងយ៉ាងខ្លាំងមិនធ្លាប់មានកន្លងមក រហូតដល់ជាង៩៩% និងជាសញ្ញាប្រកាសអាសន្ននៃការបាក់ទំនប់ទឹកនេះ ខណៈវាមានសមត្ថភាពផ្ទុកទឹករហូតដល់១៣,៤៦២លានម៉ែត្រគូប ។

ទំនប់ទឹកយក្ស «Bhumibol Dam» មានសារៈសំខាន់សម្រាប់ប្រទេសថៃ ដោយសារអាចផលិតអគ្គិសនីផ្គត់ផ្គង់ទៅបណ្តាខេត្តជាច្រើន, ផ្តល់ប្រភពទឹកសម្រាប់ស្រោចស្រង់ដំណាំផ្សេងៗនៅតំបន់ទន្លេពីង និងទន្លេចៅព្រះយ៉ា ។ ក្រៅពីនេះ វាមានតួនាទីរំដោះទឹកដែលហូរពីតំបន់នានា ជាកន្លែងនេសាទ និងតំបន់ទេសចរណ៍ ។ នៅរដូវវស្សា ទំនប់នេះមានតួនាទីស្តុកទឹកការពារកុំឱ្យលិចតំបន់ទំនាបនៅម្តុំទន្លេចៅព្រះយ៉ា រួមទាំងការពារកុំឱ្យទឹកលិចទីក្រុងបាងកក និងបណ្តាខេត្ត ៕

ខេត្តម៉ែហុងសុន៖ ផ្អើលអស់កសិករដែលកំពុងធ្វើស្រែ ក្រោយឧទ្ធម្ភាគចក្រវ័យចំណាស់ចំនួនពីរគ្រឿងរបស់កងកម្លាំងពិសេសថៃប្រើសម្រាប់ដឹកជញ្ជូនស្បៀងអាហារឲ្យទ័ពជួរមុខដែលកំពុងហោះសុខៗបានសម្រេចចិត្តចុះចតភ្លាមៗជាបន្ទាន់ទៅលើដីស្រែរបស់ពលរដ្ឋ ដោយសារមានបញ្ហាប្រព័ន្ធបញ្ជាដែលធ្វើឲ្យការហោះហើរប្រឈមនឹងការបាត់បង់លំនឹង។

យោងតាមការចុះផ្សាយរបស់សារព័ត៌មាន Thairath កាលពីព្រឹកថ្ងៃទី១៦ ខែវិច្ឆិកា ឆ្នាំ២០១៥ វេលាម៉ោង ១១:០០នាទី អ្នកភូមិនៅហួយទននុន ឃុំម៉ែង៉ាវ ស្រុកឃុនយួន ខេត្តម៉ែហុងសុន បានផ្អើលឈូរឈរខណៈពេលកំពុងច្រូតស្រូវ បន្ទាប់ពីប្រទះឃើញឧទ្ធម្ភាគចក្រចំនួន ២គ្រឿង បានធ្វើការចុះចតទៅក្នុងដីស្រែនៅក្បែរៗពួកគេ។

បើតាមសេចក្ដីរាយការណ៍ ឧទ្ធម្ភាគចក្រទាំងនោះគឺជារបស់ក្រុមការងារពិសេស Singhanat ម៉ូដែល Bell 212 ដែលទើបត្រឡប់មកពីបេសកកម្មផ្គត់ផ្អង់ស្បៀងអាហារដល់ទ័ពជួរមុខតាមព្រំដែន បានសម្រេចធ្វើការចុះចតភ្លាមៗ ដោយសារតែមួយក្នុងចំណោមឧទ្ធម្ភាគចក្រទាំងពីរ បានលោកសញ្ញាព្រមានកម្រិតខ្ពស់ ( Master Caution) ថាមានបញ្ហាសម្ពាធប្រេងប្រអប់លេខ នាំឲ្យប៉ះពាល់ដល់ប្រព័ន្ធបញ្ជារបស់វា ដែលទាមទារឲ្យអ្នកបើកបរត្រូវចុះចតជាបន្ទាន់មុនពេលវាកាន់តែធ្ងន់ធ្ងរហើយបញ្ជាលែងបាន។

តាមការបញ្ជាក់ ឧទ្ធម្ភាគចក្រ Bell 212 ទាំងនេះត្រូវបានប្រើប្រាស់អស់រយៈពេលជាច្រើនទសវត្សរ៍មកហើយ ដែលបច្ចុប្បន្នវាអាចបម្រើការងារសម្រាលមួយចំនួនដូចជាសម្រាប់ដឹកជញ្ជូនកងទ័ព ស្បៀងអាហារ ឬជំនួយ ប្រតិបត្តិការស្វែងរក និងជួយសង្គ្រោះ និងការជម្លៀសអ្នកជំងឺ។ ក្រុមការងារពិសេស Singhanat បានផ្ដល់ដំណឹងដល់សាធារណជនទូទៅ និងប្រជាពលរដ្ឋនៅក្នុងតំបន់នោះថា មិនចាំបាច់ព្រួយបារម្ភនោះទេ។

គួរជម្រាបថា ឧបទ្ទេវហេតុខាងលើមិនបានបង្កឲ្យនរណាម្នាក់រងរបួស ឬគ្រោះថ្នាក់នោះទេ ប៉ុន្តែវាបាននាំមកនូវភាពភ័យស្លន់ស្លោយ៉ាងខ្លាំងទៅដល់ប្រជាជនថៃនៅក្នុងតំបន់ ខណៈភ្លាមៗពួកគេគិតថានេះអាចជាប្រតិបត្តិការយោធា ហើយការបា.ញ់ប្រហារអាចនឹងមាននៅក្នុងតំបន់ពួកគេ។ យ៉ាងណាក៏ដោយ បច្ចុប្បន្នក្រុមការងារជំនាញរបស់ថៃ កំពុងបើកការស៊ើបអង្កេតយ៉ាងយកចិត្តទុកដាក់ចំពោះដើមចមដែលបង្កឲ្យកើតមានបញ្ហាភ្លាមៗទៅលើឧទ្ធម្ភាគចក្រនេះ៕

ប្រទេសថៃ៖ រដ្ឋាភិបាលថៃបានសម្តែងការខកចិត្តយ៉ាងខ្លាំង បន្ទាប់ពីសហរដ្ឋអាមេរិកបានប្រកាសផ្អាកការចរចាពន្ធគយរបស់ពួកគេភ្លាមៗ ដោយនិយាយថា ការសម្រេចចិត្តនេះមានភាពអយុត្តិធម៌ និងថែមរិះគន់លោក ដូណាល់ត្រាំ ថាបានយករឿងពីរដាច់ដោយឡែកមកលាយលំចូលគ្នាដើម្បីដាក់សម្ពាធលើប្រទេសថៃ។

នៅថ្ងៃទី១៦ ខែវិច្ឆិការ ឆ្នាំ២០២៥ សារព័ត៌មាន The Nation របស់ថៃបានចុះផ្សាយថា ក្រសួងការបរទេសបានថៃបានសម្ដែងការខកចិត្តយ៉ាងខ្លាំងចំពោះការសម្រេចចិត្តរបស់សហរដ្ឋអាមេរិក ហើយបានសង្កត់ធ្ងន់ថា រឿងពាណិជ្ជកម្ម និងបញ្ហាសន្តិសុខព្រំដែន គួរតែនៅតែជាបញ្ហាដាច់ដោយឡែកពីគ្នា។

អ្នកនាំពាក្យរបស់ក្រសួង លោក Nikorndej Balankura បានទទូចថា ប្រទេសថៃបានចាត់ទុកបញ្ហាគោលនយោបាយពាណិជ្ជកម្ម និងសន្តិសុខដោយពីរផ្សេងគ្នា ហើយបានហៅសកម្មភាពរបស់សហរដ្ឋអាមេរិកថា ផ្ដល់ភាពអយុត្តិធម៌មកកាន់ថៃ និងធ្វើរឿងដែលមិនចាំបាច់។ បន្ថែមលើនោះ លោកនាយករដ្ឋមន្រ្តី Anutin Chanvirakul តាមរយៈទំព័រហ្វេសប៊ុកក៏និយាយរិះគន់សហរដ្ឋអាមេរិកដែរថា បានបិទភ្នែកនៅស្ងៀមនៅពេលដែលកម្ពុជាបង្កសកម្មភាពរំលោ.ភបំពានម្ដងហើយម្ដងទៀតលើកិច្ចព្រមព្រៀងសន្តិភាព ប៉ុន្តែចេញមុខមកគាបសង្កត់ថៃ នៅពេលដែលថៃប្រកាសផ្អាកការអនុវត្តសេចក្ដីថ្លែងការណ៍រួមដើម្បីការពារឯករាជ្យភាពរបស់ខ្លួន។

គួររម្លឹកថា ប្រទេសថៃបានប្រកាសបង្កកកិច្ចព្រមព្រៀងសន្តិភាពជាមួយកម្ពុជា បន្ទាប់ពីឧប្បត្តិហេតុផ្ទុះមីននៅតំបន់ព្រំដែន ដោយថៃចោ.ទប្រកាន់ទាំងគ្មានមូលដ្ឋានថាជាស្នាដៃរបស់កម្ពុជា បើទោះជាកម្ពុជាខំបដិសេធយ៉ាងណាក៏ដោយ។ ក្រោយការសម្រេចជាឯកតោភាគីរបស់ថៃ សហរដ្ឋអាមេរិកក៏បានប្រកាសថា ខ្លួនក៏នឹងផ្អាកចរចាពីពន្ធគយជាមួយថៃដូចគ្នា រហូតដល់ថៃអនុវត្តឡើងវិញទៅតាមសេក្ដីថ្លែងការណ៍រួមនៅក្នុងកិច្ចព្រមព្រៀងសន្តិភាព។

ការសម្រេចចិត្តរបស់សហរដ្ឋអាមេរិកត្រូវបានគេមើលឃើញថា គឺជាបញ្ជាក់ឡើងវិញនូវឥទ្ធិពលរបស់ខ្លួនទៅលើប្រទេសថៃ ព្រោះការមិនគោរពចំពោះកិច្ចព្រៀងសន្តិភាព គឺប្រៀបបាននឹងការមិនគោរពអាមេរិកដូចគ្នា ក៏ដោយសារតែកិច្ចព្រមព្រៀងនោះបានមកតាមរយៈការសម្របសម្រួលរបស់សហរដ្ឋអាមេរិក។

គួរបញ្ជាក់ថា ការសម្រេចចិត្តរបស់អាមេរិកបានហុចផលវិបាកយ៉ាងសំខាន់សម្រាប់ប្រទេសថៃ ដែលក្នុងនោះវានឹងផ្ដល់ការគំរាមកំហែងដល់វិស័យនាំចេញសំខាន់ៗជាច្រើនដែលពឹងផ្អែកយ៉ាងខ្លាំងទៅលើទីផ្សារអាមេរិក។ វាក៏ធ្វើឱ្យប្រទេសថៃស្ថិតក្នុងជំហរការទូតដ៏លំបាកមួយផងដែរ ខណៈដែលទីក្រុងវ៉ាស៊ីនតោនកំពុងប្រើប្រាស់ពាណិជ្ជកម្មកាន់តែខ្លាំងឡើងជាអានុភាពនៅក្នុងបញ្ហាសន្តិសុខអាស៊ីអាគ្នេយ៍៕

ប្រទេសថៃ ៖ តាមការចុះផ្សាយរបស់សារព័ត៌មាន Khaosod នៅថ្ងៃទី១៥ ខែវិច្ឆិកា ឆ្នាំ២០២៥ ប្រធានាធិបតីអាមេរិក លោក Donald Trump បានបញ្ជាឱ្យមន្ត្រីក្រសួងពាណិជ្ជកម្មផ្អាកការចរចាពន្ធទំនិញជាមួយថៃ រហូតដល់ថៃគោរពតាមកិច្ចព្រមព្រៀងសន្តិភាពជាមួយកម្ពុជា ដែលបានចុះហត្ថលេខានៅទីក្រុងគូឡាឡាំពួរ ប្រទេសម៉ាឡេស៊ី ក្រោមវត្តមានលោកប្រធានាធិបតីអាមេរិក និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី ។

តាមការលើកឡើងរបស់អ្នកនាំពាក្យក្រសួងការបរទេសថៃ លោក និកនឌេត ផ្លាំងគូន នៅថ្ងៃទី១៥ ខែវិច្ឆិកា ថៃទទួលបានការជូនដំណឹងពីមន្ត្រីពាណិជ្ជកម្មអាមេរិកថា អាមេរិកនឹងផ្អាកការចរចាពន្ធទំនិញជាមួយថៃ ហើយអាមេរិកនឹងយល់ព្រមចរចាពន្ធទំនិញជាមួយថៃម្តងទៀត លុះត្រាតែថៃសន្យាគោរពតាមកិច្ចព្រមព្រៀងសន្តិភាពជាមួយកម្ពុជា ។ អាមេរិកសង្ឃឹមថា កម្ពុជា-ថៃ នឹងអាចរកដំណោះស្រាយជម្លោះព្រំដែនយ៉ាងឆាប់រហ័សបំផុត ។

លោក និកនឌេត បន្តថា ថៃពិតជាខកបំណងយ៉ាងខ្លាំងចំពោះមន្ត្រីពាណិជ្ជកម្មអាមេរិក ដែលផ្អាកការចរចាពន្ធទំនិញជាមួយថៃដោយសារថៃមិនគោរពកិច្ចព្រមព្រៀងសន្តិភាពនៅទីក្រុងគូឡាឡាំពួរ ។ ថៃបានបញ្ជាក់ពីគោលជំហររបស់ខ្លួនរហូតមកថា បញ្ហាសន្តិសុខ និងសុវត្ថិភាព ជាពិសេស បញ្ហាទ្វេភាគីរវាងកម្ពុជា-ថៃ ត្រូវតែពិចារណាដោយមិនពាក់ព័ន្ធជាមួយពន្ធទំនិញ ដែលថៃចាត់ទុកពន្ធទំនិញ គឺជាពាណិជ្ជកម្មទ្វេភាគីរវាងថៃ-អាមេរិក ។

គួរបញ្ជាក់ថា កាលពីយប់ថ្ងៃទី១៤ ខែវិច្ឆិកា ប្រធានាធិបតីអាមេរិក លោក Trump បានទូរស័ព្ទមកជជែកជាមួយនាយករដ្ឋមន្ត្រីថៃ លោក Anutin Charnvirakul ដោយសំណូមពរឱ្យរដ្ឋាភិបាលថៃបន្តគោរពកិច្ចព្រមព្រៀងសន្តិភាព និងបញ្ឈប់ការឈ្លានពានកម្ពុជាជាបន្ទាន់ ។ ប៉ុន្តែនាយករដ្ឋមន្ត្រីថៃនិយាយមួលបង្កាច់ថា កម្ពុជាមិនគោរពតាមកិច្ចព្រមព្រៀងសន្តិភាព ខណៈថៃគោរពយ៉ាងម៉ឺងម៉ាត់រហូតមក ៕

យោងតាមប្រព័ន្ធផ្សព្វផ្សាយរបស់ប្រទេសចិននាពេលថ្មីៗនេះនៅលើបណ្តាញសង្គមរបស់ចិន មានការបង្ហោះមួយបានលេចចេញដោយអ្នកនិយមលេងអ៊ីនធឺណិតម្នាក់ ដែលអះអាងថា Kris Wu បានស្លាប់នៅក្នុងគុក។ ទោះយ៉ាងណា ប៉ូលិសចិនបានចេញមកបញ្ជាក់ថានោះជាព័ត៌មានក្លែងក្លាយជារូបភាពចាស់ប៉ុណ្ណោះ។

បុគ្គលនោះបានសរសេរថា «ប៉ុន្មានថ្ងៃមុននេះ ឆ្មាំគុកម្នាក់បានខ្សឹបប្រាប់ខ្ញុំថា Kris Wu បានស្លាប់ហើយ។ គាត់ត្រូវបានក្រុមក្មេងទំនើងរំលោភ ហើយសម្លាប់ ដោយសារតែគាត់បដិសេធការទាមទាររបស់មេដឹកនាំ»។ អ្នកបង្ហោះរូបនេះក៏បានចែករំលែករូបថតបុរសម្នាក់ពាក់ឯកសណ្ឋានអ្នកទោសពណ៌ខៀវ ហើយពណ៌នាថាជា «រូបថតថ្មីៗរបស់ Kris Wu ក្នុងគុក»។ រូបថតនោះបានឡើងដល់កំពូលនៃលទ្ធផលស្វែងរករបស់ Weibo យ៉ាងលឿន ហើយបានក្លាយជាដំណឹងល្បីកក្រើក។

នេះមិនមែនជាលើកទីមួយទេដែលពាក្យចចាមអារ៉ាមអំពីការស្លាប់របស់ Kris Wu បានលេចចេញមក។ កាលពីខែមីនា បន្ទាប់ពីប្រព័ន្ធផ្សព្វផ្សាយរាយការណ៍ថាជនជាតិកាណាដាបួននាក់ត្រូវបានប្រហារជីវិតនៅក្នុងប្រទេសចិនពីបទជួញដូរគ្រឿងញៀន អ្នកខ្លះបានប៉ាន់ស្មានថា Kris Wu ជនជាតិកាណាដាអាចជាម្នាក់ក្នុងចំណោមពួកគេ។ ប៉ុន្តែពាក្យចចាមអារ៉ាមនេះត្រូវបានច្រានចោលភ្លាមៗព្រោះអតីតតារាចម្រៀងនិងតារាសម្តែងរូបនេះ មិនធ្លាប់ត្រូវបានចោទប្រកាន់ពីបទឧក្រិដ្ឋពាក់ព័ន្ធនឹងគ្រឿងញៀនឡើយ។

លើសពីនេះ នៅមានពាក្យចចាមអារ៉ាមអនាមិកជាច្រើនទៀតដូចជា « Kris Wu ស្លាប់ដោយសារកូដកម្មអត់អាហារអូសបន្លាយពេល»។ ទោះបីជាយ៉ាងណាតាមការពិតមិនមានព័ស្តុតាងណាមួយដែលបញ្ជាក់ថាអតីតតារាប្រុសរូបនេះទទួលមរណភាពក្នុងពន្ធនាគារនោះទេ។

នៅពេលដែលព័ត៌មានមិនពិតបានរីករាលដាល នាយកដ្ឋានប៉ូលិសខេត្ត Jiangsu បានចេញសេចក្តីជូនដំណឹងដោយផ្ទាល់នៅលើគណនី Weibo ផ្លូវការរបស់ខ្លួន ដោយបដិសេធពាក្យចចាមអារ៉ាមនេះ។ ប៉ូលិសបាននិយាយថា «រូបថតដែលត្រូវបានចែកចាយគឺជារូបភាពដែលថតចេញពីវីដេអូព័ត៌មានចាស់មួយ មុខរបស់មនុស្សដើមត្រូវបានគេដាក់លើមុខរបស់ Kris Wu ។ វាគឺជារូបថតក្លែងក្លាយទាំងស្រុង»។ ប៉ូលិសក៏បានព្រមានផងដែរថា «ការចែករំលែក ឬការផ្សព្វផ្សាយព័ត៌មានដែលមិនបានបញ្ជាក់អាចនឹងត្រូវចាត់វិធានការតាមផ្លូវច្បាប់» ហើយបានអំពាវនាវឱ្យទប់ស្កាត់ការផ្សព្វផ្សាយព័ត៌មានមិនពិតតាមអ៊ីនធឺណិត។

Kris Wu កើតនៅឆ្នាំ១៩៩០ ហើយបង្ហាញខ្លួនដំបូងក្នុងឆ្នាំ ២០១២ ជាសមាជិកនៃក្រុម Kpop EXO ។ លោកចាកចេញពីក្រុមនៅក្នុងឆ្នាំ ២០១៤ ដោយសារតែមានការប្តឹងពីកិច្ចសន្យាផ្តាច់មុខរបស់គាត់ជាមួយក្រុមហ៊ុនគ្រប់គ្រង SM Entertainment នៅក្នុងប្រទេសកូរ៉េ។ បន្ទាប់មក Kris Wu បានត្រឡប់មកប្រទេសចិនវិញ ដើម្បីធ្វើការជាតារាចម្រៀង និងជាតារាសម្តែង ហើយបានឡើងយ៉ាងលឿនក្លាយជាតារាកំពូលនៅក្នុងឧស្សាហកម្មកម្សាន្តចិន។

ទោះយ៉ាងណាក៏ដោយ នៅឆ្នាំ២០២១ នារីម្នាក់អាយុ១៩ឆ្នាំ និងជនរងគ្រោះជាង ២០ នាក់បានចោទប្រកាន់ Kris Wu ពីបទរំលោភផ្លូវភេទ។ Kris Wu ត្រូវបានកាត់ទោសឱ្យ ជាប់គុក ១៣ ឆ្នាំ ក្នុងឆ្នាំ ២០២២។ បន្ទាប់ពីបានកាត់ទោសរួច លោកនឹងត្រូវនិរទេសទៅប្រទេសកាណាដា៕