កុម្ភៈ នេះ មានក្មេងស្រីម្នាក់ជនជាតិមីយ៉ាន់ម៉ា អាយុមិនដល់២ខួបផង ត្រូវបានម្តាយនិងឪពុករបស់នាងយកទៅតាម ពេលពួកគេទៅស៊ីឈ្នួលជីកដំឡូងមីឱ្យគេ ហើយធ្លាក់ទៅក្នុងអណ្តូង ពេលនេះ អាជ្ញាធរថៃបានជួយសង្គ្រោះហើយ ដោយអាជ្ញាធរនិយាយថា ពួកគេប្រើពេលវេលាយូរណាស់ទម្រាំជួយជីវិតនាងបាន ។

កាលពីវេលាម៉ោង១០គត់ថ្ងៃនេះ លោក សាន់យ៉ា ពេជ្រសេត អភិបាលស្រុកភពព្រះ ព្រមទាំងអាជ្ញាធរក្នុងឃុំសង្កាត់បានបញ្ជូនកម្លាំងទៅកាន់កន្លែងកើតហេតុ និងនាំគ្នាដុតធូបបន់ស្រន់សុំឱ្យយកនាងតូចឡើងមកលើបានយ៉ាងមានសុវត្ថិភាព ។

រហូតមកដល់ម៉ោង១០និង៤៤នាទីថ្ងៃនេះ ខាងអាជ្ញាធរអាចយកនាងឡើងពីរណ្តៅបានដោយជោគជ័យ ។ ពេលនាំនាងឡើងមកដំបូង នាងមានសុវត្ថិភាព ប៉ុន្តែអាការៈទន់ខ្សោយ ហើយត្រូវបានគេបញ្ជូនទៅកាន់មន្ទីរពេទ្យស្រុកភពព្រះ ដើម្បីព្យាបាលរបួស ។

សូមដាស់តឿនផងដែរទៅកាន់ម្តាយឪពុកដែលមានកូនតូចៗ ត្រូវតែប្រយ័ត្នប្រយែងបំផុតក្នុងការមើលថែកូនរបស់ខ្លួន ព្រោះគ្រោះថ្នាក់អាចកើតឡើងគ្រប់ពេល មិនថានៅក្នុងផ្ទះ ឬនៅក្រៅផ្ទះទេ ៕

ប្រភព ៖ news.ch7

ប្រទេសតួកគី ៖ WHO និយាយថា ចំនួនអ្នកស្លាប់ដោយសាររញ្ជួយដីកើតឡើងនៅប្រទេសតួកគី ជិតព្រំដែនប្រទេសស៊ីរី អាចកើនឡើងដល់ទៅ៨ដងឯណោះ ពីតួលេខបច្ចុប្បន្នដែលរកឃើញអ្នកស្លាប់ជាង៣.០០០នាក់ ។

ហេតុការណ៍គ្រោះរញ្ជួយដីនៅភាគខាងត្បូងប្រទេសតួកគីនេះ កើតឡើងកាលពីថ្ងៃទី៦ ខែកុម្ភៈ ពេលនេះ ចំនួនអ្នកស្លាប់កើនឡើងបន្ថែមទៀតយ៉ាងតិច៣.៤០០នាក់ ។ ចំនួនអ្នកស្លាប់ជាងពាក់កណ្តាលជាពលរដ្ឋតួកគី និងជិតពាក់កណ្តាលទៀតជាពលរដ្ឋស៊ីរី ។ ក្រុមជួយសង្គ្រោះកំពុងស្វែងរកអ្នកនៅមានជីវិត ដែលអាចជាប់នៅក្រោមអគារផ្សេងៗក្រោមអាកាសធាតុត្រជាក់ខ្លាំង និងមានព្រិលធ្លាក់ ។

រីឯអ្នករងរបួសស្មើប្រមាណ១២.០០០នាក់ ក្នុងនោះមានពលរដ្ឋតួកគី៩.៧០០នាក់ និង២.០០០នាក់ទៀតជាពលរដ្ឋស៊ីរី ហើយភាគច្រើនជាអ្នករស់នៅភាគខាងជើងប្រទេស ។ ប្រទេសជាច្រើនដូចជា អាមេរិក សហភាពអឺរ៉ុប រុស្ស៊ី ឥណ្ឌា ចិន អ៊ីរ៉ាក់ និងអ៊ីរ៉ង់ បានប្រកាសជួយឧបត្ថម្ភក្រុមសង្គ្រោះដើម្បីរកអ្នកនៅមានជីវិត ក្នុងនោះមានអ្នកជំនាញសង្គ្រោះ ឆ្កែហិតក្លិន និងឧបករណ៍ផ្សេងៗ ខណៈរដ្ឋាភិបាលតួកគីបានស្នើសុំជំនួយជាផ្លូវការពីអង្គការសន្ធិសញ្ញាខាងជើង (NATO) ។

អ្នកជំនាញផ្នែករញ្ជួយដីបញ្ជាក់ថា គ្រោះរញ្ជួយដីពេលនេះខ្លាំងក្លាបំផុតដែលគេធ្លាប់កត់ត្រាទុកនៅប្រទេសតួកគី ចំណែកអ្នកនៅមានជីវិតនិយាយថា កម្លាំងញ័រមានរយៈពេល២នាទី ។ លើសពីនេះ កម្លាំងញ័របានធ្វើឱ្យប្រាសាទបុរាណដែលមានអាយុកាលជាង២.០០០ឆ្នាំ ដែលជាទីកន្លែងសំខាន់របស់ក្រុងហ្គាហ្សីនថេប បានដួលរលំធ្លាក់មក ហើយលំនៅឋានពលរដ្ឋ និងអគារនានាជាង៥.៦០០កន្លែងទៀតក៏ដួលរលំផងដែរ ។

ចំណែករញ្ជួយដីលើកទី២ កើតឡើងរយៈពេល១២ម៉ោងក្រោយទៀតនៅតំបន់ Elbistan ខេត្ត Kahramanmaras នៅក្បែរក្រុងហ្គាហ្សីនថេប ។ ទោះយ៉ាងណា ការិយាល័យគ្រប់គ្រងគ្រោះមហន្តរាយ និងស្ថានការណ៍បន្ទាន់របស់ប្រទេសតួកគីបញ្ជាក់ថា គ្រោះរញ្ជួយដីនេះមានកម្លាំងញ័រទៅដល់ប្រទេសលីបង់ អ៊ីស្រាអែល និងស៊ីប្រាស ៕

ប្រភព ៖ pptvhd36

បុរីញូវយ៉ក៖ ស្របពេលការវាយប្រយុទ្ធគ្នា កាន់តែខ្លាំងឡើង រវាងកងទ័ពការពារទឹកដីរបស់អ៊ុយក្រែន និង កម្លាំងទាហានរុស្ស៊ី នោះ ប្រមុខអង្គការសហប្រជាជាតិ មានសម្ដែងនូវការព្រួយបារម្ភយ៉ាងខ្លាំង ដោយសារតែមានការរំពឹងទុក អំពីការកើនឡើង នៃជម្លោះ និង ការបង្ហូរឈាមបន្ថែមទៀត នៅក្នុងសង្គ្រាមរបស់ក្រុងមូស្កូ ដែលកំពុងតែបន្ត។

សារព័ត៌មាន Aljazeera បានចេញផ្សាយ កាលពីថ្ងៃចន្ទ ទី៦ ខែកុម្ភៈ ថា លោក អង់តូនីញ៉ូ ហ្គូទែររ៉េស (General Antonio Guterres) អគ្គលេខាធិការ អង្គការសហប្រជាជាតិ (UN) បានព្រមានទៅដល់ពិភពលោក ថា សង្គ្រាមអាចនឹងរីករាលដាល កាន់តែធំឡើង ដោយសារហានិភ័យ នៃជម្លោះ រវាងរុស្ស៊ី និង អ៊ុយក្រែន កំពុងតែមានសភាពខ្លាំងក្លាឡើង។

នៅក្នុងសុន្ទរកថា ថ្លែងទៅកាន់មហាសន្និបាត អង្គការសហប្រជាជាតិ ដែលមានសមាជិក ចំនួន១៩៣ប្រទេស កាលពីថ្ងៃចន្ទ ដោយបង្ហាញពីអាទិភាព សម្រាប់ឆ្នាំ២០២៣នោះ លោក Guterres បានរិះគន់ដល់ការឈ្លានពានរបស់រុស្ស៊ី ទៅលើប្រទេសអ៊ុយក្រែន ដោយនិយាយថា សង្រ្គាមបាននាំមកនូវការឈឺចាប់ ដែលមិនអាចនិយាយបាន ដល់ប្រជាជនអ៊ុយក្រែន ជាមួយនឹងផលប៉ះពាល់ ជាសកលយ៉ាងជ្រាលជ្រៅបំផុត។

ប្រមុខអង្គការសហប្រជាជាតិ បានបញ្ជាក់ ថា «ការរំពឹងទុកទៅលើសន្ដិភាព កំពុងតែថយចុះ ខណៈឱកាសបង្កើនជម្លោះ និង ការបង្ហូរឈាម កំពុងតែកើនឡើង។ ខ្ញុំបារម្ភ ថា ពិភពលោកមិនអាចដេកលក់ នៅក្នុងសង្រ្គាមកាន់តែធំ។ ខ្ញុំខ្លាច ថា វាកំពុងតែបើកភ្នែករបស់ធំៗឡើង»។

ជម្លោះ អស់រយៈពេលជិតមួយឆ្នាំមកនេះ បាននិងកំពុងតែ បង្កឲ្យមានភាពតានតឹងខ្លាំងឡើង ហើយកាលពីប៉ុន្មានសប្តាហ៍កន្លងទៅថ្មីៗនេះ មានការវាយប្រយុទ្ធគ្នាយ៉ាងខ្លាំង រវាងកងកម្លាំងអ៊ុយក្រែន និង រុស្ស៊ី ដើម្បីគ្រប់គ្រងទីប្រជុំជន នៅភាគខាងកើត ប្រទេសអ៊ុយក្រែន។

លោក ប៉ាវឡូ គីរីឡែនកូ (Pavlo Kyrylenko) អភិបាលខេត្តដូណែតស្ក៍ (Donetsk) បានថ្លែង កាលពីថ្ងៃចន្ទ ថា «សមរភូមិ នៅតំបន់ភាគខាងកើត ប្រទេសអ៊ុយក្រែន កំពុងតែឡើងកម្ដៅខ្លាំង ដោយការវាយប្រយុទ្ធគ្នាជាមួយនឹងកងកម្លាំងរុស្ស៊ី ខណៈក្រុងមូស្គូ បានបោះកម្លាំងទើបនឹងកេណ្ឌថ្មី មកចូលនៅក្នុងសមរភូមិ ហើយលុបបំបាត់ទីក្រុង និងភូមិរបស់យើង»។

រុស្ស៊ី បានចូលឈ្លានពាន ទៅលើប្រទេសអ៊ុយក្រែន កាលពីថ្ងៃទី ២៤ ខែកុម្ភៈ ឆ្នាំ២០២២ ក្រោយពេលក្រុងមូស្គូ បានប្រមូលផ្ដុំកងទ័ព នៅជិតព្រំដែនអ៊ុយក្រែន ខណៈលោក វ៉្លាឌីមៀ ពូទីន បានទាមទារឲ្យបញ្ចប់នូវការពង្រីកខ្លួនរបស់អង្គការណាតូ មកកាន់ទឹកដីរបស់អតីតសហភាពសូវៀត។ យុទ្ធនាការយោធារបស់ក្រុងមូស្គូ បានរងនូវបរាជ័យជាច្រើនលើក ខណៈមហាអំណាចលោកខាងលិច បានផ្តល់ជំនួយផ្នែកហិរញ្ញវត្ថុ និង យោធា ជួយដល់ក្រុងកៀវ។

ដោយឡែក ក្រុមមន្រ្ដីរុស្ស៊ី បានលើកឡើង ថា ការបញ្ជូនគ្រឿងសព្វាវុធ ទៅកាន់ប្រទេសអ៊ុយក្រែន កំពុងតែពន្យារពេល និង ធ្វើឲ្យជម្លោះនេះ កាន់តែផ្ទុះខ្លាំងឡើង។ ចំណែកសហរដ្ឋអាមេរិក និង សម្ពន្ធមិត្ត បានបញ្ជាក់ ថា ពួកគេ មិនចង់ឲ្យមានការប្រឈមមុខ ដោយផ្ទាល់ជាមួយនឹងរុស្ស៊ី នៅលើទឹកដីរបស់អ៊ុយក្រែន។ ប៉ុន្ដែលោក ចូ បៃដិន ប្រធានាធិបតីសហរដ្ឋអាមេរិក បានព្រមានម្ដងហើយម្ដងទៀត ដល់ក្រុងមូស្គូ ប្រឆាំងនឹងការពង្រីកជម្លោះ ដោយប្ដេជ្ញា ថា មិនឲ្យរុស្ស៊ី ប៉ះលើទឹកដីរបស់អង្គការណាតូ សូម្បីតែមួយមិល្លីម៉ែត្រ៕

ប្រទេសចិន ៖ អនុរដ្ឋមន្ត្រីក្រសួងការបរទេសចិន សៀ ហ្វេង (Xia Feng) បានដាក់ពាក្យតវ៉ាទៅកាន់ប្រធានស្ថានទូតអាមេរិកប្រចាំប្រទេសចិន អំពីអាមេរិកធ្វើហួសហេតុពេក ដោយបញ្ជូនយន្តហោះគ្មានមនុស្សបើកទៅបាញ់ទម្លាក់បាឡុងរបស់ចិន ដែលបានហោះចូលទៅកាន់ទឹកដីអាមេរិក ។

តំណាងក្រសួងការបរទេសចិនបញ្ជាក់ថា បាឡុងដែលហោះទៅកាន់ទឹកដីអាមេរិកនេះ គឺជាកម្មសិទ្ធរបស់ជនស៊ីវិលតែប៉ុណ្ណោះ ហើយក៏គ្មានចេតនាហោះចូលទឹកដីអាមេរិកដែរ ប្រទេសចិនបានជូនដំណឹងទៅកាន់អាមេរិកជាច្រើនលើកច្រើនសា ហើយអាមេរិកមិនគួរចាប់ទោសអូសដំណើរចិនទេ ។ តំណាងក្រសួងការបរទេសចិនរូបនេះបញ្ជាក់ថា ការចាត់ការបាញ់ទម្លាក់បាឡុងរបស់ចិននេះចាត់ទុកថា ជាការធ្វើហួសហេតុពេក ហើយអាមេរិកបានរំលោភច្បាប់អន្តរជាតិដោយចេតនាយ៉ាងខ្លាំងក្លា។

ក្រៅពីនេះ ប្រទេសចិនបានបង្ហាញពីការប្រឆាំងដាច់ខាត ហើយអំពាវនាវឱ្យអាមេរិកបញ្ឈប់សកម្មភាពទាំងឡាយរបស់ខ្លួនដែលប្រឆាំងនឹងផលប្រយោជន៍របស់ចិន ឬធ្វើឱ្យស្ថានការណ៍បច្ចុប្បន្នកាន់តែតានតឹងខ្លាំងឡើងរវាងប្រទេសទាំងពីរ ។ រដ្ឋាភិបាលចិនកំពុងតែតាមដានស្ថានការណ៍នេះយ៉ាងដិតដល់ផងដែរ ។

ប្រទេសចិនបញ្ជាក់ថា នឹងការពារសិទ្ធិស្របច្បាប់របស់ខ្លួន និងផលប្រយោជន៍របស់ចិនយ៉ាងពេញលេញ ហើយចិននឹងរក្សាសិទ្ធិតបតអាមេរិកវិញ ប្រសិនបើចាំបាច់ ៕

ប្រភព ៖ TNN World

អ្នក​លេង​បណ្តាញសង្គមនៅក្នុងប្រទេសថៃ បានបញ្ចេញ​កំហឹង ជាខ្លាំងទៅកាន់វេបសាយសៀវភៅ​ណែនាំ​អាហារ​ TasteAtlas  ដោយបានដាក់ម្ហូបរបស់ពួកទៅកាន់បញ្ជីម្ហូប​គ្មានជាតិបំផុត​ក្នុង​ពិភពលោក។

សម្លកេងសោម (Kaeng som) ឬស៊ុបការីជូរ ជាមុខម្ហូបពេញនិយមមួយនៅប្រទេសថៃ ដែលមានដើម​កំណើតតាំងពីសម័យ​នគរ​អយុធ្យា ហើយ​បាន​ទទួល​ការ​ពេញ​និយម​ក្នុង​ប្រទេស​ថៃ​រាប់​រយ​ឆ្នាំ​មក​ហើយ។ ស៊ុបការីជូរ ផ្សំឡើងពីបង្គា និងទឹកខ្ទឹម រសជាតិជូរអែម ដែលជាទូទៅប្រជាជនថៃតែងតែទទួលទានជាប្រចាំ។ទន្ទឹមគ្នានេះដែរប្រជាជនថៃ បានលើកឡើងស្រដៀងគ្នាថា៖ “ខ្ញុំមិនយល់សោះម្ហូបរបស់យើង ប្រើប្រាស់គ្រឿងផ្សំដូចទៅនឹងគីមឈីម Jjigae របស់កូរ៉េខាងត្បូង​ដែរ ហេតុអ្វីគេបានពិន្ទុ 4.5 ហើយម្ហូបយើងបានតែ2.3 លើ5ពិន្ទុ?”។

តែយ៉ាងណាមិញ ការវាយតម្លៃបានចេញរួចមកហើយ ហេតុដូចនេះមុខម្ហូបសម្លកេងសោម (Kaeng som) ឬស៊ុបការីជូ នឹងត្រូវបានមើលរំលងពីសំណាកជនបរទេសដែលទៅកម្សាន្តនៅប្រទេសថៃ។

សូមជម្រាបផងដែរថា  TasteAtlas គឺជាវេបសាយវាយតម្លៃមុខម្ហូបដ៏ធំជាងគេមួយនៅក្នុងពិភពលោក ដែលត្រូវបានគេទទួលស្គាល់១០០ប្រទេសជាងលើសកលលោក៕

ប្រភព៖ Nation Thailand

ប្រទេសថៃ ៖ កាលពីថ្ងៃទី៤-៦ ខែកុម្ភៈ នៅឧទ្យានរ៉ាចឆៈផាក់ ស្រុកហួហិន ខេត្តប្រាជួប ស៊ីរីខាន់ លោក ប្រាយុទ្ធ ចាន់អូចា នាយករដ្ឋមន្ត្រីថៃ និងជារដ្ឋមន្ត្រីក្រសួងការពារជាតិ បានធ្វើជាប្រធានកម្មវិធី «Amazing Muay Thai Festival 2023» ប្រចាំឆ្នាំ២០២៣ ដែលរៀបចំឡើងដោយកងទ័ពជើងគោក អាជ្ញាធរទេសចរណ៍ អាជ្ញាធរកីឡា និងក្រសួងវប្បធម៌ ដើម្បីផ្សព្វផ្សាយពីក្បាច់គុន Muay Thai ឱ្យពិភពលោកបានស្គាល់ ។

កីឡាករ ប៊ួ ខាវ ឈ្មោះពេញ Sombat Banchamek គឺជាអ្នកដឹកនាំក្រុម និងធ្វើពិធីសំពះគ្រូ និងមានកងទ័ពជើងគោកចូលរួមចំនួន៣.៦៦០នាក់ ។ ពិធីនេះចាត់ឡើងក្នុងគោលបំណងបង្ហាញពីមោទនភាពជាតិចំពោះកីឡាជាតិ នៅខាងមុខរូបសំណាកអតីតព្រះមហាក្សត្រថៃ ដែលមានអ្នកចូលរួមច្រើនបំផុតក្នុងប្រវត្តិសាស្ត្ររបស់ថៃ និងពិភពលោក ។ លើសពីនេះ ប្រទេសថៃនឹងកត់ត្រាកីឡា Muay Thai ចូលក្នុងបញ្ជី Guinness World Records : GWR ផងដែរ ។

ក្នុងពិធីនេះបានបង្ហាញពីកីឡា Muay Thai ៤ប្រភេទ និងការសម្តែងក្បាច់ Muay Thai ក្នុង៤តំបន់ដែលបន្តពីក្បាច់គុនបុរាណថៃ ហើយចែកចេញជាក្បាច់ផ្សេងៗតាមតំបន់ ដូចជា Muay កូរ៉ាតពីភាគឦសាន, Muay លុបបុរីពីភាគកណ្តាល, Muay ឆៃយ៉ាពីភាគខាងត្បូង និង Muay ថាសៅពីភាគខាងជើង ហើយមានពាក្យសរសើរថា ៖ «កណ្តាប់ដៃធ្ងន់ កូរ៉ាត, ឆ្លាត លុបបុរី, ក្បាច់ល្អ ឆៃយ៉ា, ដៃរហ័ស ថាសៅ» ។

គេចាត់ទុកថា Muay Thai គឺជាការរួមកម្លាំងកីឡាករដ៏ធំមួយរបស់ប្រទេសថៃ និងធ្វើឱ្យទូទាំងពិភពលោកទទួលស្គាល់ថា Muay Thai គឺជាមរតករបស់ប្រទេសថៃ និងមរតកពិភពលោក ៕

ប្រភព ៖ TNN Thailand

ដើមឆ្នាំ២០២៣ភ្លាម Samsung បានបញ្ចេញកំពូលទូរសព្ទរបស់ខ្លួនគឺ Samsung Galaxy S23 Ultras ដែលបានភ្ជាប់មកជាមួយកាំមេរ៉ាទំហំធំដល់ទៅ 200MP។

អមជាមួយនឹងកាំមេរ៉ា 200MP Samsung ក៏បានដាក់បញ្ចូលមុខងារថ្មី មានឈ្មោះថា Astrophotography ដែលអាចឱ្យយើងថតឃើញផ្កាយបានយ៉ាងច្បាស់ផងដែរ។

នៅក្នុងដំណើរការថតផ្កាយនេះ វាទាមទារឱ្យយើងទៅកន្លែង ដែលមានផ្ទៃមេឃស្រឡះ ក្រោយមកពេលដែលយើងចុចថត វានឹងធ្វើការគណនាចន្លោះពី៤-១០នាទី ដើម្បីចេញរូបរាងផ្កាយ។

នេះគឺជាមុខងារថ្មីមួយ ដែលមិនមានស្មាមហ្វូននាពេលបច្ចុប្បន្នណាមួយ អាចធ្វើបែបនេះបាននោះទេ៕

ភ្នំពេញ៖ ក្រសួងធនធានទឹក និងឧតុនិយម បានចេញសេចក្តីជូនដំណឹងពីស្ថានភាពធាតុអាកាសនៅកម្ពុជា ចាប់ពីថ្ងៃទី៨-១៤ ខែកុម្ភៈ ឆ្នាំ២០២៣។

នៅក្នុងសេចក្តីជូនដំណឹងរបស់ក្រសួងបានឱ្យដឹងថា ក្នុងរយៈពេលនេះ ព្រះរាជាណាចក្រកម្ពុជា ទទួលឥទ្ធិពលពីកម្រិតសម្ពាធទាបខ្សោយ។

ក្រសួងបញ្ជាក់ថា ស្ថានភាពបែបនេះនឹងធ្វើឲ្យ៖
១៖ តំបន់ទំនាបកណ្តាល សីតុណ្ហភាពអប្បបរមា មានពី ២៣-២៥ °C សីតុណ្ហភាពអតិបរមា មានពី ៣៣-៣៥ °C ក្នុងករណីបើមានភ្លៀង ក៏ស្ថិតក្នុងកម្រិតពីខ្សោយទៅតិចតួច ដោយអន្លើតែប៉ុណ្ណោះ។

២៖ តំបន់ខ្ពង់រាប សីតុណ្ហភាពអប្បបរមា មានពី ២២-២៤ °C សីតុណ្ហភាពអតិបរមា មានពី ៣៣-៣៥ °C

៣៖ តំបន់មាត់សមុទ្រ សីតុណ្ហភាពអប្បបរមា មានពី ២១-២៣ °C សីតុណ្ហភាពអតិបរមា មានពី ៣១-៣៣ °C ក្នុងករណីបើមានភ្លៀងក៏ស្ថិតក្នុងកម្រិតពីខ្សោយ ទៅតិចតួចដោយអន្លើតែប៉ុណ្ណោះ៕

ភ្នំពេញ៖ យោងតាមគេហទំព័រហ្វេសប៊ុកផ្លូវការរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានបញ្ជាក់ពីមូលហេតុនៃការខកខានមិនបាន នៅចូលរួមបុណ្យ ៧ថ្ងៃ លោកស្រី ប៊ុន សុថា ត្រូវជាប្អូនស្រីបង្កើត របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែននោះទេដោយសារតែសម្ដេចត្រូវដឹកនាំគណៈប្រតិភូជាន់ខ្ពស់របស់រាជរដ្ឋាភិបាល ទៅបំពេញទស្សនកិច្ចនៅឯប្រទេសចិន។
តាមគេហទំព័រហ្វេសប៊ុកដដែលនោះ នៅយប់ថ្ងៃទី៦ ខែមករា ឆ្នាំ២០២៣ សម្ដេចបានសរសេររៀបរាប់ថា “ប្អូនស្រីថ្ងៃស្អែកបែកគ្នា! សល់តែមួយយប់ទៀតប៉ុណ្ណោះរូបកាយប្អូន នឹងត្រូវបញ្ចុះទៅក្នុងព្រះធរណីដែលជាទីកន្លែងសម្រាកចុងក្រោយរបស់ប្អូនបែកគ្នាដោយមិនបានលា គឺជារឿងមិនអស់ចិត្តសម្រាប់ក្រុមគ្រួសារ តែនេះជាក្រឹត្យក្រមធម្មជាតិដែលមិនអាចជៀសវាងបានគឺ កើត ចាស់ ឈឺ ស្លាប់តែអ្វីជាការសោកស្តាយ គឺនៅត្រង់មនុស្សដែលមានអាយុច្រើនធ្វើបុណ្យសពឲ្យមនុស្សដែលមានអាយុតិចជាង។

សម្ដេចបន្តថា ជាគ្រួសារមួយដែលមិនធ្លាប់មានទំនាស់ទោះតូចក្តីធំក្តីមិនដែលមានភាពរកាំរកូសសូម្បីពាក្យសំដីមួយម៉ាត់ ការបែកគ្នាដោយគ្មានពេលជួបវិញពិតជាបានធ្វើឲ្យក្រុមគ្រួសារកាន់តែអាឡោះអាល័យនឹកស្រណោះដល់ពេល ដែលកន្លងហួសពិសេសកូន ចៅនិងក្មួយៗដែលម្តាយ ជីដូន និងម្តាយមីងបានមើលថែទាំដល់ពួក គេ។

សម្ដេចតេជោ ហ៊ុន សែន បានបញ្ជាក់ថា “ដូចឆ្នាំកន្លងមកដែរពេលបងប្រុស មរណភាពខ្ញុំមិនបានចូលរួមបុណ្យ៧ថ្ងៃនោះទេព្រោះត្រូវធ្វើដំណើរទៅសហរដ្ឋអាមេរិកដើម្បីប្រជុំពិសេសអាស៊ានសហរដ្ឋអាមេរិក។ លើកនេះពេលប្អូនស្រីទទួលមរណភាពពេលបុណ្យ៧ថ្ងៃត្រូវ ដឹកនាំគណៈប្រតិភូជាន់ខ្ពស់ទស្សនកិច្ច ផ្លូវការនៅសាធារណរដ្ឋប្រជាមានិតចិន ដែលកម្មវិធីនេះបានព្រមព្រៀងគ្នាតាម រយៈការទូតជាងមួយខែមកហើយ”។

សូមរំលឹកថា លោកស្រី ប៊ុន សុថា បានទទួលមរណភាព កាលពីថ្ងៃទី០៣ ខែកុម្ភៈ ឆ្នាំ២០២៣ ក្នុងជន្មាយុ៦៧ឆ្នាំ ដោយរោគាពាធ។ សពលោកស្រី ត្រូវតម្កល់ទុកធ្វើបុណ្យតាមប្រពៃណី នៅផ្ទះលេខ៦៦ ផ្លូវលេខ៥២៨ កែងនឹងផ្លូវលេខ២៨៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ហើយដង្ហែ ទៅបញ្ចុះនៅវត្តបទុមវតី នៅថ្ងៃទី៧ ខែកុម្ភៈ ឆ្នាំ២០២៣៕

រដ្ឋធានីអង់ការ៉ា (Ankara)៖ គ្រោះរញ្ជួយដី មានកម្លាំងខ្លាំង កម្រិត ៧,៨រ៉ិកទ័រ បានវាយប្រហារទៅលើតំបន់ភាគខាងត្បូង ប្រទេសតួកគី និង ភាគខាងជើង ប្រទេសស៊ីរី កាលពីថ្ងៃចន្ទ ទី៦ ខែកុម្ភៈ ដោយបានសម្លាប់មនុស្ស យ៉ាងតិច ៣ ៥០០នាក់ និង មនុស្សជាង ១៤ ៤០០នាក់ បានរងរបួស ហើយអ្នកស្រុក ជិត ៨ ០០០នាក់ ត្រូវបានសង្គ្រោះ ចេញពីគំនរអគារបាក់បែករាប់ពាន់ខ្នង។

សារព័ត៌មាន BBC បានចេញផ្សាយ កាលពីព្រឹក ថ្ងៃអង្គារ ទី៧ ខែកុម្ភៈ ថា លោក ហ៊្វូអាត អូខាយ (Fuat Otkay) អនុប្រធានាធិបតីតួកគី បានបញ្ជាក់ ថា មនុស្ស យ៉ាងតិច ២ ៣៧៩នាក់ ត្រូវបានសម្លាប់ និង ១៤ ៤៨៣នាក់ផ្សេងទៀត រងរបួស នៅក្នុងហេតុការណ៍រញ្ជួយដី នៅតួកគី។ ចំណែកអ្នកស្រុក ចំនួន ៧ ៨៤០នាក់ផ្សេងទៀត នៅរស់រានមានជីវិត ហើយត្រូវទាញចេញពីអគារដួលរលំ ចំនួន ៤ ៧៤៨ខ្នង។

ដោយឡែក មនុស្ស ចំនួន ១ ៤៤៤នាក់ផ្សេងទៀត រស់នៅក្នុងប្រទេសស៊ីរី ត្រូវបានរាយការណ៍ ថា ស្លាប់ នៅក្នុងគ្រោះធម្មជាតិដ៏កំណាចនេះដែរ។ នេះមានន័យថា គ្រោះរញ្ជួយដីដ៏មានកម្លាំងខ្លាំងនេះ បានធ្វើឲ្យមនុស្សស្លាប់សរុប កើនឡើង ដល់ជាង៣៥០០នាក់ ខណៈកិច្ចខិតខំប្រឹងប្រែងជួយសង្គ្រោះ កំពុងតែបន្ដនៅឡើយ។

ជាមួយគ្នានេះ អង្គការសុខភាពពិភពលោក (WHO) បានព្រមាន ថា ចំនួនអ្នកស្លាប់ អាចនឹងកើនឡើង លើសពីនេះបន្ថែមទៀត។

អាជ្ញាធរតួកគី បានបញ្ជាក់ ថា ប្រតិបត្ដិការជួយសង្គ្រោះ នៅតំបន់ភាគខាងត្បូង ប្រទេសតួកគី និង ភាគខាងជើង ប្រទេសស៊ីរី ដែលបានសម្លាប់មនុស្សយ៉ាងតិច ៣ ៥០០នាក់ កំពុងតែបន្ដរុករកអ្នកនៅរស់រានមានជីវិត។ គ្រោះរញ្ជួយដី មានកម្រិត 7.8 រ៉ិចទ័រនេះ បានវាយប្រហារ នៅជិតខេត្តហ្កាហ្ស៊ាទេប (Gaziantep) ប្រទេសតួកគី កាលពីរំលងអធ្រាត្រ ឈានចូល ថ្ងៃចន្ទ ទី៦ ខែកុម្ភៈ ខណៈមនុស្សកំពុងតែលង់លក់ នៅក្នុងដំណេក។

ទីភ្នាក់ងារគ្រប់គ្រងគ្រោះមហន្ដរាយរបស់តួកគី បានអះអាង ថា មនុស្ស ជាង ២ ៣០០នាក់បានស្លាប់ សម្រាប់តែនៅក្នុងប្រទេសតួកគី ក្រោយការរញ្ជួយដីលើកទី១ ហើយមនុស្ស ជាង ១៤ ០០០បានរងរបួស ខណៈមនុស្ស ជាង ១ ៤០០នាក់ផ្សេងទៀត បានស្លាប់ នៅក្នុងប្រទេសស៊ីរី។

ទន្ទឹមគ្នានេះដែរ បណ្ដាមេដឹកនាំនៅលើពិភពលោក បានសន្យា បញ្ជូនជំនួយមនុស្សធម៌ទៅជួយ ក្រោយពេលតួកគី បានចេញនូវការអំពាវនាវដល់អន្ដរជាតិ ដើម្បីជួយដល់ពួកគេ ដែលកំពុងតែប្រឈមមុខនឹងគ្រោះធម្មជាតិដ៏កំណាចនេះ។

សេតវិមាន បានបញ្ជាក់ ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក ភា្លមៗនោះ នឹងនិយាយទៅកាន់សមភាគីតួកគី លោក រេសេប តាយយីប អេដូហ្គេន (Recep Tayyip Erdogan)។

លោកប្រធានាធិបតីសហរដ្ឋអាមេរិក បានបញ្ជាក់ ថា «គាត់មានការសោកស្ដាយយ៉ាងខ្លាំងចំពោះការបាត់បង់អាយុជីវិតរបស់មនុស្ស និង ការបំផ្លិចបំផ្លាញ បង្កឡើងដោយគ្រោះរញ្ជួយដី។ ខ្ញុំបានណែនាំដល់ក្រុមការងាររបស់ខ្ញុំ ឱ្យបន្តតាមដានយ៉ាងដិតដល់ទៅលើស្ថានភាពនេះ នៅក្នុងការសម្របសម្រួល ជាមួយនឹងប្រទេសតួកគី ហើយផ្តល់ជំនួយដែលត្រូវការចាំបាច់បំផុត»៕