ប្រទេសនូវែលសេឡង់ ៖ អ្នកស្រាវជ្រាវប្រទេសនូវែលសេឡង់បានពិភាក្សាគ្នាពីការកែតម្រូវកាត់បន្ថយពេលរៀនសូត្ររបស់សិស្ស ដើម្បីឱ្យពួកគេអាចសម្រាកបានច្រើន បន្ទាប់ពីការស្ទង់មតិមួយបង្ហាញថា ការបន្ថយពេលរៀនសូត្រធ្វើឱ្យមានផលល្អដល់សុខភាពនិងផ្នែកជាច្រើនទៀត រួមទាំងទទួលលទ្ធផលល្អក្នុងការសិក្សាផងដែរ ។

កាលពីថ្ងៃទី២០ ខែមករា កន្លងមក សារព័ត៌មានស៊ីនហួររាយការណ៍ថា ក្រុមអ្នកស្រាវជ្រាវនូវែលសេឡង់បានពិភាក្សាគ្នាពីភាពចាំបាច់ក្នុងការកាត់បន្ថយពេលសិក្សារៀនសូត្ររបស់សិស្ស ដើម្បីជួយដោះស្រាយបញ្ហាយុវវ័យ ។

ក្នុងអត្ថបទមួយរបស់វេជ្ជសាស្ត្រនូវែលសេឡង់បានឱ្យដឹងកាលពីថ្ងៃទី២០ ខែមករា ថា ការកាត់បន្ថយពេលរៀនសូត្រអាចជួយឱ្យយុវវ័យបានសម្រាកច្រើនឡើង ហើយវានឹងផ្តល់លទ្ធផលល្អដល់សុខភាព និងសុខុមាលភាពរបស់ពួកគេផងដែរ ។

អត្ថបទនេះសរសេរដោយអ្នកស្រាវជ្រាវមកពីសាកលវិទ្យាល័យ Otago សាកលវិទ្យាល័យ Massey និងស្ថាប័នការសិក្សាផ្សេងទៀត ដែលបញ្ជាក់ថា ក្មេងជំទង់ជាច្រើននៅប្រទេសនូវែលសេឡង់សម្រាកមិនគ្រប់គ្រាន់ ដោយសារការសិក្សាបង្ខំឱ្យពួកគេត្រូវក្រោកពីព្រលឹមពេក ។ បើយោងតាមជីវវិទ្យានៃការសម្រាកតាមធម្មជាតិ គឺជាធម្មតា ពេលចូលដល់វ័យជំទង់ ពេលវេលាសម្រាកនឹងយប់ជ្រៅបន្តិច មានន័យថា ពួកគេចាំបាច់ត្រូវភ្ញាក់ពីគេងយឺតជាងពេលមុន ហើយនឹងគ្មានការផ្លាស់ប្តូររហូតដល់អាយុប្រមាណ២១ឆ្នាំ ។

បើគេផ្លាស់ប្តូរពេលចូលរៀនឱ្យយឺតជាងមុន ដូចជា ចូលរៀនក្រោយម៉ោង៩និង៤៥នាទីព្រឹកសម្រាប់សិស្សអនុវិទ្យាល័យឡើងទៅ វានឹងទាក់ទាញចិត្តសិស្ស និងគ្មានផលអវិជ្ជមានសម្រាប់ការដោះស្រាយបញ្ហាសម្រាករបស់ពួកគេ ។

ក្រៅពីនេះ អត្ថបទនេះអធិប្បាយបន្ថែមថា ការសម្រាកបានគ្រប់គ្រាន់ គឺល្អសម្រាប់សុខភាពរបស់ក្មេងជំទង់ និងផ្នែកជាច្រើនទៀត ។ លើសពីនេះ ធ្វើឱ្យការរៀនសូត្រពួកគេទទួលបានលទ្ធផលល្អ ស្របគ្នានឹងការស្ទង់មតិទាំងក្នុងប្រទេស និងក្រៅប្រទេស ក៏បានយល់ឃើញដូចគ្នាដែរ ។

ទោះយ៉ាងណា អ្នកស្រាវជ្រាវឱ្យដឹងថា ការចូលរៀនយឺតជាងមុនរបស់សិស្សអនុវិទ្យាល័យ នឹងប៉ះពាល់ដល់មនុស្ស និងស្ថាប័នជាច្រើន ។ ដូច្នេះ ពួកគេចាំបាច់ត្រូវស្តាប់មតិយោបល់របស់អ្នកពាក់ព័ន្ធដោយផ្ទាល់ថា អ្វីអាចជួយបាន ឬឧបសគ្គដល់សាលារៀនក្នុងការពិចារណាផ្លាស់ប្តូរពេលចាប់ផ្តើមចូលរៀនឱ្យយឺតជាងមុន ៕

ប្រភព ៖ Topnews

រាជធានីអូស្លូ(Oslo)៖ ចាប់តាំងពីប្រធានាធិបតី លោក វ៉្លាឌីមៀរ ពូទីន បានបញ្ជាឲ្យកងទ័ពរុស្ស៊ី វាយប្រហារ ចូលលុកលុយ នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមកដល់ថ្ងៃទី២៣ ខែមករា គឺមានរយៈពេល៣៣៤ថ្ងៃមកហើយ ខណៈការវាយប្រយុទ្ធគ្នាកំពុងតែបន្ដ កាន់តែមានសភាពសាហាវឃោរឃៅខ្លាំងឡើង ហើយមេទ័ពកំពូលរបស់ន័រវ៉ែស បានអះអាង ថា ទាហានរុស្ស៊ី ប្រហែលជិត២សែននាក់ បានស្លាប់ និង រងរបួស។

សារព័ត៌មានសិង្ហបុរី Channel News Asia បានចេញផ្សាយ កាលពីព្រឹក ថ្ងៃចន្ទ ទី២៣ ខែមករា ថា មេទ័ពកំពូលរបស់ន័រវ៉ែស បានចេញផ្សាយនូវការប៉ាន់ប្រមាណរបស់ខ្លួន កាលពីថ្ងៃអាទិត្យ ថា រហូតមកដល់ពេលនេះ រុស្ស៊ី បានរងការខូចខាតដល់កម្លាំងទាហាន ទាំងស្លាប់ ឬ របួស នៅក្នុងសង្គ្រាម នៅអ៊ុយក្រែន ប្រហែល ១៨០ ០០០នាក់។ ចំណែកកងទ័ពអ៊ុយក្រែន ក៏បានរងគ្រោះថ្នាក់ ប្រហែល ១០០ ០០០នាក់ផងដែរ ខណៈជនស៊ីវិល ប្រហែល ៣០ ០០០នាក់ត្រូវសម្លាប់ នៅក្នុងសង្គ្រាមដ៏ឃោរឃៅនេះ។

លោកឧត្ដមសេនីយ៍ អេរីក គ្រីស្ដូហ្វហ័រសេន (Eirik Kristoffersen) ប្រមុខកងទ័ពន័រវ៉ែស បានបញ្ជាក់ នៅក្នុងបទសម្ភាសន៍មួយ ជាមួយនឹងទូរទស្សន៍ TV2 ដោយមិនបានបញ្ជាក់ អំពីរបៀបចំនួន ត្រូវបានគណនា ថា «ការខូចខាតរបស់រុស្ស៊ី មានស្លាប់ ឬ របួសដល់កងទ័ព ប្រហែល ១៨០ ០០០នាក់ ខណៈអ៊ុយក្រែន ក៏បានរងការខូចខាត ប្រហែល ១សែននាក់ ហើយជនស៊ីវិល ប្រហែល ៣០ ០០០ត្រូវបានសម្លាប់ នៅក្នុងសង្គ្រាមនេះ»។

ន័រវ៉ែស ជាប្រទេសអឺរ៉ុបខាងជើង មានព្រំដែនជាប់ជាមួយនឹងប្រទេសរុស្ស៊ី ហើយក្រុងអូស្លូ បានចូលជាសមាជិករបស់អង្គការណាតូ ចាប់តាំងពីអង្គការសម្ពន្ធមិត្តយោធាដ៏ខ្លាំងក្លារបស់ពិភពលោកមួយនេះ បានបង្កើនឡើង នៅក្នុងអំឡុងឆ្នាំ១៩៤៩មកម៉្លេះ។

លោក ម៉ាក មីលឡេ (Mark Milley) នាយអគ្គសេនាធិការចម្រុះ កងទ័ពសហរដ្ឋអាមេរិក ធ្លាប់បានលើកឡើង កាលពីខែវិច្ឆិកា ឆ្នាំ២០២២ ថា រុស្ស៊ី បានរងនូវការខូចខាតកម្លាំងទាហាន ទាំងស្លាប់ ឬ របួស ប្រហែលជាង ១សែននាក់ ខណៈអ៊ុយក្រែន មានរងគ្រោះថ្នាក់ ប្រហាក់ប្រហែលគ្នានេះដែរ។

ទោះជាយ៉ាងណា រដ្ឋាភិបាលក្រុងមូស្គូ និង ក្រុងកៀវ មិនបានផ្ដល់តួលេខ អំពីចំនួនការខូចខាតកម្លាំងទ័ពរបស់ពួកគេ នៅក្នុងរយៈពេលប៉ុន្មានខែមកនេះ គួរឲ្យទុកចិត្តនោះឡើយ។ ជាមួយគ្នានេះ ក៏មិនទាន់មានប្រភពឯករាជ្យណាមួយ បញ្ជាក់ អំពីចំនួនកងទ័ពទាំងសងខាង រងគ្រោះថ្នាក់ ឲ្យបានជាក់លាក់នោះដែរ។

ជាមួយគ្នានេះ លោកឧត្ដមសេនីយ៍ ប្រមុខកងទ័ពន័រវ៉ែស ក៏បានអំពាវនាវ ឲ្យបញ្ជូនរថក្រោះ ទៅកាន់អ៊ុយក្រែន ឲ្យបានឆាប់បំផុត ដែលរហូតមកដល់ពេលនេះ អាល្លឺម៉ង់ នៅតែគ្រប់គ្រងរថក្រោះធុនធ្ងន់ទំនើបៗច្រើនជាងគេ។ ឥឡូវនេះ អ៊ុយក្រែន កំពុងតែធ្វើសង្គ្រាម នៅក្នុងរដូវរងា ដូច្នេះពួកគេចាំបាច់ត្រូវការគ្រឿងចម្បាំងធុនធ្ងន់ឲ្យបានលឿនបំផុត។

ថ្វីបើមានការអំពាវនាវជាបន្ទាន់ ពីអ៊ុយក្រែន និង បណ្ដាប្រទេសអឺរ៉ុបយ៉ាងណាក្ដី ប៉ុន្ដែក្រុងប៊ែរឡាំង កាលពីថ្ងៃសុក្រ សប្ដាហ៍មុន នៅតែបដិសេធនូវការផ្គត់ផ្គង់រថក្រោះ Leopard 2
ទៅកាន់ក្រុងកៀវ ដដែល។ រថក្រោះធុនធ្ងន់ទាំងនេះ មានវត្ដមាន នៅក្នុងតំបន់អឺរ៉ុបជាច្រើនប្រទេស រួមមាន ន័រវ៉ែស ដាណឺម៉ាក ហ្វាំងឡង់ដ៍ ប៉ូឡូញ អាល្លឺម៉ង់…ជាដើម៕

ប្រទេសរុស្ស៊ី ៖ មិត្តជិតស្និទ្ធរបស់លោកប្រធានាធិបតីរុស្ស៊ី វ្ល៉ាឌីមៀ ពូទីន បានគំរាមសហរដ្ឋអាមេរិក និងណាតូ អំពីការបញ្ជូនអាវុធធុនធ្ងន់ទៅឱ្យប្រទេសអ៊ុយក្រែន នឹងធ្វើឱ្យពិភពលោកកើតសង្គ្រាម និងធ្លាក់ចូលក្តីវិនាស ។

សារព័ត៌មានរយទ័ររាយការណ៍ថា លោក វាយ៉ាជេស្លេវ វ៉ូឡូឌីន (Vyacheslav Volodin) ប្រធានរដ្ឋឌូម៉ានៃសហព័ន្ធរុស្ស៊ី និងជាមិត្តជិតស្និទ្ធជាមួយលោកប្រធានាធិបតី វ្ល៉ាឌីមៀ ពូទីន បាននិយាយគំរាមទៅកាន់សហរដ្ឋអាមេរិក និងប្រទេសជាសមាជិកអង្គការសន្ធិសញ្ញាអាត្លង់ទិកខាងជើង (ណាតូ) តាមតេឡេក្រាមថា ការសម្រេចចិត្តបញ្ជូនអាវុធធុនធ្ងន់ទៅឱ្យអ៊ុយក្រែនប្រើប្រាស់ដើម្បីគំរាមកំហែងទឹកដីរុស្ស៊ី នឹងធ្វើឱ្យពិភពលោកធ្លាក់ចូលក្នុងក្តីវិនាស ។

លោក វ៉ូឡូឌីន និយាយថា ៖ «បើក្រុងវ៉ាស៊ីនតោន និងណាតូ ស្វែងរកអាវុធដើម្បីមកវាយប្រហារជនស៊ីវិល និងព្យាយាមរឹបអូសទឹកដីយើងតាមពាក្យគំរាមរបស់គេ យើងនឹងតបតដោយប្រើអាវុធមានឥទ្ធិលខ្លាំងជាងវាយប្រហារវិញ» ។

លោក វ៉ូឡូឌីន បានលើកឡើងបែបនេះកាលពីសប្តាហ៍មុន ក្រោយពីប្រទេសលោកខាងលិចសន្យាថា នឹងបញ្ជូនអាវុធក្នុងតម្លៃជាច្រើនលានដុល្លារអាមេរិក មកជួយអ៊ុយក្រែនដើម្បីការពារអធិបតេយ្យនិងដែនដីរបស់ខ្លួន បន្ទាប់ពីត្រូវរុស្ស៊ីឈ្លានពានអស់រយៈពេលជិត១ឆ្នាំ ។

ទោះយ៉ាងណា បើទោះជាសមាជិករបស់ណាតូនឹងជួយអ៊ុយក្រែនបន្ថែមទៀត ប៉ុន្តែបច្ចុប្បន្ននេះ នៅមានបញ្ហាដោយសារប្រទេសអាល្លឺម៉ង់នៅមិនទាន់សម្រេចចិត្តផ្តល់រថក្រោះទៅឱ្យអ៊ុយក្រែនទេ ខណៈអាល្លឺម៉ង់ត្រូវបានគេស្នើសុំឱ្យបញ្ជូនរថក្រោះខ្លារខិន (Leopard 2) ទៅឱ្យអ៊ុយក្រែនសម្រាប់ទប់ទល់ក្នុងសង្គ្រាមជាមួយរុស្ស៊ី ។

កាលពីសប្តាហ៍មុន លោក ឌីមីទ្រី មេដវេដេវ អតីតប្រធានាធិបតីរុស្ស៊ី ដែលបច្ចុប្បន្នកាន់តំណែងជាអនុប្រធានក្រុមប្រឹក្សាសន្តិសុខជាតិរុស្ស៊ី និងជាបុគ្គលសំខាន់ម្នាក់ទៀតរបស់លោកប្រធានាធិបតី ពូទីន ក៏បានចេញមកគំរាមណាតូដែរថា ការចាញ់សង្គ្រាមរបស់រុស្ស៊ីនៅអ៊ុយក្រែន នឹងធ្វើឱ្យពិភពលោកកើតសង្គ្រាមនុយក្លេអ៊ែរ ។

ពាក្យគំរាមរបស់លោក វ៉ូឡូឌីន និងលោក មេដវេដេវ ក៏ស្របគ្នានឹងអ្វីដែលមេដឹកនាំប្រទេសរុស្ស៊ីធ្លាប់បានប្រកាសកាលពីពេលមុននេះថា រុស្ស៊ីនឹងប្រើប្រាស់អាវុធនុយក្លេអ៊ែររបស់ខ្លួនក្នុងករណីចាំបាច់ ដើម្បីការពារបូរណភាពទឹកដីប្រទេសរុស្ស៊ី ៕

ប្រភព ៖ Workpointtoday

បរទេស៖ នូវែលសេឡង់ជ្រើសរើសលោក Chris Hipkins(គ្រីស ហីបខិន) ជានាយករដ្ឋមន្ត្រីថ្មីជំនួសលោកស្រី Jacinda Ardern(ចាសិនដា អាឌើន) កាលពីថ្ងៃអាទិត្យម្សិលមិញនេះ ក្រោមការបោះឆ្នោតជ្រើសរើសរបស់រដ្ឋសភា ដោយលោក Chris Hipkins(គ្រីស ហីបខិន) ជានាយករដ្ឋមន្ត្រីថ្មីជំនួស ហើយក៏ជានាយករដ្ឋមន្ត្រីទី៤១របស់ប្រទេសនេះផងដែរ។

កាលពីថ្ងៃទី ២២ ខែមករា ឆ្នាំ២០២៣ កន្លងទៅនេះមានសេចក្ដីរាយការណ៍ពីប្រទេសនូវែលសេឡង់ ដែលបានបង្ហាញថា សមាជិកសភាការងារចំនួន ៦៤ធ្វើការបោះឆ្នោតជ្រើសរើសតែងតាំងលោក Chris Hipkins (គ្រីស ហីបខិន) អាយុ ៤៤ ឆ្នាំគឺជាបេក្ខភាពតែមួយគត់សម្រាប់តំណែងជាផ្លូវការនៃមេដឹកនាំថ្មីរបស់ប្រទេសនូវែលសេឡង់ និងជានាយករដ្ឋមន្ត្រីទី ៤១ របស់ប្រទេសមួយនេះ។

ការតែងតាំងលោក Chris Hipkins(គ្រីស ហីបខិន) ឱ្យកាន់តំណែងជានាយករដ្ឋមន្ត្រីបានធ្វើឡើងបន្ទាប់ពីការលាលែងពីតំណែងភ្លាមៗរបស់លោកស្រី Jacinda Ardern(ចាសិនដា អាឌើន) កាលពីថ្ងៃព្រហស្បតិ៍ ទី ១៩ ខែមករា ឆ្នាំ២០២៣ ក្រោមហេតុផលលើកឡើងថាលោកស្រីមិនបានត្រៀមខ្លួនជាស្រេចដើម្បីគ្រប់គ្រងប្រទេស និងភាពជាអ្នក ដឹកនាំ។

ការប្រកាសនេះបានធ្វើឡើងនៅក្នុងសន្និសីទសារព័ត៌មានមួយបន្ទាប់ពីគណបក្សការងារកំពុងកាន់អំណាច បានបញ្ជាក់យ៉ាងច្បាស់ថាលោក Chris Hipkins(គ្រីស ហីបខិន) ជាអ្នកស្នងតំណែងថ្មីដែលអាចឱ្យប្រជាជនមានទំនុកចិត្ត  ហើយក្នុងនោះក៏បានតែងតាំងលោកស្រី Carmel Sepuloni(ខារ៉ាម៉ែល ស៊ីបប៉ូលូនី) ជាឧបនាយករដ្ឋមន្ត្រីថ្មីដូចគ្នា។

គួររំលឹកថាលោក Hipkins(ហីបខិន) ត្រូវបានជ្រើសរើសជាសមាជិកសភាជាលើកដំបូងក្នុងឆ្នាំ ២០០៨ ហើយបានក្លាយជាបុគ្គលដ៏មានឥទ្ធិពលសម្រាប់ប្រជាជននូវែលសេឡង់ដែលជាជួរមុខរបស់រដ្ឋាភិបាលក្នុងការឆ្លើយតបនឹងជំងឺរាតត្បាតកូវីត ១៩កន្លងទៅ មិនតែប៉ុណ្ណោះលោកត្រូវបានតែងតាំងជារដ្ឋមន្ត្រីក្រសួងសុខាភិបាលនៅ ខែកក្កដា ឆ្នាំ ២០២០ មុនពេលចូលកាន់តំណែងជារដ្ឋមន្ត្រីការពារជំងឺកូវីដ-១៩នៅចុងឆ្នាំដដែលនេះ។

លើសពីនោះលោក Hipkins(ហីបខិន) ដែលត្រូវបានគេកោតសរសើរចំពោះសមត្ថភាពរបស់គាត់ក្នុងការទប់ទល់នឹង កូវីដ-១៩យ៉ាងមានប្រសិទ្ធភាព  និងជាអ្នកដោះស្រាយបញ្ហាសម្រាប់លោកស្រី Ardern(អាឌើន) កន្លងមក ខណៈពេលដែលរដ្ឋមន្ត្រីផ្សេងទៀតមិនអាចធ្វើបាន៕ ប្រភព៖ Thairath

អន្តរជាតិ៖ អតីតនាយករដ្ឋមន្ត្រីអង់គ្លេស Boris Johnson
បានធ្វើដំណើរទៅទីក្រុងគៀវ (kyiv) ដោយមិននឹកស្មានដល់ ដើម្បីជួបជាមួយប្រធានាធិបតី Volodymyr Zelensky ហើយអំពាវនាវរកឧបករណ៍ចាំបាច់ទាំងអស់សម្រាប់អ៊ុយក្រែនក្នុងយកឈ្នះសង្រ្គាមលើរុស្ស៊ី។ នេះបើយោងតាមការចុះផ្សាយរបស់សារព័ត៌មាន VN express។

លោក Johnson បានបង្ហាញខ្លួននៅថ្ងៃនេះនៅ Borodyanka និង Bucha ជាយក្រុងពីរភាគខាងជើងនៃរដ្ឋធានីគៀវ ។ វីដេអូ ដែល បាន បង្ហោះ លើ បណ្តាញ សង្គម បាន បង្ហាញ ថា លោក Johnson បាន ទៅ លេង ព្រះវិហារ នៅ Bucha ហើយ ត្រូវ បាន អម ដោយ មន្ត្រី ប៉ូលិស ម្នាក់។

បន្ទាប់មក លោក Johnson បានជួបជាមួយប្រធានាធិបតីអ៊ុយក្រែនលោក Zelensky និងរដ្ឋមន្ត្រីមួយចំនួននៅវិមានប្រធានាធិបតីនៅកណ្តាលទីក្រុងគៀវ។

នៅក្នុងវីដេអូដែលចេញផ្សាយដោយការិយាល័យរបស់លោក Zelenksy លោក Johnson បានប្រាប់ប្រធានាធិបតីអ៊ុយក្រែនថា ការបំផ្លិចបំផ្លាញដែលគាត់បានឃើញគឺ “គួរឱ្យរន្ធត់” ។ លោក Johnson បាននិយាយថា “វានៅតែកើតឡើងជារៀងរាល់ថ្ងៃ។ ខ្ញុំនឹងធ្វើអ្វីដែលខ្ញុំអាចធ្វើបាន” ។

ក្នុងអំឡុងការប្រជុំសំណេះសំណាលគ្នាមក លោក Zelensky បានថ្លែងអំណរគុណចំពោះលោក Johnson សម្រាប់ការគាំទ្ររបស់ចក្រភពអង់គ្លេស ខណៈដែលលោក Johnson បាននិយាយថាលោកចង់ចែករំលែក “គំនិតមួយចំនួន” ។

“វាជាកិត្តិយសណាស់ក្នុងដំណើរទស្សនកិច្ច អ៊ុយក្រែន តាមការអញ្ជើញរបស់ប្រធានាធិបតី Zelensky ។ ការឈឺចាប់របស់ប្រជាជនអ៊ុយក្រែនបានអូសបន្លាយយូរពេក។ មធ្យោបាយតែមួយគត់ដើម្បីបញ្ចប់សង្រ្គាមនេះគឺដើម្បីអោយអ៊ុយក្រែនឈ្នះ និងឈ្នះវាឱ្យបានលឿនតាមដែលអាចធ្វើទៅបាន” និងផ្តល់ឱ្យអ៊ុយក្រែននូវឧបករណ៍ទាំងអស់ដែលពួកគេត្រូវការដើម្បីបំពេញការងារ។ ខណៈរុស្ស៊ីកាន់តែឆាប់បរាជ័យនោះគឺវាកាន់តែប្រសើរសម្រាប់អ៊ុយក្រែន និងពិភពលោកទាំងមូល”។

ប្រភព ក្នុង ទីក្រុង គៀវ និយាយ ថា ដំណើរ ទស្សនកិច្ច នេះ មិន ត្រូវ បាន ប្រកាស ឬ រៀបចំ តាម រយៈ ស្ថានទូត អង់គ្លេស ទេ។ លោក Johnson ត្រូវបានគេរំពឹងថានឹងចាកចេញពីអ៊ុយក្រែននៅពេលក្រោយនៅថ្ងៃនេះ។ ប្រភព មួយ ក្នុង ប្រទេស អ៊ុយក្រែន បាន ហៅ ដំណើរ ទស្សនកិច្ច នេះ ថា មិន ផ្លូវការ ឬ ឯកជន។

គួររំលឹកដែរថា លោក Zelensky និងលោក Johnson បានជួបគ្នាចំនួនបីដងមកហើយ មិនត្រឹមតែប៉ុននោះថែមទាំងបាននិយាយគ្នាជាញឹកញាប់តាមទូរស័ព្ទចាប់តាំងពីការផ្ទុះឡើងនៃអរិភាពនៅចុងខែកុម្ភៈ ឆ្នាំ២០២២ ក្នុងអំឡុងពេលលោក Johnson កាន់តំណែង ៕