ចំណូលនៃការនាំចេញឈើរបស់វៀតណាម ត្រូវបានគេរំពឹងថា នឹងមានការកើនឡើងខ្លាំង ដោយគ្រាន់តែឈើបន្ទះមានការនាំចេញក្នុងទំហំ១ពាន់លានដុល្លារឯណោះ។

ជាក់ស្តែង នៅក្នុងត្រីមាសទី៤ នៃឆ្នាំ២០២២កន្លងទៅ ចំនួននៃការបញ្ជាទិញបានថយចុះជាខ្លាំង រហូតដល់ត្រីមាសទី១ឆ្នាំ២០២៣។ តែយ៉ាងណាវិញ អាជីកររំពឹងថា នៅត្រីមាសទី២ ឆ្នាំ២០២៣ ការបញ្ជាទិញពីក្រៅប្រទេស នឹងមានកំណើនខ្ពស់លើសការរំពឹងទុក្ខ។

បច្ចុប្បន្ន វៀតណាមគឺជាប្រទេសទី២ បន្ទាប់ពីសហរដ្ឋអាមេរិក ដែលជាប្រទេសនាំចេញឈើធំបំផុតនៅក្នុងពិភពលោក ហើយនៅឆ្នាំវៀតណាមរំពឹងថា ប្រាក់ចំណូលពីការនាំចេញឈើមិនក្រោម១ពាន់ដុល្លារនោះទេ៕

ប្រទេសវៀតណាម ៖ ជាច្រើនឆ្នាំកន្លងមកនេះ ក្រុមហ៊ុនលំដាប់ពិភពលោកជាច្រើនដូចជា Foxconn, Sharp, Samsung បានផ្លាស់ប្តូរទីតាំងផលិតរបស់ខ្លួនចេញពីប្រទេសចិន មកកាន់ប្រទេសគោលដៅថ្មីមួយទៀត គឺវៀតណាម ។ ហេតុអ្វីបានជាក្រុមហ៊ុនទាំងនេះផ្លាស់ប្តូរទីតាំងការផលិតរបស់ខ្លួន ?

កាលពី២-៣ឆ្នាំមុន ក្រុមហ៊ុនជាច្រើនបានចាប់ផ្តើមផ្លាស់ប្តូរទីតាំងការផលិតពីចិនមកកាន់វៀតណាម ហេតុផលសំខាន់ គឺដើម្បីចៀសវាងផលប៉ះពាល់ដូចជា សង្គ្រាមពាណិជ្ជកម្មរវាងអាមេរិក និងចិន ។ ក្រុមហ៊ុនទាំងនេះរួមមាន ៖
– Foxconn ទទួលការដំឡើងផលិតផលឱ្យ Apple បានផ្លាស់ប្តូរទីតាំងផលិត iPad និង MacBook មកកាន់វៀតណាម
– Sharp ក្រុមហ៊ុនផលិតឧបករណ៍អគ្គិសនី ក៏បានផ្លាស់ប្តូរការផលិតមកវៀតណាមដែរ
– Samsung ក្រុមហ៊ុនផលិតផលិតផលបច្ចេកវិទ្យា ដែលបច្ចុប្បន្នច្រើនជាង៥០%របស់ស្មាតហ្វូនទាំងអស់ មានទីតាំងការផលិតនៅវៀតណាម ។

វាឆ្លុះបញ្ចាំងឱ្យឃើញថា ការវិនិយោគដោយផ្ទាល់ពីបរទេស Foreign Direct Investment (FDI) ហូរចូលមកប្រទេសវៀតណាមបានរីកចម្រើនជាបន្តបន្ទាប់ ។ វៀតណាមមានគុណសម្បត្តិអ្វីខ្លះដែលគួរឱ្យចាប់អារម្មណ៍ ?

*វៀតណាមបានធ្វើកិច្ចព្រមព្រៀងពាណិជ្ជកម្មសេរីជាមួយប្រទេសជាច្រើន ៖
កិច្ចព្រមព្រៀងពាណិជ្ជកម្មសេរី គឺជួយកាត់បន្ថយឧបសគ្គផ្នែកពាណិជ្ជកម្មដូចជា រឿងពន្ធ បង្កើនឱកាសពង្រីកទីផ្សារដែលមានស្រាប់ និងបង្កើនឱកាសចូលទៅកាន់ទីផ្សារថ្មី ។ វាអាចនាំចេញផលិតផលបានកាន់តែច្រើន និងនាំចូលផលិតផលក្នុងតម្លៃថោក ជាពិសេស វត្ថុធាតុដើមសម្រាប់ការផលិត ។

បច្ចុប្បន្ន តំបន់ពាណិជ្ជកម្មសេរីដែលវៀតណាមចូលជាសមាជិកមាន តំបន់ពាណិជ្ជកម្មសេរីអាស៊ាន (AFTA), កិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូសេដ្ឋកិច្ចប៉ាស៊ីហ្វិក (CPTPP) និងកិច្ចព្រមព្រៀងភាពជាដៃគូយុទ្ធសាស្ត្រឆ្លងប៉ាស៊ីហ្វិក (TPP) ជាដើម ។

*ការមានប្រៀបផ្នែកកម្លាំងពលកម្ម ៖
ថ្លៃកម្លាំងពលកម្ម ជាកត្តាសំខាន់មួយដែលធ្វើឱ្យក្រុមហ៊ុនអន្តរជាតិជាច្រើនជ្រើសរើសផ្លាស់ទីតាំងផលិតពីចិនមកកាន់វៀតណាម ជាពិសេស ក្នុងវិស័យផលិតកម្មដែលមានកម្លាំងពលកម្មថោក ។ បច្ចុប្បន្ន ថ្លៃកម្លាំងពលកម្មនៅវៀតណាមស្មើប្រមាណ២០៥ដុល្លារអាមេរិកក្នុង១ខែ ខណៈចិនដែលធ្លាប់ជាប្រទេសមានប្រៀបរឿងថ្លៃកម្លាំងពលកម្មថោក បច្ចុប្បន្ន ស្មើប្រមាណ៤០០ដុល្លារអាមេរិកក្នុង១ខែ គឺថ្លៃជាងវៀតណាមដល់ទៅ២ដង ។

*ហេដ្ឋារចនាសម្ព័ន្ធអភិវឌ្ឍន៍ជាបន្តបន្ទាប់ ៖
បច្ចុប្បន្ន រដ្ឋាភិបាលវៀតណាមយកចិត្តទុកដាក់លើការអភិវឌ្ឍ និងកែលម្អហេដ្ឋារចនាសម្ព័ន្ធ ជាពិសេស ការដឹកជញ្ជូនផ្លូវគោក ផ្លូវទឹក និងផ្លូវអាកាស ។ កាលពីឆ្នាំ២០២១ វៀតណាមបានវិនិយោគលើហេដ្ឋារចនាសម្ព័ន្ធក្នុងទឹកប្រាក់ជាង១៤លានដុល្លារអាមេរិក ឬស្មើ៥%នៃ GDP ។ ចាប់ពីឆ្នាំ២០២១ ដល់ឆ្នាំ២០២៥ រដ្ឋាភិបាលវៀតណាមបានត្រៀមប្រាក់វិនិយោគហេដ្ឋារចនាសម្ព័ន្ធបន្ថែមទៀត ដើម្បីលើកកម្ពស់សមត្ថភាពប្រកួតប្រជែងក្នុងតំបន់ ។

*នយោបាយមានស្ថិរភាព ៖
វៀតណាមមានគណបក្សនយោបាយតែមួយ និងមានការប្តេជ្ញាចិត្តច្បាស់លាស់ក្នុងការអភិវឌ្ឍសេដ្ឋកិច្ចផងដែរ ។ ទោះបីជាវៀតណាមមានគណបក្សនយោបាយតែមួយ ប៉ុន្តែប្រទេសនេះមានប្រព័ន្ធសេដ្ឋកិច្ចសេរី ដែលជួយបង្កើតទំនុកចិត្តដល់វិនិយោគិនអន្តរជាតិចូលមកបណ្តាក់ទុន ៕ ប្រភព ៖ longtunman

បរទេស៖ របាយការណ៍ថ្មីមួយរបស់អង្គការសហប្រជាជាតិបានបញ្ជាក់យ៉ាងដូច្នេះថា ស្រទាប់អូហ្សូនដែលការពារផែនដីនឹងងើបឡើងវិញយឺតៗបន្តិចម្តងៗ ដល់កម្រិតដែលរន្ធអូហ្សូននៅពីលើអង់តាក់ទិកនឹងបិទទាំងស្រុងក្នុងរយៈពេលប្រហែល ៤៣ ឆ្នាំខាងមុខនេះ។

នាថ្ងៃទី ១៨ ខែមករា ឆ្នាំ២០២៣ មានសេចក្ដីរាយការណ៍មួយបានបង្ហាញ អំពីការវាយតម្លៃតាមបែបវិទ្យាសាស្ត្រនៃការថយចុះអូហ្សូន ដែលធ្វើឡើងរៀងរាល់បួនឆ្នាំម្តង បានរកឃើញថា មានការងើបឡើងវិញនៃស្រទាប់អូហ្សូនបន្តិចម្តងៗគួរឱ្យកត់សម្គល់។

ការងើបឡើងវិញនេះបានកើតឡើង បន្ទាប់ពីប្រទេសទាំងអស់ជុំវិញពិភពលោកបានយល់ព្រមបញ្ឈប់ការផលិតសារធាតុគីមីដែលបំផ្លាញស្រទាប់អូហ្សូនក្នុងបរិយាកាសជាង ៣៥ ឆ្នាំមុន។

ទោះជាយ៉ាងណារបាយការណ៍ដែលបានបង្ហាញនៅក្នុងកិច្ចប្រជុំនាពេលថ្មីៗនេះនៃសមាគមឧតុនិយមអាមេរិកនៅទីក្រុង Denver រដ្ឋ Colorado សហរដ្ឋអាមេរិក បានកត់សម្គាល់ឃើញថា ការងើបឡើងវិញនៃស្រទាប់អូហ្សូនគឺមានភាពយឺតយ៉ាវបន្តិច។

បន្ថែមពីនោះរបាយការណ៍ក៏បានបញ្ជាក់ថាស្រទាប់អូហ្សូនរបស់អង់តាក់ទិកដែលស្តើងខ្លាំង ហើយរន្ធ ដ៏ធំដែលបង្កើតជារៀងរាល់ឆ្នាំក្នុងបរិយាកាសនៅទីនោះ វានឹងមិនត្រូវបានស្ដារឡើងវិញពេញលេញទេរហូតដល់ឆ្នាំ ២០៦៦។

ជាមួយគ្នានោះគំរូអាកាសធាតុធម្មជាតិនៅអង់តាក់ទិកក៏ប៉ះពាល់ដល់កម្រិតរន្ធអូហ្សូនផងដែរ ជាពិសេសនៅរដូវស្លឹកឈើជ្រុះ ហើយប៉ុន្មានឆ្នាំចុងក្រោយនេះ រន្ធអូហ្សូនបានរីកធំបន្តិចដោយសារហេតុផលនេះ ប៉ុន្តែនិន្នាការទាំងមូលគឺថារន្ធអូហ្សូននេះកំពុងងើបឡើងវិញជាមួយនឹងសកម្មភាពយឺតៗ។

យ៉ាងណាមិញ Inger Andersen នាយកកម្មវិធីបរិស្ថានរបស់អង្គការសហប្រជាជាតិ បានប្រាប់អះអាងថា ការងើបឡើងវិញនេះវានិងជួយសង្គ្រោះជីវិតមនុស្សប្រហែលពីរលាននាក់ក្នុងមួយឆ្នាំៗពីជំងឺមហារីកស្បែក ការខូចខាត់ដំណាំ ​និង ផ្នែកអេកូឡូស៊ី ដ៏អស្ចារ្យបំផុតមួយសម្រាប់មនុស្សជាតិ៕ ប្រភព៖ Sanook

ប្រទេសអ៊ុយក្រែន ៖ នៅឆ្នាំ២០២២ សេដ្ឋកិច្ចប្រទេសអ៊ុយក្រែនបានធ្លាក់ចុះខ្លាំងក្នុងរយៈពេល៣០ឆ្នាំ ដោយសារការជម្លោះជាមួយប្រទេសរុស្ស៊ី ។ អ៊ុយក្រែនបានសុំជំនួយពីបរទេសដើម្បីការពារពលរដ្ឋរបស់ខ្លួន មិនឱ្យជួបហេតុការណ៍កាន់តែអាក្រក់ជាងនេះ ។

តាមទិន្នន័យសេដ្ឋកិច្ចដំបូងដែលបានចុះផ្សាយកាលពីពេលថ្មីៗនេះថា ផលិតផលក្នុងស្រុកសរុបរបស់ប្រទេស (GDP) កាលពីឆ្នាំ២០២២ បានថយចុះ៣០,៤% ។ អ្នកវិភាគសេដ្ឋកិច្ចនិយាយថា ហានិភ័យ និងភាពមិនប្រាកដប្រជាស្ថិតនៅលំដាប់ខ្ពស់ ជាពិសេស បើប្រទេសរុស្ស៊ីនៅតែវាយលុកហេដ្ឋារចនាសម្ព័ន្ធសំខាន់ៗរបស់អ៊ុយក្រែន ។

លោកស្រី Yulia Swiridenko រដ្ឋមន្ត្រីក្រសួងសេដ្ឋកិច្ចអ៊ុយក្រែនថ្លែងថា GDP បានធ្លាក់ចុះខ្លាំងបំផុតតាំងពីអ៊ុយក្រែនទទួលបានឯករាជ្យពីសហភាពសូវៀតនៅឆ្នាំ១៩៩១ ហើយលោកស្រីថា ការធ្លាក់ចុះនេះ គឺទាបជាងការរំពឹងទុកទៅទៀត ។

សង្គ្រាមរវាងប្រទេសរុស្ស៊ីនិងអ៊ុយក្រែន បណ្តាលឱ្យមនុស្សស្លាប់ច្រើន និងបង្កឱ្យមានការខូចខាតទ្រព្យសម្បត្តិយ៉ាងធ្ងន់ធ្ងរ ។ ពលរដ្ឋអ៊ុយក្រែនជាច្រើនលាននាក់ត្រូវរត់ចេញពីផ្ទះសម្បែង ការបង្កបង្កើនផលត្រូវបានផ្អាក ហើយការចូលទៅកាន់កំពង់ផែសមុទ្រខ្មៅមានកំណត់ ដែលវាមានសារសំខាន់ដល់ការនាំចេញគ្រាប់ធញ្ញជាតិ និងជំរុញថវិកាការពារជាតិកាន់តែខ្ពស់ ។

សេដ្ឋកិច្ចអ៊ុយក្រែនបានពឹងផ្អែកទាំងស្រុងលើការនាំចេញ ប៉ុន្តែការនាំចេញរបស់ប្រទេសនេះធ្លាក់ចុះខ្លាំងតាំងពីមានជម្លោះជាមួយកងទ័ពរុស្ស៊ី នៅថ្ងៃទី២៤ ខែកុម្ភៈ ឆ្នាំ២០២២ ។ ក្រសួងសេដ្ឋកិច្ចអ៊ុយក្រែនបានបញ្ជាក់ក្នុងសប្តាហ៍នេះថា ការនាំចេញបានធ្លាក់ចុះ៣៥% បើធៀបនឹងឆ្នាំ២០២១ ។

អ៊ុយក្រែនជាប្រទេសផលិត និងនាំចេញគ្រាប់ធញ្ញជាតិដ៏ធំក្នុងពិភពលោក ប៉ុន្តែការនាំចេញគ្រាប់ធញ្ញជាតិបានធ្លាក់ចុះយ៉ាងខ្លាំងដោយសារសង្គ្រាម ហើយកំពង់ផែសមុទ្រជាច្រើនត្រូវបានរុស្ស៊ីរារាំង ប៉ុន្តែក៏បានបើកឱ្យមានការនាំចេញម្តងទៀតនៅឆ្នាំ២០២២ ។

ការជួយសង្គ្រោះពីបរទេសនៅតែមានសារៈសំខាន់ខ្លាំងចំពោះស្ថិរភាពហិរញ្ញវត្ថុ និងសេដ្ឋកិច្ចរបស់អ៊ុយក្រែន ។ មន្ត្រីរដ្ឋាភិបាលថ្លែងថា អ៊ុយក្រែនបានទទួលប្រាក់ជំនួយ និងប្រាក់កម្ចីពីក្រៅប្រទេស ប្រមាណ៣១.០០០លានដុល្លារអាមេរិកក្នុងឆ្នាំ២០២២ ៕

ប្រភព ៖ TNN World

ប្រទេសចិន៖ មន្ទីរពេទ្យមួយចំនួនក្នុងប្រទេសចិន ត្រូវបានអាជ្ញាធរបញ្ជាហាមឱ្យក្រុមគ្រូពេទ្យកំណត់អត្តសញ្ញាណពីមូលហេតុនៃការស្លាប់របស់អ្នកជំងឺថាបណ្តាលមកពីកូវីដ-១៩នោះឡើយ បើទោះបីជាការស្លាប់បណ្ដាលមកពីកូវីដយ៉ាងណាក៏ដោយ។

នាថ្ងៃទី ១៨ ខែមករា ឆ្នាំ២០២៣ សារព័ត៌មានរ៉យទ័របានរាយការណ៍ឱ្យដឹងថា មន្ទីរពេទ្យមួយចំនួននៅក្នុងប្រទេសចិនបានបញ្ជាឱ្យគ្រូពេទ្យមិនត្រូវកំណត់អត្តសញ្ញាណមូលហេតុនៃការស្លាប់របស់អ្នកជំងឺថាបណ្តាលមកពីកូវីដ-១៩ឡើយ។

ទាក់ទងនឹងបញ្ហាខាងលើ គេបានរកឃើញថានៅផ្នែកសង្គ្រោះបន្ទាន់នៃមន្ទីរពេទ្យឯកជនជាច្រើន បានទទួលនូវ ក្នុងសេចក្តីជូនដំណឹង មានខ្លឹមសារថា៖ “សុំឱ្យគ្រូពេទ្យព្យាយាម កុំរាយបញ្ជីនៃមូលហេតុអំពីការស្លាប់របស់អ្នកជំងឺនៅលើសំបុត្រមរណៈថា ជាមូលហេតុនៃការស្លាប់ដែលបណ្តាលមកពីជំងឺផ្លូវ កូវីដ-១៩”។

លើសពីនេះសេចក្ដីប្រកាសបានបញ្ជាក់បន្ថែមយ៉ាងដូច្នេះថា ប្រសិនបើអ្នកជំងឺបានស្លាប់ដោយសារជំងឺកូវីដ ប៉ុន្តែអ្នកស្លាប់នោះ មានជំងឺផ្សេងក្នុងខ្លួន និងមានមុខសញ្ញានៃជំងឺដទៃ សុំឱ្យគ្រូពេទ្យសរសេររោគសញ្ញា ឬលក្ខខណ្ឌនោះជំនួសវិញ សម្រាប់ជាមូលហេតុចម្បងនៃការស្លាប់របស់ពួកគេ។

បើតាមសម្ដីរបស់ប្រធានផ្នែកវេជ្ជសាស្រ្តនៃមន្ទីរពេទ្យ និងក្រុមគ្រូពេទ្យជាច្រើនក្នុងប្រទេសចិនបានលើឡើងថា គ្រូពេទ្យទាំងអស់ត្រូវតែមានការប្រុងប្រយ័ត្នអំពីការនិយាយ ឬរាយការណ៍ថានរណាម្នាក់បានស្លាប់ដោយសារជំងឺកូវីដ-១៩។

ដោយឡែកបើតាមការលើកឡើងរបស់វេជ្ជបណ្ឌិតនៅមន្ទីរពេទ្យសាធារណៈក្នុងទីក្រុងសៀងហៃ ក៏បាននិយាយថា “នៅលើសំបុត្រមរណៈភាពភាគច្រើនរបស់អ្នកជំងឺ ជាធម្មតាពួកគេរាយបញ្ជីពីមូលហេតុចម្បងមួយនៃការស្លាប់ និងយកមូលហេតុតិចតួចមួយចំនួនរបស់អ្នកស្លាន ដើម្បីជំនួនពីការដាក់មូលហេតុពិតនៃការស្លាប់ដោយសារជំងឺកូវីដ-១៩ជំនួសវិញ។ ហើយពួកគេគ្មានជម្រើសអ្វីក្រៅពីធ្វើតាមបញ្ជារបស់មន្ទីរពេទ្យ ដែលបានមកពីរដ្ឋាភិបាលនោះឡើយ។

ទន្ទឹមនឹងនោះ សម្រាប់សាច់ញាតិអ្នកស្លាប់វិញបានអះអាងថា ពួកគេជឿថាសាច់ញាតិរបស់ពួកគេបានស្លាប់ដោយសារកូវីដ-១៩ ប៉ុន្តែមិនមានការលើកឡើងអំពីជំងឺជំងឺកូវីដក្នុងសំបុត្រមរណៈទេ ទោះបីជាសាច់ញាតិនោះត្រូវបានគេធ្វើរោគវិនិច្ឆ័យថាមានមេរោគកូវីដមុនពេលពួកគេទទួលមរណភាព ក៏ដោយ។

គួរថាបញ្ហានេះ បានកើតឡើងបន្ទាប់ពីប្រទេសចិនបានប្រកាសថាខ្លួនកំពុងបន្ធូរបន្ថយវិធានការណ៍ កូវីដ-១៩ និងបានបើកប្រទេស រួមទាំងបញ្ជាឱ្យផ្លាស់ប្តូរវិធីសាស្រ្តរាយការណ៍ចំនួនអ្នកឆ្លងកូវីដ-១៩ ចំណូលថ្មីពីមួយថ្ងៃទៅមួយខែ និងផ្លាស់ប្តូរវិធីសាស្រ្តរាប់ចំនួនអ្នកស្លាប់ មានតែអ្នកស្លាប់ដោយសារជំងឺរលាកសួតប៉ុណ្ណោះដែលត្រូវបានរាប់បញ្ចូល។

ខណៈលោក Jiao Yahui នៃគណៈកម្មាធិការសុខភាពជាតិនៃប្រទេសចិនបាននិយាយថា ក្នុងចំណោមអ្នកស្លាប់ជិត៦០,០០០ នាក់ក្នុងរយៈពេល៣ខែនេះ ដោយមានតិចជាង ១០ ភាគរយនៃអ្នកស្លាប់បានមកពីជំងឺ កូវីដ-១៩  និង អ្នកជំងឺមួយចំនួនទៀតស្លាប់ដោយសារកត្តារួមផ្សំជាមួយនឹងជំងឺចម្បងផ្សេងៗដទៃទៀត៕ ប្រភព៖ pptvhd36