ប្រទេសចិន៖ បន្ទាប់ពីចិនបានបើកទ្វាប្រទេសឡើងវិញនៅថ្ងៃទី ៨ ខែមករា ឆ្នាំ២០២៣ គេបានឱ្យដឹងថាប្រជាជនចិនជាច្រើនបានកក់សំបុត្រធ្វើដំណើរទៅក្រៅប្រទេស ដែលភាគច្រើនក្នុងគោលដៅទេសចរណ៍។ ក្នុងនោះប្រទេសដែលជាគោលដៅទេសចរសម្រាប់ប្រទេសចិនគេបានឱ្យដឹងថាមាន៥ប្រទេសដែលជាកំពូលប្រទេសដែលចិនធ្វើដំណើរទៅច្រើនជាងគេ។

នាថ្ងៃទី ៩ ខែមករា ឆ្នាំ២០២៣ នេះ ក្រុមហ៊ុន Trip.com ដែលជាក្រុមហ៊ុនផ្តល់សេវាធ្វើដំណើរឈានមុខគេលើពិភពលោកបានបង្ហើបឱ្យដឹងថាការកក់សំបុត្រសម្រាប់ការធ្វើដំណើរទៅក្រៅប្រទេសបានកើនឡើង ២៥៤ភាគរយ ចាប់ពីព្រឹកថ្ងៃទី ២៧ ខែធ្នូ ឆ្នាំ ២០២២កន្លងទៅ  មុនមួយថ្ងៃ បន្ទាប់ពីការប្រកាសជាផ្លូវការរបស់ប្រទេសចិនក្នុងការបើកប្រទេសឡើងវិញនៅថ្ងៃទី ៨ ខែមករា ឆ្នាំ២០២៣។ ដែលនេះមានន័យថាអ្នកដំណើរចេញក្រៅប្រទេសភាគច្រើនគឺជាប្រជាជនចិនចំពោះវិស័យទេសចរណ៍។

ជាមួយគ្នានោះ ដោយផ្អែកលើចំនួននៃការកក់ដ៏ខ្ពស់នេះ Trip.com បានរកឃើញថាគោលដៅកំពូលទាំង ៥ ដែលប្រជាជនចិនកក់ជើងហោះហើរទៅភាគច្រើនគឺ ប្រទេសសិង្ហបុរី កូរ៉េខាងត្បូង ហុងកុង ជប៉ុន និង ប្រទេសថៃដែលជាប្រទេសជិតខាងរបស់យើង។

សូមបង្ហាញថា សិង្ហបុរីជាគោលដៅទីមួយ នៃការកក់សំបុត្រចេញដំណើររបស់ចិន ដែលបានកើនឡើងចំនួនរហូតដល់ ៦ ដង។ ដោយឡែកសម្រាប់ប្រទេសកូរ៉េខាងត្បូង ហុងកុង ជប៉ុន និង ប្រទេសថៃ មានចំនួនកើនឡើងជាមធ្យមពី ៣ទៅ ៤ដង។

ជាមួយគ្នានោះគេបានឱ្យដឹងបន្ថែមថា សម្រាប់ប្រទេសទាំង ៥ ដែលជាគោលដៅទេសចររបស់ចិន ភាគច្រើនជាអ្នកដំណើរមកពី សៀងហៃ វីងឃីង ក្វាងចូវ ចេងទូ និងហាំងចូវ។

ទោះជាយ៉ាងណាក៏ដោយបើទោះបីជាគោលដៅទេសចរណ៍កំពូលទាំង ៥ របស់ចិនស្ថិតក្នុងតំបន់ អាស៊ី និង មានភាពជិតស្និទ្ធជាមួយប្រទេសចិនក៏ដោយ។ ប៉ុន្តែការហោះហើរទៅកាន់ចក្រភពអង់គ្លេស សហរដ្ឋអាមេរិក និងអូស្ត្រាលី ក៏កំពុងតែមានការកើនឡើងដូចគ្នា។

បន្ថែមពីនោះវិទ្យាស្ថានស្រាវជ្រាវទេសចរណ៍ក្រៅប្រទេសចិន (COTRI) បានប៉ាន់ប្រមាណថានៅឆ្នាំ ២០២៣ ភ្ញៀវទេសចរចិនប្រហែល ១១៥ លាននាក់ត្រូវបានគេរំពឹងថានឹងធ្វើដំណើរទៅក្រៅប្រទេសនៅឆ្នាំនេះ ខណៈពេលដែលការព្រួយបារម្ភជាសកលនៅតែមានអំពីស្ថានការណ៍កូវីដ-១៩ របស់ប្រទេសចិន៕ ប្រភព៖ pptvhd3

ប្រទេសជប៉ុន ៖ នាយករដ្ឋមន្ត្រីជប៉ុន លោក Fumio Kishida បានឱ្យដឹងថា លោកអាចរំលាយសភា និងប្រកាសបោះឆ្នោតមុនកំណត់នៅពេលសមស្របណាមួយ ក្រោយពីប្រជាប្រិយភាពគណៈរដ្ឋមន្ត្រីក្នុងរដ្ឋាភិបាលរបស់លោកធ្លាក់ចុះនាពេលក្រោយនេះ ដោយសារបញ្ហាជាច្រើន ។

លោកនាយករដ្ឋមន្ត្រីបានថ្លែងទៅកាន់ស្ថានីយ៍ទូរទស្សន៍ NHK របស់ប្រទេសជប៉ុនថា លោកអាចរំលាយសភា និងប្រកាសបោះឆ្នោតមុនកំណត់នៅពេលសមស្រប ក្រោយពីប្រជាប្រិយភាពរបស់គណៈរដ្ឋមន្ត្រីក្នុងរដ្ឋាភិបាលលោកធ្លាក់ចុះនាពេលចុងក្រោយ ដោយសារបញ្ហាជាច្រើន មិនថារឿងការលាចេញពីតំណែងរបស់រដ្ឋមន្ត្រីជាច្រើនរូប និងសមាជិកសភាតំណាងរាស្ត្រមួយចំនួន ត្រូវបានគេចោទថាពាក់ព័ន្ធនឹងរឿងព្រះវិហារគ្រិស្តសាសនា ។ បញ្ហាទាំងអស់នេះហើយធ្វើឱ្យអតីតនាយករដ្ឋមន្ត្រីជប៉ុន លោក Shinzo Abe ត្រូវបានគេលួចសម្លាប់កាលពីឆ្នាំមុន ។

លោក Kishida បញ្ជាក់ថា បញ្ហាកើតឡើងធ្វើឱ្យលោកមើលឃើញពីសារសំខាន់ក្នុងការជឿជាក់ខាងនយោបាយ ។ ក្រៅពីនេះ លោកនាយករដ្ឋមន្ត្រីនៅតែជឿថា លោកនឹងបានទទួលតំណែង និងការជឿទុកចិត្តពីពលរដ្ឋក្នុងការបោះឆ្នោតជាថ្មី ដើម្បីដោះស្រាយបញ្ហាបច្ចុប្បន្ន ទាំងបញ្ហាសេដ្ឋកិច្ច អតិផរណា ខ្វះខាតកម្លាំងពលកម្ម បញ្ហាសន្តិសុខ និងចំនួនក្មេងកើតថ្មីតិចខ្លាំងពេក ។

លោក Kishida មានផែនការទៅកាន់៥ប្រទេសក្នុងក្រុម G7 (ប្រទេសឧស្សាហកម្មឈានមុខគេរបស់ពិភពលោក) គឺប្រទេសបារាំង អ៊ីតាលី អង់គ្លេស កាណាដា និងសហរដ្ឋអាមេរិក មុនពេលជប៉ុនធ្វើជាម្ចាស់ផ្ទះកិច្ចប្រជុំកំពូលមេដឹកនាំ G7 នៅ Hiroshima ក្នុងខែឧសភានេះ ។ លោកនាយករដ្ឋមន្ត្រីបញ្ជាក់ថា ជប៉ុននឹងសហការជាមួយប្រទេសសមាជិកផ្សេងទៀតចាត់ការបញ្ហាផ្សេងៗ និងរឿងប្រទេសរុស្ស៊ីប្រតិបត្តិការយោធានៅអ៊ុយក្រែនផងដែរ ៕ ប្រភព ៖ TNN World

រដ្ឋធានីកៀវ៖ នៅដើមឆ្នាំថ្មីនេះ សហរដ្ឋអាមេរិក បានសម្រេចផ្ដល់ជំនួយយោធា មានតម្លៃរាប់ពាន់លានដុល្លារ ជួយដល់ប្រទេសអ៊ុយក្រែន ដោយរួមទាំងមីស៊ីលទំនើបៗ សម្រាប់ទប់ទល់នឹងការប្រហារ ដោយមីស៊ីលពីកងទ័ពរុស្ស៊ី ។

សារព័ត៌មាន The Eurasia Times បានចេញផ្សាយ កាលពីថ្ងៃទី៨ ខែមករា ថា សហរដ្ឋអាមេរិក កាលពីថ្ងៃទី៦ បានប្រកាស អំពីកញ្ចប់ជំនួយគ្រឿងសព្វាវុធ មានតម្លៃ៣,៧៥ពាន់លានដុល្លារ សម្រាប់ជួយដល់ការតស៊ូរបស់អ៊ុយក្រែន ប្រឆាំងនឹងការវាយប្រហារ ដោយឥតឈប់ឈរ ពីកម្លាំងទាហានរបស់រុស្ស៊ី។ មីស៊ីលការពារដែនអាកាស ប្រភេទ Sea Sparrow របស់អាមេរិក ដែលអ៊ុយក្រែន កំពុងតែចង់នោះ បានក្លាយជាកញ្ចប់ថ្មី សម្រាប់ការផ្គត់ផ្គង់ដល់ក្រុងកៀវ ដោយរួមទាំងរថពាសដែក ប្រភេទ Bradley ផងដែរ។

សហរដ្ឋអាមេរិក បានផ្ដល់រថពាសដែក ប្រភេទ Bradley នេះ មានគោលបំណងជួយដល់ប្រទេសអ៊ុយក្រែន ការពារខ្លួន ប្រឆាំងនឹងមីស៊ីល និង ដ្រូនអត្ដឃាតរបស់រុស្ស៊ី ខណៈកំពុងតែប្រឈមមុខនឹងការវាយប្រយុទ្ធគ្នាយ៉ាងខ្លាំង នៅតំបន់ភាគខាងកើត។

ក្រសួងការពារជាតិអ៊ុយក្រែន បានសរសេរ នៅលើបណ្ដាញសង្គមធ្វីធើរ ថា «ពលរដ្ឋអាមេរិកាំង មិនអាចដឹង អំពីអ្វីដែលយើងស្រឡាញ់ ចំពោះពួកគេនោះឡើយ»។

សារព័ត៌មាន Politico បានរាយការណ៍ ថា មន្ទីរបញ្ចកោណ នៃក្រសួងការពារជាតិសហរដ្ឋអាមេរិក មិនបានបង្ហាញចំនួនមីស៊ីលបាញ់ពីលើដីទៅអាកាស ប្រភេទ RIM-7 សម្រាប់ការបញ្ជូនទៅឲ្យប្រទេសអ៊ុយក្រែន នោះឡើយ។ មីស៊ីលទាំងនេះ នឹងត្រូវប្រើប្រាស់ សម្រាប់ប្រព័ន្ធការពារដែនអាកាស ប្រភេទ Buk ផលិតនៅក្នុងសម័យសូវៀត ដែលប្រតិបត្តិការរួចហើយជាមួយកងទ័ពការពារទឹកដីរបស់អ៊ុយក្រែន ។ប្រភពចំនួន២ សុំមិនបង្ហាញអត្ដសញ្ញាណ បានរាយការណ៍ ថា កងទ័ពការពារទឹកដីរបស់អ៊ុយក្រែន អាចប្រើប្រាស់កាំភ្លើងបាញ់មីស៊ីល Buk ផលិត នៅក្នុងសម័យសហភាពសូវៀត សម្រាប់ការបាញ់មីស៊ីល Sea Sparrow ប៉ុន្ដែប្រភពទាំងនោះ ក៏មិនបានបង្ហាញព័ត៌មានលម្អិតនោះដែរ។

មីស៊ីលប្រឆាំងនឹងយន្ដហោះចម្បាំង Sea Sparrow អាចបាញ់ចេញពីលើសមុទ្រ ឬ នៅលើដី ដើម្បីប្រឆាំងនឹងយន្ដហោះចម្បាំង ឬ មីស៊ីលគ្រូស។ មីស៊ីលប្រឆាំងនឹងយន្ដហោះចម្បាំងទាំងនេះ នឹងជួយរារាំង ដល់ការវាយប្រហារដោយមីស៊ីលរបស់រុស្ស៊ី ទៅលើទីក្រុងផ្សេងៗរបស់អ៊ុយក្រែន៕

តៃប៉ិ៖ ក្រសួងការពារជាតិតៃវ៉ាន់ នៅថ្ងៃចន្ទនេះបាននិយាយថាយន្ដហោះចម្បាំង ៥៧គ្រឿង និងនាវាចម្បាំង៤គ្រឿងរបស់ចិន បាន និងកំពុងធ្វើប្រតិបត្តិការជុំវិញកោះតៃវ៉ាន់ បន្ទាប់ពីទីក្រុងប៉េកាំងទទួលស្គាល់ថាខ្លួនបានដឹកនាំការធ្វើសមយុទ្ធយោធាមួយកាលពីថ្ងៃអាទិត្យចុងសប្ដាហ៍កន្លងទៅនេះ។ នេះបើតាមការចេញផ្សាយដោយទីភ្នាក់ងារ សារព័ត៌មាន AFP​ នៅថ្ងៃចន្ទ ទី៩ ខែមករា ឆ្នាំ២០២៣។

បើតាមក្រសួងការពារជាតិតៃវ៉ាន់ នៅក្នុងចំណោមយន្ដហោះចម្បាំងចិន ៥៧គ្រឿងខាងលើ មាន២៨គ្រឿងបានហោះចូលក្នុងតំបន់កំណត់អត្តសញ្ញាណការពារដែនអាកាសតៃវ៉ាន់ ហើយក្នុងចំណោមយន្ដហោះចម្បាំង ២៨គ្រឿងនេះទៀតសោត មានយន្ដហោះចម្បាំងខ្លះថែមទាំងបានហោះឆ្លងកាត់ «ខ្សែបន្ទាត់កណ្ដាលនៃច្រកសមុទ្រតៃវ៉ាន់» ទៀតផង។ ក្រសួងការពារជាតិតៃវ៉ាន់បន្ថែមថា យន្ដហោះចម្បាំងចិនទាំងនេះរួមមានយន្ដហោះ Su-30 និង J-16 ខណៈយន្ដហោះទម្លាក់គ្រាប់បែក H-6 ២គ្រឿងបានហោះហើរ នៅតំបន់ភាគខាងត្បូងតៃវ៉ាន់។

គួរបញ្ជាក់ថា យោធាចិនបានឱ្យដឹងថាខ្លួនបានដឹកនាំការធ្វើសមយុទ្ធយោធាប្រយុទ្ធនៅជុំវិញកោះតៃវ៉ាន់ កាលពីថ្ងៃអាទិត្យចុងសប្ដាហ៍កន្លងទៅនេះ ហើយនេះជាការធ្វើសមយុទ្ធ ប្រយុទ្ធជាលើកទី២ ក្នុងរយៈពេលមិនដល់មួយខែផង។ កាលពីចុងខែធ្នូ ឆ្នាំ២០២២ តៃវ៉ាន់បានអះអាងថាយន្ដហោះចម្បាំងចិនដល់ទៅ ៤៣គ្រឿងបានហោះឆ្លងកាត់ខ្សែបន្ទាត់ កណ្ដាលនៃច្រកសមុទ្រតៃវ៉ាន់ដែលជាតំបន់ទ្រនាប់ក្រៅផ្លូវការមួយដែលពុះចែករវាងតៃវ៉ាន់ និងចិន។

ចិនបានដឹកនាំការធ្វើសមយុទ្ធយោធាសឹងតែជាប្រចាំនៅក្បែរកោះតៃវ៉ាន់ នៅបន្ទាប់ពីអតីតប្រធានសភាតំណាងរាស្ត្រអាមេរិក លោកស្រី ណាន់ស៊ី ផេឡូស៊ី បំពេញទស្សនកិច្ច មកកាន់កោះតៃវ៉ាន់ កាលពីខែសីហា ឆ្នាំ២០២២​​ ៕

ប្រទេសថៃ ៖ ស្របពេលចិនបើកប្រទេសនៅថ្ងៃទី៨ ខែមករា ប្រទេសមួយចំនួននៅអឺរ៉ុបបានដាក់វិធានការរឹតបន្តឹងសម្រាប់ទទួលភ្ញៀវទេសចរមកពីចិន ហើយប្រទេសថៃក៏បានដាក់វិធានការដូចគ្នាដែរ ប៉ុន្តែមិនមែនសម្រាប់តែភ្ញៀវមកពីចិនទេ គឺរឹតបន្តឹងភ្ញៀវទេសចរមកពីគ្រប់ប្រទេសទាំងអស់ដែលចូលមកកាន់ទឹកដីថៃ ត្រូវអនុវត្តវិធានការដូចៗគ្នាទាំងអស់ ។ ការចាត់វិធានការកូវីដស្មើភាពគ្នានេះ បានប៉ះពាល់ដល់ក្រុមហ៊ុនទេសចរណ៍ក្នុងប្រទេសថៃ ។ ក្នុងនោះក្រុមហ៊ុនទេសចរណ៍មកពីខេត្តភូកេត ផាងង៉ា និងក្រៈប៊ី បានស្នើទៅនាយករដ្ឋមន្ត្រីថៃ ដើម្បីពិនិត្យវិធានការរឹតបន្តឹងជំងឺកូវីដឡើងវិញសម្រាប់ភ្ញៀវទេសចរអន្តរជាតិ ។

សមាគមទេសចរណ៍មកពីខេត្តភូកេត ផាងង៉ា និងក្រៈប៊ី និងសមាគមសណ្ឋាគារចំនួន១០ បានចុះហត្ថលេខាលើលិខិតរួមគ្នាមួយទៅកាន់លោកនាយករដ្ឋមន្ត្រី ។ រដ្ឋមន្ត្រីក្រសួងសុខាភិបាល ទេសចរណ៍ និងអាជ្ញាធរទេសចរណ៍ថៃ បានបង្ហាញពីកង្វល់ការចាត់វិធានការរឹតបន្តឹងកូវីដនេះ ដោយរដ្ឋាភិបាលបានរឹតបន្តឹងត្រួតពិនិត្យភ្ញៀវទេសចរគ្រប់ជាតិសាសន៍ទាំងអស់ដូចៗគ្នា គឺមិនរឹតបន្តឹងតែភ្ញៀវចិនមួយទេ ។

ផ្នែកឯកជនបញ្ជាក់ថា ផ្នែកទេសចរណ៍ក្រៅប្រទេសជាច្រើនបានទាក់ទងមកកាន់ពួកគេ ដោយសារបារម្ភពីវិធានការនេះ ។ ពួកគេថា វានឹងប៉ះពាល់ដល់ផ្នែកទេសចរណ៍ បន្ថែមការលំបាកដល់អ្នកដំណើរ និងធ្វើឱ្យក្រុមភ្ញៀវទេសចរគោលដៅសំខាន់បច្ចុប្បន្នអាចសម្រេចចិត្តមិនធ្វើដំណើរមកថៃ ហើយទៅកម្សាន្តប្រទេសផ្សេងជំនួសវិញ ។ ផ្នែកឯកជនក្នុងខេត្តទេសចរណ៍ទាំង៣ថា បច្ចុប្បន្ន ប្រទេសសំខាន់ដែលមានភ្ញៀវទេសចរធ្វើដំណើរមកថៃមាន អឺរ៉ុប រុស្ស៊ី និងអូស្ត្រាលី ។

ផ្នែកឯកជនបានស្នើឱ្យរដ្ឋាភិបាលផ្លាស់ប្តូរគោលនយោបាយកំណត់ចាក់វ៉ាក់សាំង២ម្ជុលសម្រាប់តែអ្នកដំណើរពីប្រទេសដែលមានវិធានការបង្ខំធ្វើ RT-PCR មុនចូលប្រទេសប៉ុណ្ណោះ ចំណែកប្រទេសដែលគ្មានវិធានការពិនិត្យ RT-PCR មុនត្រឡប់ចូលប្រទេស សូមឱ្យថៃលើកលែងការពិនិត្យការចាក់វ៉ាក់សាំង២ម្ជុល ខណៈប្រទេសភាគច្រើនគ្មានវិធានការនេះ ព្រោះការរាតត្បាតរបស់កូវីដបានក្លាយជាជំងឺប្រចាំតំបន់ទៅហើយ ។

សមាគមទេសចរណ៍ខេត្តភូកេតបានប្រមូលមតិយល់ឃើញពីក្រុមហ៊ុនទេសចរណ៍បរទេស ដូចជា ក្រុមហ៊ុនទេសចរណ៍ប្រទេសអាល្លឺម៉ង់និយាយថា ជាការចេញវិធានការដែលមិនគួរចេញ ជាការបង្កើតបញ្ហា និងកាត់បន្ថយទំនុកចិត្តផ្នែកទេសចរណ៍ថៃយ៉ាងខ្លាំង ។ ដូចគ្នានេះ ខណៈមានព័ត៌មានរឿងការរឹតបន្តឹងចូលថៃនេះ អ្នកដំណើរជាច្រើនបានលុបចោលគម្រោងធ្វើដំណើរជាមួយក្រុមហ៊ុនទេសចរណ៍ ។

* អ្នកដំណើរចូលមកកាន់ប្រទេសថៃ ត្រូវធ្វើតាមលក្ខខណ្ឌចំនួន៧ ដូចជា ៖
១-អ្នកដំណើរមានអាយុលើសពី១៨ឆ្នាំ ត្រូវបង្ហាញឯកសារបានចាក់វ៉ាក់សាំងគ្រប់២ម្ជុល ឬលិខិតពីពេទ្យបញ្ជាក់ថា បានជាសះស្បើយពីកូវីដ-១៩ និងមិនលើសពី៦ខែ (១៨០ថ្ងៃ) ចំណែកអ្នកដំណើរដែលមិនបានទទួលវ៉ាក់សាំង ត្រូវមានលិខិតពីពេទ្យ និងបង្ហាញហេតុផល ។
២-អ្នកដំណើរមកពីប្រទេសដែលមានវិធានការការពារមិនឱ្យអ្នកឆ្លងកូវីដធ្វើដំណើរត្រឡប់ចូលប្រទេស ត្រូវមានធានារ៉ាប់រងសុខភាពសម្រាប់ព្យាបាលកូវីដជានិច្ចអំឡុងពេលធ្វើដំណើរក្នុងប្រទេសថៃ និងបន្ថែម៧ថ្ងៃទៀតសម្រាប់អ្នកមកបំពេញបេសកកម្ម និងត្រូវមានលិខិតធានាពីផ្នែកបេសកកម្ម ។
៣-អ្នកដំណើរកាន់លិខិតឆ្លងដែនថៃ គឺទទួលបានការលើកលែងក្នុងការពិនិត្យឯកសារចាក់វ៉ាក់សាំង និងឯកសារធានារ៉ាប់រងសុខភាព ។
៤-អ្នកដំណើរដែលប្តូរជើងយន្តហោះ គឺទទួលបានការលើកលែងលើការពិនិត្យឯកសារចាក់វ៉ាក់សាំង និងឯកសារធានារ៉ាប់រងសុខភាព ។ អ្នកដំណើរទាំងនេះត្រូវអនុវត្តតាមវិធានការដែលកំណត់ដោយប្រទេសថៃ ។
៥-ផ្នែកហោះហើរនានាត្រូវពិនិត្យឯកសារដែលបានរៀបរាប់ខាងលើ បើអ្នកដំណើរណាមិនអាចបង្ហាញឯកសារទាំងនេះ ខាងផ្នែកហោះហើរត្រូវបដិសេធមិនឱ្យពួកគេធ្វើដំណើរ ។
៦-ផ្នែកហោះហើរត្រូវប្រកាន់ភ្ជាប់នូវវិធានការពាក់ព័ន្ធ និងអនុវត្តតាមការណែនាំដែលសមស្រប ដូចជា តម្រូវឱ្យអ្នកដំណើរពាក់ម៉ាស់ជានិច្ចក្នុងពេលធ្វើដំណើរ លើកលែងតែពេលទទួលទានអាហារ ឬពេលមានហេតុការណ៍បន្ទាន់ ។
៧-អ្នកដំណើរដែលមានរោគសញ្ញាកូវីដ-១៩ ក្នុងពេលធ្វើដំណើរ នឹងត្រូវទទួលការណែនាំឱ្យពួកគេពិនិត្យការឆ្លងរោគពេលធ្វើដំណើរ ដល់គោលដៅ ។

លក្ខខណ្ឌទាំង៧ខាងលើនេះ អនុវត្តចាប់ពីថ្ងៃទី៩ ខែមករា ឆ្នាំ២០២៣ រហូតដល់ថ្ងៃទី៣១ ខែមករា ឆ្នាំ២០២៣ ៕ ប្រភព ៖ BBC NEWS

ប្រទេសចិន៖ អាជ្ញាធរចិនបានព្យាករថាចរាចរណ៍អ្នកដំណើរក្នុងអំឡុងពេលបុណ្យចូលឆ្នាំថ្មីឆ្នាំនេះអាចនឹងកើន ឡើងទ្វេដង បើធៀបនឹងឆ្នាំមុនៗ បន្ទាប់ពីប្រទេសចិនបានសម្រេចបើកប្រទេសនៅថ្ងៃទី ៨ ខែមករា ឆ្នាំ២០២៣ កន្លងទៅនេះ។

កាលពីពេលថ្មីៗកន្លងទៅនេះ លោក Xu Chengguang អនុរដ្ឋមន្ត្រីក្រសួងដឹកជញ្ជូនចិន បានបង្ហាញពី ការវិភាគទិន្នន័យបឋម ដោយគេរំពឹងថា ក្នុងឱកាសចូលឆ្នាំចិនឆ្នាំនេះ អាចមានអ្នកដំណើរសរុបធ្វើដំណើរតាមផ្លូវគោក សមុទ្រ និងផ្លូវអាកាសលើសពី ២.១ ពាន់លានដង ដែលកើនឡើងទ្វេដងធៀបនឹងរយៈពេលដូចគ្នាកាលពីឆ្នាំមុន ដែលមានចំនួនត្រឹមតែ ១.៥ ពាន់លាននៃការធ្វើដំណើរ ដែលស្មើរនឹងការកើនឡើង ៩៩.៥ ភាគរយធៀបនឹងរយៈពេលដូចគ្នាកាលពីឆ្នាំមុន។

ជាមួយគ្នានោះបើយោងតាមកាលវិភាគជើងហោះហើរប្រចាំថ្ងៃជាមធ្យមរបស់អ្នកដំណើរក្នុងអំឡុងពេលថ្ងៃឈប់សម្រាកចូលឆ្នាំចិនរយៈពេល ៤០ ថ្ងៃដែលដំណើរការចាប់ពីថ្ងៃទី ៧ ខែមករា ដល់ថ្ងៃទី ១៥ ខែកុម្ភៈ ឆ្នាំនេះគឺប្រហែល ១១,០០០ ជើងក្នុងមួយថ្ងៃ ដែលស្មើនឹង ៧៣ ភាគរយ។ ហើយបើយោងតាមសមាសភាពចរាចរណ៍បានឱ្យដឹងបន្ថែមថាអ្នកដំណើរឆ្នាំថ្មីនេះ ភាគរយនៃការធ្វើដំណើរគឺជាអ្នកដំណើរកម្សាន្តជាលក្ខណៈគ្រួសារ ២៤ ភាគរយ និងអ្នកដំណើរសម្រាប់ការងារ និងជាការធ្វើដំណើរអាជីវកម្ម ព្រមទាំងការសំរាកលំហែកាយគឺប្រហែល១០ ភាគរយ។

ទោះជាយ៉ាងណាក៏ដោយ អនុរដ្ឋមន្ត្រីដឹកជញ្ជូនរបស់ប្រទេសចិនបាននិយាយថា ការធ្វើដំណើរក្នុងពិធីបុណ្យចូលឆ្នាំថ្មីឆ្នាំនេះមានភាពមិនច្បាស់លាស់ មានភាពស្មុគស្មាញ និងពិបាកបំផុតក្នុងប៉ុន្មានឆ្នាំថ្មីៗនេះ ដោយសារតែលំហូរអ្នកដំណើរខ្ពស់បំផុត ខណៈពេលដែលប្រទេសកំពុងជួបជាមួយនឹងស្ថានភាពនៃការផ្ទុះឡើងនៃជំងឺកូវិដ ដែលបានឈានដល់កម្រិតកំពូលនៃការរីករាលដាលផងដែរ។

ទោះជាយ៉ាងណាក៏ដោយ បន្ទាប់ពីប្រទេសចិនបានដោះសោប្រទេស ជាលទ្ធផលប្រជាជនចិនចំនួន ១.៤ ពាន់លាននាក់បានឆ្លងមេរោគ កូវីដ-១៩ យ៉ាងឆាប់រហ័សជាលើកដំបូង រហូតមន្ទីរពេទ្យនានាចង្អៀតជាមួយអ្នកជំងឺ និងឱសថស្ថានក៏មានការខ្វះខាតថ្នាំផងដែរ។

ទន្ទឹម នឹងនេះសហគមន៍អន្តរជាតិភ័យមានការព្រួយបារម្ភពីស្ថានការណ៍ក្នុងប្រទេសចិន និងបានជំរុញឱ្យអាជ្ញាធរចិនបញ្ចេញព័ត៌មានអំពីស្ថានភាពជាក់ស្តែងនៃកូវីដ-១៩ នៅក្នុងប្រទេសឱ្យបានច្បាស់លាស់ និងតម្លាភាព៕ ប្រភព៖ pptvhd36