ប៉េកាំង៖ សារមន្ទីរសត្វល្អិតមួយនៅទីក្រុងប៉េកាំង បានក្លាយជាចំណីអារម្មណ៍ពេញបណ្តាញសង្គម បន្ទាប់ពីបើកលក់ភេសជ្ជៈប្រភេទថ្មីដែលគ្មានម្ចាស់អាជីវកម្មកាហ្វេណានឹកស្មានដល់ ដោយកាហ្វេមានរោយម៉្សៅកន្លាត និងដង្កូវស្ងួតពីលើ ហើយលក់ក្នុងតម្លៃ ៤៥ យន់ ក្នុងមួយកែវ ឬប្រមាណ ៦ ដុល្លារអាមេរិក។ ទោះមិនសូវមានអ្នកហ៊ានផឹក តែយ៉ាងហោចណាស់ក៏លក់បាន ១០ កែវក្នុងមួយថ្ងៃផងដែរ។ ចំណែកអ្នកខ្លះថា ទោះឲ្យលុយប៉ុន្មានក៏មិនផឹកដែរ។ នេះបើតាមសារព័ត៌មាន South China Morning Post។

ភេសជ្ជៈច្នៃប្រឌិតប្លែកនេះ ធ្វើឡើងដោយការលាយបញ្ចូលកាហ្វេជាមួយម៉្សៅកន្លាតកិនស្ងួត រួមទាំងដង្កូវមេអំបៅពណ៌លឿង ដែលគេជឿថាសម្បូរទៅដោយប្រូតេអ៊ីន។ អ្នកដែលបានសាកល្បងផឹកនិយាយថា រសជាតិរបស់វាឆ្អេះ និងជូរបន្តិច ដែលខុសពីកាហ្វេធម្មតាទាំងស្រុង។

បុគ្គលិកម្នាក់បានប្រាប់សារព័ត៌មានថា ភេសជ្ជៈមីនុយថ្មីនេះបានចាប់ផ្តើមលក់តាំងពីចុងខែមិថុនាមកម៉្លេះ តែទើបតែទទួលបានការចាប់អារម្មណ៍ខ្លាំងលើអ៊ីនធឺណិត ថ្មីៗនេះប៉ុណ្ណោះ។ គាត់បាននិយាយបន្ថែមថា មានយុវវ័យជាច្រើនចង់សាកល្បងដោយសារតែភាពចម្លែក និងចង់ដឹងចង់សាក ខណៈពេលដែលមនុស្សវ័យចំណាស់ភាគច្រើនមិនពេញចិត្តនោះទេ ព្រោះគ្មាននរណាម្នាក់ចូលចិត្តមើលសត្វកន្លាតឡើយ ។

មិនត្រឹមតែកាហ្វេដាក់ ថបភីង កន្លាតរោយពីលើប៉ុណ្ណោះទេ សារមន្ទីរនេះក៏មានភេសជ្ជៈសត្វល្អិតពិសេសជាច្រើនទៀតដូចជា ភេសជ្ជៈផលិតពីទឹករំលាយអាហាររបស់រុក្ខជាតិ pitcher ដែលគេស្គាល់ថាជារុក្ខជាតិចាប់សត្វល្អិតតូចៗជាចំណី និងភេសជ្ជៈ limited edition ដែលផ្សុំឡើងដោយម៉្សៅស្រមោច តែមិនងាយមានសំណាងបានផឹកឡើយ ព្រោះគេដាក់លក់តែថ្ងៃបុណ្យហាឡូវីនប៉ុណ្ណោះ។

ទោះមើលទៅចម្លែក និងគួរឲ្យរអើមបន្តិចតែ គ្រឿងផ្សំទាំងអស់ត្រូវបានគេអះអាងថា បានទិញពីហាងឱសថបុរាណចិន (TCM) និងមានសុវត្ថិភាព។ ក្នុងទ្រឹស្តីហាងឱសថបុរាណចិន (TCM )គេជឿថា ម៉្សៅកន្លាតអាចជួយឲ្យចរន្តឈាមដំណើរការល្អ ខណៈដង្កូវមេអំបៅសម្បូរទៅដោយប្រូតេអ៊ីន ដែលអាចជួយបង្កើនភាពស៊ាំរបស់មនុស្សបាន។

នោះមិនមែនជាលើកទីមួយឡើយនៅចិន ដែលមានកាហ្វេប្លែកៗបែបនេះ។ ពីមុនមាន កាហ្វេមួយនៅខេត្តយូណាន លាយដង្កូវចៀនជាមួយកាហ្វេ ខណៈហាងមួយផ្សេងទៀតនៅខេត្តជាំងស៊ី បានដាក់ម្ទេស និងម្សៅម្រេចក្តៅក្នុងឡាតេរបស់ពួកគេផងដែរ៕

ប្រទេសអូស្ត្រាលី ៖ ក្រុមហ៊ុន Meta ជាម្ចាស់ Facebook, Instagram និង Threads បានប្រកាសបិទគណនីបណ្តាញសង្គមមួយចំនួនរបស់យុវជនអូស្ត្រាលីដែលមានអាយុក្រោម១៦ឆ្នាំ បន្ទាប់ពីរដ្ឋាភិបាលអូស្ត្រាលីអនុវត្តច្បាប់ហាមយុវជនអាយុក្រោម១៦ឆ្នាំប្រើប្រាស់បណ្តាញសង្គម ។ Meta ចាប់ផ្តើមជូនដំណឹងទៅកាន់យុវជនអូស្ត្រាលីអាយុក្រោម១៦ឆ្នាំ ថាគណនីបណ្តាញសង្គមរបស់ពួកគេ រួមមាន ៖ TikTok, YouTube និង Reddit នឹងត្រូវបិទការប្រើប្រាស់ចាប់ពីថ្ងៃទី៤ ខែធ្នូ ឆ្នាំ២០២៥ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២០ ខែវិច្ឆិកា ។

រដ្ឋាភិបាលអូស្ត្រាលីនឹងចាប់ផ្តើមអនុវត្តច្បាប់ហាមយុវជនអាយុក្រោម១៦ឆ្នាំប្រើប្រាស់បណ្តាញសង្គមជាផ្លូវការចាប់ពីថ្ងៃទី១០ ខែធ្នូ ដែលការហាមឃាត់នេះអនុវត្តចំពោះ TikTok, YouTube និង Reddit ។ នាយករដ្ឋមន្ត្រីអូស្ត្រាលី លោក Anthony Albanese ថ្លែងថា គោលដៅនៃការហាមឃាត់យុវជនប្រើប្រាស់បណ្តាញសង្គមទាំងនេះ ដើម្បីកុំឱ្យពួកគេចំណាយពេលវេលាជាមួយទូរស័ព្ទស្មាតហ្វូនខ្លាំងពេក ហើយពួកគេនឹងក្លាយជាយុវជនល្អរបស់អូស្ត្រាលី ។

បើទោះជាក្រុមហ៊ុន Meta មិនយល់ស្របនឹងការហាមឃាត់នេះ ប៉ុន្តែក្រុមហ៊ុនប្រាប់ថា នឹងអនុវត្តតាមច្បាប់អូស្ត្រាលី ពីព្រោះបើក្រុមហ៊ុនបណ្តាញសង្គមណាមួយពុំត្រួតពិនិត្យអ្នកប្រើប្រាស់ ថាតើមានអាយុក្រោម១៦ឆ្នាំឬអត់ អូស្ត្រាលីពិន័យប្រាក់ក្រុមហ៊ុននោះរហូតដល់៥០លានដុល្លារអូស្ត្រាលី ឬជាង៣០លាន ៨សែនដុល្លារអាមេរិក ។

យុវជនប្រើប្រាស់បណ្តាញសង្គម គឺជាបញ្ហាមួយដែលប្រទេសនានាបារម្ភ ដោយសារពួកគេអាចចូលមើលអ្វីមិនសមរម្យ និងចាញ់បោកជនខិលខូច ។ ក្រៅពីនេះ ក៏មានការបារម្ភពីផលប៉ះពាល់សុខភាពរាងកាយ និងផ្លូវចិត្តផងដែរ ពីព្រោះបើយុវជនប្រើប្រាស់បណ្តញសង្គមច្រើននឹងមានអារម្មណ៍តានតឹង, ប្រៀបធៀបខ្លួនឯងជាមួយអ្នកដទៃ, ទទួលបានព័ត៌មានសុខភាពមិនត្រឹមត្រូវ និងធ្វើឱ្យពួកគេបោះបង់ការហាត់ប្រាណ ឬចូលរួមសកម្មភាពផ្សេងៗក្នុងសង្គម ។

តាមអ្នកជំនាញ ប្រសិនបើអូស្ត្រាលីអាចហាមឃាត់យុវជនកុំឱ្យប្រើប្រាស់បណ្តាញសង្គមមែននោះ អូស្ត្រាលីនឹងក្លាយជាប្រទេសគំរូសម្រាប់ប្រទេសផ្សេងៗដែលកំពុងស្វែងរកវិធីដោះស្រាយបញ្ហាយុវជនមានជំងឺផ្លូវចិត្ត និងប៉ះពាល់សុខភាពដោយសារការប្រើប្រាស់បណ្តាញសង្គម ។ បន្ទាប់ពីរដ្ឋាភិបាលអូស្ត្រាលីមានចំណាត់ការតឹងរ៉ឹង ក្រុមហ៊ុនបណ្តាញសង្គមជាច្រើនសន្យាថា នឹងសហការតាមដានការបង្ហោះរបស់អ្នកប្រើប្រាស់ ៕

រាជធានីភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលរវ៉ាន់ដា បានសម្រេចលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ។ នេះបើតាមសេចក្តីប្រកាសព័ត៌មាន ស្តីពីលទ្ធផលនៃដំណើរទស្សនកិច្ចផ្លូវការរបស់ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅសាធារណរដ្ឋរវ៉ាន់ដា។

នៅថ្ងៃទី១៨ ខែវិច្ឆិកា ឆ្នាំ២០២៥ លោក ប្រាក់ សុខុន បានដឹកនាំគណៈប្រតិភូទៅបំពេញទស្សនកិច្ច ផ្លូវការនៅសាធារណរដ្ឋរវ៉ាន់ដា ដើម្បីពង្រឹងបន្ថែមទៀតនូវទំនាក់ទំនងទ្វេភាគីរវាងប្រទេសទាំងពីរ។ ដំណើរទស្សនកិច្ចកម្រិតខ្ពស់នេះជាព្រឹត្តិការណ៍ដ៏សំខាន់មួយ ក្នុងរយៈពេល ២០ឆ្នាំ នៃទំនាក់ទំនងការទូតរវាងប្រទេសទាំងពីរ។

ក្នុងអំឡុងពេលនៃទស្សនកិច្ច លោក ប្រាក់ សុខុន បានចូលជួបសម្តែងការគួរសមចំពោះ លោក បណ្ឌិត Justin Nsengiyumva នាយករដ្ឋមន្ត្រីនៃសាធារណរដ្ឋរវ៉ាន់ដា ព្រមទាំងបានជួបពិភាក្សាទ្វេភាគីជាមួយ លោក Olivier J.P. Nduhungirehe រដ្ឋមន្ត្រីការបរទេស និងសហប្រតិបត្តិការ អន្តរជាតិនៃសាធារណរដ្ឋរវ៉ាន់ដា និងលោកស្រី Louise Mushikiwabo អគ្គលេខាធិកានៃអង្គការ អន្តរជាតិហ្វ្រង់កូហ្វូនី (OIF)។

ចំពោះកិច្ចពិភាក្សាទ្វេភាគីជាមួយលោក Olivier J.P. Nduhungirehe ភាគីទាំងពីរបានសម្តែងការពេញចិត្តចំពោះទំនាក់ទំនងទ្វេភាគីរវាងប្រទេសទាំងពីរ ដែលកំពុងរីកចម្រើន ចាប់តាំងពីការបង្កើត ក្នុងឆ្នាំ២០០៥ ជាពិសេសលើកិច្ចសហប្រតិបត្តិការក្នុងវិស័យហិរញ្ញវត្ថុ និងសេវាកម្មផ្លូវអាកាសដែលនឹងដើរតួជាឧបករណ៍ដ៏សំខាន់ក្នុងការពង្រីកការតភ្ជាប់ សម្រួលការផ្លាស់ប្តូរ និងពង្រឹងទំនាក់ទំនង សេដ្ឋកិច្ច និងទំនាក់ទំនងប្រជាជន និងប្រជាជន។

ក្នុងឱកាសនោះ រដ្ឋមន្ត្រីទាំងពីរបានចុះហត្ថលេខា លើឯកសារទ្វេភាគីចំនួនពីរគឺ៖ (១) អនុស្សរណៈនៃការយោគយល់គ្នាស្តីពីការបង្កើតកិច្ចពិគ្រោះយោបល់ ទ្វេភាគីរវាងក្រសួងការបរទេសទាំងពីរ និង (២) កិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់ លិខិតឆ្លងដែនការទូត និងផ្លូវការ។

ក្នុងអំឡុង ពេលជួបសម្តែងការគួរសម លោកនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះការស្វាគមន៍យ៉ាងកក់ក្តៅចំពោះ លោក ប្រាក់ សុខុន និងគណៈប្រតិភូ ព្រមទាំងបានកោតសរសើរចំពោះការពង្រឹងទំនាក់ទំនងរវាងប្រទេសទាំងពីរ។ លោកនាយករដ្ឋមន្ត្រី បានបញ្ជាក់ថា ការចុះហត្ថលេខាលើឯកសារទ្វេភាគីទាំងពីរដោយរដ្ឋមន្ត្រីការបរទេសទាំងពីរ នឹងបើកផ្លូវសម្រាប់ការពង្រឹងបន្ថែមទៀតនូវកិច្ចសហប្រតិបត្តិការដែលមានស្រាប់ និង ស្វែងយល់ពីវិស័យសក្តានុពលផ្សេងទៀតសម្រាប់ផលប្រយោជន៍ទៅវិញទៅមករបស់កម្ពុជា និងរវ៉ាន់ជា។

នៅក្នុងជំនួបទាំងបីខាងលើ លោក ប្រាក់ សុខុន បានឆ្លៀតឱកាសជម្រាបជូនអំពីភាព តានតឹងដែលកំពុងបន្តកើតមាននៅតាមព្រំដែនកម្ពុជា-ថៃ ដោយបានបញ្ជាក់ជាថ្មីនូវការប្តេជ្ញាចិត្តយ៉ាង ពេញលេញរបស់កម្ពុជា ក្នុងការថែរក្សាកិច្ចព្រមព្រៀងបទឈប់បាញ់ និងសេចក្តីថ្លែងការណ៍រួមរវាងកម្ពុជា និងថៃ នាពេលថ្មីៗនេះ ដែលត្រូវបានចុះហត្ថលេខាដោយនាយករដ្ឋមន្ត្រីទាំងពីរ នៅទីក្រុងគូឡាឡាំពួ នៅថ្ងៃទី២៦ ខែតុលា ឆ្នាំ២០២៥ ដោយមានលោក ដូណាល់ ត្រាំ ប្រធានាធិបតីសហរដ្ឋអាម៉េរិក និងលោក អាន់វ៉ា អ៉ីប្រាហ៊ីម នាយករដ្ឋមន្ត្រីម៉ាឡេស៊ី ក្នុងនាមជាប្រធានអាស៊ានធ្វើជាសាក្សី៕

ជនជាតិប៉ាឡេស្ទីនចំនួន ២៨ នាក់បន្ថែមត្រូវបានសម្លា.ប់ និងជាង ៧៧ នាក់រងរបួសនៅក្នុងការវា.យប្រហារជាបន្តបន្ទាប់របស់អ៊ីស្រាអែលនៅទូទាំងតំបន់ហ្គាហ្សា ដែលជាការរំលោ.ភបំពានដ៏ធំបំផុតមួយនៃបទឈប់បា.ញ់ ក្រោយទើបមានការសម្របសម្រួលដោយសហរដ្ឋអាមេរិកកាលពីខែមុន។ នេះបើតាមរបាយការណ៍ដែលចុះផ្សាយដោយបណ្ដាញសារព័ត៌មាន Al Jazeera។

គិតមកត្រឹមថ្ងៃទី២០ ខែវិច្ឆិកានេះ ការវា.យប្រហាររបស់អ៊ីស្រាអែលនៅតែកើតមានជាបន្តបន្ទាប់ទៅលើតំបន់ al-Mawasi ដែលជាចំណុចប្រសព្វដ៏មមាញឹកមួយ ដោយបានសម្លា.ប់ជនជាតិប៉ាឡេស្ទីនយ៉ាងហោចណាស់ ២៨ នាក់ ដែលជាការកើនឡើងជាថ្មីម្ដងទៀតនៃអំពើហិង្សាចុងក្រោយបំផុត ចាប់តាំងពី បទឈប់បាញ់រវាងអ៊ីស្រាអែល និងក្រុមហាម៉ាសចូលជាធរមាន។

ទាក់ទងនឹងការនៅតែបន្តបា.ញ់នេះ អ៊ីស្រាអែលអះអាងថា ខ្លួនបានកំណត់គោលដៅតែលើទីតាំងក្រុមហាម៉ាសប៉ុណ្ណោះ ព្រោះកងទ័ពរបស់ខ្លួននៅតែរងការបា.ញ់ប្រហារនៅ Khan Younis ដោយក្រុមហាម៉ាស។ ប៉ុន្តែទោះជាយ៉ាងណា ក្រុមហាម៉ាសបានបដិសេធចំពោះការចោ.ទប្រកាន់នេះ។

គួរជម្រាបថា ការវាយប្រហារនេះកើតឡើងតែប៉ុន្មានថ្ងៃប៉ុណ្ណោះ បន្ទាប់ពីក្រុមប្រឹក្សាសន្តិសុខអង្គការសហប្រជាជាតិ បានគាំទ្រផែនការរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ អំពីរបៀបសម្រាប់ឈានទៅមុខបន្ទាប់ពីបទឈប់បាញ់ដ៏ផុយស្រួយ ដើម្បីឆ្ពោះទៅរកសន្តិភាពប្រកបដោយនិរន្តរភាព និងការកសាងឡើងវិញនូវតំបន់ដែលត្រូវបានបំផ្លិចបំផ្លាញយ៉ាងខ្លាំងមួយនេះ។

ក្រុមហាម៉ាស បានថ្កោលទោសការវាយប្រហារនេះ និងអំពាវនាវឱ្យសហរដ្ឋអាមេរិកដាក់ «សម្ពាធជាបន្ទាន់ និងខ្លាំងក្លា» លើអ៊ីស្រាអែល ដើម្បី «គោរពបទឈប់បាញ់ និងបញ្ឈប់ការឈ្លានពានប្រឆាំងនឹងប្រជាជនរបស់យើង»។

អ្នកវិភាគបានព្រមា.នថា ការវាយប្រហារថ្មីទាំងនេះកំពុងសាកល្បងភាពជឿជាក់នៃបទឈប់បា.ញ់ដែលផ្ដួចផ្ដើមឡើងដោយសហរដ្ឋអាមេរិក ខណៈអ៊ីស្រាអែលត្រូវបានគេកត់សម្គាល់ឃើញថា បានរំលោភបំពានបទឈប់បា.ញ់ចំនួន ៣៩៣ ដង ចាប់តាំងពីថ្ងៃទី ១០ ខែតុលាមក ដែលបង្កើនការភ័យខ្លាចថា ភ្លើងសង្គ្រាមនឹងនៅតែបន្តក្រោមរូបភាពនៃកិច្ចព្រមព្រៀងសន្តិភាព៕

ប្រទេសចិន ៖ អ្នកចូលចិត្តកាហ្វេនៅលើពិភពលោក ពិតជាភ្ញាក់ផ្អើលយ៉ាងខ្លាំងក្រោយពេលឃើញហាងមួយកន្លែងក្នុងសារមន្ទីរនៅទីក្រុងប៉េកាំង ប្រទេសចិន យកម្សៅដែលកិនពីសត្វកន្លាត និងកន្លាតទាំងមូលមករោយលើកាហ្វេ ថែមទាំងធានារសជាតិថ្មីអាចផឹកបាន គ្មានផលប៉ះពាល់សុខភាព ។ អ្វីកាន់តែធ្វើឱ្យចាប់អារម្មណ៍បំផុតនោះ គឺហាងបានដាក់ដង្កូវចូលកាហ្វេផងដែរ ដែលធ្វើឱ្យអ្នកផឹកសួរថា តើហ៊ានសាកល្បងដែរឬទេ?

តាមការចុះផ្សាយរបស់សារព័ត៌មានបរទេសនៅថ្ងៃទី២០ ខែវិច្ឆិកា ឆ្នាំ២០២៥ ហាងកាហ្វេនេះបានធ្វើឱ្យអ្នកចូលចិត្តកាហ្វេលើពិភពលោកភ្ញាក់ផ្អើលយ៉ាងខ្លាំង ក្រោយបង្ហាញកាហ្វេរសជាតិថ្មីរោយម្សៅកន្លាត និងកន្លាតទាំងមូល ថែមទាំងដាក់ដង្កូវចូលក្នុងកែវតែមួយ ។ អ្នកសាកល្បងផឹកកាហ្វេប្រាប់ថា រសជាតិរបស់វាថ្មី ប្លែក ជូរបន្តិច ហើយការផឹកកាហ្វេបែបនេះមានតែនៅទីក្រុងប៉េកាំងមួយគត់ កន្លែងផ្សេងគ្មានទេ ។

ហាងកាហ្វេពុំត្រូវបានបញ្ជាក់ឈ្មោះបានលក់កាហ្វេកន្លាត១កែវ តម្លៃ៤៥យាន់ (ឬប្រមាណ ៥ដុល្លារ) បានបញ្ជាក់ពីរសជាតិកាហ្វេប្លែករបស់ខ្លួនមានតែមួយកន្លែងប៉ុណ្ណោះនៅទីក្រុងប៉េកាំង និងក្លាយជាហាងល្បីល្បាញសម្រាប់អតិថិជនចង់សាកល្បងផឹកអ្វីប្លែកៗ ។ ហាងបានលក់កាហ្វេកន្លាតតាំងពីចុងខែមិថុនា ឆ្នាំ២០២៥ មកម្ល៉េះ ប៉ុន្តែទើបតែល្បីល្បាញក្នុងបណ្តាញសង្គមនាពេលថ្មីៗ ។

លើសពីនេះ ហាងបានលក់ភេសជ្ជៈរសជាតិផ្សេងទៀត រួមមាន ៖ ភេសជ្ជៈដាក់ផ្សំគ្រឿងពីទឹកសម្ល ទឹកអង្ករ និងសត្វស្រមោច ដោយលក់តែក្នុងពិធីបុណ្យ Halloween ដែលធ្វើឱ្យកាហ្វេរសជាតិថ្មីកាន់តែល្បីល្បាញនៅប្រទេសចិន ។ បុគ្គលិកហាងប្រាប់ថា គ្រឿងផ្សំសត្វល្អិតផ្សេងៗយកពីហាងលក់ឱសថបុរាណចិន ទើបហាងអាចធានាដល់អតិថិជនផឹកហើយមិនប៉ះពាល់សុខភាព ទោះជាមើលទៅពុំគួរឱ្យផឹក ។ បើតាមក្បួនឱសថបុរាណចិន ម្សៅកិនពីកន្លាតនឹងជួយជំរុញចរន្តឈាម ខណៈដង្កូវសម្បូរដោយប្រូតេអ៊ីនជួយប្រព័ន្ធការពាររាងកាយ ។

កាហ្វេកន្លាតបានទាក់ទាញអតិថិជនភាគច្រើនជាយុវវ័យ រីឯអតិថិជនវ័យកណ្តាលមិនចូលចិត្តកន្លាតឡើយ ហើយហាងលក់បានជាង១០កែវក្នុង១ថ្ងៃ ។ កន្លងមក មានម្ចាស់ Blogger ដ៏ល្បីនៅទីក្រុងប៉េកាំងបានមកសាកល្បងផឹកកាហ្វេកន្លាតតាមការសំណូមពររបស់អ្នកគាំទ្រ ដោយបានផឹកយ៉ាងឆាប់រហ័ស និងថា រសជាតិរបស់វាមិនអាក្រក់ដូចការគិត ។ នេះបើតាមការលើកឡើងរបស់បុគ្គលិកហាងកាហ្វេ ។

ទោះយ៉ាងណា ក៏មានអ្នកលេងបណ្តាញសង្គមមិនតិចនាក់ទេដែលមិនហ៊ានផឹកកាហ្វេនេះ និងថា ទោះជាមានអ្នកចេញលុយឱ្យក៏ដោយ ក៏មិនហ៊ានផឹកដែរ ។ កាហ្វេប្លែកៗនៅប្រទេសចិនបានដាក់លក់ជាបន្តបន្ទាប់ ទាំងកាហ្វេដង្កូវចៀននៅខេត្តយូណាន, ឡាតេម្ទេសបំពង និងកាហ្វេដាក់ម្ទេសហឹរនៅខេត្តជៀងស៊ី ដែលទាក់ទាញអ្នកផឹកនៅប្រទេសចិនជាបន្តបន្ទាប់ ៕

មីយ៉ាន់ម៉ា និង ថៃ៖ ប្រតិបត្តិការបង្រ្កាបឧក្រិ.ដ្ឋ.កម្មឆបោ.កតាមអនឡាញដោយការបំផ្ទុះគ្រាប់របស់យោធាមីយ៉ាន់ម៉ានៅតំបន់តាមព្រំដែន បានផ្លោ.ងជ្រុលទៅប៉ះចំផ្ទះរបស់ប្រជាពលរដ្ឋថៃបណ្ដាលឲ្យខូចខាតចំនួន ៥ខ្នង។ ក្រោយហេតុការណ៍នេះ អាជ្ញាធរថៃបានត្រឹមផ្ញើសេចក្ដីជូនដំណឹងពីការខូចខាតទៅឲ្យមីយ៉ាន់ម៉ា និងស្នើសុំឲ្យក្រុមយោធាបន្ធូរដៃក្នុងការបង្រ្កាបតែប៉ុណ្ណោះ។

យោងតាមការចុះផ្សាយរបស់បណ្ដាញសារព័ត៌មាន ប៉ុស្តិ៍លេខ៧ របស់ថៃនៅថ្ងៃទី១៩ វិច្ឆិកា ឆ្នាំ២០២៥ បានបង្ហាញថា សកម្មភាពបង្រ្កាបមជ្ឈមណ្ឌលឆបោ.កតាមអនឡាញ “KK Park” របស់យោធាមីយ៉ាន់ម៉ា ដោយប្រើប្រាស់គ្រឿងផ្ទុះដើម្បីបំផ្លាញអគារគឺជាបញ្ហាសំខាន់ៗ បានប៉ះពាល់ដល់ផ្ទះពលរដ្ឋថៃចំនួន ៥ខ្នងនៅក្នុងស្រុកម៉ែសូត ខេត្តតាក ប្រទេសថៃ។

តាមរបាយការណ៍របស់អាជ្ញាធរក្នុងតំបន់ ផ្ទះទាំងនោះត្រូវបានរងការខូចខាតយ៉ាងតំណម ដោយដំបូល ពិដាន និងកញ្ចក់ទ្វារ បង្អួច បែ.កបា.ក់ខ្ទេចខ្ទីយ៉ាងធ្ងន់ធ្ងរ ប៉ុន្តែក៏ជាសំណាងល្អ ដែលម្ចាស់ផ្ទះ និងមនុស្សម្នារនៅជុំវិញនោះមិនមានអ្នករងគ្រោះថ្នាក់។

ភ្លាមៗនោះភ្នាក់ងារសន្តិសុខថៃក៏បានចុះមកធ្វើការស៊ើបអង្កេត និងជូនដំណឹងដល់យោធាមីយ៉ាន់ម៉ាអំពីផលប៉ះពាល់ផងដែរ តែទោះជាយ៉ាងណាក៏ដោយ ភាគីថៃមិនទទួលបានការឆ្លើយតប ឬកិច្ចសហប្រតិបត្តិការគ្រប់គ្រាន់ពីមីយ៉ាន់ម៉ានោះទេ។

លើសពីនេះ បន្ទាប់ពីសកម្មភាពបង្ក្រាបដោយហិង្សារបស់យោធាមីយ៉ាន់ម៉ាដូចខាងលើនេះ ក្រុមឧក្រិដ្ឋជន រួមទាំងពលរដ្ឋមីយ៉ាន់ម៉ាមួយចំនួនបាននាំគ្នារត់ប្រសាចចូលទៅក្នុងទឹកដីថៃដោយខុសច្បាប់ និងក្រោយមកត្រូវបានទាហាន និងមន្ត្រីរដ្ឋាភិបាលមូលដ្ឋានខេត្តតាក បានស្ទាក់ចាប់បានមនុស្ស ៣៦នាក់ ខណៈពួកគេព្យាយាមឆ្លងដែនទៅខេត្តសាមុតសាខន និងក្រុងបាងកករយៈច្រករបៀងស្រុកម៉ែរ៉ាម៉ាត។ ។

គួរជម្រាបថា ការវាយប្រហា.រទៅលើក្រុមឧក្រិដ្ឋជនរហូតរាលដាលដល់ទឹកដីថៃបែបនេះ មិនមែនទើបកើតមានជាលើកទី១នោះទេ។ កន្លងមក មានមនុស្សជិត២០០០នាក់ ដែលមានចម្រុះជាតិសាសន៍បាននាំគ្នារត់គេចខ្លួនចូលទឹកដីថៃ បង្កឲ្យមានការតាមចាប់ខ្លួនយ៉ាងអាណាធិបតេយ្យ។

ទោះជាយ៉ាងណាក៏ដោយ រដ្ឋាភិបាលថៃមិនដែលហ៊ានធ្វើការឆ្លើយតបដោយហិង្សា ឬចេញសេចក្ដីប្រកាសតឹងរឹងទៅកាន់យោធាមីយ៉ាន់នោះទេ ពួកគេបានត្រឹមតែផ្ញើសេចក្ដីជូនដំណឹង ដើម្បីរៀបរាប់ពីផលប៉ះពាល់ និងស្នើសុំឲ្យយោធាកាត់បន្ថយការប្រើប្រាស់អាវុ.ធប៉ុណ្ណោះ ដែលទង្វើនេះបានបង្ហាញឲ្យយើងឃើញថា ថៃហាក់ក្រែងរអានឹងរបបដឹកនាំដោយយោធារបស់មីយ៉ាន់ម៉ា៕