ប្រទេសថៃ៖ ថៃបាន​​ធ្វើការប្រកាស ដល់អភិបាលទូទាំងប្រទេស ដោយជូនដំណឹងដល់ទីភ្នាក់ងាររដ្ឋាភិបាលថា គ្មានគោលនយោបាយណាមួយហាមមិនឲ្យមានការរៀបចំការស្វាគមន៍ឆ្នាំថ្មី២០២៣នោះឡើយ ប៉ុន្តែត្រូវអនុវត្តយ៉ាងតឹងរ៉ឹងនូវ ៥ ចំណុចនេះដើម្បីការពារពីគ្រោះថ្នាក់ជាយកថាហេតុ ជាពិសេសចៀសវាងការរត់ជាន់គ្នាស្លាប់ដូចនៅក្នុងប្រទេសកូរ៉េកាលពីកន្លងទៅ។

កាលពីថ្ងៃទី២៦ ខែធ្នូ ឆ្នាំ២០២២នេះ អ្នកសារព័ត៌មានបានរាយការណ៍ថាក្រសួងមហាផ្ទៃ បានចេញលិខិតបន្ទាន់ ចុះថ្ងៃទី២៦ ខែធ្នូ ឆ្នាំ២០២២ ស្តីពីការអានុញ្ញាតឱ្យប្រារព្ធពិធីឬព្រឹត្តិការណ៍ពិសេសៗដើម្បី ស្វាគមន៍ឆ្លងឆ្នាំថ្មី ចូលឆ្នាំសកល ២០២៣ នៅចន្លោះថ្ងៃទី ៣០ ខែធ្នូ ឆ្នាំ ២០២២ ដល់ថ្ងៃទី ២ ខែមករា ឆ្នាំ ២០២៣ ។

ទោះជាយ៉ាងណាការអនុញ្ញាតនេះត្រូវបានស្ថិតនៅក្រោមគោលនយោបាយ និងវិធានការទាំង៥ចំណុចដូចតទៅ៖

១.សង្កត់ធ្ងន់លើម៉ោង ឬពេលវេលា បើក និងបិទកន្លែងផ្តល់សេវាកម្ម

ក្នុងនោះរួមមានការហាមឃាត់មនុស្សដែលមានអាយុតិចមិនស្របច្បាប់ក្នុងការប្រើសេវាកម្ម បន្ថែមពីលើនេះ ត្រូវមានការចុះឈ្មោះរបស់ភ្ញៀវអ្នកស្នាក់នៅឱ្យបានត្រឹមត្រូវ ចៀសវាងបទល្មើសពាក់ព័ន្ធនឹងការជួញដូរមនុស្ស ពេស្យាចារ ល្បែងស៊ីសង និងការលក់គ្រឿងស្រវឹង ឬគ្រឿងញៀន។

២.  មុនឈាចូលដល់ថ្ងៃប្រារព្ធពិធី សម្រាប់ខេត្ត ស្រុក ត្រូវត្រួតពិនិត្យទីតាំង រួមជាមួយនឹងរដ្ឋបាលមូលដ្ឋាន ក៏ដូចជាស្ថាប័នពាក់ព័ន្ធផ្សេងទៀត ដោយសង្កត់ធ្ងន់លើការត្រួតពិនិត្យ អំពីប្រព័ន្ធសុវត្ថិភាពអគារ រួមទាំងប្រព័ន្ធការពារចរន្ធភ្លើង ដើម្បីបង្កើតសុវត្ថិភាពជូនប្រជាពលរដ្ឋ និងអ្នកដែលប្រើប្រាស់សេវាកម្មនៅកន្លែងកម្សាន្តផ្សេងៗ។

៣.  ជូនដំណឹងដល់សហគ្រិនត្រូវគិតគូរពីចំនួនមនុស្សដែលប្រើប្រាស់សេវាកម្ម ឬចូលរួមក្នុងសកម្មភាពនានា ទាក់ទងនឹងប្រភេទអាជីវកម្ម ការប្រើប្រាស់អគារ កុំឱ្យមានមនុស្សច្រើនលើសពេក ដើម្បីការពារហានិភ័យនៃការស្លាប់ ដូចករណីរបស់ប្រទេសកូរ៉េកន្លងទៅ។

៤. ត្រួតពិនិត្យថាសហគ្រិនគោរពតាមផ្លូវច្បាប់ឬអត់ និងមានវិធានការអនាម័យដើម្បីការពារហានិភ័យ ពីជំងឺ កូវីដ-១៩ឬទេ ដែលស្របតាមការអនុវត្តនៃសេចក្តីជូនដំណឹងរបស់ក្រសួងសុខាភិបាល ស្តីពីលក្ខណៈវិនិច្ឆ័យ និងវិធានការអនាម័យ ដើម្បីការពារហានិភ័យពីជំងឺកូវីដ១៩។

៥. ក្នុងអំឡុងពេលពិធី ស្វាគមន៍ឆ្នាំថ្មី ២០២៣  ចន្លោះពីថ្ងៃទី ៣០ ខែធ្នូ ឆ្នាំ ២០២២ ដល់ថ្ងៃទី ២ ខែមករា ឆ្នាំ ២០២៣ សម្រាប់ខេត្ត ស្រុក ត្រូវធ្វើសមាហរណកម្មជាមួយភ្នាក់ងារពាក់ព័ន្ធក្នុងតំបន់ ក្នុងការត្រួតពិនិត្យគ្រឹះស្ថាន ដើម្បីអនុវត្តតាមច្បាប់ ក្នុងការធានាសុវត្ថិភាព និងការពារការខូចខាតដល់អាយុជីវិត និងទ្រព្យសម្បត្តិសាធារណៈ និងអ្នកដែលបានប្រើប្រាស់សេវាកម្មនៅទីតាំងនោះ រួមទាំងធ្វើឲ្យសង្គម ទាំងមូលមានសន្តិភាព និង សណ្តាប់ធ្នាប់ល្អ។

ទោះជាយ៉ាងណាសម្រាប់បងប្អូនខ្មែរយើងមិនថាទៅកម្សាន្តនៅទីណាទេសូមមានការប្រុងប្រយ័ត្នឱ្យបានខ្ពស់ បើទោះបីជាអាជ្ញាធរគ្រប់ប្រទេស គ្រប់តំបន់បានចេញវិធានការការពារសុវត្ថិភាពខ្ពស់ឱ្យប្រជាជនយ៉ាងណាក៏ដោយ  ប៉ុន្តែការការពារសុវត្ថិភាពផ្ទាល់ខ្លួនគឺជារឿងចម្បងបំផុតក្នុងឱកាសនៃការដើរម្សាន្តឆ្លងឆ្នាំថ្មីនេះ៕ ប្រភព៖ Thaitath

បរទេស៖ សហរដ្ឋអាមេរិក និងកាណាដាត្រជាក់ខ្លាំងជាមួយនឹងព្យុះរដូវរងាខ្លាំង បូកនឹងបាតុភូតព្យុះស៊ីក្លូនយ៉ាងខ្លាំងក្លា ដែលបានសម្លាប់មនុស្ស៥០នាក់ជាង និងគ្រប់វិស័យត្រូវបានផ្អាកដំណើរការទាំងស្រុងនៅក្នុងតំបន់។

កាលពីថ្ងៃទី ២៧ ខែធ្នូ ឆ្នាំ ២០២២ ទីភ្នាក់ងារសារព័ត៌មានបរទេសបានរាយការណ៍អំពីវឌ្ឍនភាពនៃគ្រោះមហន្តរាយ នៃព្យុះរដូវរងាដ៏ខ្លាំងក្លាមួយបានបោកបក់ពាសពេញអាមេរិកខាងជើង រួមជាមួយនឹងបាតុភូត “ព្យុះស៊ីក្លូន” ដែលបណ្តាលឱ្យសហរដ្ឋអាមេរិក និងកាណាដា ប្រឈមមុខនឹងអាកាសធាតុត្រជាក់ខ្លាំង ជាមួយសីតុណ្ហភាពធ្លាក់ចុះដល់ដកជាច្រើនដឺក្រេ។

គួរបញ្ជាក់ថាព្រិលធ្លាក់ខ្លាំងតាំងពីមុនបុណ្យណូអែលមកដល់ពេលចុងក្រោយបំផុតបានបណ្តាលឲ្យមនុស្សយ៉ាងហោច ណាស់ចំនួន ៥៩ នាក់បានស្លាប់។

យ៉ាងណាមិញប្រភពដដែលបានបញ្ជាក់ថានៅក្នុងទីក្រុងញូវយ៉កនៃសហរដ្ឋអាមេរិក បានប្រឈមមុខនឹងខ្យល់ត្រជាក់ខ្លាំងជាងគេ ដោយសីតុណ្ហភាពបានដកជាច្រើនដឺក្រេ ជាមួយនឹងព្រិលធ្លាក់ខ្លាំងរហូតប្រែក្លាយជាទឹកកកគ្របដណ្តប់លើ ​ផ្លូវ អគារដើមឈើស្ទើរតែគ្មានមនុស្សចេញមកតាមផ្លូវ៕ ប្រភព៖ Thairath

រដ្ឋធានីតេអ៊ីរ៉ង់៖ ក្រោយពេលអ៊ុយក្រែន និង បណ្ដាប្រទេសមហាអំណាចលោកខាងលិច បានចោទប្រកាន់ជាញឹកញាប់ដល់អ៊ីរ៉ង់ អំពីការបញ្ជូនយន្ដហោះគ្មានមនុស្សបើក ឬ ដ្រូន ទៅកាន់រុស្ស៊ី នោះមក ក្រុងតេអ៊ីរ៉ង់ កាលពីដើមខែវិច្ឆិកា ក៏បានទទួលស្គាល់ អំពីសកម្មភាពរបស់ខ្លួន បានបញ្ជូនគ្រឿងសឹកប្រភេទនេះ ទៅឲ្យក្រុងមូស្គូ ហើយឥឡូវនេះ ថែមទាំងអួតអាង អំពីដ្រូនរបស់ខ្លួនមានប្រសិទ្ធភាព។

សារព័ត៌មាន ARAB NEWS បានចេញផ្សាយ កាលពីព្រឹក ថ្ងៃពុធ ទី២៨ ខែធ្នូ ដោយដកស្រង់ប្រភពពីបណ្ដាញផ្សព្វផ្សាយរបស់អ៊ីរ៉ង់ បានរាយការណ៍ ថា មេទ័ពកំពូលរបស់អ៊ីរ៉ង់ បានអះអាង ថា ការអះអាងរបស់បណ្ដាប្រទេសមហាអំណាចលោកខាងលិច អំពីដ្រូនរបស់ខ្លួន ដែលកម្លាំងទាហានរុស្ស៊ី កំពុងតែប្រើប្រាស់ វាយប្រហារ ប្រឆាំងនឹងអ៊ុយក្រែន កំពុងតែបង្ហាញ អំពីដ្រូនរបស់ក្រុងតេអ៊ីរ៉ង់ មានប្រសិទ្ធភាពកម្រិតខ្ពស់។

រដ្ឋាភិបាលក្រុងកៀវ និង សម្ពន្ធមិត្តបស្ចិមលោក បានចោទប្រកាន់ដល់រុស្ស៊ី អំពីការប្រើប្រាស់ដ្រូន ផលិតដោយប្រទេសអ៊ីរ៉ង់ វាយប្រហារ ប្រឆាំងនឹងអ៊ុយក្រែន នៅក្នុងជម្លោះ អស់រយៈពេលប្រហែល១០ខែកន្លងមកនេះ ដោយបានបំផ្លិចបំផ្លាញហេដ្ឋារចនាសម្ព័ន្ធស៊ីវិល និង ថាមពលសំខាន់ៗ នៅទូទាំងប្រទេស ខណៈអាកាសធាតុ នៅក្នុងប្រទេសអឺរ៉ុបខាងកើតមួយនេះ កាន់តែធ្លាក់ចុះត្រជាក់ខ្លាំងបំផុត។

ជាការឆ្លើយតបប្រឆាំងនឹងក្រុងតេអ៊ីរ៉ង់នោះ បណ្ដាប្រទេសបស្ចិមលោក បានដាក់ទណ្ឌកម្ម ប្រឆាំងនឹងក្រុមហ៊ុន និង ពួកឧត្ដមសេនីយ៍មួយចំនួនរបស់អ៊ីរ៉ង់ រួមទាំង នាយអគ្គសេនាធិការកងទ័ពអ៊ីរ៉ង់ លោកឧត្ដមសេនីយ៍ ម៉ូហាមម៉ាដ បាហ្គេរី (Mohammad Bagheri) ផងដែរ។

រដ្ឋាភិបាលក្រុងតេអ៊ីរ៉ង់ តែងតែបដិសេធជាដដែលៗ ប្រឆាំងនឹងការចោទប្រកាន់ អំពីការបញ្ជូនដ្រូនរបស់ខ្លួន ទៅឲ្យរុស្ស៊ី ប្រើប្រាស់ នៅក្នុងសង្គ្រាម ប្រឆាំងនឹងប្រទេសអ៊ុយក្រែន។ ប៉ុន្ដែនៅដើមខែវិច្ឆិកា អ៊ីរ៉ង់ ក៏បានទទួលស្គាល់ ថា ក្រុងតេអ៊ីរ៉ង់ បានបញ្ជូនដ្រូនមួយចំនួន ទៅឲ្យក្រុងមូស្គូ តាំងពីមុនការផ្ទុះសង្គ្រាម នៅក្នុងប្រទេសអ៊ុយក្រែន នាថ្ងៃទី២៤ ខែកុម្ភៈ ឆ្នាំ២០២២មកម៉្លេះ។

ទីភ្នាក់ងារសារព័ត៌មាន ពាក់កណ្ដាលផ្លូវការ Tasnim មានទំនាក់ទំនងជាមួយនឹងរដ្ឋាភិបាលក្រុងតេអ៊ីរ៉ង់ បានដកស្រង់សម្ដីរបស់លោកឧត្ដមសេនីយ៍ Mohammad Bagheri ដែលបានអះអាង ថា «បរិយាកាសបច្ចុប្បន្ន បង្កើតដោយពិភពក្រអឺតក្រទម ទាក់ទងនឹងការប្រើប្រាស់យន្តហោះគ្មានមនុស្សបើក ឬ ដ្រូនរបស់អ៊ីរ៉ង់ នៅក្នុងសង្គ្រាមអ៊ុយក្រែន គ្រាន់តែជាផ្នែកមួយ នៃសង្គ្រាមចិត្តសាស្ត្ររបស់សត្រូវតែប៉ុណ្ណោះ។ អ្វីដែលជាការពិត បង្ហាញ អំពីប្រសិទ្ធភាព សារៈសំខាន់ និង ឋានៈដ៏ខ្ពស់ សម្រាប់សាធារណរដ្ឋអ៊ិស្លាមអ៊ីរ៉ង់ នៅក្នុងវិស័យយន្តហោះគ្មានមនុស្សបើក ឬ ដ្រូន»។

សហរដ្ឋអាមេរិក និង អ៊ីស្រាអែល ជាសត្រូវរបស់អ៊ីរ៉ង់ បានចោទប្រកាន់ ដល់ក្រុងតេអេរ៉ង់ ថា បានបញ្ជូនកងយន្តហោះគ្មានមនុស្សបើក ឬ ដ្រូន ទៅឲ្យទីភ្នាក់ងាររបស់់ខ្លួន នៅមជ្ឈិមបូព៌ា រួមទាំង ចលនាហេសបូលឡាហ៍ (Hezbollah) នៅក្នុងប្រទេសលីបង់, ជួយដល់របបគ្រប់គ្រងរបស់ប្រធានាធិបតីស៊ីរី លោក បាសា អាល់អាសាដ (Bashar al-Assad) និង ក្រុមឧទ្ទាមហ៊ូធី (Houthi) នៅក្នុងប្រទេសយេម៉ែន។

អ៊ីរ៉ង់ បានចាប់ផ្តើមអភិវឌ្ឍយន្តហោះគ្មានមនុស្សបើក ឬ យានហោះគ្មានមនុស្សបើក (UAVs) នៅក្នុងទសវត្សរ៍ ឆ្នាំ១៩៨០ នាអំឡុងសង្គ្រាម រយៈពេល៨របស់ក្រុងតេអ៊ីរ៉ង់ ប្រឆាំងនឹងអ៊ីរ៉ាក់ ដែលជាប្រទេសជិតខាង។

លោកឧត្ដមសេនីយ៍ ម៉ូហាមម៉ាដ បាហ្គេរី (Mohammad Bagheri) បានបញ្ជាក់ ថា ឥឡូវនេះ អ៊ីរ៉ង់ នឹងបន្ដអភិវឌ្ឍដ្រូនបន្ថែមទៀត។ កងទ័ពរបស់ប្រទេសមជ្ឈិមបូព៌ាមួយនេះ នឹងបន្ដរីកចម្រើន និង អភិវឌ្ឍដ្រូន…យើងនឹងធ្វើកិច្ចសហប្រតិបត្ដិការ ជាមួយនឹងបណ្ដាប្រទេសផ្សេងៗទៀត ដោយផ្ដោតទៅលើវិស័យយន្ដហោះគ្មានមនុស្សបើក។ ប្រព័ន្ធដ្រូនរបស់យើង ស្ថិតក្នុងចំណាត់ថ្នាក់ខ្ពស់ នៅលើពិភពលោក ទាក់ទងនឹងភាពត្រឹមត្រូវ ភាពធន់ ការបន្តប្រតិបត្តិការ ការបំពេញប្រតិបត្តិបេសកកម្ម ហើយបំផ្លាញដល់បេសកកម្មផ្សេងៗរបស់សត្រូវ»៕

ប្រទេសវៀតណាម  បានបិទហាងខារ៉ាអូខេ និងបារជាង ១,១០០កន្លែង  នៅទីក្រុងហាណូយ ដោយសារវិធានការសុវត្ថិភាពអគ្គីភ័យមិនគ្រប់គ្រាន់។

នៅក្នុងសន្និសីទស្តីពីសុវត្ថិភាពអគ្គីភ័យដែលរៀបចំឡើងដោយគណៈកម្មាធិការប្រជាជនទីក្រុងហាណូយ កាលពីដើមសប្តាហ៍នេះ លោក Pham Trung Hieu ប្រធានការិយាល័យពន្លត់អគ្គីភ័យ និងជួយសង្គ្រោះនៃនាយកដ្ឋានប៉ូលីសហាណូយ បាននិយាយថា មានហាងខារ៉ាអូខេ បារ និងក្លឹបរាំជាង ១,៥០០ នៅក្នុងទីក្រុង Cong An។

បន្ទាប់ពីរយៈពេលពីរខែចុងក្រោយនៃការត្រួតពិនិត្យកន្លែងនៅក្នុងទីក្រុងសម្រាប់វិធានការសុវត្ថិភាពអគ្គីភ័យ ទីក្រុងហាណូយបានផ្អាកជាង ១,១០០កន្លែង ក្នុងចំណោមចំនួនសរុបខាងលើនេះ។

នាយករដ្ឋមន្ត្រីវៀតណាម លោក Pham Minh Chinh កាលពីខែកញ្ញា បានស្នើឱ្យក្រសួងសន្តិសុខសាធារណៈ និងស្ថាប័នពាក់ព័ន្ធផ្សេងទៀត ធ្វើការត្រួតពិនិត្យសុវត្ថិភាពអគ្គីភ័យ ដោយផ្តោតលើហាងខារ៉ាអូខេ សហគ្រាសដែលមានមនុស្សច្រើន និងអគារផ្ទះល្វែង។

សំណើនេះបានធ្វើឡើងបន្ទាប់ពីមានអគ្គីភ័យឆាបឆេះហាងខារ៉ាអូខេមួយកន្លែងក្នុងក្រុង Thuan An នៃខេត្ត Binh Duong បានសម្លាប់មនុស្ស ៣២នាក់កាលពីថ្ងៃទី ៦ ខែកញ្ញាកន្លងទៅនេះ៕

ប្រភព: VN Express