ចូលធ្វើការថ្ងៃទី១ Elon Musk បញ្ឈប់ក្រុមប្រឹក្សាភិបាល Twitter ទាំងអស់

November 2, 2022

គ្រាន់តែទិញបណ្ដាញសង្គម Twitter បានភ្លាមក្នុងតម្លៃ៤៤ប៊ីលានដុល្លារ លោកអេឡុន ម៉ាស( Elon Musk) បានបណ្ដេញសមាជិកទាំងអស់ចេញពីការងារ ដែលធ្វើឱ្យលោកក្លាយជានាយកតែម្នាក់គត់នៃក្រុមហ៊ុនបណ្ដាញសង្គមដ៏មានឥទ្ធិពលមួយនេះ។ ឯកសាររបស់ក្រុមហ៊ុន Twitter ដែលបានដាក់ទៅកាន់គណៈកម្មការ SEC របស់អាមេរិក។

Elon Musk ដែលជាស្ថាបនិកក្រុមហ៊ុន SpaceX និង TESLA បានចូលកាន់កាប់តំណែងរបស់លោកនៅក្រុមហ៊ុន Twitter កាលពីថ្ងៃព្រហស្បតិ៍ ទី២៧ ខែតុលា ដោយបានបណ្តេញចេញអ្នកដឹកនាំកំពូលៗរបស់ក្រុមហ៊ុន Twitter ជាច្រើនរូប ក្នុងនោះរួមមានទាំងនាយកប្រតិបត្តិ លោក Parag Agrawal និងប្រធានផ្នែកហិរញ្ញវត្ថុ លោក Ned Segal។

បុរសវ័យ៥១ឆ្នាំដែលតាំងខ្លួនជាអ្នកការពារសេរីភាពនៃការបញ្ចេញមតិ ធ្លាប់បានរិះគន់គោលនយោបាយសម្របសម្រួលរបស់ Twitter និងធ្លាប់បានចោទប្រកាន់ក្រុមហ៊ុនបណ្ដាញសង្គមនេះថាលម្អៀងទៅរកក្រុមឆ្វេងនិយម។ យ៉ាងណាក៏ដោយ ចាប់តាំងពីលោក Elon Musk ទិញយកក្រុមហ៊ុន Twitter កាលពីសប្ដាហ៍មុនរួចមក គេនៅពុំទាន់ឮលោកបង្ហើបឱ្យដឹងពីផែនការផ្លាស់ប្ដូរគោលនយោបាយរបស់បណ្ដាញសង្គម Twitter នៅឡើយទេ៕

ប្រភព៖ CNN

៤យ៉ាងអ្នកគួរដឹងមុននឹងចាក់ Filler កុំឱ្យប្រឈមមុខនឹងការខូចទ្រង់ទ្រាយ និង ផលវិបាក

Manil

November 2, 2022

សុខភាព៖ នាយកដ្ឋានឱសថដោយវិទ្យាស្ថានសើស្បែកណែនាំអោយចាក់ថ្នាំ Filler (Filler) ឬចាក់ Fillers ចូលទៅក្នុងស្បែក។ ដើម្បីជួយដោះស្រាយបញ្ហាស្បែក ស្នាមជ្រួញជ្រៅនៅតំបន់ផ្សេងៗនៃមុខ ពិគ្រោះជាមួយគ្រូពេទ្យជំនាញខាងសើស្បែកមុនពេលចាក់ថ្នាំ។ ហើយធ្វើតាមការណែនាំមុន និងក្រោយពេលចាក់ថ្នាំបំពេញ ដើម្បីកាត់បន្ថយលទ្ធភាពនៃការមិនប្រក្រតី ឬផលវិបាកុ។

តើអ្វីជាសារធាតុបំពេញ?

លោកវេជ្ជបណ្ឌិត Manus Phothaphon អគ្គនាយករងនៃនាយកដ្ឋានសេវាវេជ្ជសាស្រ្ដក្នុងប្រទេសថៃ បានផ្តល់ព័ត៌មានថាការចាក់ Filler គឺជាការចាក់ដើម្បីបំពេញបញ្ហាស្បែក ស្នាមជ្រីវជ្រួញជ្រៅនៅតំបន់ផ្សេងៗគ្នានៃ។

ទោះជាយ៉ាងណាការចាក់បំពេញ Filler ក៏អាចមានហានីភ័យប្រសិនបើមិនមានការពិគ្រោះឱ្យបានត្រឹមត្រូវ៖

៤ យ៉ាងដែលអ្នកគួរដឹងមុនពេលចាក់ថ្នាំបំពេញ (Filler)

១. អ្នកគួរតែទៅពិគ្រោះជាមួយវេជ្ជបណ្ឌិតរបស់អ្នកដើម្បីធ្វើរោគវិនិច្ឆ័យអំពីបញ្ហា និងរៀបចំផែនការព្យាបាលសមស្របណាមួយ។

២. ប្រសិនបើអ្នកមានជម្ងឺពីកំណើត ឬអ្នកប្រើថ្នាំ ឬវីតាមីនដែលអ្នកត្រូវការលេបជាប្រចាំ អ្នកគួរតែប្រាប់គ្រូពេទ្យរបស់អ្នកជានិច្ចមុនពេលធ្វើការចាក់បំពេញ Filler។

៣. គួរជ្រើសរើសម៉ាក និង ប្រភេទឧបករណ៍បំពេញ Filler ដែលមានស្តង់ដារ ហើយអាចពិនិត្យមើល ព័ត៌មានលើកញ្ចប់បាន។

៤. គួរពិនិត្យមន្ទីរពេទ្យ ឬគ្លីនិកដែលមានស្តង់ដារ និងមានអាជ្ញាប័ណ្ណត្រឹមត្រូវ។

គ្រោះថ្នាក់នៃការបំពេញមិនស្តង់ដារ

អ្នកស្រី Mingkwan Wichaidit ប្រធានវិទ្យាស្ថានសើស្បែក នាយកដ្ឋានវេជ្ជសាស្ត្របានបន្ថែមថា ការចាក់បំពេញមិនមានលក្ខណៈស្តង់ដារ ចាក់នៅកន្លែងខុស ឬការជ្រើសរើសផលិតផលមិនសមរម្យ នឹងនាំឱ្យមានលំហូរនៃសារធាតុបំពេញក្នុងស្បែកខូចទ្រង់ទ្រាយ ឬហើម ក្រាស់ ហើយ មានផលវិបាកផ្សេង ទៀតដែលអាចនឹងកើតមាន។

អ្នកអាចសង្កេតមើលផលវិបាក ឬ ភាពមិនប្រក្រតីបន្ទាប់ពីចាក់ Filler រួមមាន ៖

១. ពណ៌ស្បែកខុសពីធម្មតានៅកន្លែងព្យាបាល ដូចជាស្លេក ឬក្រហមងងឹត

២. ការឈឺចាប់ ហើម ក្រហម ឬជាំជាងធម្មតា

៣. ស្ពឹក

៤. ហើម ក្រហមទន់ៗ ឬមានខ្ទុះ សង្ស័យថាឆ្លងមេរោគ ឬរលាកស្បែក

ប្រសិនបើអ្នកមានរោគសញ្ញាទាំងនេះ សូមស្វែងរកការព្យាបាលភ្លាមៗ។

ការអនុវត្តបន្ទាប់ពីចាក់ថ្នាំបំពេញ Filler

នាយកវិទ្យាស្ថានសើស្បែក ផ្តល់ដំបូន្មានបន្ថែមទៀតថា បន្ទាប់ពីការចាក់បំពេញអ្នកជៀសវាងការប៉ះពាល់នឹងពន្លឺព្រះអាទិត្យ និងកំដៅ លាបឡេការពារកម្តៅថ្ងៃជាប្រចាំ គួរកុំ ម៉ាស្សាមុខ ឬ ប្រើ ឧបករណ៍ដែលអាចក្តៅ គួរទទួលទាទឹកស្អាតឱ្យបានគ្រប់គ្រាន់។ បន្ថែមពីនោះសង្កេតមើលភាពមិនប្រក្រតីលើមុខជាប្រចាំ ជាពិសេសទីតាំងព្យាបាល និងចាក់បំពេញ Filler ។ ប្រសិនបើអ្នកត្រូវការការណែនាំអំពីការថែទាំស្បែកឱ្យបានត្រឹមត្រូវ និងមានប្រសិទ្ធិភាពគួរតែពិគ្រោះជាមួយគ្រូពេទ្យជំនាញខាងសើស្បែកដោយផ្ទាល់៕ ប្រភព៖ Sanook

ចង់ដឹងទេថា “តើតារាចម្រៀងវណ្ណដា គឺជាអ្វីនៅស្រុកថៃ”

Manil

November 2, 2022

រាជធានីភ្នំពេញ៖ គ្រប់គ្នាច្បាស់ជាបានស្គាល់រួចមកហើយជាមួយនឹងតារាចម្រៀងដ៏មានប្រជាប្រិយភាព និងមានកេរ្តិ៍ឈ្មោះដ៏ល្បីក្នុងបណ្ដាញសង្គមគឺលោក វណ្ណដា ដែលជាតារាចម្រៀង Original song ដ៏ល្បីទូទាំងប្រទេស និងល្បីទៅដល់ប្រទេសក្រៅ ជាពិសេសប្រទេសថៃជាដើម។

ទាក់ទងនឹងកេរ្តិ៍ឈ្មោះល្បីរន្ទឺ ដែលបានមកពីសមត្ថភាព និងទេពកោសល្យរបស់តារាចម្រៀងវ័យក្មេង លោក វណ្ណដា បានធ្វើឱ្យមហាជនក្នុងស្រុកជាច្រើនមានការចាប់អារម្មណ៍ និងគាំទ្រជាខ្លាំង លើសពីនេះមិនត្រឹមតែទទួលបានការគាំទ្រពីក្នុងស្រុក ប៉ុន្តែលោកបានធ្វើឱ្យបរទេស ជាពិសេសប្រទេសថៃបានស្គាល់ពីស្នាដៃកូនខ្មែរយ៉ាងអស្ចារ្យ រហូតជនជាតិថៃមួយចំនួនបានចាប់ទុកលោកវណ្ណដា ជា អាយដល ក្នុងដួងចិត្តរបស់ពួកគេថែមទៀតផង។

ក្រោយមានភាពល្បីរន្ទឺនេះ ក៏មានម្ចាស់អាខោនហ្វេសប៊ុកមួយ ឈ្មោះ “Janrasmey Alezovann” បានបង្ហោះពីឥទ្ធិពលរបស់តារាចម្រៀងរូបនេះនៅក្នុងប្រទេសថៃយ៉ាងដូច្នេះថា៖

“តើវណ្ណដាគឺជាអ្វីនៅស្រុកថៃ?

នៅស្រុកថៃវណ្ណដា បានធ្វើឲ្យជនជាតិថៃផ្លាស់ប្តូរផ្នត់គំនិតចាស់គំរិលអំពីជនជាតិខ្មែរ។ វណ្ណដាបានបង្កើតរូបភាពវិជ្ជមានបង្ក្រាបគំនិតអវិជ្ជមានអំពីជនជាតិខ្មែរក្នុងសង្គមថៃ។ ការផ្លាស់ប្តូរនេះបានផ្តល់គុណប្រយោជន៍ និងជួយដល់បងប្អូនខ្មែរពលករដែលកំពុងរស់នៅនិងធ្វើការនៅប្រទេសថៃ (ដែលស្វែងរកក្តីសង្ឃឹមថ្មីក្នុងទឹកដីមួយដែលសង្គមគេម៉ាក់ងាយ) ដោយផ្ទាល់ លើសពីនេះ ថៃដើមកំណើតខ្មែរ(ខ្មែរលើ៖ ខ្មែរសុរិន្ទ បុរីរម្យ ស្រីស្រះកេត…) កាន់តែមានមោទនភាពជាខ្មែរដែលពីមុនមក អត្តសញ្ញាណនេះត្រូវបានម៉ាកងាយ បន្ទាបបន្ថោកដោយប្រព័ន្ធសង្គមថៃ។ នៅថៃគុណតំលៃរបស់វណ្ណដាដែលសាងគឺមានអត្តន័យជ្រាលជ្រៅ វណ្ណដាជានិមិត្តរូបនៃភាពតស៊ូ អំនត់ ឈ្លាស់វៃ ថ្លៃថ្នូរ (ថៃប្រៀបធៀបនឹងតារារ៉ាប់ស្រុកថៃ) ពូកែ មានសមត្ថភាពឆ្នៃប្រឌិតខ្ពស់អាចបង្កើតអត្តសញ្ញាណដោយមានឯក្ខណៈរបស់ខ្លួន មិនមែនជាការចម្លងរបស់គេមកជារបស់ខ្លួន ជាពិសេសគឺការយករបស់ចាស់មកឆ្នៃជារបស់ថ្មីទំនើប និងការគោរពដឹងគុណ លើកតម្កើងគ្រូបាអាចារ្យក្នុងនាមជាតារារ៉ាប់។”

ពិតណាស់ទាក់ទងនឹងការលើកឡើងរបស់អ្នកគាំទ្រថៃខាងលើនេះ គឺពិតជាបានបង្ហាញឱ្យឃើញពីសក្ដានកុពលនៃការច្នៃប្រឌិតនូវបទចម្រៀងថ្មីៗ និងទាក់ទាញអារម្មណ៍ ជាក់ស្ដែងដូចជាបទចម្រៀង “Time to rise” ដែលបានអង្រួនចិត្តប្រជាជនខ្មែរ និង បរទេសជាច្រើន ពីការច្នៃចម្រៀងក៏ដូចជាបានយកនូវសិល្បៈករខ្មែរលោកតារគង់ណៃ អ្នកចម្រៀង ចាប៉ិដងវៃង មកចូលរួមសម្ដែងយ៉ាងអស្ចារ្យ និងពិតជាប្លែកអារម្មណ៍ជាខ្លាំងសម្រាប់ចម្រៀងមួយបទនេះ៕

ក្រោយចេញពីសាន់ ដេ លេចឮថាខាន់ ជេមស៍ ត្រៀមបើកផលិតកម្មផ្ទាល់ខ្លួន

Lee Ek

November 2, 2022

លោក ខាន់ ជេមស៍ បានបង្ហោះជារូបភាពមួយសន្លឹកបញ្ជាក់ឱ្យមហាជនអ្នកគាំទ្របានដឹងថា លោកពិតជាបានបញ្ចប់កុងត្រាជាមួយផលិតកម្មសាន់ដេរយៈពេល ១០ ឆ្នាំពិតមែន។ លោកក៏បានអរគុណដល់ចាងហ្វាងផលិតកម្ម នាយប្រតិបត្តិផលិកម្ម និងក្រុមការងារផលិតកម្មសាន់ដេទាំងអស់ ដែលបានផ្ដល់ភាពកក់ក្ដៅចំពោះការសហការធ្វើការងាររួមគ្នាជាមួយលោក។

តាមដំណឹង ផលិតកម្មចម្រៀងដែលតារាចម្រៀងប្រុសរូបត្រៀមបើកផ្ទាល់ខ្លួនមានឈ្មោះថា KHAN JAMES PRODUCTION ដោយលោកត្រៀមបណ្ដុះតារាចម្រៀងថ្មី និងកូនប្រុសទាំង ៤ររបស់លោកឱ្យក្លាយជាតារាប្រចាំផលិតកម្ម។

ទោះជាយ៉ាងណាក៏ដោយ អ្នកគាំទ្រគ្រប់កំពុងរង់ចាំមើលថា តើលោក ខាន់ ជេមស៍ ពិតជាត្រៀមវាយឡុកទីផ្សារចម្រៀងតាមរយៈផលិតកម្មផ្ទាល់មែនឬយ៉ាងណា?

គួរបញ្ជាក់ផងដែរថា លោក ខាន់ ជេមស៍ ក៏ជាតារាជួរមុខដ៏ល្បីមួយរូបនៅក្នុងប្រទេសកម្ពុជាផងដែរ ដោយបទចម្រៀងមួយចំនួនរបស់លោក ក៏នៅតែបន្តមានកេរ្តិ៍ឈ្មោះបោះសម្លេងមកទល់បច្ចុប្បន្ន។ បទទាំងនោះរួមមាន៖ សម្រែកបេះដូវ, ទះថ្ពាល់ស្តាំអង្អែលថ្ពាល់ឆ្វេង និងធ្វើម៉េចបងមិនមែនជាប្រុសសម្ភារៈនិយមជាដើម៕

កូរ៉េខាងជើង គំរាមវាយប្រហារអាវុធនុយក្លេអ៊ែរ លើសមយុទ្ធយោធាអាមេរិក-កូរ៉េខាងត្បូង

Lee Ek

November 2, 2022

រដ្ឋធានីសេអ៊ូល៖ កូរ៉េខាងជើង បានគំរាមកំហែងវាយប្រហារ ទៅលើសមយុទ្ធយោធារួមគ្នារបស់កងទ័ពសហរដ្ឋអាមេរិក ជាមួយនឹងកូរ៉េខាងត្បូង ជាប្រទេសសម្ពន្ធមិត្តដ៏ជិតស្និទ្ធ នៅអាស៊ីបូព៌ា ហើយការព្រមានពីក្រុងព្យុងយ៉ាង នេះ ក៏មិនទាន់មានការឆ្លើយតប ពីក្រុងសេអ៊ូល នោះដែរ។

សារព័ត៌មាន AP បានចេញផ្សាយ កាលពីថ្ងៃអង្គារ ទី១ ខែវិច្ឆិកា ថា កូរ៉េខាងជើង កាលពីថ្ងៃអង្គារ បានបង្ហាញការគំរាមកំហែង ដោយឥតលាក់លៀម អំពីការប្រើប្រាស់អាវុធនុយក្លេអ៊ែរ ដើម្បីធ្វើឱ្យសហរដ្ឋអាមេរិក និងកូរ៉េខាងត្បូង «ខាតបង់ដ៏អាក្រក់បំផុត នៅក្នុងប្រវត្តិសាស្ត្រ»។ ក្រុងព្យុងយ៉ាង បាន និង កំពុងតែបង្កើនសង្គ្រាមវោហារសាស្ត្រយ៉ាងក្ដៅគគុក សម្ដៅលើការធ្វើសមយុទ្ធយោធាទ្រង់ទ្រាយធំរបស់កងទ័ពសហរដ្ឋអាមេរិក និង កូរ៉េខាងត្បូង ដែលកំពុងតែបន្ត។

ភាពរង្គោះរង្គើ នៅលើឧបទ្វីបកូរ៉េ បាន និង កំពុងតែកើនឡើងយ៉ាងខ្លាំង នៅក្នុងរយៈពេលប៉ុន្មានខែកន្លងទៅថ្មីៗនេះ ដោយសារតែកូរ៉េខាងជើង បានបាញ់សាកល្បងមីស៊ីល មានសមត្ថភាពបំពាក់ក្បាលគ្រាប់នុយក្លេអ៊ែរ និង អនុម័តច្បាប់របស់ខ្លួន អនុញ្ញាតឱ្យមានការប្រើប្រាស់អាវុធនុយក្លេអ៊ែរ វាយប្រហារជាមុន គ្រប់ស្ថានភាព។ ចំណែកក្រុមអ្នកជំនាញមួយចំនួន នៅតែសង្ស័យ ថា កូរ៉េខាងជើង អាចនឹងប្រើអាវុធនុយក្លេអ៊ែរ វាយប្រហារជាមុន ខណៈមានការប្រឈមមុខជាមួយនឹងកងទ័ពសហរដ្ឋអាមេរិក និង កូរ៉េខាងត្បូង។

កូរ៉េខាងជើង បានអះអាងថា ការសាកល្បងអាវុធរបស់ខ្លួន កាលពីពេលថ្មីៗនេះ មានន័យថា ជាសារព្រមានទៅដល់ក្រុងវ៉ាស៊ីនតោន និង ក្រុងសេអ៊ូល ជុំវិញសកម្មភាពធ្វើសមយុទ្ធយោធាជាបន្ដបន្ទាប់ រវាងប្រទេសសម្ពន្ធមិត្តទាំង២នេះ។ ក្រុងព្យុងយ៉ាង បានចាត់ទុកថា នេះជាការធ្វើសមយុទ្ធយោធា ហាត់សមឈ្លានពាន រួមទាំងសមយុទ្ធ នៅសប្តាហ៍នេះ មានការពាក់ព័ន្ធនឹងយន្តហោះចម្បាំងរបស់សម្ពន្ធមិត្តទាំង២ ប្រហែល២៤០គ្រឿង ផងដែរ។

លោក ប៉ាក ជុង ចុន (Pak Jong Chon) លេខាបក្សពលករ កំពុងតែកាន់អំណាច ហើយត្រូវបានគេចាត់ទុក ថា ជាមនុស្សស្និទ្ធស្នាលរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានហៅការធ្វើសមយុទ្ធរបស់ទ័ពអាកាសសហរដ្ឋអាមេរិក និង កូរ៉េខាងត្បូង ថា ជាការ«ឈ្លានពាន និង បង្កហេតុ»។

មន្រ្ដីស្និទ្ធស្នាលនឹងមេដឹកនាំកូរ៉េខាងជើង រូបនេះ បានចោទប្រកាន់មន្ទីរបញ្ចកោណរបស់សហរដ្ឋអាមេរិក អំពីការធ្វើឲ្យដួលរលំរបបកូរ៉េខាងជើង ដោយសារតែមានទិសដៅគោលនយោបាយដ៏សំខាន់មួយ នៅក្នុងសេចក្តីយោងជាក់ស្តែងមួយ ជុំវិញរបាយការណ៍យុទ្ធសាស្ត្រការពារជាតិរបស់មន្ទីរបញ្ចកោណ បានចេញផ្សាយ កាលពពេលថ្មីៗនេះ។ របាយការណ៍ បានបញ្ជាក់ ថា ការវាយប្រហារនុយក្លេអ៊ែរណាមួយរបស់កូរ៉េខាងជើង ប្រឆាំងនឹងសហរដ្ឋអាមេរិក ឬ សម្ពន្ធមិត្ត និង ដៃគូរបស់ខ្លួន «នឹងនាំឱ្យមានការបញ្ចប់របបនេះ»។

ស្របពេលមានភាពតានតឹង នៅក្នុងតំបន់នោះ នាវាផ្ទុកយន្ដហោះរបស់សហរដ្ឋអាមេរិក ដើរដោយថាមពលនុយក្លេអ៊ែរ USS Ronald Reagan កាលពីដើមខែតុលា កន្លងទៅនេះ ក៏បានទៅចូលរួម ធ្វើសមយុទ្ធយោធា នៅលើដែនទឹករបស់កូរ៉េខាងត្បូង ផងដែរ។ ការធ្វើសមយុទ្ធយោធារបស់សហរដ្ឋអាមេរិក និង សម្ពន្ធមិត្ត នៅអាស៊ីបូព៌ា ជាញឹកញាប់នេះ បានកើតឡើង ចំពេលកូរ៉េខាងជើង បាញ់ផ្លោងមីស៊ីល ជាញឹកញាប់ បង្កអសន្ដិសុខ និង ស្ថិរភាព នៅក្នុងតំបន់ និង សហគមន៍អន្ដរជាតិ៕

បាក់ស្រុតតូបលក់ដូររបស់អាជីវករមួយខ្នង នៅជាប់មាត់ស្ទឹងពោធិ៍សាត់ ធ្លាក់ចូលក្នុងស្ទឹង

Lee Ek

November 2, 2022

ភ្នំពេញ៖ តូបលក់ដូររបស់អាជីវករមួយខ្នង នៅជាប់មាត់ស្ទឹងពោធិ៍សាត់ ត្រូវបានបាក់ស្រុតធ្លាក់ចូលក្នុងស្ទឹងខូូចខាត់ទាំងស្រុង។

ករណីនៃការបាក់ស្រុតនេះបានកើតឡើងនៅល្ងាចថ្ងៃទី០១ ខែវិច្ឆិកា ឆ្នាំ២០២២នេះ ត្រងចំណុចមាត់ស្ទឹង ទល់មុខច្រកចូលផ្លូវយាយអាន ដែលស្ថិតនៅភូមិស្វាយលួង ឃុំស្វាយលួង ស្រុកកណ្ដៀង ខេត្តពោធិ៍សាត់។

ប្រភពពីកន្លែងកើតហេតុបានឲ្យដឹងថា គេមិនទានដឹងចំនួននៃការខួចខាតនោះនៅឡើយ ខណៈភ្លាមៗនោះសមត្ថកិច្ចព្រមទាំងប្រជាពលរដ្ឋនាំគ្នា អន្តរាគមន៍ជួយសង្គ្រោះផងដែរ។

សូមជម្រាបជូនថា ករណីបាក់ស្រុតដី និងតូបលក់ចាប់ហួយ របស់អាជីវករមានឈ្មោះ គឹម ឈុនហ៊ួយ ដែលរស់នៅតាមច្រាំងស្ទឹងពោធិ៍សាត់ ស្ថិតក្នុងភូមិស្វាយលួង ឃុំស្វាយលួង ស្រុកកណ្តៀង ខេត្តពោធិ៍សាត់ មកដល់ពេលនេះ ពុំមាននរណាម្នាក់បាត់បង់ជីវិតនោះទេ។

តាមការប៉ាន់ប្រម៉ាន អីវ៉ាន់ដែលក្រុមការងារអាចជួយសង្គ្រោះបាន មានប្រមាណ៧០% ដែលក្នុងនោះរួមមាន៖ ស្រាបៀរកំប៉ុង ដប ទឹកក្រូច ភេសជ្ជៈ នំ ចានស្នោរ…។ល។ រួមទាំងចានឆ្នាំង និងរបស់ក្លាស្សេង បាត់បង់ខ្លះ និងនៅសេសសល់មួយចំនួន សម្រាប់តូប គឺអាចរើបានស័ង្កសីជញ្ជាំង និងស័ង្កសីដំបូង ដោយឡែកសាបក្រោម គឺបាត់ស្រុតទាំងស្រុង៕

មន្ទីរពេទ្យ «អឃីតកោះពេជ្រ» ចេញមកបកសា្រយបែបនេះ ក្រោយស្រ្ដីម្នាក់បានបាត់បង់ជីវិត ពេលសម្រាលកូននៅមន្ទីរពេទ្យរបស់ខ្លួន

Lee Ek

November 2, 2022

ភ្នំពេញ៖ កាលពីម្សិលមិញយោងតាមការបង្ហោះនៅលើបណ្ដាញសង្គមផ្ទាល់របស់ ម្ដាយជនរងគ្រោះ អ្នកស្រី Sim Sokunthea បានបង្ហោះសារថា “ កូនស្រីខ្ញុំទៅគ្មានថ្ងៃត្រលប់បន្សល់ទុកចៅមួយ ព្រោះតែគ្រូពេទ្យនៅ Orgkid កោះពេជ្រ” ។

យ៉ាងណាមិញបន្ទាប់ពីមានការផ្សាយក្នុងបណ្ដាញសង្គមមក ខាងមន្ទីរពេទ្យ អឃីត បានចេញការបកស្រាយយ៉ាងដូច្នេះថា៖

“សូមបង្ហាញជូនករណីកំរដែលអាចកើតមានលើស្រ្តីមានផ្ទៃពោះ ឬ កំពុងសម្រាល ឬក្រោយសម្រាលដោយធម្មជាតិឬដោយការវះកាត់ករណីការជ្រាតទឹកភ្លោះរបស់កូនចូលក្នុងសសៃឈាមសួតរបស់ម្តាយដែលបង្ករជាបញ្ហាធ្ងន់ធ្ងរដល់បាត់បង់អាយុជីវិតរបស់ម្តាយឬទារក
រោគសញ្ញា
– ស្រ្ដីចុកទ្រូងឬពិបាកដកដង្ហើម
– មានការហើមសួតភ្លាមៗនោងធ្ងន់ធ្ងរ
– សម្ពាពឈាមធ្លាក់ចុះភ្លាមៗ
– បាត់បង់ស្មារតីឬប្រកាច់ភ្លាមៗ
– ចង្វាក់បេះដូងកើនឡើងភ្មាមៗ
– ករណីខ្លះម្តាយមានធ្លាក់ឈាមធ្ងន់ធ្ងរដោយសារឈាមអត់កក

មូលហេតុ៖
– ដោយសារការជ្រាតចូលនៃបំណែកតូចៗនៃទឹកភ្លោះរបស់កូនចូលក្នុងសសៃឈាមម្តាយហើយចូលទៅស្ទះនៅក្នុងសសៃឈាមនៅក្នុងសួតរបស់ម្តាយធ្វើអោយម្តាយមានអាការះស្ទះសសៃឈាមភ្លាមៗហើយបណ្តាលអោយគាំងបេះដូង(ភាគច្រើនស្លាប់ភ្លាមៗនៅនឹងកន្លែងដែលមិនអាចអោយគ្រូពេទ្យសង្គ្រោះទាន់ពេលវេលាបានទេ)

កក្តាហានិភ័យ៖
-កើតមាន1នាក់ក្នុងចំណោមស្រ្តីពពោះ10000នាក់ (1/10000នាក់)
– មកដល់បច្ចុប្បន្នគេមិនអាចដឹងបានពីមូលហេតុច្បាល់លាស់នៅឡើយទេ។
ផលវិបាក៖
– ស្រ្តីមានការពិការនៅខួរក្បាលដោយសារមិនមានឈាមគ្រប់គ្រាន់ទៅចិញ្ចឹមខួក្បាល
– ការសម្រាកពេទ្យនៅផ្នែកសង្គ្រោះបន្ទាន់រយះពេលយូរ
– កូនអាចស្លាប់ក្នុងពោះបើករណីស្ត្រីធ្វើទុកពេលមិនទាន់បានសម្រាលទារក (កូនមិនទាន់បានសម្រាលចេញមក)
– អត្រាស្លាប់របស់ម្តាយខ្ពស់ទោះបីជានៅក្នុងប្រទេសអភិវឌ្ឍន៍ដោយ។

ករណីនេះជួបប្រទះរាល់គ្រប់សម្ភពទាំងអស់មិនថានៅក្នុងប្រទេសកម្ពុជាឬក្រៅប្រទេសទេ ពេលដែលកើតមានករណីនេះឡើងគ្រូពេទ្យបានត្រឹមតែជួយសង្គ្រោះអស់ពីលទ្ធភាពតាមតែអាចធ្វើបាន លទ្ធផលយ៉ាងណាសម្រេចលើព្រហ្មលិខិតទាំងស្រុង ពីព្រោះគ្រូពេទ្យមិនមែនជាទេវតាដែលអាចប្រោះមនុស្សបានទេ កើតចាស់ឈឺស្លាប់ជារឿងធម្មតាដែលមិនអាចជៀសរួចបាន។

មន្ទីរពេទ្យអឃីតមានសម្ភារះទំនើបគ្រប់គ្រាន់សម្រាប់ក្នុងការជួយសង្គ្រោះនៅនឹងកន្លែងទាន់ពេលវេលា ហើយបានធ្វើរោគវិនិឆ្ឆ័យត្រឹមត្រូវពីករណីគ្រោះថ្នាក់កើតឡើង។

សូមមេត្តាកុំយកប្រពន្ធផ្សព្វផ្សាយហ្វេសប៊ុកមកខមិន ឬកាត់ក្តីលើគ្រូពេទ្យអោយសោះ។ មន្ទីរពេទ្យមានឯកសាយោងនិងភស្តុតាងគ្រប់គ្រាន់សម្រាប់បកស្រាយជូនលោកអ្នកតាមតំរូវការ។ សូមអគុណ” ៕

ភ្ញាក់ផ្អើលណាស់! អ្នកវិទ្យាសាស្ត្ររកឃើញអាចម៍ផ្កាយឃា.ត.ក.រ លាក់ខ្លួននៅក្រោមពន្លឺព្រះអាទិត្យ ដែលអាចវាយប្រហារផែនដីនាពេលអនាគត

Manil

November 2, 2022

អ្នកតារាវិទូមួយក្រុមបានរកឃើញអាចម៍ផ្កាយចំនួនបីដែលលាក់នៅក្រោមពន្លឺដ៏ភ្លឺរបស់ព្រះអាទិត្យ ហើយមួយក្នុងចំណោមបីនោះមានអាចម៍ផ្កាយមួយមានទំហំធំ និងត្រូវបានចាត់ថ្នាក់ជាអាចម៍ផ្កាយមានគ្រោះថ្នាក់ ដែលអាចប៉ះពាល់ដល់ពិភពលោកនាពេលអនាគត។

កាលពីថ្ងៃទី ១ ខែវិច្ឆិកា ឆ្នាំ ២០២២ ការិយាល័យព័ត៌មានអន្តរជាតិ បានរាយការណ៍ថា ក្រុមតារាវិទូអន្តរជាតិបានរកឃើញ អាចម៍ផ្កាយជិតផែនដីចំនួន ៣ លាក់កំបាំងដោយមិនមាននរណាកត់សម្គាល់នៅក្រោមពន្លឺដ៏ភ្លឺរបស់ព្រះអាទិត្យឡើយ ហើយវាមានគន្លងរវាងផែនដី និងភពសុក្រ។

បន្ថែមពីនោះគេបានបញ្ជាក់ថាអាចម៍ផ្កាយមួយក្នុងចំណោមអាចម៍ផ្កាយជិតផែនដីចំនួនបីនោះ ត្រូវបានរកឃើញថាមានអាចម៍ផ្កាយមួយធំជាងគេមានឈ្មោះថាអាចម៍ផ្កាយ អេ ភី៧. ២០២២ (2022 AP7) វាមានអង្កត់ផ្ចិត ១.៥ គីឡូម៉ែត្រ (០.៩ mi) និងមានគន្លងដែលអាចបុកផែនដីនៅថ្ងៃណាមួយ ព្រោះវាពិបាកណាស់សម្រាប់អ្នកវិទ្យាសាស្ត្រក្នុងការដឹងថាពេលណាអាចម៍ផ្កាយ អេ ភី៧. ២០២២ (2022 AP7) នេះនឹងមកបុកផែនដី។ រហូតត្រូវបានគេចាត់ថ្នាក់ថាវាជាវត្ថុគ្រោះថ្នាក់ធំបំផុតសម្រាប់ពិភពលោក ដែលត្រូវបានរកឃើញក្នុងរយៈពេល ៨ ឆ្នាំចុងក្រោយ ឬចាប់តាំងពីឆ្នាំ ២០១៤មកម្លេះ ដូច្នេះហើយទើបគេហៅវាថាជា “ឃាតករភព” ។ មិនតែប៉ុណ្ណោះតាមសមត្ថភាពរបស់វានឹងអាចបំផ្លិចបំផ្លាញនៅទូទាំងទ្វីបជាច្រើន ប្រសិនបើវាអាចបុកជាមួយនឹងផែនដីនាពេលអនាគតខាងមុខ។

ក្នុងនោះសម្រាប់អាចម៍ផ្កាយពីរផ្សេងទៀតដែលត្រូវបានរកឃើញ គេបានដាក់ឈ្មោះថា អិល ជេ ៤. ២០២១ (2021 L J4) និង ភី អេក ២៧. ២០២១ (2021 PH27) ដោយអាចម៍ផ្កាយទាំងពីរនេះត្រូវបានចាត់ទុកថាមានវាសុវត្ថិភាពសម្រាប់ពិភពលោក ដោយសារតែមានគន្លងដ៏ឆ្ងាយពីផែនដី។

យ៉ាងណាមិញការរកឃើញអាចម៍ផ្កាយទាំងបីដែលបានលាក់នៅក្រោមពន្លឺដ៏ភ្លឺរបស់ព្រះអាទិត្យនេះ គឺក្រុមតារាវិទូអន្តរជាតិ បានប្រើកាមេរ៉ាថាមពលងងឹត ឌី អ៊ី ខែម (DECam) ដែលអាចរកឃើញវត្ថុតាមរយៈការឆ្លុះបញ្ចាំងពីព្រះអាទិត្យ ហើយវាត្រូវបានបំពាក់នៅលើតេឡេស្កុបប្រវែង ៤ ម៉ែត្រមានឈ្មោះ វិចទ័រ អិម ប្លែនកូ (Victor M. Blanco) នៅ សើរ៉ូ តូឡូឡូ អ៊ិនទ័រ អាមើរិខែន អ៊ុបសើវ៉ាទ័ររី (Cerro Tololo Inter-American Observatory) ក្នុងប្រទេសឈីលី៕ ប្រភព៖ Thairath

ប្រទេសក្បែរខាងយើង ត្រៀមបញ្ចេញរថយន្តហោះនៅឆ្នាំ២០២៤

Lee Ek

November 2, 2022

ក្រុមហ៊ុនហាណូយ Airlios បានបង្ហាញរថយន្តអគ្គិសនីហោះ ដែលខ្លួនគ្រោងនឹងលក់ជាលក្ខណៈពាណិជ្ជកម្ម នៅឆ្នាំ២០២៤។

រថយន្តអគ្គិសនីហោះនេះ មានកៅអីទោល ដែលអាចហោះហើរបញ្ឈរបាន ដល់ទៅ ១០ ម៉ែត្រ ក្នុងរយៈពេល ១០វិនាទី ហើយបន្ទាប់មក ហោះហើរក្នុងល្បឿន ១០០គីឡូម៉ែត្រក្នុងមួយម៉ោង។

វាអាចឡើងដល់កម្ពស់ ១២០ ម៉ែត្រ ដែលមានកម្ពស់ដូចនឹងអគារ ៤៤ ជាន់។ វាមានថ្មចំនួន ៨ ដែលត្រូវបានសាកពេញ ក្នុងរយៈពេល៧ ទៅ ៩ នាទី នៅស្ថានីយ៍សាកថ្ម ៣០ គីឡូវ៉ាត់។ ភាគច្រើនផលិតពីអាលុយមីញ៉ូម និងសរសៃកាបូន ហើយអាចហោះហើរបានទាំងដោយស្វ័យប្រវត្តិ និងដោយដៃ។

គំរូមួយ ហោះបានយ៉ាងជោគជ័យក្នុងរយៈចម្ងាយ ៣៣គីឡូម៉ែត្រក្នុងរយៈពេល ២០នាទី ក្នុងរយៈកម្ពស់ក្រោម ១២០ម៉ែត្រ។ វាត្រូវបានសាកល្បងរយៈពេល ១០០ម៉ោង និង ១០០០គីឡូម៉ែត្រ។ គម្រោងនេះសម្រេចបាន ៧០-៨០ ភាគរយហើយ៕

ប្រភព៖ VN Express

សម្តេច ហ៊ុន សែន៖ កម្ពុជាចង់បញ្ជូនអ្នកដោះមីនទៅជួយបណ្តុះបណ្តាលអ៊ុយក្រែនក្នុងការដោះមីន

Lee Ek

November 2, 2022

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ប្រាប់ លោក វ៉ូឡូឌីមៀ ហ្ស៊ែលឡិនស្គី (Volodymyr Zelensky) ប្រធានាធិបតីនៃប្រទេសអ៊ុយក្រែនថា ដោយសហការជាមួយប្រទេសជប៉ុន កម្ពុជាត្រៀមខ្លួនជាស្រេចក្នុងការបញ្ជូនអ្នកដោះមីនរបស់កម្ពុជា ទៅជួយបណ្តុះបណ្តាលដល់អ្នកដោះមីនរបស់អ៊ុយក្រែនតាមពេលវេលាសមស្រប។

សម្តេចតេជោ ហ៊ុន សែន បានបញ្ជាក់បែបនេះ ក្នុងជំនួបតាមទូរស័ព្ទលើកដំបូងជាមួយ ប្រធានាធិបតីអ៊ុយក្រែន កាលពីថ្ងៃទី០១ ខែវិច្ឆិកា ឆ្នាំ២០២២ ម្សិលមិញនេះ។

សេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា ក្នុងជំនួបនេះ សម្តេចតេជោនាយកដ្ឋមន្ត្រី បានលើកឡើងផងដែរថា ដោយសហការជាមួយប្រទេសជប៉ុន កម្ពុជាត្រៀមខ្លួនជាស្រេចក្នុងការបញ្ជូនអ្នកដោះមីនរបស់កម្ពុជា ទៅជួយបណ្តុះបណ្តាលដល់អ្នកដោះមីនរបស់អ៊ុយក្រែនតាមពេលវេលាសមស្រប។

លោកប្រធានាធិបតី ហ្ស៊ែលឡិនស្គី បានថ្លែងអំណរគុណ និង ស្វាគមន៍ចំពោះកម្ពុជាដែលមានបំណងផ្តល់ជំនួយខាងដោះមីននេះ៕