គូឡាឡាពួ៖ រដ្ឋចំនួន ៧ របស់ប្រទេសម៉ាឡេសុី កំពុងរងការវា.យប្រហា.រដោយគ្រោះទឹកជំនន់ ដែលធ្វើឲ្យមនុស្សជាង ១មុឺននាក់ ត្រូវបង្ខំឲ្យចាកចេញពីផ្ទះរបស់ពួកគេទៅរកទីទួលសុវត្ថិភាពជាបន្ទាន់។ នេះបើតាមទីភ្នាក់ងារសារព័ត៌មាន Malay Mail របស់ម៉ាឡេសុី។

យោងតាមរបាយការណ៍ដែលចេញផ្សាយនៅថ្ងៃទី២៤ ខែវិច្ឆិកានេះ ចំនួនជនរងគ្រោះដោយទឹកជំនន់នៅក្នុងប្រទេសម៉ាឡេស៊ីនៅពេលនេះ បានកើនឡើងដល់ ១០.៩២២ នាក់គិតត្រឹមម៉ោង ៨ ព្រឹកថ្ងៃនេះ ដោយរដ្ឋ Kelantan បានរងនូវផលប៉ះពាល់ខ្លាំងក្លាបំផុត។

ក្រៅពីរដ្ឋ Kelantan រដ្ឋជាច្រើនទៀតកំពុងជួបប្រទះនឹងទឹកជំនន់ដែលកំពុងកើនឡើង។ រដ្ឋ Perlis បានឃើញការកើនឡើងយ៉ាងខ្លាំងនៃចំនួនជនរងគ្រោះ ដោយកើនឡើងដល់ 811 នាក់ពី 243 គ្រួសារនៅព្រឹកនេះ បើប្រៀបធៀបទៅនឹងមនុស្សត្រឹមតែ 114 នាក់ពី 35 គ្រួសារកាលពីយប់មិញ។ ក្នុងនោះ រដ្ឋភាគឦសានបានកត់ត្រាជនរងគ្រោះចំនួន ៨.២៤៨ នាក់ពីគ្រួសារចំនួន ៣.០២២ នៅព្រឹកនេះ ដែលជាការកើនឡើងយ៉ាងខ្លាំងពីមនុស្ស ៧.៨៣០ នាក់កាលពីយប់មិញ នេះបើយោងតាមទីភ្នាក់ងារសារព័ត៌មានរដ្ឋ Bernama។

ដោយឡែកនៅរដ្ឋ Penang ចំនួនជនរងគ្រោះដោយទឹកជំនន់បានកើនឡើងដល់ 242 នាក់ពី 57 គ្រួសារ ដែលជំរុញឱ្យអាជ្ញាធរបើកមជ្ឈមណ្ឌលសង្គ្រោះបន្ថែមចំនួនពីរ ដែលធ្វើឱ្យចំនួនសរុបកើនឡើងកាន់តែខ្ពស់ គិតត្រឹមម៉ោង 7:49 ព្រឹក នេះបើយោងតាមគេហទំព័រ JKM Infobencana។

គួរបញ្ជាក់ថា បញ្ហាគ្រោះទឹកជំនន់នៅម៉ាឡេស៊ីជារឿយៗ តែងតែកើតឡើងនៅតាមបណ្ដោយឆ្នេរភាគខាងកើត អំឡុងរដូវមូសុងប្រចាំឆ្នាំ ចាប់ពីខែតុលា រហូតដល់ខែមីនា ដែលតែងតែបង្ខំឱ្យប្រជាជនម៉ាឡេស៊ីជម្លៀសខ្លួន ជារៀងរាល់ឆ្នាំ។

តែទោះជាយ៉ាងណា សម្រាប់គ្រោះទឹកជំនន់នៅឆ្នាំ២០២៥ នេះ ដ្បិតមានសេចក្ដីរាយការណ៍ថាវាបានប៉ះពាល់ដល់មនុស្សជាង ១មុឺននាក់ក៏ពិតមែន ប៉ុន្តែមិនទាន់មានការបញ្ជាក់ថាវាបានឆ.ក់យកអាយុជីវិតរបស់ពលរដ្ឋឡើយ៕

ប្រទេសថៃ ៖ កាលពីថ្ងៃទី២៣ ខែវិច្ឆិកា ឆ្នាំ២០២៥ កងទ័ពភូមិភាគទី២ថៃបានបដិសេធព័ត៌មានក្លែងក្លាយក្នុងបណ្តាញសង្គមថា «កងទ័ពថៃជាន់មីនរងរបួសនៅព្រំដែន» ព្រមទាំងសំណូមពរកុំឱ្យពលរដ្ឋចែកចាយវីដេអូបង្ហាញពីកងទ័ពថៃរងរបួស ពីព្រោះវាជាវីដេអូចាស់តាំងពីការប៉ះទង្គិចគ្នាដោយអាវុ.ធរវាងកម្ពុជា-ថៃកាលពីថ្ងៃទី២៤ ខែកក្កដា ប៉ុន្តែត្រូវបានយកមកបង្ហោះឡើងវិញក្នុងបំណងញុះញង់ឱ្យសង្គមថៃមានកំហឹង ។ បច្ចុប្បន្ន គ្មានកងទ័ពថៃណាម្នាក់រងរបួសទេ ហើយកងទ័ពថៃដែលរងរបួសក្នុងវីដេអូនេះត្រូវបានបញ្ជូនទៅប្រចាំការនៅព្រំដែនហើយ ។

កងទ័ពភូមិភាគទី២ថៃបដិសេធព័ត៌មានក្លែងក្លាយនេះ បន្ទាប់ពីក្រុមជ្រុលនិយមថៃដែលមានបំណងធ្វើឱ្យស្ថានការណ៍ព្រំដែនកម្ពុជា-ថៃឡើងកំដៅ និងញុះញង់ឱ្យសង្គមថៃផ្ទុះកំហឹងឈានទៅកើតសង្គ្រាមម្តងទៀត បានបង្ហោះវីដេអូចាស់បង្ហាញពីកងទ័ពថៃរងរបួសកាលពីខែកក្កដា ឆ្នាំ២០២៥ ។ ពលរដ្ឋថៃមួយចំនួនដែលខ្វះការគិតពិចារណាបានជឿជាក់ព័ត៌មានក្លែងក្លាយ និងចែកចាយបន្ត ស្របពេលស្ថានការណ៍នយោបាយនៅថៃកំពុងច្របូកច្របល់ ខណៈក្រុមជ្រុលនិយមថៃបានធ្វើបាតុកម្មនៅមុខស្ថានទូតអាមេរិក និងម៉ាឡេស៊ី ដោយចោទប្រកាន់ប្រទេសទាំងពីរជ្រៀតជ្រែកជម្លោះកម្ពុជា-ថៃ ។

វីដេអូបង្ហាញពីកងទ័ពថៃរងរបួសត្រូវបានចែកចាយក្នុងបណ្តាញសង្គមថៃកាលពីថ្ងៃទី២៣ ខែវិច្ឆិកា ប៉ុន្តែកងទ័ពភូមិភាគទី២ បញ្ជាក់ថា ហេតុការណ៍នេះបានកើតឡើងតាំងពីវេលាម៉ោង១និង៥៦នាទីរសៀល ថ្ងៃទី២៤ ខែកក្កដា មកម៉្លេះ គឺមានកងទ័ពថៃចំនួន៣នាក់ រងរបួសក្នុងអំឡុងពេលសង្គ្រាមកម្ពុជា-ថៃ និងត្រូវបានក្រុមសង្គ្រោះបញ្ជូនទៅកាន់មន្ទីរពេទ្យ Sappasitthiprasong នៅស្រុកវ៉ារីនឆាំរ៉ាប ខេត្តឧប៊ុនរ៉ាជថានី ។ បច្ចុប្បន្ន កងទ័ពថៃដែលរងរបួសបានទទួលការព្យាបាលជាសះស្បើយ និងទៅប្រចាំការនៅតំបន់ព្រំដែន ។

ហេតុនេះ សូមអ្នកលេងបណ្តាញសង្គមកុំចែកចាយវីដេអូចាស់ ដែលអ្នកបង្ហោះមានចេតនាមិនល្អធ្វើឱ្យពលរដ្ឋថៃផ្ទុះកំហឹងជាថ្មីរឿងគ្រាប់មីន ។ ស្ថានការណ៍ព្រំដែនកម្ពុជា-ថៃកាលពីថ្ងៃទី២៣ ខែវិច្ឆិកា គឺធម្មតា គ្មានការប៉ះទង្គិចគ្នាទេ ប៉ុន្តែកងទ័ពថៃត្រៀមខ្លួនគ្រប់ពេលវេលា ពុំធ្វេសប្រហែស ។ នេះបើតាមការលើកឡើងរបស់មន្ត្រីជាន់ខ្ពស់ក្នុងជួរកងទ័ពភូមិភាគទី២ ។

គួរបញ្ជាក់ថា ក្រុមជ្រុលនិយមថៃតែងតែផ្សាយព័ត៌មានបំភ្លៃ ចោទប្រកាន់កម្ពុជាបង្កប់មីនថ្មី និងលាបពណ៌កម្ពុជាបង្កើនកម្លាំងទ័ពនៅតំបន់ព្រំដែនឡើងវិញ ក្នុងគោលបំណងធ្វើឱ្យសង្គមថៃផ្ទុះកំហឹងឈានទៅជំរុញឱ្យកងទ័ពថៃធ្វើសង្គ្រាមឈ្លានពានកម្ពុជាម្តងទៀត ។ សង្គ្រាមរយៈពេល៥ថ្ងៃកន្លងមកកើតឡើងដោយសារព័ត៌មានញុះញង់ថា កម្ពុជាបង្កប់មីនថ្មីធ្វើឱ្យកងទ័ពថៃរងរបួស ទើបកងទ័ពថៃយកលេសបាញ់ប្រហារមុនមកលើកម្ពុជា ក្រោមហេតុផលការពារអធិបតេយ្យ ។

រហូតមកដល់ពេលនេះ គឺក្រោយពេលកម្ពុជា-ថៃបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងគូឡាឡាំពួរ ប្រទេសម៉ាឡេស៊ី ក៏ក្រុមជ្រុលនិយមថៃនៅតែព្យាយាមផ្សាយព័ត៌មានញុះញង់ ចែកចាយព័ត៌មានក្លែងក្លាយជាបន្តបន្ទាប់ដើម្បីទម្លាក់កំហុសលើកម្ពុជា ខណៈកម្ពុជាប្រកាន់គោលជំហរដោះស្រាយជម្លោះព្រំដែនដោយសន្តិវិធី និងគោរពកិច្ចព្រមព្រៀងសន្តិភាព ។ មតិមួយចំនួនថា ក្រុមជ្រុលនិយមថៃមិនត្រឹមតែផ្សាយព័ត៌មានបំប៉ោងស្ថានការណ៍ប៉ុណ្ណោះទេ ប៉ុន្តែពួកគេបានទាញប្រទេសថៃឱ្យធ្លាក់ទៅក្រោមការគ្រប់គ្រងរបស់ចិន ដោយសារធ្វើបាតុកម្មប្រឆាំងអាមេរិក ៕

ប្រទេសថៃ ៖ រហូតមកដល់ថ្ងៃទី២៣ ខែវិច្ឆិកា ឆ្នាំ២០២៥ កម្ពស់ទឹកជំនន់នៅស្រុកហាតយៃ ខេត្តសុងក្លា ប្រទេសថៃ នៅតែកើនឡើងមិនឈប់ឈរធ្វើឱ្យពលរដ្ឋថៃរងទុក្ខវេទនាកាន់តែខ្លាំង ដោយសារទឹកជំនន់ហូរពីតំបន់ព្រៃភ្នំភ្លាមៗបណ្តាលឱ្យលំនៅឋាន សាលារៀន មន្ទីរពេទ្យ ស្ពាន អគារ និងផ្លូវនានា លិចទឹកយ៉ាងធ្ងន់ធ្ងរឈានទៅប្រកាសអាសន្នកាលពីថ្ងៃទី២២ ខែវិច្ឆិកា ។ នេះជាប្រវត្តិសាស្ត្ររបស់ថៃ ពីព្រោះខេត្តសុងក្លាពុំធ្លាប់លិចទឹកខ្លាំងទេ ដែលស្ថានការណ៍នេះធ្វើឱ្យនាយករដ្ឋមន្ត្រីថៃ លោក Anutin Charnvirakul ជិះយន្តហោះមកពិនិត្យមើលទឹកជំនន់នៅខេត្តសុងក្លាជាបន្ទាន់ ស្របពេលខេត្តផ្សេងៗកំពុងលិចខ្លាំងដូចត្រូវបណ្តាសា ។

តាមការចុះផ្សាយរបស់សារព័ត៌មានថៃ កាលពីថ្ងៃទី២៣ ខែវិច្ឆិកា ខេត្តសុងក្លាទាំងមូលនៅតែលិចទឹកយ៉ាងខ្លាំង អាជ្ញាធរខេត្តបានប្រកាសអាសន្នពីទឹកជំនន់វាយប្រហារស្រុកចំនួន១០ ក្នុងនោះស្រុកហាតយៃលិចទឹកខ្លាំងជាងគេបណ្តាលឱ្យពលរដ្ឋរងទុក្ខវេទនាដង្ហើយរកជំនួយក្រោយពីកម្ពស់ទឹកជំនន់កើនឡើងមិនឈប់ឈរ ។ កម្ពស់ទឹកជំនន់កើនឡើងយ៉ាងឆាប់រហ័សដោយសារភ្លៀងធ្លាក់ខ្លាំងជាច្រើនថ្ងៃ ទើបទីប្រជុំជន តំបន់សេដ្ឋកិច្ច និងផ្លូវសំខាន់ៗនៅស្រុកនេះក្លាយជាបឹងល្ហល្ហេវ ខណៈពលរដ្ឋជម្លៀសទៅកាន់ទីខ្ពស់ទាំងអារម្មណ៍ភ័យខ្លាចគ្រប់ពេលវេលា ។

អាជ្ញាធរខេត្តប្រកាសអាសន្នពីគ្រោះថ្នាក់ ចំនួន១០ស្រុក រួមមាន ៖ ស្រុកហាតយៃ, ស្រុកមឿងសុងក្លា, ស្រុកបាងក្លាំ, ស្រុកខួននៀង, ស្រុកឃ្លងហយខូង, ស្រុកណាម៉ម, ស្រុករ៉ាត់ភូមិ, ស្រុកជាណាក់, ស្រុករ៉ាកណូត និងស្រុកសីងហាណាខន ។ ស្រុកហាតយៃបានលិចទឹកយ៉ាងធ្ងន់ធ្ងរបំផុតក្រោយពីទឹកហូរយ៉ាងឆាប់រហ័សបណ្តាលឱ្យលំនៅឋានជាច្រើនខ្នងលិចដល់ដំបូល, រថយន្ត និងហាងលក់ទំនិញផ្សេងៗខូចខាត, ផ្លូវជាច្រើនត្រូវបានទឹកហូរផ្តាច់, អាកាសយានដ្ឋានហាតយៃត្រូវបង្កើនការប្រុងប្រយ័ត្ន, សាលារៀន និងមន្ទីរពេទ្យជាច្រើនផ្លាស់ប្តូរម៉ោងពេល ខណៈភ្នាក់ងារសង្គ្រោះ និងកងទ័ពបង្កើនការជម្លៀសពលរដ្ឋគេចពីទឹកជំនន់ទាំងយប់ ។

ពលរដ្ឋជាច្រើនគ្រួសារនៅស្រុកហាតយៃ ខេត្តសុងក្លា ស្រែករកជំនួយពីអាជ្ញាធរ និងរដ្ឋាភិបាល ពីព្រោះពួកគេមិនត្រឹមតែខូចខាតទ្រព្យសម្បត្តិប៉ុណ្ណោះទេ ប៉ុន្តែទឹកជំនន់ធ្វើឱ្យពិបាករស់នៅ មិនថាការចម្អិនម្ហូបអាហារ ការធ្វើដំណើរ គ្មានទឹកផឹក និងខ្វះថ្នាំសង្កូវ ។ រីឯភ្លៀងនៅតែបន្តធ្លាក់មិនឈប់ឈរកាន់តែធ្វើឱ្យកម្ពស់ទឹកកើនឡើងថែមទៀត ដែលស្ថានការណ៍នេះធ្វើឱ្យពលរដ្ឋថៃបារម្ភខ្លាំង ហើយមិនសង្ឃឹមទឹកជំនន់នឹងស្រកឆាប់ៗទេ ។

គួរបញ្ជាក់ថា លោកនាយករដ្ឋមន្ត្រី Anutin ក៏បានទម្លាក់ការងារផ្សេងៗចោល និងជិះយន្តហោះមកពិនិត្យមើលស្ថានការណ៍ទឹកនៅខេត្តសុងក្លាជាបន្ទាន់ ហើយលោកក៏បានចែកស្បៀង និងថវិកាមួយចំនួនឱ្យពលរដ្ឋរងគ្រោះ ។ លោកសង្ឃឹមថា ស្ថានការណ៍ទឹកជំនន់នឹងធូរស្រាលវិញចាប់ពី៣ថ្ងៃ ទៅ៤ថ្ងៃទៀត ពេលនេះ ទឹកជំនន់បានវាយប្រហារស្ទើរគ្រប់ខេត្តរបស់ថៃ ដែលតម្រូវឱ្យរដ្ឋាភិបាលយកចិត្តទុកដាក់ខ្លាំងចំពោះសុខទុក្ខពលរដ្ឋ ។

ដោយឡែក ខេត្តថៃភាគខាងត្បូងមួយទៀត គឺខេត្តប៉ាត់តានី ក៏បានជន់លិចធ្ងន់ធ្ងរផងដែរនៅថ្ងៃទី២៤ ខែវិច្ឆិកានេះ ក្រោយពីមានភ្លៀងធ្លាក់ខ្លាំងជាច្រើនថ្ងៃចាប់ពីថ្ងៃទី១៧ ខែវិច្ឆិកា ដែលធ្វើឱ្យពលរដ្ឋពិបាកយ៉ាងខ្លាំង ។ តំបន់សេដ្ឋកិច្ចសំខាន់ៗ ផ្លូវ អគារនានាក្នុងខេត្តនេះហាក់ដូចជាស្ថិតនៅលើកោះ, រថយន្តតូចៗមិនអាចបើកបរនៅតាមផ្លូវ ខណៈហាងលក់ទំនិញត្រូវបិទទ្វារដោយសារទឹកហូរខ្លាំង ហាងខ្លះដឹកជញ្ជូនអីវ៉ាន់ចេញមិនទាន់ ។

អាជ្ញាធរខេត្តបានតាមដានស្ថានការណ៍យ៉ាងដិតដល់ និងប្រាប់ឱ្យពលរដ្ឋចៀសវាងធ្វើដំណើរនៅតំបន់ទឹកលិចជ្រៅ និងប្រមូលរបស់របរទៅកាន់ទីទួលខ្ពស់ ពីព្រោះកម្ពស់ទឹកនឹងកើនឡើងខ្ពស់បន្ថែមទៀតដោយសារទឹកហូរមកពីស្រុកជាច្រើននៅខេត្តយ៉ាឡា ឆ្ពោះមកខេត្តប៉ាត់តានី ៕

ប្រទេសថៃ ៖ ស្ថានការណ៍មិនសូវស្រួលកាន់តែក្តៅ! កងទ័ពថៃបានបញ្ជូនសព្វាវុ.ធ ដ្រូន និងកាំភ្លើ.ងធំ ទៅកាន់ភូមិហួយមហាវង្ស និងភូមិមេកូនគែន ឃុំមហាវ៉ាន់ ស្រុកមេសត ខេត្តតាក ព្រមទាំងបង្កើនការយាមល្បាតនៅព្រំដែនទាំងយប់ទាំងថ្ងៃ ក្រោយពីមានការប៉ះទង្គិចដោយអាវុ.ធរវាងកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលនៅព្រំដែនកាន់តែក្តៅខ្លាំង ដែលការប៉ះទង្គិចលើកចុងក្រោយបណ្តាលឱ្យគ្រា.ប់កាំភ្លើ.ងធ្លាក់ចូលសាលារៀននៅស្រុកមេសត ។ នេះបើតាមការចុះផ្សាយរបស់សារព័ត៌មាន Khaosod កាលពីថ្ងៃទី២៣ ខែវិច្ឆិកា ឆ្នាំ២០២៥ ។

រយៈពេលជាច្រើនខែមកនេះ មានការប៉ះទង្គិចដោយអាវុធរវាងកងទ័ពមីយ៉ាន់ម៉ាជាមួយកងកម្លាំងប្រឆាំងរដ្ឋាភិបាលនៅតំបន់ព្រំដែនជាប់ប្រទេសថៃមិនឈប់ឈរ និងមានពលរដ្ឋមីយ៉ាន់ម៉ារត់ភៀសខ្លួនចូលទឹកដីថៃ ។ ការប៉ះទង្គិចនេះធ្វើឱ្យកងទ័ពថៃតាមដានស្ថានការណ៍យ៉ាងដិតដល់ដើម្បីត្រៀមខ្លួនតបត ស្របពេលមតិផ្សេងៗលើកឡើងថា កងទ័ពថៃមិនហ៊ានតដៃជាមួយមីយ៉ាន់ម៉ា បានត្រឹមតែជូនដំណឹងពីការខូចខាតនៅខាងថៃប៉ុណ្ណោះ ។

កងកម្លាំងពិសេសថៃបានរាយការណ៍ពីការបង្កើនវិធានការតាមដាន និងការពារព្រំដែនថៃ-មីយ៉ាន់ម៉ា ដោយសារការប៉ះទង្គិចដោយអាវុធនៅមីយ៉ាន់ម៉ាបានកើតឡើងមិនឈប់ឈរ និងធ្វើឱ្យពលរដ្ឋមីយ៉ាន់ម៉ារត់ភៀសខ្លួនចូលទឹកដីថៃ ។ ថៃចាត់ទុកស្ថានការណ៍កាន់តែក្តៅខ្លាំងនៅមីយ៉ាន់ម៉ា គឺជាការគំរាមកំហែងសន្តិសុខរបស់ខ្លួន ទើបកងកម្លាំងពិសសថៃបង្កើនវិធានការយាមល្បាតយ៉ាងតឹងរ៉ឹងនៅព្រំដែនជាប់មីយ៉ាន់ម៉ា ។

កាលពីថ្ងៃទី២៣ ខែវិច្ឆិកា កងកម្លាំងពិសេសថៃបានពង្រាយកម្លាំងនៅតំបន់ព្រំដែនជាប់មីយ៉ាន់ម៉ាបន្ថែមទៀត ដោយពង្រឹងការយាមល្បាតរយៈពេល២៤ម៉ោង និងបង្កើតទីតាំងត្រួតពិនិត្យការឆ្លងដែនចេញ-ចូលនៅច្រកធម្មជាតិ និងតំបន់ផ្សេងៗ ។ លើសពីនេះ សព្វាវុធជាច្រើនត្រូវបានបញ្ជូនមកកាន់តំបន់ដើម្បីត្រៀមខ្លួនតបតជាមួយមីយ៉ាន់ម៉ា ប្រសិនបើស្ថានការណ៍កាន់តែឡើងកំដៅ ។

ក្រៅពីបង្កើនកម្លាំងទ័ព និងសព្វាវុធ ថៃក៏បានបញ្ជូនដ្រូនមកកាន់ព្រំដែនជាប់មីយ៉ាន់ម៉ាផងដែរ ដើម្បីតាមដានស្ថានការណ៍ពីលើអាកាសក្នុងចម្ងាយឆ្ងាយ ក៏ដូចជាបញ្ជូនឧបករណ៍ប្រឆាំងដ្រូន និងឧបករណ៍កងទ័ពជាច្រើនប្រភេទ ដូចជា ៖ ប្រព័ន្ធត្រួតពិនិត្យស្ថានការណ៍ និងគ្រាប់កាំភ្លើង ។ ការត្រៀមខ្លួនរបស់កងទ័ពថៃសម្រាប់ទប់ទល់នឹងការប៉ះទង្គិចអូសបន្លាយកាន់តែមានហិង្សានៅមីយ៉ាន់ម៉ា ព្រមទាំងទំនាក់ទំនងជាមួយអាជ្ញាធរមូលដ្ឋាន និងសន្តិសុខប្រចាំភូមិឱ្យបង្កើនទីតាំងត្រួតពិនិត្យនៅតាមភូមិ ។

កងទ័ពថៃអះអាងថា ការបញ្ជូនកងកម្លាំង សព្វាវុ.ធ ដ្រូន និងកាំភ្លើ.ងធំ គឺដើម្បីការពារអធិបតេយ្យ និងផ្តល់សុវត្ថិភាពឱ្យពលរដ្ឋ ដោយសារការប៉ះទង្គិចដោយអាវុធរវាងកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលនៅភូមិមិនឡាប៉ាន ស្រុកមៀវឌី ខេត្តមៀវឌី ។ កងទ័ពមីយ៉ាន់ម៉ាព្យាយាមដណ្តើមយកតំបន់ឈរជើងរបស់កងកម្លាំងប្រឆាំងរដ្ឋាភិបាលនៅភូមិមិនឡាប៉ាន ប៉ុន្តែត្រូវភាគីម្ខាងទៀតបាញ់ទៅវិញ ដែលបណ្តាលឱ្យគ្រាប់កាំភ្លើងធ្លាក់ចូលទឹកដីថៃខូចខាតលំនៅឋាន និងទ្រព្យសម្បត្តិពលរដ្ឋមួយចំនួនធំ ៕