វិស័យកសិកម្ម រុក្ខាប្រមាញ់ និងនេសាទរបស់វៀតណាមបានមើលឃើញថា តម្លៃនៃការនាំចេញ នៅឆ្នាំ២០២២ កើនឡើង ៩.៣% ធៀបនឹងឆ្នាំ ២០២១ ពោលគឺដល់ទំហំ ៥៣.២២ ពាន់លានដុល្លារ ដែលឈានដល់កម្រិតកំពូលថ្មីមួយ។

ប្រភពបន្តថា អតិរេកពាណិជ្ជកម្មក្នុងវិស័យកសិកម្ម នៅវៀតណាម បានកើនឡើង ៣០% ពោលគឺដល់ ៨.៥ ពាន់លានដុល្លារ។ វិស័យជលផលបានដើរតួនាទីយ៉ាងសំខាន់ក្នុងកំណើននេះ ដោយតម្លៃនាំចេញកើនឡើង ២៣.៨% ដល់ ១១ ពាន់លានដុល្លារ ដែលជាកំណត់ត្រាថ្មីមួយ បើទោះបីជាមានបញ្ហាកូវីដ១៩ និងការប្រើប្រាស់យឺតជាងនៅទូទាំងពិភពលោកក៏ដោយ។

បង្ការ និងត្រីប្រា សុទ្ធតែត្រូវបានបង្ហាញពីកំណើននៃការនាំចេញ ក្នុងបង្គារ កើនឡើង ១៣ភាគរយ ខណៈដែលប្រភេទត្រីប្រា នៅវៀតណាម កើនឡើង ៧០ភាគរយ។ ក្នុងវិស័យកសិកម្មនេះដែរ ការនាំចេញកាហ្វេវៀតណាមបានឈានដល់ចំណុចសំខាន់ថ្មីមួយ ដែលមានទឹកប្រាក់ជិត ៤ ពាន់លានដុល្លារ ដោយគេដឹងថា សហគមន៍អឺរ៉ុបគឺជាអ្នកនាំចូលកាហ្វេវៀតណាមធំជាងគេ ហើយមានចំណែក ៣៩% នៃការនាំចេញសរុប ដោយសារកិច្ចព្រមព្រៀងពាណិជ្ជកម្មសេរីរវាងអឺរ៉ុបនិងវៀតណាម៕

ប្រភព៖ VN Express

ភ្នំពេញ៖ អាវុធហត្ថរាជធានីភ្នំពេញ បានឃាត់ខ្លួនមន្ត្រីយោធាពាក់ផ្កាយ២ម្នាក់ ពាក់ព័ន្ធប្រើប្រាស់ហិង្សា លើក្រុមគ្រួសារ កាលពីថ្ងៃទី៥ ខែមករា ឆ្នាំ២០២៣ ស្ថិតនៅផ្លូវ៣១៣ ក្នុងសង្កាត់បឹងកក់ទី១ ខណ្ឌទួលគោក រាជធនីភ្នំពេញ។

អាវុធហត្ថរាជធានីភ្នំពេញ បានឲ្យដឹងថា ជនរងគ្រោះ ដែលត្រូវបានបុរសជាមន្ត្រីយោធាពាក់ផ្កាយ២ ប្រើប្រាស់ហិង្សានោះមាន ប្រពន្ធ ប្អូនថ្លៃស្រី និងក្មួយស្រី។

ជនរងគ្រោះដោយអំពើហិង្សាពីសំណាក់មន្ត្រីយោធាបានរៀបរាប់គាត់តែងតែវាយរឿងអស់រយៈពេល៧ ទៅ៨ឆ្នាំហើយតែគាត់ជនរងគ្រោះចេះតែទ្រាំ មិនប្តឹងអីនោះទេ តែយប់កើតហេតុមន្ត្រីយោធា ដែលជាប្តីបាន រករឿងបគាត់ ប្អូនថ្លៃ និងក្មួយតាំងពីយប់រហូតទល់ភ្លឺទើបគាត់ទ្រាំមិនបាន និងមានការភ័យខ្លាច គាត់ប្តឹងទៅកម្លាំងកងរាជអាវុធហត្ថរាជធានីភ្នំពេញឱ្យមកជួយអន្តរាគមន៍ ភ្លាមកម្លាំងកងរាជអាវុធហត្ថបាន មកដល់ក៏នាំខ្លួនបុរសជាប្តីយកទៅសួរនាំ និងក្រោយមកបានមកឆែកយកកាំភ្លើងវែង២ដើម និបង់ជាច្រើនផងដែរ។

ជនដែលប្រើហិង្សាមានឈ្មោះ អឿង ប៉ុលភិវឌ្ឍន៍ ថាន្តរសក្តិ ជាឧត្តមសេនីយ៍ទោ មុខងារបច្ចុប្បន្នធ្វើការនៅ នាយកដ្ឋានសរុប ក្រសួងការពារជាតិ ត្រូវបានកម្លាំងកងរាជអាវុធហត្ថរៀបចំសំណុំរឿងបញ្ជូនមកតុលាការ ដើម្បីកាត់ទោសទៅតាមផ្លូវច្បាប់។

ចុងក្រោយជនរងគ្រោះសូមស្នើដល់កម្លាំងកងរាជអាវុធហត្ថ និងតុលាផ្តល់យុត្តិធម៌ដល់គាត់ផង៕

ភ្នំពេញ៖ លោក គួច ចំរើន អភិបាលខេត្តព្រះសីហនុ បានដាក់បណ្ដាសាលើជនចង្រៃដែលបានកាច់បំបាក់ ដើមក្ងោកអស់ជាច្រើនដើម ដែលដាំនៅតាមបណ្តោយឆ្នេរ និងកំពុងលូតលាស់យ៉ាងល្អ។

លោកអភិបាលខេត្តបានសរសេរបង្ហោះលើបណ្តាញសង្គមហ្វេសប៊ុកនៅយប់ថ្ងៃទី៨ ខែមករា ឆ្នាំ២០២៣ មានខ្លឹមសារថា “ដើមក្ងោកដែលដាំនៅតាម បណ្តោយឆ្នេរកំពុងលូតលាស់យ៉ាងល្អ តែត្រូវជនចង្រៃជាតិ កាច់បំបាក់ចោលអស់ជាច្រើនដើម ជននេះអោយជួបតែក្ដីវិនាសអន្តរាយ។មិនចង់ទេ តែទ្រាំមិនបាន»”។

សូមបញ្ជាក់ផងថា ករណីកាច់បំផ្លាញដើមឈើដែលរដ្ឋបាលខេត្តបានដាំលម្អរ នៅតាមផ្លូវក្នុង ក្រុងព្រះសីហនុនេះមិនមែនទើបតែកើតឡើងលើកទី១នោះទេ ដោយកន្លងមកក៏មានមនុស្សចង្រៃមួយ ក្តាប់តូច បានដើរដកដើមផ្កាអស់ជាច្រើនគុម្ព ដែលដាំលម្អរតាមសួនច្បារក៏ដូចជានៅតាមសួន ពុះទ្រូងផ្លូវផងដែរ បន្ថែមជាងនេះទៅទៀតក៏មានករណីចោរកម្មលួចកាត់ខ្សែរភ្លើងក្រោមដី តដាក់ភ្លើងបំភ្លឺ ផ្លូវពេលយប់ជាច្រើនលើកនៅតាមបណ្តោយផ្លូវនៅតំបន់ឆ្នេរសមុទ្រអូរត្រេះ និងផ្លូវជាច្រើនខ្សែរផ្សេងទៀត អស់ជាច្រើនរយម៉ែត្រ៕

ភ្នំពេញ៖​ ​គម្រោងសាងសង់ព្រះពុទ្ធប្បដិមាកម្ពស់១០៨ម៉ែត្រលើខ្នងភ្នំបូកគោ គឺដើម្បីរំលឹកគុណព្រះសម្មាសម្ពុទ្ធព្រះបរមគ្រូនៃយើង គឺជាស្នាដៃនៃការរចនាប្លង់ស្ថាបត្យកម្មរបស់កូនខ្មែរយើងនាសម័យតេជោ។ នេះបើយោងតាមការប្រាប់ឱ្យដឹងពីសំណាក់អ្នកឧកញ៉ាបណ្ឌិត សុខ គង់ ប្រធានក្រុមហ៊ុនសុខាអូតែល។

ទស្សនាទានព្រះពុទ្ធសាសនានៃទម្រង់ធរណីមាត្រ គឺចតុកោណការេតំណាងឲ្យធាតុទាំងបួននៃជីវិត(ទឹក ដី ភ្លើង ខ្យល់) និងរង្វង់ តំណាងឲ្យវាលវដ្តសង្ខារ (កើត ចាស់ ឈឺ ស្លាប់) និងដោយឈរលើមូលដ្ឋានរក្សាចាស់ បង្កើតថ្មី ទស្សនាទានស្ថាបត្យកម្មដែលជាធាតុដ៏សំខាន់នៃការរចនាប្លង់ស្ថាបត្យកម្មព្រះពុទ្ធប្បដិមាកម្ពស់១០៨ម៉ែត្រ(មង្គលទាំង១០៨របស់ព្រះអង្គ) គឺកើតចេញពីការសំយោគបញ្ចូលគ្នានូវរចនាប័ទ្មរបស់បុព្វបុរសខ្មែរជាច្រើនសម័យកាល ដែលក្នុងនោះរួមមាន ព្រះពុទ្ធប្បដិមា (រចនាប័ទ្មបាយ័ន និងសម័យកណ្តាល) បល្ល័ង្កផ្កាឈូក (រចនាប័ទ្មគូលែន) ខឿន ក្តារបែនឬរានហាល និងបង្កាន់ដៃនាគ (រចនាប័ទ្មអង្គរវត្ត) ថាសជណ្តើរគ្រប់ទិស (រចនាប័ទ្មកោះកេរ) និងរចនាប័ទ្មខ្មែរផ្សេងៗជាច្រើនទៀត រួមសំយោគបញ្ចូលគ្នាបង្កើតបានជារចនាប័ទ្មខ្មែរថ្មី ស.វ ទី២១ នាសម័យតេជានៃសុខសន្តិភាព និងការអភិវឌ្ឍ។

គម្រោងប្លង់ស្ថាបត្យកម្មព្រះពុទ្ធប្បដិមាដែលខ្ពស់ជាងគេនៅកម្ពុជា និងស្ថិតក្នុងចំណោមព្រះពុទ្ធប្បដិមាខ្ពស់ៗលើពិភពលោកនេះ ត្រូវបានសំរិតសំរាំងរចនាប្លង់ដោយស្ថាបត្យករកូនខ្មែរ និងមានការប្រជុំពិនិត្យវាយតម្លៃយ៉ាងម៉ត់ចត់បំផុតនៃកិច្ចប្រជុំអន្តរក្រសួងរួមមានក្រសួងបរិស្ថាន ក្រសួងធម្មការ និងសាសនា ក្រសួងរៀបចំដែនដី នគរូបនីយកម្ម និងសំណង់ ក្រសួងវប្បធម៌ និងវិចិត្រសិល្បះ ក្រសួងទេសចរណ៍ រដ្ឋបាលខេត្តកំពត អាជ្ញាធរពាក់ព័ន្ធជាច្រើនទៀត ព្រមទាំងការឯកភាពគ្រាំទ្រដោយគណៈសង្ឃនាយកនៃព្រះរាជាណាចក្រកម្ពុជា។

បច្ចុប្បន្ននេះ ក្រុមការងាររបស់លោកក្នុងនាមក្រុមហ៊ុន សុខាអូតែល បាននឹងកំពុងសិក្សាប្លង់មេដើម្បីរៀបចំគម្រោងព្រះពុទ្ធប្បដិមាដ៏ធំនេះ ឲ្យក្លាយជាមជ្ឈមណ្ឌលទេសចរណ៍វប្បធម៌ព្រះពុទ្ធសាសនាកម្រិតអន្តរជាតិ។
ព្រះពុទ្ធប្បដិមាដ៏ស្កឹមស្កៃនេះ នឹងបង្កើតជាសក្តានុពលទេសចរណ៍សាសនា ទាំងក្នុងកម្រិតជាតិ តំបន់ និងអន្តរជាតិ ហើយព្រះអង្គនឹងគង់ប្រថាប់ជាទីសក្ការៈដ៏ឧត្តុង្គឧត្តមបំផុត ជាសម្បត្តិវប្បធម៌សាសនារបស់ជាតិខ្មែរតរៀងទៅ ក្រោមការដឹកនាំដ៏ឈ្លាសវៃបំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕

ខេត្តតាកែវ​៖ ករណីបុរស​ជនជាតិចិនម្នាក់ បើកឡានល្មើសល្បឿនកំណត់ ហើយ​ត្រូវ​ប៉ូលិស​ចរាចរណ៍​ផាក​ពិន័យ និងមានការប្រតាយប្រតប់​គ្នា នាំឱ្យចិនរងរបួស​ ត្រូវបាន​ស្នងការដ្ឋាន​នគរបាល ខេត្តតាកែវ បានចេញសេចក្តីបំភ្លឺ។ ករណីនេះ ប៉ូលិសចរាចរណ៍ ១៤នាក់ ដែល​ដាក់​គោលដៅត្រួតពិនិត្យ​ការអនុវត្តច្បាប់ចរាចរណ៍ នៅផ្លូវជាតិលេខ៣ ត្រូវបាន​សាកសួរ និងបញ្ឈរ​ជើង​ផងដែរ​។

គួររំលឹកថាមានគណនីហ្វេសប៊ុក របស់ជនជាតិចិន បានផុសផ្សាយ កាលពីថ្ងៃទី៦ ខែមករា ឆ្នាំ២០២៣ មានខ្លឹមសារទាំងស្រុងថា «ជម្រាប​សួរ​នាយករដ្ឋមន្ត្រីៈ ខ្ញុំជាបុគ្គលិកនៃការិយាល័យកម្ពុជានៃរបាយការណ៍នីតិរដ្ឋចិន ខ្ញុំចង់​ផ្តល់យោបល់ជូនអ្នកនៅថ្ងៃទី០១ ខែមករា ឆ្នាំ២០២៣ ខ្ញុំបានធ្វើដំណើរតាមផ្លូវជាតិលេខ៣ ពីភ្នំពេញ ដល់គីឡូម៉ែត្រលេខ ៦៨ ខ្ញុំហួសល្បឿនកំណត់៣០% សង្ស័យវាស់ល្បឿនខុស មិនអាចបើកឡានធំបានលឿនពេក ប៉ូលិសចរាចរណ៍ឃើញខ្ញុំជាជនជាតិចិន ក៏ចង់ផាកពិន័យ១០០$ ខ្ញុំក៏យកហេតុផលមកដាក់ក្នុងហោប៉ៅផ្ទាល់ខ្លួន បណ្តាលឱ្យខាតបង់រដ្ឋាភិបាល និងប្រទេសជាតិ ខ្ញុំថតរូបប្រមូលភស្តុតាង ប្រមូលលុយមិនចេញវិក័យបត្រ ប៉ូលីស ០៥នាក់ មកឆក់ឧបករណ៍វីដេអូ និងទូរស័ព្ទដៃជាច្រើននាក់ វាយដំខ្ញុំរបួសជាច្រើនកន្លែង។ ប៉ូលិស​បានលុ​បរូបថតទាំងអស់របស់ខ្ញុំ ដែលប្រមូលភស្តុតាង និងប្រមូលលុយ នៅទីបំផុតខ្ញុំត្រូវបានគេឱ្យចាកចេញ​ដោយគ្មានវិក័យបត្រចំនួន ៥០$»។

សេចក្តីបំភ្លឺរបស់ស្នងការដ្ឋាន​នគរបាល ខេត្តតាកែវ បន្តថា «បន្ទាប់ពីទទួលបានព័ត៌មានខាងលើ លោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាល ខេត្តតាកែវ បាន​បញ្ជាឱ្យបង្កើតក្រុមការងារមួយ ធ្វើការស្រាវជ្រាវបន្ទាន់ ដើម្បីស្វែងរកការពិត និងបំភ្លឺជូនសាធារណៈជន ចំពោះករណីនេះដែរ តាមរបាយការណ៍បឋម គឺកើតឡើងកាលពីថ្ងៃទី០១ ខែមករា ឆ្នាំ២០២៣ ខណៈពេលកម្លាំងចរាចរណ៍​ផ្លូវគោកគោលដៅផ្លូវជាតិលេខ៣ ក្រុមទី២ ដឹកនាំដោយលោកវរសេនីយ៍ត្រី ជា ហាក់ ជាប្រធានក្រុម និងសមាជិកចំនួន ១៣នាក់ ចុះត្រួតពិនិត្យរឹតបន្តឹងការអនុវត្តច្បាប់​ស្ដីពី ចរាចរណ៍ផ្លូវគោក និងត្រួតពិនិត្យការបើកបរលើសល្បឿនកំណត់ នៅចន្លោះគីឡូម៉ែត្រ​លេខ៦៨-៦៩ ស្ថិតក្នុងភូមិចមពល ឃុំពពេល ស្រុកត្រាំកក់ ខេត្តតាកែវ។ ក្នុងពេលអនុវត្តកម្លាំង​ជំនាញបានពិនិត្យឃើញរថយន្តមួយគ្រឿងម៉ាកស្ដារិច ពណ៌ទឹកប្រាក់ ពាក់ផ្លាកលេខ ភ្នំពេញ 2AW-7701 ជិះម្នាក់ឯង បើកបរពីជើងទៅត្បូង ក្នុងល្បឿន ១០៦គីឡូម៉ែត ក្នុងមួយម៉ោង ខណៈដែលល្បឿនអតិប្បរមានៅទីតាំងបានកំណត់ត្រឹមតែ៨០គីឡូម៉ែត្រក្នុងមួយម៉ោងប៉ុណ្ណោះ(លើសល្បឿន២៦គីឡូម៉ែត្រក្នុងមួយម៉ោង)​។ ដោយត្រូវធ្វើការផាកពិន័យជាទឹកប្រាក់ចំនួន ១៥០,០០០៛ តាមអនុក្រឹត្យលេខ៣៩ អនក្រ.បក ត្រង់មាត្រាទី៧ ចំណុច ច បើកបរលើស​ល្បឿនកំណត់ ចាប់ពី២០ដល់២៩គីឡូម៉ែត្រក្នុងមួយម៉ោង»។

សេចក្តីបំភ្លឺរបស់ស្នងការដ្ឋាន​នគរបាល ខេត្តតាកែវ បន្ថែម​ថា «ខណៈពេលដែលកម្លាំងជំនាញ​កំពុងបង្ហាញឱ្យអ្នកបើកបរជាជនជាតិចិន (មិនចេះនិយាយខ្មែរ) បានឃើញស្រាប់តែ ជនជាតិចិនខាងលើ បានស្រែកឡូឡា បញ្ចេញអាកប្បកិរិយាមិនសមរម្យដាក់នគរបាល មានចរឹកច្រង៉េងច្រង៉ាង ក្នុងន័យប្រកែកមិនទទួលស្គាល់កំហុស បើទោះជាសមត្ថកិច្ច​បានបង្ហាញរូបភាពរថយន្ត ផ្លាកលេខរថយន្ត នៅក្នុងម៉ាស៊ីនចាប់ល្បឿនក៏ដោយ។ ដោយសារជនជាតិចិនមិនចេះខ្មែរ នគរបាលបានពន្យល់ណែនាំឱ្យហៅទូរស័ព្ទ(ខល)ទៅអ្នកបកប្រែ តែជនជាតិចិននោះមិនបានធ្វើតាមទេ ដោយយកទូរស័ព្ទមកថត​នគរបាលតែម្តង»។

សេចក្តីបំភ្លឺ បន្តថា «ទោះនគរបាល​បានណែនាំកុំឱ្យថតក៏ដោយ ទើបនគរបាលនៅគោលដៅ បានព្យាយាមឃាត់សកម្មភាព តែយ៉ាងណាក្តីជនជាតិចិននៅតែចចេស និងបានទាញទូរស័ព្ទពី​នគរបាលវិញ ព្រមទាំងទះតុ និងចង្អុលមុខនគរបាលនារី ដែលនៅអង្គុយតុ ចេញវិក័យបត្រ រហូតដល់នគរបាលជាបុរសមកអន្តរាគមន៍ ទើបមានការរុញច្រានគ្នាឱ្យចេញពីតុធ្វើការ​នៅគោលដៅ មិនមែនជាករណីប្រើអំពើហិង្សានោះទេ។ មួយសន្ទុះ​ក្រោយមក ដោយសារតែនិយាយគ្នាស្តាប់មិនបានផង មិនចង់ឱ្យមានបញ្ហាកាន់តែធំ នគរបាលគោលដៅ​ក៏បានអនុញ្ញាតឱ្យជនជាតិចិនបើករថយន្តចេញទៅ ដោយមិនបានទាមទារការ​ពិន័យទឹកប្រាក់១០០ដុល្លា និងមានការឱ្យប្រាក់៥០ដុល្លាដូចការលើកឡើងនោះទេ ទាំងដែលនគរបាលគ្រាន់តែបានបង្ហាញនូវចំនួនទឹកប្រាក់តាមវិក័យបត្រប៉ុណ្ណោះ»។

សេចក្តីបំភ្លឺ បន្ថែមថា «ទន្ទឹមនឹងនេះ មន្ត្រីនគរបាលគោលដៅ ដែលមានបញ្ហាជាជនជាតិ​ចិនខាងលើ បច្ចុប្បន្នការិយាល័យជំនាញ បានកំពុងធ្វើការសាកសួរបន្ថែម និងបញ្ឈរជើងជា​បណ្តោះ​អាសន្ន រងចាំលទ្ធផលនៃការស៊ើបអង្កេតជាក់លាក់ ដើម្បីមានមូលដ្ឋានរាយការណ៍​ជូនថ្នាក់ដឹកនាំ និង​មានវិធានការ ឬអនុវត្តវិន័យកងកម្លាំង ក្នុងករណីរកឃើញ​មានការ​អនុវត្តខុសគោល​ការណ៍ និងរង់ចាំជួបបំភ្លឺជានិច្ចពីសំណាក់ជនជាតិចិនខាងលើ ដើម្បីស្រាយបន្ទិលជូនសាធារណៈ និងជៀសវាងនូវការថ្នាំងថ្នាក់ពីប្រជាពលរដ្ឋ»៕ ​

ខ្ញុំបាទសូមគោរពរាយការណ៍ជូនឯកឧត្ដមរដ្ឋមន្ត្រី ព្រុំ សុខា ប្រធានក្រុមការងារគណបក្សចុះមូលដ្ឋានខេត្តក្រចេះ ជាទីគោរពដ៏ខ្ពង់ខ្ពស់!

ថ្ងៃអាទិត្យ ២ រោច ខែបុស្ស ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៨ ខែមករា ឆ្នាំ២០២៣ វេលាម៉ោង ២:០០នាទីរសៀលនៅសាលមហោស្រពខេត្តក្រចេះ ខ្ញុំបាទ អ៊ុយ ភារក្ស អនុប្រធានក្រុមការងារគណបក្សចុះមូលដ្ឋានក្រុងក្រចេះ តំណាងឯកឧត្ដម ឈឿន ប៊ុណ្ណារ័ត្ន សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងក្រចេះ និងឯកឧត្តម ហេង សុថា ប្រធានក្រុមការងារគណបក្សខេត្ត ចុះមូលដ្ឋានក្រុងក្រចេះ បានអញ្ជើញជាអធិបតីក្នុងពិធីមិទ្ទិញអបអរសាទរខួបលើកទី៤៤ នៃទិវាជ័យជម្នះ ៧មករា អមដំណើរដោយ៖
(១)-លោកជំទាវ ខាំ សុភាព អនុប្រធានក្រុមការងារគណបក្សថ្នាក់ខេត្តចុះជួយក្រុងក្រចេះ
(២)-លោក ញឹប វិចិត្រ ប្រធានក្រុមការងារគណបក្សខេត្តចុះមូលដ្ឋានសង្កាត់កោះទ្រង់
(៣)-លោក សេក ប៊ុនហេង ប្រធានគណបក្សក្រុង
ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី អនុប្រធាន ក្រុមការងារគណបក្សគ្រប់លំដាប់ថ្នាក់ចុះមូលដ្ឋានក្រុងក្រចេះ, គណៈកម្មាធិការគណបក្សក្រុង, គណៈកម្មាធិការគណបក្សសង្កាត់ទាំង ៥, ប្រធាន អនុប្រធាន គណៈកម្មាធិការសាខាបក្សភូមិ, ប្រធាន អនុប្រធាន សាខាចំណុះគណបក្សសង្កាត់ ដែលមានសមាសភាពចូលរួមសរុបចំនួន ៣៤៣នាក់ ។

ក្រោយពីបានអានសន្ទរកថាសម្តេចប្រធានគណបក្សប្រជាជនកម្ពុជា ដោយលោក សេក ប៊ុនហេង ប្រធានគណបក្សក្រុង និងចំណាប់អារម្មណ៍តំណាងអង្គមិទ្ធិញ រួចមក ខ្ញុំបាទបានមានចំណាប់អារម្មណ៍ និងមតិសំណេះសំណាលផ្តាំផ្ញើមួយចំនួន ដែលមានខ្លឹមសារសំខាន់ៗ ដូចខាងក្រោម៖

១- សូមសមាជិក សមាជិកា នៃអង្គមីទ្ទីង ត្រូវចងចាំជានិច្ច នូវស្មារតី ថ្ងៃ៧ មករា ១៩៧៩ គឺជាទិវាជ័យជំនះជាប្រវត្តិសាស្ត្ររបស់ប្រជាជនកម្ពុជាលេីរបបប្រល័យពូជសាសន៍ ប៉ុល ពត

២- មានថ្ងៃ ៧ មករា ឆ្នាំ១៩៧៩ ទេីបមានអ្វីៗគ្រប់យ៉ាងដូចថ្ងៃនេះ ៖ មានសន្តិភាព មានការអភិវឌ្ឍសេដ្ឋកិច្ច សង្គម មានឯករាជ្យ សេរីភាព ប្រជាធិបតេយ្យ

៣- ក្រោមការដឹកនាំរបស់គណបក្សប្រជាជនកម្ពុជា ពិសេសក្រោមការដឹកនាំរបស់ សម្តេចអគ្គមហាសេនាបតី តេជោ ហ៊ុន សែន បានដឹកនាំប្រទេសកម្ពុជាឆ្ពោះទៅរកសន្តិភាព ស្ថេរភាព និងរីកចំរេីនលេីគ្រប់វិស័យ ” អរគុណ សន្តិភាព អរគុណ នយោបាយឈ្នះ ឈ្នះ”

៤- ចូររួមគ្នាថែរក្សាស្មារតី ៧មករា អោយស្ថិតស្ថេរជាអមតៈ និងភ្លឺចែងចាំងជានិច្ច។

មុននឹងបញ្ចប់ខ្ញុំបាទបានប្រគល់កុំព្យូទ័រដល់គណប្សសង្កាត់ក្រចេះចំនួន ០១គ្រឿង និងគណបក្សសង្កាត់អូឬស្សីចំនួន ០១គ្រឿង សម្រាប់បម្រើការងារក្នុងគណបក្សសង្កាត់ សរុបថវិកាអស់ចំនួន ៩០០ដុល្លា។

សេចក្តីដូចបានគោរពជម្រាបជូនខាងលើ សូមឯកឧត្តមរដ្ឋមន្ត្រីមេត្តាជ្រាប!

ដោយសេចក្តីគោរពដ៏ខ្ពង់ខ្ពស់!

ពីខ្ញុំបាទ អ៊ុយ ភារក្ស