បរទេស៖ ក្រុមតាលីបង់បានចាប់ខ្លួនស្ត្រី ៥ នាក់ដែលបានចូលរួមក្នុងការតវ៉ានៅក្នុងរដ្ឋធានីកាប៊ុលរបស់ប្រទេសអាហ្វហ្គានីស្ថាន ប្រឆាំងនឹងការហាមឃាត់ស្ត្រីឱ្យចូលរៀននៅសាកលវិទ្យាល័យ។

នាថ្ងៃទី ២៣ ខែធ្នូ ឆ្នាំ២០២២ មានសេចក្ដីរាយការណ៍ពីទីភ្នាក់ងារក្នុងស្រុកបានឱ្យដឹងថា មានបាតុកររាប់សិបនាក់បានធ្វើការតវ៉ា នៅក្នុងប្រទេសអាហ្វហ្គានីស្ថាន ជាមួយនឹងរដ្ឋាភិបាល តាលីបង់ ដែលបានសម្រេចអនុម័តច្បាប់ហាមលែងឱ្យសិស្សស្រីចូលរៀនបន្តក្នុងសកលវិទ្យាល័យបន្តទៀត។

ក្នុងនោះរូបភាពដែលបានចែករំលែកនៅលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍ម្សិលមិញនេះបង្ហាញពីស្ត្រីជនជាតិអាហ្វហ្គានីស្ថានប្រហែល ២០ នាក់ដែលស្លៀកពាក់ហ៊ីយ៉ាបកំពុងដើរតាមដងផ្លូវនៃទីក្រុងកាប៊ុល កាន់ស្លាកសញ្ញា និងស្រែកពាក្យស្លោកបង្ហាញពីអារម្មណ៍ប្រឆាំងនឹងការអនុម័តនេះ។

ដំបូងឡើយ ក្រុមនេះគ្រោងនឹងប្រមូលផ្តុំនៅមុខសាកលវិទ្យាល័យកាប៊ុល ដែលជាស្ថាប័នអប់រំធំជាងគេ និងមានកិត្យានុភាពបំផុតរបស់ប្រទេស ប៉ុន្តែត្រូវបានផ្លាស់ប្តូរទីតាំងរបស់ខ្លួន បន្ទាប់ពីអាជ្ញាធរបានបញ្ជូនបុគ្គលិកសន្តិសុខជាច្រើននៅទីនោះ។

ទោះជាយ៉ាងណាស្ត្រីជាច្រើននាក់ដែលចូលរួមក្នុងការតវ៉ាបាននិយាយដូច្នេះថា ពួកគេត្រូវបានមន្ត្រី តាលីបង់វាយដំ ខ្លះត្រូវបានចាប់ខ្លួន ហើយស្ត្រីអ្នកតវ៉ាម្នាក់ដែលមិនស្គាល់អត្តសញ្ញាណបាននិយាយ ថា នាងត្រូវបានគេវាយដំយ៉ាងធ្ងន់ធ្ងរ ប៉ុន្តែអាចគេចពីការឃុំខ្លួនបាន ស្របពេលដែលអ្នកតវ៉ាម្នាក់ទៀត បានប្រាប់ថាខ្លួនត្រូវបានពួកគេដោះលែង ប៉ុន្តែមនុស្សជាច្រើនផ្សេងទៀតត្រូវបានជាប់ឃុំឃាំង។

គួរបញ្ជាក់ថាសិទ្ធស្ត្រីក្នុងប្រទេសអាហ្វហ្គានីស្ថានត្រូវបានរឹតបណ្ដឹងជាខ្លាំងបន្ទាប់ពីរដ្ឋាភិបាលតាលីបង់ឡើងកាន់អំណាចក្នុងឆ្នាំ២០២១៕ ប្រភព៖ Thairath

ភ្នំពេញ៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានប​ង្ហាញក្តីរំពឹងថា រដ្ឋាភិបាលចិននឹងជួយស្តារ ក៏ដូចជាជីកព្រែក នៅតាមទន្លេបាសាក់ ពីព្រែកអំបិល ទៅសមុទ្រ ដើម្បីសម្រួលដល់ការដឹកជញ្ជូនតាមផ្លូវទឹក។

ថ្លែងក្នុងពិធីបិទវេទិកាវិទ្យាសាស្ត្រស្ដីពី «ទំនាក់ទំនងកម្ពុជា-ចិន និងរំឭកខួប១០០ព្រះវស្សារបស់ព្រះបរមរតនកោដ្ឋ» នាព្រលប់ថ្ងៃទី២២ ខែធ្នូ ឆ្នាំ២០២២ លោកបណ្ឌិត សុខ ទូច បានលើកឡើងដូច្នេះថា៖ «បើយើងចង់ទៅសមុទ្រយើងត្រូវជីកប្រឡាយ ហើយសង្ឃឹមថា មិត្តចិននឹងជួយសហការជីកព្រែក»។

លោក​បណ្ឌិតបានបន្តថា សម្រាប់ការរៀបចំផែនការស្ដារផ្លូវទឹក និងការសាងសង់ផែរណបរបស់កម្ពុជា គឺជាទិសដៅមួយដែលមានសារៈសំខាន់ណាស់ ក្នុងការធ្វើឱ្យចម្ងាយដឹកជញ្ជូនពីគ្រប់ផ្លូវទន្លេ ទៅកាន់សមុទ្រកម្ពុជាកាន់តែខ្លី កាត់បន្ថយពេលវេលា និងចម្ងាយដឹកជញ្ជូន ចំណេញថវិកា ក្នុងការដឹកជញ្ជូន កាត់បន្ថយគ្រោះថ្នាក់ចរាចរណ៍ និងសម្ពាធនៃការប្រើប្រាស់ផ្លូវ ព្រមទាំងបង្កើនសកម្មភាពដឹកជញ្ជូន តាមផ្លូវទឹកកាន់តែច្រើនផងដែរ។

«យើងនាំតាមផ្លូវគោក គឺមានតម្លៃខ្ពស់ណាស់ តែបើយើងនាំតាមផ្លូវទឹករឹតតែថោក យើងដឹងហើយ១០០ឡាន ស្មើនឹងមួយទូរទេះភ្លើង ១០រទេះភ្លើង បាន១នាវា ដូច្នេះ មាននាវាដឹកនាំទំនិញ ធ្វើឱ្យតម្លៃកាន់តែថោក នឹងធ្វើទំនិញកាន់តែងាយស្រួលប្រកួតប្រជែង»។

បណ្ឌិត សុខ ទូច បានថ្លែងថា កម្ពុជា និងចិន កំពុងមានទំនាក់ទំនងជាមួយគ្នាលើ៥ចំណុចធំៗ តាំងពីអតីត បច្ចុប្បន្ន រហូតដល់អនាគត ក្នុងនោះមានប្រវត្តិសាស្ត្រ សេដ្ឋកិច្ច វប្បធម៌ បរិស្ថាន និងពេលទៅថ្ងៃអនាគត។

ក្នុងចំណោមទាំង ៥ចំណុចនេះ គឺផ្នែកសេដ្ឋកិច្ច ដោយចិនបានជួយធ្វើឲ្យកម្ពុជាឱ្យមានការរីកចម្រើនផងដែរ តាមរយៈការវិនិយោគមកលើវិស័យផ្សេងៗ ហើយបានធ្វើឱ្យតម្លៃអចលនទ្រព្យនៅកម្ពុជា មានការកើនឡើង។ លោកបណ្ឌិតសង្ឃឹមថា នៅពេលចប់កូវីដ-១៩ វិនិយោគគិនចិន នឹងមកបណ្ដាក់ទុកវិនិយោគនៅកម្ពុជាច្រើនឡើងបន្ថែមទៀត។

សូមជម្រាបថា រាជរដ្ឋាភិបាលបានអនុញ្ញាតឱ្យក្រសួងសាធារណការ និងដឹកជញ្ជូន ធ្វើការសិក្សាពីការស្ដារផ្លូវទឹក នៅតាមទន្លេបាសាក់ ពីព្រែកអំបិល ទៅខេត្តតាកែ, ខេត្តកំពត និងខេត្តកែប មានចម្ងាយ១៦៨គីឡូម៉ែត្រ។

ទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ក្រសួងនឹងជីកព្រែកថ្មីសុទ្ធសាធប្រវែងចន្លោះ ៥-៧គីឡូម៉ែត្រ តភ្ជាប់គ្នារវាងទន្លេ និងសមុទ្រ ដើម្បីសម្រួលដល់ការដឹកជញ្ជូនតាមផ្លូវទឹកពីទន្លេទៅកំពង់ផែសមុទ្រកែប។

អគ្គនាយកដ្ឋានដឹកជញ្ជូនផ្លូវទឹកសមុទ្រ និងកំពង់ផែ នៃក្រសួងសាធារណការ និងដឹកជញ្ជូន បានសិក្សាមួយជំហានហើយ ជុំវិញដំណើរការនេះ ដោយលទ្ធផលបញ្ជាក់ថា ក្នុងចម្ងាយផ្លូវទឹក ១៦៨គីឡូម៉ែត្រ ពីព្រែកអំបិលទៅតាកែវ និងភ្ជាប់ទៅកំពង់ផែកែប ស្មើនឹង ៦៨ភាគរយ គឺជាទន្លេដែលមានស្រាប់ និងជាង ២០ភាគរយ គឺជាប្រព័ន្ធធារាសាស្រ្ត ដែលត្រូវស្តារ និងពង្រីកបន្ថែម។

បច្ចុប្បន្ននេះ កម្ពុជា កំពុងមានការរីកម្រើនជាលំដាប់លើវិស័យដឹកជញ្ជូនទាំងផ្លូវគោក និងផ្លូវទឹក។ រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន បានពង្រីកសក្តានុពលវិស័យដឹកជញ្ជូនតាមផ្លូវទឹក ឱ្យកាន់តែទូលំទូលាយ ដើម្បីជាផ្នែកមួយជួយដល់កំណើនសេដ្ឋកិច្ចជាតិ៕

រដ្ឋធានីវ៉ាស៊ីនតោន៖ បណ្ដាញចារកម្មរបស់សហរដ្ឋអាមេរិក និង មន្រ្ដីជាន់ខ្ពស់របស់ចក្រភពអង់គ្លេស បានអះអាង ថា ក្រុមហ៊ុនទាហានស៊ីឈ្នួលរបស់រុស្ស៊ី គាំទ្រដោយវិមានក្រឹមឡាំង បានទិញគ្រឿងយុទ្ធោបករណ៍ ពីប្រទេសកូរ៉េខាងជើង ហើយនេះជាសញ្ញាមួយ បង្ហាញអំពីការអស់សង្ឃឹមរបស់លោក ពូទីន នៅក្នុងការងាកទៅរកជំនួយ ពីប្រទេសកុម្មុយនិស្ដឯកោមួយនេះ ដែលប្រឆាំងនឹងទណ្ឌកម្មរបស់អង្គការសហប្រជាជាតិ។

ទីភ្នាក់ងារសារព័ត៌មានរបស់អាល្លឺម៉ង់ DW បានចេញផ្សាយ កាលពីព្រឹក ថ្ងៃសុក្រ ទី២៣ ខែធ្នូ ថា ការវាយតម្លៃផ្នែកស៊ើបការណ៍សម្ងាត់របស់សហរដ្ឋអាមេរិក បានរកឃើញ ថា កូរ៉េខាងជើង បានផ្គើននឹងទណ្ឌកម្មរបស់អង្គការសហប្រជាជាតិ ដោយបានបញ្ជូនគ្រឿងសព្វាវុធ ទៅឲ្យក្រុមទាហានស៊ីឈ្នួលរបស់រុស្ស៊ី ឈ្មោះ Wagner (វ៉ាគន័រ) ដែលមានកម្លាំងទាហានប្រមាណ ៥០ ០០០នាក់ កំពុងតែប្រយុទ្ធ នៅក្នុងប្រទេសអ៊ុយក្រែន។

ក្រុងវ៉ាស៊ីនតោន បានបញ្ជាក់ កាលពីថ្ងៃព្រហស្បតិ៍ ថា កូរ៉េខាងជើង បានសម្រេចដឹកជញ្ជូនគ្រឿងសព្វាវុធយ៉ាងច្រើន បញ្ជូនទៅឲ្យក្រុមហ៊ុនទាហានស៊ីឈ្នួល Wagner Group រួមមាន គ្រាប់រ៉ុក្កែត និង មីស៊ីល …ជាដើម។ ការវាយតម្លៃផ្នែកចារកម្មចុងក្រោយរបស់សហរដ្ឋអាមេរិក បានកើតឡើង ចំពេលមានការព្រួយបារម្ភ កាន់តែខ្លាំងឡើង ថា ក្រុមហ៊ុនទាហានស៊ីឈ្នួលឯកជនដ៏ល្បីល្បាញរបស់រុស្ស៊ី មួយនេះ បាន និង កំពុងតែដើរតួនាទីយ៉ាងសំខាន់ នៅក្នុងសង្គ្រាមរបស់ក្រុងម៉ូស្គូ ប្រឆាំងងនឹងអ៊ុយក្រែន។

លោក ចន ឃើរប៊ី (John Kirby) អ្នកនាំពាក្យ ក្រុមប្រឹក្សាសន្ដិសុខជាតិ ប្រចាំនៅសេតវិមាន បានបញ្ជាក់ ថា «យើងវាយតម្លៃឃើញ ថា ចំនួនគ្រឿងសឹកមួយចំនួន ត្រូវបានបញ្ជូនចេញពីប្រទេសកូរ៉េខាងជើង យកទៅផ្គត់ផ្គង់ដល់ក្រុមហ៊ុនទាហានស៊ីឈ្នួល Wagner ដែលកំពុងតែប្រយុទ្ធជាមួយនឹងកងទ័ពអ៊ុយក្រែន។ ប៉ុន្ដែសកម្មភាពបែបនេះ នឹងមិនធ្វើឲ្យមានការផ្លាស់ប្តូរស្ថានការណ៍ នៅលើសមរភូមិ នៅក្នុងប្រទេសអ៊ុយក្រែ នោះឡើយ។

អ្នកនាំពាក្យ រូបនេះ បានបន្ថែម ថា ក្រុមមន្ត្រីស៊ើបការណ៍សម្ងាត់របស់សហរដ្ឋអាមេរិក បានកំណត់ ថា កូរ៉េខាងជើង បានសម្រេចបញ្ជូនគ្រឿងសព្វាវុធ ជាលើកដំបូង កាលពីខែមុន ដោយកត់សម្គាល់ឃើញ ថា សហរដ្ឋអាមេរិក មានការព្រួយបារម្ភ អំពីផែនការរបស់កូរ៉េខាងជើង នៅក្នុងការផ្គត់ផ្គង់គ្រឿងយុទ្ធោបករណ៍បន្ថែមទៀត។

ស្របគ្នានេះដែរ លោក ជេមស៍ ក្លេវើរលី (James Cleverly) រដ្ឋមន្រ្ដី ក្រសួងការបរទេសចក្រភពអង់គ្លេស បានថ្កោលទោសដល់ប្រទេសកូរ៉េខាងជើង ចំពោះការផ្គត់ផ្គង់គ្រឿងសឹក ទៅឲ្យរុស្ស៊ី។ លោករដ្ឋមន្រ្ដី បានអះអាង ថា ប្រធានាធិបតីរុស្ស៊ី លោក វ៉្លាឌីមៀ ពូទីន កំពុងតែងាក ទៅរកជំនួយ ពីប្រទេសកូរ៉េខាងជើង។ សកម្មភាពបែបនេះ ជាសញ្ញាមួយ បង្ហាញអំពីការអស់សង្ឃឹម និង ភាពឯកោរបស់រុស្ស៊ី។

ទោះជាយ៉ាងណា ក្រសួងការបរទេសកូរ៉េខាងជើង បានចេញមុខ មកអះអាង ថា ក្រុងព្យុងយ៉ាង មិនបានផ្គត់ផ្គង់ ឬ លក់គ្រឿងសព្វាវុធណាមួយ បញ្ជូនទៅឲ្យក្រុមហ៊ុនទាហានស៊ីឈ្នួលរបស់រុស្ស៊ី នោះឡើយ។ កូរ៉េខាងជើង សូមបដិសេធនូវសេចក្ដីរាយការណ៍ ដោយគ្មានមូលដ្ឋានច្បាស់លាស់ទាំងនេះ។

ទីភ្នាក់ងារសារព័ត៌មាន គ្រប់គ្រងដោយរដ្ឋ កូរ៉េខាងជើង KCNA បានរាយការណ៍ ថា សាធារណរដ្ឋប្រជាមានិតកូរ៉េ នៅតែមិនមានការផ្លាស់ប្ដូរនូវគោលជំហររបស់ខ្លួន លើបញ្ហាប្រតិបត្តិការគ្រឿងសព្វាវុធ រវាងកូរ៉េខាងជើង និង រុស្ស៊ី។

អ្នកនាំពាក្យ ក្រសួងការបរទេសកូរ៉េខាងជើង បានអះអាង ថា កូរ៉េខាងជើង មិនបានលក់គ្រឿងសព្វាវុធ ទៅឲ្យរុស្ស៊ី នោះឡើយ។ បញ្ហានេះ មានតែសហរដ្ឋអាមេរិក ប៉ុណ្ណោះ កំពុងតែបញ្ជូនអាវុធ ទៅបង្ហូរឈាម និង បំផ្លិចបំផ្លាញ នៅក្នុងប្រទេសអ៊ុយក្រែន។

លោក ចន ឃើរប៊ី បានអះអាងទៀត ថា ក្រុមចារកម្មសហរដ្ឋអាមេរិក បានរកឃើញ ថា ក្រុមហ៊ុនទាហានស៊ីឈ្នួល Wagner មានកម្លាំងទ័ព ប្រហែល ៥០ ០០០នាក់ កំពុងតែប្រយុទ្ធ នៅលើសមរភូមិ នៅក្នុងប្រទេសអ៊ុយក្រែន។ ក្រុមហ៊ុនមួយនេះ ត្រូវបានគ្រប់គ្រង ដោយមនុស្សដ៏ជិតស្និទ្ធជាមួយនឹងប្រធានាធិបតីរុស្ស៊ី លោក វ៉្លាឌីមៀ ពូទីន ហើយពួកគេកំពុងតែចំណាយលុយ ប្រហែល១០០លានដុល្លារ នៅក្នុង១ខែៗ សម្រាប់ការចូលរួមធ្វើសង្គ្រាមនេះ៕

បរទេស៖ ក្រុមហ៊ុនអាកាសចរណ៍អាមេរិកបានសម្រេចលុបចោលជើងហោះហើរជាង ៣,០០០ រួចហើយកាលពីថ្ងៃព្រហស្បតិ៍ និងថ្ងៃសុក្រនេះ ពីឥទ្ធិពលនៃព្យុះនៃរដូវរងា ដែលនឹងធ្វើឱ្យប្រជាជនអាមេរិកស្ទើរតែទាំងអស់ប្រឈមមុខនឹងអាកាសធាតុត្រជាក់បំផុតក្នុងរយៈពេល ៤០ ឆ្នាំ ជាមួយនឹងសីតុណ្ហភាព -៤៥ អង្សាសេនាឱកាសបុណ្យណូអែលខាងមុខ។

នាថ្ងៃទី២៣ ​ខែធ្នូ ឆ្នាំ២០២២ របាយការណ៍ពីសារព័ត៌មាន CNN បានរាយការណ៍ថា ក្រុមហ៊ុនអាកាសចរណ៍នៅសហរដ្ឋអាមេរិកបានលុបចោលជើងហោះហើរជាង ២,០០០ នៅទូទាំងប្រទេសគិតត្រឹមថ្ងៃ ទី ២២ ខែធ្នូ នេះ ហើយបានសម្រេចលុបចោលជើងហោះហើរជាង ១,០០០ បន្ថែមនៅព្រឹកថ្ងៃសុក្រនេះ បន្ទាប់ពីមានព្យុះរដូវរងាបាននាំមកនូវភ្លៀង ព្រិល និងខ្យល់បក់យ៉ាងខ្លាំង ហើយបានបង្វែរជើងហោះហើរជាង ៥,៣០០ ។

ជាមួយគ្នានោះរដ្ឋបាលអាកាសចរណ៍សហព័ន្ធអាមេរិក (FAA) បាននិយាយថា យន្តហោះកំពុងចាកចេញពីអាកាសយានដ្ឋានមួយចំនួន ត្រូវបានចាត់ដំណោះស្រាយ ដោយយកទឹកកកចេញ ដើម្បីធ្វើ ដំណើរដោយសុវត្ថិភាពខណៈ ព្រលានធំៗទាំងបី ក្នុងរដ្ឋញូវយ៉កត្រូវបានគេព្រមានអ្នកធ្វើដំណើរថាព្យុះទឹកកកក្នុងរដូវរងាអាចប៉ះពាល់ដល់ការធ្វើដំណើររបស់ពួកគេ។

ទោះជាយ៉ាងណាសេវាអាកាសធាតុជាតិសហរដ្ឋអាមេរិក បានព្រមានប្រជាជននៅសហរដ្ឋអាមេរិកទាំងអស់ថា នឹងប្រឈមមុខជាមួយនឹងរដូវបុណ្យណូអែលដ៏ត្រជាក់បំផុតក្នុងរយៈពេល ៤០ ឆ្នាំ ហើយប្រជាជននៅសហរដ្ឋអាមេរិកគួរតែត្រៀមខ្លួនដើម្បីប្រឈមមុខនឹងសីតុណ្ហភាពត្រជាក់ក្រោមសូន្យ ដោយតំបន់ខ្លះអាចមានសីតុណ្ហភាព -៤៥ អង្សាសេ ដែលអាចបង្កគ្រោះថ្នាក់ដល់ស្បែក និងសុខភាពអ្នកជំងឺ និងមនុស្សចាស់៕ ប្រភព៖ Thairath

ប្រទេសថៃ៖ ក្លាយជារឿងដ៏គួរឱ្យចាប់អារម្មណ៍ និងពិតជាទប់សំណើចមិនជាប់ ក្រោយពីមហាជនបានឃើញនូវរូបភាពនៃក្រុមប៉ូលិសធ្វើការឃាត់ខ្លួនបុរសម្នាក់ស្លៀកពាក់រូបរាងជា Avatar ជិះម៉ូតូតែមិនមានមួកការពារសុវត្ថិភាព។

កាលពីពេលថ្មីៗកន្លងទៅនេះមហាជនច្បាស់ជាបានជ្រាបរួចមកហើយជាមួយនឹងខ្សែរភាពយន្ត Avatar ភាគ ២ដ៏ល្បី និងកំពុងតែចាក់បញ្ជាំងនូវគ្រប់រោងកុនក្នុងបណ្ដាប្រទេសមួយចំនួន រហូតមានមនុស្សម្នាមួយចំនួនតូចបានស្លៀកពាក់ដូចជាតួអង្គ Avatar ក្នុងរឿងដើម្បីបង្ហាញចូលទៅក្នុងបណ្ដាញសង្គម ព្រោះតែទំហំនៃការគាំទ្រ និងពេញចិត្តជាមួយនឹងរឿងប្រភេទនេះ។

ទោះជាយ៉ាងណាក្រឡេកទៅកាន់ប្រទេសថៃវិញ ស្រាប់តែមានបុរសម្នាក់​បានសម្រេចចិត្តស្លៀកពាក់ជា Avatar ក្នុងឈុតពណ៌ខៀវ នឹងមានរូបរាងដូចទៅនឹងតួអង្គពិតៗ បានជិះម៉ូតូបង្អួតនូវរូបរាងថ្មីដូចទៅនឹងតួ អង្គក្នុងរឿងភាគល្បីនៅតាមទីសាធារណៈ។

ជាមួយគ្នានោះខណៈកំពុងតែជិះបង្អួតរូបរាង ស្រាប់តែប៉ូលិសមួយក្រុមបានធ្វើការឃាត់ខ្លួន ​ជាមួយនឹងការល្មើលជាមួយនឹងច្បាប់ចរាចរដែលលោក Avatar ម្នាក់នេះមិនព្រមពាក់មួកការពារ ដូច្នេះទើបឃាត់ខ្លួនដើម្បីណែនាំ និងដោះស្រាយតាមច្បាប់។

ទោះជាយ៉ាងណាបន្ទាប់ពីមានការបង្ហោះនូវរូបភាពនេះរួចមកក៏បានធ្វើឱ្យមហាជនជាច្រើនស្ទើទប់សំណើចមិនបាន និងលើកឡើងថាសូម្បីតែ Avatar ក៏ប៉ូលិសចាប់ដែរ ​ឱ្យតែមិនព្រមពាក់មួកការពារសុវត្ថិភាព៕ ប្រភព៖ Kapook