បរទេស៖ ប្រទេសនៅអឺរ៉ុបចំនួនប្រាំបីបានរាយការណ៍អំពីសីតុណ្ហភាពបំបែកកំណត់ត្រាចាប់តាំងពីថ្ងៃ ដំបូងនៃ ឆ្នាំថ្មី បន្ទាប់ពីមានអាកាសធាតុរលកកម្ដៅបានកើនឡើងក្នុងរដូវរងានេះ។

នាថ្ងៃទី ៤ ខែមករា ឆ្នាំ២០២៣ នេះមានសេចក្ដីរាយការណ៍ក្រៅស្រុកមួយបានបញ្ជាក់ថា ចាប់ពីខែមករា ដែលជាខែក្នុងប្រទេសជាច្រើនជាពិសេសនៅអឺរ៉ុបនៅតែមានសីតុណ្ហភាពត្រជាក់ក្នុងរដូវរងា ប៉ុន្តែក្រឡេកទៅកាន់ប្រទេសចំនួន ៨ នៅអ៊ឺរ៉ុប ដោយប្រជាជនក៏កំពុងប្រឈមមុខនឹងរលកកំដៅ  ដោយប្រែក្លាយ រដូវរងា ទៅជាមានអាកាសធាតុក្ដៅ ជាមួយនឹងសីតុណ្ហភាពដែលត្រូវបានបំបែកកំណត់ត្រាចាប់តាំងពីថ្ងៃដំបូងនៃឆ្នាំ ២០២៣ឈានមកដល់។

ជាមួយគ្នានោះអ្នកជំនាញអាកាសធាតុដែលតាមដានសីតុណ្ហភាពខ្លាំងនៅជុំវិញពិភពលោកបានរាយការណ៍ថានៅថ្ងៃទី ១ ខែមករា មានប្រទេសចំនួន៨ នៅអឺរ៉ុបរួមមាន Liechtenstein ,សាធារណរដ្ឋឆេក, ប៉ូឡូញ ,ហូឡង់, បេឡារុស្ស, លីទុយអានី, ដាណឺម៉ាក និងឡាតវី បានកត់ត្រាពីសីតុណ្ហភាពឡើងខ្ពស់។

ដោយជាធម្មតា ទីក្រុង Warsaw ប្រទេសប៉ូឡូញ បានកត់ត្រាសីតុណ្ហភាពជិត ១៩ អង្សាសេ ធ្លាក់ចុះពីធម្មតា ១៥អង្សាសេ ហើយសីតុណ្ហភាពឡើងដល់ ២៥អង្សាសេ ឬនៅទីក្រុង Bilbao ក្នុងប្រទេសអេស្ប៉ា ខ្ពស់ជាងមធ្យមភាគ ១០ អង្សាសេ។

ក្នុងនោះគេបានបញ្ជាក់ថា វាគឺជារលកកម្ដៅដ៏អាក្រក់បំផុតនៅក្នុងប្រវត្តិសាស្ត្រអ៊ឺរ៉ុប ប្រប្រៀបជាមួយនឹងសីតុណ្ហភាពនៅក្នុងតំបន់មួយចំនួននៃទ្វីបអឺរ៉ុបដែលមានាអាកាសធាតុត្រជាក់ពី ៤-១០ អង្សាសេលើសពីមធ្យមភាគរដូវរងា។

បញ្ហាខាងលើ មិនមានព័ត៌មានណាដែលអាចបញ្ជាក់ឱ្យប្រាកដថាតើរលកកម្ដៅមិនធម្មតានេះដែលជាលទ្ធផលនៃការឡើងកំដៅលើផែនដី និងវិបត្តិបម្រែបម្រួលអាកាសធាតុនោះឡើយ? ហើយអ្នកវិទ្យាសាស្ត្របានបន្ថែមថាការប្រែប្រួលអាកាសធាតុនៃធម្មជាតិនេះ នឹងកើតឡើងញឹកញាប់ និងធ្ងន់ធ្ងរជាងនេះទៅថ្ងៃអនាគត៕ ប្រភព៖ pptvhd36

អន្តរជាតិ៖ ការប្រើអាវុធ HIMARS របស់សហរដ្ឋអាមេរិក បាញ់សម្លាប់ទាហានរុស្ស៊ីក្នុងក្រុង Makiivka នៃខេត្តដូណេតស៍ បានបារម្ភថារុស្ស៊ីនឹងធ្វើការវាយសងសឹកវិញក្នុងទ្រង់ទ្រាយធំ។ ក្រសួងការពារជាតិរុស្ស៊ីបានថ្លែងថាចំនួនទាហានស្លាប់ដោយសារការវាយប្រហាររបស់អ៊ុយក្រែនដោយ អាវុធ HIMARS លើអគារដែលមានទាហានរុស្ស៊ី ជួបជុំគ្នានាដំណាច់ឆ្នាំសកល២០២២កន្លងមកនេះ បានកើនដល់៨៩នាក់ហើយ ខណៈដែលអ៊ុយក្រែនថ្លែងថាតួលេខស្លាប់មានច្រើនដល់ ៤០០នាក់។

ក្រសួងការពារជាតិរុស្ស៊ី បានបង្កើនតួលេខទាហានរុស្ស៊ីស្លាប់ដល់ ៨៩នាក់ ពាក់ព័ន្ធនឹងការវាយប្រហាររបស់អ៊ុយក្រែនលើអគារមួយកន្លែង ដែលមានទាហានស្នាក់នៅក្នុងក្រុង Makiivka នៃខេត្តដូណេតស៍។ ក្រសួងការពារជាតិរុស្ស៊ីបានបន្ទោសថា ការវាយប្រហារដែលអាចនាំឱ្យសត្រូវបានដឹងអំពីទីកន្លែងនោះ គឺដោយសារតែការប្រើប្រាស់ទូរស័ព្ទដៃដែលគេមិនបានអនុញ្ញាតឡើយ សម្រាប់កងកម្លាំងរុស្ស៊ីនោះ។ ការវាយប្រហារដាក់លើអគារដែលមានទាហានរុស្ស៊ីរស់នៅនោះ បានធ្វើឡើងតែប៉ុន្មាននាទីដំបូងនៃពេលទើបនឹងចូលឆ្នាំសកលថ្មី ឈានចូលថ្ងៃអាទិត្យ ទី១មករា ឆ្នាំ២០២៣ ដែលនៅទីនោះមានទាហានរុស្ស៊ីកំពុងប្រមូលផ្តុំ ជួបជុំគ្នារីករាយអបអរសាទរពិធីបុណ្យចូលឆ្នាំសកលថ្មី។

ទាហានអ៊ុយក្រែនបានប្រកាសថា មានទាហានរុស្ស៊ីស្លាប់ច្រើនដល់៤០០នាក់ ប៉ុន្តែរុស្ស៊ីដំបូងបានថ្លែងថាការវាយប្រហារនោះ បានសម្លាប់ទាហានរុស្ស៊ី ៦៣នាក់ និងក្រោយមកនៅថ្ងៃពុធ ទី៤មករា បានបញ្ជាក់បន្ថែមថាតួលេខមនុស្សស្លាប់កើនដល់៨៩នាក់។ ការបាត់បង់ជីវិតនេះ ត្រូវបានពលរដ្ឋរុស្ស៊ីតាមកន្លែងមួយចំនួនជួបជុំគ្នាធ្វើពិធីកាន់ទុក្ខ។ នេះជាទិដ្ឋភាពមួយនៃការចូលរួមកាន់ទុក្ខរបស់ពលរដ្ឋរុស្ស៊ី ក្នុងក្រុង Samara ដែលក្នុងនោះ រួមមានទាំងក្រុមគ្រួសារដែលមានសាច់ញាតិរបស់ខ្លួនស្លាប់ក្នុងព្រឹត្តិការណ៍វាយប្រហាររបស់ អ៊ុយក្រែនដាក់លើទាហានរុស្ស៊ីដែលជួបជុំគ្នាប្រារព្ធបុណ្យដំណាច់ឆ្នាំសកលផងដែរ។

ឧត្តមសេនីយ៍ឯករុស្ស៊ីឈ្មោះ Sergey Sevryukov បានថ្លែងនៅថ្ងៃពុធ ទី៤មករា ថាគេទើបបានរកឃើញសាកសពទាហានរុស្ស៊ីបន្ថែមទៀត ក្រោមគំនរបែកបាក់អគារដែលរងការវាយប្រហារ ដោយអាវុធ HIMARS ផ្តល់ដោយសហរដ្ឋអាមេរិកចំពោះទាហានអ៊ុយក្រែន។ ឧត្តមសេនីយ៍ឯកដដែលនោះបានថ្លែង បន្ទោសចំពោះការប្រើប្រាស់ទូរស័ព្ទដោយទាហានរុស្ស៊ី ដែលប្រើប្រាស់ក្នុងពេលនោះ ដែលនាំឱ្យសត្រូវអាចចាប់ដឹងបាននូវទីតាំងកំពុងប្រមូលផ្តុំគ្នា។ អគារដែលរងការវាយប្រហារដោយអាវុធ HIMARS បាញ់ដោយទាហានអ៊ុយក្រែន គឺជាអតីតកន្លែងសាលាវិជ្ជាជីវៈមួយដែលក្រោយមក ត្រូវបានគេយកមកប្រើប្រាស់ជាកន្លែងប្រើប្រាស់របស់ទាហានរុស្ស៊ីវិញ។

ការដែលទាហានអ៊ុយក្រែនអាចវាយប្រហារដាក់លើទីតាំងទាហានរុស្ស៊ី និងបង្កការបំផ្លាញជីវិតទាហានថែមទៀតនេះបានបំផុសការខឹងក្នុងរង្វង់អ្នកស្នេហាជាតិរុស្ស៊ី និងមន្ត្រីសភារុស្ស៊ីមួយចំនួន។ ពួកគេបានដាក់សំណួរចោទលើយុទ្ធសាស្ត្រយោធានៃមេបញ្ជាការរបស់រុស្ស៊ី ដែលដឹកនាំការប្រយុទ្ធក្នុងសង្គ្រាមអ៊ុយក្រែននោះ។ អតីតមន្ត្រីសន្តិសុខសហព័ន្ធរុស្ស៊ី FSB លោក Igor Girkin បានសរសេរក្នុងប្រព័ន្ធតេឡេក្រាមនិយាយថា ឧបករណ៍យោធានិងគ្រាប់រំសេវបានរក្សាទុកក្នុងឃ្លាំងនៅអគារ ដែលមានទាហានរុស្ស៊ីស្ថិតក្នុងនោះ ដែលធ្វើឱ្យការផ្ទុះបានកើនឡើងកាន់តែខ្លាំងនាពេលនោះ។ លោក Igor Girkin បានបន្ទោសថា ការខូចខាតបាត់បង់នោះ គឺដោយសារតែឧត្តមសេនីយ៍យោធារុស្ស៊ីមិនបានហ្វឹក ហ្វឺន។

សមាជិកសភារុស្ស៊ីម្នាក់ឈ្មោះ Sergei Mironov បានទាមទាររកការដាក់ទោសលើមន្ត្រីយោធាដែលបានធ្វើការប្រមូលផ្តុំទាហានក្នុងអគារ ដែលមិនមានការការពារសុវត្ថិភាពឡើយ។
កំហឹងដែលខឹងលើឧត្តមសេនីយ៍យោធារុស្ស៊ី ត្រូវគេឃើញបានធ្វើផងដែរតាមពលរដ្ឋក្នុងបណ្តាញសង្គម។ ការសរសេររិះគន់តាមបណ្តាញសង្គមបានខឹងនឹងមេបញ្ជាការរុស្ស៊ី ដែលបានចេញបញ្ជាឱ្យការជួបជុំគ្នាក្នុងអគារគ្មានសុវត្ថិភាព ហើយរៀបចំពិធីបុណ្យដំណាច់ឆ្នាំសកលនោះ។ បណ្តាញសង្គមបានសរសេរថា ករណីនេះធ្លាប់បានកើតមានម្តងរួចទៅហើយ ប៉ុន្តែមេបញ្ជាការរបស់រុស្ស៊ីមិនព្រមទទួលយកនូវមេរៀនចាស់នោះឡើយ។ ក្រសួងការពារជាតិរុស្ស៊ីបានថ្លែងថាអគារដែលមានទាហានរុស្ស៊ីកំពុង ស្ថិតក្នុងនោះបានរងនឹងការបាញ់ដោយអាវុធ HIMARS ចំនួន៤គ្រាប់។

ការវាយប្រហាររបស់អ៊ុយក្រែនដាក់លើអគារស្នាក់នៅទាហានរុស្ស៊ី ក្នុងដំណាច់ឆ្នាំសកល មិនបានកាត់បន្ថយការវាយប្រហាររបស់រុស្ស៊ីដាក់លើអ៊ុយក្រែនវិញនោះឡើយ។ ក្រសួងការពារជាតិរុស្ស៊ីបានអះអាងលើការវាយប្រហារដាក់លើតំបន់ដូណេតស៍នោះវិញ ដែលក្នុងនោះការវាយប្រហារមួយបានកម្ទេចមជ្ឈមណ្ឌលកំសាន្តជិះស្គីដើរលើទឹកកក។ អ៊ុយក្រែនបាននិយាយ ថាការវាយប្រហារនោះបានធ្វើឱ្យមនុស្សម្នាក់ស្លាប់និងម្នាក់ទៀតបានរងរបួស និងអគារស្នាក់ នៅរបស់ពលរដ្ឋចំនួន២០ត្រូវបានខូចខាត។

សេចក្តីរាយការណ៍ពីភាគីរុស្ស៊ីវិញ បានថ្លែងថា ក្នុងការវាយប្រហារនោះ គេបានបាញ់កម្ទេចអាវុធ HIMARS ចំនួន២គ្រឿងដែលរុស្ស៊ីនិយាយថា គឺជាអាវុធដែលបានបាញ់ដាក់លើអគារស្នាក់នៅរបស់ទាហានរុស្ស៊ីជួបជុំគ្នាក្នុងដំណាច់ឆ្នាំសកលថ្មីៗនេះ។ ទាហានរុស្ស៊ីថែមទាំងបានអះអាងថា គេបានបំផ្លាញយានយន្តយោធាដែល ជាអំណោយរបស់ប្រទេសឆេកដល់អ៊ុយក្រែន និងថាបានកម្ទេចឃ្លាំងដាក់គ្រាប់អ៊ុយក្រែនថែមទៀត។ រុស្ស៊ីថែមទាំងបានអះអាងការសម្លាប់ទាហានអ៊ុយក្រែនបានច្រើនថែមទៀតប៉ុន្តែមិន មានប្រភពអព្យាក្រិត្យណាអាចបញ្ជាក់បន្ថែមបានឡើយ។ ពេលនេះរុស្ស៊ីនៅមិនទាន់បានធ្វើការវាយសងសឹកណាមួយតបតទៅវិញទេ ប៉ុន្តែមានការរំពឹង ថារុស្ស៊ីនឹងអាចធ្វើការវាយប្រហារដាក់លើអ៊ុយក្រែនវិញក្នុងពេលណាមួយខាងមុខនេះ។

លោក ហ្សេឡិនស្គី បានថ្លែងកាលពីថ្ងៃអង្គារ៍ ទី៣មករាថា រុស្ស៊ីនឹងអាចធ្វើការវាយប្រហារក្នុងទ្រង់ទ្រាយធំរបស់ខ្លួនវិញ។ លោកហ្សេឡិនស្គី បានថ្លែងថា អ៊ុយក្រែនបានត្រៀមចាំរួចជាស្រេច និងថាអ៊ុយក្រែននឹងធ្វើកិច្ចការរបស់ខ្លួនដើម្បីបង្អាក់សេណារីយ៉ូរបស់រុស្ស៊ីនេះវិញ។ លោកថា រាល់ការប៉ុនប៉ងវាយប្រហារណាមួយរបស់រុស្ស៊ីនឹងត្រូវបរាជ័យជាមិនខានឡើយ។ នៅជាមួយ គ្នានេះផងដែរ ទូរទស្សន៍ជាតិអ៊ុយក្រែនបានប្រកាសការប្រុងប្រយ័ត្នការវាយប្រហារតាមផ្លូវអាកាសរបស់រុស្ស៊ីតាមរយៈការប្រើដ្រូន។ ទូរទស្សន៍អ៊ុយក្រែនបានផ្សាយនៅថ្ងៃ ទី៤មករាថា គេបានត្រៀមរួចជាស្រេចក្នុងការចាំបាញ់ទម្លាក់ដ្រូន។

ទូរទស្សន៍អ៊ុយក្រែនបញ្ជាក់ថា ក្នុងរយៈ ពេលតែ២ថ្ងៃ គឺថ្ងៃទី៣០ និង៣១ធ្នូ គេបានបាញ់ទម្លាក់ដ្រូនចំនួន ៨៤គ្រឿងដោយប្រព័ន្ធការពារអាកាស។ ទូរទស្សន៍ដដែលនិយាយថា គិតចាប់តាំងពីមានការប្រើដ្រូន ថ្ងៃទី១១កញ្ញានោះមក អ៊ុយក្រែនបានបាញ់ទម្លាក់ដ្រូនដែលរុស្ស៊ីបានប្រើប្រាស់ចំនួន៥០០គ្រឿងហើយ។ ក្នុងប្រទេសរុស្ស៊ីនោះវិញ ពលរដ្ឋមួយចំនួនដែលគាំទ្រស្ត្រីដែលមានស្វាមីបានស្លាប់ក្នុងសង្គ្រាមអ៊ុយក្រែន បានអំពាវនាវឱ្យមេដឹកនាំរុស្ស៊ីលោកពូទីនដាក់បញ្ជាធ្វើការចល័តទ័ពក្នុងទ្រង់ទ្រាយធំច្រើនលាននាក់ ក្នុងចំណោមបុរសរុស្ស៊ីទាំងឡាយដើម្បីធានាយកជ័យជំនះលើអ៊ុយក្រែន៕

ប្រទេសចិន ៖ Fujian ជានាវាផ្ទុកយន្តហោះបង្កើតឡើងដោយចិន នឹងត្រៀមសាកល្បងចុះសមុទ្រជាក់ស្តែងនៅឆ្នាំនេះ ដោយសង្ឃឹមថា នឹងអាចពង្រីកសក្តានុពលផ្នែកកងទ័ព និងជានាវាទំនើបមួយរបស់កងទ័ពចិន ។

មេបញ្ជាការរងនៃកងនាវា Fujian ជានាវាទី៣ផ្ទុកយន្តហោះរបស់កងទ័ពចិនបង្ហាញថា វានឹងសាកល្បងចុះក្នុងសមុទ្រជាក់ស្តែងនៅឆ្នាំនេះ ក្រោយពីចិនបង្ហាញនាវាដ៏ធំនៅក្រុងសៀងហៃកាលពីខែមិថុនាឆ្នាំមុន ដើម្បីរួមចំណែកដល់ការសម្រេចគោលដៅនាំចិនជាប្រទេសមហាអំណាចក្នុងពិភពលោកឆ្នាំ២០៤៩ ប្រកាសដោយលោកប្រធានាធិបតី ស៊ី ជិនពីង ខណៈលោកបានលើកពីភាពជោគជ័យរបស់នាវា Fujian ក្នុងឱកាសឆ្នាំថ្មី ដែលធ្វើឱ្យកងទ័ពចិនមានមោទនភាពយ៉ាងខ្លាំង ។

តាមសារព័ត៌មាន Xinhua រាយការណ៍ថា នាវានេះមានទីធ្លាវែងសម្រាប់យន្តហោះចុះចត និងបំពាក់ដោយអាវុធទំនើប ។ វាជាបច្ចេកវិទ្យាថ្មីចុងក្រោយរបស់កងទ័ពផងដែរ ក្រោយពីបានបង្ហាញខ្លួនកាលពី៦ខែមុន ។ នាវាផ្ទុកយន្តហោះ Fujian បានឆ្លងកាត់ការបំពាក់ឧបករណ៍រយៈពេលយូរ រួមទាំងសាកល្បងតួនាទីក្នុងប្រព័ន្ធផ្សេងៗ ។

នាវានេះបង្ហាញខ្លួនឡើង ចាត់ទុកជាគោលដៅចម្បងរបស់កងទ័ពចិន ព្រោះបង្ហាញឱ្យឃើញថា ពេលនេះវិស្វករចិនអាចចេញម៉ូដ និងបង្កើតនាវាទំនើបដោយខ្លួនឯងទាំងអស់ រួមទាំង នាវាពិឃាត នាវាចម្បាំងធុនកណ្តាល និងនាវាផ្ទុកយន្តហោះ វាជាប្រយោជន៍មហាសាលសម្រាប់ឧស្សាហកម្មនាវាចិន ។ អ្នកជំនាញសង្ឃឹមថា ពេលធ្វើការសាកល្បង និងត្រៀមបំពេញភារកិច្ច នាវា Fujian គួរតែទទួលនាទីយ៉ាងសំខាន់ផ្នែកការងារទ័ពចិនជុំវិញកោះតៃវ៉ាន់ ។

រយៈពេលប៉ុន្មានឆ្នាំមកនេះ ចិនបានពង្រីកនាវាចូលទៅកាន់តំបន់ជាច្រើន រួមទាំងមហាសមុទ្រឥណ្ឌាប៉ាស៊ីហ្វិកខាងលិច និងបរិវេណឆ្នេរអាហ្វ្រិកផងដែរ ។ បច្ចុប្បន្ន កងទ័ពចិនមាននាវាប្រចាំការសរុប៣៥៥គ្រឿង ។ គេសង្ឃឹមថា នាវាចិននឹងបន្ថែមចំនួនដល់៤២០គ្រឿងក្នុងឆ្នាំ២០២៥ និង៤៦០គ្រឿងក្នុងឆ្នាំ២០៣០ ។ ទោះយ៉ាងណា អ្នកវិភាគព័ត៌មាននានាជឿថា សក្តានុពលកងទ័ពចិនមានគម្លាតគ្នាខ្លាំងពីកងទ័ពអាមេរិក ៕

ប្រភព ៖ TNN World

ប្រទេសស្រីលង្ការ ៖ ស្រីលង្ការបានចាប់ផ្តើមជំរុញវិធានការរឹតត្បិតជាថ្មីកាលពីថ្ងៃទី២ ខែមករា កន្លងមក ដោយផ្អាករើសមន្ត្រីរាជការ ដើម្បីព្យាយាមស្នើសុំការអនុម័តប្រាក់កម្ចីពីមូលនិធិរូបិយវត្ថុអន្តរជាតិ (IMF) ។

IMF តម្រូវឱ្យស្រីលង្ការរៀបចំគម្រោងបំណុលក្នុងលក្ខខណ្ឌដំបូង ដើម្បីផ្តល់កម្ចីចំនួន២.៩០០លានដុល្លារអាមេរិកជួយស្រីលង្ការ បន្ទាប់ពីប្រទេសនេះខុសថ្ងៃកំណត់សងបំណុលកាលពីខែមេសាឆ្នាំមុន ខណៈស្រីលង្ការធ្លាក់ក្នុងវបត្តិសេដ្ឋកិច្ចធ្ងន់ធ្ងរដូចជា ខ្វះខាតប្រេង អគ្គិសនី និងគ្រឿងឧបភោគបរិភោគ ។

IMF ទាមទារឱ្យប្រទេសនេះចាត់វិធានការរឹតបន្តឹងផ្សេងៗ រួមទាំងឱ្យកាត់បន្ថយចំនួនមន្ត្រីរាជការ ប្រមូលពន្ធក្នុងអត្រាខ្ពស់ទ្វេមួយជាពីរ និងដំឡើងថ្លៃអគ្គិសនី ដោយបានអនុវត្តកាលពីដើមឆ្នាំកន្លងមក ។

ចំណែកការប្រកាសផ្អាកទទួលមន្ត្រីរាជការថ្មីនេះ បន្ទាប់ពីមន្ត្រីរាជការចូលនិវត្តន៍កាលពីចុងខែធ្នូឆ្នាំមុនស្មើ២០.០០០នាក់ ក្រោយពីប្រធានាធិបតីលោក Ranil Wickremesinghe ប្រកាសកាត់បន្ថយអាយុចូលនិវត្តន៍ការងារពី៦៥ឆ្នាំ ចុះមកត្រឹម៦០ឆ្នាំ ដោយគ្មានការប្រកាសជ្រើសរើសមន្ត្រីរាជការថ្មីមកជំនួសឡើយ ។

គួរបញ្ជាក់ថា លោក Ranil Wickremesinghe បានដឹកនាំប្រទេសជំនួសលោក Gotabaya Rajapaksa អតីតប្រធានាធិបតី ដែលត្រូវបានពលរដ្ឋស្រីលង្ការធ្វើបាតុកម្មបណ្តេញចេញពីតំណែង ដោយចោទថា ដឹកនាំប្រទេសដើរខុសផ្លូវ រហូតធ្វើឱ្យសេដ្ឋកិច្ចធ្លាក់ចុះ ។ លោកបានរត់ចេញទៅក្រៅប្រទេស ហើយលាឈប់កាលពីខែកក្កដា ។

លោកប្រធានាធិបតីថ្លែងថា វិបត្តិសេដ្ឋកិច្ចរបស់ស្រីលង្ការមិនបញ្ចប់ទេ ទោះបីផ្នែកដឹកជញ្ជូនងើបឡើងវិញក្តី ។ ប្រេង អាហារ និងជីកសិកម្ម បញ្ហារបស់ពួកយើងនៅមិនទទួលបានការដោះស្រាយទេ ហើយចាំបាច់ត្រូវកាត់បន្ថយបំណុល បើត្រូវការឱ្យប្រទេសនេះរីកចម្រើនទៅមុខ ៕

ប្រភព ៖ TNN World

បរទេស៖ កាលពីឆ្នាំ ២០២២ គឺជាឆ្នាំនៃភាពតានតឹងនៅឧបទ្វីបកូរ៉េបន្ទាប់ពីកូរ៉េខាងជើងបានបាញ់សាកល្បង កាំជ្រួចជាកំណត់ត្រា ដូច្នេះចង់ដឹងថាតើលោក គីម ជុងអ៊ុន នឹងធ្វើអ្វីទៀតនៅឆ្នាំ២០២៣នេះ?

បន្ទាប់ពីការបាញ់សាកល្បងមីស៊ីលបាលីស្ទីកខ្ពស់បំផុត មិនធ្លាប់មានរបស់កូរ៉េខាងជើងកាលពីឆ្នាំ២០២២កន្លងទៅថ្មីៗនេះ យោងតាមទិន្នន័យរបស់ក្រសួងការពារជាតិកូរ៉េខាងត្បូង និងក្រសួងការពារជាតិជប៉ុន បានបញ្ជាក់ថាកូរ៉េខាងជើង បានបាញ់សាកល្បងមីស៊ីលជិត ៩០គ្រាប់ តួលេខនេះគឺខ្ពស់ជាងនៅឆ្នាំ ២០២០ និង ២០២១ ដែលបានបាញ់ត្រឹមតែ១០ គ្រាប់ដែលត្រូវបានសាកល្បង រហូតធ្វើឱ្យ កម្រិតនៃភាពតានតឹងនៅលើឧបទ្វីបកូរ៉េបានកើនឡើងគួរឱ្យកត់សម្គាល់។

ជាមួយគ្នានោះនៅឆ្នាំ២០២២ មេដឹកនាំកំពូលលោក គីម ជុងអ៊ុន បានប្រកាសប្រទេសកូរ៉េខាងជើងជារដ្ឋដែលមានអាវុធនុយក្លេអ៊ែរ និងធ្វើវិសោធនកម្មច្បាប់ដើម្បីបង្កើតអាវុធនុយក្លេអ៊ែរជាសម្បត្តិជាតិផងដែរ។

ពិតណាស់រឿងដែលបានកើតឡើងចេញពីការដឹកនៃលោក គីម ជុងអ៊ុនក្នុងប្រទេសកូរ៉េខាងជើងកាលពីឆ្នាំមុនធ្វើឲ្យអ្នកវិភាគលើពិភពលោកយកចិត្តទុកដាក់ និងបានបង្ហាញពីការវិភាគថាតើលោកគីម ជុងអ៊ុន នឹងធ្វើអ្វីទៀតនៅឆ្នាំ២០២៣នេះ?

១. បន្តអភិវឌ្ឍអាវុធនុយក្លេអ៊ែរ

បើតាមអ្នកវិភាគជុំវិញពិភពលោកយល់ស្របថា កូរ៉េខាងជើងនៅក្នុងឆ្នាំ០២៣នេះ នឹងបន្តអភិវឌ្ឍអាវុធនុយក្លេអ៊ែរ និងអាវុធហាមឃាត់ ដូចជាមីស៊ីលផ្លោងអន្តរទ្វីប (ICBMs) ជាដើម។

ដូច្នេះហើយ អ្នកជំនាញសន្មត់ថាឆ្នាំ ២០២៣ នឹងមានអារម្មណ៍ខុសប្លែកពីឆ្នាំ ២០២២ ដោយសារកូរ៉េខាងជើងនឹងបន្តសាកល្បងយ៉ាងខ្លាំងក្លា ចម្រាញ់ និងពង្រីកឃ្លាំងអាវុធនុយក្លេអ៊ែររបស់ខ្លួន។ ហើយការបាញ់មីស៊ីលភាគច្រើននៅឆ្នាំនេះ ប្រហែលជាមិនមែនជាការសាកល្បងទេ ប៉ុន្តែការបណ្តុះបណ្តាល ព្រោះពេលនេះកូរ៉េខាងជើង កំពុងរៀបចំប្រើប្រាស់ កាំជ្រួចពិតប្រាកដ នៅក្នុងជម្លោះដែលអាចកើតមាន។

២. បាញ់បង្ហោះផ្កាយរណបចារកម្ម

បន្តមកទៀតក្នុងបញ្ជីការងាររបស់មេដឹកនាំ គីម ជុងអ៊ុនដែលត្រូវធ្វើក្នុងឆ្នាំ២០២៣នេះក៏មានរួមបញ្ចូលការបាញ់បង្ហោះផ្កាយរណបចារកម្មផងដែរ ដោយកាលពីពាក់កណ្តាលខែធ្នូឆ្នាំមុន មានសេចក្តីរាយការណ៍ថាការធ្វើតេស្តចុងក្រោយទើបតែបានបញ្ចប់ ហើយគេរំពឹងថាវានឹងត្រូវបញ្ជូនទៅកាន់ទីអវកាស ក្នុងខែមេសា ឆ្នាំ២០២៣  ដោយរួមបញ្ជូលទាំង កាំជ្រួចអន្តរទ្វីប ឥន្ធនៈ រឹង ដែលធ្លាប់ត្រូវបានសាកល្បងនៅពាក់កណ្តាលខែធ្នូកន្លងទៅ។

បញ្ហានេះលោក Ankit Panda អ្នកជំនាញគោលនយោបាយនុយក្លេអ៊ែរនៅមូលនិធិ Carnegie សម្រាប់សន្តិភាពអន្តរជាតិនៅសហរដ្ឋអាមេរិកបាននិយាយថា “នេះគឺជាបញ្ហាធ្ងន់ធ្ងរបំផុតដល់ពិភពលោក” ។

៣.រ៉េខាងជើងសម្រេចចិត្តបើកព្រំដែនរបស់ខ្លួន ជាមួយចិនម្តងទៀត

អ្នកវិភាគបានបន្តទៀតថាក្នុងឆ្នាំ ២០២៣នេះអាចជាឆ្នាំដែលកូរ៉េខាងជើងសម្រេចចិត្តបើកព្រំដែនរបស់ខ្លួន ជាមួយចិនម្តងទៀត ដើម្បីឆ្លើយតបនឹង វិបត្តិកង្វះស្បៀង អាហារ និង ថ្នាំពេទ្យ ក្នុងប្រទេសបន្ទាប់ពីបានបិទព្រំដែនចាប់តាំងពីពិភពលោកបានរងគ្រោះដោយការផ្ទុះឡើងនៃជំងឺកូវីដ។

ពិតណាស់ជាធម្មតាប្រទេសនេះត្រូវបានទិញទំនិញតាមព្រំដែនជាមួយប្រទេសចិន ប៉ុន្តែបច្ចុប្បន្ន ថ្នាក់ ដឹកនាំ គីម ជុងអ៊ុនបានចេញមកទទួលស្គាល់ជាលើកដំបូងថាប្រទេសកូរ៉េខាងជើងកំពុងជួបប្រទះវិបត្តិស្បៀងអាហារពិតមែន។

ទោះជាយ៉ាងណាការរំពិតទុកពីការបើកប្រទេសនេះផងដែរ វាក៏អាស្រ័យលើស្ថានភាពនៃកូវីដ-១៩ នៅក្នុងប្រទេសចិនផងដែរ ព្រោះប្រសិនបើចិនរកឃើញអ្នកឆ្លងថ្មីរាប់លាននាកក្នុងមួយថ្ងៃ គេរំពឹងថាមេដឹកនាំគីម ជុងអ៊ុនក៏នឹងមិនប្រថុយនាំមេរោគចូលប្រទេសទេ ហើយអាចជ្រើសរើសបន្តបិទព្រំដែន បន្ថែមទៀត ឬ បើកដោយផ្នែកដោយប្រុងប្រយ័ត្ន។

៤.ប្រកាសអ្នកស្នងតំណែង

ទាក់ទងនឹងអ្នកស្នងតំណែង  មេដឹកនាំកូរ៉េខាងជើងកន្លងមកមិនដែលមានគម្រោង ឬ ការប្រកាសជា ផ្លូវការថា តើលោក គីម ជុងអ៊ុន នឹងតែងតាំងអ្នកណាជាអ្នកស្នងតំណែងរបស់លោកនោះឡើយ។

ប៉ុន្តែគេសង្កេតឃើញងានៅចុងខែវិច្ឆិកា ឆ្នាំ ២០២២ ពិភពលោកមានការភ្ញាក់ផ្អើល នៅពេលដែលលោកបានណែនាំក្មេងស្រីឈ្មោះ គីម ជូអេ “Kim Juae” ជាកូនស្រីកណ្តាលរបស់របស់លោកគីម ជុងអ៊ុន រហូតធ្វើឱ្យពិភពលោកធ្វើការជជែកវែកញែក និងមានការវិភាគផ្សេងៗគ្នា។

ទោះជាយ៉ាងណានេះគ្រាន់តែជាការវិភាគ និងសន្មត់ទុកមុន ដោយអ្នកវិភាគមិនអាចកំណត់ថាតើនៅឆ្នាំ ២០២៣ លោកគីម ជុងអ៊ុន នឹងធ្វើអ្វីឱ្យច្បាស់ ព្រោះពិភពលោកបានដឹងហើយថា ប្រទេសកូរ៉េខាងជើងប្រៀបបាននឹងតំបន់អាថ៌កំបាំងដែលវាពិបាកក្នុងការទាយទុកមុន ហើយប្រទេសនេះតែងតែបង្កើតនូវភាពភ្ញាក់ផ្អើលរហូតពិភពលោកនឹកស្មានមិនដល់៕ ប្រភព៖ pptvhd36

ប្រទេសថៃ ៖ កាលពីថ្ងៃទី៣ ខែមករា លោក Anutin Charnvirakul រដ្ឋមន្ត្រីក្រសួងសុខាភិបាល បានថ្លែងពីវិធានការទទួលភ្ញៀវទេសចរចិនដែលនឹងមកកម្សាន្តប្រទេសថៃថា នៅថ្ងៃទី៥ ខែមករា មានការប្រជុំពិភាក្សាគ្នាជាមួយក្រសួងទេសចរណ៍ និងកីឡា និងក្រសួងគមនាគមន៍ ដោយធ្វើយ៉ាងណា ឱ្យពលរដ្ឋថៃមានសុវត្ថិភាពខ្លាំងបំផុត និងគ្មានការខាតបង់ ។

ចំណែកការចាត់វិធានការតឹងតែងជាមួយជនជាតិចិននោះ ក្នុងការប្រជុំគណៈកម្មការសុខាភិបាលយល់ឃើញថា មិនចាំបាច់ត្រូវបែងចែកការពិនិត្យកូវីដឡើយ ព្រោះមានវិធានការទាំងសងខាងដូចជា អ្នកចូលមកប្រទេសថៃ ត្រូវមានធានារ៉ាប់រងសុខភាព ដូច្នេះ មិនចាំបាច់មានលក្ខខណ្ឌអីច្រើនទេ ។ ចំណែកការពិនិត្យរកកូវីដ ខាងមន្ទីរពេទ្យយល់ឃើញថា មិនបាច់ទេ ដូច្នេះ ចិនត្រូវជឿជាក់ ហើយថៃនឹងផ្តល់កម្លាំងចិត្ត គាំទ្រចិនពេញទំហឹង ។

ពេលសួរថា សហរដ្ឋអាមេរិក និងប្រទេសក្នុងទ្វីបអឺរ៉ុបមានកង្វល់ថា កូវីដក្នុងប្រទេសចិននឹងបំលែងពូជថ្មី ហើយធ្វើឱ្យថៃខាតបង់នោះ លោក Anutin ថា លោកជឿជាក់លើគណៈកម្មការវេជ្ជសាស្ត្ររបស់ថៃ ព្រោះបានចេញវិធានការប្រឆាំងកូវីដជាច្រើនដងហើយ ។ ប្រទេសថៃអាចទប់ស្កាត់ស្ថានភាពឆ្លងជំងឺ ឬការស្លាប់ បានល្អជាងប្រទេសផ្សេងៗ ប្រព័ន្ធសុខាភិបាលថៃមិននៅក្រោមអ្នកណាទេ ។ ទោះយ៉ាងណា ពូជកូវីដមិនខុសគ្នាទេ វ៉ាក់សាំងដែលមាននៅថៃអាចទប់ស្កាត់បាន សូមឱ្យពលរដ្ឋថៃទៅចាក់វ៉ាក់សាំងដុសជំរុញឱ្យបានគ្រប់គ្នា ដើម្បីបង្កើតភាពស៊ាំ និងទាក់ទាញភ្ញៀវទេសចរ ។

ចំណែកព័ត៌មានថា ចិននឹងបើកប្រទេសថ្ងៃទី៨ ខែមករា លោក Anutin ថ្លែងថា ពួកគេមិនបានលើកគ្នាមកថៃតាំងពីថ្ងៃទី៨ ខែមករាទេ តែលោកគិតថា នៅខែមករា ជនជាតិចិនមកថៃ ប្រមាណ៤០.០០០នាក់, ខែកុម្ភៈ ប្រមាណ៥០.០០០នាក់ ហើយថៃក៏មិនអនុញ្ញាតឱ្យចិនមកជាក្រុមធំ ឬតាមក្រុមហ៊ុនទេសចរណ៍ទេ ។

ពេលសួរថា តើអាចវាស់ស្ទង់បានទេថា កូវីដក្នុងប្រទេសថៃនឹងមិនឆ្លងរាលដាលធ្ងន់ធ្ងរជាងនេះ លោកថា គ្មានអ្វីវាស់ស្ទង់បានទេ គ្រាន់តែថាយើងឆ្លងកាត់វាមកហើយ តែយើងគ្មានការបិទប្រទេសទេ ។ អ្នកណាឈឺ បើគេបានចាក់វ៉ាក់សាំងលើសពី៤ម្ជុល គ្មានជំងឺប្រចាំកាយនោះពួកគេនឹងគ្មានអាការៈធ្ងន់ធ្ងរ ឬស្លាប់ឡើយ យើងមានថ្នាំ ការផ្គត់ផ្គង់ផ្នែកវេជ្ជសាស្ត្រ និងមានគ្រូពេទ្យគ្រប់គ្រាន់ ៕

ប្រភព ៖ 3PlusNews