តារាចម្រៀង កែវ ច័ន្ទដាលីន អតីតបេក្ខនាទី X Factor Cambodia រដូវកាលទី១ បានធ្វើឱ្យមនុស្សជាច្រើនកោតសរសើរពីទឹកដមសំឡេងរបស់នាងក្រោយពីបកស្រាយបទ «Waka Waka» របស់តារាចម្រៀងល្បី Shakira ។ អ្នកមួយចំនួនបានលើកឡើងថា ដាលីន ច្រៀងសឹងតែដូចម្ចាស់ដើម ខណៈមានអ្នកខ្លះថែមទាំងនិយាយថាគ្រាន់បើជាង Lisa ទៅទៀត។
ស្របពេលដែលរដូវកាល World Cup បានមកដល់នៅក្នុងកម្មវិធីប្រគំតន្រ្តីមួយបានរៀបចំជាមួយនឹង concept ទាក់ទងនឹងព្រឹត្តិការណ៍នេះដោយសិល្បករចូលរួមបានលើកយកបទចម្រៀងទាក់ទងនឹងស្មារតីកីឡា។ កម្មវិធីនេះទទួលបានការចាប់អារម្មណ៍ជាពិសេសនៅពេលតារាចម្រៀង កែវ ច័ន្ទដាលីន និង សុខ សីឡាលីន បានបកស្រាយបទចម្រៀងជាភាសាបរទេសរបស់តារាចម្រៀងល្បីឈ្មោះ Shakira ជាពិសេសគឺតារាចម្រៀង កែវ ច័ន្ទដាលីន ផ្ទាល់តែម្តងដោយការច្រៀងរបស់នាងទទួលបានមតិវិជ្ជមានពីទស្សនិកជន។
នៅក្នុងកម្មវិធីនេះ កែវ ច័ន្ទដាលីន បានបកស្រាយបទ «Waka Waka» ដែលជាបទល្បីល្បាញបំផុតមួយរបស់ព្រឹត្តិការណ៍ World Cup ដែលបានចេញនៅឆ្នាំ២០១០។ អ្នកលេងបណ្តាញសង្គមជាច្រើនបានសរសើរដាលីន ជាមួយនឹងមតិល្អៗថា «សម្លេងម្ចាស់ដើមនិងម្ចាស់ចុងមិនសូវខុសគ្នាទេ, ឡូយណាស់បង, Wow ច្រៀងបទបរទេសឆ្ងាញ់លេខ1ហ្មងidol , សម្លេងឡូយណាស់…, សំឡេងពីរោះចង់ដូចម្ចាស់ដើមហើយ, Dalin អេមខ្លាំងខ្លាំង , Wow នេះបានគុណភាពមែន សសើរម៉ងដាលីន , គ្រាន់បើជាង Lisa»។
គួរឱ្យដឹងថាក្រៅពីអាជីពសិល្បៈ កែវ ច័ន្ទដាលីន ក៏មានហាងលក់ភេសជ្ជៈផ្ទាល់ខ្លួនផងដែរ។ ដាលីន បានធ្វើឱ្យទស្សនិកជនស្គាល់តាមរយៈការប្រកួតក្នុងកម្មវិធី X Factor Cambodia រដូវកាលទី១ ក្នុងឆ្នាំ២០១៩ ជាមួយនឹងការច្រៀងជាភាសាបរទេសដែលមានសំឡេងខ្ពស់ល្អ។ ក្រោយពីបញ្ចប់ការប្រកួត កែវ ច័ន្ទដាលីន បានក្លាយជាតារាចម្រៀងម្នាក់នៅក្នុងផលិតកម្មរស្មីហង្សមាស៕
