ហ្វីយ៉ាតា បវរកញ្ញាចក្រវាលកម្ពុជាឆ្នាំ២០២៥ បានស្នើទៅដល់មេៗពិនិត្យរឿងស្បៀងក្រោយមានការលើកឡើងថាទីតាំងខ្លះទ័ពមិនបានស្បៀង។ ហ្វីយ៉ាតា លើកឡើងថា អ្នកឈរជើងយកជីវិតទៅដូរពិតប្រាកដត្រូវការស្បៀងនិងថ្នាំសង្កូវឱ្យគ្រប់គ្រាន់ឬហូរហៀរ។
កាលពីថ្ងៃទី១៥ ខែធ្នូ ហ្វីយ៉ាតា បានចែករំលែកការបង្ហោះមួយដែលកងទ័ពនិយាយថាស្បៀងមិនដល់ដៃពួកគាត់ដោយបវរកញ្ញារូបនេះបានសរសេរថា «ខ្ញុំឮបែបនេះមកច្រើនគួរសម… តើរឿងនេះយ៉ាងមិចឱ្យពិតប្រាកដ? មានអ្នកណាអាចបកស្រាយឱ្យពួកខ្ញុំជាប្រជាជនខ្មែរដែលបានសាមគ្គីគ្នាសឹងរាល់ថ្ងៃ ឱ្យបានដឹងច្បាស់ហើយបានរំសាយចិត្តទេ? ពួកយើងមិនចង់បានគុណអ្វីទេ តែគ្រាន់តែចង់ច្បាស់ចិត្តថាបងៗកងទ័ពពិតបានទទួលនៅអ្វីដែលប្រជាជនយើងខំរៀបចំជូនពួកគាត់ទាំងយប់ថ្ងៃ… មេៗមេត្តាជួយពិនិត្យម្ដងទៀតផងចុះ ពួកខ្ញុំពិតបារម្ភណាស់»។ 
ការលើកឡើងរបស់ ហ្វីយ៉ាតា ដែលស្នើឱ្យមានការពិនិត្យទៅលើបញ្ហានេះមានអ្នកលេងបណ្តាញសង្គមជាច្រើនបានបញ្ចេញមតិថារឿងនេះគឺជាការពិត។
នៅព្រឹកថ្ងៃទី១៦ ខែធ្នូ នេះ បន្ទាប់ពីយោធាថៃនៅតែបន្តការវាយប្រហារ ហ្វីយ៉ាតា បានទទូចឱ្យថ្នាក់លើពិនិត្យមើលស្បៀងកងទ័ពជួរមុខពីព្រោះទីតាំងខ្លះកងទ័ពពុំទទួលបាននោះទេ។ ហ្វីយ៉ាតា បានចែករំលែកពីការឈ្លានពានរបស់ថៃមកលើកម្ពុជាដោយភ្ជាប់មកជាមួយខ្លឹមសារថា «ពួកវាមិនឈប់ទេ ចឹងសុំមេត្តា មេៗពិនិត្យរឿងស្បៀង ថាហេតុអីបាន នៅទីតាំងខ្លះ កងទ័ពមិនទទួលបាមស្បៀង? ហើយបងប្អនយើង ទាំងអ្នកល្បី រឺមិនល្បី សុំជួយគ្នាស្រែកសួររឿងនេះទាំងអស់គ្នា.. ព្រោះអ្នកឈរជើងយកជីវិតទៅដូរពិតប្រាកដ ត្រូវការស្បៀង នឹងថ្នាំសង្កូវអោយគ្រប់គ្រាន់ រឺហូរហៀរ..»។
គួរបញ្ជាក់ផងដែរថា ហ្វីយ៉ាត ក៏កំពុងតែដុតដៃដុតជើងយ៉ាងសស្រាក់សស្រាំកៀងគរថវិកាពីសប្បុរជនមកជួយដល់ជនភៀសសឹករួមទាំងកងទ័ពជួរមុខដូចគ្នា៕
