ប្រទេសថៃ ៖ ទោះជាកម្ពុជា-ថៃបានចុះកិច្ចព្រមព្រៀងសន្តិភាពដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សីកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ប៉ុន្តែអ្នកនយោបាយ និងពលរដ្ឋថៃនៅព្រំដែនមិនពេញចិត្តនឹងកិច្ចព្រមព្រៀងសន្តិភាពនេះ និងទាមទារយកប្រាសាទតាក្របីរបស់កម្ពុជាដោយប្រើប្រាស់កម្លាំងទ័ព ។ ពេលពលរដ្ឋថៃចង់បានប្រាសាទតាក្របីខ្លាំង មេបញ្ជាការយោធភូមិភាគ២ និយាយបំភ្លៃថា ប្រាសាទតាក្របីជារបស់ថៃ កងទ័ពថៃមានផែនការដណ្តើមយកប្រាសាទ ។

ពេលប្រគល់សម្ភារៈធ្វើផ្លូវ និងរបងតាមបណ្តោយព្រំដែនកម្ពុជា-ថៃកាលពីថ្ងៃទី៦ ខែវិច្ឆិកា ឆ្នាំ២០២៥ មេបញ្ជាការយោធភូមិភាគ២ លោក Weerayut Raksin និយាយបំភ្លៃថា ប្រាសាទតាក្របីជារបស់ថៃ កងទ័ពថៃបានរៀបចំផែនការរួចហើយដើម្បីយកប្រាសាទនេះពីកម្ពុជា ។ ការលើកឡើងរបស់មេបញ្ជាការយោធភូមិភាគ២ថៃ ស្របពេលសង្គមថៃទាមទារឱ្យរដ្ឋាភិបាលរបស់លោកនាយករដ្ឋមន្ត្រី Anutin Charnvirakul និងកងទ័ពយកប្រាសាទតាក្របីរបស់កម្ពុជាទោះប្រើប្រាស់វិធីណាក៏ដោយ ។

នារសៀលថ្ងៃទី៦ ខែវិច្ឆិកា មេបញ្ជាការយោធភូមិភាគ២ លោក Weerayut Raksin រួមទាំងកងទ័ពមួយចំនួនបានធ្វើដំណើរតាមឧទ្ធម្ភាគចក្រមកកាន់វត្តប៉ាណងស៊ែង ស្ថិតនៅឃុំណងបួបាន ស្រុកណងវួសរ ខេត្តឧដនថានី ដើម្បីមកសំពះសុំពរព្រះសង្ឃថៃ១អង្គព្រះជន្ម៩០វស្សា ព្រមទាំងប្រគល់សម្ភារៈមួយចំនួន និងត្រាក់ទ័រចំនួន៣គ្រឿងសម្រាប់ការងារធ្វើផ្លូវ និងរបងតាមបណ្តោយព្រំដែនកម្ពុជា-ថៃ ។

បន្ទាប់មក លោកបានផ្តល់សម្ភាសន៍ពីស្ថានការណ៍ព្រំដែនកម្ពុជា-ថៃថា តាំងពីប្រទេសទាំងពីរដកអាវុធធុនធ្ងន់ចេញពីព្រំដែន គឺគ្មានភាពតានតឹងរវាងកងទ័ពទាំងសងខាងទេ ដោយសារអនុវត្តតាមការព្រមព្រៀង ។ កងទ័ពភូមិភាគទី២ថៃបានត្រៀមខ្លួនគ្រប់ពេលវេលា បើកម្ពុជាមិនអនុវត្តតាមការព្រមព្រៀង ដោយលោកបានបញ្ជូនលិខិតទៅកម្ពុជាដែលថា ថៃត្រៀមប្រើប្រាស់កម្លាំងដណ្តើមប្រាសាទតាក្របី ថៃមិនប្រើប្រាស់កម្លាំងកងទ័ពទេ កងទ័ពថៃបានរៀបចំផែនការរួចហើយដើម្បីយកប្រាសាទនេះ ។ រីឯការដណ្តើមយកប្រាសាទតាក្របីតាមវិធីណា គឺជារឿងសម្ងាត់របស់កងទ័ពថៃ ។ លោកក៏អរគុណពលរដ្ឋផងដែរ ដែលប្រមូលគ្នាទាមទារយកប្រាសាទតាក្របីរបស់កម្ពុជា ប៉ុន្តែត្រូវគិតពីសុវត្ថិភាព ។

ដោយឡែក កាលពីថ្ងៃទី៦ ខែវិច្ឆិកា រដ្ឋមន្ត្រីក្រសួងការពារជាតិថៃ លោក Natthaphon Narkphanit ក៏បាននិយាយបំភ្លៃដែរថា ប្រាសាទតាក្របីជារបស់ថៃ ថៃនឹងអនុវត្តការចរចាដោយសន្តិវិធីជាមុន ដូចជា ៖ ការដោះស្រាយបញ្ហាតាមរយៈយន្តការទ្វេភាគី ឬកិច្ចប្រជុំ JBC រីឯការប្រើប្រាស់កម្លាំងទ័ពជាវិធីចុងក្រោយ ។

កាលពីថ្ងៃទី៥ ខែវិច្ឆិកា អ្នកនាំពាក្យរាជរដ្ឋាភិបាលកម្ពុជាបានចេញសេចក្តីថ្លែងការណ៍បញ្ជាក់ពីគោលជំហររបស់កម្ពុជាក្នុងការគោរពយ៉ាងម៉ឺងម៉ាត់សេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាពទីក្រុងគូឡាឡាំពួរ និងអំពាវនាវឱ្យភាគីថៃគោរពដូចគ្នាដែរ ដោយសាររយៈពេលប៉ុន្មានថ្ងៃចុងក្រោយនេះ មន្ត្រីថ្នាក់ដឹកនាំថៃ ទាំងរដ្ឋាភិបាល ស៊ីវិល និងយោធា បានចេញសេចក្តីអត្ថាធិប្បាយជាបន្តបន្ទាប់មិនស្របតាមស្មារតី និងខឹ្លមសារនៃសេចក្តីថ្លែងការណ៍រួមទីក្រុងកូឡាឡាំពួរ គឺមន្ត្រីថៃបានអត្ថាធិប្បាយយកចំណុចមិនបានព្រមព្រៀងគ្នាក្នុងសេចក្តីថ្លែងការណ៍រួម មកធ្វើជាលក្ខខណ្ឌថ្មីៗបន្ថែមទៀត ដូចជា ៖ ទាមទារប្រាសាទតាក្របី ដោយព្រមានប្រើប្រាស់កម្លាំងយោធាដណ្តើមយក ។

អ្នកនាំពាក្យរាជរដ្ឋាភិបាលកម្ពុជាបានអំពាវនាវឱ្យភាគីថៃគោរព និងអនុវត្តឱ្យម៉ឺងម៉ាត់បំផុតនូវរាល់ខ្លឹមសារដែលមានចែងក្នុងសេចក្តីថ្លែងការណ៍រួម ដោយមិនត្រូវធ្វើអត្ថាធិប្បាយណាមួយនាំឱ្យមានភាពតានតឹង និងបាត់បង់ទំនុកចិត្តរវាងគ្នាដែលមិនអំណោយផលដល់ការសន្ទនាដោយសន្តិវិធី ។ កម្ពុជាសូមអំពាវនាវដល់ថៃបញ្ឈប់ការដាក់លក្ខខណ្ឌផ្សេងៗដែលមិនស្របតាមស្មារតីនៃសេចក្តីថ្លែងការណ៍រួម និងការឯកភាពគ្នាក្នុងកិច្ចប្រជុំនានាក្នុងពេលកន្លងមក ៕

ប្រទេសថៃ ៖ បន្ទាប់ពីកម្ពុជា និងថៃចាប់ផ្តើមកែសម្រួលអាវុ.ធ និងយុទ្ធោបករណ៍ធុនធ្ងន់ចេញពីតំបន់ព្រំដែនដំណាក់កាលទី១ ក្រោមការសង្កេតការណ៍ និងផ្ទៀងផ្ទាត់ដោយក្រុមអ្នកសង្កេតការណ៍អាស៊ាន (AOT) ក៏មានមតិមួយចំនួននៅប្រទេសថៃចោទប្រកាន់ថា កងទ័ពកម្ពុជាដឹកអាវុ.ធត្រឡប់ទៅព្រំដែនវិញបន្ទាប់ពីទើបដកចេញ ដែលធ្វើឱ្យមានការបារម្ភពីការបាត់បង់អធិបតេយ្យ ។ លើសពីនេះ សារព័ត៌មានថៃចោទប្រកាន់កងទ័ពកម្ពុជារារាំងក្រុមអ្នកសង្កេតការណ៍អាស៊ាន (AOT) ពិនិត្យមើលមជ្ឈមណ្ឌលជាតិកម្ចាត់មីន (TMAC) ដោះមីននៅតំបន់ច្រកដោះដូរទំនិញ សាយតាគូ ស្រុកបានក្រួត ខេត្តបុរីរាំ ។

បន្ទាប់ពីមានការចោទប្រកាន់កងទ័ពកម្ពុជារារាំងក្រុម AOT ពិនិត្យមើលការដោះមីននៅតំបន់ច្រកដោះដូរទំនិញ សាយតាគូ ស្រុកបានក្រួត ខេត្តបុរីរាំ (ទល់មុខច្រកព្រំដែនជប់គគី ស្រុកបន្ទាយអំពិល ខេត្តឧត្តរមានជ័យ) នៅថ្ងៃទី៣ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul ប្រាប់ឱ្យពលរដ្ឋជឿជាក់លើកងទ័ពអាចការពារអធិបតេយ្យភាព និងកុំប្រើពាក្យថា «កម្ពុជារារាំងការដោះមីន» ដោយលោកសង្កត់ធ្ងន់លើការបំពេញតាមលក្ខខណ្ឌ៤ចំណុច ។

នាវេលាម៉ោង១១ព្រឹកថ្ងៃទី៣ ខែវិច្ឆិកា លោក Anutin នាយករដ្ឋមន្ត្រីថៃបានផ្តល់សម្ភាសន៍ជាមួយសារព័ត៌មានក្រោយមានព័ត៌មានថា កងទ័ពកម្ពុជារារាំងមិនឱ្យក្រុម AOT ចូលសង្កេតការណ៍ការដោះមីននៅតំបន់ច្រកដោះដូរទំនិញ សាយតាគូ ថា កុំទាន់ប្រើប្រាស់ពាក្យ «កម្ពុជារារាំងការដោះមីន» ដោយសារកម្ពុជាបានប្រជុំជាមួយថៃរហូតមក ។ តាមរបាយការណ៍ពីអគ្គមេបញ្ជាការ គឺថៃកំពុងដំណើរការដកថយកម្លាំងទ័ពចេញពីព្រំដែន និងដោះមីន គឺការពិភាក្សាកំពុងបន្តទោះមិនរលូនក្តី ប៉ុន្តែបានកំណត់គោលដៅច្បាស់លាស់ដើម្បីទទួលសន្តិភាព ។

ក្រៅពីនេះ នាយករដ្ឋមន្ត្រីថៃបានសង្កត់ធ្ងន់ពីលក្ខខណ្ឌ៤ចំណុច រួមមាន ៖ ១-ដកអាវុធចេញពីតំបន់ព្រំដែន ២-ដោះមីន ៣-បង្ក្រាបឧក្រិដ្ឋកម្មឆ្លងដែន-ការឆបោកអនឡាញ និង៤-ដោះស្រាយបញ្ហានៅតំបន់ព្រំដែនខេត្តស្រះកែវ (ទល់មុខភូមិជោគជ័យ និងភូមិព្រៃចាន់) ដោយភាគីទាំងពីរត្រូវអនុវត្តតាមលក្ខខណ្ឌទាំង៤ ទើបកងទ័ពថៃដោះលែងកងទ័ពកម្ពុជាចំនួន១៨រូប និងជជែកពីការកំណត់ព្រំដែន និងរឿងផ្សេងៗ ដោយបច្ចុប្បន្ន ស្ថិតក្នុងដំណាក់កាលអនុវត្តលក្ខខណ្ឌទាំងនេះ ។

ចំណែកពាក្យចចាមអារ៉ាមថា កងទ័ពកម្ពុជាដឹកអាវុ.ធត្រឡប់ទៅព្រំដែនវិញបន្ទាប់ពីទើបដកចេញ គឺលោក Anutin បញ្ជាក់ថា ភាគីទាំងពីរបានដកអាវុធចេញពីតំបន់ព្រំដែនហើយ តើសារព័ត៌មានថៃបានព័ត៌មាននេះពីណា? កម្ពុជាមិនបានដឹកអាវុធត្រឡប់ទៅព្រំដែនវិញទេ ពីព្រោះកិច្ចព្រមព្រៀងកំណត់ឱ្យភាគីទាំងពីរដកអាវុធរៀងៗខ្លួន បើកម្ពុជាដឹកអាវុធទៅព្រំដែនវិញ មានន័យថា បំពានកិច្ចព្រមព្រៀង ហើយថៃនឹងមានវិធានការ ។ នាយករដ្ឋមន្ត្រីថៃបានជជែកជាមួយអគ្គមេបញ្ជាការកងទ័ពពីពលរដ្ឋថៃបារម្ភរឿងការដកអាវុធចេញពីព្រំដែនអាចដឹកមកវិញមិនទាន់ ប្រសិនបើកម្ពុជាមិនអនុវត្តតាមកិច្ចព្រមព្រៀង អគ្គមេបញ្ជាការកងទ័ពថៃបានត្រៀមខ្លួនការពារអធិបតេយ្យ សូមជឿជាក់លើកងទ័ពអាចការពារអធិបតេយ្យ ។

គួរបញ្ជាក់ថា កម្ពុជាបានកែសម្រួលអាវុ.ធ និងយុទ្ធោបករណ៍ធុនធ្ងន់ចេញពីតំបន់ព្រំដែនដំណាក់កាលទី១ ជាការបង្ហាញពីការប្តេជ្ញាចិត្តក្នុងការគោរព និងអនុវត្តនូវអ្វីដេលបានឯកភាពគ្នាក្នុងសេចក្តីថ្លែងការណ៍រួមនៅទីក្រុងកូឡាឡាំពួរ ស្តីពីកិច្ចព្រមព្រៀងសន្តិភាពកម្ពុជា-ថៃ ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ព្រមទាំងស្មារតីនៃកិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅ កម្ពុជា-ថៃ (GBC) ដែលប្រព្រឹត្តទៅនៅប្រទេសម៉ាឡេស៊ី កាលពីថ្ងៃទី២៣ ខែតុលា ឆ្នាំ២០២៥ ។

ការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ក្នុងដំណាក់កាលទី១របស់កម្ពុជា គឺបានប្រព្រឹត្តទៅនៅទីតាំងចំនួន២ រួមមាន ៖ នៅស្រុកជាំក្សាន្ត ខេត្តព្រះវិហារ និងស្រុករវៀង ខេត្តព្រះវិហារ ។ រីឯភាគីថៃក៏កែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ក្នុងដំណាក់កាលទី១ ដែរ ៕

ប្រទេសថៃ៖ លោកស្រី Thananon Niramit ជាភរិយារបស់លោកនាយករដ្ឋមន្រ្តី អនុទីន ឆាន់វិរៈគុល ដែលទទួលបានការរិះគន់យ៉ាងចាស់ដៃពីសាធារណជន បន្ទាប់ពីនាងបានហៅអ្នកកាសែតថា «ចិត្តអាក្រ.ក់» ដែលសួរសំណួរពិបាកៗ និងដាក់សម្ពាធលើស្វាមីខ្លួន បានចេញមកសូមការអភ័យទោ.សចំពោះពាក្យសំដីទាំងនេះ ដោយអះអាងថា វាគ្រាន់តែជាការលេងសើចតែប៉ុណ្ណោះ។

យោងតាមការចុះផ្សាយរបស់កាសែត បាងកកប៉ុស្តិ៍ នៅថ្ងៃទី១ ខែវិច្ឆិកា ឆ្នាំ២០២៥ បាឲ្យដឹងថា លោកស្រី Thananon Niramit ឬ Suthasinee Charnvirakul ដែលបច្ចុប្បន្នមានងារជាលោកជំទាវទី១ របស់ប្រទេសថៃ បានចេញសេចក្តីសុំទោសជាសាធារណៈនៅលើប្រព័ន្ធផ្សព្វផ្សាយសង្គមរបស់លោកដោយបញ្ជាក់ថា លោកស្រីមិនមានបំណងប្រមា.ថនរណាម្នាក់ទេ ហើយពាក្យសម្ដីរបស់លោកស្រីគ្រាន់តែជាការនិយាយលេងសើចទៅកាន់អ្នកកាសែតប៉ុណ្ណោះ។

លោកស្រីបានសម្តែងនូវការសោកស្តាយចំពោះជម្រើសភាសារបស់លោកស្រី និងទទួលស្គាល់តួនាទីសំខាន់របស់អ្នកសារព័ត៌មានក្នុងការទំនាក់ទំនងគោលនយោបាយរបស់រដ្ឋាភិបាល និងព័ត៌មានសាធារណៈ។ លោកស្រីបានបន្ថែមថា លោកស្រីតែងគោរពដល់ការងាររបស់សារព័ត៌មាន និងឱ្យតម្លៃចំពោះការរិះគន់ដើម្បីស្ថាបនា ហើយលោកស្រីសង្ឃឹមថាការយល់ច្រឡំអាចត្រូវបានដោះស្រាយដោយការគោរពគ្នាទៅវិញទៅមក។

គួររំលឹកថា កាលពីសប្ដាហ៍មុនក្នុងឱកាសពេលដែលលោក Anutin វិលត្រឡប់មកពីប្រទេសម៉ាឡេស៊ីវិញសម្រាប់កិច្ចប្រជុំអាស៊ាន នៅអាកាសយានដ្ឋាន Don Mueang លោកបានផ្តល់បទសម្ភាសដល់អ្នកសារព័ត៌មានពាក់ព័ន្ធនឹងបញ្ហាមួយចំនួន។ នាអំឡុងពេលនោះ ក្រុមអ្នកកាសែតក៏សួរដេញដោលលោក Anutin ជាមួយនឹងសំណួរចាក់ដោតមួយចំនួន ទើបធ្វើឲ្យភរិយារបស់លោកមិនសប្បាយចិត្ត និងពោលពាក្យថា “ហេតុអ្វីបានជាអ្នកចិត្តអាក្រ.ក់ចំពោះនាយករដ្ឋមន្ត្រីយ៉ាងនេះ? លើកក្រោយខ្ញុំនឹងចាំមើល… នេះសួរច្រើនពេកហើយ”។

បើទោះជាពាក្យសម្ដីរបស់លោកស្រីត្រូវបានថ្លែងដោយកាយវិការ “សំពះ” ដ៏គួរសម និងស្នាមញញឹមក្ដី ប៉ុន្តែអ្នករិះគន់បានយល់ថា សម្លេង និងឃ្លារបស់គាត់ប្រៀបដូចជាការព្រមា.ន ឬដាក់សម្ពាធដោយប្រយោល។ មតិជាច្រើបានអះអាងថា “ទោះជាការនិយាយលេងសើចក៏ដោយ សម្លេងរបស់នាងបានបង្ហាញថា អ្នកសារព័ត៌មាននឹងត្រូវបានគេកត់ចំណាំ ចំពោះការសួរសំណួរពិបាកៗទៅកាន់នាយករដ្ឋមន្រ្តី”។

យ៉ាងណាក៏ដោយ បន្ទាប់ពីមានរិះគន់ និងវា.យតម្លៃអវិជ្ជមានចំពោះពាក្យសំដីបែបនេះ លោកស្រីក៏ទទួលស្គាល់កំហុស និងធ្វើការសុំទោសជាសាធារណៈ។ ហេតុការណ៍នេះបានបង្កឱ្យមានការពិភាក្សាឡើងវិញអំពីភាពរសើបរបស់អ្នកមានអំណាចចំពោះការរិះគន់ប្រព័ន្ធផ្សព្វផ្សាយ និងសារៈសំខាន់នៃការរក្សាវិជ្ជាជីវៈ និងការគោរពគ្នាទៅវិញទៅមករវាងអ្នកនយោបាយ និងសារព័ត៌មាន៕

ប្រទេសថៃ ៖ កាលពីថ្ងៃទី៣១ ខែតុលា ឆ្នាំ២០២៥ យោធភូមិភាគទី៤កម្ពុជា និងយោធភូមិភាគទី២ថៃ បានរៀបចំកិច្ចប្រជុំពិសេសក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ (RBC) នៅច្រកព្រំដែនអន្តរជាតិអូរស្មាច់ ខេត្តឧត្តរមានជ័យ ដោយមានការចូលរួមពីក្រុមអ្នកសង្កេតការណ៍អាស៊ាន (AOT) ប្រចាំកម្ពុជា-ថៃ ដើម្បីតាមដាន ផ្ទៀងផ្ទាត់ និងធានាការអនុវត្តបទឈ.ប់បា.ញ់ឱ្យបានពេញលេញ និងប្រសិទ្ធភាព ។ ភាគីទាំងពីរបានឯកភាពកែសម្រួលអាវុ.ធ និងយុទ្ធោបករណ៍ធុនធ្ងន់រវាងយោធភូមិភាគទី៤កម្ពុជា និងយោធភូមិភាគទី២ថៃ ជា៣ដំណាក់កាល ប៉ុន្តែពលរដ្ឋថៃមិនគាំទ្រឱ្យកងទ័ពខ្លួនដកអាវុ.ធធុនធ្ងន់ចេញពីព្រំដែនទេ ដោយសារបារម្ភពីកម្ពុជាមិនស្មោះត្រង់ ។

ក្រោយពីពលរដ្ឋបង្ហាញក្តីបារម្ភ អ្នកនាំពាក្យកងទ័ពជើងគោកថៃ លោក វិនឆ័យ ស៊ុវ៉ារី បាននិយាយនៅថ្ងៃទី៣ ខែវិច្ឆិកា ឆ្នាំ២០២៥ ឱ្យពលរដ្ឋមានទំនុកចិត្តលើកងទ័ពអាចចល័តអាវុ.ធធុនធ្ងន់ទាន់ពេលវេលា ប្រសិនបើកម្ពុជាមិនអនុវត្តតាមកិច្ចព្រមព្រៀងកែសម្រួលអាវុ.ធ និងយុទ្ធោបករណ៍ធុនធ្ងន់ជា៣ដំណាក់កាល ។ អ្នកនាំពាក្យកងទ័ពថៃក៏បានបញ្ជាក់ថា TMAC នឹងបន្តបោសសម្អាតមីននៅតំបន់ច្រកដោះដូរទំនិញ សាយតាគូ ស្រុកបានក្រួត ខេត្តបុរីរាំ (ទល់មុខច្រកព្រំដែនជប់គគី ស្រុកបន្ទាយអំពិល ខេត្តឧត្តរមានជ័យ) បើទោះមានព័ត៌មានកងទ័ពកម្ពុជារារាំងការចូលសង្កេតការណ៍របស់ក្រុមអ្នកសង្កេតការណ៍អាស៊ាន (AOT) ក៏ដោយ ។

លោក វិនឆ័យ ស៊ុវ៉ារី បាននិយាយពីពលរដ្ឋថៃមួយចំនួនបារម្ភពីកងទ័ពថៃកែសម្រួលអាវុធ និងយុទ្ធោបករណ៍ធុនធ្ងន់ទៅកាន់បន្ទាយវិញនៅខេត្តលបបុរី ដែលមានទីតាំងនៅឆ្ងាយពីព្រំដែនកម្ពុជា-ថៃថា កងទ័ពថៃនឹងអាចចល័តអាវុធមកកាន់តំបន់ព្រំដែនទាន់ពេលវេលា ករណីកម្ពុជាមិនអនុវត្តតាមកិច្ចព្រមព្រៀងកែសម្រួលអាវុធ និងយុទ្ធោបករណ៍ធុនធ្ងន់ជា៣ដំណាក់កាល ។ រីឯសារព័ត៌មានថៃរាយការណ៍ពីកងទ័ពកម្ពុជារារាំងមិនឱ្យក្រុមអ្នកសង្កេតការណ៍អាស៊ាន (AOT) ចូលសង្កេតការណ៍ការបោសសម្អាតមីននៅតំបន់ច្រកដោះដូរទំនិញសាយតាគូ ស្រុកបានក្រួត ខេត្តបុរី គឺតាមការត្រួតពិនិត្យឃើញថា មជ្ឈមណ្ឌលជាតិកម្ចាត់មីន (TMAC) នៅតែបន្តបោសសម្អាតមីនតាមផែនការ ទោះជាកម្ពុជាកំពុងរង់ចាំបទបញ្ជាពីថ្នាក់លើក្តី ។

កាលពីថ្ងៃទី១ ខែវិច្ឆិកា កងទ័ពបូព៌ាបានរាយការណ៍ពីការបោសសម្អាតមីនរបស់ TMAC នៅតំបន់ច្រកដោះដូរទំនិញ សាយតាគូ ស្រុកបានក្រួត ខេត្តបុរីរាំ ដោយភាគីថៃចាប់ផ្តើមបោសសម្អាតមីនតាមផែនការតាំងពីថ្ងៃទី២៨ ខែតុលា ។ បច្ចុប្បន្ន TMAC បានបោសសម្អាតមីនប្រមាណជាង៧% នៃផ្ទៃដីសរុប ប៉ុន្តែកាលពីថ្ងៃទី៣០ ខែតុលា ពេលភាគីថៃកំពុងបោសសម្អាតមីន ក៏មានបញ្ហារារាំងពីកងទ័ពកម្ពុជា ហើយភាគីថៃបានចរចារួចហើយ ។

លទ្ធផលការចរចា គឺកងទ័ពកម្ពុជាសុំឱ្យភាគីថៃបោសសម្អាតមីនតែក្នុងទឹកដីថៃ និងកុំរាយបន្លាលួស ប៉ុន្តែអាចកំណត់សញ្ញាសម្គាល់បាន ខណៈកងទ័ពកម្ពុជាពុំទាន់អាចដោះមីនលើទឹកដីរបស់ខ្លួនបានដោយសារមិនទាន់ទទួលបញ្ជាពីថ្នាក់លើ ។ បន្ទាប់មក នៅថ្ងៃទី១ ខែវិច្ឆិកា ក្រុមអ្នកសង្កេតការណ៍អាស៊ាន (AOT) ប្រចាំប្រទេសថៃបានចុះពិនិត្យមើលការបោសសម្អាតមីននៅតំបន់ច្រកដោះដូរទំនិញ សាយតាគូ ហើយថៃក៏រាយការណ៍ពីលទ្ធផលបោសសម្អាតមីន និងការរារាំងរបស់កងទ័ពកម្ពុជាទៅកាន់ក្រុម AOT ។

កម្ពុជា-ថៃឯកភាពកែសម្រួលអាវុធ និងយុទ្ធោបករណ៍ធុនធ្ងន់ជា ៣ដំណាក់កាល រួមមាន ៖
-១ ៖ មានរយៈពេល ៣សប្តាហ៍ ចាប់ពីថ្ងៃទី១ ដល់ថ្ងៃទី២១ ខែវិច្ឆិកា ឆ្នាំ២០២៥ ក្រោមការសង្កេតការណ៍ និងផ្ទៀងផ្ទាត់ដោយក្រុមអ្នកសង្កេតការណ៍អាស៊ាន (AOT) ។
-២ ៖ មានរយៈពេល ៣សប្តាហ៍ ចាប់ពីថ្ងៃទី២២ ខែវិច្ឆិកា ដល់ថ្ងៃទី១២ ខែធ្នូ ឆ្នាំ២០២៥ ក្រោមការសង្កេតការណ៍ និងផ្ទៀងផ្ទាត់ដោយក្រុមអ្នកសង្កេតការណ៍អាស៊ាន (AOT) និង
-៣ ៖ មានរយៈពេល ៣សប្តាហ៍ ចាប់ពីថ្ងៃទី១៣ ដល់ថ្ងៃទី៣១ ខែធ្នូ ឆ្នាំ២០២៥ ក្រោមការសង្កេតការណ៍ និងផ្ទៀងផ្ទាត់ដោយក្រុមអ្នកសង្កេតការណ៍អាស៊ាន (AOT) ។

គួរបញ្ជាក់ថា ការឯកភាពគ្នាកែសម្រួលអាវុធ និងយុទ្ធោបរណ៍ធុនធ្ងន់ គឺមានគោលបំណងផ្តល់ទំនុកចិត្ត លើកកម្ពស់ការជឿទុកចិត្តគ្នា និងស្ថិរភាពនៅតាមព្រំដែនកម្ពុជា-ថៃ ដើម្បីឆ្ពោះទៅរកសន្តិភាពនាពេលឆាប់ៗ ប៉ុន្តែពលរដ្ឋថៃនៅព្រំដែនមិនគាំទ្រឱ្យកងទ័ពខ្លួនដកថយអាវុធធុនធ្ងន់ ឬដកកងកម្លាំងចេញពីព្រំដែនទេ រហូតដល់ធ្វើរបងព្រំដែនរួចរាល់ ដោយពួកគេចោទប្រកាន់កម្ពុជាមិនស្មោះត្រង់ក្នុងការអនុវត្តតាមកិច្ចព្រមព្រៀងដកអាវុធ ៕