អាហ្រ្វិកខាងត្បូង៖ លោក អាន់វ៉ា អុីប្រាហុីម នាយករដ្ឋមន្រ្តីម៉ាឡេសុី បានធ្វើការបដិសេធទាំងស្រុងចំពោះការចោ.ទប្រកាន់ក្នុងពេលថ្មីៗនេះថា ម៉ាឡេសុី បានជ្រៀតជ្រែកក្នុងជម្លោះព្រំដែនកម្ពុជា-ថៃ ដោយការអះអាងពីការរក្សាតួនាទីអព្យាក្រឹតរបស់ខ្លួនក្នុងការសម្របសម្រួលកិច្ចចរចារវាងទេសជិតខាងទាំងពីរ។ នេះបើតាមការចុះផ្សាយរបស់ទីភ្នាក់ងារព័ត៌មាន CNA។

ថ្លែងក្នុងសន្និសីទសារព័ត៌មានមួយកាលពីថ្ងៃសៅរ៍ ទី២២ ខែវិច្ឆិកា ឆ្នាំ២០២៥ នៅទីក្រុងJohannesburgប្រទេសអាហ្វ្រិកខាងត្បូង លោក អាន់វ៉ា អុីប្រាហុីម បានបញ្ជាក់ថា «ខ្ញុំសូមអនុញ្ញាធ្វើការស្រាយបំភ្លឺ។ ជាដំបូង ក្នុងនាមជាប្រទេសជិតខាង យើងពិតជាមានការព្រួយបារម្ភ (អំពីជម្លោះ) ប៉ុន្តែយើងមិនពាក់ព័ន្ធនោះទេ»។

លោកបន្តថា «យើងគ្រាន់តែសម្របសម្រួល – ដើម្បីជួយពួកគេ (កម្ពុជា និង ថៃ) ឱ្យសម្រេចបាននូវការដោះស្រាយ ឬដំណោះស្រាយចំពោះជម្លោះរបស់ពួកគេប៉ុណ្ណោះ។ យើងមិនដែលចេញបញ្ជាជាក់លាក់ណាមួយដល់ពួកគេអំពីរបៀបថាត្រូវដោះស្រាយបញ្ហាយ៉ាងម៉េចនោះទេ» ដោយបន្ថែមថា ព្រោះប្រទេសទាំងពីរចាត់ទុកម៉ាឡេស៊ីជា «មិត្ត»។

លើសពីនោះ លោកអាន់វ៉ាក៏បានបញ្ជាក់បន្ថែមអំពីលោកដូណាល់ ត្រាំ ថាប្រធានាធិបតីសហរដ្ឋអាមេរិក រូបនេះក៏បាននិយាយជាមួយពួកគេហើយដែរ»។ ក្នុងនោះនាយករដ្ឋមន្រ្តីម៉ាឡេស៊ីបានមានប្រសាសន៍ថា« ពេលខ្ញុំធ្វើជាប្រធានកិច្ចប្រជុំ (រវាងភាគីនានា) ខ្ញុំបានបញ្ជាក់យ៉ាងច្បាស់អំពីរឿងនោះ»។

គួរជម្រាបថា ការលើកឡើងរបស់លោក អាន់វ៉ា អ៊ីប្រាហ៊ីម បានកើតឡើងចំថ្ងៃដែលមានការតវ៉ាក្នុងប្រទេសថៃពីសកម្មជនជ្រុលនិយមថៃ ដែលនាំគ្នាដើរគ្រវីទង់ជាតិថៃ ផ្ទាំងបដា និងគូសសញ្ញាខ្វែងលើមុខនាយករដ្ឋមន្រ្តីម៉ាឡេសុី និង ប្រធានាធិបតីអាមេរិក ដើរដង្ហែពីស្ថានទូតម៉ាឡេស៊ី នៅលើផ្លូវSathon ឆ្ពោះទៅកាន់ស្ថានទូតអាមេរិកនៅPathum Wan ក្នុងទីក្រុងបាងកក ដោយចោទប្រកាន់ថា រដ្ឋាភិបាលលោក អាន់វ៉ា អ៊ីប្រាហ៊ីម និង រដ្ឋបាលរបស់ប្រធានាធិបតី ដូណាល់ ត្រាំ បានជ្រៀតជ្រែកចូលក្នុងកិច្ចការចរចាបញ្ចប់ជម្លោះព្រំដែនរវាងកម្ពុជានិងថៃ។

លោកជឿថាប្រធានបទនេះនឹងត្រូវលើកឡើងម្ដងទៀត នៅពេលដែលនាយករដ្ឋមន្ត្រីថៃលោកអានុទិន ឆាន់វីរ៉ាគុលធ្វើដំណើរទៅបំពេញទស្សនកិច្ចនៅប្រទេសម៉ាឡេស៊ី នៅថ្ងៃទី២៦ ខែវិច្ឆិកា។ លោកថា «ខ្ញុំមិនដឹងអំពីនយោបាយផ្ទៃក្នុង ឬនយោបាយក្នុងស្រុកនៅទីនោះ ដើម្បីបង្ហាញថាយើងបានជ្រៀតជ្រែកនោះទេ»។ លោកសង្កត់ធ្ងន់ថា«មិត្តភក្តិរបស់យើងនៅប្រទេសថៃមិនត្រូវយល់ច្រឡំពីរឿងនេះទេ យើងគឺគ្រាន់តែជួយពួកគេឱ្យសម្រេចបានសន្តិភាព។ ផ្ទុយទៅវិញ យើងត្រូវតែប្តេជ្ញាចិត្ត ចំពោះជំហរដំបូងរបស់យើង លើអ្វីដែលកំពុងកើតឡើងនៅទីនោះ (តាមបណ្តោយព្រំដែនថៃ-កម្ពុជា)»៕

ស្លឹកគ្រៃមិនត្រឹមតែមានក្លិនក្រអូបឈ្ងុយប៉ុណ្ណោះទេ ប៉ុន្តែរសជាតិស្រាលប្រហើរៗរបស់វាអាចព្យាបាលអារម្មណ៍តានតឹងបានយ៉ាងមានប្រសិទ្ធភាព។ ជាមួយគ្នានេះ អ្នកជំនាញជឿថាការផឹកតែស្លឹកគ្រៃអាចព្យាបាលជំងឺជាច្រើន និងថែមទាំងធ្វើឲ្យសុខភាពសរសៃឈាមបេះដូងប្រសើរឡើងទៀតផង។ ខាងក្រោមនេះជាហេតុផលមួយចំនួនដែលអ្នកគួរតែបញ្ចូលតែស្លឹកគ្រៃក្នុងរបបអាហារប្រចាំថ្ងៃរបស់អ្នក៖

១.ការផឹកតែស្លឹកគ្រៃអាចជួយក្នុងការកាត់បន្ថយជំងឺលើសឈាម និងសម្ពាធឈាមស៊ីស្តូលិកខ្ពស់៖ យោងតាមការសិក្សាមួយរបស់ទស្សនាវដ្ដី ResearchGate បង្ហាញថា អ្នកដែលផឹកតែស្លឹកគ្រៃ ជារៀងរាល់ថ្ងៃសង្កេតឃើញមានការធ្លាក់ចុះនៃសម្ពាធឈាមស៊ីស្តូលិក និង កើនឡើងបន្តិចបន្តួចនៃសម្ពាធឈាមឌីអាស្តូលិក ថែមទាំងមានអត្រាចង្វាក់បេះដូងទាបជាងគួរឱ្យកត់សម្គាល់ផងដែរ។

២.ដើរតួជាថ្នាំបញ្ចុះទឹកនោម៖ តែស្លឹកគ្រៃដំណើរការជាថ្នាំបញ្ចុះទឹកនោមធម្មជាតិ ដែលជួយបញ្ចេញជាតិពុល និងសូដ្យូមក្នុងទម្រង់ជាសារធាតុរាវលើស។

៣.កាត់បន្ថយកូឡេស្តេរ៉ុល៖ ការទទួលទានតែស្លឹកគ្រៃអាចជួយក្នុងការបន្ថយកូឡេស្តេរ៉ុលអាក្រក់ ព្រមទាំងហានិភ័យនៃជំងឺបេះដូងផងដែរ។

៤.សារធាតុប្រឆាំងអុកស៊ីតកម្ម៖
ស្លឹកគ្រៃមានសារធាតុប្រឆាំងអុកស៊ីតកម្មដែលល្អចំពោះបេះដូងដូចជា អាស៊ីត chlorogenic, isoorientin និង swertiajaponin ដែលជួយក្នុងការការពារមុខងារមិនប្រក្រតីនៃកោសិកានៅក្នុងសរសៃឈាមបេះដូង។

ជាចុងក្រោយ ស្លឹកគ្រៃមិនត្រឹមតែអាចយកមកធ្វើជាគ្រឿងផ្សុំធ្វើម្ហូប ដែលប្រជាជនខ្មែរនិយមសម្រាប់ដាំស្លប៉ុណ្ណោះទេ តែអ្នកក៏អាចយកវាធ្វើជាតែ ទទួលទានជារៀងរាល់ថ្ងៃបាន ដោយបន្ថែមជាមួយគ្រឿងផ្សុំផ្សេងទៀតដែលអាចមាននៅក្នុងផ្ទះស្រាប់ដូចជា ទឹកឃ្មុំ ឬក្រួចឆ្មាជាដើម តាមចំណូលចិត្ត៕

ប្រទេសថៃ ៖ កូនសិស្សថៃបានរត់ប្រសាចចេញពីសាលារៀនដោយសារការប៉ះទង្គិចគ្នាដោយអាវុ.ធរវាងកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលនៅព្រំដែនថៃ-មីយ៉ាន់ម៉ា ដែលធ្វើឱ្យគ្រាប់កាំភ្លើ.ង១គ្រាប់ធ្លាក់លើសាលារៀនថៃ ។ ភ្លាមនោះ នាយកសាលានៅស្រុកមេសត ខេត្តតាក បានប្រកាសបិទទ្វារសាលា និងជម្លៀសសិស្សចេញជាបន្ទាន់ដើម្បីសុវត្ថិភាព ។ នេះបើតាមការចុះផ្សាយរបស់សារព័ត៌មាន Amarin News កាលពីថ្ងៃទី២១ ខែវិច្ឆិកា ឆ្នាំ២០២៥ ។

នាវេលាម៉ោង១រសៀលថ្ងៃទី២១ ខែវិច្ឆិកា ស្ថានការណ៍នៅព្រំដែនថៃ-មីយ៉ាន់ម៉ាតានតឹងខ្លាំងក្រោយពីកងទ័ពមីយ៉ាន់ម៉ាមានអាវុធគ្រប់ដៃបានបាញ់កងកម្លាំងប្រឆាំងរដ្ឋាភិបាលនៅភូមិមិនឡាប៉ាន ស្រុកមៀវឌី ខេត្តមៀវឌី ប្រទេសមីយ៉ាន់ម៉ា ទល់មុខភូមិមេគយគែន ឃុំមហាវ៉ាន់ ស្រុកមេសត ខេត្តតាក ប្រទេសថៃ ។ ភាគីទាំងសងខាងបង្កើនកម្លាំងរៀងខ្លួន និងប្រើប្រាស់កាំភ្លើងបាញ់គ្នាទៅវិញទៅមកមិនឈប់ឈរ បន្ទាប់មក កងទ័ពមីយ៉ាន់ម៉ាក៏ប្រើប្រាស់អាវុធធុនធ្ងន់ ខណៈកងកម្លាំងប្រឆាំងរដ្ឋាភិបាល តបតវិញដោយប្រើប្រាស់ដ្រូនទម្លាក់គ្រាប់បែកវាយប្រហារពីលើអាកាស ប៉ុន្តែពុំមានសេចក្តីរាយការណ៍ពីការខូចខាតរបស់ភាគីទាំងពីរទេ ។

ក្នុងអំឡុងពេលប៉ះទង្គិចគ្នារវាងកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលដែលស្ថិតនៅមិនឆ្ងាយពីព្រំដែនថៃ ស្រាប់តែមានគ្រាប់កាំភ្លើង១គ្រាប់ធ្លាក់មកលើសាលារៀននៅភូមិមេគយគែន ពេលកូនសិស្សថៃកំពុងតែហ្វឹកហាត់កីឡា ។ ហេតុការណ៍នេះធ្វើឱ្យកូនសិស្សថៃនៅទីលានហ្វឹកហាត់កីឡាភ័យតក់ស្លុតយ៉ាងខ្លាំង បន្ទាប់មក នាយកសាលាក៏ផ្អាកការហ្វឹកហាត់កីឡា ព្រមទាំងប្រកាសឱ្យអាណាព្យាបាលមកទទួលកូនសិស្សចំនួន៣៤៥នាក់ ចេញពីសាលាជាបន្ទាន់ ។

សំឡេងគ្រាប់កាំភ្លើង និងផ្ទុះគ្រាប់បែកនៅតែឮសូរខ្លាំងជាបន្តបន្ទាប់ ពេលនេះ នាយកសាលារៀនកំពុងវាយតម្លៃស្ថានការណ៍ជារៀងរាល់ថ្ងៃដើម្បីសុវត្ថិភាពគ្រូបង្រៀន និងកូនសិស្ស ដោយប្រកាសបិទទ្វារសាលាបន្តទៀត ប្រសិនបើស្ថានការណ៍ប៉ះទង្គិចនៅមីយ៉ាន់ម៉ាមិនបញ្ឈប់ ។ តាមសេចក្តីរាយការណ៍ គឺកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលនៅតែបន្តបាញ់គ្នា និងប្រើប្រាស់អាវុធធុនធ្ងន់ ខណៈពួកគេបានប៉ះទង្គិចគ្នានៅតំបន់នេះរយៈពេលជាង១ខែហើយ ហេតុការណ៍ប៉ះគ្នាលើកចុងក្រោយធ្វើឱ្យពលរដ្ឋមីយ៉ាន់ម៉ាជាង១០០នាក់ រត់ភៀសខ្លួនមកប្រទេសថៃ ។

កងទ័ព និងសមត្ថកិច្ចថៃបំពាក់ដោយអាវុធត្រូវបានបញ្ជូនមកកាន់ព្រំដែនស្រុកមេសត ខេត្តតាក ដើម្បីការពារអធិបតេយ្យ ព្រមទាំងតាមដានការជម្លៀសរបស់ពលដ្ឋមីយ៉ាន់ម៉ា ។ កងកម្លាំងថៃបានហាមឃាត់ពលរដ្ឋចូលក្បែរតំបន់ប៉ះទង្គិចជាដាច់ខាត ពីព្រោះអាចនឹងមានគ្រោះថ្នាក់ដោយសារគ្រាប់កាំភ្លើងធ្លាក់ចូលដីថៃ ។

គួរបញ្ជាក់ថា ភាគីថៃពុំទាន់ប្រតិកម្មជាមួយមីយ៉ាន់ម៉ាទេ អំពីគ្រាប់កាំភ្លើងមីយ៉ាន់ម៉ាធ្លាក់ចូលដីថៃបណ្តាលឱ្យថៃបិទទ្វារសាលារៀន ។ កន្លងមក លំនៅឋានពលរដ្ឋថៃបានរងខូចខាតចំនួន៥ខ្នង ដោយសារការបង្ក្រាបក្រុមឆបោកអនឡាញដោយការបំផ្ទុះគ្រាប់របស់កងទ័ពមីយ៉ាន់ម៉ានៅព្រំដែនធ្វើឱ្យជ្រុលទៅប៉ះលំនៅឋានពលរដ្ឋថៃ ខណៈរដ្ឋាភិបាលថៃមិនហ៊ានឆ្លើយតបដោយហិង្សា ឬថ្កោលទោស គឺបានត្រឹមតែជូនដំណឹងពីការខូចខាត និងស្នើឱ្យកងទ័ពមីយ៉ាន់ម៉ាបន្ធូរដៃក្នុងការបង្ក្រាបប៉ុណ្ណោះ ។ នេះបង្ហាញថា ថៃហាក់ក្រែងរអានឹងមីយ៉ាន់ម៉ា មិនហ៊ានស្រែក ឬប្តឹងទៅអន្តរជាតិឡើយ ៕

ប្រទេសថៃ និង វៀតណា ដែលជាអ្នកជិតខាងធំៗទាំងពីររបស់ប្រទេសកម្ពុជាកំពុងជួបប្រទះនឹងគ្រោះធម្មជាតិដ៏ខ្លាំងក្លាបំផុតមិនធ្លាប់មានក្នុងរយៈរាប់ទសវត្សន៍កន្លងមកនេះ ដោយមានទាំងព្យុះ ទឹកជំនន់ និងការបា.ក់ដី បណ្ដាលឲ្យខូចខាតដល់ទ្រព្យសម្បត្តិ ហេដ្ឋារចនាសម្ព័ន្ធ និងឆក់យកជីវិតមនុស្សអស់ជាច្រើននាក់។

តាមរយៈរបាយការណ៍ចុងក្រោយបង្អស់របស់ប្រទេសថៃ គិតមកត្រឹមថ្ងៃទី២២ ខែវិច្ឆិកា ឆ្នាំ២០២៥ ខេត្ត-ក្រុង រួមទាំងតំបន់ជាច្រើន បានប្រកាសអាសន្នអំពីហានិភ័យនៃគ្រោះទឹកជំនន់និងបំណាក់ដី ខណៈគ្រោះធម្មជាតិ បន្តវាយប្រហារមកលើប្រទេសនេះផ្ទួនៗគ្នា។ ក្នុងនោះខេត្តដែលកំពុងប្រឈមនឹងផលប៉ះពាល់ខ្លាំងជាងគេក្នុងពេលថ្មីនេះ គឺរួមមានខេត្តអាយុធ្យា និង សុងក្លា ដោយប្រជាពលរដ្ឋរាប់មុឺនគ្រួសារកំពុងស្នាក់នៅក្នុងជុំរំតង់លើទីទួលសុវត្ដិភាព។

បើតាមសេចក្ដីរាយការណ៍របស់អាជ្ញាធរថៃ មានប្រជាពលរដ្ឋយ៉ាងហោចណាស់ ២០នាក់ បានស្លា.ប់បាត់បង់ជីវិតដោយសារគ្រោះទឹកជំនន់នៅខេត្ត អយុធ្យា។ជាមួយគ្នានោះ នៅខេត្តសុងក្លាឯណោះវិញ ជំនន់ទឹកភ្លៀងស្រាប់តែហក់ឡើងយ៉ាងឆាប់រហ័សបំផុត ដោយក្នុងរយៈពេលត្រឹមប៉ុន្មានថ្ងៃប៉ុណ្ណោះ វាមានការកើនឡើងរហូតដល់កម្ពស់ ៣ម៉ែត្រ ដែលឈានដល់កម្រិតប្រកាសអាសន្ន។

អាជ្ញាធរអគ្គិសនីខេត្តសុងក្លា បានបញ្ជាឲ្យកាត់ផ្តាច់ចរន្តអគ្គិសនី១៦តំបន់ តាំងពីម៉ោង៩ព្រឹកថ្ងៃទី២២ ខែវិច្ឆិកា ដើម្បីសុវត្ថិភាព ដែលធ្វើឲ្យប្រជាជនពលនៅក្នុងតំបន់ទាំងនោះកាន់តែពិបាកក្នុងការរស់នៅ។

ដោយឡែកនៅប្រទេសវៀតណាម គ្រោះទឹកជំនន់ដ៏សាហាវមិនធ្លាប់មានក្នុងរយៈពេលជាច្រើនទសវត្សន៍មកនេះ កំពុងគ្របដណ្ដប់ពាសពេញភាគកណ្តាល ដែលជាការកើនឡើងយ៉ាងខ្លាំងក្លាបំផុត បណ្ដាលឲ្យជន់លេចតំបន់ និងក្រុងជាច្រើន ក្នុងនោះចំនួនអ្នកស្លា.ប់កើនឡើងដល់ ៤៣ នាក់ និងមានមនុស្សចំនួន ៩ នាក់ផ្សេងទៀតត្រូវបានបាត់ខ្លួន។

យោងតាមការចេញផ្សាយដោយកាសែតវៀតណាម VNExpress ទឹកជំនន់ដែលកើនឡើងយ៉ាងឆាប់រហ័សនេះ បានប៉ះពាល់ដល់ផ្ទះជាង ៦៧.៧០០ ខ្នង ដោយ ១៦៨ ខ្នងទទួលរងការខូចខាតទាំងស្រុង ព្រមទាំងបំផ្លិ.ចបំផ្លា.ញដីស្រែ ចម្ការរបស់ប្រជាជនរាប់មុឺនហិកតាផងដែរ។ អាជ្ញាធរជាតិវៀតណាម បានប៉ាន់ប្រមាណថាការខូចខាតសេដ្ឋកិច្ចបឋមមានចំនួន ៣ ពាន់ពាន់លានដុង (១១៣,៧៦ លានដុល្លារអាមេរិក)។

ជាមួយគ្នានោះ ប្រទេសកម្ពុជាយើង ក៏ទទួលរងផលប៉ះពាល់ខ្លះដែរពីគ្រោះទឹកជំនន់ ដោយក្នុងនោះមានខេត្តពោធិ៍សាត់ បានទទួលរងសម្ពាធទឹកភ្លៀងពីមធ្យមទៅច្រើន ដែលគ្រប់ដណ្តប់ទូទាំងខេត្ត ធ្វើឲ្យកម្រិតទឹកក្នុងស្ទឹងពោធិ៍សាត់បានកើនឡើងខ្ពស់។ តែទោះជាយ៉ាងណា អាជ្ញាធរពាក់ព័ន្ធបាន និងកំពុងយកចិត្តទុកដាក់ជម្លៀសពលរដ្ឋដែលប្រឈមនឹងការប៉ះពាល់ឲ្យទៅកាន់ទីទួលមានសុវត្ថិភាពរួចរាល់ ហើយពុំមានសេចក្ដីរាយការណ៍ណាមួយដែលបញ្ជាក់ពីផលប៉ះពាល់ដល់អាយុជីវិតមនុស្ស និងការខូចខាតដោយសារទឹកជំនន់នៅខេត្តពោធិ៍សាត់ឡើយ៕