ប្រទេសថៃ ៖ សមាគមអ្នកនាំចេញអង្ករថៃបានបង្ហាញពីការនាំចេញអង្ករក្នុងរយៈពេល១១ខែដំបូងឆ្នាំ២០២២ គឺស្មើ៦,៩១លានតោន ស្ថិតក្នុងលំដាប់លេខ២របស់ពិភពលោក ខណៈប្រទេសឥណ្ឌានាំមុខគេ ដោយនាំចេញអង្ករដល់ទៅ១៨,២៥លានតោន ។ គេសង្ឃឹមថា ថៃអាចនាំចេញអង្ករលើសគោលដៅដែលស្មើ៧,៥លានតោន ។

នាយកសមាគមនាំចេញអង្ករថៃ លោក Charoen Lao Thammathat បានបង្ហាញពីបរិមាណការនាំចេញអង្ករក្នុងរយៈពេល១១ខែឆ្នាំ២០២២ (ខែមករា-ខែវិច្ឆិកា) មានបរិមាណ៦.៩០៧.៧៦១តោន កើនឡើង២៦,៨% ស្មើទឹកប្រាក់១២៣,៥១១.៣លានបាត ឬកើនឡើង២៩,២% បើធៀបនឹងឆ្នាំ២០២១ ដែលនាំចេញក្នុងបរិមាណ៥.៤៤៥.៨១០តោន ស្មើ៩៥,៥៩១.៧លានបាត ។

សម្រាប់ការនាំចេញអង្ករក្នុងខែវិច្ឆិកា ឆ្នាំ២០២២ មានបរិមាណ៧០៦.២៧០តោន ស្មើ១៤,៣៣៣.៣លានបាត ដោយបរិមាណថយចុះ១១,១% ប៉ុន្តែតម្លៃនាំចេញកើនឡើង២,៦% បើធៀបនឹងខែតុលា ដែលនាំចេញក្នុងបរិមាណ៧៩៤.២២៤តោន ស្មើ១៣,៩៧៤.១លានបាត ។ ទីផ្សារនាំចេញសំខាន់សម្រាប់អង្ករថៃមាន សហរដ្ឋអាមេរិក ចិន ហុងកុង កាណាដា សិង្ហបុរី និងអូស្ត្រាលី ជាដើម ខណៈថៃនាំចេញអង្ករសទៅកាន់ប្រទេសអ៊ីរ៉ាក់ ចិន ជប៉ុន អង់ហ្គោឡា ម៉ូសំប៊ិក ហ្វីលីពីន និងកាមេរ៉ូន ។

ទោះយ៉ាងណា សមាគមសង្ឃឹមថា ក្នុងខែធ្នូ ឆ្នាំ២០២២ ការនាំចេញអង្ករស្មើប្រមាណ៧៥ម៉ឺន-៨០ម៉ឺនតោន ដោយអ្នកនាំចេញអង្ករនានាជំរុញការនាំចេញតាមកិច្ចសន្យា ហើយសង្ឃឹមថា ការនាំចេញអង្ករឆ្នាំ២០២២ មានបរិមាណលើសគោលដៅដែលស្មើ៧,៥លានតោន ។

ប្រទេសថៃនៅតែដើរតួនាំចេញអង្ករលំដាប់លេខ២ក្នុងពិភពលោក ដោយនាំមុខវៀតណាមដែលនាំចេញបាន៦,៦៧លានតោន ខណៈឥណ្ឌាលំដាប់លេខ១ ជាអ្នកនាំចេញអង្ករច្រើនបំផុតក្នុងពិភពលោក ស្មើ១៨,២៥លានតោន ។ ប្រទេសប៉ាគីស្ថានបាននាំចេញ៣,៧៤លានតោន ហើយអាមេរិកនាំចេញ១,៩៩លានតោន ។ ដូច្នេះ អង្ករថៃនាំចេញរហូតដល់៦០% របស់ការនាំចេញអង្ករទាំងអស់ ។

ទីផ្សារនាំចេញសំខាន់ៗមាន ប្រទេសអ៊ីរ៉ាក់ អាហ្វ្រិកខាងត្បូង ចិន អាមេរិក និងបេនីន ក្រៅពីនេះមាន ជប៉ុន សេណេហ្គាល់ អង់ហ្គោឡា ហ្វីលីពីន ម៉ូសំបិក កាមេរ៉ូន និងហុងកុង ជាដើម ។ គួរបញ្ជាក់ថា តម្លៃអង្កររបស់ថៃបច្ចុប្បន្ន គឺមិនខុសគ្នាពីគូប្រជែងទេ ដែលធ្វើឱ្យថៃអាចប្រជែងជាមួយប្រទេសទាំងនោះបាន ៕ ប្រភព ៖ Post Today

ភ្នំពេញ៖ អ្នកឧកញ៉ា សុខ គង់ ដែលគេស្គាល់ថាជាមហាសេដ្ឋីស្រុកខ្មែរ បានក្រើនរំលឹកកុំឲ្យផឹកស៊ីភ្លេចខ្លួន ព្រោះគ្មានអ្វីពិបាកជាងពេលក្រនោះឡើយ។

ថ្លែងនាពេលសម្ពោធសៀវភៅ អាថ៌កំបាំងពីក្រោយភាពជោគជ័យរបស់អ្នកឧកញ៉ាបណ្ឌិត សុខ គង់ នាភ្នំបូកគោ កាលពីពេលថ្មីៗនេះ អ្នកឧកញ៉ា សុខ គង់បានរំលឹកអតីតកាលដ៏ជូរចត់របស់ខ្លួនជាមួយមិត្តភក្តិ រវាងពេលលោកមានលុយ និងពេលលោកអត់លុយ ពេលមានលុយ ដើរលេងផឹកស៊ីជាមួយគ្នាមួយ យប់អស់៤ជី ៥ជី ទៅ១ដំឡឹង តែដល់ពេលធ្លាក់ខ្លួន សូម្បីតែកាហ្វេខ្មៅមួយកែវ ក៏គេមិនហៅផឹកផង។

មហាសេដ្ឋីស្រុកខ្មែរ អ្នកឧកញ៉ា សុខ គង់ថា” ខ្ញុំចេះតែឧស្សាហ៍ប្រាប់កូនចៅថា ពេលយើងអស់លុយហើយ មុខយើងគេអត់មើលទេ អ៊ីចឹងខំប្រឹងឡើង ខំសន្សំសំចៃឡើង”។

យោងតាមឃ្លីបវីដេអូដែលផ្សាយនៅលើទំព័រហ្វេសប៊ុកសារព័ត៌មានស៊ីស៊ីថាមស៍ អ្នកឧកញ៉ា សុខ គង់ មានប្រសាសន៍លើកឡើងពីករណីបុគ្គលដែលចូលចិត្តចាយវាយតែលើការផឹកស៊ីរាល់ថ្ងៃ ហើយពេលខ្លះ ឈានដល់កាប់ចាក់គ្នា និងជំពាក់លុយគេ។

អ្នកឧកញ៉ា ក្រើនរំលឹកជាទូទៅថា “យើងផឹករហូតដល់អត់មានលុយ គេមានផ្ទះ ត្រូវគិតគូរខ្លួនឯង អនាគតយើងនៅយូរអង្វែង”។

អ្នកឧកញ៉ា សុខ គង់ ម្ចាស់ក្រុមហ៊ុនសូគីម៉ិច, ក្រុមហ៊ុនសុខាអូតែលដែលប្រតិបត្តិគម្រោងវិនិយោគធំៗ ជាច្រើននៅកម្ពុជា បានបញ្ជាក់ថា គ្មានអ្វីដែលពិបាកជាងពេលក្រនោះឡើយ អាក្រហ្នឹងហើយ ពិបាក អត់លុយហ្នឹងហើយ ពិបាក អ៊ីចឹងមនុស្សយើងត្រូវខំប្រឹង ទោះមិនមានធ្វើសេដ្ឋីដូចគេឯង ក៏វាគ្រប់គ្រាន់ដើម្បីជីវភាពប្រចាំថ្ងៃរបស់យើងដែរ៕

ក្រសួង​អប់រំ យុវជន និង​កីឡា បាន​ប្រកាស​រៀប​ចំ​ពិព័រណ៌​អប់រំ​មួយ ដោយ​មាន​គោលដៅ​៣សំខាន់​ៗ ហើយ​មួយ​ក្នុង​ចំណោម​នោះ គឺ​ដើម្បី ដើម្បី​តម្រង់ទិសចាប់យកមុខជំនាញសិក្សាឆ្លើយតបទីផ្សារការងារ។

ពិព័រណ៌​នេះ​មាន​ឈ្មោះ​ផ្លូវ​ការ​ថា កម្មវិធី “ពិព័រណ៍ជំនាញ និងសាកលវិទ្យាល័យ២០២៣” ។ តាម​ការ​បញ្ជាក់​របស់​ក្រសួង​អប់រំ កម្មវិធី នឹង​ត្រូវ​រៀប​ចំ​ឡើយ​រយៈ​ពេល​២ថ្ងៃ ចាប់​ផ្ដើមពី​ថ្ងៃ​ស្អែក​ទី ០៦-០៧ ខែមករា ឆ្នាំ២០២៣។

ប្រទេសថៃ ៖ អ្នកនាំពាក្យរដ្ឋាភិបាលថៃឱ្យដឹងថា ផ្លែឈើថៃមានកេរ្តិ៍ឈ្មោះ ដូចជា ម្នាស់កំប៉ុងថៃបានជាប់លំដាប់លេខ១ក្នុងពិភពលោក ហើយផ្លែស្វាយខេត្តសុងក្លា ក៏បានចុះបញ្ជី GI រួចហើយដែរ ដែលបានបង្កើនប្រាក់ចំណូលដល់កសិករ ។

កាលពីថ្ងៃទី៤ ខែមករា លោក Anucha Burapachaisri អនុរដ្ឋលេខាធិការផ្នែកនយោបាយ និងជាអ្នកនាំពាក្យទីស្តីការនាយករដ្ឋមន្ត្រី មានប្រសាសន៍ថា លោកនាយករដ្ឋមន្ត្រីថៃ ប្រាយុទ្ធ ចាន់អូចា បានជ្រាបពីសក្តានុពលរបស់ថៃ ក្នុងឋានៈជាប្រទេសនាំចេញផ្លែម្នាស់និងម្នាស់កំប៉ុង លំដាប់លេខ១ក្នុងលោក មានតម្លៃ២ម៉ឺនលានបាត ដោយគ្រប់គ្រងទីផ្សារពិភពលោកដល់៣២% ខណៈហ្វីលីពីនជាប់លំដាប់លេខ២ ស្មើ២២% និងសរសើរការងាររបស់ផ្នែកពាក់ព័ន្ធដែលជួយគាំទ្រផលិតផលម្នាស់កំប៉ុងរហូតដល់នាំចេញលំដាប់លេខ១ ។

រោងចក្រម្នាស់កំប៉ុងភាគច្រើនរបស់ថៃស្ថិតនៅខេត្តប្រាជួប សិរ៉ីខាន់ (Prachuap Khiri Khan) ។ រដ្ឋាភិបាលបានចាត់ផែនការអភិវឌ្ឍន៍ម្នាស់រយៈពេល៥ឆ្នាំ (២០២៣-២០២៧) ដើម្បីជួយដល់ឧស្សាហកម្មផលិតម្នាស់ បង្កើនសក្តានុពលការផលិត ការបំលែងរូប និងទីផ្សារ ។ លើសពីនេះ ក៏មានផែនការអភិវឌ្ឍន៍សំខាន់ទៀតដើម្បីជំរុញប្រាក់ចំណូល និងសមត្ថភាពប្រកួតប្រជែងរបស់ឧស្សាហកម្មម្នាស់យូរអង្វែង ។

ទីស្តីការនាយករដ្ឋមន្ត្រីបន្ថែមថា រីឯផ្លែស្វាយនៅខេត្តសុងក្លា ជាទំនិញមួយដែលទទួលបានការនិយមចូលចិត្តពីអ្នកនៅទីនោះ និងភ្ញៀវទេសចរ ដែលតែងទិញផ្ញើមិត្តភក្តិ ខណៈស្វាយនេះបានចុះបញ្ជីនៅ GI រួចហើយ ។ ស្វាយបានបង្កើតប្រាក់ចំណូលដល់កសិករក្នុងតំបន់ជាង៥៨លានបាតក្នុង១ឆ្នាំតាមនយោបាយជំរុញសេដ្ឋកិច្ចរបស់រដ្ឋាភិបាល ដើម្បីកសាងទំនុកចិត្តដល់អតិថិជន និងពង្រីកទីផ្សារក្រៅប្រទេសជាបន្តបន្ទាប់ ។

លោកនាយករដ្ឋមន្ត្រីបានសរសើរ និងអរគុណដល់ការធ្វើការរបស់គ្រប់ស្ថាប័នពាក់ព័ន្ធ ក៏ដូចជាកសិករក្នុងតំបន់ និងផ្នែកឯកជន រួមគ្នាធ្វើការតាមវិធានការរបស់រដ្ឋ ពង្រីកសក្តានុពលគុណភាពផលិតផលថៃ ដើម្បីកេរ្តិ៍ឈ្មោះ និងការជឿជាក់ក្នុងការនាំចេញ ។ លើសពីនេះ លោកប្រាយុទ្ធ បានស្នើឱ្យស្ថាប័នពាក់ព័ន្ធទាំងអស់ជួយអភិវឌ្ឍន៍សមត្ថភាពផ្នែកផលិត ការនាំចេញផលិតផល និងសិក្សាពីតម្រូវការទីផ្សារក្រៅប្រទេសដើម្បីបង្កើនប្រាក់ចំណូលកសិករ ៕

ប្រភព ៖ THE STATES TIMES

ភ្នំពេញ៖ លោក ឌិត ទីណា ក្រសួងកសិកម្ម រុក្ខាប្រមាញ់ និងនេសាទ អះអាងថា ក្រសួងកសិកម្មបានបើក និងសម្រួលឱ្យមាននាំចូលឈើពីក្រៅប្រទេស ដើម្បីកាត់បន្ថយសម្ពាធនៃតម្រូវការឈើ ប្រើប្រាស់មកលើធនធានព្រៃឈើនៅកម្ពុជា។

ក្នុងសន្និសីទសារព័ត៌មាន ស្ដីពី «ទស្សនទាន ក្នុងវិស័យកសិកម្មនៅកម្ពុជា» ដែលរៀបចំដោយ អង្គភាពអ្នកនាំពាក្យរាជរដ្ឋាភិបាលកម្ពុជា នៅទីស្ដីការគណៈរដ្ឋមន្ដ្រី នាព្រឹកថ្ងៃទី០៥ ខែមករា ឆ្នាំ២០២៣នេះ លោក ឌិត ទីណា បានថ្លែងថា តម្រូវការប្រើប្រាស់ឈើពីសំណាក់ពលរដ្ឋកម្ពុជានៅតែមាន តែយ៉ាងនេះក្តី បច្ចុប្បន្ននេះប្រជាជនកម្ពុជា ​បានកែប្រែទម្លាប់ ក្នុងការប្រើប្រាស់ឈើ ​​គឺបានផ្លាស់ប្តូរពីការប្រើប្រាស់ឈើប្រណិត មកប្រើប្រាស់ឈើគ្រប់បែបយ៉ាង ដែលមានគុណភាពប្រហាក់ប្រហែលគ្នា ពោលគឺពីបេង នាងនួន និងក្រញូង មកប្រើធ្នង់ គគី ឈ្លិច ផ្ចិក និងប្រភេទឈើនាំចូលដើម។

ទន្ទឹមគ្នានេះ ​លោកបានកត់សម្គាល់​ថា និន្នាការនៃការប្រើប្រាស់​ឈើនាំចូល ក៏មានការកើនឡើងគួរឱ្យកត់សម្គាល់។ ជាក់ស្តែងសព្វថ្ងៃនេះ កម្ពុជាបាននាំចូលឈើ​ប្រភេទមួយចំនួន មានដូចជា ធ្នង់ នាំចូលមកពីអាហ្វ្រិក និងឈើប្រភេទផ្សេងៗ ដូចឈើកិន (កុំប្លាកេ) ​​និងឈើប្រណិត​ដែលនាំពី ចិន និងម៉ាឡេស៊ីជាដើម សម្រាប់ការប្រើប្រាស់ក្នុងស្រុក​។ លោកគូសបញ្ជាក់បន្ថែមថា «យើងមិនអាចបដិសេធបានទេ នូវតម្រូវឈើប្រើប្រាស់ក្នុងស្រុក​ ដោយប្រជាពលរដ្ឋយើងនៅតែត្រូវការសង់ផ្ទះពីឈើ នៅតែត្រូវការឈើធ្វើជន្លង់ ធ្វើជន្ទុល ឬរបងផ្សេងៗ​ ឬតម្រូវការធ្វើជាអុស ឬជាធ្យូង។ អីចឹងតម្រូវការផ្សេងៗគ្នានេះ គឺបង្កើតជាសម្ពាធមួយចំនួន ទៅលើធនធានធម្មជាតិយើងដែលមាន»។

ដើម្បីបំពេញតម្រូវការប្រើប្រាស់ឈើក្នុងស្រុក​ ក្រសួងនឹងពង្រឹងសមត្ថភាពផលិតឈើ ស្របតាមតម្រូវការក្នុងស្រុក និងសម្រួលការនាំចូល​ពីក្រៅប្រទេស ​ព្រមទាំងជំរុញចលនាដាំឈើផងដែរ ទាំងសម្រាប់ការស្តារព្រៃឈើឡើងវិញ និងសម្រាប់អាជីវកម្ម ដូចជាអាកាស្យា ឬប្រេងខ្យល់ដែលងាយដាំដុះ និងធំធាត់លឿន​៕