សហរដ្ឋអាមេរិក ៖ រដ្ឋាភិបាលអាមេរិកក្រោមការដឹកនាំរបស់លោកប្រធានាធិបតី Donald Trump នឹងដំឡើងពន្ធទំនិញនាំចូលពីចិនម្តងទៀត បើរដ្ឋាភិបាលក្រុងប៉េកាំងក្រឡាស់សម្តី និងនៅតែរឹតបន្តឹងការនាំចេញរ៉ែកម្រ ។ នេះបើតាមការលើកឡើងរបស់រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent កាលពីថ្ងៃទី២ ខែវិច្ឆិកា ឆ្នាំ២០២៥ ក្រោយពីប្រធានាធិបតីអាមេរិកបានជួបគ្នាជាមួយប្រធានាធិបតីចិន លោក Xi Jinping នៅមូលដ្ឋានទ័ពអាកាសគីមហេ ទីក្រុងពូសាន ប្រទេសកូរ៉េខាងត្បូង ដើម្បីចរចាពីការបញ្ចប់ជម្លោះពាណិជ្ជកម្ម ។

រដ្ឋាភិបាលចិនបានចេញសេចក្តីថ្លែងការណ៍កាលពីថ្ងៃទី៣០ ខែតុលា ថា នឹងផ្អាកការរឹតបន្តឹងការនាំចេញរ៉ែកម្រ និងបច្ចេកវិទ្យារ៉ែកម្ររយៈពេល១ឆ្នាំ ប៉ុន្តែរដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent បានសម្ភាសន៍ជាមួយសារព័ត៌មានដោយបង្ហាញក្តីបារម្ភពីរដ្ឋាភិបាលចិនតែងតែមិនអនុវត្តតាមការសន្យារបស់ខ្លួនជាច្រើនលើក និងគ្មានភាពស្មោះត្រង់ ។ លោកថា មានការជីកយករ៉ែកម្រនៅប្រទេសជាច្រើន រួមទាំងអាមេរិក ប៉ុន្តែចិនជាអ្នកគ្រប់គ្រងផ្តាច់មុខលើការកែច្នៃរ៉ែទាំងនេះសម្រាប់ប្រើប្រាស់ក្នុងឧស្សាហកម្ម ។

ចិនផ្អាកការរឹតបន្តឹងការនាំចេញរ៉ែកម្រ គឺក្រោយពីប្រធានាធិបតីអាមេរិក លោក Donald Trump បានប្រជុំជាមួយប្រធានាធិបតីចិន លោក Xi Jinping កាលពីថ្ងៃទី៣០ ខែតុលា កន្លងមក នៅកូរ៉េខាងត្បូង ។ ទោះយ៉ាងណា វិធានការរឹតបន្តឹងការនាំចេញរ៉ែកម្រនាពេលកន្លងមករបស់រដ្ឋាភិបាលចិននឹងអនុវត្តបន្តទៀត ប៉ុន្តែតាមកិច្ចព្រមព្រៀង និងមិត្តភាពរវាងមេដឹកនាំមហាអំណាចទាំងពីរ លោក Scott Bessent រំពឹងអាមេរិកនឹងអាចពឹងពាក់លើរ៉ែកម្រចិន បើចិនក្រឡាស់សម្តី អាមេរិកនឹងដំឡើងពន្ធទំនិញចិនម្តងទៀត អាមេរិកមិនចង់ទាញយកផលប្រយោជន៍ពីចិនទេ ប៉ុន្តែចង់កាត់បន្ថយបញ្ហាប្រឈម ។

រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent បានចោទប្រកាន់រដ្ឋាភិបាលអាមេរិកអាណត្តិមុនធ្វេសប្រហែសក្នុងការបំពេះតួនាទី ដែលបណ្តោយឱ្យចិនប្រមូលផ្តុំ និងរៀបចំយុទ្ធសាស្ត្ររ៉ែកម្រជាច្រើនឆ្នាំ ប៉ុន្តែរដ្ឋាភិបាលរបស់លោកប្រធានាធិបតី Donald Trump នឹងធ្វើឱ្យអាមេរិកគេចផុតពីបញ្ហានេះដែលចិនមានប្រៀបជាងអាមេរិក ។

កិច្ចព្រមព្រៀងរវាងអាមេរិក-ចិនដែលត្រូវបានប្រកាស ក្នុងនោះមានអាមេរិកនឹងទម្លាក់ពន្ធទំនិញនាំចូលពីចិន១០% មកនៅត្រឹមតែ៤៧% ហើយកិច្ចព្រមព្រៀងនេះក៏បានកំណត់ឱ្យចិត្តចាត់វិធានការផ្សេងៗដើម្បីរឹតបន្តឹងមិនឱ្យថ្នាំញៀន Fentanil ហូរចូលអាមេរិក ដោយសារវាជាថ្នាំបំបាត់ការឈឺចាប់កម្រិតខ្លាំងបណ្តាលឱ្យពលរដ្ឋអាមេរិកបាត់បង់ជីវិតរាប់ម៉ឺននាក់ ។

គួរបញ្ជាក់ថា លោក Trump បានចុះ MOU រ៉ែកម្រជាមួយបណ្តាប្រទេសមួយចំនួនក្នុងតំបន់អាស៊ី រួមទាំងជប៉ុន ស្របពេលអាមេរិកមានជម្លោះពាណិជ្ជកម្មជាមួយចិន និងរីករាលដាលដល់រ៉ែកម្រ ខណៈចិនមានរ៉ែកម្រច្រើនលំដាប់ទី១ លើពិភពលោក ។ ក្រោយចិនរឹតបន្តឹងការនាំចេញរ៉ែកម្រដ៏សំខាន់របស់ខ្លួន លោក Trump ក៏ដំឡើងពន្ធទំនិញចិនបន្ថែម១០០% ដែលអត្រាពន្ធថ្មីនេះ ចាប់ផ្តើមអនុវត្តចាប់ពីថ្ងៃទី១ ខែវិច្ឆិកា ឆ្នាំ២០២៥ ដែលធ្វើឱ្យចិនខឹងសម្បារ និងព្រមានសងសឹកវិញ ៕

ចក្រភពអង់គ្លេស៖ ស្ដេច Charles III ដែលជាព្រះមហាក្សត្ររបស់ចក្រភពអង់គ្លេសបច្ចុប្បន្ន បានដកងារជាខ្សែរាជវង្ស និងឋានៈគ្រប់បែបយ៉ាងទាំងអស់ពីព្រះអង្គម្ចាស់ Andrew ជាព្រះអានុជបង្កើតរបស់ទ្រង់។ ការអនុវត្តច្បាប់ដ៏ខ្លាំងក្លាមិនធ្លាប់មានពីមុនមកនេះ កើតឡើងបន្ទាប់ពីព្រះអង្គម្ចាស់ Andrew ជាប់ពាក់ព័ន្ធនឹងរឿងអា.ស្រូ.វដ៏ធំ ធ្វើឲ្យប៉ះពាល់ដល់កិត្តិយសរបស់ខ្សែរាជវង្សនៃចក្រភពអង់គ្លេស។

យោងតាមការចុះផ្សាយរបស់ទីភ្នាក់ងារ BBC នៅថ្ងៃទី៣១ ខែតុលា ឆ្នាំ២០២៥ បានឲ្យដឹងថា ព្រះអង្គម្ចាស់ Andrew ដែលជាបុត្រាមួយអង្គរបស់ម្ចាស់ក្សត្រី Elizabeth នឹងលែងត្រូវបានគេទទួលស្គាល់ថាជាព្រះអង្គម្ចាស់ ឬជាព្រះរាជបុត្រាក្នុងចំណោមងារផ្សេងទៀត ទៀតហើយ។ ផ្ទុយទៅវិញ ព្រះអង្គនឹងក្លាយជាមនុស្សសាមញ្ញាធម្មតា ដែលមានឈ្មោះថា Andrew Mountbatten Windsor។

ការសម្រេចចិត្តរបស់វិមាន Buckingham របស់ចក្រភពអង់គ្លេសក្នុងការដកហូតងាររាជវង្ស និងឋានៈយោធាទាំងអស់របស់លោក Andrew ធ្វើឡើងក្រោយពេលគេរកឃើញថាលោកមានទំនាក់ទំនងជាមួយ Jeffrey Epstein ដែលជាឪយ៉ែមនៅក្នុងសង្គមអភិជនដ៏មានឥទ្ធិពល។ រឿងអាស្រូ.វរវាងលោក Andrew និងលោក Epstein បានជំរុញឲ្យសាធារណជនដាក់សម្ពាធលើព្រះបរមរាជវាំងឲ្យចាត់វិធានការផ្នែកច្បាប់កាន់តែខ្លាំងឡើង ដោយចោទប្រកាន់ព្រះអង្គពីបទប្រព្រឹត្តខុសផ្លូវ.ភេទ នៅក្នុងសំណុំរឿងរដ្ឋប្បវេណីមួយនៅសហរដ្ឋអាមេរិក។

គួរជម្រាបថា លោក Andrew Mountbatten-Windsor ដែលត្រូវបានគេស្គាល់ថាជាអតីតព្រះអង្គម្ចាស់ Andrew ចាប់ពីពេលនេះតទៅ គឺជាបុត្រាទីពីររបស់ម្ចាស់ក្សត្រី Elizabeth II និងព្រះអង្គម្ចាស់ Philipកើតនៅឆ្នាំ 1960។ លោកធ្លាប់មានងារជា Duke of York និងបានបម្រើការនៅក្នុងកងទ័ពជើងទឹករាជវង្ស មុនពេលទទួលភារកិច្ចកាន់ការងាររបស់រាជវង្ស។ ទោះជាយ៉ាងណា លោកបានបាត់បង់ងារជារាជវង្ស និងតួនាទីសាធារណៈទាំងអស់របស់ទ្រង់នៅឆ្នាំ 2025 ដោយសារតែទំនាក់ទំនងរបស់ទ្រង់ជាមួយមេជួ.ញដូរផ្លូវភេ.ទ Jeffrey Epstein និងភាពចម្រូងចម្រាសផ្នែកច្បាប់ពាក់ព័ន្ធជាច្រើនទៀត។

ការដកលោក Andrew ចេញពីខ្សែរាជវង្សបានបង្ហាញពីវិធានការវិន័យដ៏ធ្ងន់ធ្ងរបំផុតមួយដែលមិនធ្លាប់មានប្រឆាំងនឹងរាជវង្សជាន់ខ្ពស់ នៅក្នុងប្រវត្តិសាស្ត្រអង់គ្លេសសម័យទំនើបនេះ។ ការផ្លាស់ប្តូរនេះ គូសបញ្ជាក់ពីការប្តេជ្ញាចិត្តព្រះមហាក្សត្រ និងមន្រ្តីជាន់ខ្ពស់អង់គ្លេស ក្នុងការការពារកេរ្តិ៍ឈ្មោះរបស់រាជាធិបតេយ្យ ចំពេលមានការត្រួតពិនិត្យកាន់តែខ្លាំងឡើង និងការទាមទារឱ្យមានការទទួលខុសត្រូវ៕

ទោះជាកម្ពុជា-ថៃបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី ហើយប្រទេសទាំងពីរបានឯកភាពកែសម្រួលអាវុ.ធ និងយុទ្ធោបករណ៍ធុនធ្ងន់ជា៣ដំណាក់កាលដើម្បីកសាងទំនុកចិត្ត លើកកម្ពស់ការជឿទុកចិត្តគ្នា និងស្ថិរភាពនៅតាមព្រំដែនកម្ពុជា-ថៃ ប៉ុន្តែពលរដ្ឋថៃនៅព្រំដែនកើតទុក្ខមិនសុខចិត្ត និងស្តីបន្ទោសនាយករដ្ឋមន្ត្រីរបស់ខ្លួនដែលយល់ព្រមចុះហត្ថលេខាសន្តិភាព ទាំងដែលថៃមិនទាន់ដណ្តើមបានទឹកដី និងប្រាសាទរបស់កម្ពុជា ។

ពលរដ្ឋខេត្តសុរិន្ទកើតទុក្ខមិនសុខចិត្តយ៉ាងខ្លាំងដែលកងទ័ពថៃមិនអាចដណ្តើមប្រាសាទតាក្របីមកគ្រប់គ្រង និងខឹងសម្បារលោកនាយករដ្ឋមន្ត្រី Anutin Charnvirakul ដែលនិយាយថា ពលរដ្ឋថៃល្មើសអធិបតេយ្យកម្ពុជានៅព្រំដែនខេត្តស្រះកែវ បើចង់ឱ្យពលរដ្ឋខ្មែរចាកចេញពីតំបន់ភូមិជោគជ័យ និងភូមិព្រៃចាន់ គឺពលរដ្ឋថៃក៏ត្រូវរុះរើលំនៅឋានដែលសាងសង់លើទឹកដីកម្ពុជាដែរ ដើម្បីយុត្តិធម៌ទាំងសងខាង ។ ពលរដ្ឋសុរិន្ទមិនព្រមដាច់ខាត ហើយនឹងធ្វើគ្រប់វិធីដើម្បីដណ្តើមប្រាសាទតាក្របី ដោយពួកគេបានណាត់គ្នាទាមទារយកប្រាសាទនេះនៅថ្ងៃទី៧ ខែវិច្ឆិកា ខាងមុខ ។

តាមការចុះផ្សាយរបស់សារព័ត៌មាន Amarin News កាលពីថ្ងៃទី២ ខែវិច្ឆិកា ពលរដ្ឋថៃនៅព្រំដែន ជាពិសេស ពលរដ្ឋសុរិន្ទ មិនយល់ព្រមដាច់ខាតដែលកងទ័ពថៃមិនអាចដណ្តើមប្រាសាទតាក្របីមកគ្រប់គ្រង និងខឹងសម្បារនាយករដ្ឋមន្ត្រីថៃដែលនិយាយថា ពលរដ្ឋថៃល្មើសអធិបតេយ្យកម្ពុជា ។ បើទោះជាសុរិន្ទ គឺជាអតីតខេត្តរបស់កម្ពុជាដែលត្រូវបានថៃដណ្តើមយកទៅ ប៉ុន្តែពលរដ្ឋសុរិន្ទគាំទ្រថៃ១០០% និងញុះញង់ឱ្យកងទ័ពថៃធ្វើសង្គ្រាមដណ្តើមប្រាសាទតាក្របី ពីព្រោះបើមិនធ្វើសង្គ្រាម ថៃគ្មានថ្ងៃដណ្តើមបានប្រាសាទទេ ។

ពលរដ្ឋថៃនៅព្រំដែន អ្នកស្រី អើយ រ៉ាក់សាក់ប្រាខូន អាយុ៦៩ឆ្នាំ សោកស្តាយយ៉ាងខ្លាំងដែលកងទ័ពថៃមិនអាចដណ្តើមប្រាសាទតាក្របីរបស់កម្ពុជា និងកាន់តែខឹងសម្បារខ្លាំងឡើងក្រោយពីលោកនាយករដ្ឋមន្ត្រី Anuti និយាយថា ពលរដ្ឋថៃល្មើសអធិបតេយ្យកម្ពុជានៅព្រំដែនខេត្តស្រះកែវ និងឱ្យចាកចេញពីទឹកដីកម្ពុជា រដ្ឋាភិបាលថៃនឹងរកទីកន្លែងថ្មីឱ្យរស់នៅ ។ អ្នកដឹកនាំនិយាយបែបនេះ ខ្លួនមិនអាចទទួលយកបានទេ ខណៈពលរដ្ឋនៅព្រំដែនផ្សេងទៀតក៏ចង់ឱ្យថៃគ្រប់គ្រងប្រាសាទតាក្របីដែរ ថែមទាំងចោទប្រកាន់កងទ័ពកម្ពុជាល្មើសអធិបតេយ្យថៃ ។

នៅថ្ងៃទី៧ ខែវិច្ឆិកា ខាងមុខ អ្នកស្រីចង់ចូលរួមជាមួយពលរដ្ឋសុរិន្ទដែលណាត់គ្នាទាមទារប្រាសាទតាក្របី ប៉ុន្តែបើមានធុរៈមិនបានទៅចូលរួម អ្នកស្រីនឹងទិញទឹកបរិសុទ្ធផ្តល់ឱ្យក្រុមតវ៉ា ។ បើអនាគត កងទ័ពថៃប៉ះទង្គិចគ្នាជាមួយកងទ័ពកម្ពុជាម្តងទៀត ពលរដ្ឋសុរិន្ទនឹងរួមកម្លាំងជាមួយកងទ័ពថៃប្រឆាំងកម្ពុជា ដោយស្ត្រីរូបនេះចោទប្រកាន់កម្ពុជាពុំអាចទុកចិត្តបាន និងមិនអនុវត្តតាមការព្រមព្រៀង ព្រមទាំងផ្តាំផ្ញើទៅនាយករដ្ឋមន្ត្រីថៃរកវិធីដណ្តើមប្រាសាទតាក្របី ។

ដូចគ្នានេះ ពលរដ្ឋថៃផ្សេងទៀតថា ប្រាសាទតាក្របីជារបស់ថៃ ប៉ុន្តែពេលនេះ កងទ័ពកម្ពុជាគ្រប់គ្រងដែលធ្វើឱ្យពលរដ្ឋថៃមិនបានឡើងលើប្រាសាទ ដោយពួកគេទាមទារឱ្យរដ្ឋាភិបាលថៃទាមទារប្រាសាទតាក្របីពីកម្ពុជា ។ ពលរដ្ឋថៃម្នាក់ឈ្មោះ អ ផៃរ៉ាត់ បានបង្ហោះសារក្នុងបណ្តាញសង្គមពីការប្រមូលផ្តុំពលរដ្ឋថៃទាមទារប្រាសាទតាក្របីនៅថ្ងៃទី៧ ខែវិច្ឆិកា ដោយជួបជុំគ្នានៅសាលារៀនខូកតាខៀន ព្រមទាំងមានការច្រៀងចម្រៀងស្នេហាជាតិផងដែរ ។

គួរបញ្ជាក់ថា អ្នកសារព័ត៌មានថៃបានសួរនាំលោក វីរៈយុទ្ធ រ៉ាក់ស៊ីន មេបញ្ជាការកងទ័ពភូមិភាគទី២ ពីបញ្ហាប្រាសាទតាក្របី ប៉ុន្តែលោកមិនបាននិយាយអ្វីទៅកាន់អ្នកសារព័ត៌មានទេ ។ ភាពស្ងាត់ស្ងៀមបែបនេះធ្វើឱ្យពលរដ្ឋថៃសន្និដ្ឋានថា លោក វីរៈយុទ្ធ ក៏មានបំណងមិនខុសពីពួកគេ គ្រាន់តែមិននិយាយពីកិច្ចការកងទ័ព ដែលត្រូវលាក់កាណ៍ជាអាថ៌កំបាំងមិនឱ្យបែកធ្លាយ ៕

លោក ដូណាល់ ត្រាំ បានគំរាមដាក់ទ័ពវាយប្រហារប្រទេសនីហ្សេរីយ៉ា ក្រោយពីមានការសម្លាប់រង្គាលគ្រិស្តសាសនិក ពីសំណាកក្រុមភេរវករឥស្លាម។

ប្រធានាធិបតីអាមេរិករូបនេះ បានបង្ហោះសារនៅលើបណ្តាញសង្គម Truth Social ថា៖”ប្រសិនបើរដ្ឋាភិបាលនីហ្សេរីយ៉ា មិនអើពើលើការសម្លាប់គ្រិស្តសាសនិកទៀតនោះ អាមេរិកនឹងធ្វើអន្តរាគមន៍យោធា និងបញ្ឈប់ជាបន្ទាន់នូវជំនួយឧបត្ថម្ភទាំងអស់”។

សហគមន៍គ្រិស្តសាសនិកនៅភាគឦសានប្រទេសនីហ្សេរីយ៉ា តែងតែរងការវាយប្រហារជាញឹកញាប់ ពីសំណាកក្រុមភេរវករឥស្លាម Boko Haram និង Islamic State West Africa Province (ISWAP)។

ក្រុមទាំង២នេះ តែងបើកការវាយប្រហារសម្លាប់មនុស្ស និងបំផ្លាញព្រះវិហារជាច្រើន រហូតឈានដល់សភាអាមេរិកយល់ឃើញថា ជាការប្រល័យពូជសាសន៍គ្រិស្តសាសនិកនៅហ្សេរីយ៉ា។

គួរបញ្ជាក់ថា ចាប់តាំងពីឆ្នាំ២០០៩ ដល់ឆ្នាំ២០២៥ គ្រិស្តសាសនិកប្រមាណជា ១២៥ ០០០នាក់ ត្រូវបានសម្លាប់នៅនីហ្សេរីយ៉ា៕

ទីក្រុងបាងកក៖ លោក អនុទីន ឆាន់វីរៈគុល បានបញ្ជាក់ថា ដរាបណាលោកនៅកាន់តំណែងជានាយករដ្ឋមន្រ្តីថៃ នោះនឹងគ្មានការច្រកព្រំដែនជាមួយកម្ពុជាដោយគ្មានការអនុញ្ញាតពីសាធារណជនឡើយ។ លោកអនុទីន បន្ថែមថា រដ្ឋាភិបាលថៃនឹងមិនបើកព្រំដែនឡើងវិញនោះទេ បើកង្វល់ទាំងអស់ ជាពិសេសទាក់ទងនឹងសុវត្ថិភាព និងសុខភាពរបស់ពលរដ្ឋនៅតាមព្រំដែននៅតែមាន។

យោងតាមសារព័ត៌មាន The Naipn ក្រោយវិលត្រឡប់ពីកិច្ចប្រជុំកំពូល APEC នៅប្រទេសកូរ៉េខាងត្បូង នៅថ្ងៃអាទិត្យទី២ ខែវិច្ឆិកា ឆ្នាំ២០២៥ លោកអនុទីន បានថ្លែងទៅកាន់អ្នកសារព័ត៌មានដោយបញ្ជាក់ពីជំហររបស់ខ្លួនថា ការសម្រេចចិត្តណាមួយ ក្នុងការបើកព្រំដែនថៃជាមួយកម្ពុជាឡើងវិញ នឹងត្រូវធ្វើឡើងបានលុះត្រាតែមានការពិគ្រោះយោបល់យ៉ាងហ្មត់ចត់ជាមួយសាធារណជន និងអាជ្ញាធរមូលដ្ឋានជាមុនសិន។

លោកបានសង្កត់ធ្ងន់ថា ប្រសិនបើលោកនៅតែមានតំណែងក្នុងរដ្ឋាភិបាល នោះនឹងមិនមានច្រកព្រំដែនណាមួយ នឹងបើកឡើងវិញដោយគ្មានការយល់ព្រមពីសាធារណជនឡើយ។ រដ្ឋាភិបាលថៃត្រូវតែស្ដាប់ប្រជាពលរដ្ឋជាមុនសិន ហើយត្រូវធានាថា ការសម្រេចចិត្តបើកព្រំដែនឡើងវិញនឹងមិនបង្កហានិភ័យដល់សន្តិសុខជាតិ»។

គួររំលឹកថា កាលពីសប្ដាហ៍មុន លោក អនុទីន បានច្រានចោលនូវរាល់ពាក្យចចាមអារ៉ាមដែលចេញផ្សាយថា រដ្ឋាភិបាលថៃនឹងបើកព្រំដែនជាមួយកម្ពុជាឡើងវិញក្នុងខែវិច្ឆិការនេះ ដោយលោកបានអះអាងថា លោកមិនបានពិភាក្សាពីបញ្ហានេះនោះទេ។

ដោយឡែកបើតាមការបញ្ជាក់របស់ប្រមុខរាជរដ្ឋាភិបាលកម្ពុជាកន្លងមកបានឲ្យដឹងថា ទាក់ទងនឹងការបើកព្រំដែនឡើងវិញ វាមិនមែនជារឿងអ្វីដែលស្មុគស្មាញឡើយ។ ថៃជាអ្នកបិទដោយឯកតោភាគី ដូច្នេះថៃគ្រាន់តែបើកឡើងវិញដោយឯកតោភាគី នោះកម្ពុជានឹងធ្វើការបើកវិញដូចគ្នានៅប៉ុន្មានម៉ោងក្រោយ ដោយមិនចាំបាច់មានការចរចាអ្វីទាំងអស់។

បើតាមអ្នកជំនាញផ្នែកទំនាក់ទំនងអន្តរជាតិ លោកបណ្ឌិត ដេត សុខឧត្តម បានកត់សម្គាល់ឃើញថា ប្រសិនបើរដ្ឋាភិបាលថៃមានសិទ្ធិអំណាចពេញលេញក្នុងការសម្រេចចិត្ត នោះថៃនឹងបើកព្រំដែនឡើងវិញ ព្រោះថៃមិនចង់ឃើញការខាតបង់ផ្នែកសេដ្ឋកិច្ចដោយសារការបន្តបិទព្រំដែនជាមួយកម្ពុជានោះទេ។ ប៉ុន្តែដោយសារយោធាថៃនៅតែចង់រក្សាឥទ្ធិពលនយោបាយនៅក្នុងជម្លោះព្រំដែនកម្ពុជា និងថៃ ដូច្នេះទ្វារព្រំដែន នឹងមិនបើកឡើងវិញដោយងាយនោះទេ ហើយអ្វីដែលរដ្ឋាភិបាលថៃអាចធ្វើបាន គឺជំរុញឲ្យកម្ពុជាគោរពតាមខ្លឹមសារនៃសេចក្តីថ្លែងការណ៍រួមដែលសម្រេចបានថ្មីៗនេះនៅក្នុងប្រទេសម៉ាឡេស៊ី ដូចជាការដកអាវុធធុនធ្ងន់ចេញពីព្រំដែន៕

ប្រទេសថៃ ៖ ទោះជាសមាជិកព្រឹទ្ធសភា ប្រធានគណបក្សប្រឆាំង និងមន្ត្រីសិទ្ធិមនុស្សនៅប្រទេសថៃ ចាត់ទុកការបើកសំឡេងខ្លាំងៗរបស់ Influencer កាន់ ចមផ្លាំង ដូចជា ៖ សំឡេងខ្មោច យន្តហោះចម្បាំង និងឆ្កែលូ រំខានដំណេកពលរដ្ឋខ្មែរ គឺជាការរំលោ.ភសិទ្ធិមនុស្សយ៉ាងធ្ងន់ធ្ងរ រំខានសុខភាពផ្លូវកាយ ផ្លូវចិត្តកុ.មារ ស្ត្រី ចាស់ជរា អ្នកជំងឺ ជនពិការ ក៏ដូចជាបំពានលើបទឈប់បា.ញ់ និងគោលការណ៍ធម្មនុញ្ញអង្គការសហប្រជាជាតិ ប៉ុន្តែបុគ្គលនេះទទួលបានការគាំទ្រយ៉ាងខ្លាំងពីសង្គមថៃ ជាពិសេស ក្រុមជ្រុលនិយម ថែមទាំងមានអ្នកប្រគល់ពានរង្វាន់ «បុគ្គលមានប្រយោជន៍ដល់សង្គម» ឱ្យ Influencer ទៀតផង ។

តាមការចុះផ្សាយរបស់សារព័ត៌មាន Thairath នៅថ្ងៃទី២ ខែវិច្ឆិកា ឆ្នាំ២០២៥ Influencer កាន់ ចមផ្លាំង បានទទួលពានរង្វាន់ «បុគ្គលមានប្រយោជន៍ដល់សង្គម» ក្រោយពីបង្កសកម្មភាពអុកឡុក និងចាក់សំឡេងខ្លាំងៗរំខានពលរដ្ឋខ្មែរនៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ (ទល់មុខភូមិណងចាន់ និងភូមិណងយ៉ាកែវ ឃុំឃូកសូង ខេត្តស្រះកែវ) ។ សកម្មភាពរំលោភសិទ្ធិមនុស្សរបស់បុគ្គលនេះដែលអន្តរជាតិមិនឱ្យតម្លៃ បែរជាសង្គមថៃគាំទ្រលើកតម្កើងជាវីរបុរសក្លាហាន និងប្រគល់ពានរង្វាន់ «បុគ្គលមានប្រយោជន៍ដល់សង្គម» និងជំរុញឱ្យធ្វើសកម្មភាពរំខានពលរដ្ឋខ្មែរបន្តទៀត ។

ក្រោយពីទទួលបានពានរង្វាន់ «បុគ្គលមានប្រយោជន៍ដល់សង្គម» ពីក្រុមសិល្បករសង្គមច្នៃប្រឌិតនៅប្រទេសថៃ កាន់ ចមផ្លាំង និយាយថា បើមានឱកាស ខ្លួននឹងត្រឡប់មកធ្វើសកម្មភាពរំខានពលរដ្ឋខ្មែរនៅព្រំដែនខេត្តស្រះកែវឡើងវិញ រួមទាំងអរគុណដល់អ្នកគាំទ្រផងដែរដែលជំរុញឱ្យខ្លួនធ្វើសកម្មភាពនៅព្រំដែន ។

កាលពីថ្ងៃទី២ ខែវិច្ឆិកា កាន់ ចមផ្លាំង បានបង្ហោះរូបភាព និងសរសេរក្នុងហ្វេសប៊ុកថា «ក្រុមសិល្បករសង្គមច្នៃប្រឌិតបានប្រគល់ពានរង្វាន់ឱ្យខ្ញុំ ខណៈពេលនេះ មានទាំងអ្នកស្រឡាញ់ និងអ្នកមិនចូលចិត្ត ។ ពីដំបូង គិតថាឈប់ធ្វើសកម្មភាពនៅព្រំដែនទៀតហើយ ប៉ុន្តែសង្គមបានគាំទ្រឱ្យធ្វើសកម្មភាពបន្តទៀត បើមានឱកាស នឹងធ្វើសកម្មភាពនៅព្រំដែនខេត្តស្រះកែវឡើងវិញ ដើម្បីកុំឱ្យអ្នកប្រគល់ពានរង្វាន់ឱ្យខកបំណង ។ អរគុណដែលផ្តល់កម្លាំងចិត្តជំរុញឱ្យខ្ញុំចង់ធ្វើសកម្មភាពបន្ត និងអរគុណអ្នកគាំទ្រទាំងអស់ដែលតែងតែជំរុញគ្រប់ពេលវេលា» ។

គួរបញ្ជាក់ថា ទន្ទឹមនឹងមានអ្នកស្រឡាញ់ចូលចិត្ត Influencer រូបនេះក៏រងនូវរិះគន់ពីសង្គមផងដែរ ពាក់ព័ន្ធនឹងការកេងបន្លំប្រាក់មូលនិធិដែលពលរដ្ឋថៃផ្ញើចូលគណនីធនាគារសម្រាប់ធ្វើសកម្មភាពនៅព្រំដែន ដូចជា ៖ រៀបចំលេណដ្ឋាន បន្ទប់ទឹក និងបើកសំឡេងរំខានពលរដ្ឋខ្មែរ ដោយសារចំណាយខុសគោលដៅ និងគ្មានបញ្ជីចំណូល ចំណាយច្បាស់លាស់ ។ មតិភាគច្រើនសង្ស័យថា ប្រមូលប្រាក់មូលនិធិដែល កាន់ ចមផ្លាំង ប្រមូលបានរាប់រយលានបាត គឺពាក់ព័ន្ធនឹងផលប្រយោជន៍របស់រដ្ឋមន្ត្រីក្រសួងកសិកម្ម និងយកទៅទិញរថយន្តទំនើបជិះ រហូតធ្វើឱ្យ កាន់ ចមផ្លាំង ផ្អាកសកម្មភាពនៅព្រំដែនមួយរយៈ ។

ទោះយ៉ាងណា ពលរដ្ឋថៃនៅព្រំដែនគាំទ្រ កាន់ ចមផ្លាំង និងប្រាប់ឱ្យមកធ្វើសកម្មភាពរំខានពលរដ្ឋខ្មែរបន្ត ដោយពួកគេថា សមាជិកព្រឹទ្ធសភា និងមន្ត្រីសិទ្ធិមនុស្ស បានតែរិះគន់ប៉ុណ្ណោះ មិនដែលចុះមកមើលពលរដ្ឋនៅព្រំដែនដោយផ្ទាល់ទេ ។ ក្រុមជ្រុលនិយមថៃថែមទាំងរិះគន់ខ្លាំងៗទៅលើសមាជិកព្រឹទ្ធសភា អ្នកស្រី អាំងខាណា នីឡៈផៃជិត ក្រោយពីរិះគន់ Influencer និង និយាយការពិតពីថៃឈ្លានពានកម្ពុជា ដូចជា ៖ បើកសំឡេងរំខានពលរដ្ឋខ្មែរនៅភូមិជោគជ័យ និងភូមិព្រៃចាន់ ដែលជាការរំលោភសិទ្ធិមនុស្សយ៉ាងធ្ងន់ធ្ងរ និងប្រើប្រាស់យន្តហោះចម្បាំង F-16 ទម្លាក់គ្រាប់បែកលើមូលដ្ឋានកងទ័ពកម្ពុជា ៕

តារាចម្រៀង G-Dragon នៃសមាជិក BIGBANG បានធ្វើឱ្យអ្នកគាំទ្រ (VIP) បង្ហាញអារម្មណ៍រំភើបរីករាយនិងមានមោទនភាពយ៉ាងខ្លាំងបន្ទាប់ពីតារាចម្រៀងរូបនេះបានសម្តែងបទចម្រៀង Kpop នៅពីមុខមេដឹកនាំកំពូលៗនៅក្នុងកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក(APEC)។

កិច្ចប្រជុំ APEC ស្វាគមន៍អាហារពេលល្ងាចត្រូវបានប្រារព្ធឡើងនៅ Lahan Hotel Grand Ballroom ក្នុងទីក្រុង Gyeongju នៅថ្ងៃទី៣១ តុលា។ បន្ទាប់ពីទទួលទានអាហារពេលល្ងាច ការសំដែងវប្បធម៌ក្រោមប្រធានបទ «Journey of Butterfly: Together, We Fly» ត្រូវបានបង្ហាញ។ G-Dragon គឺជាសិល្បករ K-pop តែម្នាក់គត់ដែលបានសម្តែងនៅទីនេះដោយបានសម្តែងរយៈពេល ១០ នាទី។

G-Dragon បានណែនាំខ្លួនយ៉ាងខ្លីដោយនិយាយថា«ខ្ញុំគឺ G-Dragon ដែលជាទូតសុឆ្ឆនៈផ្សព្វផ្សាយសម្រាប់ APEC 2025» ហើយបានចាប់ផ្តើមជាមួយនឹងបទ «Power» ដែលជាបទបានចេញផ្សាយកាលពីខែតុលា ឆ្នាំ២០២៤។ គួរកត់សម្គាល់ថា G-Dragon បានទាក់ទាញការចាប់អារម្មណ៍ជាមួយនឹងការតុបតែងខ្លួនដោយមានគុជខ្យង និងមួកបែបប្រពៃណីកូរ៉េ។ រូបរាងរបស់តារាចម្រៀងវ័យ៣៧ឆ្នាំរូបនេះក៏បានរំលឹក Jinwoo ពីក្រុម Saja Boys នៅក្នុងគំនូរជីវចល «KPop Demon Hunters»ផងដែរ។ លោកបានបន្តបង្កើនបរិយាកាសជាមួយនឹងបទចម្រៀងបន្តទៀតគឺបទ “Drama” “Home Sweet Home” ។

ថ្នាក់ដឹកនាំបានឆ្លើយតបយ៉ាងរីករាយ។ ប្រធានាធិបតីកូរ៉េ Lee Jae-myung បានទស្សនាការសម្តែងរបស់ G-Dragon ពេលកំពុងសន្ទនាជាមួយប្រធានាធិបតីចិន Xi Jinping ។ នាយករដ្ឋមន្ត្រីកាណា រដ្ឋមន្ត្រីការបរទេសឈីលី និងថ្នាក់ដឹកនាំផ្សេងទៀតបានថតការសម្តែងរបស់ G-Dragon។ ក្រៅពី G-Dragon កម្មវិធីជប់លៀងអាហារពេលល្ងាចនេះក៏មានវត្តមានរបស់ Cha Eun-woo ធ្វើជាពិធីករផងដែរ។

អាហារពេលល្ងាចនេះមានការចូលរួមពីភ្ញៀវចំនួន ៤០០ នាក់ រួមទាំងប្រធានាធិបតីដឹកនាំកូរ៉េ ចិន និងមេដឹកនាំរួមទាំងភរិយាមកពីសមាជិក APEC ចំនួន ២១ និងប្រទេសដែលបានអញ្ជើញមកទស្សនាកូរ៉េខាងត្បូងសម្រាប់កិច្ចប្រជុំកំពូល តំណាងអង្គការអន្តរជាតិ នាយកប្រតិបត្តិពិភពលោក និងឥស្សរជនក្នុងស្រុក និងអន្តរជាតិដ៏លេចធ្លោផ្សេងទៀត៕